Chapter 15

[English text for this chapter is available]

nandīśvara uvāca |
viśvānarassapatnīkastacchrutvā nāraderitam |
tadevammanyamānobhūdvajrapātaṃ sudāruṇam || 1 ||
[Analyze grammar]

hā hatosmīti vacasā hṛdayaṃ samatāḍayat |
mūrcchāmavāpa mahatīṃ putraśokasamākulaḥ || 2 ||
[Analyze grammar]

śuciṣmatyapi duḥkhārttā rurodātīva dussaham |
atisvareṇa hārāvairatyantaṃ vyākulendriyā || 3 ||
[Analyze grammar]

śrutvārttanādamiti viśvanaropi mohaṃ hitvotthitaḥ kimiti kiṃtviti kiṃ kimetat |
uccairvadan gṛhapatiḥ kva sa me bahisthaḥ prāṇontarātmanilayassakaleṃdriyeśaḥ || 4 ||
[Analyze grammar]

tato dṛṣṭvā sa pitarau bahuśokasamāvṛtau |
smitvovāca gṛhapassabālaśśaṃkarāṃśajaḥ || 5 ||
[Analyze grammar]

gṛhapatiruvāca |
he mātastāta kiṃ jātaṃ kāraṇantadvadādhunā |
kimarthaṃ rudito'tyarthaṃ trāsastādṛkkuto hi vām || 6 ||
[Analyze grammar]

na māṃ kṛtavapustrāṇambhavaccaraṇareṇubhiḥ |
kālaḥ kalayituṃ śakto varākīṃ ciñcalālpikā || 7 ||
[Analyze grammar]

pratijñāṃ śṛṇutāntātau yadi vāntanayo hyaham |
kariṣyehaṃ tathā yena mṛtyustrasto bhaviṣyati || 8 ||
[Analyze grammar]

mṛtyuṃjayaṃ samārādhya garvajñaṃ sarvadaṃ satām |
japiṣyāmi mahākālaṃ satyaṃ tātau vadāmyaham || 9 ||
[Analyze grammar]

nandīśvara uvāca |
iti śrutvā vacastasya jāritau dvijadampatī |
akālamṛtavarṣaughairgatatāpau tadocatuḥ || 10 ||
[Analyze grammar]

dvijadampatī ūcatuḥ |
punarbrūhi punarbrūhi kīdṛkkīdṛk punarvada |
kālaḥ kalayitunnālaṃ varākī cañcalāsti kā || 11 ||
[Analyze grammar]

āvayostāpanāśāya mahopāyastvayeritaḥ |
mṛtyuṃjayākhyadevasya samārādhanalakṣaṇaḥ || 12 ||
[Analyze grammar]

tadvacca śaraṇaṃ śambhornātaḥ parataraṃ hi tat |
manorathapathātīta kāriṇaḥ pāpahāriṇaḥ || 13 ||
[Analyze grammar]

kinna śrutantvayā tāta śvetaketuṃ yathā purā |
pāśitaṃ kālapāśena rarakṣa tripurāntakaḥ || 14 ||
[Analyze grammar]

śilādatanayaṃ mṛtyugrastamaṣṭābdamātrakam |
śivo nijajanañcakre nandinaṃ viśvanaṃdinam || 15 ||
[Analyze grammar]

kṣīrodamathanodbhūtaṃ pralayānalasannibham |
pītvā halāhalaṃ ghoramarakṣadbhuvanatrayam || 16 ||
[Analyze grammar]

jalaṃdharaṃ mahādarpaṃ hṛtatrailokyasampadam |
rucirāṃguṣṭharekhottha cakreṇa nijaghāna yaḥ || 17 ||
[Analyze grammar]

ya ekeṣu nipātotthajvalanaistripurampurā |
trailokyaiśvaryasammūḍhaṃ śoṣayāmāsa bhānunā || 18 ||
[Analyze grammar]

kāmaṃ dṛṣṭinipātena trailokyavijayorjitam |
nināyānaṃgapadavīṃ vīkṣyamāṇeṣvajādiṣu || 19 ||
[Analyze grammar]

tambrahmādyaikakartārammeghavāhanamacyutam |
prayāhi putra śaraṇaṃ viśvarakṣāmaṇiṃ śivam || 20 ||
[Analyze grammar]

nandīśvara uvāca |
pitroranujñāmprāpyeti praṇamya caraṇau tayoḥ |
prādakṣiṇyamupāvṛtya bahvāśvāsya viniryayau || 21 ||
[Analyze grammar]

samprāpya kāśīṃ duṣprāpāmbrahmanārāyaṇādibhiḥ |
mahāsaṃvarttasantāpahantrīṃ viśveśapālitām || 22 ||
[Analyze grammar]

svardhunyā hārayaṣṭyeva rājitā kaṇṭhabhūmiṣu |
vicitraguṇaśālinyā harapatnyā virājitām || 23 ||
[Analyze grammar]

tatra prāpya sa vipreśaḥ prāgyayau maṇikarṇikām |
tatra snātvā vidhānena dṛṣṭvā viśveśvaramprabhum || 24 ||
[Analyze grammar]

sāñjalirnataśīrṣo'sau mahānandānvitassudhīḥ |
trailokyaprāṇasantrāṇakāriṇampraṇanāma ha || 25 ||
[Analyze grammar]

ālokyālokya talliṃgaṃ tutoṣa hṛdaye muhuḥ |
paramānaṃdakaṃdāḍhyaṃ sphuṭametanna saṃśayaḥ || 26 ||
[Analyze grammar]

aho na matto dhanyosti trailokye sacarācare |
yadadrākṣiṣamadyāhaṃ śrīmadviśveśvaraṃ vibhum || 27 ||
[Analyze grammar]

mama bhāgyodayāyaiva nāradena maharṣiṇā |
purāgatya tathoktaṃ yatkṛtakṛtyosmyahantataḥ || 28 ||
[Analyze grammar]

nandīśvara uvāca |
ityānandāmṛtarasairvidhāya sa hi pāraṇam |
tataśśubhehni saṃsthāpya liṃgaṃ sarvvahitapradam || 29 ||
[Analyze grammar]

jagrāha niyamānghorān duṣkarānakṛtātmabhiḥ |
aṣṭottaraśataiḥ kumbhaiḥ pūrṇairgaṃgāmbhasā śubhaiḥ || 30 ||
[Analyze grammar]

saṃsnāpya vāsasā pūtaḥ pūtātmā pratyahaṃ śivam |
nīlotpalamayīmmālāṃ samarpayati so'nvaham || 31 ||
[Analyze grammar]

aṣṭādhikasahasraistu sumanobhirvinirmitām |
sa pakṣe vātha vā māse kandamūlaphalāśanaḥ || 32 ||
[Analyze grammar]

śīrṇaparṇāśanairdhīraḥ ṣaṇmāsaṃ sambabhūva saḥ |
ṣaṇmāsaṃ vāyubhakṣo'bhūtṣaṇmāsaṃ jala bindubhuk || 33 ||
[Analyze grammar]

evaṃ varṣavayastasya vyatikrāntaṃ mahātmanaḥ |
śivaikamanaso viprāstapyamānasya nārada || 34 ||
[Analyze grammar]

janmato dvādaśe varṣe tadvaco nāraderitam |
satyaṃ kariṣyanniva tamabhyagātkuliśāyudhaḥ || 35 ||
[Analyze grammar]

uvāca ca varaṃ brūhi dadmi tvanmanasi sthitam |
ahaṃ śatakraturvipra prasannosmi śubhavrataiḥ || 36 ||
[Analyze grammar]

nandīśvara uvāca |
ityākarṇya mahendrasya vākyammunikumārakaḥ |
uvāca madhurandhīraḥ kīrtayanmadhurākṣaram || 37 ||
[Analyze grammar]

gṛhapatiruvāca |
maghavan vṛtraśatro tvāṃ jāne kuliśapāṇinam |
nāhaṃ vṛṇe varantvattaśśaṃkaro varado'sti me || 38 ||
[Analyze grammar]

indra uvāca |
na mattaśśaṅkarastvanyo devadevo'smyahaṃ śiśo |
vihāya bāliśatvaṃ tvaṃ varaṃ yācasva mā ciram || 39 ||
[Analyze grammar]

gṛhapatiruvāca |
gacchāhalyāpate'sādho gotrāre pākaśāsana |
na prārthaye paśupateranyaṃ devāntaraṃ sphuṭam || 40 ||
[Analyze grammar]

nandīśvara uvāca |
iti tasya vacaḥ śrutvā krodha saṃraktalocanaḥ |
udyamya kuliśaṃ ghorambhīṣayāmāsa bālakam || 41 ||
[Analyze grammar]

sa dṛṣṭvā bālako vajraṃ vidyujjvālā samākulam |
smarannārada vākyaṃ ca mumūrccha bhayavihvalaḥ || 42 ||
[Analyze grammar]

atha gaurīpatiśśambhurāvirāsīttaponudaḥ |
uttiṣṭhottiṣṭha bhadrante sparśaissaṃjīvayanniva || 43 ||
[Analyze grammar]

unmīlya netrakamale supte iva dinakṣaye |
apaśyadagre cotthāya śambhumarkaśatādhikam || 44 ||
[Analyze grammar]

bhāle locanamālokya kaṇṭhe kālaṃ vṛṣadhvajam |
vāmāṅgasanniviṣṭādritanayaṃ candraśekharam || 45 ||
[Analyze grammar]

kaparddena virājantaṃ triśūlājagavāyudham |
sphuratkarpūragaurāṃgaṃ pariṇaddha gajājinam || 46 ||
[Analyze grammar]

parijñāya mahādevaṃ guruvākyata āgamāt |
harṣabāṣpākulāsannakaṇṭharomāñcakañcukaḥ || 47 ||
[Analyze grammar]

kṣaṇaṃ ca girivattasthau citrakūṭatriputrakaḥ |
yathā tathā susampanno vismṛtyātmānameva ca || 48 ||
[Analyze grammar]

na stotuṃ na namaskartuṃ kiñcidvijñaptimeva ca |
yadā sa na śaśākālaṃ tadā smitvāha śaṅkaraḥ || 49 ||
[Analyze grammar]

īśvara uvāca |
śiśo gṛhapate śakrādvajrodyatakarādaho |
jñāta bhīto'si mā bhaiṣīrjijñāsā te mayā kṛtā || 50 ||
[Analyze grammar]

mama bhaktasya no śakro na vajraṃ cāntako'pi ca |
prabhavedindrarūpeṇa mayaiva tvamvibhīṣitaḥ || 51 ||
[Analyze grammar]

varandadāmi te bhadra tvamagnipadabhāgbhava |
sarveṣāmeva devānāṃ varadastvaṃ bhaviṣyasi || 52 ||
[Analyze grammar]

sarveṣāmeva bhūtānāṃ tvamagne'ntaścaro bhava |
dharmarājendrayormadhye digīśo rājyamāpnuhi || 53 ||
[Analyze grammar]

tvayedaṃ sthāpitaṃ liṃgaṃ tava nāmnā bhaviṣyati |
agnīśvara iti khyātaṃ sarvatejovibṛṃhaṇam || 54 ||
[Analyze grammar]

agnīśvarasya bhaktānāṃ na bhayaṃ vidyudagnibhiḥ |
agnimāṃdyabhayaṃ naiva nākālamaraṇaṃ kvacit || 55 ||
[Analyze grammar]

agnīśvaraṃ samabhyarcya kāśyāṃ sarvasamṛddhidam |
anyatrāpi mṛto daivādvahniloke mahīyate || 56 ||
[Analyze grammar]

nandīśvara uvāca |
ityuktānīya tadbandhūnpitrośca paripaśyatoḥ |
dikpatitve'bhiṣicyāgniṃ tatra liṃge śivo'viśat || 57 ||
[Analyze grammar]

itthamagnyavatāraste varṇito me janārdanaḥ |
nāmnā gṛhapatistāta śaṃkarasya parātmanaḥ || 58 ||
[Analyze grammar]

citrahotrapurī ramyā sukhadārciṣmatī varā |
jātavedasi ye bhaktā te tatra nivasanti vai || 59 ||
[Analyze grammar]

agnipraveśaṃ ye kuryyurdṛḍhasattvā jitendriyāḥ |
striyo vā sattvasampannāste sarvvepyagnitejasaḥ || 60 ||
[Analyze grammar]

agnihotraratā viprāḥ sthāpitā brahmacāriṇaḥ |
paścānivarttino'pyevamagnilokegnivarcasaḥ || 61 ||
[Analyze grammar]

śīte śītāpanuttyai yastvedhobhārānprayacchati |
kuryyādagnīṣṭikāṃ vātha sa vasedagnisannidhau || 62 ||
[Analyze grammar]

anāthasyāgnisaṃskāraṃ yaḥ kuryyācchraddhayānvitaḥ |
aśaktaḥ prerayedanyaṃ sogniloke mahīyate || 63 ||
[Analyze grammar]

agnireko dvijātīnāṃ niśśreyasakaraḥ paraḥ |
gururdevo vrataṃ tīrthaṃ sarvamagnirviniścitam || 64 ||
[Analyze grammar]

apāvanāni sarvāṇi vahnisaṃsargataḥ kṣaṇāt |
pāvanāni bhavantyeva tasmādyaḥ pāvakaḥ smṛtaḥ || 65 ||
[Analyze grammar]

antarātmā hyayaṃ sākṣānniścayo hyāśuśukṣaṇiḥ |
māṃsagrāsānpacetkukṣau strīṇāṃ no māṃsapeśikām || 66 ||
[Analyze grammar]

taijasī śāmbhavī mūrttiḥ pratyakṣā dahanātmikā |
kartrī hartrī pālayitrī vinaitāṃ kiṃ vilokyate || 67 ||
[Analyze grammar]

citrabhānurayaṃ sākṣānnetrantribhuvaneśituḥ |
andhe tamomaye loke vinainaṃ kaḥ prakāśanaḥ || 68 ||
[Analyze grammar]

dhūpapradīpanaivedyapayodadhighṛtaikṣavam |
etadbhuktaṃ niṣevante sarve divi divaukasaḥ || 69 ||
[Analyze grammar]

iti śrīśivamahāpurāṇe tṛtīyāyāṃ śatarudrasaṃhitāyāṃ gṛhapatyavatāravarṇanaṃ nāma pañcadaśo'dhyāyaḥ || 15 ||
[Analyze grammar]