Chapter 7

[English text for this chapter is available]

|| nandikeśvara uvāca |
tatra gatvā mune'haṃ vai sthitvaikāntasthale sudhīḥ |
atapaṃ tapa ugraṃ sanmunīnāmapi duṣkaram || 1 ||
[Analyze grammar]

hṛtpuṇḍarīkasuṣire dhyātvā devaṃ triyambakam |
tryakṣaṃ daśabhujaṃ śāntaṃ pañcavaktraṃ sadā śivam || 2 ||
[Analyze grammar]

rudrajāpyamakārṣaṃ vai paramadhyānamāsthitaḥ |
saritaścottare puṇye hyekacittaḥ samāhitaḥ || 3 ||
[Analyze grammar]

tasmiñjāpye'tha saṃprītaḥ sthitaṃ māṃ parameśvaraḥ |
tuṣṭo'bravīnmahādevaḥ somaḥ somārddhabhūṣaṇaḥ || 4 ||
[Analyze grammar]

śiva uvāca |
śailāde varadohaṃ te tapasānena toṣitaḥ |
sādhu taptaṃ tvayā dhīman brūhi yatte manogatam || 5 ||
[Analyze grammar]

sa evamukto devena śirasā pādayornataḥ |
astavaṃ parameśānaṃ jarāśokavināśanam || 6 ||
[Analyze grammar]

atha māṃ nandinaṃ śambhurbhaktyā parāmayā yutam |
aśrupūrṇekṣaṇaṃ samyak pādayoḥ śirasā natam || 7 ||
[Analyze grammar]

utthāya parameśānaḥ pasparśa paramārtihā |
karābhyāṃ saṃmukhābhyāntu saṃgṛhya vṛṣabhadhvajaḥ || 8 ||
[Analyze grammar]

nirīkṣya gaṇapāṃścaiva devīṃ himavataḥ sutām |
uvāca māṃ kṛpādṛṣṭyā samīkṣya jagatāmpatiḥ || 9 ||
[Analyze grammar]

vatsa nandinmahāprājña mṛtyorbhītiḥ kutastava |
mayaiva preṣitau viprau matsamastvaṃ na saṃśayaḥ || 10 ||
[Analyze grammar]

amaro jarayā tyakto'duḥkhī gaṇapatiḥ sadā |
avyayaścākṣayaśceṣṭaḥ sa pitā sa suhṛjjanaḥ || 11 ||
[Analyze grammar]

madbalaḥ pārśvago nityaṃ mameṣṭo bhavitāniśam |
na jarā janma mṛtyurvai matprasādādbhaviṣyati || 12 ||
[Analyze grammar]

nandīśvara uvāca |
evamuktvā śiromālāṃ kuśeśayamayīṃ nijām |
samunmucya babandhāśu mama kaṇṭhe kṛpānidhiḥ || 13 ||
[Analyze grammar]

tayāhaṃ mālayā vipra śubhayā kaṇṭhasaktayā|| |
tryakṣo daśabhujaścāsaṃ dvitīya iva śaṅkara || 14 ||
[Analyze grammar]

tata eva samādāya hastena parameśvaraḥ |
uvāca brūhi kiṃ te'dya dadāmi varamuttamam || 15 ||
[Analyze grammar]

tato jaṭāśritaṃ vāri gṛhītvā hāra nirmalam |
uktvā nandī bhavetīha visasarja vṛṣadhvajaḥ || 16 ||
[Analyze grammar]

tataḥ pañcamitā nadyaḥ prāvartata śubhāvahāḥ |
sutoyāśca mahāvegā divya rūpā ca sundarī || 17 ||
[Analyze grammar]

jaṭodakā trisrotāśca vṛṣadhvaniritīva hi |
svarṇodakā jambunadī pañcanadyaḥ prakīrtitāḥ || 18 ||
[Analyze grammar]

etatpañcanadaṃ nāma śivapṛṣṭhatamaṃ śubham |
japeśvarasamīpe tu pavitraṃ paramaṃ mune || 19 ||
[Analyze grammar]

yaḥ pañcanadamāsādya snātvā japtveśvareśvaram |
pūjayecchivasāyujyaṃ prayātyeva na saṃśayaḥ || 20 ||
[Analyze grammar]

atha śambhuruvācomāmabhiṣiñcāmi nandinam |
gaṇendraṃ vyāhariṣyāmi kiṃ vā tvaṃ manyase'vyaye || 21 ||
[Analyze grammar]

umovāca |
dātumarhasi deveśa nandine parameśvara |
mahāpriyatamo nātha śailādistanayo mama || 22 ||
[Analyze grammar]

nandīśvara uvāca |
tatassa śaṅkaraḥ svīyānsasmāra gaṇapānvarān |
svatantraḥ parameśānassarvado bhaktavatsalaḥ || 23 ||
[Analyze grammar]

smaraṇādeva rudrasya samprāptāśca gaṇeśvarāḥ |
asaṅkhyātā mahāmodāśśaṅkarākṛtayo'khilāḥ || 24 ||
[Analyze grammar]

te gaṇeśāśśivaṃ devīṃ praṇamyāhuḥ śubhaṃ vacaḥ |
te praṇamya karau baddhvā nataskandhā mahābalāḥ || 25 ||
[Analyze grammar]

gaṇeśā ūcuḥ |
kimarthaṃ ca smṛtā deva hyājñāpaya mahāprabho |
kiṅkarānnaḥ samāyātāṃstripurārdana kāmada || 26 ||
[Analyze grammar]

kiṃ sāgarāñśoṣayāmo yamaṃ vā saha kiṃkaraiḥ |
hanmo mṛtyuṃ mahāmṛtyuṃ viśeṣaṃ vṛddhapadmajam || 27 ||
[Analyze grammar]

baddhvendraṃ saha devaiśca viṣṇuṃ vā pārṣadaiḥ saha |
ānayāmaḥ susaṃkuddhāndaityānvā dānavaiḥ saha || 28 ||
[Analyze grammar]

kasyādya vyasanaṃ ghoraṃ kariṣyāmastavājñayā |
kasya vādyotsavo deva sarvakāmasamṛddhaye || 29 ||
[Analyze grammar]

nandīśvara uvāca |
ityākarṇya vacasteṣāṃ gaṇānāṃ vīravādinām |
uvāca tānsa praśaṃsya gaṇeśānparameśvaraḥ || 30 ||
[Analyze grammar]

śiva uvāca |
nandīśvaroyaṃ putro me sarveṣāmīśvareśvaraḥ |
priyo gaṇāmagraṇīssarvaiḥ kriyatāṃ vacanaṃ mama || 31 ||
[Analyze grammar]

sarve prītyābhiṣiñcadhvaṃ madgaṇānāṃ gatimpatim |
adyaprabhṛti yuṣmākamayaṃ nandīśvaraḥ prabhuḥ || 32 ||
[Analyze grammar]

nandīśvara uvāca |
evamuktāḥ śaṅkareṇa gaṇapāssarvva eva te |
evamastviti samprocya sambhārānāharaṃstataḥ || 33 ||
[Analyze grammar]

tato devāśca sendrāśca nārāyaṇamukhāstathā |
munayaḥ sarvato lokā ājagmurmuditānanāḥ || 34 ||
[Analyze grammar]

pitāmahopi bhagavanniyogācchaṅkarasya vai |
cakāra naṃdinassarvvamabhiṣekaṃ samāhitaḥ || 35 ||
[Analyze grammar]

tato viṣṇustataśśakro lokapālāstathaiva ca |
ṛṣayastuṣṭuvuścaiva pitāmahapurogamāḥ || 36 ||
[Analyze grammar]

stutimatsu tatasteṣu viṣṇuḥ sarvajagatpatiḥ |
śirasyañjalimādhāya tuṣṭāva ca samāhitaḥ || 37 ||
[Analyze grammar]

prāñjaliḥ praṇato bhūtvā jayaśabdaṃ cakāra ca |
tato gaṇādhipāssarvve tato devāstato'surāḥ || 38 ||
[Analyze grammar]

evaṃ stutaścābhiṣikto devaissa brahmakaistadā |
nandīśvarohaṃ viprendra niyogātpa rameśituḥ || 39 ||
[Analyze grammar]

udvāhaśca kṛtastatra niyogātparameṣṭhinaḥ |
mahotsavayutaḥ prītyā viṣṇubrahmādibhirmama || 40 ||
[Analyze grammar]

marutāṃ ca sutā devī suyaśāstu manoharā |
patnī sā me'bhavaddivyā manonayananandinī || 41 ||
[Analyze grammar]

labdhaṃ śaśiprabhaṃ chatraṃ tayā tatra vibhūṣitam |
cāmaraiścāmarāsaktahastāgraiḥ strīgaṇairyutam || 42 ||
[Analyze grammar]

siṃhāsanaṃ ca paramaṃ tayā cādhiṣṭhitaṃ mayā |
alaṃkṛto mahālakṣmyā mukuṭādyaissubhūṣaṇaiḥ || 43 ||
[Analyze grammar]

labdho hāraśca paramo devyāḥ kaṇṭhagatastathā |
vṛṣendraśca śito nāgassiṃhassiṃhadhvajastathā || 44 ||
[Analyze grammar]

rathaśca hemahāraśca candrabiṃbasamaḥ śubhaḥ |
anyānyapi ca vastūni labdhāni hi mayā mune || 45 ||
[Analyze grammar]

evaṃ kṛtavivāho'haṃ tayā patnyā mahāmune |
pādau vavande śambhośca śivāyā brahmaṇo hareḥ || 46 ||
[Analyze grammar]

tathāvidhaṃ trilokeśassapatnīkaṃ ca māmprabhuḥ |
provāca parayā prītyā sa śivo bhaktavatsalaḥ || 47 ||
[Analyze grammar]

īśvara uvāca |
śṛṇu satputra tātastvaṃ suyaśeyantava priyā |
dadāmi te varamprītyā yatte manasi vāñchitam || 48 ||
[Analyze grammar]

sadāhantava nandīśa santuṣṭo'smi gaṇeśvara |
devyā ca sahito vatsa śṛṇu me paramaṃ vacaḥ || 49 ||
[Analyze grammar]

sadeṣṭaśca viśiṣṭaśca paramaiśvaryyasaṃyutaḥ |
mahāyogī maheṣvāsaḥ sa pitā sa pitāmahaḥ || 50 ||
[Analyze grammar]

ajeyassarvajetā ca sadā pūjyo mahābalaḥ |
ahaṃ yatra bhavāṃstatra yatra tvaṃ tatra cāpyaham || 51 ||
[Analyze grammar]

ayaṃ ca te pitā putra paramaiśvaryyasaṃyutaḥ |
bhaviṣyati gaṇādhyakṣo mama bhakto mahābalaḥ || 52 ||
[Analyze grammar]

pitāmaho'pi te vatsa tathāstu niyamā ime |
matsamīpaṃ gamiṣyanti mayā dattavarāstathā || 53 ||
[Analyze grammar]

nandīśvara uvāca |
tato devī mahābhāgā nandinaṃ varadābravīt |
varaṃ brūhīti māmputra sarvvānkāmānyathesitān || 54 ||
[Analyze grammar]

tacchrutvā vacanaṃ devyāḥ prāvocatsāñjalistadā |
bhaktirbhavatu me devi pādayoste sadā varā || 55 ||
[Analyze grammar]

śrutvā mama vaco devī hyevamastviti sābravīt |
suyaśāṃ tāñca suprītyā nandipriyatamāṃ śivām || 56 ||
[Analyze grammar]

devyuvāca |
vatse varaṃ yatheṣṭaṃ hi trinetrā janmavarjitā |
putrapautrestu bhaktirme tathā ca bhartureva hi || 57 ||
[Analyze grammar]

nandyuvāca |
tadā brahmā ca viṣṇuśca sarvve devagaṇāśca vai |
tābhyāṃ varāndaduḥ prītyā suprasannāśśivājñayā || 58 ||
[Analyze grammar]

sānvayaṃ māṃ gṛhītveśastatassambandhibāndhavaiḥ |
āruhya vṛṣamīśāno gato devyā nijaṃ gṛham || 59 ||
[Analyze grammar]

viṣṇvādayaḥ surāssarvve praśaṃsanto hyamī tadā |
svadhāmāni yayuḥ prītyā saṃstuvantaḥ śivaṃ śivam || 60 ||
[Analyze grammar]

iti te kathito vatsa svāvatāro mahāmune |
sadānandakaraḥ puṃsāṃ śivabhaktipravarddhanaḥ || 61 ||
[Analyze grammar]

ya idannandino janma varadānantathā mama |
abhiṣekaṃ vivāhaṃ ca śṛṇuyācchrāvayettathā || 62 ||
[Analyze grammar]

paṭhedvā pāṭhayedvāpi śraddhāvānbhaktisaṃyutaḥ |
iha sarvvasukhambhuktvā paratra labhate gatim || 63 ||
[Analyze grammar]

iti śrīśivamahāpurāṇe tṛtīyāyāṃ śatarudrasaṃhitāyāṃ nandikeśvarāvatārābhiṣekavivāha varṇanaṃ nāma saptamo'dhyāyaḥ || 7 ||
[Analyze grammar]

iti tricatvāriṃśovatāraḥ || 43 ||
[Analyze grammar]