Chapter 6

[English text for this chapter is available]

atha nandīśvarāvatāramāha |
sanatkumāra uvāca |
bhavānkathamanuprāpto mahādevāṃśajaḥ śivam |
śrotumicchāmi tatsarvaṃ vaktumarhasi me prabho || 1 ||
[Analyze grammar]

nandīśvara uvāca |
sanatkumāra sarvajña sāvadhānatayā śṛṇu |
yathāhaṃ ca śivaṃ prāpto mahādevāṃśajo mune || 2 ||
[Analyze grammar]

prajākāmaḥ śilādo'bhūduktaḥ pitṛbhirādarāt |
taduddhartumanā bhaktyā samuddhāramabhīpsubhiḥ || 3 ||
[Analyze grammar]

adhodṛṣṭiḥ sudharmātmā śilādo nāma vīryavān |
tasyāsīnmunikairvṛttiḥ śivaloke ca sogamat || 4 ||
[Analyze grammar]

śakramuddiśya sa munistapastepe suduḥ saham |
niścalātmā śilādākhyo bahukālaṃ dṛḍhavrataḥ || 5 ||
[Analyze grammar]

tapatastasya tapasā saṃtuṣṭo'bhūcchatakratuḥ |
jagāma ca varaṃ dātuṃ sarvadevaprabhustadā || 6 ||
[Analyze grammar]

śilādamāha suprītyā śakrastuṣṭo'smi te'nagha |
tena tvaṃ muniśārdūla varayasva varāniti || 7 ||
[Analyze grammar]

tataḥ praṇamya deveśaṃ stutvā stutibhirādarāt |
śilādo muniśārdūlastamāha sukṛtāñjaliḥ || 8 ||
[Analyze grammar]

śilāda uvāca |
śatakrato sureśāna santuṣṭo yadi me prabho |
ayonijaṃ mutyuhīnaṃ putramicchāmi suvratam || 9 ||
[Analyze grammar]

śakra uvāca |
putraṃ dāsyāmi putrārthinyonijaṃ mṛtyusaṃyutam |
anyathā te na dāsyāmi mṛtyuhīnā na santi vai || 10 ||
[Analyze grammar]

na dāsyāmi sutaṃ te'haṃ mṛtyuhīnamayonijam |
harirvidhiśca bhagavānkimutānyo mahāmune || 11 ||
[Analyze grammar]

tāvapi tripurāryaṃgasambhāvau maraṇānvitau |
tayorapyāyuṣā mānaṃ kathitaṃ nigame pṛthak || 12 ||
[Analyze grammar]

tasmādayonije putre mṛtyuhīne prayatnataḥ |
parityajāśāṃ viprendra gṛhāṇātmakṣamaṃ sutam || 13 ||
[Analyze grammar]

kintu deveśvaro rudraḥ prasīdati maheśvaraḥ |
sudurlabho mṛtyuhīnastava putro hyayonijaḥ || 14 ||
[Analyze grammar]

ahaṃ ca viṣṇurbhagavāndruhiṇaśca mahāmune |
ayonijaṃ mṛtyuhīnaṃ putraṃ dātuṃ na śaknumaḥ || 15 ||
[Analyze grammar]

ārādhaya mahādevaṃ tatputravinikāmyayā |
sarveśvaro mahāśaktaḥ sa te putraṃ pradāsyati || 16 ||
[Analyze grammar]

nandīśvara uvāca |
evaṃ vyāhṛtya viprendramanugṛhya ca taṃ ghṛṇī |
devairvṛtaḥ sureśānassvalokaṃ samagānmune || 17 ||
[Analyze grammar]

gate tasmiṃśca varade sahasrākṣe śilāśanaḥ |
ārādhayanmahādevaṃ tapasātoṣayadbhavam || 18 ||
[Analyze grammar]

atha tasyaivamaniśantatparasya dvijasta vai |
divyamvarṣasahasraṃ tu gataṃ kṣaṇamivādbhutam || 19 ||
[Analyze grammar]

valmīkena vṛtāṃgaśca lakṣakoṭagaṇairmuniḥ |
sūcīmukhaiścānyai raktabhugbhiśca sarvataḥ || 20 ||
[Analyze grammar]

nirmāṃsarudhira tvagvai bile tasminnavasthitaḥ |
asthiśeṣobhavatpaścācchilādo munisattamaḥ || 21 ||
[Analyze grammar]

tuṣṭaḥ prabhustadā tasmai darśayāmāsa svāṃ tanum |
divyāṃ divyaguṇairyuktāmalabhyāṃ vāmabuddhibhiḥ || 22 ||
[Analyze grammar]

divyavarṣasahasreṇa tapyamānāya śūladhṛk |
sarvadevādhipastasmai varadosmītyabhāṣata || 23 ||
[Analyze grammar]

mahāsamādhisaṃlīnassa śilādo mahāmuniḥ |
nāśṛṇottadgiraṃ śambhorbhaktyadhīnaratasya vai || 24 ||
[Analyze grammar]

yadā spṛṣṭo munistena kareṇa tripurāriṇā |
tadaiva muniśārdūla utsasarja tapaḥkramam || 25 ||
[Analyze grammar]

athonmīlya munirnetre somaṃ śaṃbhuṃ vilokayan |
drutaṃ praṇamya sa mudā pādayornyapatanmune || 26 ||
[Analyze grammar]

harṣagadgadayā vācā nataskaṃdhaḥ kṛtāñjaliḥ |
prasannātmā śilādassa tuṣṭāva parameśvaram || 27 ||
[Analyze grammar]

tataḥ prasanno bhagavāndevadevastrilocanaḥ |
varado'smīti tamprāha śilādaṃ munipuṃgavam || 28 ||
[Analyze grammar]

tapasānena kiṃ kāryaṃ bhavate hi mahā mate |
dadāmi putraṃ sarvajñaṃ sarvaśāstrārthapāragam || 29 ||
[Analyze grammar]

tataḥ praṇamya deveśaṃ tacchrutvā ca śilāśanaḥ |
harṣagadgadayā vācovāca somavibhūṣaṇam || 30 ||
[Analyze grammar]

śilāda uvāca |
maheśa yadi tuṣṭo'si yadi vā varadaśca me |
icchāmi tvatsamaṃ putraṃ mṛtyuhīnamayonijam || 31 ||
[Analyze grammar]

naṃdīśvara uvāca |
evamuktastato devastryambakastena śaṅkaraḥ |
pratyuvāca prasannātmā śilādaṃ munisattamam || 32 ||
[Analyze grammar]

|| śiva uvāca |
pūrvamārādhito vipra brahmaṇāhaṃ tapodhana |
tapasā cāvatārārthaṃ munibhiśca surottamaiḥ || 33 ||
[Analyze grammar]

tava putro bhaviṣyāmi nandī nāmnā tvayonijaḥ |
pitā bhaviṣyasi mama piturvai jagatāṃ mune || 34 ||
[Analyze grammar]

nandīśvara uvāca |
evamuktvā muniṃ prekṣya praṇipatyāsthitaṃ ghṛṇī |
somastūrṇaṃ tamādiśya tatraivāntardadhe haraḥ || 35 ||
[Analyze grammar]

gate tasminmahādeve sa śilādo mahāmuniḥ |
svamāśrayamupāgamya ṛṣibhyo'kathayattataḥ || 36 ||
[Analyze grammar]

kiyatā caiva kālena tadāsau janakaḥ sa me |
yajñāṃgaṇaṃ cakarṣāśu yajñārthaṃ yajñavittamaḥ || 37 ||
[Analyze grammar]

tataḥ kṣaṇādahaṃ śaṃbhostanujastasya cājñayā |
sa jātaḥ pūrvvamevāhaṃ yugāntāgnisamaprabhaḥ || 38 ||
[Analyze grammar]

avarṣaṃstadā puṣkarāvartakādyā jaguḥ khecarāḥ kinnarāḥ siddhasādhyā |
śilādātmajatvaṃ gate mayyṛṣīndrāssamantācca vṛṣṭiṃ vyadhuḥ kausumīṃ te || 39 ||
[Analyze grammar]

atha brahmādayo devā devapalyaśca sarvaśaḥ |
tatrājagmuśca suprītyā hariścaiva śivo'mbikā || 40 ||
[Analyze grammar]

tadotsavo mahānāsīnnanṛtuścāpsarogaṇāḥ |
ādṛtya māṃ tathā liṃgaṃ tuṣṭuvurharṣitāśca te || 41 ||
[Analyze grammar]

supraśasya śilādaṃ taṃ stutvā ca sustavaiḥ śivau |
sarve jagmuśca dhāmāni śivāvapyakhileśvarau || 42 ||
[Analyze grammar]

śilādo'pi ca māṃ dṛṣṭvā kālasūryyānalaprabham |
tryakṣaṃ caturbhujaṃ bālaṃ jaṭāmukuṭadhāriṇam || 43 ||
[Analyze grammar]

triśūlādyāyudhaṃ dīptaṃ sarvathā rudrarūpiṇam |
mahānandabharaḥ prītyā praṇamyaṃ praṇanāma ca || 44 ||
[Analyze grammar]

śilāda uvāca |
tvayāhaṃ nandito yasmānnandī nāmnā sureśvara |
tasmāttvāṃ devamānandaṃ namāmi jagadīśvaram || 45 ||
[Analyze grammar]

nandīśvara uvāca |
mayā saha pitā hṛṣṭaḥ supraṇamya maheśvaram |
uṭajaṃ svaṃ jagāmāśu nidhiṃ labdhveva nirdhanaḥ || 46 ||
[Analyze grammar]

yadā gatohamuṭajaṃ śilādasya mahāmune |
tadāhaṃ tādṛśaṃ rūpaṃ tyaktvā mānuṣyamāsthitaḥ || 47 ||
[Analyze grammar]

mānuṣyamāsthitaṃ dṛṣṭvā pitā me lokapūjitaḥ |
vilalāpātiduḥkhārttaḥ svajanaiśca samāvṛtaḥ || 47 ||
[Analyze grammar]

jātakarmādikānyeva sarvāṇyapi cakāra me |
śālaṃkāyanaputro vai śilādaḥ putravatsalaḥ || 49 ||
[Analyze grammar]

vedānadhyāpayāmāsa sāṃgopāṃgānaśeṣataḥ |
śāstrāṇyanyānyapi tathā pañcavarṣe pitā ca mām || 50 ||
[Analyze grammar]

sampūrṇe saptame varṣe mitrāvaruṇasaṃjñakau |
munī tasyāśramaṃ prāptau draṣṭuṃ māṃ cājñayā vibhoḥ || 51 ||
[Analyze grammar]

satkṛtau muninā tena sūpaviṣṭo mahāmunī |
ūcatuśca mahātmānau māṃ nirīkṣya muhurmuhuḥ || 52 ||
[Analyze grammar]

mitrāvaruṇāvūcatuḥ |
tāta naṃdīstavālpāyuḥ sarvaśāstrārthapāragaḥ |
na dṛṣṭameva cāpaśyaṃ hyāyurvarṣādataḥ param || 53 ||
[Analyze grammar]

viprayorityuktavatoḥ śilādaḥ putravatsalaḥ |
tamāliṅgya ca duḥkhārtto rurodātīva visvaram || 54 ||
[Analyze grammar]

mṛtavatpatitaṃ dṛṣṭvā pitaraṃ ca pitāmaham |
pratyavocatprasannātmā smṛtvā śivapadāmbujam || 55 ||
[Analyze grammar]

kena tvaṃ tāta duḥkhena vepamānaśca rodiṣi |
duḥkhaṃ te kuta utpannaṃ jñātumicchāmi tattvataḥ || 56 ||
[Analyze grammar]

|| pitovāca |
tavālpamṛtyuduḥkhena duḥkhito'tīva putraka |
ko me duḥkhaṃ haratu vai śaraṇaṃ prayāmi hi || 57 ||
[Analyze grammar]

|| putra uvāca |
devo vā dānavo vāpi yamaḥ kālotha vāpi hi |
ṛdhyeyuryadyapi hyete māmanyepi janāstathā || 58 ||
[Analyze grammar]

athāpi cālpamṛtyurme na bhaviṣyati māṃ tudaḥ |
satyaṃ bravīmi janakaṃ śapathante karomyaham || 59 ||
[Analyze grammar]

|| pitovāca |
kiṃ tapaḥ kiṃ parijñānaṃ ko yogaśca prabhuśca te |
yena tvaṃ dāruṇaṃ duḥkhaṃ vañcayiṣyasi putra me || 60 ||
[Analyze grammar]

|| putra uvāca |
na tāta tapasā mṛtyuṃ vaṃcayiṣye na vidyayā |
mahādevasya bhajanānmṛtyuṃ jeṣyāmi nānyathā || 61 ||
[Analyze grammar]

|| nandīśvara uvāca |
ityuktvāhaṃ pituḥ pādau praṇamya śirasā mune |
pradakṣiṇīkṛtya ca tamagacchaṃ vanamuttamam || 62 ||
[Analyze grammar]

iti śrīśivamahāpurāṇe tṛtīyāyāṃ śatarudrasaṃhitāyāṃ nandikeśāvatāravarṇanaṃ nāma ṣaṣṭho'dhyāyaḥ || 6 ||
[Analyze grammar]