Chapter 26

[English text for this chapter is available]

vyāsa uvāca |
brahmaputra namaste'stu dhanyastvaṃ śaivasattama |
yacchrāvitā mahādivyā katheyaṃ śāṃkarī śubhā || 1 ||
[Analyze grammar]

idānīṃ brūhi suprītyā caritaṃ vaiṣṇavaṃ mune |
sa vṛndāṃ mohayitvā tu kimakārṣītkuto gataḥ || 2 ||
[Analyze grammar]

|| sanatkumāra uvāca |
śṛṇu vyāsa mahāprājña śaivapravara sattama |
vaiṣṇavaṃ caritaṃ śaṃbhucaritāḍhyaṃ sunirmalam || 3 ||
[Analyze grammar]

maunībhūteṣu deveṣu brahmādiṣu maheśvaraḥ |
suprasanno'vadacchaṃbhuśśaraṇāgata vatsalaḥ || 4 ||
[Analyze grammar]

śaṃbhuruvāca |
brahmandevavarāssarve bhavadarthe mayā hataḥ |
jalaṃdharo madaṃśopi satyaṃ satyaṃ vadāmyaham || 5 ||
[Analyze grammar]

sukhamāpurna vā tātāssatyaṃ brūtāmarāḥ khalu |
bhavatkṛte hi me līlā nirvikārasya sarvadā || 6 ||
[Analyze grammar]

sanatkumāra uvāca |
atha brahmādayo devā harṣādutphullalocanāḥ |
praṇamya śirasā rudraṃ śaśaṃsurviṣṇuceṣṭitam || 7 ||
[Analyze grammar]

|| devā ūcuḥ |
mahādeva tvayā devā rakṣitā śśatrujādbhayāt |
kiṃcidanyatsamudbhūtaṃ tatra kiṃ karavāmahai || 8 ||
[Analyze grammar]

vṛndāṃ vimohitā nātha viṣṇunā hi prayatnataḥ |
bhasmībhūtā drutaṃ vahnau paramāṃ gatimāgatā || 9 ||
[Analyze grammar]

vṛndālāvaṇyasaṃbhrāṃto viṣṇustiṣṭhati mohitaḥ |
taccitābhasma saṃdhārī tava māyāvimohitaḥ || 10 ||
[Analyze grammar]

sa siddhamunisaṃghaiśca bodhito'smābhirādarāt |
na budhyate harissotha tava māyāvimohitaḥ || 11 ||
[Analyze grammar]

kṛpāṃ kuru maheśāna viṣṇuṃ bodhaya bodhaya |
tvadadhīnamidaṃ sarvaṃ prākṛtaṃ sacarācaram || 12 ||
[Analyze grammar]

sanatkumāra uvāca |
ityākarṇya maheśo hi vacanaṃ tridivaukasām |
pratyuvāca mahālīlassvacchandastānkṛtāṃjalīn || 13 ||
[Analyze grammar]

maheśa uvāca |
he brahmanhe surāssarve madvākyaṃ śṛṇutādarāt |
mohinī sarvalokānāṃ mama māyā duratyayā || 14 ||
[Analyze grammar]

tadadhīnaṃ jagatsarvaṃ yaddevāsuramānuṣam |
tayaiva mohito viṣṇuḥ kāmādhīno'bhavaddhariḥ || 15 ||
[Analyze grammar]

umākhyā sā mahādevī tridevajananī parā |
mūlaprakṛtirākhyātā surāmā girijātmikā || 16 ||
[Analyze grammar]

gacchadhvaṃ śaraṇā devā viṣṇumohāpanuttaye |
śaraṇyāṃ mohinīmāyāṃ śivākhyāṃ sarvakāmadām || 17 ||
[Analyze grammar]

stutiṃ kuruta tasyāśca macchaktestoṣakāriṇīm |
suprasannā yadi ca sā sarvakāryaṃ kariṣyati || 18 ||
[Analyze grammar]

sanatkumāra uvāca |
ityuktvā tānsurāñśaṃbhuḥ pañcāsyo bhagavānharaḥ |
aṃtardadhe drutaṃ vyāsa sarvaiśca svagaṇaissaha || 19 ||
[Analyze grammar]

devāśca śāsanācchaṃbhorbrahmādyā hi savāsavā |
manasā tuṣṭuvurmūlaprakṛtiṃ bhaktavatsalām || 20 ||
[Analyze grammar]

devā ūcuḥ |
yadudbhavāssattvarajastamoguṇāḥ sargasthitidhvaṃsavidhāna kārakā |
yadicchayā viśvamidaṃ bhavābhavau tanoti mūlaprakṛtiṃ natāḥ sma tām || 21 ||
[Analyze grammar]

pāhi trayoviṃśaguṇānsuśabditāñjagatyaśeṣe samadhiṣṭhitā parā |
yadrūpakarmāṇijagattrayo'pi te vidurna mūlaprakṛtiṃ natāḥ sma tām || 22 ||
[Analyze grammar]

yadbhaktiyuktāḥ puruṣāstu nityaṃ dāridryamohātyayasaṃbhavādīn |
na prāpnuvaṃtyeva hi bhaktavatsalāṃ sadaiva mūlaprakṛtiṃ natāḥ sma tām || 23 ||
[Analyze grammar]

kuru kāryaṃ mahādevi devānāṃ naḥ pareśvari |
viṣṇumohaṃ ha śive durge devi namo'stu te || 24 ||
[Analyze grammar]

jalaṃdharasya śaṃbhośca raṇe kailāsavāsinaḥ |
pravṛtte tadvadhārthāya gaurīśāsanataśśive || 25 ||
[Analyze grammar]

vṛndā vimohitā devi viṣṇunā hi prayatnataḥ |
svavṛṣāttyājitā vahnau bhasmībhūtā gatiṃ gatā || 26 ||
[Analyze grammar]

jalaṃdharo hato yuddhe tadbhayānmo citā vayam |
giriśena kṛpāṃ kṛtvā bhaktānugrahakāriṇā || 27 ||
[Analyze grammar]

tadājñayā vayaṃ sarve śaraṇaṃ te samāgatāḥ |
tvaṃ hi śaṃbhuryuvāṃ devi bhaktoddhāraparāyaṇau || 28 ||
[Analyze grammar]

vṛndālāvaṇyasaṃbhrāto viṣṇustiṣṭhati tatra vai |
taccitābhasmasaṃdhārī jñānabhraṣṭo vimohitaḥ || 29 ||
[Analyze grammar]

saṃsiddhasurasaṃghaiśca bodhito'pi maheśvari |
na budhyate harissotha tava māyāvimohitaḥ || 30 ||
[Analyze grammar]

kṛpāṃ kuru mahādevi hariṃ bodhaya bodhaya |
yathā svalokaṃ pāyātsa sucittassurakāryakṛt || 31 ||
[Analyze grammar]

iti stuvaṃtaste devāstejomaṃḍalamāsthitam |
dadṛśurgagane tatra jvālāvyāptā digaṃtaram || 32 ||
[Analyze grammar]

tanmadhyādbhāratīṃ sarve brahmādyāśca savāsavāḥ |
amarāśśuśruvurvyāsa kāmadāṃ vyomacāriṇīm || 33 ||
[Analyze grammar]

ākāśavāṇyuvāca |
ahameva tridhā bhinnā tiṣṭhāmi trividhairguṇaiḥ |
gaurī lakṣmīḥ surā jyotī rajassattvatamoguṇaiḥ || 34 ||
[Analyze grammar]

tatra gacchata yūyaṃ vai tāsāmaṃtika ādarāt |
madājñayā prasannāstā vidhāsyaṃte tadīpsitam || 35 ||
[Analyze grammar]

sanatkumāra uvāca |
śṛṇvatāmiti tāṃ vācamaṃtarddhānamagānmahaḥ |
devānāṃ vismayotphullanetrāṇāṃ tattadā mune || 36 ||
[Analyze grammar]

tatassaveṃ'pi te devāḥ śrutvā tadvākyamādarāt |
gaurīṃ lakṣmīṃ surāṃ caiva nemustadvākyacoditāḥ || 37 ||
[Analyze grammar]

tuṣṭuvuśca mahābhaktyā devīstāssakalāssurāḥ |
nānāvidhābhirvāgbhiste brahmādyā natamastakāḥ || 38 ||
[Analyze grammar]

tato'raṃ vyāsa devyastā āvirbhūtāśca tatpuraḥ |
mahādbhutaissvatejobhirbhāsayaṃtyo digaṃtaram || 39 ||
[Analyze grammar]

atha tā amarā dṛṣṭvā suprasannena cetasā |
praṇamya tuṣṭuvurbhaktyā svakāryaṃ ca nyavedayan || 40 ||
[Analyze grammar]

tataścaitāssurāndṛṣṭvā praṇatānbhaktavatsalaḥ |
bījāni pradadustebhyo vākyamūcuśca sādaram || 41 ||
[Analyze grammar]

devya ūcuḥ |
imāni tatra bījāni viṣṇuryatrāvatiṣṭhati |
nirvapadhvaṃ tataḥ kāryaṃ bhavatāṃ siddhimeṣyati || 42 ||
[Analyze grammar]

sanatkumāra uvāca |
ityuktvā tāstato devyoṃtarhitā abhavanmune |
rudraviṣṇuvidhīnāṃ hi śaktayastriguṇātmikāḥ || 43 ||
[Analyze grammar]

tatastuṣṭāḥ surāssarve brahmādyāśca savāsavāḥ |
tāni bījāni saṃgṛhya yayuryatra hariḥ sthitaḥ || 44 ||
[Analyze grammar]

vṛndācitābhūmitale cikṣipustāni te surāḥ |
smṛtvā tāssaṃsthitāstatra śivaśaktyaṃśakā mune || 45 ||
[Analyze grammar]

nikṣiptebhyaśca bījebhyo vanaspatyastrayo'bhavan |
dhātrī ca mālatī caiva tulasī ca munīśvara || 46 ||
[Analyze grammar]

dhātryudbhavā smṛtā dhātrī mābhavā mālatī smṛtā |
gaurībhavā ca tulasī tamassattvarajoguṇāḥ || 47 ||
[Analyze grammar]

viṣṇurvanaspatīrdṛṣṭvā tadā strīrūpiṇīrmune |
udatiṣṭhattadā tāsu rāgātiśayavibhramāt || 48 ||
[Analyze grammar]

dṛṣṭvā sa yācate mohātkāmāsaktena cetasā |
taṃ cāpi tulasī dhātrī rāgeṇaivāvalokatām || 49 ||
[Analyze grammar]

yacca bījaṃ purā lakṣmyā māyayaiva samarpitam |
tasmāttadudbhavā nārī tasminnīrṣyāparābhavat || 50 ||
[Analyze grammar]

atassā barbarītyākhyāmavāpātīva garhitām |
dhātrītulasyau tadrāgāttasya prītiprade sadā || 51 ||
[Analyze grammar]

tato vismṛtaduḥkho'sau viṣṇustābhyāṃ sahaiva tu |
vaikuṃṭhamagamattuṣṭassarvadevairnamaskṛtaḥ |
kārtike māsi viprendra dhātrī ca tulasī sadā |
sarvadevapriyājñeyā viṣṇoścaiva viśeṣataḥ || 53 ||
[Analyze grammar]

tatrāpi tulasī dhanyātīva śreṣṭhā mahāmune |
tyaktvā gaṇeśaṃ sarveṣāṃ prītidā sarvakāmadā || 54 ||
[Analyze grammar]

vaikuṇṭhasthaṃ hariṃ dṛṣṭvā brahmendrādyāśca te'marāḥ |
natvā stutvā mahāviṣṇuṃ svasvadhāmāni vai yayuḥ || 55 ||
[Analyze grammar]

vaikuṇṭho'pi svalokastho bhraṣṭamohassubodhavān |
sukhī cābhūnmuniśreṣṭha pūrvavatsaṃsmarañchivam || 56 ||
[Analyze grammar]

ityākhyānamaghoghaghnaṃ sarvakāmapradaṃ nṛṇām |
sarva kāmavikāraghnaṃ sarvavijñānavarddhanam || 57 ||
[Analyze grammar]

ya idaṃ hi paṭhennityaṃ pāṭhayedvāpi bhaktiman |
śṛṇuyācchrāvayedvāpi sa yāti paramāṃ gatim || 58 ||
[Analyze grammar]

paṭhitvā ya idaṃ dhīmānākhyānaṃ paramottamam |
saṃgrāmaṃ praviśedvīro vijayī syānna saṃśayaḥ || 59 ||
[Analyze grammar]

viprāṇāṃ brahmavidyādaṃ satriyāṇāṃ jayapradam |
vaiśyānāṃ sarvadhanadaṃ śūdrāṇāṃ sukhadaṃ tvidam || 60 ||
[Analyze grammar]

śaṃbhubhaktipradaṃ vyāsa sarveṣāṃ pāpanāśanam |
ihaloke paratrāpi sadā sadgatidāyakam || 61 ||
[Analyze grammar]

iti śrīśivamahāpurāṇe dvitīyāyāṃ rudrasaṃhitāyāṃ pañcame yuddhakhaṇḍe jalaṃdharavadhānaṃtaradevīstutiviṣṇumohavidhvaṃsavarṇanaṃ nāma ṣaḍviṃśo'dhyāyaḥ || 26 ||
[Analyze grammar]