Chapter 23

[English text for this chapter is available]

vyāsa uvāca |
sanatkumāra sarvajña vada tvaṃ vadatāṃ vara |
kimakārṣīddharistatra dharmaṃ tatyāja sā katham || 1 ||
[Analyze grammar]

sanatkumāra upāca |
viṣṇurjālaṃdharaṃ gatvā daityasya puṭabhedanam |
pātivratyasya bhaṃgāya vṛndāyāścā karonmatim || 2 ||
[Analyze grammar]

vṛndāṃ sa darśayāmāsa svapnaṃ māyāvināṃ varaḥ |
svayaṃ tannagarodyānamāsthito'dbhutavigrahaḥ || 3 ||
[Analyze grammar]

atha vṛndā tadā devī tatpatnī niśi suvratā |
harermāyāprabhāvāttu dussvapnaṃ sā dadarśa ha || 4 ||
[Analyze grammar]

svapnamadhye hi sā viṣṇumāyayā pradadarśa ha |
bharttāraṃ mahiṣārūḍhaṃ tailābhyaktaṃ digaṃbaram || 5 ||
[Analyze grammar]

kṛṣṇaprasūnabhūṣāḍhyaṃ kravyādagaṇasevitam |
dakṣiṇāśāṃ gataṃ muṃḍaṃ tamasā ca vṛtaṃ tadā || 6 ||
[Analyze grammar]

svapuraṃ sāgare magnaṃ sahasaivātmanā saha |
ityādi bahudussvapnānniśāṃte sā dadarśa ha || 7 ||
[Analyze grammar]

tataḥ prabudhya sā bālā taṃ svapnaṃ svaṃ vicinvatī |
dadarśoditamādityaṃ sacchidraṃ niḥprabhaṃ muhuḥ || 8 ||
[Analyze grammar]

tadaniṣṭamidaṃ jñātvā rudaṃtī bhayavihvalā |
kutracinnāpa sā śarma gopurāṭṭālabhūmiṣu || 9 ||
[Analyze grammar]

tatassakhīdvayayutā nagarodyānamāgamat |
tatrāpi sā gatā bālā na prāpa kutracitsukham || 10 ||
[Analyze grammar]

tato jalaṃdharastrī sā nirviṇṇodvignamānasā |
vanādvanāṃtaraṃ yātā naiva vedātmanā tadā || 11 ||
[Analyze grammar]

bhramatī sā tato bālā dadarśātīva bhīṣaṇau |
rākṣasau siṃhavadanau dṛṣṭvā daśanabhāsurau || 12 ||
[Analyze grammar]

tau dṛṣṭvā vihvalātīva palāyanaparā tadā |
dadarśa tāpasaṃ śāṃtaṃ saśiṣyaṃ maunamāsthitam || 13 ||
[Analyze grammar]

tatastatkaṃṭhamāsādya nijāṃ bāhulatāṃ bhayāt |
mune māṃ rakṣa śaraṇamāgatāsmītyabhāṣata || 14 ||
[Analyze grammar]

munistāṃ vihvalāṃ dṛṣṭvā rākṣasānugatāṃ tadā |
huṃkāreṇaiva tau ghorau cakāra vimukhau drutam || 15 ||
[Analyze grammar]

taddhuṃkārabhayatrastau dṛṣṭvā tau vimukhau gatau |
vismitātīva daityendrapatnī sābhūnmune hṛdi || 16 ||
[Analyze grammar]

tatassā munināthaṃ taṃ bhayānmuktā kṛtāṃjaliḥ |
praṇamya daṃḍavadbhūmau vṛndā vacanamabravīt || 17 ||
[Analyze grammar]

vṛndovāca |
muninātha dayāsindho parapīḍānivāraka |
rakṣitāhaṃ tvayā ghorādbhayādasmātkha lodbhavāt || 18 ||
[Analyze grammar]

samarthassarvathā tvaṃ hi sarvajño'pi kṛpānidhe |
kiṃcidvijñaptumicchāmi kṛpayā tanniśāmaya || 19 ||
[Analyze grammar]

jalaṃdharo hi madbhartā rudraṃ yoddhuṃ gataḥ prabho |
sa tatrāste kathaṃ yuddhe tanme kathaya suvrata || 20 ||
[Analyze grammar]

sanatkumāra uvāca |
munistadvākyamākarṇya maunakapaṭamāsthitaḥ |
karttuṃ svārthaṃ vidhānajñaḥ kṛpayorddhvamavaikṣata || 21 ||
[Analyze grammar]

tāvatkapīśāvāyātau taṃ praṇamyāgrataḥ sthitau |
tatastadbhrūlatāsaṃjñāniyuktau gaganaṃ gatau || 22 ||
[Analyze grammar]

nītvā kṣaṇārddhamāgatya punastasyāgrataḥ sthitau |
tasyaiva kaṃ kabaṃdhaṃ ca hastāvāstāṃ munīśvara || 23 ||
[Analyze grammar]

śiraḥ kabaṃdhaṃ hastau tau dṛṣṭvābdhitanayasya sā |
papāta mūrchitā bhūmau bhartṛvyasanaduḥkhitā || 24 ||
[Analyze grammar]

|| vṛndovāca |
yaḥ purā sukhasaṃvādairvinodayasi māṃ prabho |
sa kathaṃ na vadasyadya vallabhāṃ māmanāgasam || 25 ||
[Analyze grammar]

yena devāssagaṃdharvā nirjitā viṣṇunā saha |
kathaṃ sa tāpasenādya trailokyavijayī hata || 25 ||
[Analyze grammar]

nāṃgīkṛtaṃ hi me vākyaṃ rudratattvamajānatā |
paraṃ brahma śivaśceti vadaṃtyā daityasattama || 27 ||
[Analyze grammar]

tatastvaṃ hi mayā jñātastava sevāprabhāvataḥ |
garvitena tvayā naiva kusaṃgavaśagena hi || 28 ||
[Analyze grammar]

itthaṃprabhāṣya bahudhā svadharmasthā ca tatpriyā |
vilalāpa vicitraṃ sā hṛdayena vidūyatā || 29 ||
[Analyze grammar]

tatassā dhairyamālaṃbya duḥkhocchravā sānvimuṃcatī |
uvāca munivaryaṃ taṃ supraṇamya kṛtāṃjaliḥ || 30 ||
[Analyze grammar]

vṛndovāca |
kṛpānidhe muniśreṣṭha paropakaraṇādara |
mayi kṛtvā kṛpāṃ sādho jīvayainaṃ mama prabhum || 31 ||
[Analyze grammar]

yattvamasya punaśśakto jīvanāya mato mama |
atassaṃjīvayainaṃ me prāṇanāthaṃ munīśvara || 32 ||
[Analyze grammar]

sanatkumāra uvāca |
ityuktvā daityapatnī sā pativratyaparāyaṇāḥ |
pādayoḥ patitā tasya duḥkhaśvāsān vimuñcatī || 33 ||
[Analyze grammar]

muniruvāca |
nāyaṃ jīvayituṃ śakto rudreṇa nihato yudhi |
rudreṇa nihatā yuddhe na jīvanti kadācana || 34 ||
[Analyze grammar]

tathāpi kṛpayāviṣṭa enaṃ saṃjīvayāmyaham |
rakṣyāśśaraṇagāśceti jānandharmaṃ sanātanam || 35 ||
[Analyze grammar]

|| sanatkumāra uvāca |
ityuktvā sa munistasyā jīvayitvā patiṃ mune |
aṃtardadhe tato viṣṇussarvamāyāvināṃ varaḥ || 36 ||
[Analyze grammar]

drutaṃ sa jīvitastenotthitaḥ sāgaranandanaḥ |
vṛndāmāliṃgya tadvaktraṃ cucuṃba prītamānasaḥ || 37 ||
[Analyze grammar]

atha vṛndāpi bhartāraṃ dṛṣṭvā harṣitamānasā |
jahau śokaṃ ca nikhilaṃ svapnavaddhṛdyamanyata || 38 ||
[Analyze grammar]

atha prasannahṛdayā sā hi saṃjātahṛcchayā |
reme tadvanamadhyasthā tadyuktā bahuvāsarān || 39 ||
[Analyze grammar]

kadācitsuratasyāṃte dṛṣṭvā viṣṇuṃ tameva hi |
nirbhartsya krodhasaṃyuktā vṛndā vacanamabravīt || 40 ||
[Analyze grammar]

vṛndovāca |
dhik tadevaṃ hare śīlaṃ paradārābhigāminaḥ |
jñāto'si tvaṃ mayā samyaṅmāyī pratyakṣatāpasaḥ || 41 ||
[Analyze grammar]

sanatkumāra uvāca |
ityuktvā krodhamāpannā darśayaṃtī svatejasam |
śaśāpa keśavaṃ vyāsa pātivratyaratā ca sā || 42 ||
[Analyze grammar]

re mahādhama daityāre paradharmavidūṣaka |
gṛhṇīṣva śaṭha maddattaṃ śāpaṃ sarvaviṣolbaṇam || 43 ||
[Analyze grammar]

yau tvayā māyayā khyātau svakīyau darśitau mama |
tāveva rākṣasau bhūtvā bhāryāṃ tava hariṣyataḥ || 44 ||
[Analyze grammar]

tvaṃ cāpi bhāryāduḥkhārto vane kapisahāyavān |
bhrama sarpeśvareṇāyaṃ yaste śiṣyatvamāgataḥ || 45 ||
[Analyze grammar]

sanatkumāra uvāca |
ityuktvā sā tadā vṛndā praviśaddhavyavāhanam |
viṣṇunā vāryamāṇāpi tasmitāsaktacetasā || 46 ||
[Analyze grammar]

tasminnavasare devā brahmādyā nikhilā mune |
āgatā khe samaṃ dāraiḥ sadgatiṃ vai didṛkṣavaḥ || 47 ||
[Analyze grammar]

atha daityendrapatnyāstu tajjyotiḥ paramaṃ mahat |
paśyatāṃ sarvadevānāmalokamagamaddrutam || 48 ||
[Analyze grammar]

śivātanau vilīnaṃ tadvṛndātejo babhūva ha |
āsījjayajayārāvaḥ khasthitāmara paṃktiṣu || 49 ||
[Analyze grammar]

evaṃ vṛndā mahārājñī kālanemisutottamā |
pātivratyaprabhāvācca muktiṃ prāpa parāṃ mune || 50 ||
[Analyze grammar]

tato haristāmanusaṃsmanmuhurvṛndācitābhasmarajovaguṃṭhitaḥ |
tatraiva tasthau surasiddhasaṃghakaiḥ prabodhyamānopi yayau na śāṃtim || 51 ||
[Analyze grammar]

iti śrīśivamahāpurāṇe dvitīyāyāṃ rudrasaṃhitāyāṃ pañcame yuddhakhaṃḍe jalaṃdharavadhopākhyāne vṛndāpativratabhaṃgadehatyāgavarṇanaṃ nāma trayoviṃśo'dhyāyaḥ || 23 ||
[Analyze grammar]