Chapter 11

[English text for this chapter is available]

vyāsa uvāca |
brahmaputra mahāprājña dhanyastvaṃ śaivasattama |
kimakārṣustato devā dagdhe ca tripure'khilāḥ || 1 ||
[Analyze grammar]

mayaḥ kutra gato dagdho patayaḥ kutra te gatāḥ |
tatsarvaṃ me samācakṣva yadi śaṃbhukathāśrayam || 2 ||
[Analyze grammar]

sūta uvāca |
ityākarṇya vyāsavākyaṃ bhagavānbhavakṛtsutaḥ |
sanatkumāraḥ provāca śivapādayugaṃ smaran || 3 ||
[Analyze grammar]

sanatkumāra uvāca |
śṛṇu vyāsa mahābuddhe pārāśaryaṃ maheśituḥ |
caritaṃ sarvapāpaghnaṃ lokalīlānusārariṇaḥ || 4 ||
[Analyze grammar]

maheśvareṇa sarvasmiṃstripure daityasaṃkule |
dagdhe viśeṣatastatra vismitāste'bhavansurāḥ || 5 ||
[Analyze grammar]

na kiṃcidabruvandevāḥ sendropeṃdrādayastadā |
mahātejasvinaṃ rudraṃ sarve vīkṣya sasaṃbhramāḥ || 6 ||
[Analyze grammar]

mahābhayaṃkaraṃ raudraṃ prajvalaṃtaṃ diśo daśa |
koṭisūryapratīkāśaṃ pralayānalasannibham || 7 ||
[Analyze grammar]

bhayāddevaṃ nirīkṣyaiva devīṃ ca himavatsutām |
bibhyire nikhilā devapramukhā stasthurānatāḥ || 8 ||
[Analyze grammar]

dṛṣṭvānīkaṃ tadā bhītaṃ devānāmṛṣipuṃgavāḥ |
na kiṃcidūcussaṃtasthuḥ praṇemuste samaṃtataḥ || 9 ||
[Analyze grammar]

atha brahmāpi saṃbhīto dṛṣṭvā rūpaṃ ca śāṃkaram |
tuṣṭāva tuṣṭahṛdayo devaissaha samāhitaḥ || 10 ||
[Analyze grammar]

viṣṇunā ca sabhītena devadevaṃ bhavaṃ haram |
tripurāriṃ sagirijaṃ bhaktādhīnaṃ maheśvaram || 11 ||
[Analyze grammar]

|| brahmovāca |
devadeva mahādeva bhaktānugrahakāraka |
prasīda parameśāna sarva devahitaprada || 12 ||
[Analyze grammar]

prasīda jagatāṃ nātha prasīdānaṃdadāyaka |
prasīda śaṃkara svāmin prasīda parameśvara || 13 ||
[Analyze grammar]

oṃkārāya namastubhyamākāraparatāraka |
prasīda sarvadeveśa tripuraghna maheśvara || 14 ||
[Analyze grammar]

nānāvācyāya devāya varaṇapriya śaṃkara |
aguṇāya namastubhyaṃ prakṛteḥ puruṣātpara || 15 ||
[Analyze grammar]

nirvikārāya nityāya nityatṛptāya bhāsvate |
niraṃjanāya divyāya trigu ṇāya namo'stu te || 16 ||
[Analyze grammar]

saguṇāya namastubhyaṃ svargeśāya namostu te |
sadāśivāya śāṃtāya maheśāya pinākine || 17 ||
[Analyze grammar]

sarvajñāya śaraṇyāya sadyojātāya te namaḥ |
vāmadevāya rudrāya tadāpyapuruṣāya ca || 18 ||
[Analyze grammar]

aghorāya susevyāya bhaktādhīnāya te namaḥ |
īśānāya vareṇyāya bhaktānaṃdapradāyine || 19 ||
[Analyze grammar]

rakṣarakṣa mahādeva bhītānnassakalāmarān |
dagdhvā ca tripuraṃ sarve kṛtārthā amarāḥ kṛ tāḥ || 20 ||
[Analyze grammar]

stutvaivaṃ devatāssarvā namaskāraṃ pṛthakpṛthak |
cakruste paramaprītā brahmādyāstu sadāśivam || 21 ||
[Analyze grammar]

atha brahmā svayaṃ devaṃ tripurāriṃ maheśvaram |
tuṣṭāva praṇato bhūtvā nataskaṃdhaḥ kṛtāṃjaliḥ || 22 ||
[Analyze grammar]

brahmovāca || bhagavandevadeveśa tripurāntaka śaṃkara |
tvayi bhaktiḥ parā me'stu mahādevānapāyinī || 23 ||
[Analyze grammar]

sarvadā me'stu sārathyaṃ tava deveśa śaṃkara |
anukūlo bhava vibho sadā tvaṃ parameśvara || 24 ||
[Analyze grammar]

sanatkumāra uvāca |
iti stutvā vidhiśśaṃbhuṃ bhaktavatsalamānataḥ |
virarāma nataskaṃdhaḥ kṛtāṃjalirudāradhīḥ || 25 ||
[Analyze grammar]

janārdano'pi bhagavān namaskṛtya maheśvaram |
kṛtāṃjalipuṭo bhūtvā tuṣṭāva ca maheśvaram || 26 ||
[Analyze grammar]

viṣṇuruvāca || devādhīśa maheśāna dīnabaṃdho kṛpākara |
prasīda parameśāna kṛpāṃ kuru natapriya || 27 ||
[Analyze grammar]

nirguṇāya namastubhyaṃ punaśca saguṇāya ca |
punaḥ prakṛtirūpāya punaśca puruṣāya ca || 28 ||
[Analyze grammar]

paścādguṇasvarūpāya nato viśvātmane namaḥ |
bhaktipriyāya śāṃtāya śivāya paramātmane || 29 ||
[Analyze grammar]

sadāśivāya rudrāya jagatāṃ pataye namaḥ |
tvayi bhaktirdṛḍhā me'dya varddhamānā bhavatviti || 30 ||
[Analyze grammar]

sanatkumāra uvāca |
ityuktvā virarāmāsau śaivapravarasattamaḥ |
sarve devāḥ praṇamyocustatastaṃ parameśvaram || 31 ||
[Analyze grammar]

devā ūcuḥ |
devanātha mahādeva karuṇākara śaṃkara |
prasīda jagatāṃ nātha prasīda parameśvara || 32 ||
[Analyze grammar]

prasīda sarvakartā tvaṃ namāmastvāṃ vayaṃ mudā |
bhaktirdṛḍhāsmākaṃ nityaṃ syādanapāyinī || 33 ||
[Analyze grammar]

sanatkumāra uvāca |
iti stutaśca deveśo brahmaṇā hariṇāmaraiḥ |
pratyuvāca prasannātmā śaṃkaro lokaśaṃkaraḥ || 34 ||
[Analyze grammar]

śaṃkara uvāca |
he vidhe he hare devāḥ prasanno'smi viśeṣataḥ |
mano'bhilaṣitaṃ brūta varaṃ sarve vicā rataḥ || 35 ||
[Analyze grammar]

sanatkumāraḥ uvāca |
ityuktaṃ vacanaṃ śrutvā hareṇa munisattama |
pratyūcussarvadevāśca prasannenāntarātmanā || 36 ||
[Analyze grammar]

sarve devā ūcuḥ |
yadi prasanno bhagavanyadi deyo varastvayā |
devadeveśa cāsmabhyaṃ jñātvā dāsānhi nassurān || 37 ||
[Analyze grammar]

yadā duḥkhaṃ tu devānāṃ saṃbhaveddevasattama |
tadā tvaṃ prakaṭo bhūtvā duḥkhaṃ nāśaya sarvadā || 38 ||
[Analyze grammar]

sanatkumāra uvāca |
ityukto bhagavānudro brahmaṇā hariṇāmaraiḥ |
yugapatprāha tuṣṭātmā tathetyastu niraṃtaram || 39 ||
[Analyze grammar]

stavairetaiśca tuṣṭo'smi dāsyāmi sarvadā dhruvam |
yadabhīṣṭatamaṃ loke paṭhatāṃ śṛṇvatāṃ surāḥ || 40 ||
[Analyze grammar]

ityuktvā śaṃkaraḥ prīto devaduḥkhaharassadā |
sarvadevapriyaṃ yadvai tatsarvaṃ ca pradattavān || 41 ||
[Analyze grammar]

iti śrīśivamahāpurāṇe dvitīyāyāṃ rudrasaṃhitāyāṃ pañcame yuddhakhaṃḍe devastutivarṇanaṃ nāmaikādaśo'dhyāyaḥ || 11 ||
[Analyze grammar]