Chapter 6

[English text for this chapter is available]

vyāsa uvāca |
tasmin daityādhipe paure sabhrātari vimohite |
sanatkumāra kiṃ vāsīttadācakṣvākhilaṃ vibho || 1 ||
[Analyze grammar]

|| sanatkumāra uvāca |
tripure ca tathābhūte daitye tyaktaśivārcane |
strīdharme nikhile naṣṭe durācāre vyavasthite || 2 ||
[Analyze grammar]

kṛtārtha iva lakṣmīśo devaissārddhamumāpatim |
nivedituṃ taccaritraṃ kailāsamagamaddhariḥ || 3 ||
[Analyze grammar]

tasyopakaṃṭhaṃ sthitvā'sau devaissaha ramāpatiḥ |
tato bhūri sa ca brahmā parameṇa samādhinā || 4 ||
[Analyze grammar]

manasā prāpya sarvajñaṃ brahmaṇā sa haristadā |
tuṣṭāva vāgbhiriṣṭvābhiśśaṃkaraṃ puruṣottamaḥ || 5 ||
[Analyze grammar]

|| viṣṇuruvāca |
maheśvarāya devāya namaste paramātmane |
nārāyaṇāya rudrāya brahmaṇe brahmarūpiṇe || 6 ||
[Analyze grammar]

evaṃ kṛtvā mahādevaṃ daṃḍavatpraṇipatya ha |
jajāpa rudramaṃtraṃ ca dakṣiṇāmūrtisaṃbhavam || 7 ||
[Analyze grammar]

jale sthitvā sārddhakoṭipramitaṃ tanmanāḥ prabhuḥ |
saṃsmaran manasā śaṃbhuṃ svaprabhuṃ parameśvaram || 8 ||
[Analyze grammar]

tāvaddevāstadā sarve tanmanaskā maheśvaram || 9 ||
[Analyze grammar]

devā ūcuḥ |
namassarvātmane tubhyaṃ śaṃkarāyārtihāriṇe |
rudrāya nīlakaṃṭhāya cidrūpāya pracetase || 10 ||
[Analyze grammar]

gatirnassarvadā tvaṃ hi sarvāpadvinivārakaḥ |
tvameva sarvadātmābhirvaṃdyo devārisūdana || 11 ||
[Analyze grammar]

tvamādistvamanādiśca svānaṃdaścākṣayaḥ prabhuḥ |
prakṛteḥ puruṣasyāpi sākṣātsraṣṭā jagatprabhuḥ || 12 ||
[Analyze grammar]

tvameva jagatāṃ kartā bhartā hartā tvameva hi |
brahmā viṣṇurharo bhūtvā rajassattvatamoguṇaiḥ || 13 ||
[Analyze grammar]

tārakosi jagatyasminsarveṣāmadhipo'vyayaḥ |
varado vāṅmayo vācyo vācyavācakavarjitaḥ || 14 ||
[Analyze grammar]

yācyo muktyarthamīśāno yogibhiryogavittamaiḥ |
hṛtpuṃḍarīkavivare yogināṃ tvaṃ hi saṃsthitaḥ || 15 ||
[Analyze grammar]

vadaṃti vedāstvāṃ saṃtaḥ parabrahmasvarūpiṇam |
bhavaṃtaṃ tattvamityadya tejorāśiṃ parātparam || 16 ||
[Analyze grammar]

paramātmānamityāhurarasmin jagati yadvibho |
tvameva śarva sarvātman trilokādhipate bhava || 17 ||
[Analyze grammar]

dṛṣṭaṃ śrutaṃ stutaṃ sarvaṃ jñāyamānaṃ jagadguro |
aṇoralpataraṃ prāhurmahatopi mahattaram || 18 ||
[Analyze grammar]

sarvataḥ pāṇipādāṃtaṃ sarvatokṣiśiromukham |
sarvataśśravaṇaghrāṇaṃ tvāṃ namāmi ca sarvataḥ || 19 ||
[Analyze grammar]

sarvajñaṃ sarvato vyāpin sarveśvaramanāvṛtam |
viśvarūpaṃ virūpākṣaṃ tvāṃ namāmi ca sarvataḥ || 20 ||
[Analyze grammar]

sarveśvaraṃ bhavādhyakṣaṃ satyaṃ śivamanuttamam |
koṭi bhāskarasaṃkāśaṃ tvāṃ namāmi ca sarvataḥ || 21 ||
[Analyze grammar]

viśvadevamanādyaṃtaṃ ṣaṭtriṃśatkamanīśvaram |
pravartakaṃ ca sarveṣāṃ tvāṃ namāmi ca sarvataḥ || 22 ||
[Analyze grammar]

pravartakaṃ ca prakṛtessarvasya prapitāmaham |
sarvavigrahamīśaṃ hi tvāṃ namāmi ca sarvataḥ || 23 ||
[Analyze grammar]

evaṃ vadaṃti varadaṃ sarvāvāsaṃ svayambhuvam |
śrutayaḥ śrutisārajñaṃ śrutisāravidaśca ye || 24 ||
[Analyze grammar]

adṛśyamasmābhiranekabhūtaṃ tvayā kṛtaṃ yadbhavatātha loke |
tvāmeva devāsurabhūsurāśca anye ca vai sthāvarajaṃgamāśca || 25 ||
[Analyze grammar]

pāhyananyagatīñśaṃbho surānno devavallabha |
naṣṭaprāyāṃstripurato vinihatyāsurānkṣaṇāt || 26 ||
[Analyze grammar]

māyayā mohitāste'dya bhavataḥ parameśvara |
viṣṇunā proktayuktyā ta ujjhitā dharmataḥ prabho || 27 ||
[Analyze grammar]

saṃtyaktasarvadharmāṃśca boddhāgamasamāśritāḥ |
asmadbhāgyavaśājjātā daityāste bhaktavatsala || 28 ||
[Analyze grammar]

sadā tvaṃ kāryakarttāhi devānāṃ śaraṇaprada |
vayaṃ te śaraṇāpannā yathecchasi tathā kuru || 29 ||
[Analyze grammar]

sanatkumāra uvāca |
iti stutvā maheśānaṃ devāstu purataḥ sthitāḥ |
kṛtāṃjalipuṭā dīnā āsan saṃnatamūrtayaḥ || 30 ||
[Analyze grammar]

stutaścaivaṃ surendrādyairviṣṇorjāpyena ceśvaraḥ |
agacchattatra sarveśo vṛṣamāruhya harṣitaḥ || 31 ||
[Analyze grammar]

viṣṇumāliṃgya naṃdiśādavaruhya prasannadhīḥ |
dadarśa sudṛśā tatra nandīdattakaro'khilān || 32 ||
[Analyze grammar]

atha devān samālokya kṛpādṛṣṭyā hariṃ haraḥ |
prāha gaṃbhīrayā vācā prasannaḥ pārvatīpatiḥ || 33 ||
[Analyze grammar]

śiva uvāca |
jñātaṃ mayedamadhunā devakāryaṃ sureśvara |
viṣṇormāyābalaṃ caiva nāradasya ca dhīmataḥ || 34 ||
[Analyze grammar]

teṣāmadharmaniṣṭhānāṃ daityānāṃ devasattama |
puratrayavināśaṃ ca kariṣye'haṃ na saṃśayaḥ || 35 ||
[Analyze grammar]

parantu te mahādaityā madbhaktā dṛḍhamānasāḥ |
atha vadhyā mayaiva syurvyājatyaktavṛṣottamāḥ || 36 ||
[Analyze grammar]

viṣṇurhanyātparo vātha yattyājitavṛṣāḥ kṛtāḥ |
daityā madbhaktirahitāssarve tripuravāsinaḥ || 37 ||
[Analyze grammar]

iti śaṃbhostu vacanaṃ śrutvā sarve divaukasaḥ |
vimanaskā babhūvuste hariścāpi munīśvara || 38 ||
[Analyze grammar]

devān viṣṇumudāsīnān dṛṣṭvā ca bhavakṛdvidhiḥ |
kṛtāṃjalipuraśśaṃbhuṃ brahmā vacanamabravīt || 39 ||
[Analyze grammar]

brahmovāca |
na kiṃcidvidyate pāpaṃ yasmāttvaṃ yogavittamaḥ |
parameśaḥ parabrahma sadā devarṣirakṣakaḥ || 40 ||
[Analyze grammar]

tavaiva śāsanātte vai mohitāḥ prerako bhavān |
tyaktasvadharmatvatpūjāḥ paravadhyāstathāpi na || 41 ||
[Analyze grammar]

atastvayā mahādeva surarṣiprāṇarakṣaka |
sādhūnāṃ rakṣaṇārthāya haṃtavyā mlecchajātayaḥ || 42 ||
[Analyze grammar]

rājñastasya na tatpāpaṃ vidyate dharmatastava |
tasmādrakṣeddvijān sādhūnkaṃṭakādvai viśodhayet || 43 ||
[Analyze grammar]

evamicchedihānyatra rājā cedrājyamātmanaḥ |
prabhutvaṃ sarvalokānāṃ tasmādrakṣasva mā ciram || 44 ||
[Analyze grammar]

munīndreśāstathā yajñā vedāśśāstrādayokhilāḥ |
prajāste devadeveśa hyayaṃ viṣṇurapi dhruvam || 45 ||
[Analyze grammar]

devatā sārvabhaumastvaṃ samrāṭsarveśvaraḥ prabho |
parivārastavaivaiṣa haryādi sakalaṃ jagat || 46 ||
[Analyze grammar]

yuvarājo haristeja brahmāhaṃ te purohitaḥ |
rājakāryakaraḥ śakrastvadājñāpari pālakaḥ || 47 ||
[Analyze grammar]

devā anyepi sarveśa tava śāsanayantritāḥ |
svasvakāryakarā nityaṃ satyaṃ satyaṃ na saṃśayaḥ || 48 ||
[Analyze grammar]

sanatkumāra uvāca |
etacchrutvā vacastasya brahmaṇaḥ parameśvaraḥ |
pratyuvāca prasannātmā śaṃkarassurapo vidhim || 49 ||
[Analyze grammar]

śiva uvāca |
he brahman yadyahaṃ devarājassamrāṭ prakīrttitaḥ |
tatprakāro na me kaścidgṛhṇīyāṃ yamiha prabhuḥ || 50 ||
[Analyze grammar]

ratho nāsti mahādivyastādṛk sārathinā saha |
dhanurbāṇādikaṃ cāpi saṃgrāme jayakārakam || 51 ||
[Analyze grammar]

yamāsthāya dhanurbāṇān gṛhītvā yojya va manaḥ |
nihaniṣyāmyahaṃ daityān prabalānapi saṃgare || 52 ||
[Analyze grammar]

sanatkumāra uvāca |
adya sabrahmakā devāssendropendrāḥ praharṣitāḥ |
śrutvā prabhostadā vākyaṃ natvā procurmaheśvaram || 53 ||
[Analyze grammar]

devā ūcuḥ || vayaṃ bhavāma deveśa tatprakārā maheśvara |
rathādikā tava svā minsaṃnaddhāssaṃgarāya hi || 54 ||
[Analyze grammar]

ityuktvā saṃhatāssarve śivecchāmadhigamya ha |
pṛthagūcuḥ prasannāste kṛtāñjalipuṭāssurāḥ || 55 ||
[Analyze grammar]

iti śrīśivamahāpurāṇe dvitīyāyāṃ rudrasaṃhitāyāṃ pañcame yuddhakhaṇḍe śivastutivarṇanaṃ nāma ṣaṣṭho'dhyāyaḥ || 6 ||
[Analyze grammar]