Chapter 13

[English text for this chapter is available]

sūta uvāca |
tārakāreriti śrutvā vṛttamadbhutamuttamam |
nāradassuprasannotha papraccha prītito vidhim || 1 ||
[Analyze grammar]

|| nārada uvāca |
devadeva prajānātha śivajñānanidhe mayā |
śrutaṃ kārtikasadvṛttamamṛtādapi cottamam || 2 ||
[Analyze grammar]

adhunā śrotumicchāmi gāṇeśaṃ vṛttamuttamam |
tajjanmacaritaṃ divyaṃ sarvamaṃgalamaṃgalam || 3 ||
[Analyze grammar]

sūta uvāca |
ityākarṇya vacastasya nāradasya mahāmune |
prasannamānaso brahmā pratyuvāca śivaṃ smaran || 4 ||
[Analyze grammar]

brahmovāca |
kalpabhedādgaṇeśasya janiḥ proktā vidheḥ parāt |
śanidṛṣṭaṃ śiraśchinnaṃ saṃcitaṃ gajamānanam || 5 ||
[Analyze grammar]

idānīṃ śvetakalpoktā gaṇeśotpattirucyate |
yatra cchinnaṃ śirastasya śivena ca kṛpālunā || 6 ||
[Analyze grammar]

saṃdeho nātra kartavyaḥ śaṃkarassūtikṛnmune |
sa hi sarvādhipaḥ śaṃbhurnirguṇassaguṇo 'pi hi || 7 ||
[Analyze grammar]

tallīlayākhilaṃ viśvaṃ sṛjyate pālyate tathā |
vināśyate muniśreṣṭha prastutaṃ śṛṇu cādarāt || 8 ||
[Analyze grammar]

udvāhite śive cātra kailāsaṃ ca gate sati |
kiyatā caiva kālena jāto gaṇapaterbhavaḥ || 9 ||
[Analyze grammar]

ekasminneva kāle ca jayā ca vijayā sakhī |
pārvatyā ca militvā vai vicāre tatparābhavat || 10 ||
[Analyze grammar]

rudrasya ca gaṇāssarve śivasyājñāparāyaṇāḥ |
te sarvepyasmadīyāśca nandibhṛṃgipurassarāḥ || 11 ||
[Analyze grammar]

pramathāste hyasaṃkhyātā asmadīyo na kaścana |
dvāri tiṣṭhanti te sarve śaṃkarājñāparāyaṇāḥ || 12 ||
[Analyze grammar]

te sarvepyasmadīyāṃśca tathāpi na milenmanaḥ |
ekaścaivāsmadīyo hi racanīyastvayānaghe || 13 ||
[Analyze grammar]

brahmovāca |
ityuktvā pārvatī devī sakhībhyāṃ sundaraṃ vacaḥ |
hitaṃ mene tadā tacca kartuṃ smāpyadhyavasyati || 14 ||
[Analyze grammar]

tataḥ kadācinmajjatyāṃ pārvatyāṃ vai sadāśivaḥ |
naṃdinaṃ paribhartsyātha hyājagāma gṛhāṃtaram || 15 ||
[Analyze grammar]

āyāṃtaṃ śaṃkaraṃ dṛṣṭvā'samaye jagadaṃbikā |
uttasthau majjatī sā vai lajjitā sundarī tadā || 16 ||
[Analyze grammar]

tasminnavasare devī kautukenātisaṃyutā |
tadīyaṃ tadvacaścaiva hitaṃ mene sukhāvaham || 17 ||
[Analyze grammar]

evaṃ jāte sadā kāle kadācitpārvatī śivā |
viciṃtya manasā ceti paramāyā pareśvarī || 18 ||
[Analyze grammar]

madīyassevakaḥ kaścidbhavecchubhataraḥ kṛtī |
madājñayā paraṃ nānyadrekhāmātraṃ calediha || 19 ||
[Analyze grammar]

vicāryeti ca sā devī vapuṣo malasaṃbhavam |
puruṣaṃ nirmamau sā tu sarvalakṣaṇasaṃyutam || 20 ||
[Analyze grammar]

sarvāvayavanirddoṣaṃ sarvāvayava sundaram |
viśālaṃ sarvaśobhāḍhyaṃ mahābalaparākramam || 21 ||
[Analyze grammar]

vastrāṇi ca tadā tasmai dattvā sā vividhāni hi |
nānālaṃkaraṇaṃ caiva bahvāśiṣamanuttamām || 22 ||
[Analyze grammar]

matputrastvaṃ madīyosi nānyaḥ kaścidihāsti me |
evamuktasya puruṣo namaskṛtya śivāṃ jagau || 23 ||
[Analyze grammar]

|| gaṇeśa uvāca |
kiṃ kāryaṃ vidyate tedya karavāṇi tavoditam |
ityuktā sā tadā tena pratyuvāca sutaṃ śivā || 24 ||
[Analyze grammar]

śivovāca |
he tāta śṛṇu madvākyaṃ dvārapālo bhavādya me |
matputrastvaṃ madīyo'si nānyathā kaścidasti me || 25 ||
[Analyze grammar]

vinā madājñāṃ matputra naivāyānma dgṛhāntaram |
ko'pi kvāpi haṭhāttāta satyametanmayoditam || 26 ||
[Analyze grammar]

brahmovāca |
ityuktvā ca dadau tasmai yaṣṭiṃ cātidṛḍhāṃ mune |
tadīyaṃ rūpamālokya sundaraṃ harṣamāgatā || 27 ||
[Analyze grammar]

mukhamācuṃbya suprītyāliṃgya taṃ kṛpayā sutam |
svadvāri sthāpayāmāsa yaṣṭipāṇiṃ gaṇādhipam || 28 ||
[Analyze grammar]

atha devīsutastāta gṛhadvāri sthito gaṇaḥ |
yaṣṭipāṇirmahāvīraḥ pārvatīhitakāmyayā || 29 ||
[Analyze grammar]

svadvāri sthāpayitvā taṃ gaṇeśaṃ svasutaṃ śivā |
svayaṃ ca majjatī sā vai saṃsthitāsītsakhīyutā || 30 ||
[Analyze grammar]

etasminneva kāle tu śivo dvāri samāgataḥ |
kautukī munirśādūla nānālīlāviśāradaḥ || 31 ||
[Analyze grammar]

uvāca ca śiveśaṃ tamavijñāya gaṇādhipaḥ |
māturājñāṃ vinā deva gamyatāṃ na tvayā dhunā || 32 ||
[Analyze grammar]

majjanārthaṃ sthitā mātā kva yāsīto vrajādhunā |
ityuktvā yaṣṭikāṃ tasya rodhanāya tadāgrahīt || 33 ||
[Analyze grammar]

taṃ dṛṣṭvā tu śivaḥ prāha kaṃ niṣedhasi mūḍhadhīḥ |
māṃ na jānāsyasadbuddhe śivohamiti nānyathā || 34 ||
[Analyze grammar]

tāḍitastena yaṣṭyā hi gaṇeśena maheśvaraḥ |
pratyuvāca sa taṃ putraṃ bahulīlaśca kopitaḥ || 35 ||
[Analyze grammar]

śiva uvāca |
murkhosi tvaṃ na jānāsi śivohaṃ girijāpatiḥ |
svagṛhaṃ yāmi re bāla niṣedhasi kathaṃ hi mām || 36 ||
[Analyze grammar]

ityuktvā praviśaṃtaṃ taṃ maheśaṃ gaṇanāyakaḥ |
krodhaṃ kṛtvā tato vipra daṃḍenātāḍayatpunaḥ || 37 ||
[Analyze grammar]

tataśśivaśca saṃkruddho gaṇānājñāpayannijān |
ko vāyaṃ vartate kiṃca kriyate paśyatāṃ gaṇāḥ || 38 ||
[Analyze grammar]

ityuktvā tu śivastatra sthitaḥ kruddho gṛhādbahiḥ |
bhavācāraratassvāmī bahvadbhutasulīlakaḥ || 39 ||
[Analyze grammar]

iti śrīśivamahāpurāṇe dvitīyāyāṃ rudrasaṃhitāyāṃ caturthe kumārakhaṇḍe gaṇeśotpattivarṇanaṃ nāma trayodaśo'dhyāyaḥ || 13 ||
[Analyze grammar]