Chapter 12

[English text for this chapter is available]

brahmovāca |
nihataṃ tārakaṃ dṛṣṭvā devā viṣṇupurogamāḥ |
tuṣṭuvuśśāṃkariṃ bhaktyā sarve'nye muditānanāḥ || 1 ||
[Analyze grammar]

devā ūcuḥ |
namaḥ kalyāṇarūpāya namaste viśvamaṃgala |
viśvabaṃdho namaste'stu namaste viśvabhāvana || 2 ||
[Analyze grammar]

namostu te dānavavaryahaṃtre bāṇāsuraprāṇaharāya deva |
pralaṃbanāśāya pavitrarūpiṇe namonamaśśaṃkaratāta tubhyam || 3 ||
[Analyze grammar]

tvameva karttā jagatāṃ ca bharttā tvameva harttā śucija prasīda |
prapañcabhūtastava lokabiṃbaḥ prasīda śambhvātmaja dīnabaṃdho || 4 ||
[Analyze grammar]

devarakṣākara svāminrakṣa nassarvadā prabho |
devaprāṇāvana kara prasīda karuṇākara || 5 ||
[Analyze grammar]

hatvā te tārakaṃ daityaṃ parivārayutaṃ vibho |
mocitāssakalā devā vipadbhyaḥ parameśvara || 6 ||
[Analyze grammar]

brahmovāca |
evaṃ stutaḥ kumāro'sau devairviṣṇumukhaiḥ prabhuḥ |
varāndadāvabhinavānsarvebhyaḥ kramaśo mune || 7 ||
[Analyze grammar]

śailānnirīkṣya stuvatastatassa giriśātmajaḥ |
suprasannataro bhūtvā provāca pradadadvarān || 8 ||
[Analyze grammar]

skanda uvāca |
yūyaṃ sarve parvatā hi pūjanīyāstapasvibhiḥ |
karmibhirjñānibhiścaiva sevyamānā bhaviṣyatha || 9 ||
[Analyze grammar]

śaṃbhorviśiṣṭarūpāṇi liṃgarūpāṇi caiva hi |
bhaviṣyatha na saṃdehaḥ parvatā vacanānmama || 10 ||
[Analyze grammar]

yo'yaṃ mātāmaho me'dya himavānparvatottamaḥ |
tapasvināṃ mahābhāgaḥ phalado hi bhaviṣyati || 11 ||
[Analyze grammar]

devā ūcuḥ |
evaṃ dattvā varānhatvā tārakaṃ cāsurādhipam |
tvayā kṛtāśca sukhino vayaṃ sarve carācarāḥ || 12 ||
[Analyze grammar]

idānīṃ khalu suprītyā kailāsaṃ giriśālayam |
jananī janakau draṣṭuṃ śivāśaṃbhū tvamarhasi || 13 ||
[Analyze grammar]

brahmovāca |
ityuktvā nikhilā devā viṣṇvādyā prāptaśāsanāḥ |
kṛtvā mahotsavaṃ bhūri sakumārā yayurgirim || 14 ||
[Analyze grammar]

kumāre gacchati vibhau kailāsaṃ śaṃkarālayam |
mahāmaṃgalamuttasthau jayaśabdo babhūva ha || 15 ||
[Analyze grammar]

āruroha kumāro'sau vimānaṃ paramarddhimat |
sarvatolaṃkṛtaṃ ramyaṃ sarvopari virājitam || 16 ||
[Analyze grammar]

ahaṃ viṣṇuśca samudau tadā cāmaradhāriṇau |
guha mūrdhni mahāprītyā mune'bhūva hyataṃdritau || 17 ||
[Analyze grammar]

indrādyā amarāssarve kurvaṃto guhasevanam |
yathocitaṃ caturdikṣu jagmuśca pramudāstadā || 18 ||
[Analyze grammar]

śaṃbhorjayaṃ prabhāṣaṃtaḥ prāpuste śaṃbhuparvatam |
sānaṃdā viviśustatroccarito maṃgaladhvaniḥ || 19 ||
[Analyze grammar]

dṛṣṭvā śivaṃ śivāṃ caiva sarve viṣṇvādayo drutam |
praṇamya śaṃkaraṃ bhaktyā karau baddhvā vinamrakāḥ || 20 ||
[Analyze grammar]

kumāro'pi vinītātmā vimānādavatīrya ca |
praṇanāma mudā śaṃbhuṃ śivāṃ siṃhāsanasthitām || 21 ||
[Analyze grammar]

atha dṛṣṭvā kumāraṃ taṃ tanayaṃ prāṇavallabham |
tau daṃpatī śivau devau mumudāte'ti nārada || 22 ||
[Analyze grammar]

mahāprabhussamutthāpya tamutsaṃge nyaveśayat |
mūrdhni jaghrau mudā snehāttaṃ pasparśa kareṇa ha || 23 ||
[Analyze grammar]

mahānaṃdabharaḥ śaṃbhuścakāra mukhacuṃbanam |
kumārasya mahāsnehāt tārakārermahāprabhoḥ || 24 ||
[Analyze grammar]

śivāpi taṃ samutthāpya svotsaṃge saṃnyaveśayat |
kṛtvā mūrdhni mahāsnehāt tanmukhābjaṃ cucumba hi || 25 ||
[Analyze grammar]

tayostadā mahāmodo vavṛdhe'tīva nārada |
daṃpatyoḥ śivayostāta bhavācāraṃ prakurvatoḥ || 26 ||
[Analyze grammar]

tadotsavo mahānāsīnnānāvidhiḥ śivālaye |
jayaśabdo namaśśabdo babhūvātīva sarvataḥ || 27 ||
[Analyze grammar]

tatassuragaṇāssarve viṣṇvādyā munayastathā |
supraṇamya mudā śaṃbhuṃ tuṣṭuvussaśivaṃ mune || 28 ||
[Analyze grammar]

devā ūcuḥ |
devadeva mahādeva bhaktānāmabhayaprada |
namo namaste bahuśaḥ kṛpākara maheśvara || 29 ||
[Analyze grammar]

adbhutā te mahādeva mahālīlā sukhapradā |
sarveṣāṃ śaṃkara satāṃ dīnabaṃdho mahāprabho || 30 ||
[Analyze grammar]

evaṃ mūḍhadhiyaścājñāḥ pūjāyāṃ te sanātanam |
āvāhanaṃ na jānīmo gatiṃ naiva prabhodbhutām || 31 ||
[Analyze grammar]

gaṃgāsaliladhārāya hyādhārāya guṇātmane |
namaste tridaśeśāya śaṃkarāya namonamaḥ || 32 ||
[Analyze grammar]

vṛṣāṃkāya maheśāya gaṇānāṃ pataye namaḥ |
sarveśvarāya devāya trilokapataye namaḥ || 33 ||
[Analyze grammar]

saṃhartre jagatāṃ nātha sarveṣāṃ te namo namaḥ |
bhartre kartre ca deveśa triguṇeśāya śāśvate || 34 ||
[Analyze grammar]

visaṃgāya pareśāya śivāya paramātmane |
niṣprapaṃcāya śuddhāya paramāyāvyayāya ca || 35 ||
[Analyze grammar]

daṇḍahastāya kālāya pāśahastāya te namaḥ |
vedamaṃtrapradhānāya śatajihvāya te namaḥ || 36 ||
[Analyze grammar]

bhūtaṃ bhavyaṃ bhaviṣyacca sthāvaraṃ jaṃgamaṃ ca yat |
tava dehātsamutpannaṃ sarvathā parameśvara || 37 ||
[Analyze grammar]

pāhi nassarvadā svāminprasīda bhagavanprabho |
vayaṃ te śaraṇāpannāḥ sarvathā parameśvara || 38 ||
[Analyze grammar]

śitikaṇṭhāya rudrāya svāhākārāya te namaḥ |
arūpāya sarūpāya viśvarūpāya te namaḥ || 39 ||
[Analyze grammar]

śivāya nīlakaṃṭhāya citābhasmāṃgadhāriṇe |
nityaṃ nīlaśikhaṃḍāya śrīkaṇṭhāya namonamaḥ || 40 ||
[Analyze grammar]

sarvapraṇatadehāya saṃyamapraṇatāya ca |
mahādevāya śarvāya sarvārcitapadāya ca || 41 ||
[Analyze grammar]

tvaṃ brahmā sarvadevānāṃ rudrāṇāṃ nīlalohitaḥ |
ātmā ca sarvabhūtānāṃ sāṃkhyaiḥ puruṣa ucyase || 42 ||
[Analyze grammar]

parvatānāṃ sumerustvaṃ nakṣatrāṇāṃ ca candramā |
ṛṣīṇāṃ ca vaśiṣṭhastvaṃ devānāṃ vāsavastathā || 43 ||
[Analyze grammar]

akārassarvavedānāṃ trātā bhava maheśvara |
tvaṃ ca lokahitārthāya bhūtāni pariṣiṃcasi || 44 ||
[Analyze grammar]

maheśvara mahābhāga śubhāśubhanirīkṣaka |
āpyāyāsmānhi deveśa kartṝnvai vacanaṃ tava || 45 ||
[Analyze grammar]

rūpakoṭisahasreṣu rūpakoṭiśateṣu te |
aṃtaṃ gaṃtuṃ na śaktāḥ sma devadeva namostu te || 46 ||
[Analyze grammar]

|| brahmovāca |
iti stutvākhilā devā viṣṇvādyā pramukhasthitāḥ |
muhurmuhussupraṇamya skaṃdaṃ kṛtvā purassaram || 47 ||
[Analyze grammar]

devastutiṃ samākarṇya śivassarveśvarassvarāṭ |
suprasanno babhūvātha vijahāsa dayāparaḥ || 48 ||
[Analyze grammar]

uvāca suprasannātmā viṣṇvādīnsurasattamān |
śaṃkaraḥ parameśāno dīnabaṃdhussatāṃ gatiḥ || 49 ||
[Analyze grammar]

śiva uvāca |
he hare he vidhe devā vākyaṃ me śṛṇutādarāt |
sarvathāhaṃ satāṃ trātā devānāṃ vaḥ kṛpānidhiḥ || 50 ||
[Analyze grammar]

duṣṭahaṃtā trilokeśaśśaṃkaro bhaktavatsalaḥ |
kartā bhartā ca hartā ca sarveṣāṃ nirvikāravān || 51 ||
[Analyze grammar]

yadā yadā bhavedduḥkhaṃ yuṣmākaṃ devasattamāḥ |
tadā tadā māṃ yūyaṃ vai bhajaṃtu sukhahetave || 52 ||
[Analyze grammar]

brahmovāca |
ityājñaptastadā devā viṣṇvādyāssamunīśvarāḥ |
śivaṃ praṇamya saśivaṃ kumāraṃ ca mudānvitāḥ || 53 ||
[Analyze grammar]

kathayaṃto yaśo ramyaṃ śivayośśāṃkareśca tat |
ānandaṃ paramaṃ prāpya svadhāmāni yayu rmune || 54 ||
[Analyze grammar]

śivopi śivayā sārddhaṃ sagaṇaḥ parameśvaraḥ |
kumāreṇayutaḥ prītyovāsa tasmingirau mudā || 55 ||
[Analyze grammar]

ityevaṃ kathitaṃ sarvaṃ kaumāraṃ caritaṃ mune |
śaivaṃ ca sukhadaṃ divyaṃ kimanyacchrotumicchasi || 56 ||
[Analyze grammar]

iti śrīśivamahāpurāṇe dvitīyāyāṃ rudrasaṃhitāyāṃ caturthe kumārakhaṃḍe svāmikārtikacaritagarbhitaśivāśivacaritavarṇanaṃ nāma dvādaśo'dhyāyaḥ || 12 ||
[Analyze grammar]