Chapter 45

[English text for this chapter is available]

brahmovāca |
etasminnantare tvaṃ hi viṣṇunā prerito drutam |
anukūlayituṃ śaṃbhumayāstannikaṭe mune || 1 ||
[Analyze grammar]

tatra gatvā sa vai rudro bhavatā suprabodhitaḥ |
stotrairnānāvidhaisstutvā devakāryacikīrṣayā || 2 ||
[Analyze grammar]

śrutvā tvadvacanaṃ prītyā śaṃbhunā dhṛtamadbhutam |
svarūpamuttamandivyaṃ kṛpālutvaṃ ca darśitam || 3 ||
[Analyze grammar]

taddṛṣṭvā sundaraṃ śambhuṃ svarūpammanmathā dhikam |
atyahṛṣyo mune tvaṃ hi lāvaṇyaparamāyanam || 4 ||
[Analyze grammar]

stotrairnānāvidhaisstutvā paramānandasaṃyutaḥ |
āgacchastvaṃ mune tatra yatra menā sthitākhilaiḥ || 5 ||
[Analyze grammar]

tatrāgatya suprasanno mune'tipremasaṃkulaḥ |
harṣayaṃstāṃ śailapatnī menāntvaṃ vākyamabravīḥ || 6 ||
[Analyze grammar]

nārada uvāca |
mene paśya viśālākṣi śivarūpamanuttamam |
kṛtā śivena tenaiva sukṛpā karuṇātmanā || 7 ||
[Analyze grammar]

brahmovāca |
śrutvā sā tadvaco menā vismitā śailakāminī |
dadarśa śivarūpantatparamānandadāyakam || 8 ||
[Analyze grammar]

koṭisūryapratīkāśaṃ sarvāvayavasundaram |
vicitravasanaṃ cātra nānābhūṣaṇabhūṣitam || 9 ||
[Analyze grammar]

suprasannaṃ suhāsaṃ ca sulāvaṇyaṃ manoharam |
gaurābhaṃ dyutisaṃyuktaṃ candrarekhāvibhūṣitam || 10 ||
[Analyze grammar]

sarvairdevagaṇaiḥ prītyā viṣṇvādyassevitaṃ tathā |
sūryeṇa cchatritaṃ mūrdhni candreṇa ca viśobhitam || 11 ||
[Analyze grammar]

sarvathā ramaṇīyaṃ ca bhūṣitasya vibhūṣaṇaiḥ |
vāhanasya mahāśobhā varṇituṃ naiva śakyate || 12 ||
[Analyze grammar]

gaṃgā ca yamunā caiva vidhattaḥ sma sucāmare |
siddhayo'ṣṭau purastasya kurvanti sma sunarttanam || 13 ||
[Analyze grammar]

mayā caiva tadā viṣṇurindrādyā hyamarāstathā |
svaṃ svaṃ veṣaṃ susambhūṣya giriśenācaranyutāḥ || 14 ||
[Analyze grammar]

tathā jayeti bhāṣanto nānārūpā gaṇāstadā |
svalaṅkṛtamahāmodā girīśapurato'caran || 15 ||
[Analyze grammar]

siddhāścopasurāssarve munayaśca mahāsukhāḥ |
yayuśśivena suprītāssakalāścāpare tathā || 16 ||
[Analyze grammar]

evandevādayassarve kutūhalasamanvitāḥ |
paraṃbrahma gṛṇantaste svapatnībhiralaṃkṛtāḥ || 17 ||
[Analyze grammar]

viśvāvasumukhāstatra hyapsarogaṇasaṃyutāḥ |
gāyantopyagratastasya paramaṃ śāṅkaraṃ yaśaḥ || 18 ||
[Analyze grammar]

itthaṃ mahotsavastatra babhūva munisa ttama |
nānāvidho maheśe hi śailadvāri ca gacchati || 19 ||
[Analyze grammar]

tasmiṃśca samaye tatra suṣamā yā parātmanaḥ |
varṇituṃ tāṃ viśeṣeṇa kaśśaknoti munīśvara || 20 ||
[Analyze grammar]

tathāvidhaṃ ca tandṛṣṭvā menā citragatā iva |
kṣaṇamāsīttataḥ prītyā provāca vacanaṃ mune || 21 ||
[Analyze grammar]

menovāca |
dhanyā putrī madīyā ca yayā taptaṃ mahattapaḥ |
yatprabhāvānmaheśāna tvaṃ prāpta iha madgṛhe || 22 ||
[Analyze grammar]

mayā kṛtā purā yā vai śivanindā duratyayā |
tāṃ kṣamasva śivāsvāminsuprasanno bhavādhunā || 23 ||
[Analyze grammar]

brahmovāca |
itthaṃ sambhāṣya sā menā saṃstūyendulalāṭakam |
sāñjaliḥ praṇatā śailapriyā lajjāparā'bhavat || 24 ||
[Analyze grammar]

tāvatstriyassamājagmurhitvā kāmānanekaśaḥ |
bahvyastāḥ puravāsinyaśśivadarśanalālasāḥ || 25 ||
[Analyze grammar]

majjanaṃ kurvatī kācittaccūrṇasahitā yayau |
draṣṭuṃ kutūhalāḍhyā ca śaṅkaraṃ girijāvaram || 26 ||
[Analyze grammar]

kācittu svāminassevāṃ sakhīyuktā vihāya ca |
sucāmarakarā prītyāgācchambhordarśanāya vai || 27 ||
[Analyze grammar]

kācittu bālakaṃ hitvā pibantaṃ stanyamādarāt |
atṛptaṃ śaṅkarandraṣṭuṃ yayau darśanalālasā || 28 ||
[Analyze grammar]

raśanāṃ badhnatī kācittayaiva sahitā yayau |
vasanaṃ viparītaṃ vai dhṛtvā kācidyayau tataḥ || 29 ||
[Analyze grammar]

bhojanārthaṃ sthitaṃ kāntaṃ hitvā kācidyayau priyā |
draṣṭuṃ śivāvaraṃ prītyā satṛṣṇā sakutūhalā || 30 ||
[Analyze grammar]

kāciddhaste śalākāṃ ca dhṛtvāṃjanakarā priyā |
añjitvaikākṣi sandraṣṭuṃ yayau śailasutāvaram || 31 ||
[Analyze grammar]

kācittu kāminī pādau rañjayantī hyalaktakaiḥ |
śrutvā ghoṣaṃ ca taddhitvā darśanārthamupāgatā || 32 ||
[Analyze grammar]

ityādi vividhaṃ kāryaṃ hitvā vāsaṃ striyo yayuḥ |
dṛṣṭvā tu śāṃkaraṃ rūpaṃ mohaṃ prāptāstadā'bhavan || 33 ||
[Analyze grammar]

tatastāḥ premasaṃvignāśśivadarśanaharṣitāḥ |
nidhāya hṛdi tanmūrtiṃ vacanaṃ cedamabruvan || 34 ||
[Analyze grammar]

puravāsinya ūcuḥ |
netrāṇi saphalānyāsanhimavatpuravāsinām |
yo yo'paśyadado rūpaṃ tasya vai sārthakaṃ januḥ || 35 ||
[Analyze grammar]

tasyaiva saphalaṃ janma tasyaiva saphalāḥ kriyāḥ |
yena dṛṣṭaśśivassākṣātsarvapāpapraṇāśakaḥ || 36 ||
[Analyze grammar]

pārvatyā sādhitaṃ sarvaṃ śivārthaṃ yattapaḥ kṛtam |
dhanyeyaṃ kṛtakṛtyeyaṃ śivā prāpya śivampatim || 37 ||
[Analyze grammar]

yadīdaṃ yugalaṃ brahmā na yuṃjyācchivayormudā |
tadā ca sakalo'pyasya śramo niṣphalatāmiyāt || 38 ||
[Analyze grammar]

samyak kṛtaṃ tathā cātra yojitaṃ yugmamuttamam |
sarveṣāṃ sārthatā jātā sarvakāryasamudbhavā || 39 ||
[Analyze grammar]

vinā tu tapasā śambhordarśanaṃ durlabhannṛṇām |
darśanācchaṃkarasyaiva sarve yātāḥ kṛtārthatām || 40 ||
[Analyze grammar]

lakṣmīrnārāyaṇaṃ lebhe yathā vai svāminampurā |
tathāsau pārvatī devī haramprāpya subhūṣitā || 41 ||
[Analyze grammar]

brahmāṇaṃ ca yathā lebhe svāminaṃ vai sarasvatī |
tathāsau pārvatī devī haramprāpya subhūṣitā || 42 ||
[Analyze grammar]

vayandhanyāḥ striyassarvāḥ puruṣāssakalā varāḥ |
ye ye paśyanti sarveśaṃ śaṃkaraṃ girijāpatim || 43 ||
[Analyze grammar]

brahmovāca || itthamuktvā tu vacanaṃ candanaiścākṣatairapi |
śivaṃ samarcayāmāsurlājānvavṛṣurādarāt || 44 ||
[Analyze grammar]

tasthustatra striyaḥ sarvā menayā saha sotsukāḥ |
varṇayantyo'dhikambhāgyammenāyāśca girerapi || 45 ||
[Analyze grammar]

kathāstathāvidhāśśṛṇvaṃstadvāmā varṇitāśśubhāḥ |
prahṛṣṭo'bhūtprabhuḥ sarvairmune viṣṇvādibhistadā || 46 ||
[Analyze grammar]

iti śrīśivamahāpurāṇe dvitīyāyāṃ rudrasaṃhitāyāṃ tṛtīye pārvatīkhaṇḍe śivasundarasvarūpapuravāsyutsavavarṇanaṃ nāma pañcacatvāriṃśo'dhyāyaḥ || 45 ||
[Analyze grammar]