Chapter 44

[English text for this chapter is available]

|| brahmovāca |
saṃjñāṃ labdhā tatassā ca menā śailapriyā satī |
vilalāpātisaṃkṣubdhā tiraskāramathākarot || 1 ||
[Analyze grammar]

tatra tāvatsvaputrāṃśca nininda khalitā muhuḥ |
prathamaṃ sā tataḥ putrī kathayāmāsa durvacaḥ || 2 ||
[Analyze grammar]

|| menovāca |
mune purā tvayā proktaṃ variṣyati śivā śivam |
paścāddhimavataḥ kṛtyaṃ pūjārthaṃ viniveśitam || 3 ||
[Analyze grammar]

tato dṛṣṭaṃ phalaṃ satyaṃ viparītamanarthakam |
mune'dhamāhaṃ durbuddhe sarvathā vañcitā tvayā || 4 ||
[Analyze grammar]

punastayā tapastaptaṃ duṣkaraṃ munibhiśca yat |
tasya labdhaṃ phalaṃ hyetatpaśyatāṃ duḥkhadāyakam || 5 ||
[Analyze grammar]

kiṃ karomi kva gacchāmi ko me duḥkhaṃ vyapohatām |
kulādikaṃ vinaṣṭaṃ me vihitaṃ jīvitaṃ mama || 6 ||
[Analyze grammar]

kva gatā ṛṣayo divyāḥ śmaśrūṇi troṭayāmyaham |
tapasvinī ca yā patnī sā dhūrtā svayamāgatā || 7 ||
[Analyze grammar]

keṣāñcaivāparādhena sarvaṃ naṣṭaṃ mamādhunā |
ityuktvā vīkṣya ca sutāmuvāca vacanaṃ kaṭu || 8 ||
[Analyze grammar]

kiṃ kṛtaṃ te sute duṣṭe karma duḥkhakaraṃ mama |
hema dattvā tvayānītaḥ kāco vai duṣṭayā svayam || 9 ||
[Analyze grammar]

hitvā tu candanaṃ bhūyo lepitaḥ kardamastvayā |
haṃsamuḍḍīya kāko vai gṛhīto hastapañjare || 10 ||
[Analyze grammar]

hitvā brahmajalaṃ dūre pītaṃ kūpodakaṃ tvayā |
sūryaṃ hitvā tu khadyoto gṛhīto yatnatastvayā || 11 ||
[Analyze grammar]

taṇḍulāṃśca tathā hitvā kṛtaṃ vai tuṣabhakṣaṇam |
prakṣipyājyaṃ tathā tailaṃ kāraṇḍaṃ bhuktamādarāt || 12 ||
[Analyze grammar]

siṃhasevāṃ tathā muktvā śṛgālassevitastvayā |
brahmavidyāṃ tathā muktvā kugāthā ca śrutā tvayā || 13 ||
[Analyze grammar]

gṛhe yajñavibhūtiṃ hi dūrīkṛtya sumaṃgalām |
gṛhītaśca citābhasma tvayā putri hyamaṃgalam || 14 ||
[Analyze grammar]

sarvān devavarāṃstyaktvā viṣṇvādīnparameśvarān |
kṛtaṃ tvayā kubuddhyā vai śivārthaṃ tapa īdṛśam || 15 ||
[Analyze grammar]

dhiktvā ca tava buddhiśca dhigrūpaṃ caritaṃ tava |
dhik copadeśakarttāraṃ dhiksakhyāvapi te tathā || 16 ||
[Analyze grammar]

āvāṃ ca dhiktathā putrī yau te janmapravartakau |
dhikte nārada buddhiñca saptarṣīṃśca subuddhidān || 17 ||
[Analyze grammar]

dhikkulaṃ dhikkriyādākṣyaṃ sarvaṃ dhigyatkṛtaṃ tvayā |
gṛhantu dhukṣitaṃ tvetanmaraṇaṃ tu mamaiva hi || 18 ||
[Analyze grammar]

pārvatānāmayaṃ rājā nāyātu nikaṭe mama |
saptarṣayassvayaṃ naiva darśayantu mukhammama || 19 ||
[Analyze grammar]

sādhitaṃ kiñca sarvaistu militvā ghātitaṃ kulam |
vandhyāhaṃ na kathaṃ jātā garbho na galitaḥ katham || 20 ||
[Analyze grammar]

atho na vā mṛtā cāhaṃ putrikā na mṛtā katham |
rakṣasādya kathaṃ no vā bhakṣitā gagane punaḥ || 21 ||
[Analyze grammar]

chedayāmi śiraste'dya kiṃ karomi kalevaraiḥ |
tyaktvā tvāṃ ca kuto yāyāṃ hāhā me jīvitaṃ hatam || 22 ||
[Analyze grammar]

||brahmovāca |
ityuktvā patitā sā ca menā bhūmau vimūrchitā |
vyākulā śokaroṣādyairna gatā bhartṛsannidhau || 23 ||
[Analyze grammar]

hāhākāro mahānāsītta sminkāle munīśvara |
sarve samāgatāstatra kramāttatsannidhau surāḥ || 24 ||
[Analyze grammar]

purā devamune cāhamāgatastu svayaṃ tadā |
māṃ dṛṣṭvā tvaṃ vacastā vai prāvoca ṛṣisattama || 25 ||
[Analyze grammar]

nārada uvāca |
yathārthaṃ suṃdaraṃ rūpaṃ nā jñātaṃ te śivasya vai |
līlayedaṃ dhṛtaṃ rūpaṃ na yathārthaṃ śivena ca || 26 ||
[Analyze grammar]

tasmātkrodhaṃ parityajya svasthā bhava pativrate |
kāryyaṃ kuru haṭhaṃ tyaktvā śivāṃ dehi śivāya ca || 27 ||
[Analyze grammar]

|| brahmovāca |
tadākarṇya vacaste sā menā tvāṃ vākyamabravīt |
uttiṣṭheto gaccha dūraṃ duṣṭādhamavaro bhavān || 28 ||
[Analyze grammar]

ityukte tu tayā deva indrādyāḥ sakalāḥ kramāt |
samāgatya ca dikpālā vacanaṃ cedamabruvan || 29 ||
[Analyze grammar]

|| devā ūcuḥ |
he mene pitṛkanye hi śṛṇvasmadvacanammudā |
ayaṃ vai paramaḥ sākṣācchivaḥ parasukhāvahaḥ || 30 ||
[Analyze grammar]

kṛpayā ca bhavatputryāstapo dṛṣṭvātidussaham |
darśanaṃ dattavāñchambhurvaraṃ sadbhaktavatsalaḥ || 31 ||
[Analyze grammar]

|| brahmovāca |
athovāca surānmenā vilapyāti muhurmuhuḥ |
na deyā tu mayā kanyā giriśāyograrūpiṇe || 32 ||
[Analyze grammar]

kimarthantu bhavantaśca sarve devāḥ prapañcitāḥ |
rūpamasyāḥ parannāma vyarthīkartuṃ samudyataḥ || 33 ||
[Analyze grammar]

ityukte ca tayā tatra ṛṣayassapta eva hi |
ūcuste vaca āgatya vasiṣṭhādyā munīśvara || 34 ||
[Analyze grammar]

saptarṣayaḥ ūcuḥ |
kāryyaṃ sādhayitumprāptāḥ pitṛkanye giripriye |
viruddhaṃ cātra uktārthe kathammanyāmahe vayam || 35 ||
[Analyze grammar]

brahmovāca |
ayaṃ vai paramo lābho darśanaṃ śaṃkarasya yat |
dānapātraṃ sa te bhūtvāgatastava ca maṃdiram || 36 ||
[Analyze grammar]

|| brahmovāca |
ityuktvā taistato menā munivākyaṃ mṛṣākarot |
pratyuvāca ca ruṣṭā sā tānṛṣīñjñānadurbalā || 37 ||
[Analyze grammar]

menovāca |
śastrādyairghātayiṣyehaṃ na hāsye śaṃkarāyatām |
dūraṃ gacchata sarve hi nāgantavyaṃ madantike || 38 ||
[Analyze grammar]

brahmovāca |
ityuktvā virarāmāśu sā vilapyātivihvalā |
hāhākāro mahānāsīttatra tadvṛttato mune || 39 ||
[Analyze grammar]

tato himālayastatrājagāmātisamākulaḥ |
tāñca bodhayituṃ prītyā prāha tattvañca darśayan || 40 ||
[Analyze grammar]

himālaya uvāca |
śṛṇu mene vaco me'dya vikalā'si kathampriye |
ke ke samāgatā gehaṃ kathaṃ caitānvinindasi || 41 ||
[Analyze grammar]

śaṃkaraṃ tvaṃ ca jānāsi rūpaṃ dṛṣṭvāsi vihvalā |
vikaṭaṃ tasya śaṃbhostu nānārūpābhidhasya hi || 42 ||
[Analyze grammar]

sa śaṃkaro mayā jñātassarveṣāṃ pratipālakaḥ |
pūjyānāṃ pūjya evāsau kartānugrahanigrahān || 43 ||
[Analyze grammar]

haṭhaṃ na kuru muñca tvaṃ duḥkhaṃ prāṇapriye'naghe |
uttiṣṭhāraṃ tathā kāryaṃ kartumarhasi suvrate || 44 ||
[Analyze grammar]

yadvai dvāragataśśaṃbhuḥ purā vikaṭarūpadhṛk |
nānālīlāñca kṛtavāñcetayāmi ca tāmimām || 45 ||
[Analyze grammar]

tanmāhātmyaṃ paraṃ dṛṣṭvā kanyāṃ dātuṃ tvayā mayā |
aṃgīkṛtaṃ tadā devi tatpramāṇaṃ kuru priye || 46 ||
[Analyze grammar]

brahmovāca |
ityuktvā so'drinātho hi virarāma tato mune |
tadākarṇya śivāmātā menovāca himālayam || 47 ||
[Analyze grammar]

menovāca |
madvacaḥ śrūyatāṃ nātha tathā kartuṃ tvamarhasi |
gṛhītvā tanujāṃ caināṃ baddhvā kaṇṭhe tu pārvatīm || 48 ||
[Analyze grammar]

adhaḥ pātaya niḥśaṃkaṃ dāsye tāṃ na harāya hi |
tathaināmathavā nātha gatvā vai sāgare sutām || 49 ||
[Analyze grammar]

nimajjaya dayāṃ tyaktvā tato'drīśa sukhī bhava |
yadi dāsyasi putrī tvaṃ rudrāya vikaṭātmane |
tarhi tyakṣyāmyahaṃ svāminniścayena kalevaram || 50 ||
[Analyze grammar]

|| brahmovāca |
ityukte ca tadā tatra vacane menayā haṭhān |
uvāca vacanaṃ ramyaṃ pārvatī svayamāgatā || 51 ||
[Analyze grammar]

pārvatyuvāca |
mātaste viparītā hi buddhirjātā'śubhāvahā |
dharmāvalambanāttvaṃ hi kathandharmaṃ jahāsi vai || 52 ||
[Analyze grammar]

ayaṃ rudro'parassākṣātsarvaprabhava īśvaraḥ |
śambhussurūpassukhadassarvaśrutiṣu varṇitaḥ || 53 ||
[Analyze grammar]

maheśaśśaṃkaraścāyaṃ sarvadevaprabhussvarāṭ |
nānārūpābhidho mātarharibrahmādisevitaḥ || 54 ||
[Analyze grammar]

adhiṣṭhānaṃ ca sarveṣāṃ kartā hartā ca sa prabhuḥ |
nirvikārī trideveśo hyavināśī sanātanaḥ || 55 ||
[Analyze grammar]

yadarthe devatāssarvā āyātā kiṃkarīkṛtāḥ |
dvāri te sotsavāścādya kimato'nyatparaṃ sukham || 56 ||
[Analyze grammar]

uttiṣṭhātaḥ prayatnena jīvitaṃ saphalaṃ kuru |
dehi māṃ tvaṃ śivāyāsmai svāśramaṃ kuru sārthakam || 57 ||
[Analyze grammar]

dehi māṃ parameśāya śaṃkarāya jananyaho |
svīkuru tvamimaṃ mātarvinayamme bravīmi te || 58 ||
[Analyze grammar]

cenna dāsyasi tasmai māṃ na vṛṇe'nyamahaṃ varam |
bhāgaṃ labhetkathaṃ saiṃhaṃ śṛgālaḥ paravaṃcakaḥ || 59 ||
[Analyze grammar]

manasā vacasā mātaḥ karmaṇā ca harastvayam |
mayā vṛto vṛtaścaiva yadicchasi tathā kuru || 60 ||
[Analyze grammar]

brahmovāca |
ityākarṇya śivāvākyaṃ menā śaileśvarapriyā |
suvilapya mahākruddhā gṛhītvā tatkalevaram || 61 ||
[Analyze grammar]

muṣṭibhiḥ kūrparaiścaiva dantāndharṣayatī ca sā |
tāḍayāmāsa tāṃ putrīṃ vihvalātiruṣānvitā || 62 ||
[Analyze grammar]

ye tatra ṛṣayastāta tvadādyāścāpare mune |
taddhastāttāmparicchidya nityurdūrataraṃ tataḥ || 63 ||
[Analyze grammar]

tānvai tathā vidhāndṛṣṭvā bhartsayitvā punaḥ punaḥ |
uvāca śrāvayantī sā durvaco nikhilānpunaḥ || 64 ||
[Analyze grammar]

menovāca |
kiṃ menā hi kariṣye'haṃ duṣṭāṃ grahavatīṃ śivām |
dāsyāmyasyai garantīvraṃ kūpe kṣepsyāmi vā dhruvam || 65 ||
[Analyze grammar]

chetsyāmi kālīmathavā śastrāstrairbhūrikhaṇḍaśaḥ |
nimajjayiṣye vā sindhau svasutāmpārvatīṃ khalu || 66 ||
[Analyze grammar]

athavā svaśarīraṃ hi tyakṣyāmyāśvanyathā dhruvam |
na dāsye śambhave kanyāṃ durgāṃ vikaṭarūpiṇe || 67 ||
[Analyze grammar]

varo'yaṃ kīdṛśo bhīmo'nayā labdhaśca duṣṭayā |
kāritaścopahāso me gireścāpi kulasya hi || 68 ||
[Analyze grammar]

na mātā na pitā bhrātā na bandhurgotrajo'pi hi |
no surūpaṃ na cāturyyaṃ na guhaṃ vāsya kiṃcana || 69 ||
[Analyze grammar]

na vastraṃ nāpyalaṅkārāssahāyāḥ ke'pi tasya na |
vāhanaṃ na śubhaṃ hyasya na vayo na dhanantathā || 70 ||
[Analyze grammar]

na pāvitryaṃ na vidyā ca kīdṛśaḥ kāya ārtidaḥ |
kiṃ vilokya mayā putrī deyāsmai syātsumaṃgalā || 71 ||
[Analyze grammar]

brahmovāca |
ityādi suvilapyātha bahuśo menakā tadā |
rurodoccairmune sā hi duḥkhaśokapariplutā || 72 ||
[Analyze grammar]

athāhandrutamāgatyākathayammenakāṃ ca tām |
śivatattvaṃ ca paramaṃ kujñānaharamuttamam || 73 ||
[Analyze grammar]

brahmovāca |
śrotavyamprītito mene madīyaṃ vacanaṃ śubham |
yasya śravaṇataḥ prītyā kubuddhiste vinaśyati || 74 ||
[Analyze grammar]

śaṅkaro jagataḥ kartā bhartā hartā tathaiva ca |
na tvaṃ jānāsi tadrūpaṃ kathanduḥkhaṃ samīhase || 75 ||
[Analyze grammar]

anekarūpanāmā ca nānā līlākaraḥ prabhuḥ |
sarvasvāmī svatantraśca māyādhīśo'vikalpakaḥ || 76 ||
[Analyze grammar]

iti vijñāya mene tvaṃ śivāndehi śivāya vai |
kuhaṭhantyaja kujñānaṃ sarvakāryavināśanam || 77 ||
[Analyze grammar]

brahmovāca |
ityuktā sā mayā menā vilapantī muhurmuhuḥ |
lajjāṃ kiṃcicchanaistyaktvā mune māṃ vākyamabravīt || 78 ||
[Analyze grammar]

menovāca |
kimarthantu bhavānbrahmanrūpamasya mahāvaram |
vyarthīkaroti kimiyaṃ hanyatāṃ na svayaṃ śivā || 79 ||
[Analyze grammar]

na vaktavyaṃ ca bhavatā śivāya pratidīyatām |
na dāsye'haṃ śivāyaināṃ svasutāmprāṇavallabhām || 80 ||
[Analyze grammar]

brahmovāca |
ityukte tu tadā siddhāḥ sanakādyā mahāmune |
samāgatya mahāprītyā vacanaṃ hīdamabruvan || 81 ||
[Analyze grammar]

siddhā ūcuḥ |
ayamvai paramassākṣācchivaḥ parasukhāvahaḥ |
kṛpayā ca bhavatputryai darśanandattavānprabhuḥ || 82 ||
[Analyze grammar]

|| brahmovāca |
athovāca tu tānmenā vilapya ca muhurmuhuḥ |
na deyā tu mayā samyaggiriśāyograrūpiṇe || 83 ||
[Analyze grammar]

kimarthantu bhavantaśca sarve siddhāḥ prapañcinaḥ |
rūpamasyāḥ paraṃ nāma vyarthīkarttuṃ samudyatāḥ || 84 ||
[Analyze grammar]

ityukte ca tayā tatra mune'haṃ cakito'bhavam |
sarve vismayamāpannā devasiddharṣimānavāḥ || 85 ||
[Analyze grammar]

etasminsamaye tasyā haṭhaṃ śrutvā dṛḍhaṃ mahat |
drutaṃ śivapriyo viṣṇussamāgatyā'bravīdidam || 86 ||
[Analyze grammar]

viṣṇuruvāca |
pitṝṇāṃ ca priyā putrī mānasī guṇasaṃyutā |
patnī himavatassākṣādbrahmaṇaḥ kulamuttamam || 87 ||
[Analyze grammar]

sahāyāstādṛśā loke dhanyā hyasi vadāmi kim |
dharmasyādhārabhūtāsi kathaṃ dharmaṃ jahāsi hi || 88 ||
[Analyze grammar]

devaiśca ṛṣibhiścaiva brahmaṇā vā mayā tathā |
viruddhaṃ kathyate kiṃ nu tvayaiva suvicāryatām || 89 ||
[Analyze grammar]

śivatvaṃ na ca jānāsi nirguṇasya guṇassa hi |
virūpassa surūpo hi sarvasevyassatāṃ gatiḥ || 90 ||
[Analyze grammar]

tenaiva nirmitā devī mūlaprakṛtirīśvarī |
tatpārśve ca tadā tena nirmitaḥ puruṣottamaḥ || 91 ||
[Analyze grammar]

tābhyāṃ cāhaṃ tathā brahmā tataśca guṇarūpataḥ |
avatīrya svayaṃ rudro lokānāṃ hitakārakaḥ || 92 ||
[Analyze grammar]

tato vedāstathā devā yatkiṃciddṛśyate jagat |
sthāvaraṃ jaṃgamaṃ caiva tatsarvaṃ śakarādabhūt || 93 ||
[Analyze grammar]

tadrūpamvarṇitaṃ kena jñāyate kena vā punaḥ |
mayā ca brahmaṇā yasya hyato labdhaśca naiva hi || 94 ||
[Analyze grammar]

ābrahmastambaparyaṃtaṃ yatkiñciddṛśyate jagat |
tatsarvaṃ ca śivaṃ viddhi nātra kāryā vicāraṇā || 95 ||
[Analyze grammar]

sa evedṛksurūpeṇāvatīrṇo nijalīlayā |
śivātapaḥ prabhāvāddhi tava dvāri samāgataḥ || 96 ||
[Analyze grammar]

tasmāttvaṃ himavatpatni duḥkhaṃ muñca śivambhaja |
bhaviṣyati mahānandaḥ kleśo yāsyati saṃkṣayam || 97 ||
[Analyze grammar]

brahmovāca || evamprabodhitāyāstu menakāyā abhūnmune |
tasyāstu komalaṃ kiṃcinmano viṣṇuprabodhitam || 98 ||
[Analyze grammar]

paraṃ haṭhaṃ na tatyāja kanyāndātuṃ harāya na |
svīcakāra tadā menā śivamāyāvimohi tā || 99 ||
[Analyze grammar]

uvāca ca hariṃ menā kiñcidbuddhvā giripriyā |
śrutvā viṣṇuvaco ramyaṃ girijājananī hi sā || 100 ||
[Analyze grammar]

yadi ramyatanussa syāttadā deyā mayā sutā |
nānyathā koṭiśo yatnairvacmi satyandṛḍhaṃ vacaḥ || 101 ||
[Analyze grammar]

brahmovāca |
ityuktvā vacanaṃ menā tūṣṇīmāsa dṛḍhavratā |
śivecchāpreritā dhanyā tathā yākhilamohinī || 102 ||
[Analyze grammar]

iti śrīśivamahāpurāṇe dvitīyāyāṃ rudrasaṃhitāyāṃ tṛtīye pārvatī khaṇḍe menāprabodhavarṇano nāma catuścatvāriṃśo'dhyāyaḥ || 44 ||
[Analyze grammar]