Chapter 40

[English text for this chapter is available]

brahmovāca |
atha śambhuḥ samāhūya nandyādīn sakalāngaṇān |
ājñāpayāmāsa mudā gantuṃ svena ca tatra vai || 1 ||
[Analyze grammar]

|| śiva uvāca |
api yūyaṃ saha mayā saṃgacchadhvaṃ gireḥ puram |
kiyadgaṇānihāsthāpya mahotsavapurassaram || 2 ||
[Analyze grammar]

brahmovāca |
atha te samanujñaptā gaṇeśā niryayurmudā |
svaṃsvaṃ balamupādāya tān kathaṃcidvadāmyaham || 3 ||
[Analyze grammar]

abhyagācchaṃkhakarṇaśca gaṇakoṭyā gaṇeśvaraḥ |
śivena sārddhaṃ saṃgantuṃ himācalapuramprati || 4 ||
[Analyze grammar]

daśakoṭyā kekarākṣo gaṇānāṃ samahotsavaḥ |
aṣṭakoṭyā ca vikṛto gaṇānāṃ gaṇanāyakaḥ || 5 ||
[Analyze grammar]

catuṣkoṭyā viśākhaśca gaṇānāṃ gaṇanāyakaḥ |
pārijātaśca navabhiḥ koṭibhirgaṇapuṃgavaḥ || 6 ||
[Analyze grammar]

ṣaṣṭissarvāntakaḥ śrīmāntathaiva vikṛtānanaḥ |
gaṇānāndundubhoṣṭābhiḥ koṭikoṭibhirgaṇanāyakaḥ || 7 ||
[Analyze grammar]

pañcabhiśca kapālākhyo gaṇeśaḥ koṭibhistathā |
ṣaḍbhissandārako vīro gaṇānāṃ koṭibhirmune || 8 ||
[Analyze grammar]

koṭikoṭibhireveha kandukaḥ kuṇḍakastathā |
viṣṭambho gaṇapo'ṣṭābhirgaṇānāṃ koṭibhistathā || 9 ||
[Analyze grammar]

sahasrakoṭyā gaṇapaḥ pippalo mudito yayau |
tathā saṃnādako vīro gaṇeśo munisattama || 10 ||
[Analyze grammar]

āveśanastathāṣṭābhiḥ koṭibhirgaṇanāyakaḥ |
mahākeśassahasreṇa koṭīnāṃ gaṇapo yayau || 11 ||
[Analyze grammar]

kuṇḍo dvādaśakoṭyā hi tathā parvatako mune |
aṣṭābhiḥ koṭibhirvīrassamagāccandratāpanaḥ || 12 ||
[Analyze grammar]

kālaśca kālakaścaiva mahākālaśśatena vai |
koṭīnāṃ gaṇanātho hi tathaivāgnikanāmakaḥ || 13 ||
[Analyze grammar]

koṭyagnimukha evāgād gaṇānāṃ gaṇanāyakaḥ |
ādityamūrddhā koṭyā ca tathā caiva ghanāvahaḥ || 14 ||
[Analyze grammar]

sannāhaśśatakoṭyā hi kumudo gaṇapastathā |
amoghaḥ kokilaścaiva śatakoṭyā gaṇādhipaḥ || 15 ||
[Analyze grammar]

sumantraḥ koṭikoṭyā ca gaṇānāṃ gaṇānāyakaḥ |
kākapādodaraḥ koṭiṣaṣṭyā santānakastathā || 16 ||
[Analyze grammar]

mahābalaśca navabhirmadhupiṃgaśca kokilaḥ |
nīlo navatyā koṭīnāṃ pūrṇabhadrastathaiva ca || 17 ||
[Analyze grammar]

saptakoṭyā caturvaktraḥ karaṇo viṃśakoṭibhiḥ |
yayau navatikoṭyā tu gaṇeśāno hi romakaḥ || 18 ||
[Analyze grammar]

yajvāśaśśatamanyuśca meghamanyuśca nārada |
tāvatkoṭyā yayussarve gaṇeśā hi pṛthakpṛthak || 19 ||
[Analyze grammar]

kāṣṭhāṅguṣṭhaścatuṣṣaṣṭyā koṭīnāṃ gaṇanāyakaḥ |
virūpākṣassukeśaśca vṛṣābhaśca sanātanaḥ || 20 ||
[Analyze grammar]

tālaketuḥ ṣaḍāsyaśca cañcvāsyaśca sanātanaḥ |
samvartakastathā caitro lakulīśassvayamprabhuḥ || 21 ||
[Analyze grammar]

lokāntakaśca dīptātmā tathā daityāntako mune |
devo bhṛṃgiriṭiśśrīmāndevadevapriyastathā || 22 ||
[Analyze grammar]

aśanirbhānukaścaiva catuṣṣaṣṭyā sahasraśaḥ |
yayuśśivavivāhārthaṃ śivena sahasotsavāḥ || 23 ||
[Analyze grammar]

bhūtakoṭisahasreṇa pramathāḥ koṭibhistribhiḥ |
vīrabhadraścatuṣṣaṣṭyā romajānāntrikoṭibhiḥ || 24 ||
[Analyze grammar]

koṭikoṭisahasrāṇāṃ śatairviṃśatibhirvṛtāḥ |
tatra jagmuśca nandyādyā gaṇapāśśaṃkarotsave || 25 ||
[Analyze grammar]

kṣetrapālo bhairavaśca koṭikoṭigaṇairyutaḥ |
udvāhaśśaṃkarasyetyāyayau prītyā mahotsave || 26 ||
[Analyze grammar]

ete cānye ca gaṇapā asaṅkhyātā mahābalāḥ |
tatra jagmurmahāprītyā sotsāhāśśaṃkarotsave || 27 ||
[Analyze grammar]

sarve sahasrahastāśca jaṭāmukuṭadhāriṇaḥ |
candrarekhāvataṃsāśca nīlakaṇṭhāstrilocanāḥ || 28 ||
[Analyze grammar]

rudrākṣābharaṇāssarve tathā sadbhasmadhāriṇaḥ |
hārakuṇḍalakeyūramukuṭādyairalaṃkṛtāḥ || 29 ||
[Analyze grammar]

brahmaviṣṇvindrasaṃkāśā aṇimādiguṇairyutāḥ |
sūryyakoṭipratīkāśāstatra rejurgaṇeśvarāḥ || 30 ||
[Analyze grammar]

pṛthivīcāriṇaḥ kecit kecitpātālacāriṇaḥ |
kecidvyomacarāḥ kecitsaptasvargacarā mune || 31 ||
[Analyze grammar]

kimbahūktena devarṣe sarvalokanivāsinaḥ |
āyayussvagaṇāśśambhoḥ prītyā vai śaṅkarotsave || 32 ||
[Analyze grammar]

itthaṃ devairgaṇaiścānyaissahitaśśaṅkaraḥ prabhuḥ |
yayau himagiripuraṃ vivāhārthaṃ nijasya vai || 33 ||
[Analyze grammar]

yadājagāma sarveśo vivāhārthe surādibhiḥ |
tadā tatra hyabhūdvṛttaṃ tacchṛṇu tvaṃ munīśvara || 34 ||
[Analyze grammar]

rudrasya bhaginī bhūtvā caṇḍī sūtsavasaṃyutā |
tatrājagāma suprītyā pareṣāṃ suṃbhayāvahā || 35 ||
[Analyze grammar]

pretāsanasamārūḍhā sarpābharaṇabhūṣitā |
pūrṇaṃ kalaśamādāya haimaṃ mūrdhni mahāprabham || 36 ||
[Analyze grammar]

svaparīvārasaṃyuktā dīptāsyā dīptalocanā |
kutūhalamprakurvantī jātaharṣā mahābalā || 37 ||
[Analyze grammar]

tatra bhūtagaṇā divyā virūpaḥ koṭiśo mune |
virājante sma bahuśastathā nānāvidhāstadā || 38 ||
[Analyze grammar]

taissametāgrataścaṇḍī jagāma vikṛtānanā |
kutūhalānvitā prītā prītyupadrava kāriṇī || 39 ||
[Analyze grammar]

caṇḍyā sarve rudragaṇāḥ pṛṣṭhataśca kṛtāstadā |
koṭyekādaśasaṃkhyākā raudrarudrapriyāśca te || 40 ||
[Analyze grammar]

tadā ḍamarunirghoṣairvyāptamāsījjagattrayam |
bherījhaṃkāraśabdena śaṃkhānāṃ ninadena ca || 41 ||
[Analyze grammar]

tathā dundubhinirghoṣaiśśabdaḥ kolāhalo'bhavat |
kurvañjaganmaṃgalaṃ ca nāśayenmaṃgaletarat || 42 ||
[Analyze grammar]

gaṇānāṃ pṛṣṭhato bhūtvā sarve devāssamutsukāḥ |
anvayussarvasiddhāśca lokapālādikā mune || 43 ||
[Analyze grammar]

madhye vrajan rameśo'tha garuḍāsanamāśritaḥ |
śuśubhe dhriyamāṇena kṣatreṇa mahatā mune || 44 ||
[Analyze grammar]

cāmarairvījyamāno'sau svagaṇaiḥ parivāritaḥ |
pārṣadairvilasadbhiśca svabhūṣāvidhibhūṣitaḥ || 45 ||
[Analyze grammar]

tathā'hamapyaśobhamvai vrajanmārge virājitaḥ |
vedairmūrtidharaiśśāstraiḥ purāṇairāgamaistathā || 46 ||
[Analyze grammar]

sanakādimahāsiddhaissaprajāpatibhissutaiḥ |
parivāraissaṃyuto hi śivasevanatatparaḥ || 47 ||
[Analyze grammar]

svasainyamadhyagaśśakra airāvatagaja sthitaḥ |
nāmāvibhūṣito'tyantaṃ vrajan reje sureśvaraḥ || 48 ||
[Analyze grammar]

tadā tu vrajamānāste ṛṣayo bahavaśca te |
virejuratisotkaṇṭhaśśivasyodvāhanamprati || 49 ||
[Analyze grammar]

śākinyo yātudhānāśca vetālā brahmarākṣasāḥ |
bhūtapretapiśācāśca tathānye pramathādayaḥ || 50 ||
[Analyze grammar]

tumbururnārado hāhā hūhūścetyādayo varāḥ |
gandharvāḥ kinnarā jagmurvādyānādhmāya harṣitāḥ || 51 ||
[Analyze grammar]

jagato mātarassarvā devakanyāśca sarvaśaḥ |
gāyatrī caiva sāvitrī lakṣmīranyāssurastriyaḥ || 52 ||
[Analyze grammar]

etāścānyāśca devānāṃ patnayo bhavamātaraḥ |
udvāhaśśaṃkarasyeti jagmussarvā mudānvitāḥ || 53 ||
[Analyze grammar]

śuddhasphaṭikasaṃkāśo vṛṣabhassarvasundaraḥ |
yo dharma ucyate vedaiśśāstraissiddhamaharṣibhiḥ || 54 ||
[Analyze grammar]

tamārūḍho mahādevo vṛṣabhaṃ dharmavatsalaḥ |
śuśubhetīva devarṣisevitassakalairvrajan || 55 ||
[Analyze grammar]

ebhissametaissaphalaimaharṣibhirbabhau maheśo bahuśotyalaṃkṛtaḥ |
himālayāhvasya dharasya saṃvrajan pāṇigrahārthaṃ sadanaṃ śivāyāḥ || 56 ||
[Analyze grammar]

ityuktaṃ śambhucaritaṃ gamanamparamotsavam |
himālayapurodbhūtaṃ sadvṛttaṃ śṛṇu nārada || 57 ||
[Analyze grammar]

iti śrīśivamahāpurāṇe dvitīyāyāṃ rudrasaṃhitāyāṃ tṛtīye pārvatīkhaṇḍe yātrāvarṇanaṃ nāma catvāriśo'dhyāyaḥ || 40 ||
[Analyze grammar]