Chapter 31

[English text for this chapter is available]

|| brahmovāca |
tayorbhaktiṃ śive jñātvā parāmavyabhicāriṇīm |
sarve śakrādayo devāścicinturiti nārada || 1 ||
[Analyze grammar]

devā ūcuḥ |
ekāntabhaktyā śailaścetkanyāṃ tasmai pradāsyati |
dhruvaṃ nirvāṇatā sadyassa prāpsyati ca bhārate || 2 ||
[Analyze grammar]

anantaratnādhāraścetpṛthvī tyaktvā prayāsyati |
ratnagarbhābhidhā bhūmirmithyaiva bhavitā dhruvam || 3 ||
[Analyze grammar]

sthāvaratvaṃ parityajya divyarūpaṃ vidhāya saḥ |
kanyāṃ śūlabhṛte dattvā śivalokaṃ gamiṣyati || 4 ||
[Analyze grammar]

mahādevasya sārūpyaṃ lapsyate nātra saṃśayaḥ |
tatra bhuktvā varānbhogāṃstato mokṣamavāpsyati || 5 ||
[Analyze grammar]

brahmovāca |
ityālocya surāssarve kṛtvā cāmantraṇaṃ mithaḥ |
prasthāpayitumaicchaṃste guruṃ tatra suvismitāḥ || 6 ||
[Analyze grammar]

tataḥ śakrādayo devāssarve guruniketanam |
jagmuḥ prītyā savinayā nārada svārthasādhakāḥ || 7 ||
[Analyze grammar]

gatvā tatra guruṃ natvā sarve devāssavāsavāḥ |
cakrurnivedanaṃ tasmai gurave vṛttamādarāt || 8 ||
[Analyze grammar]

|| devā ūcuḥ |
guro himālayagṛhaṃ gacchāsmatkāryyasiddhaye |
tatra gatvā prayatnena kuru nindāñca śūlinaḥ || 9 ||
[Analyze grammar]

pinākinā vinā durgā varaṃ nānyaṃ variṣyati |
anicchayā sutāṃ dattvā phalaṃ tūrṇaṃ labhiṣyati || 10 ||
[Analyze grammar]

kālenaivādhunā śaila idānīṃ bhuvi tiṣṭhatu |
anekaratnādhāraṃ taṃ sthāpaya tvaṃ kṣitau gurau || 11 ||
[Analyze grammar]

|| brahmovāca |
iti devavacaḥ śrutvā pradadau karṇayoḥ karam |
na svīcakāra sa gurussmarannāma śiveti ca || 12 ||
[Analyze grammar]

atha smṛtvā mahādevaṃ bṛhaspatirudāradhīḥ |
uvāca devavaryāṃśca dhikkṛtvā ca punaḥ punaḥ || 13 ||
[Analyze grammar]

bṛhaspatiruvāca |
sarve devāssvārthaparāḥ parārthadhvaṃsakārakāḥ |
kṛtvā śaṃkaraniṃdā hi yāsyāmi narakaṃ dhruvam || 14 ||
[Analyze grammar]

kaścinmadhye ca yuṣmākaṃ gacchecchailāntikaṃ surāḥ |
saṃpādayetsvābhimataṃ śailendraṃ pratibodhya ca || 15 ||
[Analyze grammar]

anicchayā sutāṃ dattvā sukhaṃ tiṣṭhatu bhārate |
tasmai bhaktyā sutāṃ dattvā mokṣaṃ prāpsyati niścitam || 16 ||
[Analyze grammar]

paścātsaptarṣayassarve bodhayiṣyanti parvatam |
pinākinā vinā durgā varaṃ nānyaṃ variṣyati || 17 ||
[Analyze grammar]

athavā gacchata surā brahmalokaṃ savāsavāḥ |
vṛttaṃ kathayata svaṃ tatsa vaḥ kāryaṃ kariṣyati || 18 ||
[Analyze grammar]

brahmovāca |
tacchrutvā te samālocyājagmurmama sabhāṃ surāḥ |
sarve nivedayāṃcakrurnatvā tadgatamādarāt || 19 ||
[Analyze grammar]

devānāṃ tadvacaḥ śrutvā śivanindākaraṃ tadā |
vedavaktā vilapyāhaṃ tānavocaṃ surānmune || 20 ||
[Analyze grammar]

brahmovāca |
nāhaṃ kartuṃ kṣamo vatsāḥ śivanindāṃ sudussahām |
saṃpadvināśa rūpāñca vipadāṃ bījarūpiṇīm || 21 ||
[Analyze grammar]

surā gacchata kailāsaṃ santoṣayata śaṃkaram |
prasthāpayata taṃ śīghraṃ himālayagṛhaṃ prati || 22 ||
[Analyze grammar]

sa gacchedupaśaileśamātmanindāṃ karotu vai |
paranindāvināśāya svanindā yaśase matā || 23 ||
[Analyze grammar]

brahmovāca |
śrutveti madvaco devā māṃ praṇamya mudā ca te |
kailāsaṃ prayayuḥ śīghraṃ śailānāmadhipaṃ girim || 24 ||
[Analyze grammar]

tatra gatvā śivaṃ dṛṣṭvā praṇamya natamastakāḥ |
sukṛtāṃjalayassarve tuṣṭuvustaṃ surā haram || 25 ||
[Analyze grammar]

|| devā ūcuḥ |
devadeva mahādeva karuṇākara śaṃkara |
vayaṃ tvāṃ śaraṇāpannāḥ kṛpāṃ kuru namo'stu te || 26 ||
[Analyze grammar]

tvaṃ bhaktavatsalaḥ svāminbhaktakāryakarassadā |
dīnoddharaḥ kṛpāsindhurbhaktāpadvinimocakaḥ || 27 ||
[Analyze grammar]

|| brahmovāca |
iti stutvā maheśānaṃ sarve devāssavāsavāḥ |
sarvaṃ nivedayāṃcakrustadvṛttaṃ tata ādarāt || 28 ||
[Analyze grammar]

tacchrutvā devavacanaṃ svīcakāra maheśvaraḥ |
devān suyāpayāmāsa tānāśvāsya vihasya saḥ || 29 ||
[Analyze grammar]

devā mumudire sarve śīghraṃ gatvā svamaṃdiram |
siddhaṃ matvā svakāryyaṃ hi praśaṃsantassadāśivam || 30 ||
[Analyze grammar]

tataḥ sa bhagavāñchambhurmaheśo bhaktavatsalaḥ |
prayayau śailabhūpañca māyeśo nirvikāravān || 31 ||
[Analyze grammar]

yadā śailassabhāmadhye samuvāsa mudānvitaḥ |
bandhuvargaiḥ parivṛtaḥ pārvatīsahitassvayam || 32 ||
[Analyze grammar]

etasminnantare tatra hyājagāma sadāśivaḥ |
daṇḍī chatrī divyavāsā bibhrattilakamujjvalam || 33 ||
[Analyze grammar]

kare sphaṭikamālāñca śālagrāmaṃ gale dadhat |
japannāma harerbhaktyā sādhuveṣadharau dvijaḥ || 34 ||
[Analyze grammar]

taṃ ca dṛṣṭvā samuttasthau sagaṇo'pi himālayaḥ |
nanāma daṇḍavadbhūmau bhaktyātithimapūrvakam || 35 ||
[Analyze grammar]

nanāma pārvatī bhaktyā prāṇeśaṃ viprarūpiṇam |
jñātvā taṃ manasā devī tuṣṭāva parayā mudā || 36 ||
[Analyze grammar]

āśiṣaṃ yuyuje viprassarveṣāṃ prītitaśśivaḥ |
śivāyā adhikaṃ tāta manobhilaṣitaṃ hṛdā || 37 ||
[Analyze grammar]

madhuparkādikaṃ sarvaṃ jagrāha brāhmaṇo mudā |
dattaṃ śailādhirājena himāṃgena mahādarāt || 38 ||
[Analyze grammar]

papraccha kuśalaṃ cāsya himādriḥ parvatottamaḥ |
taṃ dvijendraṃ mahāprītyā sampūjya vidhivanmune || 39 ||
[Analyze grammar]

punaḥ papraccha śaileśastaṃ tataḥ ko bhavāniti |
uvāca śīghraṃ viprendro girīdraṃ sādaraṃ vacaḥ || 40 ||
[Analyze grammar]

viprendra uvāca |
brāhmaṇo'haṃ giriśreṣṭha vaiṣṇavo budhasattamaḥ |
ghaṭikīṃ vṛtimāśritya bhramāmi dharaṇītale || 41 ||
[Analyze grammar]

manoyāyī sarva gāmī sarvajñohaṃ gurorbalāt |
paropakārī śuddhātmā dayāsindhurvikārahā || 42 ||
[Analyze grammar]

mayā jñātaṃ harāya tvaṃ svasutāṃ dātumicchasi |
imāṃ padmasamāṃ divyāṃ vararūpāṃ sulakṣaṇām || 43 ||
[Analyze grammar]

nirāśrayāyāsaṃgāya kurūpāyāguṇāya ca |
śmaśānavāsine vyālagrāhirūpāya yogine || 44 ||
[Analyze grammar]

digvāsase kugātrāya vyālabhūṣaṇadhāriṇe |
ajñātakulanāmne ca kuśīlāyāvihāriṇe || 45 ||
[Analyze grammar]

vibhūtidigdhadehāya saṃkruddhāyāvivekine |
ajñātavayase'tīva kujaṭādhāriṇe sadā || 46 ||
[Analyze grammar]

sarvāśrayāya bhramiṇe nāgahārāya bhikṣave |
kumārganiratāyātha vedā'dhvatyāgine haṭhāt || 47 ||
[Analyze grammar]

iyaṃ te buddhiracala na hi maṃgaladā khalu |
vibodha jñānināṃ śreṣṭha nārāyaṇakulodbhava || 48 ||
[Analyze grammar]

na te pātrānurūpaśca pārvatīdānakarmaṇi |
mahājanaḥ smeramukhaḥ śrutamātrādbhaviṣyati || 49 ||
[Analyze grammar]

paśya śailādhipa tvaṃ ca na tasyaikosti bāndhavaḥ |
mahāratnākarastvañca tasya kiñciddhanaṃ na hi || 50 ||
[Analyze grammar]

bāndhavānmenakāṃ kudhrapate śīghraṃ sutāṃstathā |
sarvānpṛccha prayatnena paṇḍitānpārvatī vinā || 51 ||
[Analyze grammar]

rogiṇo nauṣadhaṃ śaśvadrocate girisattama |
kupathyaṃ rocate'bhīkṣṇaṃ mahādoṣakaraṃ sadā || 52 ||
[Analyze grammar]

brahmovāca |
ityuktvā brāhmaṇaḥ śīghraṃ sa vai bhuktvā mudānvitaḥ |
jagāma svālayaṃ śānto nānālīlākara śśivaḥ || 53 ||
[Analyze grammar]

iti śrīśivamahāpurāṇe dvitīyāyāṃ rudrasaṃhitāyāṃ tṛtīye pārvatīkhaṇḍe śivamāyāvarṇanaṃ nāmaikatriṃśo'dhyāyaḥ || 31 ||
[Analyze grammar]