Chapter 8

[English text for this chapter is available]

|| brahmovāca |
ekadā tu śivajñānī śivalīlāvidāṃvaraḥ |
himācalagṛhaṃ prītyāgamastvaṃ śivapreritaḥ || 1 ||
[Analyze grammar]

dṛṣṭvā mune girīśastvāṃ natvānarca sa nārada |
āhūya ca svatanayāṃ tvadaṅghryostāmapātayat || 2 ||
[Analyze grammar]

punarnatvā munīśa tvāmuvāca himabhūdharaḥ |
sāñjaliḥ svavidhiṃ matvā bahusannatamastakaḥ || 3 ||
[Analyze grammar]

himālaya uvāca |
he mune nārada jñāninbrahmaputravara prabho |
sarvajñastvaṃ sakaruṇaḥ paropakaraṇe rataḥ || 4 ||
[Analyze grammar]

matsutājātakaṃ brūhi guṇadoṣasamudbhavam |
kasya priyā bhāgyavatī bhaviṣyati sutā mama || 5 ||
[Analyze grammar]

|| brahmovāca |
ityukto munivarya tvaṃ girīśena himādriṇā |
vilokya kālikāhastaṃ sarvāṃgaṃ ca viśeṣataḥ || 6 ||
[Analyze grammar]

avocastvaṃ giriṃ tāta kautukī vāgviśāradḥ |
jñānī viditavṛttānto nāradaḥ prītamānasaḥ || 7 ||
[Analyze grammar]

nārada uvāca |
eṣā te tanayā mene sudhāṃśoriva varddhitā |
ādyā kalā śailarāja sarvalakṣaṇaśālinī || 8 ||
[Analyze grammar]

svapatessukhadātyantaṃ pitroḥ kīrtivivarddhinī |
mahāsādhvī ca sarvāsu mahānandakarī sadā || 9 ||
[Analyze grammar]

sulakṣaṇāni sarvāṇi tvatsutāyāḥ kare gire |
ekā vilakṣaṇā rekhā tatphalaṃ śṛṇu tattvataḥ || 10 ||
[Analyze grammar]

yogī nagno'guṇo'kāmī mātṛtātavivarjitaḥ |
amāno'śivaveṣaśca patirasyāḥ kiledṛśaḥ || 11 ||
[Analyze grammar]

|| brahmovāca |
ityākarṇya vacaste hi satyaṃ mattvā ca dampatī |
menā himācalaścāpi duḥkhitau tau babhūvatuḥ || 12 ||
[Analyze grammar]

śivākarṇyavacaste hi tādṛśaṃ jagadambikā || |
lakṣaṇaistaṃ śivaṃ mattvā jaharṣāti mune hṛdi || 13 ||
[Analyze grammar]

na mṛṣā nāradavacastviti saṃcintya sā śivā |
snehaṃ śivapadadvandve cakārāti hṛdā tadā || 14 ||
[Analyze grammar]

uvāca duḥkhitaḥ śailastvāntadā hṛdi nārada |
kamupāyaṃ mune kuryāmatiduḥkhamabhūditi || 15 ||
[Analyze grammar]

tacchutvā tvaṃ mune prāttha mahākautukakārakaḥ |
himācalaṃ śubhairvākyairharṣayanvāgviśāradaḥ || 16 ||
[Analyze grammar]

nārada uvāca |
snehācchṛṇu gire vākyaṃ mama satyaṃ mṛṣā na hi |
kararekhā brahmalipirna mṛṣā bhavati dhuvam || 17 ||
[Analyze grammar]

tādṛśo'syāḥ patiḥ śaila bhaviṣyati na saṃśayaḥ |
tatropāyaṃ śṛṇu prītyā yaṃ kṛtvā lapsyase sukham || 18 ||
[Analyze grammar]

tādṛśo'sti varaḥ śambhulīlārūpadharaḥ prabhuḥ |
kulakṣaṇāni sarvāṇi tatra tulyāni sadguṇaiḥ || 19 ||
[Analyze grammar]

prabhau doṣo na duḥkhāya duḥkhado'tyaprabhau hi saḥ |
ravipāvakagaṃgānāṃ tatra jñeyā nidarśanā || 20 ||
[Analyze grammar]

tasmācchivāya kanyā svāṃ śivāṃ dehi vivekataḥ |
śivassarveśvarassevyo'vikārī prabhuravyayaḥ || 21 ||
[Analyze grammar]

śīghraprasādaḥ sa śivastāṃ grahīṣyatyasaṃśayam |
tapaḥsādhyo viśeṣeṇa yadi kuryācchivā tapaḥ || 22 ||
[Analyze grammar]

sarvathā susamartho hi sa śivassakaleśvaraḥ |
kuliperapi vidhvaṃsī brahmādhīnastvakapradaḥ || 23 ||
[Analyze grammar]

|| brahmovāca |
ityuktvā tvaṃ punastāta kautukī brahmavinmune |
śailarājamavoco hi harṣayanvacanaiśśubhaiḥ || 24 ||
[Analyze grammar]

bhāvinī dayitā śambhossānukūlā sadā hare |
mahāsādhvī suvratā ca pitrossukhavivarddhinī || 25 ||
[Analyze grammar]

śambhościttaṃ vaśe caiṣā kariṣyati tapasvinī |
sa cāpyenāmṛte yoṣāṃ na hyanyāmudvahiṣyati || 26 ||
[Analyze grammar]

etayossadṛśaṃ prema na kasyāpyeva tādṛśam |
bhūtaṃ vā bhavitā vāpi nādhunā ca pravartate || 27 ||
[Analyze grammar]

anayossurakāryyāṇi kartavyāni mṛtāni ca |
yāni yāni nagaśreṣṭha jīvitāni punaḥ punaḥ || 28 ||
[Analyze grammar]

anayā kanyayā te'dre ardhanārīśvaro haraḥ |
bhaviṣyati tathā harṣadinayormilitampunaḥ || 29 ||
[Analyze grammar]

śarīrārdhaṃ harasyaiṣā hariṣyati sutā tava |
tapaḥ prabhāvātsaṃtoṣya maheśaṃ sakaleśvaram || 30 ||
[Analyze grammar]

svarṇagaurī suvarṇābhā tapasā toṣya taṃ haram |
vidyudgauratamā ceyaṃ tava putrī bhaviṣyati || 31 ||
[Analyze grammar]

gaurīti nāmnā kanyā tu khyātimeṣā gamiṣyati |
sarvadevagaṇaiḥ pūjyā haribrahmādibhistathā || 32 ||
[Analyze grammar]

nānyasmai tvamimāṃ dātumihārhasi nagottama |
idaṃ copāṃśu devānāṃ na prakāśyaṃ kadācana || 33 ||
[Analyze grammar]

brahmovāca |
iti tasya vacaḥ śrutvā devarṣe tava nārada |
uvāca himavānvākyaṃ mune tvāmvāgviśāradaḥ || 34 ||
[Analyze grammar]

himālaya uvācā |
he mune nārada prājña vijñaptiṃ kāṃcideva hi |
karomi tāṃ śṛṇu prītyā tastvaṃ pramudamāvaha || 35 ||
[Analyze grammar]

śrūyate tyaktasaṃgassa mahādevo yatātmavān |
tapaścarati sannityaṃ devānāmapyagocaraḥ || 36 ||
[Analyze grammar]

sa kathaṃ dhyāna mārgasthaḥ parabrahmārpitaṃ manaḥ |
bhraṃśayiṣyati devarṣe tatra me saṃśayo mahān || 37 ||
[Analyze grammar]

akṣaraṃ paramaṃ brahma pradīpakalikopamam |
sadāśivākhyaṃ svaṃ rūpaṃ nirvikāramajāparam || 38 ||
[Analyze grammar]

nirguṇaṃ saguṇaṃ tacca nirviśeṣaṃ nirīhakam |
ataḥ paśyati sarvatra na tu bāhyaṃ nirīkṣate || 39 ||
[Analyze grammar]

iti sa śrūyate nityaṃ kiṃnarāṇāṃ mukhānmune |
ihāgatānāṃ suprītyā kintanmithyā vaco dhuvam || 40 ||
[Analyze grammar]

viśeṣataḥ śrūyate sa sākṣānnāmnā tathā haraḥ |
samayaṃ kṛtavānpūrvvaṃ tanmayā gaditaṃ śṛṇu || 41 ||
[Analyze grammar]

na tvāmṛte'nyāṃ varaye dākṣāyaṇi priye satī |
bhāryārthaṃ na grahīṣyāmi satyametadbravīmi te || 42 ||
[Analyze grammar]

iti satyāsamaṃ tena puraiva samayaḥ kṛtaḥ |
tasyāṃ mṛtāyāṃ sa kathaṃ svayamanyāṃ grahīṣyati || 43 ||
[Analyze grammar]

|| brahmovāca |
ityuktvā sa giristūṣṇīmāsa tasya purastava |
tadākarṇyātha devarṣe tvaṃ prāvocassutattvataḥ || 44 ||
[Analyze grammar]

nārada uvāca |
na vai kāryā tvayā ciṃtā girirāja mahāmate |
eṣā tava sutā kālī dakṣajā hyabhavatpurā || 45 ||
[Analyze grammar]

satīnāmābhavattasyāssarvamaṃgaladaṃ sadā |
satī sā vai dakṣakanyā bhūtvā rudrapriyābhavata || 46 ||
[Analyze grammar]

pituryajñe tathā prāpyānādaraṃ śaṃkarasya ca |
taṃ dṛṣṭvā kopamādhāyātyākṣīddehaṃ ca sā satī || 47 ||
[Analyze grammar]

punassaiva samutpannā tava gehe'mbikā śivā |
pārvatī harapatnīyaṃ bhaviṣyati na saṃśayaḥ || 48 ||
[Analyze grammar]

etatsarvaṃ vistarāttvaṃ proktavānbhūbhṛte mune |
pūrvarūpaṃ caritraṃ ca pārvatyāḥ prītivardhanam || 49 ||
[Analyze grammar]

taṃ sarvaṃ pūrvavṛttānyaṃ kālyā munimukhādgiriḥ |
śrutvā saputradāraḥ sa tadā niḥsaṃśayo'bhavat || 50 ||
[Analyze grammar]

tataḥ kālī kathāṃ śrutvā nāradasya mukhāttadā |
lajjayādhomukhī bhūtvā smitavistāritānanā || 51 ||
[Analyze grammar]

kareṇa tāṃ tu saṃspṛśya śrutvā taccaritaṃ giriḥ |
mūrdhni śaśvattathāghrāya svāsa nānte nyaveśayat || 52 ||
[Analyze grammar]

tatastvaṃ tāṃ punardṛṣṭvā'vocastatra sthitāṃ mune |
harṣayan girirājaṃ ca menakāntanayaiḥ saha || 53 ||
[Analyze grammar]

siṃhāsanantu kintvasyāśśailarāja bhavedataḥ |
śambhorūrau sadaitasyā āsanaṃ tu bhaviṣyati || 54 ||
[Analyze grammar]

harorūrvāsanamprāpya tanayā tava santatam |
na yatra kasyācidṛṣṭirmānasaṃ vā gamiṣyati || 55 ||
[Analyze grammar]

|| brahmovāca |
iti vacanamudāraṃ nārada tvaṃ girīśaṃ tridivamagama uktvā tatkṣaṇādevaprītyā |
giripatirapi citte cārusaṃmodayuktassvagṛhamagamadevaṃ sarvasaṃpatsamṛddham || 56 ||
[Analyze grammar]

iti śrīśivamahā purāṇe dvitīyāyāṃ rudrasaṃhitāyāṃ tṛtīye pārvatīkhaṃḍe nāradahimālayasaṃvādavarṇanaṃ nāmāṣṭamo'dhyāyaḥ || 8 ||
[Analyze grammar]