Chapter 39

[English text for this chapter is available]

brahmovāca |
kṣuvasya hitakṛtyena dadhīcasyāśramaṃ yayau |
viprarūpamathāsthāya bhagavān bhaktavatsalaḥ || 1 ||
[Analyze grammar]

dadhīcaṃ prāha viprarṣimabhivaṃdya jagadguruḥ |
kṣuvakāryyārthamudyuktaśśaivendraṃ chalamāśritaḥ || 2 ||
[Analyze grammar]

viṣṇuruvāca |
bho bho dadhīca viprarṣe bhavārcanaratāvyaya |
varamekaṃ vṛṇe tvattastadbhavān dātumarhati || 3 ||
[Analyze grammar]

brahmovāca |
yācito devadevena dadhīcaśśaivasattamaḥ |
kṣuvakāryārthinā śīghraṃ jagāda vacanaṃ harim || 4 ||
[Analyze grammar]

dadhīca uvāca |
jñātaṃ tavepsitaṃ vipra kṣuvakāryārthamāgataḥ |
bhagavān viprarūpeṇa māyī tvamasi vai hariḥ || 5 ||
[Analyze grammar]

bhūtaṃ bhaviṣyaṃ deveśa vartamānaṃ janārdana |
jñānaṃ prasādādrudrasya sadā traikālikaṃ mama || 6 ||
[Analyze grammar]

tvāṃ jānehaṃ hariṃ viṣṇuṃ dvijatvaṃ tyaja suvrata |
ārādhito'si bhūpena kṣuveṇa khalabuddhinā || 7 ||
[Analyze grammar]

jāne tavaiva bhagavan bhaktavatsalatāṃ hare |
chalaṃ tyaja svarūpaṃ hi svīkuru smara śaṃkaram || 8 ||
[Analyze grammar]

asti cetkasyacidbhītirbhavārcanaratasya me |
vaktumarhasi yatnena satyadhāraṇapūrvakam || 9 ||
[Analyze grammar]

vadāmi na mṛṣā kvāpi śivasmaraṇasaktadhīḥ |
na bibhemi jagatyasmindevadaityādikādapi || 10 ||
[Analyze grammar]

viṣṇuruvāca |
bhayaṃ dadhīca sarvatra naṣṭaṃ ca tava suvrata |
bhavārcanarato yasmādbhavānsarvajña eva ca || 11 ||
[Analyze grammar]

bibhemīti sakṛdvaktumarhasi tvaṃ namastava |
niyogānmama rājendra kṣuvāt pratisahasya ca || 12 ||
[Analyze grammar]

brahmovāca |
evaṃ śrutvāpi tadvākyaṃ viṣṇossa tu mahāmuniḥ |
vihasya nirbhayaḥ prāha dadhīcaśśaivasattamaḥ || 13 ||
[Analyze grammar]

dadhīca uvāca || |
na bibhemi sadā kvāpi kutaścidapi kiṃcana |
prabhāvāddevadevasya śaṃbhossākṣātpinākinaḥ || 14 ||
[Analyze grammar]

brahmovāca |
tatastasya muneḥ śrutvā vacanaṃ kupito hariḥ |
cakramudyamya saṃtasthau didhakṣumunisattamam || 15 ||
[Analyze grammar]

abhavatkuṃṭhitaṃ tatra vipre cakraṃ sudāruṇam |
prabhāvācca tadīśasya nṛpatessaṃnidhāvapi || 16 ||
[Analyze grammar]

dṛṣṭvā taṃ kuṃṭhitāsyaṃ taccakraṃ viṣṇuṃ jagāda ha |
dadhīcassasmitaṃ sākṣātsadasadvyakti kāraṇam || 17 ||
[Analyze grammar]

dadhīca uvāca |
bhagavan bhavatā labdhaṃ purātīva sudāruṇam |
sudarśanamiti khyātaṃ cakraṃ viṣṇoḥ prayatnataḥ |
bhavasya tacchubhaṃ cakraṃ na jighāṃsati māmiha || 18 ||
[Analyze grammar]

bhagavānatha kruddho'smai sarvāstrāṇi kramāddhariḥ |
brahmāstrādyaiḥ śaraiścāstraiḥ prayatnaṃ kartumarhasi || 19 ||
[Analyze grammar]

brahmovāca |
sa tasya vacanaṃ śrutvā dṛṣṭvā ni्rvīryyamānuṣam |
sasarjātha krudhā tasmai sarvāstrāṇi kramāddhariḥ || 20 ||
[Analyze grammar]

cakrurdevāstatastasya viṣṇossāhāyyamādarāt |
dvijenaikena saṃyoddhuṃ prasṛtasya vibuddhayaḥ || 21 ||
[Analyze grammar]

cikṣipuḥ svāni svānyāśu śastrāṇyastrāṇi sarvataḥ |
dadhīcopari vegena śakrādyā haripākṣikāḥ || 22 ||
[Analyze grammar]

kuśamuṣṭimathādāya dadhīcassaṃsmaran śivam |
sasarja sarvadevebhyo vajrāsthi sarvato vaśī || 23 ||
[Analyze grammar]

śaṃkarasya prabhāvāttu kuśamuṣṭirmunerhi sā |
divyaṃ triśūlamabhavat kālāgnisadṛśaṃ mune || 24 ||
[Analyze grammar]

dagdhuṃ devān matiṃ cakre sāyudhaṃ saśikhaṃ ca tat |
prajvalatsarvataśśaivaṃ yugāṃtāgryadhikaprabham || 25 ||
[Analyze grammar]

nārāyaṇendumukhyaistu devaiḥ kṣiptāni yāni ca |
āyudhāni samastāni praṇemustriśikhaṃ ca tat || 26 ||
[Analyze grammar]

devāśca dudruvussarve dhvastavīryā divaukasaḥ |
tasthau tatra harirbhītaḥ kevalaṃ māyināṃ varaḥ || 27 ||
[Analyze grammar]

sasarja bhagavān viṣṇuḥ svadehātpuruṣottamaḥ |
ātmanassadṛśān divyān lakṣalakṣāyutān gaṇān || 28 ||
[Analyze grammar]

te cāpi yuyudhustatra vīrā viṣṇugaṇāstataḥ |
muninaikena devarṣe dadhīcena śivātmanā || 29 ||
[Analyze grammar]

tato viṣṇugaṇān tānvai niyudhya bahuśo raṇe |
dadāha sahasā sarvān dadhī caśśaiva sattamaḥ || 30 ||
[Analyze grammar]

tatastadvismayāthāya dadhīcesya munerhariḥ |
viśvamūrtirabhūcchīghraṃ mahāmāyāviśāradaḥ || 31 ||
[Analyze grammar]

tasya dehe hareḥ sākṣādapaśyaddvijasattamaḥ |
dadhīco devatādīnāṃ jīvānāṃ ca sahasrakam || 32 ||
[Analyze grammar]

bhūtānāṃ koṭayaścaiva gaṇānāṃ koṭayastathā |
aṃḍānāṃ koṭayaścaiva viśvamūtastanau tadā || 33 ||
[Analyze grammar]

dṛṣṭvaitadakhilaṃ tatra cyāvanissatataṃ tadā |
viṣṇumāha jagannāthaṃ jagatstu vamajaṃ vibhum || 34 ||
[Analyze grammar]

dadhīca uvāca |
māyāṃ tyaja mahābāho pratibhāso vicārataḥ |
vijñātāni sahasrāṇi durvijñeyāni mādhava || 35 ||
[Analyze grammar]

mayi paśya jagatsarvaṃ tvayā yuktamataṃdritaḥ |
brahmāṇaṃ ca tathā rudraṃ divyāṃ dṛṣṭiṃ dadāmi te || 36 ||
[Analyze grammar]

|| brahmovāca |
ityuktvā darśayāmāsa svatanau nikhilaṃ muniḥ |
brahmāṃḍaṃ cyāvaniśśaṃbhutejasā pūrṇadehakaḥ || 37 ||
[Analyze grammar]

dadāha viṣṇuṃ deveśaṃ dadhīcaśśaivasattamaḥ |
saṃsmarañ śaṃkaraṃ citte vihasan vibhayassudhīḥ || 38 ||
[Analyze grammar]

dadhīca uvāca |
māyayā tvanayā kiṃ vā maṃtraśaktyātha vā hare |
satkāmāyāmimāṃ tasmādyoddhumarhasi yatnataḥ || 39 ||
[Analyze grammar]

brahmovāca |
etacchutvā munestasya vacanaṃ nirbhayastadā |
śaṃbhutejomayaṃ viṣṇuścukopātīva taṃ munim || 40 ||
[Analyze grammar]

devāśca dudruvurbhūyo devaṃ nārāyaṇaṃ ca tam |
yoddhukāmāśca muninā dadhīcena pratāpinā || 41 ||
[Analyze grammar]

etasminnaṃtare tatrāgamanmatsaṃgataḥ kṣuvaḥ |
avārayaṃtaṃ niśceṣṭaṃ padmayoniṃ hariṃ surān || 42 ||
[Analyze grammar]

niśamya vacanaṃ me hi brāhmaṇo na vinirjitaḥ |
jagāma nikaṭaṃ tasya praṇanāma muniṃ hariḥ || 43 ||
[Analyze grammar]

kṣuvo dīnataro bhūtvā gatvā tatra munīśvaram |
dadhīcamabhivādyaiva prārthayāmāsa viklavaḥ || 44 ||
[Analyze grammar]

kṣuva uvāca |
prasīda muniśārdūla śivabhaktaśiromaṇe |
prasīda parameśāna durlakṣye durjanaissaha || 45 ||
[Analyze grammar]

brahmovāca |
ityākarṇya vacastasya rājñassuragaṇasya hi |
anujagrāha taṃ vipro dadhīcastapasāṃ nidhiḥ || 46 ||
[Analyze grammar]

atha dṛṣṭvā rameśādīn krodhavihvalito muniḥ |
hṛdi smṛtvā śivaṃ viṣṇuṃ śaśāpa ca surānapi || 47 ||
[Analyze grammar]

dadhīca uvāca |
rudrakopāgninā devāssadeveṃdrā munīśvarāḥ |
dhvastā bhavaṃtu devena viṣṇunā ca samaṃ gaṇaiḥ || 48 ||
[Analyze grammar]

|| brahmovāca |
evaṃ śaptvā surān prekṣya kṣuvamāha tato muniḥ |
devaiśca pūjyo rājendra nṛpaiścaiva dvijottamaḥ || 49 ||
[Analyze grammar]

brāhmaṇā eva rājendra balinaḥ prabhaviṣṇavaḥ |
ityuktvā sa sphuṭa vipraḥ praviveśa nijāśramam || 50 ||
[Analyze grammar]

dadhīcamabhivaṃdyaiva kṣuvo nijagṛhaṃ gataḥ |
viṣṇurjagāma svaṃ lokaṃ suraissaha yathāgatam || 51 ||
[Analyze grammar]

tadevaṃ tīrthamabhavat sthāneśvara iti smṛtam |
sthāneśvaramanuprāpya śivasāyujyamāpnuyāt || 52 ||
[Analyze grammar]

kathitastava saṃkṣepādvādaḥ kṣuvadadhīcayoḥ |
nṛpāptaśāpayostāta brahmaviṣṇvoḥ śivaṃ vinā || 53 ||
[Analyze grammar]

ya idaṃ kīttayennityaṃ vādaṃ kṣuvadadhīcayoḥ |
jitvāpamṛtyuṃ dehānte brahmalokaṃ prayāti saḥ || 54 ||
[Analyze grammar]

raṇe yaḥ kīrtayitvedaṃ praviśettasya sarvadā |
mṛtyubhītibhavennaiva vijayī ca bhaviṣyati || 55 ||
[Analyze grammar]

iti śrīśivamahāpurāṇe dvitīyāyāṃ rudrasaṃhitāyāṃ dvitīye satīkhaṇḍe viṣṇudadhīcayuddhavarṇano nāma navatriṃśo'dhyāyaḥ || 39 ||
[Analyze grammar]