Chapter 38

[English text for this chapter is available]

|| sūta uvāca |
ityākarṇya vacastasya vidheramitadhīmataḥ |
papraccha nāradaḥ prītyā vismitastaṃ dvijottamaḥ || 1 ||
[Analyze grammar]

|| nārada uvāca |
śivaṃ vihāya dakṣasya surairyajñaṃ harirgataḥ |
hetunā kena tad brūhi yatrāvajñā' bhavattataḥ || 2 ||
[Analyze grammar]

jānāti kiṃ sa śaṃbhuṃ no hariḥ pralayavikramam |
raṇaṃ kathaṃ ca kṛtavān tadgaṇairabudho yathā || 3 ||
[Analyze grammar]

eṣa me saṃśayo bhūyāṃstaṃ chiṃdhi karuṇānidhe |
caritaṃ brūhi śaṃbhostu cittotsāhakaraṃ prabho || 4 ||
[Analyze grammar]

brahmovāca |
dvijavarya śṛṇu prītyā caritaṃ śaśimaulinaḥ |
yatpṛcchate kurvataśca sarvasaṃśayahārakam || 5 ||
[Analyze grammar]

dadhīcasya muneḥ śāpādbhraṣṭajñāno hariḥ purā |
sāmaro dakṣayajñaṃ vai gataḥ kṣuvasahāyakṛt || 6 ||
[Analyze grammar]

|| nārada uvāca |
kimarthaṃ śaptavānviṣṇuṃ dadhīco munisattamaḥ |
kopākāraḥ kṛtastasya hariṇā tatsahāyinā || 7 ||
[Analyze grammar]

brahmovāca |
samutpanno mahātejā rājā kṣuva iti smṛtaḥ |
abhūnmitraṃ dadhīcasya munīndrasya mahāprabhoḥ || 8 ||
[Analyze grammar]

cirāttapaḥprasaṃgādvai vādaḥ kṣuvadadhīcayoḥ |
mahānarthakaraḥ khyātastrilokeṣvabhavatpurā || 9 ||
[Analyze grammar]

tatra trivarṇataḥ śreṣṭho vipra eva na saṃśayaḥ |
iti prāha dadhīco hi śivabhaktastu vedavit || 10 ||
[Analyze grammar]

tacchrutvā vacanaṃ tasya dadhīcasya mahāmune |
kṣuvaḥ prāheti nṛpatiḥ śrīmadena vimohitaḥ || 11 ||
[Analyze grammar]

kṣuva uvāca |
aṣṭānāṃ lokapālānāṃ vapurdhārayate nṛpaḥ |
tasmānnṛpo variṣṭho hi varṇāśramapatiḥ prabhuḥ || 12 ||
[Analyze grammar]

sarvadevamayorājā śruti prāheti tatparā |
mahatī devatā yā sā sohameva tato mune || 13 ||
[Analyze grammar]

tasmādviprādvaro rājā cyavaneya vicāryatām |
nāvamaṃtavya evātaḥ pūjyo'haṃ sarvathā tvayā || 14 ||
[Analyze grammar]

brahmovāca |
śrutvā tathā mataṃ tasya kṣuvasya munisattamaḥ |
śrutismṛtiviruddhaṃ taṃ cukopātīva bhārgavaḥ || 15 ||
[Analyze grammar]

atha kruddho mahātejā gauravāccātmano mune |
atāḍayatkṣuvaṃ mūrdhni dadhīco vāmamuṣṭitaḥ || 16 ||
[Analyze grammar]

vajreṇa taṃ ca ciccheda dadhīcaṃ tāḍitaḥ kṣuvaḥ |
jagarjātīva saṃkruddho brahmāṃḍādhipatiḥ kudhīḥ || 17 ||
[Analyze grammar]

papāta bhūmau nihato tena vajreṇa bhārgavaḥ |
śukraṃ sasmāra kṣuvakṛdbhārgavasya kulaṃdharaḥ || 18 ||
[Analyze grammar]

śukrotha saṃdhayāmāsa tāḍitaṃ ca kṣuvena tu |
yogī dadhīcasya tadā dehamāgatya sadrutam || 19 ||
[Analyze grammar]

saṃdhāya pūrvavaddehaṃ dadhīcasyāha bhārgavaḥ |
śivabhaktāgraṇīrbhṛtyaṃ jayavidyāpravartakaḥ || 20 ||
[Analyze grammar]

śukra uvāca |
dadhīca tāta saṃpūjya śivaṃ sarveśvaraṃ prabhum |
mahāmṛtyuṃjayaṃ maṃtraṃ śrautamagryaṃ vadāmi te || 21 ||
[Analyze grammar]

tryambakaṃ yajāmahe trailokyaṃ pitaraṃ prabhum |
trimaṃḍalasya pitaraṃ triguṇasya maheśvaram || 22 ||
[Analyze grammar]

tritattvasya trivahneśca tridhābhūtasya sarvataḥ |
tridivasya tribāhośca tridhābhūtasya sarvataḥ || 23 ||
[Analyze grammar]

tridevasya mahādevassugaṃdhi puṣṭivarddhanam |
sarvabhūteṣu sarvatra triguṇeṣu kṛtau yathā || 24 ||
[Analyze grammar]

indriyeṣu tathānyeṣu deveṣu ca gaṇeṣu ca |
puṣpe sugaṃdhivatsūrassugaṃdhimamareśvaraḥ || 25 ||
[Analyze grammar]

puṣṭiśca prakṛteryasmātpuruṣādvai dvijottama |
mahadādiviśeṣāṃtavikalpaścāpi suvrata || 26 ||
[Analyze grammar]

viṣṇoḥ pitāmahasyāpi munīnāṃ ca mahāmune |
indriyasya ca devānāṃ tasmādvai puṣṭivarddhanaḥ || 27 ||
[Analyze grammar]

taṃ devamamṛtaṃ rudraṃ karmaṇā tapasāpi vā |
svādhyāyena ca yogena dhyānena ca prajāpate || 28 ||
[Analyze grammar]

satyenānyena sūkṣmāgrānmṛtyupāśādbhavaḥ svayam |
vaṃdhamokṣakaro yasmādurvārukamiva prabhuḥ || 29 ||
[Analyze grammar]

mṛtasaṃjīvanīmantro mama sarvottamaḥ smṛtaḥ |
evaṃ japaparaḥ prītyā niyamena śivaṃ smaran || 30 ||
[Analyze grammar]

japtvā hutvābhimaṃtryaiva jalaṃ piba divāniśam |
śivasya sannidhau dhyātvā nāsti mṛtyubhayaṃ kvacit || 31 ||
[Analyze grammar]

kṛtvā nyāsādikaṃ sarvaṃ saṃpūjya vidhivacchivam |
saṃvidhāyedaṃ nirvyagraśśaṃkaraṃ bhaktavatsalam || 32 ||
[Analyze grammar]

dhyānamasya pravakṣyāmi yathā dhyātvā japanmanum |
siddha mantro bhaveddhīmān yāvacchaṃbhuprabhāvataḥ || 33 ||
[Analyze grammar]

hastāṃbhojayugasthakuṃbhayugalāduddhṛtyatoyaṃ śirassiṃcaṃtaṃ karayoryugena dadhataṃ svāṃkebhakuṃbhau karau |
akṣasraṅmṛgahastamaṃbujagataṃ mūrddhasthacandrasravatpīyūṣārdratanuṃ bhaje sagirijaṃ tryakṣaṃ ca mṛtyuṃjayam || 34 ||
[Analyze grammar]

brahmovāca |
upadiśyeti śukraḥ svaṃ dadhīciṃ munisattamam |
svasthānamagamattāta saṃsmarañ śaṃkaraṃ prabhum || 35 ||
[Analyze grammar]

tasya tadvacanaṃ śrutvā dadhīco hi mahāmuniḥ |
vanaṃ jagāma tapase mahāprītyā śivaṃ smaran || 36 ||
[Analyze grammar]

tatra gatvā vidhānena mahāmṛtyuṃjayābhidham |
taṃ manuṃ prajapan prītyā tapastepe śivaṃ smaran || 37 ||
[Analyze grammar]

tanmanuṃ suciraṃ japtvā tapasārādhya śaṃkaram |
śivaṃ saṃtoṣayāmāsa mahāmṛtyuṃjayaṃ hi saḥ || 38 ||
[Analyze grammar]

atha śaṃbhuḥ prasannātmā tajjapādbhaktavatsalaḥ |
āvirbabhūva puratastasya prītyā mahāmune || 39 ||
[Analyze grammar]

taṃ dṛṣṭvā svaprabhuṃ śaṃbhuṃ sa mumoda munīśvaraḥ |
praṇamya vidhivadbhaktyā tuṣṭāva sukṛtāṃjaliḥ || 40 ||
[Analyze grammar]

atha prītyā śivastāta prasannaścyāvaniṃ mune |
varaṃ brūhīti sa prāha suprasannena cetasā || 41 ||
[Analyze grammar]

tacchutvā śaṃbhuvacanaṃ dadhīco bhaktasattamaḥ |
sāṃjalirnatakaḥ prāha śaṃkaraṃ bhaktavatsalam || 42 ||
[Analyze grammar]

dadhīca uvāca |
devadeva mahādeva mahyaṃ dehi varatrayam |
vajrāsthitvādavadhyatvamadīnatvaṃ hi sarvataḥ || 43 ||
[Analyze grammar]

brahmovāca |
taduktavacanaṃ śrutvā prasannaḥ parameśvaraḥ |
varatrayaṃ dadau tasmai dadhīcāya tathāstviti || 44 ||
[Analyze grammar]

varatrayaṃ śivātprāpya sānaṃdaśca mahāmuniḥ |
kṣuvasthānaṃ jagāmāśu vedamārge pratiṣṭhitaḥ || 45 ||
[Analyze grammar]

brahmovāca |
prāpyāvadhyatvamugrātsa vajrāsthitvamadīnatām |
atāḍayacca rājendraṃ pādamūlena mūrddhani || 46 ||
[Analyze grammar]

kṣuvo dadhīcaṃ vajreṇa jaghānorasyatho nṛpaḥ |
krodhaṃ kṛtvā viśeṣeṇa viṣṇugauravagarvitaḥ || 47 ||
[Analyze grammar]

nābhūnnāśāya tadvajraṃ dadhīcasya mahātmanaḥ |
prabhāvātparameśasya dhātṛputro visismiye || 48 ||
[Analyze grammar]

dṛṣṭvāpyavadhyatvamadīnatāṃ ca vajrasya cātyaṃtaparaprabhāvam |
kṣuvo dadhīcasya munīśvarasya visismiye cetasi dhātṛputraḥ || 49 ||
[Analyze grammar]

ārādhayāmāsa hariṃ mukundamindrānujaṃ kānanamāśu gatvā |
prapannapālaśca parājito hi dadhīcamṛtyuṃjayasevakena || 50 ||
[Analyze grammar]

pūjayā tasya santuṣṭo bhagavān madhusūdanaḥ |
pradadau darśanaṃ tasmai divyaṃ vai garuḍadhvajaḥ || 51 ||
[Analyze grammar]

divyena darśanenaiva dṛṣṭvā devaṃ janārdanam |
tuṣṭāva vāgbhiriṣṭābhiḥ praṇamya garuḍadhvajam || 52 ||
[Analyze grammar]

sampūjya caivaṃ tridaśeśvarādyaiḥ stutaṃ devamajeyamīśam |
vijñāpayāmāsa nirīkṣya bhaktyā janārdanāya praṇipatya mūrdhnā || 53 ||
[Analyze grammar]

rājovāca |
bhagavan brāhmaṇaḥ kaściddadhīca iti viśrutaḥ |
dharmavettā vinītātmā sakhā mama purābhavat || 54 ||
[Analyze grammar]

avadhyassarvadā sarvaiśśaṃkarasya prabhāvataḥ |
tamārādhya mahādevaṃ mṛtyuṃjayamanāmayam || 55 ||
[Analyze grammar]

sāvajñaṃ vāmapādena mama mūrdhni sadasyapi |
tāḍayāmāsa vegena sa dadhīco mahātapāḥ || 56 ||
[Analyze grammar]

uvāca taṃ ca garveṇa na bibhemīti sarvataḥ |
mṛtyuṃjayāpta suvaro garvito hyatulaṃ hariḥ || 57 ||
[Analyze grammar]

|| brahmovāca |
atha jñātvā dadhīcasya hyavadhyatvaṃ mahātmanaḥ |
sasmārāsya maheśasya prabhāvamatulaṃ hariḥ || 58 ||
[Analyze grammar]

evaṃ smṛtvā hariḥ prāha kṣuvaṃ vidhisutaṃ drutam |
viprāṇāṃ nāsti rājendra bhayamaṇvapi kutracit || 59 ||
[Analyze grammar]

viśeṣādrudrabhaktānāṃ bhayaṃ nāsti ca bhūpate |
duḥkhaṃ karoti viprasya śāpārthaṃ sasurasya me || 60 ||
[Analyze grammar]

bhavitā tasya śāpena dakṣayajñe sureśvarāt |
vināśo mama rājendra punarutthānameva ca || 61 ||
[Analyze grammar]

tasmātsametya rājendra sarvayajño na bhūyate |
karomi yatnaṃ rājendra dadhīcavijayāya te || 62 ||
[Analyze grammar]

śrutvā vākyaṃ kṣuvaḥ prāha tathāstviti harernṛpaḥ |
tasthau tatraiva tatprītyā tatkāmotsukamānasaḥ || 63 ||
[Analyze grammar]

iti śrīśivamahāpurāṇe dvitīyāyāṃ rudrasaṃhitāyāṃ dvitīyasatīkhaṃḍe kṣuvadadhīcavādavarṇanaṃ nāmāṣṭatriṃśo'dhyāyaḥ || 38 ||
[Analyze grammar]