Chapter 32

[English text for this chapter is available]

|| nārada uvāca |
śrutvā vyomagiraṃ dakṣaḥ kimakārṣīttadā'budhaḥ |
anye ca kṛtavaṃtaḥ kiṃ tataśca kimabhūdvada || 1 ||
[Analyze grammar]

parājitāḥ śivagaṇā bhṛgumaṃtrabalena vai |
kimakārṣuḥ kutra gatāstattvaṃ vada mahāmate || 2 ||
[Analyze grammar]

brahmovāca |
śrutvā vyomagiraṃ sarve vismitāśca surādayaḥ |
nāvocatkiṃcidapi te tiṣṭhantastu vimohitāḥ || 3 ||
[Analyze grammar]

palāyamānā ye vīrā bhṛgumaṃtrabalena te |
avaśiṣṭā śśivagaṇāśśivaṃ śaraṇamāyayuḥ || 4 ||
[Analyze grammar]

sarvaṃ nivedayāmāsū rudrāyāmitatejase |
caritraṃ ca tathābhūtaṃ supraṇamyādarācca te || 5 ||
[Analyze grammar]

gaṇā ūcuḥ |
devadeva mahādeva pāhi naśśaraṇāgatān |
saṃśṛṇvādarato nātha satī vārtāṃ ca vistarāt || 6 ||
[Analyze grammar]

garvitena maheśānadakṣena sudurātmanā |
avamānaḥ kṛtassatyā'nādaro nirjaraistathā || 7 ||
[Analyze grammar]

tubhyaṃ bhāgamadātro sa devebhyaśca pradattavān |
durvacāṃsyavadatproccairduṣṭo dakṣassugarvitaḥ || 8 ||
[Analyze grammar]

tato dṛṣṭvā na te bhāgaṃ yajñe'kupyatsatī prabho |
viniṃdya bahuśastātamadhākṣītsvatanuṃ tadā || 9 ||
[Analyze grammar]

gaṇāstvayutasaṃkhyākā mṛtāstatra vilajjayā |
svāṃgānyāchidya śastraiśca krudhyāma hyapare vayam || 10 ||
[Analyze grammar]

tadyajñe dhvaṃsituṃ vegātsannaddhāstu bhayāvahāḥ |
tiraskṛtā hi bhṛguṇā svaprabhāvādvirodhinā || 11 ||
[Analyze grammar]

te vayaṃ śaraṇaṃ prāptāstava viśvaṃbhara prabho |
nirbhayān kuru nastasmāddayamānabhavādbhayāt || 12 ||
[Analyze grammar]

apamānaṃ viśeṣeṇa tasmin yajñe mahāprabho |
dakṣādyāste'khilā duṣṭā akurvan garvitā ati || 13 ||
[Analyze grammar]

ityuktaṃ nikhilaṃ vṛttaṃ sveṣāṃ satyāśca nārada |
teṣāṃ ca mūḍhabuddhīnāṃ yathecchasi tathā kuru || 14 ||
[Analyze grammar]

|| brahmovāca |
ityākarṇyavacastasya svagaṇānāṃ vacaḥ prabhuḥ |
sasmāra nāradaṃ sarvaṃ jñātuṃ taccaritaṃ laghu || 15 ||
[Analyze grammar]

āgatastvaṃ drutaṃ tatra devarṣe divyadarśana |
praṇamya śaṃkaraṃ bhaktyā sāṃjalistatra tasthivān || 16 ||
[Analyze grammar]

tvāṃ praśasyātha sa svāmī satyā vārttāṃ ca pṛṣṭavān |
dakṣayajñagatāyā vai paraṃ ca caritaṃ tathā || 17 ||
[Analyze grammar]

pṛṣṭena śaṃbhunā tāta tvayāśveva śivātmanā |
tatsarvaṃ kathitaṃ vṛtaṃ jātaṃ dakṣādhvare hi yat || 18 ||
[Analyze grammar]

tadākarṇyeśvaro vākyaṃ mune tattvanmukhoditam |
cukopātidrutaṃ rudro mahāraudraparākramaḥ || 19 ||
[Analyze grammar]

utpāṭyaikāṃ jaṭāṃ rudro lokasaṃhārakārakaḥ |
āsphālayāmāsa ruṣā parvatasya tadopari || 20 ||
[Analyze grammar]

todanācca dvidhā bhūtā sā jaṭā ca mune prabhoḥ |
saṃbabhūva mahārāvo mahāpralayabhīṣaṇaḥ || 21 ||
[Analyze grammar]

tajjaṭāyāssamudbhūto vīrabhadro mahābalaḥ |
pūrvabhāgena devarṣe mahābhīmo gaṇāgraṇīḥ || 22 ||
[Analyze grammar]

sa bhūmiṃ viśvato vṛttvātyatiṣṭhaddaśāṃgulam |
pralayānalasaṃkāśaḥ pronnato dossahasravān || 23 ||
[Analyze grammar]

kopaniśvāsatastatra mahārudrasya ceśituḥ |
jātaṃ jvarāṇāṃ śatakaṃ saṃnipātāstrayodaśa || 24 ||
[Analyze grammar]

mahākālī samutpannā tajjaṭāparabhā gataḥ |
mahābhayaṃkarā tāta bhūtakoṭibhirāvṛtā || 25 ||
[Analyze grammar]

sarve mūrttidharāḥ krūrāḥ svara lokabhayaṃkarāḥ |
svatejasā prajvalaṃto dahaṃta iva sarvataḥ || 26 ||
[Analyze grammar]

atha vīro vīrabhadraḥ praṇamya parameśvaram |
kṛtāṃjalipuṭaḥ prāha vākyaṃ vākyaviśāradaḥ || 27 ||
[Analyze grammar]

vīrabhadra uvāca |
mahārudra mahāraudra somasūryāgnilocana |
kiṃ kartavyaṃ mayā kāryaṃ śīghramājñāpaya prabho || 28 ||
[Analyze grammar]

śoṣaṇīyāḥ kimīśāna kṣaṇārddhenaiva siṃdhavaḥ |
peṣaṇīyāḥ kimīśāna kṣaṇārddhenaiva parvatāḥ || 29 ||
[Analyze grammar]

kṣaṇena bhasmasātkuryāṃ brahmāṃḍamuta kiṃ hara |
kṣaṇena bhasmasātkuryāmsurānvā kiṃ munīśvarān || 30 ||
[Analyze grammar]

vyāśvāsaḥ sarvalokānāṃ kimu cāryo hi śaṃkara |
kartavya kimuteśāna sarvaprāṇivihiṃsanam || 31 ||
[Analyze grammar]

mamāśakyaṃ na kutrāpi tvatprasādānmaheśvara |
parākrameṇa mattulyo na bhūto na bhaviṣyati || 32 ||
[Analyze grammar]

yatra yatkāryamuddiśya preṣayiṣyasi māṃ prabho |
tatkāryaṃ sādhayāmyeva satvaraṃ tvatprasādataḥ || 33 ||
[Analyze grammar]

kṣudrāstaraṃti lokābdhiṃ śāsanācchaṃkarasya te |
harātohaṃ na kiṃ tartuṃ mahāpatsāgaraṃ kṣamaḥ || 34 ||
[Analyze grammar]

tvatpreṣitatṛṇenāpi mahatkāryaṃ mayatnataḥ |
kṣaṇena śakyate kartuṃ śaṃkarātra na saṃśayaḥ || 35 ||
[Analyze grammar]

līlāmātreṇa te śaṃbho kāryaṃ yadyapi siddhyati |
tathāpyahaṃ preṣaṇīyo tavaivānugraho hyayam || 36 ||
[Analyze grammar]

śaktiretādṛśī śaṃbho mamāpi tvadanugrahāt |
vinā śaktirna kasyāpi śaṃkara tvadanugrahāt || 37 ||
[Analyze grammar]

tvadājñayā vinā kopi tṛṇādīnapi vastutaḥ |
naiva cālayituṃ śaktassatyametanna saṃśayaḥ || 38 ||
[Analyze grammar]

śaṃbho niyamyāssarvepi devādyāste maheśvara |
tathaivāhaṃ niyamyaste niyaṃtussarvadehinām || 39 ||
[Analyze grammar]

praṇatosmi mahādeva bhūyopi praṇatosmyaham |
preṣaya sveṣṭa siddhyarthaṃ māmadya hara satvaram || 40 ||
[Analyze grammar]

spaṃdopi jāyate śaṃbho sakhyāṃgānāṃ muhurmuhuḥ |
bhaviṣyatyadya vijayo māmataḥ preṣaya prabho || 41 ||
[Analyze grammar]

harṣotsāhaviśeṣopi jāyate mama kaścana |
śaṃbho tvatpādakamale saṃsaktaśca mano mama || 42 ||
[Analyze grammar]

bhaviṣyati pratipadaṃ śubhasaṃtānasaṃtatiḥ || 43 ||
[Analyze grammar]

tasyaiva vijayo nityaṃ tasyaiva śubhamanvaham |
yasya śaṃbhau dṛḍhā bhaktistvayi śobhanasaṃśraye || 44 ||
[Analyze grammar]

brahmovāca |
ityuktaṃ tadvacaḥ śrutvā saṃtuṣṭo maṃgalāpatiḥ |
vīrabhadra jayeti tvaṃ proktāśīḥ prāha taṃ punaḥ || 45 ||
[Analyze grammar]

maheśvara uvāca |
śṛṇu madvacanaṃ tāta vīrabhadra sucetasā |
karaṇīyaṃ prayatnena taddrutaṃ me pratoṣakam || 46 ||
[Analyze grammar]

yāgaṃ kartuṃ samudyukto dakṣo vidhisutaḥ khalaḥ |
madvirodhī viśeṣeṇa mahāgarvo'budho'dhunā || 47 ||
[Analyze grammar]

tanmakhaṃ bhasmasātkṛtvā sayāgaparivārakam |
punarāyāhi matsthānaṃ satvaraṃ gaṇasattama || 48 ||
[Analyze grammar]

surā bhavaṃtu gaṃdharvā yakṣā vānye ca kecana |
tānapyadyaiva sahasā bhasmasātkuru satvaram || 49 ||
[Analyze grammar]

tatrāstu viṣṇurbrahmā vā śacīśo vā yamopi vā |
api cādyaiva tānsarvānpātayasva prayatnataḥ || 50 ||
[Analyze grammar]

surā bhavaṃtu gaṃdharvā yakṣā vānye ca kecana |
tānapyadyaiva sahasā bhasmasātkuru satvaram || 51 ||
[Analyze grammar]

dadhīcikṛtamullaṃghya śapathaṃ mayi tatra ye |
tiṣṭhaṃti te prayatnena jvālanīyāstvayā dhruvam || 52 ||
[Analyze grammar]

pramathāścāgamiṣyaṃti yadi viṣṇvādayo bhramāt |
nānākarṣaṇamaṃtreṇa jvālayānīya satvaram || 53 ||
[Analyze grammar]

ye tatrollaṃghya śapathaṃ madīyaṃ garvitāḥ sthitāḥ |
te hi maddrohiṇo'tastān jvālayānalamālayā || 54 ||
[Analyze grammar]

sapatnīkānsasārāṃśca dakṣayāgasthalasthitān |
prajvālya bhasmasātkṛtvā punarāyāhi satvaram || 55 ||
[Analyze grammar]

tatra tvayi gate devā viśvādya api sādaram |
stoṣyaṃti tvāṃ tadāpyāśu jvālayā jvālayaiva tān || 56 ||
[Analyze grammar]

devānapi kṛtadrohān jvālāmālāsamākulaḥ |
jvālaya jvalanaiśśīghraṃ mādhyāyādhyāyapālakam || 57 ||
[Analyze grammar]

dakṣādīnsakalāṃstatra sapatnīkānsabāṃdhavān |
prajvālya vīra dakṣaṃ nu salīlaṃ salilaṃ piba || 58 ||
[Analyze grammar]

brahmovāca |
ityukto roṣatāmrākṣo vedamaryādapālakaḥ |
virarāma mahāvīraṃ kālārissakaleśvaraḥ || 59 ||
[Analyze grammar]

iti śrīśivamahāpurāṇe dvitīyāyāṃ rudrasaṃhitāyāṃ dvitīye satīkhaṃḍe vīrabhadrotpattiśivopadeśavarṇanaṃ nāma dvātriṃśo'dhyāyaḥ || 32 ||
[Analyze grammar]