Chapter 30

[English text for this chapter is available]

|| nārada uvāca |
maunībhūtā yadā sāsītsatī śaṃkaravallabhā |
caritraṃ kimabhūttatra vidhe tadvada cādarāt || 1 ||
[Analyze grammar]

|| brahmovāca |
maunībhūtā satī devī smṛtvā svapatimādarāta |
kṣitāvudīcyāṃ sahasā niṣasāda praśāṃtadhīḥ || 2 ||
[Analyze grammar]

jalamācamya vidhivat saṃvṛtā vāsasā śuciḥ |
dṛṅnimīlya patiṃ smṛtvā yogamārgaṃ samāviśat || 3 ||
[Analyze grammar]

kṛtvāsamānāvanilau prāṇāpānau sitānanā |
utthāpyodānamatha ca yatnātsā nābhicakrataḥ || 4 ||
[Analyze grammar]

hṛdi sthāpyorasi dhiyā sthitaṃ kaṃṭhādbhruvossatī |
aniṃditānayanmadhyaṃ śaṃkaraprāṇavallabhā || 5 ||
[Analyze grammar]

evaṃ svadehaṃ sahasā dakṣakopājjihāsatī |
dagdhe gātre vāyuśucirdhāraṇaṃ yogamārgataḥ || 6 ||
[Analyze grammar]

tatassvabhartuścaraṇaṃ ciṃtayaṃtī na cāparam |
apaśyatsā satī tatra yogamārganiviṣṭadhīḥ || 7 ||
[Analyze grammar]

hatakalmaṣataddehaḥ prāpatacca tadagninā |
bhasmasādabhavatsadyo muniśreṣṭha tadicchayā || 8 ||
[Analyze grammar]

tatpaśyatāṃ ca khe bhūmau vādo'bhūtsumahāṃstadā |
hāheti sodbhutaścitrassurādīnāṃ bhayāvahaḥ || 9 ||
[Analyze grammar]

haṃ priyā parā śaṃbhordevī daivatamasya hi |
ahādasūn satī kena suduṣṭena prakopitā || 10 ||
[Analyze grammar]

aho tvanātmyaṃ sumahadasya dakṣasya paśyata |
carācaraṃ prajā yasya yatputrasya prajāpateḥ || 11 ||
[Analyze grammar]

ahodya dvimanā'bhūtsā satī devī manasvinī |
vṛṣadhvajapriyā'bhīkṣṇaṃ mānayogyā satāṃ sadā || 12 ||
[Analyze grammar]

soyaṃ durmarṣahṛdayo brahmadhṛk sa prajāpatiḥ |
mahatīmapakīrtiṃ hi prāpsyati tvakhile bhave || 13 ||
[Analyze grammar]

yatsvāṃgajāṃ sutāṃ śaṃbhudviṭ nyaṣe dhatsamudyatām |
mahānarakabhogī sa mṛtaye no'parādhataḥ || 14 ||
[Analyze grammar]

vadatyevaṃ jane satyā dṛṣṭvā'sutyāgamadbhutam |
drutaṃ tatpārṣadāḥ krodhādudatiṣṭhannudāyudhāḥ || 15 ||
[Analyze grammar]

dvāri sthitā gaṇāssarve rasāyutamitā ruṣā |
śaṃkarasya prabhoste vā'kudhyannatimahābalāḥ || 16 ||
[Analyze grammar]

hāhākāramakurvaṃste dhikdhik na iti vādinaḥ |
uccaissarve'sakṛdvīraḥśśaṃkarasya gaṇādhipāḥ || 17 ||
[Analyze grammar]

hāhākāreṇa mahatā vyāpta māsīddigantaram |
sarve prāpan bhayaṃ devā munayonyepi te sthitāḥ || 18 ||
[Analyze grammar]

gaṇāssaṃmaṃtrya te sarve'bhūvan kruddhā udāyudhāḥ |
kurvantaḥ pralayaṃ vādyaśastrairvyāptaṃ digaṃtaram || 19 ||
[Analyze grammar]

śastrairaghnannijāṃgāni kecittatra śucākulāḥ |
śiromukhāni devarṣe sutīkṣṇaiḥ prāṇanāśibhiḥ || 20 ||
[Analyze grammar]

itthaṃ te vilayaṃ prāptā dākṣāyaṇyā samaṃ tadā |
gaṇāyute dve ca tadā tadadbhutamivābhavat || 21 ||
[Analyze grammar]

gaṇā nāśā'vaśiṣṭā ye śaṃkarasya mahātmanaḥ |
dakṣaṃ taṃ krodhitaṃ hantuṃ mudā tiṣṭhannudāyudhāḥ || 22 ||
[Analyze grammar]

teṣāmāpatatāṃ vegaṃ niśamya bhagavān bhṛguḥ |
yajñaghnaghnena yajuṣā dakṣiṇāgnau juhonmune || 23 ||
[Analyze grammar]

hūyamāne ca bhṛguṇā samutpeturmahāsurāḥ |
ṛbhavo nāma prabalavīrāstatra sahasraśaḥ || 24 ||
[Analyze grammar]

tairalātāyudhaistatra pramathānāṃ munīśvara |
abhūdyuddhaṃ suvikaṭaṃ śṛṇvatāṃ romaharṣaṇam || 25 ||
[Analyze grammar]

ṛbhubhistairmahāvīrairhanyamānāssamantataḥ |
ayatnayānāḥ pramathā uśadbhirbrahmatejasā || 26 ||
[Analyze grammar]

evaṃ śivagaṇāste vai hatā vidrāvitā drutam |
śivecchayā mahāśaktyā tadadbhutamivā'bhavat || 27 ||
[Analyze grammar]

taddṛṣṭvā ṛṣayo devāśśakrādyāssamarudgaṇāḥ |
viśveśvinau lokapālāstūṣṇīṃ bhūtāstadā'bhavan || 28 ||
[Analyze grammar]

kecidviṣṇuṃ prabhuṃ tatra prārthayantassamantataḥ |
udvignā mantrayaṃtaśca viprābhāvaṃ muhurmuhuḥ || 29 ||
[Analyze grammar]

suvicāryodarkaphalaṃ mahodvignāssubuddhayaḥ |
suraviṣṇvādayobhūvan tannāśādrāvaṇānmuhuḥ || 30 ||
[Analyze grammar]

evaṃbhūtastadā yajño vighno jāto durātmanaḥ |
brahmabaṃdhośca dakṣasya śaṃkaradrohiṇo mune || 31 ||
[Analyze grammar]

iti śrīśivamahāpurāṇe dvitīyāyāṃ rudrasaṃhitāyāṃ dvitīye satīkhaṇḍe satyupākhyāne satīdehatyāgopadravavarṇanaṃ nāma triṃśo'dhyāyaḥ || 30 ||
[Analyze grammar]