Chapter 25

[English text for this chapter is available]

rāma uvāca |
ekadā hi purā devi śaṃbhuḥ paramasūtikṛt |
viśvakarmāṇamāhūya svaloke parataḥ pare || 1 ||
[Analyze grammar]

svadhenuśālāyāṃ ramyaṃ kārayāmāsa tena ca |
bhavanaṃ vistṛtaṃ samyak tatra siṃhāsanaṃ varam || 2 ||
[Analyze grammar]

tatracchatraṃ mahādivyaṃ sarvadādbhuta muttamam |
kārayāmāsa vighnārthaṃ śaṃkaro viśvakarmaṇā || 3 ||
[Analyze grammar]

śakrādīnāṃ juhāvāśu samastāndevatāgaṇān |
siddhagaṃdharvanāgānupade śāṃśca kṛtsnaśaḥ || 4 ||
[Analyze grammar]

devān sarvānāgamāṃśca vidhiṃ putrairmunīnapi |
devīḥ sarvā apsarobhirnānāvastusamanvitāḥ || 5 ||
[Analyze grammar]

devānāṃ ca tatharṣīṇāṃ siddhānāṃ phaṇināmapi |
ānayanmaṃgalakarāḥ kanyāḥ ṣoḍaśaṣoḍaśa || 6 ||
[Analyze grammar]

vīṇāmṛdaṃgapramukhavādyānnānāvidhānmune |
utsavaṃ kārayāmāsa vādayitvā sugāyanaiḥ || 7 ||
[Analyze grammar]

rājābhiṣekayogyāni dravyāṇi sakalauṣadhaiḥ |
pratyakṣatīrthapāthobhiḥ paṃcakubhāṃśca pūritān || 8 ||
[Analyze grammar]

tathānyāssaṃvidhā divyā ānayatsvagaṇaistadā |
brahmaghoṣaṃ mahārāvaṃ kārayāmāsa śaṃkaraḥ || 9 ||
[Analyze grammar]

atho hariṃ samāhūya vaikuṃṭhātprītamānasaḥ |
tadbhaktyā pūrṇayā devi modatisma maheśvaraḥ || 10 ||
[Analyze grammar]

sumuhūrte mahādevastatra siṃhāsane vare |
upaveśya hariṃ prītyā bhūṣayāmāsa sarvaśaḥ || 11 ||
[Analyze grammar]

ābaddharamyamukuṭaṃ kṛtakautukamaṃgalam |
abhyaṣiṃcanmaheśastu svayaṃ brahmāṃḍamaṃḍape || 12 ||
[Analyze grammar]

dattavānnikhilaiśvaryaṃ yannaijaṃ nānyagāmi yat |
tatastuṣṭāva taṃ śaṃbhussvataṃtro bhaktavatsalaḥ || 13 ||
[Analyze grammar]

brahmāṇaṃ lokakartāramavocadvacanaṃ tvidam |
vyāpayansvaṃ varādhīnaṃ svataṃtraṃ bhaktavatsalaḥ || 14 ||
[Analyze grammar]

maheśa uvāca |
ataḥ prabhṛti lokeśa mannideśādayaṃ hariḥ |
mama vaṃdya svayaṃ viṣṇurjātassarvaśśṛṇoti hi || 15 ||
[Analyze grammar]

sarvairdevādibhistāta praṇamatvamamuṃ harim |
varṇayaṃtu hariṃ vedā mamaite māmivājñayā || 16 ||
[Analyze grammar]

rāma uvāca |
ityuktvātha svayaṃ rudro'namadvai garuḍadhvajam |
viṣṇubhaktiprasannātmā varado bhaktavatsalaḥ || 17 ||
[Analyze grammar]

tato brahmādibhirdevaiḥ sarvarūpasuraistathā |
munisiddhādibhiścaivaṃ vaṃditobhūddharistadā || 18 ||
[Analyze grammar]

tato maheśo harayeśaṃsaddiviṣadāṃ tadā |
mahāvarān suprasanno dhṛtavānbhaktavatsalaḥ || 19 ||
[Analyze grammar]

maheśa uvāca |
tvaṃ kartā sarvalokānāṃ bhartā hartā madājñayā |
dātā dharmārthakāmānāṃ śāstā durnayakāriṇām || 20 ||
[Analyze grammar]

jagadīśo jagatpūjyo mahābalaparākramaḥ |
ajeyastvaṃ raṇe kvāpi mamāpi hi bhaviṣyasi || 21 ||
[Analyze grammar]

śaktitrayaṃ gṛhāṇa tvamicchādi prāpitaṃ mayā |
nānālīlāprabhāvatvaṃ svataṃtratvaṃ bhavatraye || 22 ||
[Analyze grammar]

tvaddveṣṭāro hare nūnaṃ mayā śāsyāḥ prayatnataḥ |
tvadbhaktānāṃ mayā viṣṇo deyaṃ nirvāṇamuttamam || 23 ||
[Analyze grammar]

māyāṃ cāpi gṛhāṇemāṃ duḥpraṇodyāṃ surādibhiḥ |
yayā saṃmohitaṃ viśvamacidrūpaṃ bhaviṣyati || 24 ||
[Analyze grammar]

mama bāhurmadīyastaṃ dakṣiṇo'sau vidhirhare |
asyāpi hi vidheḥ pātā janitāpi bhaviṣyasi || 25 ||
[Analyze grammar]

hṛdayaṃ mama yo rudrassa evāhaṃ na saṃśayaḥ |
pūjyastava sadā sopi brahmādīnāmapi dhruvam || 26 ||
[Analyze grammar]

atra sthitvā jagatsarvaṃ pālaya tvaṃ viśeṣataḥ |
nānāvatārabhedaiśca sadā nānoti kartṛbhiḥ || 27 ||
[Analyze grammar]

mama loke tavedaṃ va sthānaṃ ca paramarddhimat |
goloka iti vikhyātaṃ bhaviṣyati mahojjvalam || 28 ||
[Analyze grammar]

bhaviṣyaṃti hare ye te'vatārā bhuvi rakṣakāḥ |
madbhaktāstān dhruvaṃ drakṣye prītānatha nijādvarāta || 29 ||
[Analyze grammar]

rāma uvāca |
akhaṃḍaiśvaryamāsādya hareritthaṃ harassvayam |
kailāse svagaṇaistasmin svairaṃ krīḍatyumāpatiḥ || 30 ||
[Analyze grammar]

tadāprabhṛti lakṣmīśo gopaveṣobhavattathā |
ayāsīttatra suprītyā gopagopogavāṃ patiḥ || 31 ||
[Analyze grammar]

sopi viṣṇuḥ prasannātmā jugopa nikhilaṃ jagat |
nānāvatārassaṃdhartā vanakartā śivājñayā || 32 ||
[Analyze grammar]

idānīṃ sa caturddhātrāvātaracchaṃkarājñayā |
rāmohaṃ tatra bharato lakṣmaṇaśśatruheti ca || 33 ||
[Analyze grammar]

atha pitrājñayā devi sasītālakṣmaṇassati |
āgatohaṃ vane cādya duḥkhitau daivato 'bhavam || 34 ||
[Analyze grammar]

niśācareṇa me jāyā hṛtā sīteti kenacit |
anveṣyāmi priyāṃ cātra virahī baṃdhunā vane || 35 ||
[Analyze grammar]

darśanaṃ te yadi prāptaṃ sarvathā kuśalaṃ mama |
bhaviṣyati na saṃdeho mātaste kṛpayā sati || 36 ||
[Analyze grammar]

sītāprāptivaro devi bhaviṣyati na saṃśayaḥ |
taṃ hatvā duḥkhadaṃ pāpaṃ rākṣasaṃ tvadanugrahāt || 37 ||
[Analyze grammar]

mahadbhāgyaṃ mamādyaiva yadyakārṣṭāṃ kṛpāṃ yuvām |
yasmin sakaruṇau syātāṃ sa dhanyaḥ puruṣo varaḥ || 38 ||
[Analyze grammar]

itthamābhāṣya bahudhā supraṇamya satīṃ śivām |
tadājñayā vane tasmin vicacāra raghūdvahaḥ || 39 ||
[Analyze grammar]

athākarṇya satī vākyaṃ rāmasya prayatātmanaḥ |
hṛṣṭābhūtsā praśaṃsantī śivabhaktirataṃ hṛdi || 40 ||
[Analyze grammar]

smṛtvā svakarma manasākārṣīcchokaṃ suvistaram |
pratyāgacchadudāsīnā vivarṇā śivasannidhau || 41 ||
[Analyze grammar]

aciṃtayatpathi sā devī saṃcalaṃtī punaḥ punaḥ |
nāṃgīkṛtaṃ śivoktaṃ me rāmaṃ prati kudhīḥ kṛtā || 42 ||
[Analyze grammar]

kimuttaramahaṃ dāsye gatvā śaṃkarasannidhau |
iti saṃciṃtya bahudhā paścāttāpo'bhavattadā || 43 ||
[Analyze grammar]

gatvā śaṃbhusamīpaṃ ca praṇanāma śivaṃ hṛdā |
viṣaṇṇavadanā śokavyākulā vigataprabhā || 44 ||
[Analyze grammar]

atha tāṃ duḥkhitāṃ dṛṣṭvā papraccha kuśalaṃ haraḥ |
provāca vacanaṃ prītyā tatparīkṣā kṛtā katham || 45 ||
[Analyze grammar]

śrutvā śivavaco nāhaṃ kimapi praṇatānanā |
satī śokaviṣaṇṇā sā tasthau tatra samīpataḥ || 46 ||
[Analyze grammar]

atha dhyātvā maheśastu bubodha caritaṃ hṛdā |
dakṣajāyā mahāyogī nānālīlā viśāradaḥ || 47 ||
[Analyze grammar]

sasmāra svapaṇaṃ pūrvaṃ yatkṛtaṃ harikopataḥ |
tatprārthitotha rudrosau maryādā pratipālakaḥ || 48 ||
[Analyze grammar]

viṣādobhūtprabhostatra manasyevamuvāca ha |
dharmavaktā dharmakarttā dharmāvanakarassadā || 49 ||
[Analyze grammar]

śiva uvāca |
kuryāṃ ceddakṣajāyāṃ hi snehaṃ pūrvaṃ yathā mahān |
naśyenmama paṇaḥ śuddho lokalīlānusāriṇaḥ || 50 ||
[Analyze grammar]

brahmovāca |
itthaṃ vicārya bahudhā hṛdā tāmatyajatsatīm |
paṇaṃ na nāśayāmāsa vedadharmaprapālakaḥ || 51 ||
[Analyze grammar]

tato vihāya manasā satīṃ tāṃ parameśvaraḥ |
jagāma svagiri bhedaṃ jagāvaddhā sa hi prabhuḥ || 52 ||
[Analyze grammar]

calaṃtaṃ pathi taṃ vyomavāṇyuvāca maheśvaram |
sarvān saṃśrāvayan tatra dakṣajāṃ ca viśeṣataḥ || 53 ||
[Analyze grammar]

vyomavāṇyuvāca |
dhanyastvaṃ parameśāna tvattsamodya tathā paṇaḥ |
na kopyanyastrilokesmin mahāyogī mahāprabhuḥ || 54 ||
[Analyze grammar]

brahmovāca |
śrutvā vyomavaco devī śivaṃ papraccha viprabhā |
kaṃ paṇaṃ kṛtavānnātha brūhi me parameśvara || 55 ||
[Analyze grammar]

iti pṛṣṭopi giriśassatyā hitakaraḥ prabhuḥ |
nodvāhe svapaṇaṃ tasyai kaharyagre'karotpurā || 56 ||
[Analyze grammar]

tadā satī śivaṃ dhyātvā svapatiṃ prāṇavallabham |
sarvaṃ bubodha hetuṃ taṃ priyatyāgamayaṃ mune || 57 ||
[Analyze grammar]

tato'tīva śuśocāśu budhvā sā tyāgamātmanaḥ |
śaṃbhunā dakṣajā tasmānniśvasaṃtī muhurmuhuḥ || 58 ||
[Analyze grammar]

śivastasyāḥ samājñāya guptaṃ cakre manobhavam |
satye paṇaṃ svakīyaṃ hi kathā bahvīrvadanprabhuḥ || 59 ||
[Analyze grammar]

satyā prāpa sa kailāsaṃ kathayan vividhāḥ kathā |
vare sthitvā nijaṃ rūpaṃ dadhau yogī samādhibhṛt || 60 ||
[Analyze grammar]

tatra tasthau satī dhāmni mahāviṣaṇṇamānasā |
na bubodha caritraṃ tatkaścicca śivayormune || 61 ||
[Analyze grammar]

mahānkālo vyatīyāya tayoritthaṃ mahāmune |
svopāttadehayoḥ prabhvorlokalīlānusāriṇoḥ || 62 ||
[Analyze grammar]

dhyānaṃ tatyāja giriśastatassa paramārtihṛt |
tajjñātvā jagadaṃbā hi satī tatrājagāma sā || 63 ||
[Analyze grammar]

nanāmātha śivaṃ devī hṛdayena vidūyatā |
āsanaṃ dattavāñśaṃbhuḥ svasanmukha udāradhīḥ || 64 ||
[Analyze grammar]

kathayāmāsa suprītyā kathā bahvīrmanoramāḥ |
niśśokā kṛtavānsadyo līlāṃ kṛtvā ca tādṛśīm || 65 ||
[Analyze grammar]

pūrvavatsā sukhaṃ lebhe tatyāja svapaṇaṃ na saḥ |
netyāścaryaṃ śive tāta maṃtavyaṃ parameśvare || 66 ||
[Analyze grammar]

itthaṃ śivāśivakathāṃ vadanti munayo mune |
kila kecidavidvāṃso viyogaśca kathaṃ tayoḥ || 67 ||
[Analyze grammar]

śivāśivacaritraṃ ko jānāti paramārthataḥ |
svecchayā krīḍatasto hi caritaṃ kurutassadā || 68 ||
[Analyze grammar]

vāgarthāviva saṃpṛktau sadā khalu satīśivau |
tayorviyogassaṃbhāvyassaṃbhavedicchayā tayoḥ || 69 ||
[Analyze grammar]

iti śrīśivamahāpurāṇe ddvitīyāyāṃ rudrasaṃhitāyāṃ dvitīye satīkhaṃḍe satīviyogo nāma paṃcaviṃśo'dhyāyaḥ || 25 ||
[Analyze grammar]