Chapter 22

[English text for this chapter is available]

brahmovāca |
kadācidatha dakṣasya tanayā jaladāgame |
kailāsakṣmābhṛtaḥ prāha prasthasthaṃ vṛṣabhadhvajam || 1 ||
[Analyze grammar]

satyuvāca |
deva deva mahādeva śaṃbho matprāṇavallabha |
śṛṇu me vacanaṃ nātha śrutvā tatkuru mānada || 2 ||
[Analyze grammar]

ghanāgamoyaṃ saṃprāptaḥ kālaḥ paramadussahaḥ |
anekavarṇameghaughāssaṃgītāṃbaradikcayāḥ || 3 ||
[Analyze grammar]

vivāṃti vātā hṛdayaṃ hārayaṃtīta veginaḥ |
kadaṃbarajasā dhautāḥ pāthobinduvikarṣaṇāḥ || 4 ||
[Analyze grammar]

meghānāṃ garjitairuccairdhārāsāraṃ vimuṃcatām |
vidyutpatākināṃ tīvraḥ kṣubdhaṃ syātkasya no manaḥ || 5 ||
[Analyze grammar]

na sūryo dṛśyate nāpi meghacchanno niśāpatiḥ |
divāpi rātrivadbhāti virahi vyasanākaraḥ || 6 ||
[Analyze grammar]

meghānaikatra tiṣṭhaṃto dhvananta pavaneritāḥ |
pataṃta iva lokānāṃ dṛśyaṃte mūrdhni śaṃkara || 7 ||
[Analyze grammar]

vātāhatā mahāvṛkṣā nartaṃta iva cāṃbare |
dṛśyaṃte hara bhīrūṇāṃ trāsadāḥ kāmukepsitā || 8 ||
[Analyze grammar]

snigdhanīlāṃjanasyāśu sadivaughasya pṛṣṭhataḥ |
balākarājī vātyuccairyamunāpṛṣṭhaphenavat || 9 ||
[Analyze grammar]

kṣapākṣayeṣavalayaṃ dṛśyate kālikāgatā |
aṃbudhāviva saṃdīptapāvako vaḍavāmukhaḥ || 10 ||
[Analyze grammar]

prārohaṃtīha sasyāni maṃdiraṃ prāṅgaṇeṣvapi |
kimanyatra virūpākṣa sasyaudbhūtiṃ vadāmyaham || 11 ||
[Analyze grammar]

śyāmalai rājatairaktairviśadoyaṃ himācalaḥ |
maṃdarāśrayameghaughaḥ patrairdugdhāṃbudhiryathā || 12 ||
[Analyze grammar]

asamaśrīśca kuṭilaṃ bheje yasyātha kiṃśukān |
uccāvacān kalau lakṣmīrgantā saṃtyajya sajjanān || 13 ||
[Analyze grammar]

maṃdārastana pīlūnāṃ śabdena hṛṣitā muhuḥ |
kekāyaṃte prativane satataṃ pṛṣṭhasūcakam || 14 ||
[Analyze grammar]

meghotsukānāṃ madhuraścātakānāṃ manoharaḥ |
dhārāsāraśaraistāpaṃ petuḥ pratipathodgatam || 15 ||
[Analyze grammar]

meghānāṃ paśya maddehe durnayaṃ karakotkaraiḥ |
ye chādayaṃtyanugate mayūrāṃścātakāṃstathā || 16 ||
[Analyze grammar]

śikhasāraṃgayordṛṣṭvā mitrādapi parābhavam |
harṣaṃ gacchaṃti giriśaṃ vidūramapi mānasam || 17 ||
[Analyze grammar]

etasminviṣame kāle nīlaṃ kākāścakorakāḥ |
kurvaṃti tvāṃ vinā gehān kathaṃ śāṃtimavāpsyasi || 18 ||
[Analyze grammar]

mahatīvādya no bhītirmā meghotthā pinākadhṛk |
yatasva yasmādvāsāya māciraṃ vacanānmama || 19 ||
[Analyze grammar]

kailāse vā himādrau vā mahākāśyāmatha kṣitau |
tatropayogyaṃ saṃvāsaṃ kuru tvaṃ vṛṣabhadhvaja || 20 ||
[Analyze grammar]

|| brahmovāca |
evamuktastayā śaṃbhurdākṣāyaṇyā tathā'sakṛta |
saṃjahāsa ca śīrṣasthacandraraśmismitālayam || 21 ||
[Analyze grammar]

athovāca satīṃ devīṃ smitabhinnauṣṭhasaṃpuṭaḥ || |
mahātmā sarvatattvajñastoṣayanparameśvaraḥ || 22 ||
[Analyze grammar]

īśvaraḥ uvāca |
yatra prītyai mayā kāryo vāsastava manohare |
meghāstatra na gaṃtāraḥ kadācidapi matpriye || 23 ||
[Analyze grammar]

meghā nitaṃbaparyaṃtaṃ saṃcaraṃti mahībhṛtaḥ |
sadā prāleyasānostu varṣāsvapi manohare || 24 ||
[Analyze grammar]

kailāsasya tathā devi pādagāḥ prāyaśo ghanāḥ |
saṃcaraṃti na gacchaṃti tata ūrddhvaṃ kadācana || 25 ||
[Analyze grammar]

sumerorvā girerūrddhvaṃ na gacchaṃti balāhakāḥ |
jambūmūlaṃ samāsādya puṣkarāvartakādayaḥ || 26 ||
[Analyze grammar]

ityukteṣu girīndreṣu yasyopari bhaveddhi te |
manorucirnivāsāya tamācakṣva drutaṃ hi me || 27 ||
[Analyze grammar]

svecchāvihāraistava kautukāni suvarṇapakṣānilavṛndavṛndaiḥ |
śabdottaraṃgairmadhurasvanaistairmudopageyāni girau himotthe || 28 ||
[Analyze grammar]

siddhāṅganāste racitāsanā bhuvamicchaṃti caivopahṛtaṃ sakautukam |
svecchāvihāre maṇikuṭṭime girau kurvanti ceṣyaṃti phalādidānakaiḥ || 29 ||
[Analyze grammar]

phaṇīndrakanyā girikanyakāśca yā nāgakanyāśca turaṃgamukhyāḥ |
sarvāstu tāste satataṃ sahāyatāṃ samācariṣyaṃtyanumodavibhramaiḥ || 30 ||
[Analyze grammar]

rūpaṃ tadevamatulaṃ vadanaṃ sucāru dṛṣṭvāṃganā nijavapurnijakāṃtisahyam |
helā nije vapuṣi rūpagaṇeṣu nityaṃ kartāra ityanimiṣekṣaṇacārurūpāḥ || 31 ||
[Analyze grammar]

yā menakā parvatarāja jāyā rūpairguṇaiḥ khyātavatī triloke |
sā cāpi te tatra manonumodaṃ nityaṃ kariṣyatyanunāthanādyaiḥ || 32 ||
[Analyze grammar]

puraṃ hi vargairgiṃrirājavaṃdyaiḥ prītiṃ vicinvadbhirudārarūpā |
śikṣā sadā te khalu śocitāpi kāryā'nvahaṃ prītiyutā guṇādyaiḥ || 33 ||
[Analyze grammar]

vicitraiḥ kokilālāpamodaiḥ kuṃjagaṇāvṛtam |
sadā vasaṃtaprabhavaṃ gaṃtumicchasi kiṃ priye || 34 ||
[Analyze grammar]

nānābahujalāpūrṇasaraśśīta samāvṛtam |
padminīśataśoyuktamacalendraṃ himālayam || 35 ||
[Analyze grammar]

sarvakāmapradairvṛkṣaiśśādvalaiḥ kalpasaṃjñakaiḥ |
sakṣaṇaṃ paśya kusumānyathāśvakari govraje || 36 ||
[Analyze grammar]

praśāṃtaśvāpadagaṇaṃ munibhiryatibhirvṛtam |
devālayaṃ mahāmāye nānāmṛgagaṇairyutam || 37 ||
[Analyze grammar]

sphaṭika svarṇavaprādyai rājataiśca virājitam |
mānasādisaroraṃgairabhitaḥ pariśobhitam || 38 ||
[Analyze grammar]

hiraṇmayai ratnanālaiḥ paṃkajairmukulairvṛtam |
śiśumāraistathāsaṃkhyaiḥ kacchapairmakaraiḥ karaiḥ || 39 ||
[Analyze grammar]

niṣevitaṃ maṃjulaiśca tathā nīlotpalādibhiḥ |
deveśi tasmānmuktaiśca sarvagaṃdhaiśca kuṃkumaiḥ || 40 ||
[Analyze grammar]

lasadgaṃdhajalaiḥ śubhrairāpūrṇaiḥ svacchakāṃtibhiḥ |
śādvalaistaruṇaistuṃgaistīrasthairupaśobhitam || 41 ||
[Analyze grammar]

nṛtyadbhiriva śākhoṭairvarjayaṃtaṃ svasaṃbhavam |
kāmadevaissārasaiśca mattacakrāṃgaśobhitaiḥ || 42 ||
[Analyze grammar]

madhurārāvibhirmodakāribhirbhramarādibhiḥ |
śabdāyamānaṃ ca mudā kāmoddīpanakārakam || 43 ||
[Analyze grammar]

vāsavasya kuberasya yamasya varuṇasya ca |
agneḥ koṇaparājasya mārutasya parasya ca || 44 ||
[Analyze grammar]

purībhiśśobhiśikharaṃ meroruccaissurālayam |
raṃbhāśacīmenakādiraṃbhorugaṇasevitam || 45 ||
[Analyze grammar]

kiṃ tvamicchasi sarveṣāṃ parvatānāṃ hi bhūbhṛtām |
sārabhūte mahāramye saṃvihartuṃ mahāgirau || 46 ||
[Analyze grammar]

tatra devī sakhiyutā sāpsarogaṇamaṃḍitā |
nityaṃ kariṣyati śacī tava yogyāṃ sahāyatām || 47 ||
[Analyze grammar]

athavā mama kailāse parvateṃdre sadāśraye |
sthānamicchasi vitteśapurīparivirājite || 48 ||
[Analyze grammar]

gaṃgājalaughaprayate pūrṇacandrasamaprabhe |
darīṣu sānuṣu sadā brahmakanyābhyudīrite || 49 ||
[Analyze grammar]

nānāmṛgagaṇairyukte padmākaraśatāvṛte |
sarvairguṇaiśca sadvastusumerorapi suṃdari || 50 ||
[Analyze grammar]

sthāneṣveteṣu yatrāpi tavāṃtaḥkaraṇe spṛhā |
taṃ drutaṃ me samācakṣva vāsakartāsmi tatra te || 51 ||
[Analyze grammar]

brahmovāca |
itīrite śaṃkareṇa tadā dākṣāyaṇī śanaiḥ |
idamāha mahādevaṃ lakṣaṇaṃ svaprakāśanam || 52 ||
[Analyze grammar]

|| satyuvāca |
himādrāveva vasitumahamicche tvayā saha |
na cirātkuru saṃvāsaṃ tasminneva mahāgirau || 53 ||
[Analyze grammar]

brahmovāca |
atha tadvākyamākarṇya haraḥ paramamohitaḥ |
himādriśikharaṃ tuṃgaṃ dākṣāyaṇyā samaṃ yayau || 54 ||
[Analyze grammar]

siddhāṃganāgaṇayutamagamyaṃ caiva pakṣibhiḥ |
agamacchikharaṃ ramyaṃ sarasīvanarājitam || 55 ||
[Analyze grammar]

vicitrarūpaiḥ kamalaiḥ śikharaṃ ratnakarburam |
bālārkasadṛśaṃ śaṃbhurāsasāda satīsakhaḥ || 56 ||
[Analyze grammar]

sphaṭikābhramaye tasmin śādavaladrumarājite |
vicitrapuṣpāvalibhissarasobhiśca saṃyute || 57 ||
[Analyze grammar]

praphullataruśākhāgraṃ guṃjadbhramarasevitam |
paṃkeruhaiḥ praphullaiśca nīlotpalacayaistathā || 58 ||
[Analyze grammar]

śobhitaṃ cakravākādyaiḥ kādaṃbairhaṃsaśaṃkubhiḥ |
pramattasārasaiḥ krauṃcairnīlaskaṃdhaiśca śabditaiḥ || 59 ||
[Analyze grammar]

puṃskokilānāṃ ninadairmadhurairgaṇasevitaiḥ |
turaṃgavadanaissiddhairapsarobhiśca guhyakaiḥ || 60 ||
[Analyze grammar]

vidyādharībhirdevībhiḥ kinnarībhirvihāritam |
puraṃdhrībhiḥ pārvatībhiḥ kanyābhirabhisaṃgatam || 61 ||
[Analyze grammar]

vipaṃcītāṃtrikāmattamṛdaṃgapaṭahasvanaiḥ |
nṛtyadbhirapsarobhiśca kautukotthaiśca śobhitam || 62 ||
[Analyze grammar]

devikābhirdīrghikābhirgaṃdhibhissusamāvṛtam |
praphullakusumairnityaṃ sakuṃjairupaśobhitam || 63 ||
[Analyze grammar]

śailarājapurābhyarṇe śikhare vṛṣabhadhvajaḥ |
saha satyā ciraṃ reme evaṃbhūteṣu śobhanam || 64 ||
[Analyze grammar]

tasminsvargasame sthāne divyamānena śaṃkaraḥ |
daśavarṣasahasrāṇi reme satyā samaṃ mudā || 65 ||
[Analyze grammar]

sa kadācittatassthānādanyadyāti sthalaṃ haraḥ |
kadācinmeruśikharaṃ devī devavṛtaṃ sadā || 66 ||
[Analyze grammar]

dvīpānnānā tathodyānavanāni vasudhātalam |
gatvāgatvā punastatrābhyetya reme satīsukham || 67 ||
[Analyze grammar]

na jajñe sa divā rātrau na brahmaṇi tapassamam |
satyāṃ hi manasā śaṃbhuḥ prītimeva cakāra ha || 68 ||
[Analyze grammar]

evaṃ mahādevamukhaṃ satyapaśyatsma sarvadā |
mahādevo'pi sarvatra sadādrākṣītsatīmukham || 69 ||
[Analyze grammar]

evamanyonyasaṃsargādanurāgamahīruham |
varddhayāmāsatuḥ kālīśivau bhāvāṃbusecanaiḥ || 70 ||
[Analyze grammar]

iti śrīśivamahāpurāṇe dvitīyāyāṃ rudrasaṃhitāyāṃ dvitīye satīkhaṃḍe śivāśivavihāravarṇanaṃ nāma dvāviṃśo'dhyāyaḥ || 22 ||
[Analyze grammar]