Chapter 20

[English text for this chapter is available]

nārada uvāca |
brahman vidhe mahābhāga śivabhaktavara prabho |
śrāvitaṃ caritaṃ śaṃbhoradbhutaṃ maṃgalāyanam || 1 ||
[Analyze grammar]

tataḥ kimabhavattāta kathyatāṃ śaśimaulinaḥ |
satyāśca caritaṃ divyaṃ sarvāghaughavināśanam || 2 ||
[Analyze grammar]

|| brahmovāca |
nivṛtte śaṃkare cāsmadvadhādbhaktānukaṃpini |
abhavannirbhayāssarve sukhinastu prasannakāḥ || 3 ||
[Analyze grammar]

nataskaṃdhāssāṃjalayaḥ praṇemurnikhilāśca te |
tuṣṭuvuśśaṃkaraṃ bhaktyā cakrurjayaravaṃ mudā || 4 ||
[Analyze grammar]

tasminneva kāle'haṃ prasanno nirbhayo mune |
astavaṃ śaṃkaraṃ bhaktyā vividhaiśca śubhastavaiḥ || 5 ||
[Analyze grammar]

tatastuṣṭamanāśśaṃbhurbahulīlākaraḥ prabhuḥ |
mune māṃ samuvācedaṃ sarveṣāṃ śṛṇvatāṃ tadā || 6 ||
[Analyze grammar]

|| rudra uvāca |
brahman tāta prasannohaṃ nirbhayastvaṃ bhavādhunā |
svaśīrṣaṃ spṛśa hastena madājñāṃ kurvasaṃśayam || 7 ||
[Analyze grammar]

brahmovāca |
ityākarṇya vacaśśambhorbahulīlākṛtaḥ prabhoḥ |
spṛśan svaṃ kaṃ tathā bhūtvā prāṇamaṃ vṛṣabhadhvajam || 8 ||
[Analyze grammar]

yāvadevamahaṃ svaṃ kaṃ spṛśāmi nijapāṇinā |
tāvattatra sthitaṃ sadyastadrūpavṛṣavāhanam || 9 ||
[Analyze grammar]

tato lajjāparītāṃgassthitaścāhamadhomukhaḥ |
indrādyairamaraissarvaissudṛṣṭassarvatassthitaiḥ || 10 ||
[Analyze grammar]

athāhaṃ lajjayāviṣṭaḥ praṇipatya maheśvaram |
pravocaṃ saṃstutiṃ kṛtvā kṣamyatāṃ kṣamyatāmiti || 11 ||
[Analyze grammar]

asya pāpasya śudhyarthaṃ prāyaścittaṃ vada prabho |
nigrahaṃ ca tathānyāyaṃ yena pāpaṃ prayātu me || 12 ||
[Analyze grammar]

ityuktastu mayā śaṃbhuruvāca praṇataṃ hi tam |
suprasannataro bhūtvā sarveśo bhaktavatsalaḥ || 13 ||
[Analyze grammar]

śaṃbhuruvāca |
anenaiva svarūpeṇa madadhiṣṭhitakena hi |
tapaḥ kuru prasannātmā madārādhanatatparaḥ || 14 ||
[Analyze grammar]

khyātiṃ yāsyasi sarvatra nāmnā rudraśiraḥ kṣitau |
sādhakaḥ sarvakṛtyānāṃ tejobhājāṃ dvijanmanām || 15 ||
[Analyze grammar]

manuṣyāṇāmidaṃ kṛtyaṃ yasmādvīryyaṃ tvayā'dhunā |
tasmāttvaṃ mānuṣo bhūtvā vicariṣyasi bhūtale || 16 ||
[Analyze grammar]

yastvāṃ cānena rūpeṇa dṛṣṭvā kau vicariṣyati |
kimetadbrahmaṇo mūrdhni vadanniti purāntakaḥ || 17 ||
[Analyze grammar]

tataste ceṣṭitaṃ sarvaṃ kautukācchroṣyatīti yaḥ |
paradārakṛtāttyāgānmuktiṃ sadyassa yāsyati || 18 ||
[Analyze grammar]

yathā yathā janaścaitatkṛtyante kīrtayiṣyati |
tathā tathā viśuddhiste pāpasyāsya bhaviṣyati || 19 ||
[Analyze grammar]

etadeva hi te brahman prāyaścittaṃ mayeritam |
janahāsyakaraṃ loke tava garhākaraṃ param || 20 ||
[Analyze grammar]

etacca tava vīryyaṃ hi patitaṃ vedimadhyagam |
kāmārtasya mayā dṛṣṭaṃ naitaddhāryaṃ bhaviṣyati || 21 ||
[Analyze grammar]

caturbindumitaṃ retaḥ patitaṃ yatkṣitau tava |
tanmitāstoyadā vyomni bhaveyuḥ pralayaṃkarāḥ || 22 ||
[Analyze grammar]

etasminnaṃtare tatra devarṣīṇāṃ puro drutam |
tadretasassamabhavaṃstanmitāśca balāhakā || 23 ||
[Analyze grammar]

saṃvartakastathāvarttaḥ puṣkaro droṇa eva ca |
ete caturvidhāstāta mahāmeghā layaṃkarāḥ || 24 ||
[Analyze grammar]

garjaṃtaścātha mucaṃtastoyānīṣacchivecchayā |
phelurvyomni muniśreṣṭha toyadāste kadāravāḥ || 25 ||
[Analyze grammar]

taistu saṃchādite vyomni sugarjadbhiśca śaṃkaraḥ |
praśāndākṣāyaṇī devī bhṛśaṃ śāṃto'bhavaddrutam || 26 ||
[Analyze grammar]

atha cāhaṃ vītabhayaśśaṃkarasyā jñayā tadā |
śeṣaṃ vaivāhikaṃ karma samāptimanayaṃ mune || 27 ||
[Analyze grammar]

papāta puṣpavṛṣṭiśca śivāśivaśiraskayoḥ |
sarvatra ca muniśreṣṭha mudā devagaṇojjhitā || 28 ||
[Analyze grammar]

vādyamāneṣu vādyeṣu gāyamāneṣu teṣu ca |
paṭhatsu vipravaryeṣu vādān bhaktyānviteṣu ca || 29 ||
[Analyze grammar]

raṃbhādiṣu puraṃdhrīṣu nṛtyamānāsu sādaram |
mahotsavo mahānāsīddevapatnīṣu nārada || 30 ||
[Analyze grammar]

atha karmavitāneśaḥ prasannaḥ parameśvaraḥ |
prāha māṃ prāṃjaliṃ prītyā laukikīṃ gatimāśritaḥ || 31 ||
[Analyze grammar]

īśvara uvāca |
he brahman sukṛtaṃ karma sarvaṃ vaivāhikaṃ ca yat |
prasannosmi tvamācāryo dadyāṃ te dakṣiṇāṃ ca kām || 32 ||
[Analyze grammar]

yācasva tāṃ surajyeṣṭha yadyapi syātsudurlabhā |
brūhi śīghraṃ mahābhāga nādeyaṃ vidyate mama || 33 ||
[Analyze grammar]

|| brahmovāca |
ityākarṇya vacassohaṃ śaṃkarasya kṛtāṃjaliḥ |
mune'vocaṃ vinītātmā praṇamyeśaṃ muhurmuhuḥ || 34 ||
[Analyze grammar]

|| brahmovāca |
yadi prasanno deveśa varayogyosmyahaṃ yadi |
tatkuru tvaṃ maheśāna suprītyā yadvadāmyaham || 35 ||
[Analyze grammar]

anenaiva tu rūpeṇa vedyāmasyāṃ maheśvara |
tvayā stheyaṃ sadaivātra nṛṇāṃ pāpaviśuddhaye || 36 ||
[Analyze grammar]

yenāsya saṃnidhau kṛtvā svāśramaṃ śaśi śekhara |
tapaḥ kuryā vināśāya svapāpasyāsya śaṃkara || 37 ||
[Analyze grammar]

caitraśuklatrayodaśyāṃ nakṣatre bhagadaivate |
sūryavāre ca yo bhaktyā vīkṣeta bhuvi mānavaḥ || 38 ||
[Analyze grammar]

tadaiva tasya pāpāni prayāṃtu hara saṃkṣayam |
varddhate vipulaṃ puṇyaṃ rogā naśyaṃtu sarvaśaḥ || 39 ||
[Analyze grammar]

yā nārī durbhagā vaṃdhyā kāṇā rūpavivarjitā |
sāpi tvaddarśanādeva nirdoṣā saṃbhaveddhruvam || 40 ||
[Analyze grammar]

brahmovāca |
ityākarṇya vaco me hi svātmasarvasukhāvaham |
tathā'stviti śivaḥ prāha suprasannena cetasā || 41 ||
[Analyze grammar]

śiva uvāca |
hitāya sarvalokasya vedyāṃ tasyāṃ vyavasthitaḥ |
sthāsyāmi sahitaḥ patnyā satyā tvadvacanādvidhe || 42 ||
[Analyze grammar]

|| brahmovāca |
ityuktvā bhagavāṃstatra sabhāryo vṛṣabhadhvajaḥ |
uvāca vedimadhyastho mūrtiṃ kṛtvāṃśarūpiṇīm || 43 ||
[Analyze grammar]

tato dakṣaṃ samāmaṃtrya śaṃkaraḥ parameśvaraḥ |
patnyā satyā gaṃtumanā abhūtsvajanavatsalaḥ || 44 ||
[Analyze grammar]

etasminnaṃtare dakṣo vinayāvanatassudhīḥ |
sāṃjalirnatakaḥ prītyā tuṣṭāva vṛṣabhadhvajam || 45 ||
[Analyze grammar]

viṣṇvādayassurāssarve munayaśca gaṇāstadā |
natvā saṃstūya vividhaṃ cakrurjayaravaṃ mudā || 46 ||
[Analyze grammar]

āropya vṛṣabhe śaṃbhussatīṃ dakṣājñayā mudā |
jagāma himavatprasthaṃ vṛṣabhasthassvayaṃ prabhuḥ || 47 ||
[Analyze grammar]

atha sā śaṃkarābhyāse sudatī cāruhāsinī |
vireje vṛṣabhasthā vai candrāṃte kālikā yathā || 48 ||
[Analyze grammar]

viṣṇvādayassurāssarve marīcyādyāstatharṣayaḥ |
dakṣopi mohitaścāsīttathānye niścalā janāḥ || 49 ||
[Analyze grammar]

kecidvādyānvādayanto gāyaṃtassusvaraṃ pare |
śivaṃ śivayaśaśśuddhamanujagmuḥ śivaṃ mudā || 50 ||
[Analyze grammar]

madhyamārgādvisṛṣṭo hi dakṣaḥ prītyātha śambhunā |
vadhāma prāpa sagaṇaḥ śambhuḥ premasamākulaḥ || 51 ||
[Analyze grammar]

visṛṣṭā api viṣṇvādyāśśambhunā punareva te |
anujagmuśśivaṃ bhaktyā surāḥ paramayā mudā || 52 ||
[Analyze grammar]

taissarvaissagaṇaiśśaṃbhussatyaḥ ca svastriyā yutaḥ |
prāpa svaṃ dhāma saṃhṛṣṭo himavadgiri śobhitam || 53 ||
[Analyze grammar]

tatra gatvākhilāndevānmunīnapi parāṃstathā |
mudā visarjayāmāsa bahu sammānya sādaram || 54 ||
[Analyze grammar]

śaṃbhumābhāṣya te sarve viṣṇvādyā muditānanā |
svaṃsvaṃ dhāma yayurnatvā stutvā ca munayassurāḥ || 55 ||
[Analyze grammar]

śivopi muditotyarthaṃ svapatnyā dakṣakanyayā |
himavatprasthasaṃstho hi vijahāra bhavānugaḥ || 56 ||
[Analyze grammar]

tatassa śaṃkarassatyā sagaṇassūtikṛnmune |
prāpa svaṃ dhāma saṃhṛṣṭaḥ kailāśaṃ parvatottamam || 57 ||
[Analyze grammar]

etadvassarvamākhyātaṃ yathā tasya purā'bhavat |
vivāho vṛṣayānasya manusvāyaṃbhuvāntaka || 58 ||
[Analyze grammar]

vivāhasamaye yajñe prāraṃbhe vā śṛṇoti yaḥ |
etadākhyānamavyagrassaṃpūjya vṛṣabhadhvajam || 59 ||
[Analyze grammar]

tasyā'vighnaṃ bhavetsarvaṃ karma vaivāhikaṃ ca yat |
śubhākhyamaparaṃ karma nirvighnaṃ sarvadā bhavet || 60 ||
[Analyze grammar]

kanyā ca sukhasaubhaṇyaśīlācāraguṇānvitā |
sādhvī syātputriṇī prītyā śrutvākhyānamidaṃ śubham || 61 ||
[Analyze grammar]

iti śrīśivamahāpurāṇe dvitīyāyāṃ rudrasaṃhitāyāṃ dvitīye satīkhaṇḍe satī vivāhavarṇanaṃ nāma viṃśo'dhyāyaḥ || 20 ||
[Analyze grammar]