Chapter 11

[English text for this chapter is available]

nārada uvāca |
brahman tāta mahāprājña vada no vadatāṃ vara |
gate viṣṇau kimabhavadakārṣītkiṃ vidhe bhavān || 1 ||
[Analyze grammar]

brahmovāca |
vipranandanavarya tvaṃ sāvadhānatayā śṛṇu |
viṣṇau gate bhagavati yadakārṣamahaṃ khalu || 2 ||
[Analyze grammar]

vidyāvidyātmikāṃ śuddhāṃ parabrahmasvarūpiṇīm |
staumi deva jagaddhātrīṃ durgāṃ śambhupriyāṃ sadā || 3 ||
[Analyze grammar]

sarvatra vyāpinīṃ nityāṃ nirālaṃbāṃ nirākulām |
tridevajananīṃ vaṃde sthūlasthūlāmarūpiṇīm || 4 ||
[Analyze grammar]

tvaṃ citiḥ paramānaṃdā paramātmasvarūpiṇī |
prasannā bhava deveśi matkāryaṃ kuru te namaḥ || 5 ||
[Analyze grammar]

brahmovāca |
evaṃ saṃstūyamānā sā yoganidrā mayā mune |
āvirbabhūva pratyakṣaṃ devarṣe caṃḍikā mama || 6 ||
[Analyze grammar]

snigdhāṃjanadyutiścārurūpā divyacaturbhujā |
siṃhasthā varahastā ca muktāmaṇikacotkaṭā || 7 ||
[Analyze grammar]

śaradiṃdvānanā śubhracandrabhālā trilocanā |
sarvāvayavaramyā ca kamalāṃghrinakhadyutiḥ || 8 ||
[Analyze grammar]

samakṣaṃ tāmumāṃ vīkṣya mune śaktiṃ śivasya hi |
bhaktyā vinatatuṃgāṃśaḥ prāstavaṃ supraṇamya vai || 9 ||
[Analyze grammar]

brahmovāca |
namo namaste jagataḥpravṛttinivṛtirūpe sthitisargarūpe |
carācarāṇāṃ bhavatī suśaktissanātanī sarvavimohanīti || 10 ||
[Analyze grammar]

yā śrīḥ sadā keśavamūrtimālā viśvaṃbharā yā sakalaṃ bibharti |
yā tvaṃ purā sṛṣṭikarī maheśī hartrī trilokasya parā guṇebhya || 11 ||
[Analyze grammar]

yā yogināṃ vai mahitā manojñā sā tvaṃ na te paramāṇusāre |
yamādipūte hṛdi yogināṃ yā yā yogināṃ dhyānapathe pratītā || 12 ||
[Analyze grammar]

prakāśaśuddhyādiyutā virāgā sā tvaṃ hi vidyā vividhāvalaṃbā |
kūṭasthamavyaktamanaṃtarūpaṃ tvaṃ bibhratī kālamayī jagaṃti || 13 ||
[Analyze grammar]

vikārabījaṃ prakaropi nityaṃ guṇānvitā sarvajaneṣu nūnam |
tvaṃ vai guṇānāṃ ca śive trayāṇāṃ nidānabhūtā ca tataḥ parāsi || 14 ||
[Analyze grammar]

satvaṃ rajastāmasa ityamīṣāṃ vikārahīnā samu vastitīryā |
sā tvaṃ guṇānāṃ jagadekahetuṃ brahmāṃtarāraṃbhasi cātsi pāsi || 15 ||
[Analyze grammar]

aśeṣajagatāṃ bīje jñeyajñānasvarūpiṇi |
jagaddhitāya satataṃ śivapatni namostu te || 16 ||
[Analyze grammar]

brahmovāca |
ityākarṇya vacaḥ sā me kālī loka vibhāvinī |
prītyā māṃ jagatāmūce sraṣṭāraṃ janaśabdavat || 17 ||
[Analyze grammar]

devyuvāca |
brahmankimarthaṃ bhavatā stutāhamavadhāraya |
ucyatāṃ yadi dhṛṣyosi tacchīghraṃ purato mama || 18 ||
[Analyze grammar]

pratyakṣamapi jātāyāṃ siddhiḥ kāryasya niścitā |
tasmāttvaṃ vāṃchitaṃ brūhi yā kariṣyāmi bhāvitā || 19 ||
[Analyze grammar]

brahmovāca |
śṛṇu devi maheśāni kṛpāṃ kṛtvā mamopari |
manorathasthaṃ sarvajñe pravadāmi tvadājñayā || 20 ||
[Analyze grammar]

yaḥ patistava deveśi lalāṭānme'bhavatpurā |
śivo rudrākhyayā yogī sa vai kailāsamāsthitaḥ || 21 ||
[Analyze grammar]

tapaścarati bhūteśa eka evāvikalpakaḥ |
apatnīko nirvikāro na dvitīyāṃ samīhate || 22 ||
[Analyze grammar]

taṃ mohaya yathā cānyāṃ dvitīyāṃ sati vīkṣate |
tvadṛte tasya no kācidbhaviṣyati manoharā || 23 ||
[Analyze grammar]

tasmāttvameva rūpeṇa bhavasva haramohinī |
sutā bhūtvā ca dakṣasya rudrapatnī śive bhava || 24 ||
[Analyze grammar]

yathā dhṛtaśarīrā tvaṃ lakṣmīrūpeṇa keśavam |
āmodayasi viśvasya hitāyaitaṃ tathā kuru || 25 ||
[Analyze grammar]

kāṃtābhilāṣamātraṃ me dṛṣṭvā'niṃdadvṛṣadhvajaḥ |
sa kathaṃ vanitāṃ devī svecchayā saṃgrahīṣyati || 26 ||
[Analyze grammar]

hare gṛhītakāṃte tu kathaṃ sṛṣṭiśśubhāvahā |
ādyaṃtamadhye caitasya hetau tasminvirāgiṇi || 27 ||
[Analyze grammar]

iti ciṃtāparo nāhaṃ tvadanyaṃ śaraṇaṃ hitam |
kṛcchravāṃstena viśvasya hitāyaitatkuruṣva me || 28 ||
[Analyze grammar]

na viṣṇustasya mohāya na lakṣmīrna manobhavaḥ |
na cāpyahaṃ jaganmātarnānyastvāṃ kopi vai vinā || 29 ||
[Analyze grammar]

tasmāttvaṃ dakṣajā bhūtvā divyarūpā maheśvarī |
tatpatnī bhava madbhaktyā yoginaṃ mohayeśvaram || 30 ||
[Analyze grammar]

dakṣastapati deveśi kṣīrodottaratīragaḥ |
tvāmuddiśya samādhāya manastvayi dṛḍhavrataḥ || 31 ||
[Analyze grammar]

brahmovāca |
ityākarṇya vacassā ciṃtāmāpa śivā tadā |
uvāca ca svamanasi vismitā jagadambikā || 32 ||
[Analyze grammar]

devyuvāca |
aho sumahadāścaryaṃ vedavaktāpi viśvakṛt |
mahājñānaparo bhūtvā vidhātā kiṃ vadatyayam || 33 ||
[Analyze grammar]

vidheścetasi saṃjāto mahāmoho'sukhāvahaḥ |
yadvaraṃ nirvikāraṃ taṃ saṃmohayitumicchati || 34 ||
[Analyze grammar]

haramohavaraṃ mattassamicchati vidhistvayam |
ko lābhosyātra sa vibhurnirmoho nirvikalpakaḥ || 35 ||
[Analyze grammar]

parabrahmākhyo yaśśaṃbhurnirguṇo nirvikāravān |
tasyāhaṃ sarvadā dāsī tadājñāvaśagā sadā || 36 ||
[Analyze grammar]

sa eva pūrṇarūpeṇa rudranāmābhavacchivaḥ |
bhaktoddhāraṇahetorhi svataṃtraḥ parameśvaraḥ || 37 ||
[Analyze grammar]

harervidheśca sa svāmī śivānnyūno na karhicit |
yogādaro hyamāyastho māyeśaḥ parataḥ paraḥ || 38 ||
[Analyze grammar]

matvā tamātmajaṃ brahmā sāmānyasurasaṃnibham |
icchatyayaṃ mohayitumato'jñānavimohitaḥ || 39 ||
[Analyze grammar]

na dadyāṃ cedvaraṃ vedanītirbhraṣṭā bhavediti |
kiṃ kuryāṃ yena na vibhuḥ kruddhassyānme maheśvaraḥ || 40 ||
[Analyze grammar]

brahmo vāca |
vicāryyetthaṃ maheśaṃ taṃ sasmāra manasā śivā |
prāpānujñāṃ śivasyāthovāca durgā ca māṃ tadā || 41 ||
[Analyze grammar]

|| durgovāca |
yaduktaṃ bhavatā brahman samastaṃ satyameva tat |
madṛte mohayitrīha śaṃkarasya na vidyate || 42 ||
[Analyze grammar]

hare'gṛhītadāre tu sṛṣṭinaiṣā sanātanī |
bhaviṣyatīti tatsatyaṃ bhavatā pratipāditam || 43 ||
[Analyze grammar]

mamāpi mohane yanno vidyatesya mahāprabhoḥ |
tvadvākyādviguṇo medya prayatno'bhūtsa nirbharaḥ || 44 ||
[Analyze grammar]

ahaṃ tathā yatiṣyāmi yathā dāraparigraham |
haraḥ kariṣyati vidhe svayameva vimohitaḥ || 45 ||
[Analyze grammar]

satīmūrtimahaṃ dhṛtvā tasyaiva vaśavartinī |
bhaviṣyāmi mahābhāgā lakṣmīrviṣṇoryathā priyā || 46 ||
[Analyze grammar]

yathā sopi mayaiveya vaśavartī sadā bhavet |
tathā yatnaṃ kariṣyāmi tasyaiva kṛpayā vidhe || 47 ||
[Analyze grammar]

utpannā dakṣajāyāyāṃ satīrūpeṇa śaṃkaram |
ahaṃ sabhājayiṣyāmi līlayā taṃ pitāmaha || 48 ||
[Analyze grammar]

yathānyajaṃturavanau vartate vanitāvaśe |
madbhaktyā sa haro vāmāvaśavartī bhaviṣyati || 49 ||
[Analyze grammar]

brahmovāca |
mahyamitthaṃ samābhāṣya śivā sā jagadambikā |
vīkṣyamāṇā mayā tāta tatraivāṃtardadhe tataḥ || 50 ||
[Analyze grammar]

tasyāmaṃtarhitāyāṃ tu sohaṃ lokapitāmahaḥ |
agamaṃ yatra svasutāstebhyassarvamavarṇayam || 51 ||
[Analyze grammar]

iti śrīśivapurāṇe dvitīyāyāṃ rudrasaṃhitāyāṃ satīkhaṇḍe durgāstutibrahmavaraprāptivarṇano nāmekādaśo'dhyāyaḥ || 11 ||
[Analyze grammar]