Chapter 5

[English text for this chapter is available]

sūta uvāca |
ityākarṇya vacastasya brahmaṇo munisattamaḥ |
sa mudovāca saṃsmṛtya śaṃkaraṃ prītamānasaḥ || 1 ||
[Analyze grammar]

nārada uvāca |
brahman vidhe mahābhāga viṣṇuśiṣya mahāmate |
adbhutā kathitā līlā tvayā ca śaśimaulinaḥ || 2 ||
[Analyze grammar]

gṛhītadāre madane hṛṣṭe hi svagṛhe gate |
dakṣe ca svagṛhaṃ yāte tathā hi tvayi kartari || 3 ||
[Analyze grammar]

mānaseṣu ca putreṣu gateṣu svasvadhāmasu |
saṃdhyā kutra gatā sā ca brahmaputrī pitṛprasūḥ || 4 ||
[Analyze grammar]

kiṃ cakāra ca kenaiva puruṣeṇa vivāhitā |
etatsarvaṃ viśeṣeṇa saṃdhyāyāścaritaṃ vada || 5 ||
[Analyze grammar]

sūta uvāca |
ityākarṇya vacastasya brahmaputraśca dhīmataḥ |
saṃsmṛtya śaṃkaraṃ saktyā brahmā provāca tattvavit || 6 ||
[Analyze grammar]

brahmovāca |
śṛṇu tvaṃ ca mune sarvaṃ saṃdhyāyāścaritaṃ śubham |
yacchrutvā sarvakāminyassādhvyassyussarvadā mune || 7 ||
[Analyze grammar]

sā ca saṃdhyā sutā me hi manojātā purā' bhavat |
tapastaptvā tanuṃ tyaktvā saiva jātā tvaruṃdhatī || 8 ||
[Analyze grammar]

medhātithessutā bhūtvā muniśreṣṭhasya dhīmatī |
brahmaviṣṇumaheśānavacanāccaritavratā || 9 ||
[Analyze grammar]

vavre patiṃ mahātmānaṃ vasiṣṭhaṃ śaṃsitavratam |
pativratā ca mukhyā'bhūdvaṃdyā pūjyā tvabhīṣaṇā || 10 ||
[Analyze grammar]

nārada uvāca |
kathaṃ tayā tapastaptaṃ kimarthaṃ kutra saṃdhyayā |
kathaṃ śarīraṃ sā tyaktvā'bhavanmedhātitheḥ sutā|| |
kathaṃ vā vihitaṃ devairbrahmaviṣṇuśivaiḥ patim |
vasiṣṭhaṃ tu mahātmānaṃ saṃvavre śaṃsitavratam || 12 ||
[Analyze grammar]

etanme śroṣyamāṇāya vistareṇa pitāmaha |
kautūhalamaruṃdhatyāścaritaṃ brūhi tattvataḥ || 13 ||
[Analyze grammar]

brahmovāca |
ahaṃ svatanayāṃ saṃdhyāṃ dṛṣṭvā pūrvamathātmanaḥ |
kāmāyāśu mano'kārṣaṃ tyaktvā śivabhayācca sā || 14 ||
[Analyze grammar]

saṃdhyāyāścalitaṃ cittaṃ kāmabāṇaviloḍitam |
ṛṣīṇāmapi saṃruddhamānasānāṃ mahātmanām || 15 ||
[Analyze grammar]

bhargasya vacanaṃ śrutvā sopahāsaṃ ca māṃ prati |
ātmanaścalitatvaṃ vai hyamaryādamṛṣīnprati || 16 ||
[Analyze grammar]

kāmasya tādṛśaṃ bhāvaṃ munimohakaraṃ muhuḥ |
dṛṣṭvā saṃdhyā svayaṃ tatropayamāyātiduḥkhitā || 17 ||
[Analyze grammar]

tatastu brahmaṇā śapte madane ca mayā mune |
aṃtarbhūte mayi śive gate cāpi nijāspade || 18 ||
[Analyze grammar]

āmarṣavaśamāpannā sā saṃdhyā munisattama |
mama putrī vicāryaivaṃ tadā dhyānaparā'bhavat || 19 ||
[Analyze grammar]

dhyāyaṃtī kṣaṇamevāśu pūrvaṃ vṛttaṃ manasvinī |
idaṃ vimamṛśe saṃdhyā tasminkāle yathocitam || 20 ||
[Analyze grammar]

saṃdhyovāca |
utpannamātrāṃ māṃ dṛṣṭvā yuvatīṃ madaneritaḥ |
akārṣitsānurāgoyamabhilāṣaṃ pitā mama || 21 ||
[Analyze grammar]

paśyatāṃ mānasānāṃ ca munīnāṃ bhāvitātmanām |
dṛṣṭvaiva māmamaryādaṃ sakāmamabhavanmanaḥ || 22 ||
[Analyze grammar]

mamāpi mathitaṃ cittaṃ madanena durātmanā |
yena dṛṣṭvā munīnsarvāṃścalitaṃ manmano bhṛśam || 26 ||
[Analyze grammar]

phalametasya pāpasya madanassvayamāptavān |
yastaṃ śaśāpa kupitaḥ śaṃbhoragre pitāmahaḥ || 24 ||
[Analyze grammar]

prāpnuyāṃ phalametasya pāpasya svaghakāriṇī |
tacchodhanaphalamahamāśu necchāmi sādhanam || 29 ||
[Analyze grammar]

yanmāṃ pitā bhrātaraśca sakāmamaparokṣataḥ |
dṛṣṭvā cakrusspṛhāṃ tasmānna mattaḥ pāpakṛtparā || 26 ||
[Analyze grammar]

mamāpi kāmabhāvobhūdamaryādaṃ samīkṣya tān |
patyā iva svaketāte sarveṣu sahajeṣvaṣi || 27 ||
[Analyze grammar]

kariṣyāramyasya pāpasya prāyaścittamahaṃ svayam |
ātmānamagnau hoṣyāmi vedamārgānusārata || 28 ||
[Analyze grammar]

kiṃ tvekāṃ sthāpayiṣyāmi maryādāmiha bhūtale |
utpannamātrā na yathā sakāmāssyuśśarīriṇaḥ || 29 ||
[Analyze grammar]

etadarthamahaṃ kṛtvā tapaḥ parama dāruṇam |
maryādāṃ sthāpayiṣyāmi paścāttyakṣāmi jīvitam || 30 ||
[Analyze grammar]

yasmiñccharīre pitrā me hyabhilāṣassvayaṃ kṛtaḥ |
bhātṛbhistena kāyena kiṃcinnāsti prayojanam || 31 ||
[Analyze grammar]

mayā yena śarīreṇa tāteṣu sahajeṣu ca |
udbhāvitaḥ kāmabhāvo na tatsukṛtasādhanam || 32 ||
[Analyze grammar]

iti saṃcitya manasā saṃdhyā śailavaraṃ tataḥ |
jagāma candrabhāgākhyaṃ candrabhāgāpagā yataḥ || 33 ||
[Analyze grammar]

atha tatra gatāṃ jñātvā saṃdhyāṃ girivaraṃ prati |
tapase niyatātmānaṃ brahmāvocamahaṃ sutam || 34 ||
[Analyze grammar]

vaśiṣṭhaṃ saṃyatātmānaṃ sarvajñaṃ jñānayoginam |
samīpe sve samāsīnaṃ vedavedāṅgapāragam || 35 ||
[Analyze grammar]

brahmovāca |
vasiṣṭha putra gaccha tvaṃ saṃdhyāṃ jātāṃ manasvinīm |
tapase dhṛtakāmāṃ ca dīkṣasvaināṃ yathā vidhi || 36 ||
[Analyze grammar]

maṃdākṣamabhavattasyāḥ purā dṛṣṭvaiva kāmukān |
yuṣmānmāṃ ca tathātmānaṃ sakāmāṃ munisattama || 37 ||
[Analyze grammar]

abhūtapūrvaṃ tatkarma pūrva mṛtyuṃ vimṛśya sā |
yuṣmākamātmanaścāpi prāṇānsaṃtyaktumicchati || 38 ||
[Analyze grammar]

samaryādeṣu maryādāṃ tapasā sthāpayiṣyati |
tapaḥ kartuṃ gatā sādhvī candrabhāgākhyabhūdhare || 39 ||
[Analyze grammar]

na bhāvaṃ tapasastāta sānujānāti kaṃcana |
tasmādyathopadeśātsā prāpnotviṣṭaṃ tathā kuru || 40 ||
[Analyze grammar]

idaṃ rūpaṃ parityajya nijaṃ rūpāṃtaraṃ mune |
parigṛhyāṃtike tasyāstapaścaryāṃ nidarśayan || 41 ||
[Analyze grammar]

idaṃ svarūpaṃ bhavato dṛṣṭvā pūrvaṃ yathātra vām |
nāpnuyātsā'tha kiṃcidvai tato rūpāṃtaraṃ kuru || 42 ||
[Analyze grammar]

brahmovāca ||nāradetthaṃ vasiṣṭho me samājñapto dayāvatā |
yathā'sviti ca māṃ procya yayau saṃdhyāṃtikaṃ muniḥ || 43 ||
[Analyze grammar]

tatra devasaraḥ pūrṇaṃ guṇairmānasasaṃmitam |
dadarśa sa vasiṣṭotha saṃdhyāṃ tattīragāmapi || 44 ||
[Analyze grammar]

tīrasthayā tayā reje tatsaraḥ kamalojjvalam |
udyadiṃdusunakṣatra pradoṣe gaganaṃ yathā || 45 ||
[Analyze grammar]

munirdṛṣṭvātha tāṃ tatra susaṃbhāvāṃ sa kautukī |
vīkṣāṃcakre sarastatra bṛhallohitasaṃjñakam || 46 ||
[Analyze grammar]

candrabhāgā nadī tasmātprākārāddakṣiṇāṃbudhim |
yāṃtī sā caiva dadṛśe tena sānugirermahat || 47 ||
[Analyze grammar]

nirbhidya paścimaṃ sā tu candrabhāgasya sā nadī |
yathā himavato gaṃgā tathā gacchati sāgaram || 48 ||
[Analyze grammar]

tasmin girau candrabhāge bṛhallohitatīragām |
saṃdhyāṃ dṛṣṭvātha papraccha vasiṣṭhassādaraṃ tadā || 49 ||
[Analyze grammar]

vaśiṣṭha uvāca |
kimarthamāgatā bhadre nirjanaṃ tvaṃ mahīdharam |
kasya vā tanayā kiṃ vā bhavatyāpi cikīrṣitam || 50 ||
[Analyze grammar]

etadicchāmyahaṃ śrotuṃ vada guhyaṃ na cedbhavet |
vadanaṃ pūrṇacandrābhaṃ niśceṣṭaṃ vā kathaṃ tava || 51 ||
[Analyze grammar]

brahmovāca |
tacchrutvā vacanaṃ tasya vaśiṣṭhasya mahātmanaḥ |
dṛṣṭvā ca taṃ mahātmānaṃ jvalaṃtamiva pāvakam || 52 ||
[Analyze grammar]

śarīradhṛgbrahmacaryaṃ vilasaṃtaṃ jaṭādharam |
sādaraṃ praṇipatyātha saṃdhyovāca tapodhanam || 53 ||
[Analyze grammar]

saṃdhyovāca |
yadarthamāgatā śailaṃ siddhaṃ tanme nibodha ha |
tava darśanamātreṇa yanme setsyati vā vibho || 54 ||
[Analyze grammar]

tapaścartumahaṃ brahmannirjanaṃ śailamāgatā |
brahmaṇohaṃ sutā jātā nāmnā saṃdhyeti viśrutā || 55 ||
[Analyze grammar]

yadi te yujyate sahyaṃ māṃ tvaṃ samupadeśaya |
etaccikīrṣitaṃ guhyaṃ nānyaiḥ kiṃcana vidyate || 56 ||
[Analyze grammar]

ajñātvā tapaso bhāvaṃ tapovanamupāśritā |
ciṃtayā pariśuṣyehaṃ vepate hi mano mama || 57 ||
[Analyze grammar]

brahmovāca |
ākarṇya tasyā vacanaṃ vasiṣṭho brahmavittamaḥ |
svayaṃ ca sarvakṛtyajño nānyatkiṃcana pṛṣṭavān || 58 ||
[Analyze grammar]

atha tāṃ niyatātmānaṃ tapaseti dhṛtodyamām |
provāca manasā smṛtvā śaṃkaraṃ bhaktavatsalam || 59 ||
[Analyze grammar]

vasiṣṭha uvāca |
paramaṃ yo mahattejaḥ paramaṃ yo mahattapaḥ |
paramaḥ paramārādhyaḥ śambhurmanasi dhāryatām || 60 ||
[Analyze grammar]

dharmārthakāmamokṣāṇāṃ ya ekastvādikāraṇam |
tamekaṃ jagatāmādyaṃ bhajasva puruṣottamam || 61 ||
[Analyze grammar]

maṃtreṇānena deveśaṃ śambhuṃ bhaja śubhānane |
tena te sakalā vāptirbhaviṣyati na saṃśayaḥ || 62 ||
[Analyze grammar]

oṃ namaśśaṃkarāyeti oṃmityaṃtena santatam |
maunatapasyāprāraṃmbhaṃ tanme nigadataḥ śṛṇu || 63 ||
[Analyze grammar]

snānaṃ maunena kartavyaṃ maunena harapūjanam |
dvayoḥ pūrṇajalāhāraṃ prathamaṃ ṣaṣṭhakālayoḥ || 64 ||
[Analyze grammar]

tṛtīye ṣaṣṭhakāle tu hyupavāsaparo bhavet |
evaṃ tapassamāptau vā ṣaṣṭhe kāle kriyā bhavet || 65 ||
[Analyze grammar]

evaṃ maunatapasyākhyā brahmacaryaphalapradā |
sarvābhīṣṭapradā devi satyaṃsatyaṃ na saṃśayaḥ || 66 ||
[Analyze grammar]

evaṃ citte samuddiśya kāmaṃ ciṃtaya śaṃkaram |
sa te prasanna iṣṭārthamacirādeva dāsyati || 67 ||
[Analyze grammar]

brahmovāca |
upaviśya vasiṣṭhotha saṃdhyāyai tapasaḥ kriyām |
tāmābhāṣya yathānyāyaṃ tatraivāṃtardadhe muniḥ || 68 ||
[Analyze grammar]

iti śrīśivamahāpurāṇe dvitīyāyāṃ rudrasaṃhitāyāṃ dvitīye satīkhaṇḍe saṃdhyācaritravarṇano nāma paṃcamo'dhyāyaḥ || 5 ||
[Analyze grammar]