Chapter 1

[English text for this chapter is available]

nārada uvāca |
vidhe sarvaṃ vijānāsi kṛpayā śaṃkarasya ca |
tvayādbhutā hi kathitāḥ kathā me śivayośśubhāḥ || 1 ||
[Analyze grammar]

tvanmukhāṃbhojasaṃvṛttāṃ śrutvā śivakathāṃ parām |
atṛpto hi punastāṃ vai śrotumicchāmyahaṃ prabho || 2 ||
[Analyze grammar]

pūrṇāṃśaśśaṃkarasyaiva yo rudro varṇitaḥ purā |
vidhe tvayā maheśānaḥ kailāsanilayo vaśī || 3 ||
[Analyze grammar]

sa yogī sarvaviṣṇvādisurase vyassatāṃ gatiḥ |
nirdvaṃdvaḥ krīḍati sadā nirvikārī mahāprabhuḥ || 4 ||
[Analyze grammar]

so'bhūtpunargṛhasthaśca vivāhya paramāṃ striyam |
hariprārthanayā prītyā maṃgalāṃ svatapasvinīm || 5 ||
[Analyze grammar]

prathamaṃ dakṣaputrī sā paścātsā parvatātmajā |
kathamekaśarīreṇa dvayorapyātmajā matā || 6 ||
[Analyze grammar]

kathaṃ satī pārvatī sā punaśśivamupāgatā |
etatsarvaṃ tathānyacca brahman gaditumarhasi || 7 ||
[Analyze grammar]

sūta uvāca |
iti tasya vacaḥ śrutvā surarṣeḥ śaṃkarātmanaḥ |
prasannamānaso bhūtvā brahmā vacanamabravīt || 8 ||
[Analyze grammar]

brahmovāca |
śṛṇu tāta muniśreṣṭha kathayāmi kathāṃ śubhām |
yāṃ śrutvā saphalaṃ janma bhaviṣyati na saṃśayaḥ || 9 ||
[Analyze grammar]

purāhaṃ svasutāṃ dṛṣṭvā saṃdhyāhvāṃ tanayaissaha |
abhavaṃ vikṛtastāta kāmabāṇaprapīḍitaḥ || 10 ||
[Analyze grammar]

dharmaḥ smṛtastadā rudro mahāyogī paraḥ prabhuḥ |
dhikkṛtya māṃ sutaistāta svasthānaṃ gatavānayam || 11 ||
[Analyze grammar]

yanmāyāmohitaścāhaṃ vedavaktā ca mūḍhadhīḥ |
tenākārṣaṃ sahākārya parameśena śaṃbhunā || 12 ||
[Analyze grammar]

tadīrṣayāhamākārṣaṃ bahūpāyānsutaiḥ saha |
kartuṃ tanmohanaṃ mūḍhaḥ śivamāyā vimohitaḥ || 13 ||
[Analyze grammar]

abhavaṃste'tha vai sarve tasmiñ śaṃbho paraprabho |
upāyā niṣphalāsteṣāṃ mama cāpi munīśvara || 14 ||
[Analyze grammar]

tadā'smaraṃ rameśānaṃ vyathopāyastutaissaha |
abodhayatsa āgatya śivabhaktiratassudhīḥ || 15 ||
[Analyze grammar]

prabodhito rameśena śivatattvapradarśinā |
tadīrṣāmatyajaṃ sohaṃ taṃ haṭhaṃ na vimohitaḥ || 16 ||
[Analyze grammar]

śaktiṃ saṃsevya tatprītyotpādayāmāsa tāṃ tadā |
dakṣādaśiknyāṃ vīriṇyāṃ svaputrāddharamohane || 17 ||
[Analyze grammar]

somā bhūtvā dakṣasutā tapaḥ kṛtvā tu dussaham |
rudrapatnyabhavadbhaktyā svabhaktahitakāriṇī || 18 ||
[Analyze grammar]

somo rudro gṛhī bhūtvā'kārṣīllīlāṃ parāṃ prabhuḥ |
mohayitvātha māṃ tatra svavivāhe'vikāradhīḥ || 19 ||
[Analyze grammar]

vivāhya tāṃ sa āgatya svagirau sūtikṛttayā |
reme bahuvimoho hi svataṃtrassvāttavigrahaḥ || 20 ||
[Analyze grammar]

tayā viharatastasya vyātīyāya mahān mune |
kālassukhakaraśśabhornirvikārasya sadrateḥ || 21 ||
[Analyze grammar]

tato rudrasya dakṣeṇa sparddhā jātā nijecchayā |
mahāmūḍhasya tanmāyāmohitasya sugarviṇaḥ || 22 ||
[Analyze grammar]

tatprabhāvāddharaṃ dakṣo mahāgarvī vimūḍhadhīḥ |
mahāśāṃtaṃ nirvikāraṃ nini da bahumohitaḥ || 23 ||
[Analyze grammar]

tato dakṣaḥ svayaṃ yajñaṃ kṛtavāngarvito'haram |
sarvānāhūya devādīn viṣṇuṃ māṃ cākhilādhipaḥ || 24 ||
[Analyze grammar]

nājuhāva tathābhūto rudraṃ roṣasamākulaḥ |
tathā tatra satīṃ nāmnā svaputrīṃ vidhimohitaḥ || 25 ||
[Analyze grammar]

yadā nākāritā pitrā māyāmohita cetasā |
līlāṃ cakāra sujñānā mahāsādhvī śivā tadā || 26 ||
[Analyze grammar]

athāgatā satī tatra śivājñāmadhigamya sā |
anāhūtāpi dakṣeṇa garviṇā svapiturgṛham || 27 ||
[Analyze grammar]

vilokya rudrabhāgaṃ no prāpyāvajñāṃ ca tātataḥ |
viniṃdya tatra tānsarvāndehatyāgamathākarot || 28 ||
[Analyze grammar]

tacchutvā deva deveśaḥ krodhaṃ kṛtvā tu dussaham |
jaṭāmutkṛtya mahatīṃ vīrabhadramajījanat || 29 ||
[Analyze grammar]

sagaṇaṃ taṃ samutpādya kiṃ kuryyā miti vādinam |
sarvāpamānapūrvaṃ hi yajñadhvaṃsaṃ dideśa ha || 30 ||
[Analyze grammar]

tadājñāṃ prāpya sa gaṇādhīśo bahubalānvitaḥ |
gato'raṃ tatra sahasā mahābalaparākramaḥ || 31 ||
[Analyze grammar]

mahopadravamācerurgaṇāstatra tadājñayā |
sarvānsa daṃḍayāmāsa na kaścidavaśeṣitaḥ || 32 ||
[Analyze grammar]

viṣṇuṃ saṃjitya yatnena sāmaraṃ gaṇasattamaḥ |
cakre dakṣaśiraśchedaṃ tacchirognau juhāva ca || 33 ||
[Analyze grammar]

yajñadhvaṃsaṃ cakārāśu mahopadravamācaran |
tato jagāma svagiriṃ praṇanāma prabhuṃ śivam || 34 ||
[Analyze grammar]

yajñadhvaṃso'bhavaccetthaṃ devaloke hi paśyati |
rudrasyānucaraistatra vīrabhadrādibhiḥ kṛtaḥ || 35 ||
[Analyze grammar]

mune nītiriyaṃ jñeyā śrutismṛtiṣu saṃmatā |
rudre ruṣṭe kathaṃ loke sukhaṃ bhavati suprabho || 36 ||
[Analyze grammar]

tato rudraḥ prasannobhūtstutimākarṇya tāṃ parām |
vijñaptiṃ saphalāṃ cakre sarveṣāṃ dīnavatsalaḥ || 37 ||
[Analyze grammar]

pūrvavacca kṛtaṃ tena kṛpālutvaṃ mahātmanā |
śaṃkareṇa maheśena nānālīlāvi hāriṇā || 38 ||
[Analyze grammar]

jīvitastena dakṣo hi tatra sarve hi satkṛtāḥ |
punassa kārito yajñaḥ śaṃkareṇa kṛpālunā || 39 ||
[Analyze grammar]

rudraśca pūjitastatra sarvairdevairviśeṣataḥ |
yajñe viśvādibhirbhaktyā suprasannātmabhirvane || 40 ||
[Analyze grammar]

satīdehasamutpannā jvālā lokasukhāvahā |
patitā parvate tatra pūjitā sukhadāyinī || 41 ||
[Analyze grammar]

jvālāmukhīti vikhyātā sarvakāmaphalapradā |
babhūva paramā devī darśanātpāpahāriṇī || 42 ||
[Analyze grammar]

idānīṃ pūjyate loke sarvakāmaphalāptaye |
saṃvidhābhiranekābhirmahotsavaparasparam || 43 ||
[Analyze grammar]

tataśca sā satī devī himālayasutā 'bhavat |
tasyāśca pārvatīnāma prasiddhamabhavattadā || 44 ||
[Analyze grammar]

sā punaśca samārādhya tapasā kaṭhinena vai |
tameva parameśānaṃ bharttāraṃ samupāśritā || 45 ||
[Analyze grammar]

etatsarvaṃ samākhyātaṃ yatpṛṣṭohaṃ munīśvara |
yacchrutvā sarvapāpebhyo mucyate nātra saṃśayaḥ || 46 ||
[Analyze grammar]

iti śrīśivamahāpurāṇe dvitīyāyāṃ rudrasaṃhitāyāṃ dvitīye satīsaṃkṣepacaritravarṇanaṃ nāma prathamo'dhyāyaḥ || 1 ||
[Analyze grammar]