Chapter 15

[English text for this chapter is available]

nārada uvāca |
vidhe vidhe mahābhāga dhanyastvaṃ surasattama |
śrāvitādyādbhutā śaivakathā paramapāvanī || 1 ||
[Analyze grammar]

tatrādbhutā mahādivyā liṃgotpattiḥ śrutā śubhā |
śrutvā yasyāḥ prabhāvaṃ ca duḥkhanāśo bhavediha || 2 ||
[Analyze grammar]

anaṃtaraṃ ca yajjātaṃ māhātmyaṃ caritaṃ tathā |
sṛṣṭeścaiva prakāraṃ ca kathaya tvaṃ viśeṣataḥ || 3 ||
[Analyze grammar]

brahmovāca |
samyak pṛṣṭe ca bhavatā yajjātaṃ tadanaṃtaram |
kathayiṣyāmi saṃkṣepādyathā pūrvaṃ śrutaṃ mayā || 4 ||
[Analyze grammar]

aṃtarhite tadā deve śivarūpe sanātane |
ahaṃ viṣṇuśca viprendra adhikaṃ sukhamāptavān || 5 ||
[Analyze grammar]

mayā ca viṣṇunā rūpaṃ haṃsavārāhayostadā |
saṃvṛtaṃ tu tatastābhyāṃ lokasargāvanecchayā || 6 ||
[Analyze grammar]

nārada uvāca |
vidhe brahman mahāprājña saṃśayo hṛdi me mahān |
kṛpāṃ kṛtvātulāṃ śīghraṃ taṃ nāśayitumarhasi || 7 ||
[Analyze grammar]

haṃsavārāhayo rūpaṃ yuvābhyāṃ ca dhṛtaṃ katham |
anyadrūpaṃ vihāyaiva kimatra vada kāraṇam || 8 ||
[Analyze grammar]

sūta uvāca |
ityetadvacanaṃ śrutvā nāradasya mahātmanaḥ |
smṛtvā śivapadāṃbhojaṃ brahmā sādaramabravīt || 9 ||
[Analyze grammar]

brahmovāca |
haṃsasya corddhvagamane gatirbhavati niścalā |
tattvātattvaviveko'sti jaladugdhavibhāgavat || 10 ||
[Analyze grammar]

ajñānajñānayostattvaṃ vivecayati haṃsakaḥ |
haṃsarūpaṃ dhṛtaṃ tena brahmaṇā sṛṣṭikāriṇā || 11 ||
[Analyze grammar]

viveko naiva labdhaśca yato haṃso vyalīyata |
śivasvarūpatattvasya jyotirūpasya nārada || 12 ||
[Analyze grammar]

sṛṣṭipravṛttikāmasya kathaṃ jñānaṃ prajāyate |
yato labdho viveko'pi na mayā haṃsarūpiṇā || 13 ||
[Analyze grammar]

gamane'dho varāhasya gatirbhavati niścalā |
dhṛtaṃ vārāharūpaṃ hi viṣṇunā vanacāriṇā || 14 ||
[Analyze grammar]

athavā bhavakalpārthaṃ tadrūpaṃ hi prakalpitam |
viṣṇunā ca varāhasya bhuvanāvanakāriṇā || 15 ||
[Analyze grammar]

yaddinaṃ hi samārabhya tadrūpaṃ dhṛtavānhariḥ |
taddinaṃ prati kalpo'sau kalpo vārāhasaṃjñakaḥ || 16 ||
[Analyze grammar]

tadicchā vā yadā jātā tābhyāṃ rūpaṃ hi dhāraṇe |
taddinaṃ pratikalpo'sau kalpo vārāhasaṃjñak || 17 ||
[Analyze grammar]

iti praśnottaraṃ dattaṃ prastutaṃ śṛṇu nārada |
smṛtvā śivapadāṃbhojaṃ vakṣye sṛṣṭividhiṃ mune || 18 ||
[Analyze grammar]

aṃtarhite mahādeve tvahaṃ lokapitāmahaḥ |
tadīyaṃ vacanaṃ kartumadhyāyandhyānatatparaḥ || 19 ||
[Analyze grammar]

namaskṛtya tadā śaṃbhuṃ jñānaṃ prāpya harestadā |
ānaṃdaṃ paramaṃ gatvā sṛṣṭiṃ kartuṃ mano dadhe || 20 ||
[Analyze grammar]

viṣṇuścāpi tadā tatra praṇipatya sadāśivam |
upadiśya ca māṃ tāta hyaṃtardhānamupāgataḥ || 21 ||
[Analyze grammar]

brahmāṇḍācca bahirgatvā prāpya śambhoranugraham |
vaikuṃṭhanagaraṃ gatvā tatrovāsa harissadā || 22 ||
[Analyze grammar]

ahaṃ smṛtvā śivaṃ tatra viṣṇuṃ vai sṛṣṭikāmyayā |
pūrvaṃ sṛṣṭaṃ jalaṃ yacca tatrāṃjalimudākṣipam || 23 ||
[Analyze grammar]

ato'ṇḍamabhavattatra caturviṃśatisaṃjña kam |
virāḍrūpamabhūdvipra jalarūpamapaśyataḥ || 24 ||
[Analyze grammar]

tatassaṃśayamāpannastapastepe sudāruṇam |
dvādaśābdamahaṃ tatra viṣṇudhyānaparāyaṇaḥ || 25 ||
[Analyze grammar]

tasmiṃśca samaye tāta prādurbhūto harissvayam |
māmuvāca mahāprītyā madaṃgaṃ saṃspṛśanmudā || 26 ||
[Analyze grammar]

|| viṣṇuruvāca |
varaṃ brūhi prasanno'smi nādeyo vidyate tava |
brahmañchaṃbhuprasādena sarvaṃ dātuṃ samarthakaḥ || 27 ||
[Analyze grammar]

brahmovāca |
yuktametanmahābhāga datto'haṃ śaṃbhunā ca te |
taduktaṃ yācate me'dya dehi viṣṇo namo'stu te || 28 ||
[Analyze grammar]

virāḍrūpamidaṃ hyaṃḍaṃ caturviṃśatisaṃjñakam |
na caitanyaṃ bhavatyādau jaḍībhūtaṃ pradṛśyate || 29 ||
[Analyze grammar]

prādurbhūto bhavānadya śivānugrahato hare |
prāptaṃ śaṃkarasaṃbhūtyā hyaṇḍaṃ caitanyamāvaha || 30 ||
[Analyze grammar]

ityukte ca mahāviṣṇuśśaṃbhorājñāparāyaṇaḥ |
anaṃtarūpamāsthāya praviveśa tadaṃḍakam || 31 ||
[Analyze grammar]

sahasraśīrṣā puruṣassahasrākṣaḥ sahasrapāt |
sa bhūmiṃ sarvataspṛtvā tadaṇḍaṃ vyāptavāniti || 32 ||
[Analyze grammar]

praviṣṭe viṣṇunā tasminnaṇḍe samyakstutena me |
sacetanamabhūdaṇḍaṃ caturviṃśatisaṃjñakam || 33 ||
[Analyze grammar]

pātālādi samārabhya saptalokādhipaḥ svayam |
rājate sma haristatra vairājaḥ puruṣaḥ prabhuḥ || 34 ||
[Analyze grammar]

kailāsanagaraṃ ramyaṃ sarvopari virājitam |
nivāsārthaṃ nijasyaiva paṃcavaktra ścakāra ha || 35 ||
[Analyze grammar]

brahmāṃḍasya tathā nāśe vaikuṇṭhasya ca tasya ca |
kadācideva devarṣe nāśo nāsti tayoriha || 36 ||
[Analyze grammar]

satyaṃ padamupāśritya sthito'haṃ munisattama |
sṛṣṭikāmo'bhavaṃ tāta mahādevājñayā hyaham || 37 ||
[Analyze grammar]

sisṛkṣoratha me prādurabhavatpāpasargakaḥ |
avidyāpaṃcakastāta buddhipūrvastamopamaḥ || 38 ||
[Analyze grammar]

tataḥ prasannacitto'hamasṛjaṃ sthāvarābhidham |
mukhyasargaṃ ca nissaṃgamadhyāyaṃ śaṃbhuśāsanāt || 39 ||
[Analyze grammar]

taṃ dṛṣṭvā me sisṛkṣośca jñātvā sādhakamātmanaḥ |
sargo'vartata duḥkhāḍhyastiryaksrotā na sādhakaḥ || 40 ||
[Analyze grammar]

taṃ cāsādhakamājñāya punaściṃtayataśca me |
abhavatsāttvikassarga ūrdhvasrotā iti drutam || 41 ||
[Analyze grammar]

devasargaḥ pratikhyātassatyo'tīva sukhāvahaḥ |
tamapyasādhakaṃ matvā'ciṃtayaṃ prabhumātmanaḥ || 42 ||
[Analyze grammar]

prādurāsīttatassargo rājasaḥ śaṃkarājñayā |
avāksrotā iti khyāto mānuṣaḥ parasādhakaḥ || 43 ||
[Analyze grammar]

mahādevājñayā sargastato bhūtādiko'bhavat |
iti paṃcavidhā sṛṣṭiḥ pravṛttā vai kṛtā mayā || 44 ||
[Analyze grammar]

trayassargāḥ prakṛtyāśca brahmaṇaḥ parikīrtitāḥ |
tatrādyo mahatassargo dvitīyaḥ sūkṣmabhautikaḥ || 45 ||
[Analyze grammar]

vaikārikastṛtīyaśca ityete prakṛtāstrayaḥ |
evaṃ cāṣṭavidhāssargāḥ prakṛtervekṛtaiḥ saha || 46 ||
[Analyze grammar]

kaumāro navamaḥ proktaḥ prākṛto vaikṛtaśca saḥ |
eṣāmavāṃtaro bhedo mayā vaktuṃ na śakyate || 47 ||
[Analyze grammar]

alpatvādupayogasya vacmi sargaṃ dvijātmakam |
kaumāraḥ sanakādīnāṃ yatra sargo mahānabhūt || 48 ||
[Analyze grammar]

sanakādyāḥ sutā me hi mānasā brahmasaṃmitāḥ |
mahāvairāgyasaṃpannā abhavanpaṃca suvratāḥ || 49 ||
[Analyze grammar]

mayājñaptā api ca te saṃsāravimukhā budhāḥ |
śivadhyānaikamanaso na sṛṣṭau cakrire matim || 50 ||
[Analyze grammar]

pratyuttaraṃ ca tadanu śrutvāhaṃ munisattama |
akārṣaṃ krodhamatyugraṃ mohamāptaśca nārada || 51 ||
[Analyze grammar]

kuddhasya mohitasyātha vihvalasya mune mama |
krodhena khalu netrābhyāṃ prāpatannaśrubiṃdavaḥ || 52 ||
[Analyze grammar]

tasminnavasare tatra smṛtena manasā mayā |
prabodhitohaṃ tvaritamāgatenā hi viṣṇunā || 53 ||
[Analyze grammar]

tapaḥ kuru śivasyeti hariṇā śikṣito'pyaham |
tapokārī mahadghoraṃ paramaṃ munisattama || 54 ||
[Analyze grammar]

tapasyataśca sṛṣṭyarthaṃ bhruvorghrāṇasya madhyataḥ |
avimuktābhidhāddeśātsvakīyānme viśeṣataḥ || 55 ||
[Analyze grammar]

trimūrtīnāṃ maheśasya prādurāsīdghṛṇānidhiḥ |
ārddhanārīśvaro bhūtvā pūrṇāśassakaleśvaraḥ || 56 ||
[Analyze grammar]

tamajaṃ śaṃkaraṃ sākṣāttejorāśimumāpatim |
sarvajñaṃ sarvakartāraṃ nīlalohitasaṃjñakam || 57 ||
[Analyze grammar]

dṛṣṭvā natvā mahābhaktyā stutvāhaṃ tu praharṣitaḥ |
avocaṃ devadeveśaṃ sṛja tvaṃ vividhāḥ prajāḥ || 58 ||
[Analyze grammar]

śrutvā mama vacassotha devadevo maheśvaraḥ |
sasarja svātmanastulyānrudro rudragaṇānbahūna || 59 ||
[Analyze grammar]

avocaṃ punareveśaṃ mahārudraṃ maheśvaram |
janmamṛtyubhayāviṣṭāssṛja deva prajā iti || 60 ||
[Analyze grammar]

evaṃ śrutvā mahādevo madvacaḥ karuṇānidhiḥ |
prahasyovāca māṃ sadyaḥ prahasya munisattama || 61 ||
[Analyze grammar]

mahādeva uvāca |
janmamṛtyubhayāviṣṭā nāhaṃ srakṣye prajā vidhe |
aśobhanāḥ karmavaśā vimagnā duḥkhavāridhau || 62 ||
[Analyze grammar]

ahaṃ duḥkhodadhau magnā uddhariṣyāmi ca prajāḥ |
samyakjñānapradānena gurumūrtiparigrahaḥ || 63 ||
[Analyze grammar]

tvameva sṛja duḥkhāḍhyāḥ prajāssarvāḥ prajāpate |
madājñayā na baddhastvaṃ māyayā saṃbhaviṣyasi || 64 ||
[Analyze grammar]

brahmovāca |
ityuktvā māṃ sa bhagavānsuśrīmānnīlalohitaḥ |
sagaṇaḥ paśyato me hi drutamaṃtardadhe haraḥ || 65 ||
[Analyze grammar]