Chapter 6

[English text for this chapter is available]

||brahmovāca |
bho brahmansādhu pṛṣṭo'haṃ tvayā vibudhasattama |
lokopakāriṇā nityaṃ lokānāṃ hitakāmyayā || 1 ||
[Analyze grammar]

yacchrutvā sarvalokānāṃ sarvapāpakṣayo bhavet |
tadahaṃ te pravakṣyāmi śivatattvamanāmayam || 2 ||
[Analyze grammar]

śivatattvaṃ mayā naiva viṣṇunāpi yathārthataḥ |
jñātaśca paramaṃ rūpamadbhutaṃ ca pareṇa na || 3 ||
[Analyze grammar]

mahāpralayakāle ca naṣṭe sthāvarajaṃgame |
āsīttamomayaṃ sarvamanarkagrahatārakam || 4 ||
[Analyze grammar]

acandramanahorātramanagnyanilabhūjalam |
apradhānaṃ viyacchūnyamanyatejovivarjitam || 2 ||
[Analyze grammar]

adṛṣṭatvādirahitaṃ śabdasparśasamujjhitam |
avyaktagaṃdharūpaṃ ca rasatyaktamadiṅmukham || 6 ||
[Analyze grammar]

itthaṃ satyaṃdhatamase sūcībhedyaṃ niraṃtare |
tatsadbrahmeti yacchrutvā sadekaṃ pratipadyate || 7 ||
[Analyze grammar]

itīdṛśaṃ yadā nāsīdyattatsadasadātmakam |
yoginoṃtarhitākāśe yatpaśyaṃti niraṃtaram || 8 ||
[Analyze grammar]

amanogocaramvācāṃ viṣayanna kadācana |
anāmarūpavarṇaṃ ca na ca sthūlaṃ na yatkṛśam || 9 ||
[Analyze grammar]

ahrasvadīrghamalaghugurutvaparivarjitam |
na yatropacayaḥ kaścittathā nāpacayo'pi ca || 10 ||
[Analyze grammar]

abhidhatte sa cakitaṃ yadastīti śrutiḥ punaḥ |
satyaṃ jñānamanaṃtaṃ ca parānaṃdamparammahaḥ || 11 ||
[Analyze grammar]

aprameyamanādhāramavikāramanākṛti |
nirguṇaṃ yogigamyañca sarvavyāpyekakārakam || 12 ||
[Analyze grammar]

nirvikalpaṃ nirāraṃbhaṃ nirmāyaṃ nirupadravam |
advitīyamanādyantamavikāśaṃ cidātmakam || 13 ||
[Analyze grammar]

yasyetthaṃ saṃvikalpaṃte saṃjñāsaṃjñoktitaḥ sma vai |
kiyatā caiva kālena dvitīyecchā'bhavatkila || 14 ||
[Analyze grammar]

amūrtena svamūrtiśca tenākalpi svalīlayā |
sarvaiśvaryaguṇopetā sarvajñānamayī śubhā || 15 ||
[Analyze grammar]

sarvagā sarvarūpā ca sarvadṛksarvakāriṇī |
sarvekavaṃdyā sarvādyā sarvadā sarvasaṃskṛtiḥ || 16 ||
[Analyze grammar]

parikalyeti tāṃ mūrtimaiśvarīṃ śuddharūpiṇīm |
advitīyamanādyaṃtaṃ sarvābhāsaṃ cidātmakam |
aṃtardadhe parākhyaṃ yadbrahma sarvagamavyayam || 17 ||
[Analyze grammar]

amūrte yatparākhyaṃ vai tasya mūrtissadāśivaḥ |
arvācīnāḥ parācīnā īśvaraṃ taṃ jagurbudhāḥ || 18 ||
[Analyze grammar]

śaktistadaikalenāpi svairaṃ viharatā tanuḥ |
svavigrahātsvayaṃ sṛṣṭā svaśarīrānapāyinī || 19 ||
[Analyze grammar]

pradhānaṃ prakṛti tāṃ ca māyāṃ guṇavatīṃ parām |
buddhitattvasya jananīmāhurvikṛtivarjitām || 20 ||
[Analyze grammar]

sā śaktirambikā proktā prakṛtissakaleśvarī |
tridevajananī nityā mūlakāraṇamityuta || 21 ||
[Analyze grammar]

asyā aṣṭau bhujāścāsanvicitravadanā śubhā |
rākācandrasahasrasya vadane bhāśca nityaśaḥ || 22 ||
[Analyze grammar]

nānābharaṇasaṃyuktā nānāgatisamanvitā |
nānāyudhadharā devī phullapaṃkajalocanā || 23 ||
[Analyze grammar]

aciṃtyatejasā yuktā sarvayonissamudyatā |
ekākinī yadā māyā saṃyogāccāpyanekikā || 24 ||
[Analyze grammar]

paraḥ pumānīśvarassa śivaśśaṃbhuranīśvaraḥ |
śīrṣe mandākinīdhārī bhālacandrastrilocanaḥ || 25 ||
[Analyze grammar]

paṃcavaktraḥ prasannātmā daśabāhustriśūladhṛk |
karpūragaurasusito bhasmoddhūlitavigrahaḥ || 26 ||
[Analyze grammar]

yugapacca tayā śaktyā sākaṃ kālasvarūpiṇā |
śivalokābhidhaṃ kṣetraṃ nirmitaṃ tena brahmaṇā || 27 ||
[Analyze grammar]

tadeva kāśiketyetatprocyate kṣetramuttamam |
paraṃ nirvāṇasaṃkhyānaṃ sarvopari virājitam || 28 ||
[Analyze grammar]

tābhyāṃ ca ramamāṇābhyāṃ ca tasminkṣetre manorame |
paramānaṃdarūpābhyāṃ paramānandarūpiṇī || 29 ||
[Analyze grammar]

mune pralayakālepi na tatkṣetraṃ kadācana |
vimuktaṃ hi śivābhyāṃ yadavimuktaṃ tato viduḥ || 30 ||
[Analyze grammar]

asyānandavanaṃ nāma purākāri pinākinā |
kṣetrasyānaṃdahetutvādavimuktamanaṃtaram || 31 ||
[Analyze grammar]

athānandavane tasmiñcchivayo ramamāṇayoḥ |
icchetyabhūtsurarṣe hi sṛjyaḥ kopyaparaḥ kila || 32 ||
[Analyze grammar]

yasminyasya mahābhāramāvāṃ svasvairacāriṇau |
nirvāṇadhāraṇaṃ kurvaḥ kevalaṃ kāśiśāyinau || 33 ||
[Analyze grammar]

sa eva sarvaṃ kurutāṃ sa eva paripātu ca |
sa eva saṃvṛṇotvaṃ te madanugrahatassadā || 34 ||
[Analyze grammar]

cetassamudramākuṃcya ciṃtākallolalolitam |
sattvaratnaṃ tamogrāhaṃ rajovidrumavallitam || 35 ||
[Analyze grammar]

yasya prasādāttiṣṭhāvassukhamānaṃdakānane |
parikṣiptamanovṛttau bahiściṃtāture sukham || 36 ||
[Analyze grammar]

saṃpradhāryyeti sa vibhustayā śaktyā pareśvaraḥ |
savye vyāpārayāṃcakre daśameṃ'gesudhāsavam || 37 ||
[Analyze grammar]

tataḥ pumānāvirāsīdekastrailokyasuṃdaraḥ |
śāṃtassattvaguṇodrikto gāṃbhīryyāmitasāgaraḥ || 38 ||
[Analyze grammar]

tathā ca kṣamayā yukto mune'labdhopamo 'bhavat |
indranīladyutiḥ śrīmānpuṇḍarīkottamekṣaṇaḥ || 39 ||
[Analyze grammar]

suvarṇakṛtibhṛcchreṣṭha dukūlayugalāvṛtaḥ |
lasatpracaṃḍadordaṇḍayugalohyaparājitaḥ || 40 ||
[Analyze grammar]

tatassa puruṣaśśaṃbhuṃ praṇamya parameśvaram |
nāmāni kuru me svāminvada karmaṃ jagāviti || 41 ||
[Analyze grammar]

tacchrutvā vacanamprāha śaṃkaraḥ prahasanprabhuḥ |
puruṣaṃ taṃ maheśāno vācā meghagabhīrayā || 42 ||
[Analyze grammar]

śiva uvāca |
viṣṇvitivyāpakatvātte nāma khyātaṃ bhaviṣyati |
bahūnyanyāni nāmāni bhaktasaukhyakarāṇi ha || 43 ||
[Analyze grammar]

tapaḥ kuru dṛḍho bhūtvā paramaṃ kāryasādhanam |
ityuktvā śvāsamārgeṇa dadau ca nigamaṃ tataḥ || 44 ||
[Analyze grammar]

tato'cyutaśśivaṃ natvā cakāra vipulaṃ tapaḥ |
aṃtarddhānaṃ gataśśaktyā salokaḥ parameśvaraḥ || 49 ||
[Analyze grammar]

divyaṃ dvādaśa sāhasraṃ varṣaṃ taptvāpi cācyutaḥ |
 na prāpa svābhilaṣitaṃ sarvadaṃ śaṃbhudarśanam || 46 ||
[Analyze grammar]

tattatsaṃśayamāpannaściṃtitaṃ hṛdi sādaram |
mayādya kiṃ prakartavyamiti viṣṇuśśivaṃ smaran || 47 ||
[Analyze grammar]

etasminnaṃtare vāṇī samutpannā śivācchubhā |
tapaḥ punaḥ prakarttavyaṃ saṃśayasyāpanuttaye || 48 ||
[Analyze grammar]

tatastena ca tacchrutvā tapastaptaṃ sudāruṇam |
bahukālaṃ tadā brahmadhyānamārgapareṇa hi || 49 ||
[Analyze grammar]

tatassa puruṣo viṣṇuḥ prabuddho dhyānamārgataḥ |
suprīto vismayaṃ prāptaḥ kiṃ yattava mahā iti || 50 ||
[Analyze grammar]

pariśramavatastasya viṣṇoḥ svāṅgebhya eva ca |
jaladhārā hi saṃyātā vividhāśśivamāyayā || 51 ||
[Analyze grammar]

abhivyāptaṃ ca sakalaṃ śūnyaṃ yattanmahāmune |
brahmarūpaṃ jalamabhūtsparśanātpāpanāśanam || 52 ||
[Analyze grammar]

tadā śrāṃtaśca puruṣo viṣṇustasmiñjale svayam |
suṣvāpa parama prīto bahukālaṃ vimohitaḥ || 53 ||
[Analyze grammar]

nārāyaṇeti nāmāpi tasyasīcchrutisaṃmatam |
nānyatkiṃcittadā hyāsītprākṛtaṃ puruṣaṃ vinā || 54 ||
[Analyze grammar]

etasminnantare kāle tattvānyāsanmahātmanaḥ |
tatprakāraṃ śṛṇu prājña gadato me mahāmate || 55 ||
[Analyze grammar]

prakṛteśca mahānāsīnmahataśca guṇāstrayaḥ |
ahaṃkārastato jātastrividho guṇabhedataḥ || 56 ||
[Analyze grammar]

tanmātrāśca tato jātaḥ pañcabhūtāni vai tatā |
tadaiva tānīndriyāṇi jñānakarmamayāni ca || 27 ||
[Analyze grammar]

tattvānāmiti saṃkhyānamuktaṃ te ṛṣisattama |
jaḍātmakañca tatsarvaṃ prakṛteḥ puruṣaṃ vinā || 58 ||
[Analyze grammar]

tattadaikīkṛtaṃ tattvaṃ caturviṃśatisaṃkhyakam |
śivecchayā gṛhītvā sa suṣvāpa brahmarūpake || 59 ||
[Analyze grammar]

iti śrīśivamahāpurāṇe dvitīyāyāṃ rudrasaṃhitāyāṃ sṛṣṭivyākhyane prathamakhaṃḍe viṣṇūtpattivarṇano nāma ṣaṣṭho'dhyāyaḥ || 6 ||
[Analyze grammar]