Chapter 53

|| tripañcāśo'dhyāyaḥ ||

evaṃ vadati govinde śrīstaṃ provāca padminī|
govinda puṇḍarīkākṣa purāṇa puruṣottama|| 53.1 ||
dustarāpārasaṃsārasāgarottāraṇakṣama|
vāsudeva jagannātha saṃkarṣaṇa jagatprabho|| 53.2 ||
pradyumna subhaga śrīmannaniruddhāparājita|
nārāyaṇa dayāmūrte sarvāntaryāmiṇe (ne)namaḥ|| 53.3 ||
amī hi prāṇinaḥ sarve nimnāśca kleśasāgare|
pūrvoktebhyaḥ kriyābhyaḥ kiṃ sulabhā kācana kriyā|| 53.4 ||
nāsti sarveṣu vedeṣu sarvaśāstreṣu vā hare|
kliśyamānān janān sarvān kiṃ rakṣasi jagatpate|| 53.5 ||
śrībhagavān-
aravindāsane devi padmagarbhasamudbhave|
uttārahetavo'mīṣāmupāyā bahavaḥ kṛtāḥ|| 53.6 ||
karma sāṃkhyaṃ ca yogaṃ ca vājapeyādayo makhāḥ|
mantrasiddhirdevapūjā tīrthayātrādayo rame|| 53.7 ||
etān vihāya svācchandyādakāryeṃ patitā yadi|
teṣāṃ karmānurūpaṃ tu dadāmi phalamīdṛśam|| 53.8 ||
śrīḥ-
pitā putrān hi lokeṣu śikṣate sādhakarmasu|
tvaṃ pravartayase'nindye kārye sarvāḥ prajā imāḥ|| 53.9 ||
bhagavān-
kṣīrābdhitanaye lakṣmīḥ sarvaṃ manmanasi sthitam|
jānatyapi punarmāṃ tu jijñāsayitumicchasi|| 53.10 ||
upāyāścāpyapāyāśca śāstrīyā nirmitā mayā|
upāyāḥ pūrvamuddiṣṭāḥ niṣiddhaścetare matāḥ|| 53.11 ||
anarthaparihārārthaṃ prāyaścittaṃ mayoditam|
cāndrāyaṇaṃ taptakṛcchraṃ kṛcchaṃ sāṃtapanaṃ tathā|| 53.12 ||
gaṅgāditīrthasnānaṃ ca sādhūnāmabhyanujñayā|
eteṣvanyatamaṃ kṛtvā mahāpāpādvimucyate|| 53.13 ||
vimuktaḥ svargamāpnoti modate svargibhiḥ saha|
puṇyakṣayo yadi bhavet punarbhūmau patiṣyati|| 53.14 ||
anarthasādhakaṃ kiṃcit kiṃciccāpyarthasādhakam|
anarthaparihāraśca prāyaścittātmakaṃ rame|| 53.15 ||
trairāśyaṃ karmaṇāmevaṃ śāstrataścopadiśyate|
manīṣī śāstratattvajña upāyāpāyasaṃjñikam|| 53.16 ||
prāyaścittaṃ ca saṃtyajya vaidikīṃ vṛttimāśritaḥ|
mantrametaṃ samuccārya tvayā māṃ śaraṇaṃ vrajet|| 53.17 ||
tadupāyaṃ ṣaḍaṅgaṃ syād vivṛṇomi tavānaghe|
ānukūlyasya saṃkalpaḥ prātikūlyasya varjanam|| 53.18 ||
rakṣiṣyatīti viśvāso goptṛtvavaraṇaṃ tathā|
ātmanikṣepakārpaṇye ṣaḍvidhā śaraṇāgatiḥ|| 53.19 ||
evaṃ māṃ śaraṇaṃ prāpya taret saṃsārasāgaram|
satkarmanirataḥ śuddho vītaśokabhayaklamaḥ|| 53.20 ||
nirārambho nirāśīśca nirmamo nirahaṃkṛtiḥ|
vidyāsu ca prasaktaśca sāṃkhye tapasi ca sthitaḥ|| 53.21 ||
nārhatyupāyaniṣṭhasya kalāṃ koṭitamīmapi|
śrīḥ-
ānukūlyādiśabdānāṃ hare vyākhyātumarhasi|| 53.22 ||
bhagavān-
sarvānukūlatā nāma ānukūlyamihocyate|
tathaiva prātikūlyaṃ ca bhūteṣu parivarjanam|| 53.23 ||
tyāgo garvasya kārpaṇyaṃ śrutaśīlādijanmanaḥ|
aṅgasāmagryasaṃpatteraśakterapi ca karmaṇām|| 53.24 ||
adhikārasya cāsiddherdeśakālaguṇakṣayāt|
upāyā naiva sidhyanti hyapāyabahulāttathā|| 53.25 ||
iti yā garvahānistad dainyaṃ kārpaṇyamucyate|
śakteḥ sūpasadatvācca kṛpāyogācca śāśvatāt|| 53.26 ||
īśeśitavyasaṃbandhādanidaṃprathamādapi|
rakṣiṣyatyanukūlānna iti yā sudṛḍhā matiḥ|| 53.27 ||
sa viśvāso bhaved devi sarvaduṣkṛtanāśanaḥ|
karuṇāvānapi vyaktaṃ śaktaḥ svāmyapi dehinām|| 53.28 ||
aprārthito na gopāyediti tatprārthanāmatiḥ|
gopāyitā bhavetyevaṃ goptṛtvavaraṇaṃ tathā|| 53.29 ||
tena saṃrakṣyamāṇasya phale svāmyaviyuktatā|
keśavārpaṇaparyantā hyātmanikṣepa ucyate|| 53.30 ||
nikṣepāparaparyāyo nyāsaḥ pañcāṅgasaṃyutaḥ|
sannyāsastyāga ityuktaḥ śaraṇāgatirityapi|| 53.31 ||
apāyo'yaṃ caturthaste proktaḥ śaghraphalapradaḥ|
pūrve traya upāyāste bhaveyuramanoharāḥ|| 53.32 ||
ānukūlyetarābhyāṃ tu vinivṛtti(1)rapāyataḥ|
kārpaṇyenāpyupāyānāṃ vinivṛttirihocyate(2)|| 53.33 ||
(1.gra.parā yataḥ|)
(2.gra. rihoditā|)
rakṣiṣyatīti viśvāsādrakṣaṇopāyakalpanam|
goptṛtvavaraṇaṃ nāma svābhiprāyanivedanam|| 53.34 ||
sarvajño'pi hi viśvātmā sadā kāruṇiko'pi san|
saṃsāratantravāhitvāt rakṣāpekṣāṃ pratīkṣate|| 53.35 ||
ātmātmīyabharanyāso hyātmanikṣepa ucyate|
hiṃsāsteyādayaḥ śāstrairapāyatvena darśitāḥ|| 53.36 ||
[karmasāṃkhyādayaḥ śāstrairupāyatvena darśitāḥ|]
apāyopāyasaṃtyāgī mādhyamīṃ vṛttimāsthitaḥ|| 53.37 ||
rakṣiṣyatīti niścitya nikṣiptaḥ svasvagocaraḥ|
budhyeta devadeveśaṃ goptāraṃ puruṣottamam|| 53.38 ||
tato mantraṃ varṇacakrāduddharenmantravittamaḥ|
sarvadāhakasaṃyuktaṃ śrīvatsaṃ ca manobhavam|| 53.39 ||
mandaraṃ vyāpakaṃ dvitvaṃ bhadrapāṇiṃ ca gopanam|
mahājvālaṃ cādidevaṃ vāyubījamataḥ param|| 53.40 ||
draṣṭāraṃ dharaṇīṃ lakṣmīṃ candraṃ vyāpakameva ca|
nyagrodhaśāyinaṃ lakṣmīṃ vanamālyauṣadhe tathā|| 53.41 ||
śrīvatsaṃ vyāpakaṃ kharvamaprameyaṃ ca dhāriṇīm|
vāsudevaṃ mahājvālasametaṃ paścimānanam|| 53.42 ||
draṣṭāraṃ padmanetraṃ ca lakṣmīṃ śaṅkhasamanvitām|
madanaṃ sāttvataṃ sarvadāhakena samanvitam|| 53.43 ||
śubhadaṃ pañcabinduṃ ca kālaṃ vyāpakameva ca|
vairājaṃ sāttvataṃ kīrtimādidevaṃ mahānalam|| 53.44 ||
saṃkarṣaṇaṃ vāyubījamaprameyaṃ ca dhāriṇīm|
ānandaṃ vāyubījaṃ ca vyāpakāntaṃ samuddharet|| 53.45 ||
vahnijāyāṃ tato yuktvā namo'ntaṃ vā samuccaran|
samāhitamanā bhūtvā dvayaṃ mantrārthatattvavit|| 53.46 ||
tvatpūrvakaṃ māṃ śaraṇaṃ vrajedyadvā samāhitaḥ|
aṣṭākṣaraṃ dvādaśārṇaṃ praṇavaṃ vā caturthimat|| 53.47 ||
athavā mantrahīno'pi devatāntaravarjitaḥ|
māmeva śaraṇaṃ prāpya śāśvataṃ padamaśnute|| 53.48 ||
sakṛdeva hi śāstrārthaḥ kṛto'yaṃ tārayennaram|
upāyāpāyasaṃyoge niṣṭhayā hīyate'nayā|| 53.49 ||
apāyasaṃplave sadyaḥ prāyaścittaṃ samācaret|
prāyaścittiriyaṃ sātra yatpunaḥ śaraṇāgatiḥ|| 53.50 ||
upāyānāmupāyatvasvīkāre'pyetadeva hi|
aviplavāya dharmāṇāṃ pālanāya kulasya ca|| 53.51 ||
saṃgrahāya ca lokānāṃ maryādāsthāpanāya ca|
manīṣī samayācāraṃ manasāpi na laṅghayet|| 53.52 ||
yathā hi vallabho rājño nadīṃ rājñā pravartitām|
lokopayoginīṃ ramyāṃ bahusasyavivardhinīm|| 53.53 ||
laṅghayan śūlamārohedanapekṣo'pi tāṃ prati|
evaṃ vilaṅghayan martyo maryādāṃ nirmitāṃ mayā|| 53.54 ||
priyo'pi na priyo'sau me mamājñāvyativartanāt|
upāyatvagrahaṃ tatra varjayenmanasā sudhīḥ|| 53.55 ||
caturthamāśrayannevamupāyaṃ śaraṇāśrayam|
atītya sakalaṃ kleśaṃ sa viśatyamalaṃ padam|| 53.56 ||
apāyopāyanirmuktāṃ madhyamīṃ sthitimāśritā|
śaraṇāgatiragryeṣā saṃsārārṇavatāriṇī|| 53.57 ||
idaṃ śaraṇamajñānamidameva vijānatām|
idaṃ titīrṣatāṃ pāramidamānantyamicchatām|| 53.58 ||
prāyaścittaprasaṅge tu sarvapāpasamudbhave|
saha tvayā māṃ śaraṇaṃ vrajedyadi sumadhyame|| 53.59 ||
tanūkṛtyākhilaṃ pāpaṃ māmevaiṣyatyasaṃśayam|
athopāyaprasaktaśced bhuktvā bhogānamānuṣān|| 53.60 ||
ante viraktimāsādya viśate māmakaṃ padam|
akāmaiśca sakāmaiśca tasmāt sidhyarthamātmanaḥ|| 53.61 ||
arcanīyā naraiḥ śaśvanmama mantramayī tanuḥ|
tathā harau pūjyamāne pūjākāle viśeṣataḥ|| 53.62 ||
mude bhagavato mudrāṃ darśayet deśikottamaḥ|
mudrā nāma piśācānāmasurāṇāṃ ca rakṣasām|| 53.63 ||
yasmānmudaṃ drāvayati tasmānmudreti kīrtyate|
kāścanaikena hastena hastābhyāmapi kāścana|| 53.64 ||
tattatkāle prayoktavyā devasāṃnidhyasiddhaye|
caitanyamaṅgulīnāṃ tu rame yadyapi vidyate|| 53.65 ||
tathāpi mantro'trādhyakṣastatphalaṃ saṃprayacchati|
śrotre pidhāya pāṇibhyāṃ nāmagotre ca vai bruvan|| 53.66 ||
vyutkrameṇa ca tatpādau gṛhṇīyādyadi vallabhe|
abhivādanamudraiṣā gurvādiṣu niyojayet|| 53.67 ||
hastābhyāṃ śirasā padbhyāṃ manasā ca dhiyā tathā|
ahaṃkāreṇa cātmānaṃ nipātya dharaṇītale|| 53.68 ||
sāṣṭāṅgena spṛśed‌bhūmiṃ sā namaskṛtimudrikā|
hṛdaye śirasi tayoḥ saṃpuṭāñjalirūrdhvagā|| 53.69 ||
praṇāmapūrvā sā jñeyā kṣipraṃ devaprasādinī|
prasārya tarjanīmanyāṃ muṣṭīkṛtya ca mastakam|| 53.70 ||
tarjanyā bhrāmayet sā tu vahniprākāramudrikā|
ātmarakṣaṇakāle ca mahābhītau ca darśayet|| 53.71 ||
yogamudrā karatalaṃ vāmaṃ nābheḥ samīpagam|
uttānīkṛtya tadadhi dakṣiṇaṃ ca tathā nyaset|| 53.72 ||
nidhāya pūrvavad vāmaṃ dakṣiṇaṃ cāpyadhomukham|
kriyeta yadi sā proktā yogasaṃpuṭamudrikā|| 53.73 ||
tarjanyaṅguṣṭhayorantaḥ saṃyogastattvamudrikā|
tattvānāṃ nyasane cāpi mānasārādhane tathā|| 53.74 ||
arghyādidānasamaye haraye darśayed guruḥ|
anāmikāmadhyamayormadhye'ṅguṣṭhaṃ niveśya ca|| 53.75 ||
muṣṭiṃ kṛtvā tu hṛdaye nyāso hṛdayamudrikā|
adho bad‌dhvā tu tāṃ muṣṭiṃ tarjanyantena yuktayā|| 53.76 ||
aṅguṣṭhena brahmarandhraṃ saṃspṛśecchīrṣamudrikā|
ūrdhvāṅguṣṭhayutāṃ muṣṭiṃ śikhāyāṃ vinyasedyadi|| 53.77 ||
śikhāmudreti sā proktā tāṃ mudrāṃ yadyadhomukhīm|
bhruvormadhye sthāpyamāne netramudreti kīrtyate|| 53.78 ||
aṅguṣṭhau sudṛḍhau cāntaḥ kṛtvā muṣṭī tu hastayoḥ|
mūlabhāge dṛḍhaṃ nyāso vyatyāsena bhavedyadi|| 53.79 ||
sā mudrā kavacākhyā syānmantramuccārya (3)darśayet|
kaniṣṭhādyaṅgulīstisro muṣṭīkṛtya tadanyayoḥ|| 53.80 ||
(3.gra. vinyaset|)
tarjanyaṅguṣṭhayoḥ sphoṭaṃ dakṣiṇasyāṣṭadikṣvapi|
śiraḥpradakṣiṇenaiva kuryāccedastramudrikā|| 53.81 ||
hastau mukulītau kṛtvā nyasecchirasi mantrataḥ|
kirīṭamudrā sā jñeyā śrīvatsākhyāmatho śṛṇu|| 53.82 ||
maṇibandhau melayitvā cāṅguṣṭhāvantaraṃ nayet|
śeṣāḥ prasārayecchākhā dakṣiṇorasi vinyaset|| 53.83 ||
eṣaiva padmamudreti vadantyāgamaśāstriṇaḥ|
padme śriyādidevīnāmāsane ca niyojayet|| 53.84 ||
aṅguṣṭhau ca kaniṣṭhau ca praveśyāntaśca hastayoḥ|
śiṣṭāṅgulīnāmagrāṇi melayitvā parasparam|| 53.85 ||
eṣā kaustubhamudreti vāmavakṣasi vinyaset|
aṅguṣṭhābhyāṃ vinā śākhā ṛjūkṛtyoru(4)pārśvayoḥ|| 53.86 ||
(4.gra. pārśvagau|)
hastau prālambayet kaṇṭhādvānamāleti tāṃ viduḥ|
prasāryāṅgulibhirhastau melayitvā parasparam|| 53.87 ||
savyāpasavyabhramaṇaṃ kuryāccakrākhyamudrikā|
dormūle dakṣiṇasyāpi rakṣaṇārthe ca yojayet|| 53.88 ||
vāmāṅguṣṭhaṃ dakṣiṇasya muṣṭinā grāhayet purā|
prasārayet taditarā(5)stābhirmuṣṭiṃ ca gūhayet|| 53.89 ||
(5.tāṃ muṣṭiṃ grāhayet tataḥ|)
tarjanyagraṃ dakṣiṇasya tvaṅguṣṭhena niyojayet|
śaṅkhamudrāmimāṃ devi nyasedvāmabhujopari|| 53.90 ||
kūrparādyau melayitvā karau madhyāṅgulīyugam|
prasārya yojayedanyā muṣṭīkuryādvicakṣaṇaḥ|| 53.91 ||
gadāmudrāmimāṃ devi vāmahaste pradarśayet|
vāmetare padmamudrāṃ darśayecca yathāvidhi|| 53.92 ||
karayorubhayoḥ pṛṣṭhaṃ śleṣayecca kaniṣṭhike|
bandhayet tarjanīyugmaṃ cañcuvat tadadhomukhau|| 53.93 ||
aṅguṣṭhau pādavacchākhā itarāḥ pakṣavaddhavet|
vainateyasya mudraiṣā mūle tūrvorniyojayet|| 53.94 ||
hastayoraṅgulīḥ sarvāḥ prasārya tadanantaram|
cālayet kiṃcidākuñcya phaṇino mastakāniva|| 53.95 ||
śeṣamudrāmimāṃ devi hastapādamukhasya ca|
śodhane tūpayogaḥ syād devasya paramātmanaḥ|| 53.96 ||
kaniṣṭhādyaṅgulīstisraḥ saṃhṛtyāṅguṣṭhakena ca|
niyojya tarjanīṃ bhūyo viṣvak‌senasya mudrikā|| 53.97 ||
pādāgre darśayet tadvad digbandhe ca niyojayet|
vāme karatale pūrevaṃ tato haste tu dakṣiṇe|| 53.98 ||
punarvāmatale kuryādaṅgulībhistu tāḍanam|
tālatrayākhyamudraiṣā kavāṭoddhāṭanādiṣu|| 53.99 ||
pātrasthāpanakāle'pi darśayet gurusattamaḥ|
hastayormadhyamāṅgulyau karapṛṣṭhe niyojayet|| 53.100 ||
aṅguṣṭhena tathāṅguṣṭhaṃ kaniṣṭhena kaniṣṭhikām|
saṃkuñcayet taditarāḥ śākhāḥ sarvāḥ prasārayet|| 53.101 ||
mudraiṣā kāmadhenvākhyā sarvaśuddhikarī sadā|
hastābhyāmañjaliṃ badhvā tvīṣa(6)dvikasitāṃ sphuṭām|| 53.102 ||
(6.gra. dvikasitaṃ sphuṭam|)
mudrā hyāvāhane yojyā sthāpanā śṛṇu bhārgavi|
hastāvadomukhau kṛtvā cāṅguṣṭhābhyāmanāmike|| 53.103 ||
saṃmṛjet sthāpane devi viniyogo bhavediyam|
ūrdhvāṅguṣṭhaṃ dakṣiṇaṃ tu muṣṭīkṛtya pradarśayet|| 53.104 ||
mudraiṣā pratipā devi pūjākāle niyojayet|
uttānaṃ jaśriṇaṃ kṛtvā kīṃcinnāmrāṅguliṃ punaḥ|| 53.105 ||
svāgatena ca śabdena darśayet svāgatāmimām|
uttānau saṃhatau pāṇī kṛtvāṅguṣṭhadvayena tu|| 53.106 ||
svāṃ svāṃ kaniṣṭhāṃ vimṛjedeṣā saṃnidhimudrikā|
nābhau kūrparayugmaṃ tu niveśya karayordvayoḥ|| 53.107 ||
maṇibandhānmelayitvā tataḥ kiṃcidvikāsayet|
kiṃcidvicālayedeṣā prārthanāyāṃ pradarśayet|| 53.108 ||
īṣadvikasitaṃ kuryādañjaliṃ kamalekṣaṇe|
eṣā sāṃmukhyamudrā syāt saṃmukhīkaraṇe hareḥ|| 53.109 ||
kumbhamudrāṃ pravakṣyāmi yadyadhomukhato'ñjalim|
pradarśayet snānakāle kamale gurusattamaḥ|| 53.110 ||
pañcāṅgulīnāmagraṃ tu yojayed grāsamudrikā|
nivedane devadevyoritareṣāmimāṃ smaret|| 53.111 ||
madhyamānāmikābhyāṃ tu hyaṅguṣṭhaṃ melayettataḥ|
kaniṣṭhā tarjanīyugmaṃ dīrghākṛtvā vicakṣaṇaḥ|| 53.112 ||
dhānyapuṣphalādīnāmimaṃ home pradarśayet|
balipradānakāle tu puṣṭimudrāṃ niyojayet|| 53.113 ||
aṅguṣṭhābhyāṃ tu karayostarjanīmadhyamāntimau|
spṛśet taditarāḥ śākhāḥ prasāryābhipradarśayet|| 53.114 ||
japamudreti vijñeyā japakāle jalodbhave|
tarjanyanāmikāgraṃ tu veṣṭayitvā parasparam|| 53.115 ||
[aṅguṣṭhau daṇḍavatkṛtvā muṣṭibandhaṃ śanaiḥ śanaiḥ|]
kuryāt kaniṣṭhikādīnāṃ mudraiṣā syādvisarjane|| 53.116 ||
kiṃca puṣpāṇi tulasīranyāni vidhivadrame|
snātaḥ śuddhāmbaro maunī pāṇipādaṃ ca śodhayet|| 53.117 ||
mantramuccārayanmūlaṃ (7)dvādaśākṣarameva vā|
tattallatābhyo vṛkṣebhyaḥ svārāmāccinuyādrame|| 53.118 ||
(7.gra. yadvāṣṭākṣarameva vā|)
vetrajātiṣu pātreṣu nidhāya ca pidhāya ca|
gatvālayaṃ tatra śuddhe patraiḥ saṃcchādite sthale|| 53.119 ||
punarnikṣipya saṃśodhya taiḥ puṣpairarcayeddharim|
prātaḥ padmadvayaṃ śastamutpalatrayameva ca|| 53.120 ||
madhyaṃdine mādhavī ca ketakīdvayameva ca|
mālatīcampakaṃ caiva puṃnāgaṃ suraparṇikā|| 53.121 ||
nandyāvartaṃ śvetapuṣpaṃ karavīraṃ ca padmakam|
mandāramavadātaṃ ca pāṭalaprabhameva ca|| 53.122 ||
sāyaṃkāle vicakilaṃ mallikādvayameva ca|
vakulaṃ jātipuṣpaṃ ca tathā vanasamudbhave|| 53.123 ||
jātī ca mallikā cāpi etaiḥ saṃpūjayeddharim|
hrīberaṃ ca tamālaṃ ca tathā damanakatrayam|| 53.124 ||
tulasyau sitakṛṣṇe ca kevalā kṣapakāstathā|
etaiḥ saṃpūjayet sarvakāleṣu ca tathārcayet|| 53.125 ||
padmādijalapuṣpāṇi tryahātparyuṣitaṃ bhavet|
na paryuṣitadoṣo'sti(8)hrīberādestu pūjane|| 53.126 ||
(8.gra. tulasīpallavasya hi iti pāṭhāntaraṃ gra. pustake darśitam|)
etairbhagavataḥ pūjāṃ padmādyairarcanaṃ caret|
sādhako bhagavannāma śatamaṣṭottaraṃ vadan|| 53.127 ||
pādayorarcanaṃ kuryāt tasya svargo bhaved dhruvam|
sahasranāmnā yaḥ kuryāt kārayedarcanaṃ hareḥ|| 53.128 ||
bhūloke sarvakāmān sa āyuṣaḥ pūrṇameva ca|
saṃpadaḥ putrapautrādīnanubhūya tato rame|| 53.129 ||
prāpta viṣṇoḥ paraṃ dhāma modate nityasūrivat|
puṣpairlakṣārcanasamamarcanaṃ tulasīdalaiḥ|| 53.130 ||
aṣṭottaraśataiḥ kuryāt tasya sthānaṃ tu padmaje|
vaikuṇṭhaṃ padamāsādya modate sānugaiḥ saha|| 53.131 ||
udyānaṃ vā taṭākaṃ vā kṣetraṃ vā pūjanāya yaḥ|
dadāti sa tu malloke nityavāsaṃ kariṣyati|| 53.132 ||
ataḥ sarvaṃ(9) samālocya śāstraṃ ca bhagavatpriyam|
deśakālādhikāraṃ ca pūjayet bhaktimānnaraḥ|| 53.133 ||
(9.gra. samyak)
tasya dātā hariḥ (10)sākṣādihāmutra śubhaṃ phalam|
ityevaṃ vāsudevasya mukhapadmād viniḥsṛtam|| 53.134 ||
(10.gra. satyaṃ)
śāstrāmṛtaṃ śrotrapeyaṃ śrotratṝṇāṃ mokṣadāyakam|
śrutaṃ mayā pāñcarātraṃ kṣemāya jagato mune|| 53.135 ||
upādikṣaṃ susūkṣmārthaṃ hariṇā preṣitā tava|
[bhāradvājānvayo vedaśirāḥ kauṇḍinyasaṃtatiḥ|| 53.136 ||
kavaṣastu vasiṣṭhābhijano bhārgavanāmakaḥ|
viśvāmitrānvavāyaśca marīcīti maharṣayaḥ|| 53.137 ||
śaraṇāgatidharmajñāścatvāro dvayacintakāḥ|
paramaikāntino śaṅkhaśārṅgacakragadāṃśajāḥ|| 53.138 ||
cakrādyāyudhasaṃbhūtāścatvāro munisattamāḥ|
te tvaṃ samāgamiṣyanti bhagavaddīkṣitā mune|| 53.139 ||
tebhya etamupādiśya vaikuṇṭhaṃ sūrisevitam|
āyāhi bhagavatprītyai modatāṃ nityasūrivat|| 53.140 ||
[tvacchiṣyavargānvayajo yastu mūḍho'pi dīkṣitaḥ|
sa evārādhane yogyaḥ pāvano brahmavinmahān|| 53.141 ||
anyā bhāgavatā naiva pūjāyāmāvayordvayoḥ|
dīkṣitairitarairvipraiḥ kṛtaṃ yadi parārcanam|| 53.142 ||
mohena rājyarāṣṭrāṇāṃ mahān doṣo bhaviṣyati|
tasmāt sarvaprayatnena kāryaṃ tvacchiṣyavaṃśajaiḥ|| 53.143 ||]
iti śriyā samādiṣṭaḥ śrīpraśnamiti saṃjñitam|
etacchāstraṃ pāñcarātraṃ yuṣmabhyo'hamupādiśam|| 53.144 ||
idaṃ śāstraṃ mayāvāptaṃ bahukālaṃ tapasyatā|
ata etadabhaktāya śraddhāhīnāya vai kvacit|| 53.145 ||
asūyave karmaṭhāya na vaktavyaṃ munīśvarāḥ|
sādhubhyo viṣṇubhaktebhyaḥ pañcakālebhya eva ca|| 53.146 ||
bhītebhyaḥ saṃsṛternityaṃ śraddhālubhyo vicakṣaṇāḥ|
upādiśata yūyaṃ(11) ca puṇyakṣetrādiṣu kramāt|| 53.147 ||
(11.gra. tu)
kalpayitvā bhagavataḥ saṃnidhiṃ śāstrasaṃmatam|
bhagavantaṃ samārādhya sveṣṭaṃ prāpsyatha mā ciram|| 53.148 ||
[svārthe parārthe yajane yūyaṃ mukhyādhikāriṇaḥ|
yuṣmadvaṃśyāśca ye viprāste'bhiṣecyā yathāvidhi|| 53.149 ||
te'pi svārthe parārthe ca bhaveyuradhikāriṇaḥ|
vedaśirāḥ-
kiṃ svārthaṃ ca parārthaṃ kiṃ vadasva vadatāṃ vara|| 53.150 ||
ekataḥ-
sindhutīre saritkūle grāme vā vipinādike|
pattane vā parvatāgre svayaṃvyaktādibhedataḥ|| 53.151 ||
jagatāṃ kṣemalābhāya duṣkṛtāṃ nidhanāya ca|
saṃsthito vāsudevastu parārtha iti kathyate|| 53.152 ||
utkṛṣṭaḥ paraśabdo'yamartho mokṣādilakṣaṇaḥ|
yasmāt sa labhyate so'yaṃ parārthaḥ parikīrtitaḥ|| 53.153 ||
sa eva sarvaphaladaḥ sarveṣāṃ muktidāyakaḥ|
tasmāt sarvajanaiḥ sevyaḥ parārthaḥ puruṣottamaḥ|| 53.154 ||
brāhmaṇaiḥ kṣatriyairvaiśyaiḥ śūdrādyaiḥ svasvasadmani|
sthāpito devadevastu svārtha ityabhidhīyate|| 53.155 ||
paśvārāmagṛhakṣetraputrādyāḥ svārthasaṃpadaḥ|
tanmātradānāt taddevaḥ svārtha(:) saṃparikīrtitaḥ|| 53.156 ||
parārthaḥ sūryasadṛśaḥ svārthastu gṛhadīpavat|
iti tebhya upādiśya śrīpatiṃ manasā smaran|| 53.157 ||
ātmānaṃ brahmarandhreṇa nirgamayya tanuṃ tyajan|
arcirādigatiṃ prāpya vaikuṇṭhaṃ padamāptavān|| 53.158 ||

|| iti śrīśrīpraśnasaṃhitāyāṃ śaraṇāgatimudrādividhirnāma tripañcāśo'dhyāyaḥ ||(12)
(12.śrīpraśnasaṃhitāyāṃ catuḥpañcāśo'dhyāya iti gra. pustake|)
|| iti śrīśrīpraśnasaṃhitā samāptā ||
|| śrī bhūminīlāsametāya vāsudevāya parabrahmaṇe namaḥ ||