Chapter 47

|| saptacatvāriṃśo'dhyāyaḥ ||

indire vikasatpadmamandire lokavandite|
jñātamadya mayā pūrvakalpavṛttaṃ tava priye|| 47.1 ||
vadāmi hyutsavaṃ bhadre praṇayāt kalahastava|
kṣīrodamadhye sumahān śvetadvīpa itīritaḥ|| 47.2 ||
trikūṭo nāma tanmadhye devagandharvasevitaḥ|
tatsamīpe hradaḥ svaccho mahāmakarasevitaḥ|| 47.3 ||
pañcāśadyojano yāmo matsyakacchamasaṃvṛtaḥ|
rājahaṃsairmallikākṣaiḥ plavaiḥ kāraṇḍavairyutaḥ|| 47.4 ||
sahasrapatraiḥ kamalaiḥ śatapatraiśca pūritaḥ|
nīlotpalaiśca kalhāraiḥ śobhito jalapūritaḥ|| 47.5 ||
candanaiḥ syandanaurnīpaiḥ sālaistālaistamālakaiḥ|
evaṃ bahuvidhairvṛkṣaiḥ paritaścāvṛtaṃ saharaḥ|| 47.6 ||
śaityasaurabhyamānadya(ndyai?)śca vāti vāyuśca sarvadā|
evaṃ sthitaṃ hradaṃ devi grīṣmakālābhipīḍitaḥ|| 47.7 ||
mattamātaṅgayūthānāṃ kariṇīnāṃ ca yūthapaḥ|
gharmārtaścodakaṃ pātuṃ tatsaraḥ prāviśajjavāt|| 47.8 ||
gṛhītvā salilaṃ śītamapibatpuṣkareṇa saḥ|
etasmin samaye tasya grāho'gṛhṇācca tatpadam|| 47.9 ||
tasmānmoktumaśaktaḥ sannuccairitthamaghoṣayat|
yatkāraṇaṃ yadādhāraṃ yasmin līnamidaṃ jagat|| 47.10 ||
tasmai jagatkāraṇāya mūlāya mahase namaḥ|
ityākrandattato devā nāgacchan druhiṇādayaḥ|| 47.11 ||
tato garuḍamāruhya tvāmanādṛtya vai javāt|
tatsamīpamupāgamya nakrasya krūrakarmaṇaḥ|| 47.12 ||
cakreṇa śira utkṛtya nāgarājamarakṣayam|
mayā hato nakravaro gajaścāpi vimokṣitaḥ|| 47.13 ||
śāpādvimuktau devatvaṃ prāpitau māṃ praṇematuḥ|
matsālokyaṃ tayordatvā vaikuṇṭhaṃ punarāgataḥ|| 47.14 ||
tadā tvayāhaṃ dvāryeva pratiṣiddho'bhavaṃ kila|
avocaṃ kāraṇaṃ bhadre na śṛṇoṣi yadā vacaḥ|| 47.15 ||
tadā tau ca samāgatya bhavatpādābhivanditau|
avocatāṃ sarovṛttaṃ tato madvacanaṃ nyathāḥ|| 47.16 ||
tatastvayā nāgabhoge vallabhe śayitāsmyaham|
tadutsavaṃ varārohe mamārcāyāṃ viśeṣataḥ|| 47.17 ||
kāryaṃ tasya prakāraṃ ca vadāmi kamalekṣaṇe|
śrīḥ-
utsavo'pyeṣa vai kāryastarhi tvaṃ bhaktavatsala|| 47.18 ||
yatra yatrāsate bhaktāḥ sevituṃ na kṣamā hare|
praveśastvālaye yeṣāṃ pratiṣiddho jagatpate|| 47.19 ||
śāstreṇa vyādhibhiścāpi teṣāṃ darsanasiddhaye|
āruhya śibikāṃ deva hyarcārūpeṇa keśava|| 47.20 ||
sarvavīthisthitānāṃ ca bhaktānāmiṣṭasiddhaye|
darśayātmānamānandaṃ sarvapāpapraṇāśanam|| 47.21 ||
saṃsāragrāhasaṃdaṣṭān gajendramiva mocaya|
bhagavān-
tava priyārthaṃ he lakṣmīstathā vakṣyāmi suvrate|| 47.22 ||
ārabhya makarānmāsān mīnamāsāntamabjaje|
śukravārādi divase praṇayotsavamācaret|| 47.23 ||
aruṇodayataḥ pūrvaṃ nityakarmādikāṃścaran|
athālayaṃ praviśyāntarnityapūjāṃ samāpayet|| 47.24 ||
bhagavan puṇḍarīkākṣa bhaktarakṣaṇadīkṣita|
lakṣmyāstava priyārthāya praṇayādyuvayorhare|| 47.25 ||
kalahotsavamadyāhaṃ kartumicchāmi mādhava|
tadarthaṃ kautuke bimbe saṃnidhatsva kṛpānidhe|| 47.26 ||
iti vijñāpya lakṣmīśaṃ mūlātkarmaṇi kautuke|
āvāhyārghyādinābhyarcya mudgānnādi nivedayet|| 47.27 ||
śibikāyāṃ samāropya bhrāmayet (1)vīthiṣu kramāt|
sāyāhnasamaye prāpte dūratastvālayāt kvacit|| 47.28 ||
(1.gra. sarvavīthikāḥ|)
maṇḍape sthāpayitvā taṃ śramaśāntyai tato hareḥ|
datvārghyādīni bhakṣyāṇi nivedya tadanantaram|| 47.29 ||
yānamāropya gandhādyairalaṃkṛtya hariṃ prabhum|
vādyairvīṇādigānaiśca nṛtyairbahubhiranvitam|| 47.30 ||
tāmbūlacarvitoṣṭhaṃ ca gaṇikāgaṇasevitam|
praveśayedālayaṃ tu devī taṃ pratiṣedhayet|| 47.31 ||
evaṃ tricaturo vārān pratiṣidhya tato guruḥ|
he lakṣmīrbhagavānadya bhaktarakṣaṇakāmyayā|| 47.32 ||
bahirgato nānyathā tvaṃ mantumarhasi padmaje|
iti saṃprārthya devena devyā nīrājanaṃ caret|| 47.33 ||
rātripūjāṃ tataḥ kṛtvā śayyāyāṃ tau niveśayet|
saṃpūjya bhogaiḥ śayyāṅgaiḥ prātarūdbodhya mādhavam|| 47.34 ||
mūle śaktiṃ niyojyātha prārthayecca tato guruḥ|
gajārtihara lakṣmīśa praṇayotsavamadya te|| 47.35 ||
kṛtaṃ tvanādaraṃ kiṃcit tatkṣantavyaṃ dayānidhe|
iti (2)samprārthya lakṣmīśaṃ tataḥ pūjāmupakramet|| 47.36 ||
(2.gra. vijñāpya)
avatārā hyasaṃkhyeyāstvayā saha mayā kṛtāḥ|
teṣāṃ mukhyānidānīṃ te kathayāmi śucismite|| 47.37 ||
tattatkāle tadarcāyāṃ pūjayeyuśca mānavāḥ|
ārādhanānurūpeṇa teṣāmiṣṭaṃ dadāmyaham|| 47.38 ||
caitraśuddhe śuklapakṣe navamyāṃ somavāsare|
punarvasubhyāṃ saṃyukte kulīre'bhijite tathā|| 47.39 ||
pradyumno rāmarūpeṇa sūryavaṃśe'janiṣṭa hi|
tasmin kāle lakṣmaṇena śatrughnena ca sītayā|| 47.40 ||
bharatenāñjaneyena rāghavaṃ pūjayed guruḥ|
tasmin māsyasite pakṣe pūrvaproṣṭhapadīyute|| 47.41 ||
gurorvāre trayodaśyāṃ prātardevo ramāpatiḥ|
vārāharūpi bhagavān vāsudevāṃśasaṃbhavaḥ|| 47.42 ||
tasmin kāle tu taṃ devaṃ dharayā sahitaṃ harim|
mustācūrṇādi bhakṣyaiśca toṣayenniyato guruḥ|| 47.43 ||
vaiśākhaśuklapakṣasya caturdaśyāṃ bhṛgordine|
citrānakṣatrayoge ca sāyāhne narakesarim|| 47.44 ||
saṃkarṣaṇāṃśasaṃbhūtaṃ hiraṇyākṣavadhodyatam|
lakṣmyā sārdhaṃ bhaktavaśyaṃ pūjayet sarvasiddhaye|| 47.45 ||
tasmin dvitīye suklasya kṛttikāsahite rame|
sūryasya vāsare prātaḥ pradyumnāṃśādajāyata|| 47.46 ||
balastasmin dine sāyaṃ revatīsahitaṃ vibhum|
pūjayeddhalahastaṃ tamaparāhṇe guruḥ svayam|| 47.47 ||
jyeṣṭhaśukle kūrmarūpī dvādaśyāṃ surasattamaiḥ|
prārthito mantharoddhāre bharaṇārthimudāvahan|| 47.48 ||
vāsudevāṃśasaṃbhūto hyamṛtoddhāraṇe purā|
pūjayet taṃ hariṃ bhaktyā bhaktānāmamṛtapradam|| 47.49 ||
śrāvaṇyāmuttare tāre tṛtīyāyāṃ dine guroḥ|
kalkī khalānāṃ dahanaṃ punaḥ kṛtayugaṃ dadhat|| 47.50 ||
aniruddhāṃśajo'bhūttaṃ prātareva samarcayet|
tatpakṣe dvādaśidine pūrvāṣāḍhāsamanvite|| 47.51 ||
sūryavāre prātareva vāmanaṃ rūpamāsthitaḥ|
balernigrahaṇārthāya hariḥ saṃkarṣaṇātmajaḥ|| 47.52 ||
tasmin din prabhātāyāṃ vāmanaṃ pūjayed budhaḥ|
sāyaṃ traivikramaṃ rūpamāsthitaṃ toṣayeddharim|| 47.53 ||
mārgaśīrṣasya māsasya kṛṣṇapakṣe tu puṣyabhe|
dvitīyāyāṃ mandavāre jāmadagneḥ samudbhavaḥ|| 47.54 ||
saṃkarṣaṇāṃśajo rāmaḥ kuṭhāraṃ tvāyudhaṃ vahan|
rājanyadāvadahanastaṃ sāyāhne'rcayeddharim|| 47.55 ||
purā kalpe prathamadine vedhaso vedamāvahan|
durjayaḥ somako nāma dānavo'bdhiṃ praviṣṭavān|| 47.56 ||
tadā vedān samuddhartuṃ taṃ hantuṃ matsyarūpadhṛt|
praviśya salilaṃ bhadre vedhaso hitakāmyayā|| 47.57 ||
vedān gṛhītvā taṃ hatvā punastānādadāṃ vidheḥ|
yugādau pūjayed devaṃ matsyarūpiṇamabjaje|| 47.58 ||
ataḥ paraṃ te kamale ṣaṇṇāmadhvarasaṃjñinām|
kramaṃ tu kathayāmyadya vāsudevasya vedhasaḥ|| 47.59 ||
viṣṇorāvirbhavarkṣe ca darśaśravaṇayostathā|
ekādaśyāṃ saṃkrame ca ṣaḍvidhaiścotsavaḥ smṛtaḥ|| 47.60 ||
notsavaḥ śravaṇe yatra viṣṇorāyatane śubhe|
pañcaparvotsavaṃ nāma māsi māsi bhavedrame|| 47.61 ||
purā nityārcanāṃ kṛtvā prārthanāpūrvakaṃ hareḥ|
śaktimāvāhya deveśaṃ bhadrapīṭhe nidhāya ca|| 47.62 ||
puṣpābharaṇamālyādyairalaṃkuryādviśeṣataḥ|
arghyapādyādinābhyarcya bhakṣyādīni nivedya ca|| 47.63 ||
yātropakaraṇaiśchatraiscāmarairvyajanādibhiḥ|
sarvāvāditraghoṣaiśca prākāraṃ bhrāmayeddharim|| 47.64 ||
devasya śramaśāntyarthaṃ madhye madhye ca maṇḍape|
arghyādinā tamabhyarcya bhakṣyāṇi vividhaāni ca|| 47.65 ||
mudgān śarkarasaṃmiśrān nālikerajalaṃ tathā|
nivedya mukhavāsādi tāmbūlaṃ ca samarpayet|| 47.66 ||
balipīṭhapurobhāge mūlārcābhimukhaṃ nayet|
maṇḍape sthāpayeddevamarghyapādyādinā yajet|| 47.67 ||
ghaṭadīpaṃ pradarśyātha bhakṣyāṇi (3)vividhāni ca|
(4)nivedya garbhaṃ nītvā taṃ mūle śaktiṃ niyojayet|| 47.68 ||
(3.gra. vinivedayet|)
(4.samānīya gṛhe garbhe)

|| iti śrīśrīpraśnasaṃhitāyāṃ pañcaparvotsavaṃ(vo) nāma (5)ṣaṭcatvāriṃśo'dhyāyaḥ ||
(5.`saptacatvāriṃśodhyāya' iti bhāvyam|
      `aṣṭacatvāriṃśo'dhyāya' iti gra. pustake vartate|)