Chapter 46

|| ṣaṭ‌catvāriṃśo'dhyāyaḥ ||


aparaṃ devi vakṣyāmi dhanurmāse tu pūjanam|
utsavaṃ saṃpadāyuṣyapuṣṭidaṃ mokṣadaṃ rame|| 46.1 ||
kodaṇḍasthe savitari yāvanmakara(1)saṃkramam|
tāvaddineṣu pratyūṣe bhagavantaṃ janārdanam|| 46.2 ||
(1.gra. saṃkramaḥ|)
yathāvat pūjayed devi snānārthaṃ prokṣaṇaṃ caret|
alaṃkārāsanaṃ nītvā bhaktagāthāsamanvitaiḥ|| 46.3 ||
stotrairanairnṛttagītaistoṣayeddharimavyayam|
mudgānnaṃ saghṛtaṃ kṣīraṃ marīcyādisamanvitam|| 46.4 ||
sopadaṃśaṃ śarkarāṃ ca kadalīphalasaṃyutam|
sugandharasasaṃyuktaṃ lehyacoṣyādibhiryutam|| 46.5 ||
evaṃ pratidinaṃ prātardevasya vinivedayet|
dvādaśābdārcanaphalaṃ dinenaikena labhyate|| 46.6 ||
kārtike mārgaśīrṣe vā śrīmadadhyayanotsavam|
mārgaśīrṣasya śuklasya prathamāyāmupakramet|| 46.7 ||
daśamyantaṃ tato bhūyaḥ ekādaśyāṃ tathārabhet|
pañcamī kṛṣṇapakṣasya tāvad daśadinaṃ bhavet|| 46.8 ||
tadvidhānaṃ tu kamale bhaktamokṣadamutsavam|
prathamāvaraṇe vāpi dvitīyāvaraṇe'pi vā|| 46.9 ||
tṛtīyāvaraṇe yadvā yatra kutrāpi vā bhavet|
prācyāṃ vā kalpanīyaṃ syādāpayodharamunnatam|| 46.10 ||
nālikeraiśca pūgādiphalairnānāvidhaistathā|
vitānairdīpamālābhiḥ pratimābhiḥ suśobhitam|| 46.11 ||
devagandharvadaityānāṃ sukhasaṃcaraṇakṣamam|
evaṃ lakṣaṇasaṃyuktaṃ kuryānmaṇḍapamuttamam|| 46.12 ||
śrīḥ-
devadeva jagannātha brahmarudrādi(2)sevita|
mārgaśīrṣe māsi mukhye uṣaḥkāle tu pūjanam|| 46.13 ||
(2.gra. pūjita|)
mudgānnādi ca tatkāle kimarthaṃ vā nivedanam|
utsavo mokṣadaḥ kasmāt maṇḍapaṃ tādṛgunnatam|| 46.14 ||
śrotumicchāmi vistārād bhagavan bhaktavatsala|
śrī bhagavān-
vismṛtāsi purāvṛttaṃ smārayāmi tava priye|| 46.15 ||
pralayode hyahaṃ supto vaṭapatre purā rame|
bālarūpadharo devi tadā tvaṃ vakṣasi sthitā|| 46.16 ||
mannābhikamalād brahmā matsaṃkalpādajāyata|
ānanaiścaturo vedānuccaran śāstrasaṃmitān|| 46.17 ||
sarvajñasya jagatsraṣṭuḥ smayo'bhūnmāṃ ca nāsmarat|
mama karṇāt samud‌bhūtāvasurau lokakaṇṭakau|| 46.18 ||
brahmāṇaṃ hantumārabdhau so'rodīt prākṛto yathā|
jaleśayaṃ ca māṃ dṛṣṭvā hyastauṣīccaturānanaḥ|| 46.19 ||
tato'vabudhya tau dṛṣṭvā prāvocaṃ dānavottamau|
varaṃ vṛṇītaṃ matto vāṃ tāvabrūtāmanantaram|| 46.20 ||
vṛṇīṣva matto deveśa varaṃ dāsyāva durlabham|
tayoritthaṃ vacaḥ śrutvā prahasyāhamathābruvam|| 46.21 ||
mayā hatau yuvāṃ daityau punaḥ prakṛtimeṣyataḥ|
ityuktāvasurau māṃ tu māsamāvāṃ tvayā saha|| 46.22 ||
yudhvā tvatto vadhaṃ prāpya siddhimiṣṭāmavāpnutaḥ|
evaṃ niścitya tadanu yuddhasaṃrambhiṇau mayā|| 46.23 ||
niyuddhaṃ māsamekaṃ tu kṛtvā sārdhaṃ sumadhyame|
mayā hatau tau devatvaṃ prāptau cakrābjadhāriṇau|| 46.24 ||
matsvarūpamapi jñātvā namaskṛtya kṛtāñjalī|
tvatsvarūpaṃ prāptavato daityāre nāvayoḥ punaḥ|| 46.25 ||
kiṃca tvallokavāsaṃ ca nityaṃ (3)syātkamalekṣaṇa|
iti saṃprārthito'haṃ hi daityau tau matsvarūpiṇau|| 46.26 ||
(3.gra. kamalekṣaṇe|)
cāpamāse śuklapakṣasyaikādaśyāminodaye|
dvāramuttaramuddhāṭya tanmārgāt prāpayaṃ ca tau|| 46.27 ||
śrīvaikuṇṭhe satyalokādupariṣṭhāt sthite śubhe|
śuddhasattve sūrigaṇairnityaiścāpi niṣevite|| 46.28 ||
ratnamaṇḍapamadhyasthe ratnaparyaṅkaśobhite|
tiṣṭhantaṃ śeṣaśayane tatphaṇāmaṇiśobhitam|| 46.29 ||
sūribhiḥ stūyamānaṃ māmekāyanaṛgādibhiḥ|
āyudhaiḥ śaṅkhacakrādyairmūrtibhiḥ parisevitam|| 46.30 ||
upasthitaṃ prāñjalinā vinatānandanena ca|
viṣvaksenena cānyaiśca pārṣadaiḥ kumudādibhiḥ|| 46.31 ||
jayādibhiśca māṃ dṛṣṭvā vismitenāntarātmanā|
matsvarūpaṃ paraṃ dṛṣṭvā pulakāñcitavigrahau|| 46.32 ||
stutvā ca vividhaiḥ stotrairabrūtāmasurottamau|
paramātman paraṃ brahma parātpara jagatpara|| 46.33 ||
jñānānanda jñānamūrte sarvajñācintyavigraha|
nityānanda nirākāra saṃsārodadhitāraka|| 46.34 ||
satyalokādilokasthāstvatsvarūpaṃ kadācana|
na jānanti janā loke saṃsāravaśavartinaḥ|| 46.35 ||
koṭikoṭisahasreṇa janmanā kṛpayā ca te|
saṃsārasāgarātpāraṃ prāptau tvāṃ śaraṇaṃ gatau|| 46.36 ||
prārthayāva viśālākṣa prārthanāṃ saphalāṃ kuru|
tvayā vigṛhya cāvāṃ yatprāptau svaḥ śrīpate padam|| 46.37 ||
brahmādayo'pi tvallokasadṛśaṃ ratnamandiram|
kalpayitvā tvadarcāyāmekādaśyutsavaṃ caret|| 46.38 ||
tadā paśyanti ye tvāṃ tu namasyanti ca ye janāḥ|
uttaradvāramārgeṇa praviśanti ca ye hare|| 46.39 ||
te vaikuṇṭhamimaṃ prāpya modantāṃ nityasūrivat|
tayostadvacanaṃ śrutvā bhaktavaśyastadābruvam|| 46.40 ||
yuvayostṛptaye hoṣa utsavaḥ kāryate mayā|
tadārabhyāhamādikṣaṃ sarvalokeṣu vai rame|| 46.41 ||
kṛtvotsavaṃ tathābhūtamekādaśyāṃ viśeṣataḥ|
viśanti mokṣaṃ tasmāt so mokṣotsava itīryate|| 46.42 ||
prapāyā unnaterhetuṃ vadāmi kamalekṣaṇe|
utsavo'yaṃ prathamato daityābhyāṃ prārthitaḥ kila|| 46.43 ||
mokṣaṃ cāpi prāptavantau tasmāt sevāmahe vayam|
iti niścitya daiteyā mokṣakāmāśca rākṣasāḥ|| 46.44 ||
mahonnatāḥ samāgatya namasyanti dine dine|
teṣāṃ sukhapraveśārthaṃ prapā tādṛk samunnatā|| 46.45 ||
mārgaśīrṣo devatānāṃ prātaḥkāla iti smṛtaḥ|
prātaḥkālo mahadbhistu sāttvikaḥ samudāhṛtaḥ|| 46.46 ||
tasminnabhigame kāle pūjanaṃ sāttvikaṃ smṛtam|
mudgānnaṃ ca gulānnaṃ ca sāttvikaṃ paricakṣate|| 46.47 ||
tatkāle sāttvikānneva vāsudevaṃ tu tarpayet|
pūrvoktayorutsavayoḥ pūrvāparavibhedataḥ|| 46.48 ||
prātaḥ sāyaṃ ca kartavyaṃ tadvidhānaṃ śṛṇu priye|
utsavārambhapūrvedyuraṅkurānarpayed guruḥ|| 46.49 ||
prātarnityārcanaṃ kṛtvā prārthayet kamalāpatim|
pītāmbaradhara śrīman kaustubhānatakaṃdhara|| 46.50 ||
makhāyādhyayanāyāsmin bimbe saṃnidhimāvaha|
iti saṃprārthya deveśaṃ mūlācchaktiṃ niyojya ca|| 46.51 ||
bandhayenmaṅgalaṃ sūtraṃ mūlādīnāṃ tathātmanaḥ|
deveśaṃ yānamāropya nītvā dhāma pradakṣiṇam|| 46.52 ||
mahāmaṇḍapamānīya deveśaṃ svarṇaviṣṭare|
devasyābhimukhe bhaktabimbān saṃsthāpayet tataḥ|| 46.53 ||
devaṃ saṃpūjya bhakṣyādi vinivedya tataḥ param|
bhaktabimbān pūjayitvā tebhyastāni nivedayet|| 46.54 ||
gāthāpāṭhakabhaktebhyo vaiṣṇavebhyaśca dāpayet|
aparāhṇe vāsudevamārādhya vidhivad guruḥ|| 46.55 ||
caturvidhānnabhakṣyādi vinivedya samāhitaḥ|
mukhavāsasamopetaṃ tāmbūlaṃ ca nivedayet|| 46.56 ||
annādīn bhaktabimbānāṃ nivedya prāṇavallabhe|
deveśaṃ yānamāropya nṛttagītādibhiḥ saha|| 46.57 ||
antaḥ praveśya deveśaṃ śaktimūle niyojayet|
evaṃ daśadinaṃ kṛtvā catuḥsthānasthitaṃ vibhum|| 46.58 ||
mūle niyojayed devaṃ prārthayet prāñjaliḥ sthitaḥ|
tvatprītaye jagannātha mayā hyadhyayanotsavaḥ|| 46.59 ||
tasmin mohācchāstrahīnaṃ tatkṣamasva dayānidhe|
atha mokṣotsavavidhiṃ śṛṇu kṣīrābdhisaṃbhave|| 46.60 ||
sāyāhnasamaye prāpte daśamyāḥ prārthaddharim|
pralayābdhijale śāyin madhukaiṭabhasevita|| 46.61 ||
prārthitaṃ tūtsavaṃ tābhyāmutsavaṃ kartumārabhe|
anujñāṃ dehi deveśa vaikuṇṭhālayabhūṣaṇa|| 46.62 ||
iti saṃprārthya deveśamanujñāṃ prāpya deśikaḥ|
mṛtsaṃgrahādikaṃ sarvamācarecchāstravartmanā|| 46.63 ||
ekādaśyāmuṣaḥkāle nityapūjāṃ samāpya ca|
mokṣotsavamahaṃ kartuṃ tava daityaniṣūdana|| 46.64 ||
icchāmi karmabimbe'sminnāyāhi jagatīpate|
iti vijñāpya deveśaṃ bimbe karmaṇi deśikaḥ|| 46.65 ||
āvāhyārghyādinābhyarcya bimbe pratisaraṃ nayet|
bhadrapīṭhaṃ samāropya devaṃ stotrapuraḥsaram|| 46.66 ||
uttaraṃ dvāramānāyya kavāṭābhimukhaṃ guruḥ|
devasya śramaśāntyarthamarghyādyaiḥ pūjayed vibhum|| 46.67 ||
stutvā ṛgādibhirdevaṃ kavāṭamapi pūjayet|
dvārād bahiḥ sarvavedaiḥ sarvavādyaiśca ghoṣite|| 46.68 ||
gāthābhiḥ stutibhiścaiva saṃstute jñānibhistadā|
guruḥ kavāṭamuddhāṭya pathā tena hariṃ nayet|| 46.69 ||
tadā paśyanti ye devaṃ tena dvāreṇa yānti(4) ye|
mahāpātakino'pi syurmokṣabhājo bhavanti te|| 46.70 ||
(4.gra. ca|)
tato devaṃ prapāṃ nītvā mahatīṃ siṃhaviṣṭare|
sthāpayitvārghyapādyādyairupacarya yathākramam|| 46.71 ||
ekaikaśo bhaktabimbānānāyya ca hareḥ puraḥ|
gandhamālyaṃ ca tulasīṃ datvā bhaktasya mūrdhani|| 46.72 ||
nikṣipya pādukāṃ caiva bhūmau bhaktānniveśayet|
tairuktābhirgādhikābhistoṣayed bhaktavatsalam|| 46.73 ||
samārāghya tato devaṃ piṣṭadīpaṃ pradarśayet|
nivedayed bhakṣyabhojyaṃ vividhāni phalānyapi|| 46.74 ||
tāmbūlaṃ ca nivedyātha harernīrājanaṃ caret|
antarnītvā hariṃ mūle niyojya prārthaddharim|| 46.75 ||
mokṣotsavo mayā te'dya kriyate bhaktavatsala|
āyāsastava saṃprāptaḥ kṣantumarhasi taṃ hare|| 46.76 ||
iti vijñāpya deveśaṃ śayyāntaṃ pūjayed guruḥ|
dvādaśīdinamārabhya sāyāhne tvitthamācaret|| 46.77 ||
evaṃ kṛtvā navadinaṃ daśame'hani deśikaḥ|
tīrthasthānamathānāyya viṣṇoravabhṛthaṃ caret|| 46.78 ||
prāpayya maṇḍapaṃ devaṃ sthāpayet siṃhaviṣṭare|
pūrvavad bhaktabimbānāṃ maryādādi samācaret|| 46.79 ||
vahnimaṇḍalakumbhebhyaḥ śaktiṃ bimbe niyojya ca|
tato garbhagṛhaṃ nītvā mūle śaktiṃ niyojayet|| 46.80 ||
uttarāyaṇakālaṃ tu niścityāvabhṛthaṃ hareḥ|
mahotsavaṃ yatra devi karoti vidhipūrvakam|| 46.81 ||
mārgaśīrṣaprathamadinādyāvadviṃśati vai dinam|
pūrvoktotsavayugmaṃ ca kṛtvā tu tadanantaram|| 46.82 ||
dhvajārohaṇapūrvaṃ tu kuryāt tatra mahotsavam|

iti śrīśrīpraśnasaṃhitāyāṃ mokṣotsavo nāma (5)pañcacatvāriṃśo'dhyāyaḥ ||
(5.`ṣaṭ‌catvāriṃśo'dhyāya' iti bhāvyam|
      `saptacatvāriṃśo'dhyāya' iti gra. pustake vartate|)