Chapter 44

|| catuścatvāriṃśo'dhyāyaḥ ||

purā mahābalīrnāma madbhakto dānavottamaḥ|
sarvān devān vijityaiva trailokyasyādhipo'bhavat|| 44.1 ||
taṃ vijetumaśaktā vai devā māṃ śaraṇaṃ yayuḥ|
śaraṇāgatarakṣārthamahatvāpyasurādhipam|| 44.2 ||
upāyena jayiṣyāmi hyasuraṃ devakaṇṭakam|
iti niścitya manasā vāmanaṃ rūpamāsthitaḥ|| 44.3 ||
māmuddiśyaiva yajato yajñavāṭamupāgamam|
gatvā tvayāce tapase matpādatrayamānitām|| 44.4 ||
bhuvaṃ tato hyalakṣyeṇa so'pyadānmama vallabhe|
gṛhītvaiva padaikena bhuvamanyena pādataḥ|| 44.5 ||
puṇyamasyāntarikṣaṃ ca bhūyo'prākṣamahaṃ balim|
tṛtīyaṃ padamānaṃ tu kutra dāsyasi suvrata|| 44.6 ||
iti madvacanaṃ śrutvā balirhṛṣṭo vaco'bravīt|
satyaṃ madvacanaṃ kartuṃ mūrdhni me caraṇaṃ kuru|| 44.7 ||
anugrahārthaṃ bhaktasya tathā kṛtvā rasātalam|
nītvā tasmin rājyabhāramasuraṃ kārayāmyaham|| 44.8 ||
evaṃ māṃ prārthayattasmin kāle daityādhipo baliḥ|
upakrāntā mayā tṛptirvahnirūpasya te vibho|| 44.9 ||
mayā prītistu nākāri vighno'bhūdyajñasaṃtateḥ|
tasmādasmin dine bhūmyāmālayeṣu gṛheṣu ca|| 44.10 ||
agniṃ hutvā pradīpāṃstu dīpayeyustadagninā|
tadā prabhṛti kurvanti mayājñaptā janā bhuvi|| 44.11 ||
agnitṛptyutsavaṃ vakṣye śṛṇu sāgarasaṃbhave|
sūryodaye kalāyuktā hyaviddhā pūrṇimā yadi|| 44.12 ||
bharaṇyā ca caturdaśyā kṛttikāpūrṇime yadā|
viddhe syātāṃ tadā viṣṇorutsavaṃ naiva kārayet|| 44.13 ||
saṃkrāntyā coparāgeṇa dvaṣite te yadā bhavet|
nakṣatraṃ ta tithiṃ caiva tyaktā śuddhadine caret|| 44.14 ||
ekā ceduparāgeṇa pūrṇimā dīṣitā yadi|
purastācca pakastācca varjayitvāṣṭanāḍikāḥ|| 44.15 ||
dīpotsavaṃ tadā kuryādagnitṛptyutsavaṃ śubham|
ācāryaḥ prātarutthāya nityapūjāṃ samāpya ca|| 44.16 ||
prāsādāntaramārabhya parivāragaṇāntimam|
purātanāni mṛddīpapātrāṇi paritastyajet|| 44.17 ||
svarṇādīni ca pātrāṇi śodhayeccharkarādibhiḥ|
salilaiḥ śodhayet pūrvaṃ prāsādādyaṃ sumadhyame|| 44.18 ||
sudhācūrṇairalaṃkṛtya vikiredakṣatānapi|
vitānaistoraṇaiścaiva kadalīstabhbhapūgakaiḥ|| 44.19 ||
nālikerairalaṃkuryāt dhvajayaṣṭibhirabjaje|
candanāgarukastūridhūpaiḥ sarvatra dhūpayet|| 44.20 ||
nūtnapradīpapātrāṇi saṃkṣālya ca tataḥ param|
teṣu svarṇādipātreṣu vartīstantuvinirmitāḥ|| 44.21 ||
nūtanairvastrakhaṇ‍ḍaiśca nirmitāsteṣu ca nyaset|
ājyena pūrayettāni tilatailena vā rame|| 44.22 ||
prākārabhittiṣu tathā maṇḍape gopureṣu ca|
gomayaiḥ pīṭhamākalpya dīpapātrāṇi nikṣipet|| 44.23 ||
mūlaberasya purato dhānyapīṭhaṃ prakalpayet|
sauvarṇaṃ rājataṃ tāmraṃ paittalaṃ mṛṇmayaṃ tu vā|| 44.24 ||
caturaśraṃ vartulaṃ vā tanmadhye sthāpayettataḥ|
paritastasya pātrasyāpyaṣṭau saṃsthāpya deśikaḥ|| 44.25 ||
madhyapātre tvāḍhakena goghṛtena supūrayet|
parito'ṣṭasu pātreṣu goghṛtena yathārhataḥ|| 44.26 ||
madhyapātre tūrdhvamukhīṃ vartiṃ madhye nidhāpayet|
anyeṣvapi ca pātreṣu itthameva prakalpayet|| 44.27 ||
sarvāṇyapi ca pātrāṇi prokṣayet puṇyavāriṇā|
tato'parāhne saṃprāpte mūrtipaiḥ saha deśikaḥ|| 44.28 ||
mūlamandiramāsādya prārthayedacyutaṃ param|
puṇyakīrte mahāyogin sādhusevitavigraha|| 44.29 ||
dīpotsavārthaṃ bimbe'smin saṃnidhatsva bhuvaḥ pate|
evaṃ saṃprārthyā cābhyarcya bandhayet kautukaṃ guruḥ|| 44.30 ||
svayaṃ ca kautukaṃ haste dakṣiṇe bandhayet tataḥ|
snāpayedekaberaṃ cenmūlaṃ tu bahuberake|| 44.31 ||
karmārcāṃ navabhiḥ kumbhairabhiṣicya ca pūjayet|
arghyādyaiḥ pāpaṇāntaṃ ca pūjayet puṣkarekṣaṇe|| 44.32 ||
āvāhanapade pātre devamāvāhya deśikaḥ|
nayed devaṃ tathā dīpapātrāṇi paricārakaiḥ|| 44.33 ||
nityāgnikuṇḍamāsādya vahniṃ prajvalayettataḥ|
pātrasthaṃ śrīśamāvāhya vahnau saṃpūjayedrame|| 44.34 ||
apūpān guḍasaṃmiśralājādīn juhuyātpunaḥ|
sāyāhnasamaye prāpte dīpāropaṇamiṣyate|| 44.35 ||
dhyāyet viṣṇormukhāmbhojādutpannaṃ havyavāhanam|
dīpān prajvālya netreṇa nidhāya preṣyamūrdhasu|| 44.36 ||
āvāhitaṃ vāsudevaṃ punaḥ pātre niyojya ca|
vedaghoṣairvādyaghoṣaiḥ kṛtvā dhāma pradakṣiṇam|| 44.37 ||
garbhagehaṃ samāsādya devaṃ mūle niyojayet|
dīpapātrāṇi purato dhānyapīṭhe nidhāya ca|| 44.38 ||
arghyādinā devadevamapūpānupahārakān|
pāyasādīṃstathā lājāṃstāmbūlaṃ ca nivedayet|| 44.39 ||
vahnimantreṇa cāstreṇa dīpānabhyarcya deśikaḥ|
apūpādīni bhakṣyāṇi vinivedya tataḥ svayam|| 44.40 ||
dīpapātraṃ samādāya netramantreṇa vā ṛcā|
uddīpyasveti vai dīpaṃ pradarśya haraye tataḥ|| 44.41 ||
paricārakahasteṣu dīpān dadyāt svayaṃ guruḥ|
te ca dvāreṣu sarveṣu maṇḍapāvaraṇeṣu ca|| 44.42 ||
gopureṣu ca sarveṣu puṣkariṇyāstaṭeṣu ca|
śriyo gṛhe tathodyāne bhaktabimbagṛheṣu ca|| 44.43 ||
vinyastavartidīpeṣu dīpayeyurdvijottamāḥ|
tataḥ śrīpuṣṭisahitaṃ yānamāropya vai harim|| 44.44 ||
vedaghoṣairvādyaghoṣaiḥ pradīpānāṃ śatena ca|
yātropakaraṇaiḥ sārdhaṃ bahirgopuramānayet|| 44.45 ||
gopurasya purobhāge śatatālonnataṃ tu vā|
tadardhaṃ vā tadardhaṃ vā khādiraṃ candanaṃ tu vā|| 44.46 ||
sālaṃ tālaṃ nārikelamaḍajuṃ stambhaṃ samāharet|
caturdhā vibhajet stambhamekāṃśaṃ khātabhūtale|| 44.47 ||
nidhāya dṛḍhavatkṛtvā stambhāgre pīṭhamabjaje|
vṛttaṃ vā caturaśraṃ vā kalpayeddhastavistṛtam|| 44.48 ||
ājyāvasiktavastrairvā tailavastrairnavaiḥ priye|
tālapatrasamūhairvā yadvā vittānusārataḥ|| 44.49 ||
stambhamāveṣṭayeddhīmān prokṣya puṇyāhavāriṇā|
ālayābhimukhaṃ dīpaṃ pīṭhamadhye nyasetpurā|| 44.50 ||
śarāvān samupādāya tasya prāgādiṣu nyaset|
tebhyo vartīḥ samādāya tattaddikṣu ca dīpayet|| 44.51 ||
agneḥ praśamanādarvāgrājarāṣṭravivṛddhaye|
chedayet stambhamūlaṃ tu tato nīrājayet vibhum|| 44.52 ||
tattatkāryaniyuktānāṃ preṣyāṇāṃ toṣayeddhranaiḥ|
dhāma pradakṣiṇīkṛtya devamantaḥ praveśya ca|| 44.53 ||
ghaṭadīpaṃ pradararśyātha mūle śaktiṃ niyojayet|
śarkarairgoghṛtairmiśraṃ navaṃ cāḍhakataṇḍulam|| 44.54 ||
kṣīraiḥ saṃpacya devāya nivedya prārthayet tataḥ|
balinā prārthitaḥ pūrvamutsavastu mayā kṛtaḥ|| 44.55 ||
ajñānāt skhalitaṃ tvasmin tatkṣamasva dayānidhe|
iti vijñāpya deveśaṃ śayanāntaṃ samarcayet|| 44.56 ||


|| iti śrīśrīpraśnasaṃhitāyāṃ agnidīpotsa(vo)nāma (1)tricatvāriṃśo'dhyāyaḥ ||
(1.`catuścatvāriṃśo'dhyāya' iti bhāvyam|
     `pañcacatvāriṃśo'dhyāya' iti gra. pustake vartate|)