Book 1 - Mitra-bheda

vardhamāno mahān snehaḥ siṃha-go-vṛṣayor vane |
piśunenātilubdhena jambukena vināśitaḥ || 1 ||
[Analyze grammar]

nahi tad vidyate kiṃcid yad arthena na siddhyati |
yatnena matimāṃs tasmād artham ekaṃ prasādhayet || 2 ||
[Analyze grammar]

yasyāryas tasya mitrāṇi yasyārthās tasya bāndhavāḥ |
yasyārthāḥ sa pumāṃ loke yasyārthāḥ sa ca paṇḍitaḥ || 3 ||
[Analyze grammar]

na sā vidyā na tad dānaṃ na tac chilpaṃ na sā kalā |
na tat sthairyaṃ hi dhanināṃ yācakair yan na gīyate || 4 ||
[Analyze grammar]

iha loke hi dhanināṃ paro 'pi svajanāyate |
svajano 'pi daridrāṇāṃ sarvadā durjanāyate || 5 ||
[Analyze grammar]

arthebhyo 'pi hi vṛddhebhyaḥ saṃvṛttebhya itas tataḥ |
pravartante kriyāḥ sarvāḥ parvatebhya ivāpagāḥ || 6 ||
[Analyze grammar]

pūjyate yad apūjyo 'pi yad agamyo 'pi gamyate |
vandyate yad avandyo 'pi sa prabhāvo dhanasya ca || 7 ||
[Analyze grammar]

aśanād indriyāṇīva syuḥ kāryāṇy akhilāny api |
etasmāt kāraṇād vittaṃ sarva-sādhanam ucyate || 8 ||
[Analyze grammar]

arthārthī jīva-loko 'yaṃ śmaśānam api sevate |
tyaktvā janayitāraṃ svaṃ niḥsvaṃ yacchati dūrataḥ || 9 ||
[Analyze grammar]

gata-vayasām api puṃsāṃ yeṣām arthā bhavanti te taruṇāḥ |
arthe tu ye hīnā vṛddhās te yauvane'pi syuḥ || 10 ||
[Analyze grammar]

kṛtā bhikṣānekair vitarati nṛpo nocitam aho kṛṣiḥ kliṣṭā vidyā guru-vinaya-vṛttyātiviṣamā |
kusīdād dāridryaṃ parakaragata-granthi-śamanān na manye vāṇijyāt kim api paramaṃ vartanam iha || 11 ||
[Analyze grammar]

upāyānāṃ ca sarveṣām upāyaḥ paṇya-saṃgrahaḥ |
dhanārthaṃ śasyate he ekas tad-anyaḥ saṃśayātmakaḥ || 12 ||
[Analyze grammar]

paṇyānāṃ gāndhikaṃ paṇyaṃ kim anyaiḥ kāñcanādibhiḥ |
yatraikena ca yat krītaṃ tac chatena pradīyate || 13 ||
[Analyze grammar]

nikṣepe patite harmye śreṣṭhī stauti sva-devatām |
nikṣepī mriyate tubhyaṃ pradāsyāmy upayācitam || 14 ||
[Analyze grammar]

goṣṭhika-karma-niyuktaḥ śreṣṭhī cintayati cetasā hṛṣṭaḥ |
vasudhā vasu-sampūrṇā mayādya labdhā kim anyena || 15 ||
[Analyze grammar]

paricitam āgacchantaṃ grāhakam utkaṇṭhyā vilokayāsau |
hṛṣyati tad-dhana-labdho yadvat putreṇa jātena || 16 ||
[Analyze grammar]

pūrṇāpūrṇe māne paricita-jana-vañcanaṃ tathā nityam |
mithyā-krayasya kathanaṃ prakṛtir iyaṃ syāt kirātānām || 17 ||
[Analyze grammar]

dviguṇaṃ triguṇaṃ vittaṃ bhāṇḍa-kraya-vicakṣaṇāḥ |
prāpnuvanty udyamāl lokā dūra-deśāntaraṃ gatāḥ || 18 ||
[Analyze grammar]

na svalpasya kṛte bhūri nāśayen matimān naraḥ |
etad evātra pāṇḍityaṃ yat svalpād bhūri-rakṣaṇam || 19 ||
[Analyze grammar]

arakṣitaṃ tiṣṭhati deva-rakṣitaṃ surakṣitaṃ deva-hataṃ vinaśyati |
jīvaty anātho 'pi vane visarjitaḥ kṛta-prayatno 'pi gṛhe vinaśyati || 20 ||
[Analyze grammar]

avyāpareṣu vyāpāraṃ yo naraḥ kartum icchati |
sa eva nidhanaṃ yāti kīlotpāṭīva vānaraḥ || 21 ||
[Analyze grammar]

suhṛdām upakāraṇād dviṣatām apy apakāraṇāt |
nṛpa-saṃśraya iṣyate budhair jaṭharaṃ ko na bibharti kevalam || 22 ||
[Analyze grammar]

yasmiñ jīvanti jīvanti bahavaḥ so 'tra jīvatu |
vayāṃsi kiṃ na kurvanti cañcvā svodara-pūraṇam || 23 ||
[Analyze grammar]

yaj jīvyate kṣaṇam api prathitaṃ manuṣyair vijñāna-śaurya-vibhavārya-guṇaiḥ sametam |
tan nāma jīvitam iha pravadanti taj-jñāḥ kāko 'pi jīvati cirāya baliṃ ca bhuṅkte || 24 ||
[Analyze grammar]

yo nātmanā na ca pareṇa ca bandhu-varge dīne dayāṃ na kurute na ca martya-varge |
kiṃ tasya jīvita-phalaṃ hi manuṣya-loke kāko 'pi jīvati cirāya baliṃ ca bhuṅkte || 25 ||
[Analyze grammar]

supūrā syāt kunadikā supūro mūṣikāñjaliḥ |
susaṃtuṣṭaḥ kāpuruṣaḥ svalpakenāpi tuṣyati || 26 ||
[Analyze grammar]

kiṃ tena jātu jātena māṭur yauvana-hāriṇā |
ārohati na yaḥ svasya vaṃśasyāgre dhvajo yathā || 27 ||
[Analyze grammar]

parivartini saṃsāre mṛtaḥ ko vā na jāyate |
jātas tu gaṇyate so 'tra yaḥ sphurec ca śriyādhikaḥ || 28 ||
[Analyze grammar]

jātasya nadī-tīre tasyāpi tṛṇasya janma-sāphalyam |
yat salila-majjanākula-jana-hastālambanaṃ bhavati || 29 ||
[Analyze grammar]

stimitonnata-sañcārā jana-santāpa-hāriṇaḥ |
jāyante viralā loke jaladā iva sajjanāḥ || 30 ||
[Analyze grammar]

niratiśayaṃ garimāṇaṃ tena jananyāḥ smaranti vidvāṃsaḥ |
yat kam api vahati garbhaṃ mahatām api yo gurur bhavati || 31 ||
[Analyze grammar]

aprakaṭīkṛta-śaktiḥ śakto 'pi janas tiraskriyāṃ labhate |
nivasann antar-dāruṇi laṅghyo vahnir na tu jvalitaḥ || 32 ||
[Analyze grammar]

apṛṣṭo 'trāpradhāno yo brūte rājñaḥ puraḥ kudhīḥ |
na kevalam asaṃmānaṃ labhate ca viḍambanam || 33 ||
[Analyze grammar]

vacas tatra prayoktavyaṃ yatroktaṃ labhate phalam |
sthāyī bhavati cātyantaṃ rāgaḥ śukla-paṭe yathā || 34 ||
[Analyze grammar]

damaka āha- mā maivaṃ vada |
apradhānaḥ pradhānaḥ syāt sevate yadi pārthivam |
pradhāno 'py apradhānaḥ syād yadi sevā-vivarjitaḥ || 35 ||
[Analyze grammar]

āsannam eva nṛpatir bhajate manuṣyaṃ vidyā-vihīnam akulīnam asaṃskṛtaṃ vā |
prāyeṇa bhūmi-patayaḥ pramadā latāś ca yat pārśvato bhavati tat pariveṣṭayanti || 36 ||
[Analyze grammar]

kopa-prasāda-vastūni ye vicinvanti sevakāḥ |
ārohanti śanaiḥ paścād dhunvantam api pārthivam || 37 ||
[Analyze grammar]

vidyāvatāṃ mahecchānāṃ śilpa-vikrama-śālinām |
sevā-vṛtti-vidāṃ caiva nāśrayaḥ pārthivaṃ vinā || 38 ||
[Analyze grammar]

ye jāty-ādi-mahotsāhān narendrān nopayānti ca |
teṣām āmaraṇaṃ bhikṣā prāyaścittaṃ vinirmitam || 39 ||
[Analyze grammar]

ye ca prāhur durātmāno durārādhyā mahībhujaḥ |
pramādālasya-jāḍyāni khyāpitāni nijāni taiḥ || 40 ||
[Analyze grammar]

sarpān vyāghrān gajān siṃhān dṛṣṭvopāyair vaśīkṛtān |
rājeti kiyatī mātrā dhīmatām apramādinām || 41 ||
[Analyze grammar]

rājānam eva saṃśritya vidvān yāti parāṃ gatim |
vinā malayam anyatra candanaṃ na prarohati || 42 ||
[Analyze grammar]

dhavalāny ātapatrāṇi vājinaś ca manoramāḥ |
sadā mattāś ca mātaṅgāḥ prasanne sati bhūpatau || 43 ||
[Analyze grammar]

udīrito 'rthaḥ paśunāpi gṛhate hayāś ca nāgāś ca vahanti coditāḥ |
anuktam apy ūhati paṇḍito janaḥ pareṅgita-jñāna-phjalā hi buddhayaḥ || 44 ||
[Analyze grammar]

ākārair iṅgitair gatyā ceṣṭayā bhāṣaṇena ca |
netra-vaktra-vikāraiś ca lakṣyate'ntargataṃ manaḥ || 45 ||
[Analyze grammar]

suvarṇa-puṣpitāṃ pṛthvīṃ vicinvanti narās trayaḥ |
śūraś ca kṛta-vidyaś ca yaś ca jānāti sevitum || 46 ||
[Analyze grammar]

sā sevā yā prabhu-hitā grāhyā vākya-viśeṣataḥ |
āśrayet pārthivaṃ vidvāṃs tad-dvāreṇaiva nānyathā || 47 ||
[Analyze grammar]

yo na vetti guṇān yasya na taṃ seveta paṇḍitaḥ |
na hi tasmāt phalaṃ kiñcit sukṛṣṭād ūṣarād iva || 48 ||
[Analyze grammar]

dravya-kṛti-hīno 'pi sevyaḥ sevya-guṇānvitaḥ |
bhavaty ājīvanaṃ tasmāt phalaṃ kālāntarād api || 49 ||
[Analyze grammar]

api sthāṇuvad āsīnaḥ śuṣyan parigataḥ kṣudhā |
na tv ajñānātma-sampannād vṛttim īhate paṇḍitaḥ || 50 ||
[Analyze grammar]

sevakaḥ svāminaṃ dveṣṭi kṛpaṇaṃ paruṣākṣaram |
ātmānaṃ kiṃ sa na dveṣṭi sevyāsevyaṃ na vetti yaḥ || 51 ||
[Analyze grammar]

yasyāśritya viśrāmaṃ kṣudhārtā yānti sevakāḥ |
so 'rkavan nṛpatis tyājyaḥ sadā puṣpa-phalo 'pi san || 52 ||
[Analyze grammar]

rāja-mātari devyāṃ ca kumāre mukhya-mantriṇi |
purohite pratīhāre sadā varteta rājavat || 53 ||
[Analyze grammar]

jīveti prabruvan proktaḥ kṛtyākṛtya-vicakṣaṇaḥ |
karoti nirvikalpaṃ yaḥ sa bhaved rāja-vallabhaḥ || 54 ||
[Analyze grammar]

prabhu-prasādajaṃ vittaṃ suprāptaṃ yo nivedayet |
vastrādyaṃ ca dadhāty aṅge sa bhaved rāja-vallabhaḥ || 55 ||
[Analyze grammar]

antaḥ-pura-caraiḥ sārdhaṃ yo na mantraṃ samācaret |
na kalatrair narendrasya sa bhaved rāja-vallabhaḥ || 56 ||
[Analyze grammar]

dyūtaṃ yo yama-dūtābhaṃ hālāṃ hālāhalopamam |
paśyed dārān vṛthākārān sa bhaved rāja-vallabhaḥ || 57 ||
[Analyze grammar]

yuddha-kāle'graṇīr yaḥ syāt sadā pṛṣṭhānugaḥ pure |
prabhor dvārāśrito harmye sa bhaved rāja-vallabhaḥ || 58 ||
[Analyze grammar]

sammato 'haṃ vibhor nityam iti matvā vyatikramet |
kṛcchreṣv api na maryādāṃ sa bhaved rāja-vallabhaḥ || 59 ||
[Analyze grammar]

dveṣi-dveṣa-paro nityam iṣṭānām iṣṭa-karma-kṛt |
yo naro nara-nāthasya sa bhaved rāja-vallabhaḥ || 60 ||
[Analyze grammar]

proktaḥ pratyuttaraṃ nāha viruddhaṃ prabhunā na yaḥ |
na samīpe hasaty uccaiḥ sa bhaved rāja-vallabhaḥ || 61 ||
[Analyze grammar]

up raṇaṃ śaraṇaṃ tadvan manyate bhaya-varjitaḥ |
pravāsaṃ sva-purāvāsaṃ sa bhaved rāja-vallabhaḥ || 62 ||
[Analyze grammar]

na kuryān naranāthasya yoṣidbhiḥ saha saṃgatim |
na nindāṃ na vivādaṃ ca sa bhaved rāja-vallabhaḥ || 63 ||
[Analyze grammar]

uttarād uttaraṃ vākyaṃ vadatāṃ samprajāyate |
suvṛṣṭi-guṇa-sampannād bījād bījam ivāparam || 64 ||
[Analyze grammar]

apāya-sandarśanajāṃ vipattim upāya-sandarśanajāṃ ca siddhim |
medhāvino nīti-guṇa-prayuktāṃ puraḥ sphurantīm iva varṇayanti || 65 ||
[Analyze grammar]

ekeṣāṃ vāci śukavad anyeṣāṃ hṛdi mūkavat |
hṛdi vāci tathānyeṣāṃ valgu valgantiu sūktayaḥ || 66 ||
[Analyze grammar]

aprāpta-kālaṃ vacanaṃ bṛhaspatir api bruvan |
labhate bahv-avajñānam apamānaṃ ca puṣkalam || 67 ||
[Analyze grammar]

durārādhyā hi rājānaḥ parvatā iva sarvadā |
vyālākīrṇāḥ suviṣamāḥ kaṭhinā duṣṭa-sevitāḥ || 68 ||
[Analyze grammar]

bhoginaḥ kañcukāviṣṭāḥ kuṭilāḥ krūra-ceṣṭitāḥ |
suduṣṭā mantra-sādhyāś ca rājānaḥ pannagā iva || 69 ||
[Analyze grammar]

dvi-jihvāḥ krūra-karmāṇo 'niṣṭhāś chidrānusāriṇaḥ |
dūrato 'pi hi paśyanti rājāno bhujagā iva || 70 ||
[Analyze grammar]

svalpam apy apakurvanti ye'bhīṣṭā hi mahīpateḥ |
te vahnāv iva dahyante pataṅgāḥ pāpa-cetasaḥ || 71 ||
[Analyze grammar]

durārohaṃ padaṃ rājñāṃ sarva-loka-namaskṛtam |
svalpenāpy apakāreṇa brāhmaṇyam iva duṣyati || 72 ||
[Analyze grammar]

durārādhyāḥ śriyo rājñāṃ durāpā duṣparigrahāḥ |
tiṣṭhanty āpa ivādhāre ciram ātmani saṃsthitāḥ || 73 ||
[Analyze grammar]

yasya yasya hi yo bhāvas tena tena samācaret |
anupraviśya medhāvī kṣipram ātma-vaśaṃ nayet || 74 ||
[Analyze grammar]

bhartuś cittānuvartitvaṃ suvṛttaṃ cānujīvinām |
rākṣasāś cāpi gṛhyante nityaṃ chandānuvartibhiḥ || 75 ||
[Analyze grammar]

saruṣi nṛpe stuti-vacanaṃ tad-abhimate prema tad-dviṣi dveṣaḥ |
tad-dānasya ca śaṃsā amantra-tantraṃ vaśīkaraṇam || 76 ||
[Analyze grammar]

dantasya niṣkoṣaṇakena nityaṃ karṇasya kaṇḍūyanakena vāpi |
tṛṇena kāryaṃ bhavatīśvarāṇāṃ kim āṅga vāggha-stavatā nareṇa || 77 ||
[Analyze grammar]

sthāneṣv eva niyoktavyā bhṛtyā ābharaṇāni ca |
na hi cūḍāmaṇiḥ pāde prabhavāmīti badhyate || 78 ||
[Analyze grammar]

anabhijño guṇānāṃ yo na bhṛtyair anugamyate |
dhanāḍhyo 'pi kulīno 'pi kramāYāto 'pi bhūpatiḥ || 79 ||
[Analyze grammar]

asamaiḥ samīyamānaḥ samaiś ca parihīyamāṇa-sat-kāraḥ |
dhuri yo na yujyamānas tribhir artha-patiṃ tyajati bhṛtyaḥ || 80 ||
[Analyze grammar]

kanaka-bhūṣaṇa-saṅgrahaṇocito yadi maṇis trapuṇi pratibadhyate |
na sa virauti na cāpi sa śobhate bhavati yojayitur vacanīyatā || 81 ||
[Analyze grammar]

savya-dakṣiṇayor yatra viśeṣo nāsti hastayoḥ |
kas tatra kṣaṇam apyāryo vidyamāna-gatir bhavet || 82 ||
[Analyze grammar]

kāce maṇir maṇau kāco yeṣāṃ buddhir vikalpate |
na teṣāṃ sannidhau bhṛtyo nāma-mātro 'pi tiṣṭhati || 83 ||
[Analyze grammar]

parīkṣakā yatra na santi deśe nārghanti ratnāni samudrajāni |
ābhīra-deśe kila candrakāntaṃ tribhir varāṭair vipaṇanti gopāḥ || 84 ||
[Analyze grammar]

lohitākhyasya ca maṇeḥ padmarāgasya cāntaram |
yatra nāsti kathaṃ tatra kriyate ratna-vikrayaḥ || 85 ||
[Analyze grammar]

nirviśeṣaṃ yadā svāmī samaṃ bhṛtyeṣu vartate |
tatrodyama-samarthānām utsāhaḥ parihīyate || 86 ||
[Analyze grammar]

na vinā pārthivo bhṛtyair na bhṛtyāḥ pārthivaṃ vinā |
teṣāṃ ca vyavahāro 'yaṃ paraspara-nibandhanaḥ || 87 ||
[Analyze grammar]

bhṛtyair vinā svayaṃ rājā lokānugraha-kāribhiḥ |
mayūkhair iva dīptāṃśus tejasvy api na śobhate || 88 ||
[Analyze grammar]

araiḥ sandhāryate nābhir nābhau cārāḥ pratiṣṭhitāḥ |
svāmi-sevakayor evaṃ vṛtti-cakraṃ pravartate || 89 ||
[Analyze grammar]

śirasā vidhṛtā nityaṃ snehena paripālitāḥ |
keśā api virajyante niḥsnehāḥ kiṃ na sevakāḥ || 90 ||
[Analyze grammar]

rājā tuṣṭo hi bhṛtyānām artha-mātraṃ prayacchati |
te tu saṃmāna-mātreṇa prāṇair apy upakurvate || 91 ||
[Analyze grammar]

evaṃ jñātvā narendreṇa bhṛtyāḥ kāryā vicakṣaṇāḥ |
kulīnāḥ śaurya-saṃyuktāḥ śaktā bhaktāḥ kramāgatāḥ || 92 ||
[Analyze grammar]

yaḥ kṛtvā sukṛtaṃ rājño duṣkaraṃ hitam uttamam |
lajjayā vakti no kiñcit tena rājā sahāyavān || 93 ||
[Analyze grammar]

yasmin kṛtyaṃ samāveśya nirviśaṅkena cetasā |
āsyate sevakaḥ sa syāt kalatram iva cāparam || 94 ||
[Analyze grammar]

yo 'nāhūtaḥ samabhyeti dvāri tiṣṭhati sarvadā |
pṛṣṭhaḥ satyaṃ mitaṃ brūte sa bhṛtyo 'rho mahībhujām || 95 ||
[Analyze grammar]

anādiṣṭo 'pi bhūpasya dṛṣṭvā hānikaraṃ ca yaḥ |
yatate tasya nāśāya sa bhṛtyo 'rho mahībhujām || 96 ||
[Analyze grammar]

tāḍito 'pi durukto 'pi daṇḍito 'pi mahībhujā |
yo na cintayate pāpaṃ sa bhṛtyo 'rho mahībhujām || 97 ||
[Analyze grammar]

na garvaṃ kurute māne nāpamāne ca tapyate |
svākāraṃ rakṣayed yas tu sa bhṛtyo 'rho mahībhujām || 98 ||
[Analyze grammar]

na kṣudhā pīḍyate yas tu nidrayā na kadācana |
na ca śītātapādyaiś ca sa bhṛtyo 'rho mahībhujām || 99 ||
[Analyze grammar]

śrutvā sāṃgrāmikīṃ vārtāṃ bhaviṣyāṃ svāminaṃ prati |
prasannāsyo bhaved yas tu sa bhṛtyo 'rho mahībhujām || 100 ||
[Analyze grammar]

sīmā vṛddhiṃ samāyāti śukla-pakṣa ivoḍurāṭ |
niyoga-saṃsthite yasmin sa bhṛtyo 'rho mahībhujām || 101 ||
[Analyze grammar]

sīmā saṃkocam āyāti vahnau carma ivāhitam |
sthite yasmin sa tu tyājyo bhṛtyo rājyaṃ samīhatā || 102 ||
[Analyze grammar]

kauśeyaṃ kṛmijaṃ suvarṇam upalād durvāpi goromataḥ paṅkāt tāmarasaṃ śaśāṅka udadher indīvaraṃ gomayāt |
kāṣṭhād agnir aheḥ phaṇād api maṇir go-pittato rocanā prākāśyaṃ sva-guṇodayena guṇino gacchanti kiṃ janmanā || 103 ||
[Analyze grammar]

mūṣikā gṛha-jātāpi hantavyā svāpa-kāriṇī |
bhakṣya-pradānair jāro hitakṛt prāpyate janaiḥ || 104 ||
[Analyze grammar]

eraṇḍa-bhiṇḍārka-nalaiḥ prabhūtair api sañcitaiḥ |
dāru-kṛtyaṃ yathā nāsti tathaivājñaiḥ prayojanam || 105 ||
[Analyze grammar]

kiṃ bhaktenāsamarthena kiṃ śakternāpakāriṇā |
bhaktaṃ śaktaṃ ca māṃ rājan nāvajñātuṃ tvam arhasi || 106 ||
[Analyze grammar]

api svalpataraṃ kāryaṃ yad bhavet pṛthivī-pateḥ |
tan na vācyaṃ sabhā-madhye provācedaṃ bṛhaspatiḥ || 107 ||
[Analyze grammar]

ṣaṭ-karṇo bhidyate mantraś catuṣkarṇaḥ sthiro bhavet |
tasmāt sarva-prayatnena ṣaṭkarṇaṃ varjayet sudhīḥ || 108 ||
[Analyze grammar]

dariṣu kiñcit svajaneṣu kiñcid gopyaṃ vayasyeṣu suteṣu kiñcit |
yuktaṃ na vā yuktam idaṃ vicintya vaded vipaścin mahato 'nurodhāt || 100 ||
[Analyze grammar]

svāmini guṇāntarajñe guṇavati bhṛtye'nuvartini kalaye |
suhṛdi nirantara-citte nivedya duḥkhaṃ sukhī bhavati || 101 ||
[Analyze grammar]

ambhasā bhidyate setus tathā mantro 'py arakṣitaḥ |
paiśunyād bhidyate sneho bhidyate vāgbhir āturaḥ || 111 ||
[Analyze grammar]

atyutkaṭe ca raudre ca śatrau prāpte na hīyate |
dhairyaṃ yasya mahīnātho na sa yāti parābhavam || 112 ||
[Analyze grammar]

darśita-bhaye'pi dhātari dhairya-dhvaṃso bhaven na dhīrāṇām |
śoṣita-sarasi nidāghe nitarām evoddhataḥ sindhuḥ || 113 ||
[Analyze grammar]

yasya na vipadi viṣādaḥ sampadi harṣo raṇe na bhīrutvam |
taṃ bhuvana-traya-tilakaṃ janayati jananī sutaṃ viralam || 114 ||
[Analyze grammar]

śakti-vaikalya-namrasya niḥsāratvāl laghīyasaḥ |
jannimo mānahīnasya tṛṇasya ca samā gatiḥ || 115 ||
[Analyze grammar]

anya-pratāpam āsādya yo dṛḍhatvaṃ na gacchati |
jatujābharaṇasyeva rūpeṇāpi hi tasya kim || 116 ||
[Analyze grammar]

pūrvam eva mayā jñātaṃ pūrṇam etad dhi medasā |
anupraviśya vijñātaṃ yāvac carma ca dāru ca || 117 ||
[Analyze grammar]

bhaye vā yadi vā harṣe samprāpte yo vimarśayet |
kṛtyaṃ na kurute vegān na sa santāpam āpnuyāt || 118 ||
[Analyze grammar]

aśvaḥ śastraṃ śāstraṃ vīṇā vāṇī naraś ca nārī ca |
puruṣa-viśeṣaṃ prāptā bhavanty ayogyāś ca yogyāś ca || 119 ||
[Analyze grammar]

svāmy-ādeśāt subhṛtyasya na bhoḥ sañjāyate kvacit |
praviśen mukham āheyaṃ dustaraṃ vā mahārṇavam || 120 ||
[Analyze grammar]

svāmy-ādiṣṭas tu yo bhṛtyaḥ samaṃ viṣamam eva ca |
manyate na sa sandhāryo bhūbhujā bhūtim icchatā || 121 ||
[Analyze grammar]

ye bhavanti mahīpasya sammānita-vimānitāḥ |
yatante tasya nāśāya kulīnā api sarvadā || 122 ||
[Analyze grammar]

na badhyante hy aviśvastā balibhir durbalā api |
viśvastās tv eva badhyante balavanto 'pi durbalaiḥ || 123 ||
[Analyze grammar]

bṛhaspater api prājño na viśvāse vrajen naraḥ |
ya icched ātmano vṛddhim āyuṣyaṃ ca sukhāni ca || 124 ||
[Analyze grammar]

śapathaiḥ sandhitasyāpi na viśvāse vrajed ripoḥ |
rājya-lābhodyato vṛtraḥ śakreṇa śapathair hataḥ || 125 ||
[Analyze grammar]

na viśvāsaṃ vinā śatrur devānām api siddhyati |
viśvāsāt tridaśendreṇa diter garbho vidāritaḥ || 126 ||
[Analyze grammar]

na kaulīnyān na sauhārdān nṛpo vākye pravartate |
mantriṇāṃ vāvad abhyeti vyasanaṃ śokam eva ca || 127 ||
[Analyze grammar]

sadaivāpadgato rājā bhogyo bhavati mantriṇām |
ataeva hi vāñchanti mantriṇaḥ sāpadaṃ nṛpam || 128 ||
[Analyze grammar]

yathā necchati nīrogaḥ kadācit sucikitsakam |
tathāpad rahito rājā sacivaṃ nābhivāñchati || 129 ||
[Analyze grammar]

api svalpam asatyaṃ yaḥ puro vadati bhūbhujām |
devānāṃ ca vinaśyate sa drutaṃ sumahān api || 130 ||
[Analyze grammar]

sarva-deva-mayo rājā manunā samprakīrtitaḥ |
tasmāt taṃ devavat paśyen na vyalīkena karhicit || 131 ||
[Analyze grammar]

sarva-devamayasyāpi viśeṣo nṛpater ayam |
śubhāśubha-phalaṃ sadyo nṛpād devād bhavāntare || 132 ||
[Analyze grammar]

tṛṇāni nonmūlayati prabhañjano mrḍūni nīcaiḥ praṇatāni sarvataḥ |
svabhāva evonnata-cetasām ayaṃ mahān mahatsv eva karoti vikramam || 133 ||
[Analyze grammar]

matta-bhramad-bhramara-pāda-talāhato 'pi |
kopaṃ na gacchati nitānta-balo 'pi nāgas tulye bale tu balavān parikopam eti || 134 ||
[Analyze grammar]

na tac chastrair na nāgendrair na hayair na padātibhiḥ |
kāryaṃ saṃsiddhim abhyeti yathā buddhyā prasādhitam || 135 ||
[Analyze grammar]

paryanto labhyate bhūmeḥ samudrasya girer api |
na kathañcin mahīpasya cittāntaḥ kenacit kvacit || 136 ||
[Analyze grammar]

antaḥ-sārair akuṭilair acchidraiḥ suparīkṣitaiḥ |
mantribhir dhāryate rājyaṃ sustambhair iva mandiram || 137 ||
[Analyze grammar]

mantriṇāṃ bhinna-sandhāne bhiṣajāṃ sānnipātike |
karmaṇi vyajyate prajñā svasthe ko vā na paṇḍitaḥ || 138 ||
[Analyze grammar]

amṛtaṃ śiśire vahnir amṛtaṃ priya-darśanam |
amṛtaṃ rāja-saṃmānam amṛtaṃ kṣīra-bhojanam || 139 ||
[Analyze grammar]

ākheṭakasya dharmeṇa vibhavāḥ syur vaśe nṝṇām |
nṛ-prajāḥ prerayaty eko hanty anyo 'tra mṛgān iva || 140 ||
[Analyze grammar]

yo na pūjayate garvād uttamādhama-madhyamān |
nṛpāsannān sa mānyo 'pi bhraśyate dantilo yathā || 141 ||
[Analyze grammar]

narapati-hita-kartā dveṣyatāṃ yāti loke janapada-hita-kartā tyajyate pārthivendraiḥ |
iti mahati virodhe vartamāne samāne nṛpati-jana-padānāṃ durlabhaḥ kārya-kartā || 142 ||
[Analyze grammar]

yo hy apakartum aśaktaḥ kupyati kim asau naro 'tra nirlajjaḥ |
utpatito 'pi hi caṇakaḥ śaktaḥ kiṃ bhrāṣṭrakaṃ bhaṅktum || 143 ||
[Analyze grammar]

yad vāñchati divā martyo vīkṣate vā karoti vā |
tat svapne'pi tad-abhyāsād brūte vātha karoti vā || 144 ||
[Analyze grammar]

śubhaṃ vā yadi pāpaṃ yan nṝṇāṃ hṛdi saṃsthitam |
sugūḍham api taj jñeyaṃ svapna-vākyāt tathā madāt || 145 ||
[Analyze grammar]

athavā strīṇāṃ viṣaye ko 'tra sandehaḥ |
jalpanti sārdham anyena paśyanty anyaṃ sa-vibhramāḥ |
hṛd-gataṃ cintayanty anyaṃ priyaḥ ko nāma yoṣitām || 146 ||
[Analyze grammar]

ekena smita-pāṭalādhara-ruco jalpanty analpākṣaraṃ vīkṣante'nyam itaḥ sphuṭat-kumudinī-phullollasal-locanāḥ |
dūrodāra-caritra-citra-vibhavaṃ dhyāyanti cānyaṃ dhiyā kenetthaṃ paramārthato 'rthavad iva premāsti vāma-bhruvām || 147 ||
[Analyze grammar]

nāgnis tṛpyati kāṣṭhānāṃ nāpagānāṃ mahodadhiḥ |
nāntakaḥ sarva-bhūtānāṃ na puṃsāṃ vāma-locanā || 148 ||
[Analyze grammar]

raho nāsti kṣaṇo nāsti nāsti prārthayitā naraḥ |
tena nārada nārīṇāṃ satītvam upajāyate || 149 ||
[Analyze grammar]

yo mohān manyate mūḍho rakteyaṃ mama kāminī |
sa tasyā vaśago nityaṃ bhavet krīḍā-śakuntavat || 150 ||
[Analyze grammar]

tāsāṃ vākyāni kṛtyāni svalpāni sugurūṇy api |
karoti saḥ kṛtair loke laghutvaṃ yāti sarvataḥ || 151 ||
[Analyze grammar]

striyaṃ ca yaḥ prārthayate sannikarṣaṃ ca gacchati |
īṣac ca kurute sevāṃ tam evecchanti yoṣitaḥ || 152 ||
[Analyze grammar]

anarthitvān manuṣyāṇāṃ bhayāt parijanasya ca |
maryādāyām amaryādāḥ striyas tiṣṭhanti sarvadā || 153 ||
[Analyze grammar]

nāsāṃ kaścid agamyo 'sti nāsāṃ ca vayasi sthitiḥ |
virūpaṃ rūpavantaṃ vā pumān ity eva bhujyate || 154 ||
[Analyze grammar]

rakto hi jāyate bhogyo nārīṇāṃ śāṭikā yathā |
ghṛṣyante yo daśālambī nitambe viniveśitaḥ || 155 ||
[Analyze grammar]

alaktiko yathā rakto niṣpīḍya puruṣas tathā |
abalābhir balād raktaḥ pāda-mūle nipātyate || 156 ||
[Analyze grammar]

ko 'rthān prāpya na garvito viṣayiṇaḥ kasyāpado 'staṃ gatāḥ strībhiḥ kasya na khaṇḍitaṃ bhuvi manaḥ ko nāmā rājñāṃ priyaḥ |
kaḥ kālasya na gocarāntara-gataḥ ko 'rthī gato gauravaṃ ko vā durjana-vāgurāsu patitaḥ kṣemeṇa yātaḥ pumān || 157 ||
[Analyze grammar]

kāke śaucaṃ dyūta-kāreṣu satyaṃ sarpe kṣāntiḥ strīṣu kāmopaśāntiḥ |
klībe dhairyaṃ madyape tattva-cintā rājā mitraṃ kena dṛṣṭaṃ śrutaṃ vā || 158 ||
[Analyze grammar]

akulīno 'pi mūrkho 'pi bhūpālaṃ yo 'tra sevate |
api saṃmānahīno 'pi sa sarvatra prapūjyate || 159 ||
[Analyze grammar]

api kāpuruṣo bhīruḥ syāc cen nṛpati-sevakaḥ |
tathāpi na parābhūtiṃ janād āpnoti mānavaḥ || 160 ||
[Analyze grammar]

stokenonnatim āyāti stokenāyāty adho-gatim |
aho sasadṛśo ceṣṭā tulāyaṣṭeḥ khalasya ca || 161 ||
[Analyze grammar]

yadṛcchayāpy upanataṃ sakṛt sajjana-saṅgatam |
bhavaty ajaram atyantaṃ nābhyāsa-kramam īkṣate || 162 ||
[Analyze grammar]

phala-hīnaṃ nṛpaṃ bhṛtyāḥ kulīnam api connatam |
santy ajyāny atra gacchanti śuṣkaṃ vṛkṣam ivāṇḍajāḥ || 163 ||
[Analyze grammar]

api saṃmāna-saṃyuktāḥ kulīnā bhakti-tat-parāḥ |
vṛtti-bhaṅgān mahīpālaṃ tyajanty eva hi sevakāḥ || 164 ||
[Analyze grammar]

kālātikramaṇaṃ vṛtteryo na kurvīta bhūpatiḥ |
kadācit taṃ na muñcanti bhartsitā api sevakāḥ || 165 ||
[Analyze grammar]

deśānām upari kṣmābhṛd āturāṇāṃ cikitsakāḥ |
vaṇijo grāhakāṇāṃ ca mūrkhāṇām api paṇḍitāḥ || 166 ||
[Analyze grammar]

pramādināṃ tathā caurā bhikṣukā gṛha-medhinām |
gaṇikāḥ kāmināṃ caiva sarva-lokasya śilpinaḥ || 167 ||
[Analyze grammar]

sāmādi-sajjitaiḥ pāśaiḥ pratīkṣante divā-niśam |
upajīvanti śaktyā hi jalajā jaladān iva || 168 ||
[Analyze grammar]

sarpāṇāṃ ca khalānāṃ ca para-dravyāpahāriṇām |
abhiprāyā na sidhyanti tenedaṃ vartate jagat || 169 ||
[Analyze grammar]

attuṃ vāñchati śāmbhavo gaṇapater ākhuṃ kṣudhārtaḥ phaṇī taṃ ca krauñca-ripoḥ śikhī giri-sutā-siṃho 'pi nāgāśanam |
itthaṃ yatra parigrahasya ghaṭanā śambhor api syād gṛhe tatrāpy asya kathaṃ na bhāvi jagato yasmāt svarūpaṃ hi tat || 170 ||
[Analyze grammar]

aśṛnvann api boddhavyo mantribhiḥ pṛthivī-patiḥ |
yathā sva-doṣa-nāśāya vidureṇāmbikāsutaḥ || 171 ||
[Analyze grammar]

madonmattasya bhūpasya kuñjarasya ca gacchataḥ |
unmārgaṃ vācyatāṃ yānti mahāmātrāḥ samīpagāḥ || 172 ||
[Analyze grammar]

jambūko huḍu-yuddhena vayaṃ cāṣāḍha-bhūtinā |
dūtikā para-kāryeṇa trayo doṣāḥ svayaṃ kṛtāḥ || 173 ||
[Analyze grammar]

arthānām arjane duḥkham arjitānāṃ ca rakṣaṇe |
nāśe duḥkhaṃ vyaye duḥkhaṃ dhig arthāḥ kaṣṭa-saṃśrayāḥ || 174 ||
[Analyze grammar]

nispṛho nādhikārī syān nākāmī maṇḍana-priyaḥ |
nāvidagdhaḥ priyaṃ brūyāt sphuṭa-vaktā na vañcakaḥ || 175 ||
[Analyze grammar]

pūrvaṃ vayasi yaḥ śāntaḥ sa śānta iti me matiḥ |
dhātuṣu kṣīyamāṇeṣu śamaḥ kasya na jāyate || 176 ||
[Analyze grammar]

ādau citte tataḥ kāye satāṃ saṃjāyate jarā |
asatāṃ ca punaḥ kāye naiva citte kadācana || 177 ||
[Analyze grammar]

śūdro vā yadi vānyo 'pi caṇḍālo 'pi jaṭādharaḥ |
dīkṣitaḥ śiva-mantreṇa sa bhasmāṅgī śivo bhavet || 178 ||
[Analyze grammar]

ṣaḍ-akṣareṇa mantreṇa puṣpam ekam api svayam |
liṅgasya mūrdhni yo dadyān na sa bhūyo 'bhijāyate || 179 ||
[Analyze grammar]

durmantrān nṛpatir vinaśyati yatiḥ saṅgāt suto lālasād vipro 'nadhyayanāt kulaṃ kutanayāc chīlaṃ khalopāsanāt |
maitrī cāpraṇayāt samṛddhir anayāt snehaḥ pravāsāśrayāt strī garvād anavekṣaṇād api kṛṣis tyāgāt pramādād dhanam || 180 ||
[Analyze grammar]

samprāpto yo 'tithiḥ sāyaṃ sūryoḍhe gṛha-medhinām |
pūjayā tasya devatvaṃ prayānti gṛha-medhinaḥ || 181 ||
[Analyze grammar]

tṛṇāni bhūmir udakaṃ vāk-caturthī ca sūnṛtā |
satām etāni harmyeṣu nocchidyante kadācana || 182 ||
[Analyze grammar]

svāgatenāgnayas tṛptā āsanena śatakratuḥ |
pāda-śaucena pitaraḥ arghāc chambhus tathātitheḥ || 183 ||
[Analyze grammar]

durdivase ghana-timire duḥsañcārāsu nagara-vīthīṣu |
patyur videśa-gamane parama-sukhaṃ jaghana-capalāyāḥ || 184 ||
[Analyze grammar]

paryaṅkeṣv āstaraṇaṃ patim anukūlaṃ manoharaṃ śayanam |
tṛṇam iva laghu manyante kāminyaś caurya-rata-lubdhāḥ || 185 ||
[Analyze grammar]

keliṃ pradahati lajjā śṛṅgāro 'sthīni cāṭavaḥ kaṭavaḥ |
vandha-trayāḥ paritoṣo na kiṃcid iṣṭaṃ bhavet patyau || 186 ||
[Analyze grammar]

kula-patanaṃ jana-garhāṃ bandhanam api jīvitavya-sandeham |
aṅgīkaroti kulaṭā satataṃ para-puruṣa-saṃsaktā || 187 ||
[Analyze grammar]

vaikalyaṃ dharaṇī-pātam ayathocita-jalpanam |
saṃnipātasya cihnāni madyaṃ sarvāṇi darśayet || 188 ||
[Analyze grammar]

kara-spando 'mbara-tyāgas tejo-hāniḥ sarāgatā |
vāruṇī-saṅgajāvasthā bhānunāpy anubhūyate || 189 ||
[Analyze grammar]

viṣama-stha-svādu-phala-grahaṇa-vyavasāya-niścayo yeṣām |
uṣṭrāṇām iva teṣāṃ manye'haṃ śaṃsitaṃ janma || 190 ||
[Analyze grammar]

sandigdhe para-loke janāpavāde ca jagati bahu-citre |
svādhīne para-ramaṇe dhanyās tāruṇya-phala-bhājaḥ || 191 ||
[Analyze grammar]

yadi bhavati deva-yogāt pumān virūpo 'pi bandhako rahasi |
na tu kṛcchrād api bhadraṃ nija-kāntaṃ sā bhajaty eva || 192 ||
[Analyze grammar]

āditya-candra-hari-śaṃkara-vāsavādyāḥ śaktā na jetum atiduḥkha-karāṇi yāni |
tānīndriyāṇi balavanti sudurjayāni ye nirjayanti bhuvane balinas ta eke || 193 ||
[Analyze grammar]

śambarasya ca yā māyā yā māyā namucer api |
baleḥ kumbhīnasaś caiva sarvās tā yoṣito viduḥ || 194 ||
[Analyze grammar]

hasantaṃ prahasanty etā rudantaṃ prarudanty api |
apriyaṃ priya-vākyaiś ca gṛhṇanti kāla-yogataḥ || 195 ||
[Analyze grammar]

uśanā veda yac chāstraṃ yac ca veda bṛhaspatiḥ |
strī-buddhyā na viśiṣyete tāḥ sma rakṣyāḥ kathaṃ naraiḥ || 196 ||
[Analyze grammar]

anṛtaṃ satyam ity āhuḥ satyaṃ cāpi tathānṛtam |
iti yās tāḥ kathaṃ vīra saṃrakṣyāḥ puruṣair iha || 197 ||
[Analyze grammar]

nātiprasaṅgaḥ pramadāsu kāryo necched balaṃ strīṣu vivardhamānam |
atiprasaktaiḥ puruṣair yatas tāḥ krīḍanti kākair iva lūna-pakṣaiḥ || 198 ||
[Analyze grammar]

sumukhena vadanti vagunā praharanty eva śitena cetasā |
madhu tiṣṭhati vāci yoṣitāṃ hṛdaye hālāhalaṃ mahad-viṣam || 199 ||
[Analyze grammar]

ata eva nipīyate'dharo hṛdayaṃ muṣṭibhir eva tāḍyate |
puruṣaiḥ sukha-leśa-vañcitair madhu-lubdhaiḥ kamalaṃ yathālibhiḥ || 200 ||
[Analyze grammar]

āvartaḥ saṃśayānām avinaya-bhavanaṃ pattanaṃ sāhasānāṃ doṣāṇāṃ saṃnidhānaṃ kapaṭa-śata-mayaṃ kṣetram apratyayānām |
svarga-dvārasya vighnaṃ naraka-pura-mukhaṃ sarva-māyā-karaṇḍaṃ strī-yantraṃ kena sṛṣṭaṃ viṣam amṛta-mayaṃ prāṇi-lokasya pāśaḥ || 201 ||
[Analyze grammar]

kārkaśyaṃ stanayor dṛśos taralatālīkaṃ mukhe ślāghyate kauṭilyaṃ kaca-saṃcaye ca vacane māndyaṃ trike sthūlatā |
bhīrutvaṃ hṛdaye sadaiva kathitaṃ māyā-prayogaḥ priye yāsāṃ doṣa-gaṇo guṇo mṛga-dṛśāṃ tāḥ syur narāṇāṃ priyāḥ || 202 ||
[Analyze grammar]

etā hasanti ca rudanti ca kārya-hetor viśvāsayanti ca paraṃ na ca viśvasanti |
tasmān nareṇa kula-śīla-samanvitena nāryaḥ śmaśāna-ghaṭikā iva varjanīyāḥ || 203 ||
[Analyze grammar]

tasmān nareṇa kulaśīlavatā sadaiva nāryaḥ śmaśāna-vaṭikā iva varjanīyāḥ |
vyakīrṇa-kesara-karāla-mukhā mṛgendrā nāgāś ca bhūri-mada-rāja-virājamānāḥ || 204 ||
[Analyze grammar]

kurvanti tāvat prathamaṃ priyāṇi yāvan na jānanti naraṃ prasaktam |
jñātvā ca taṃ manmatha-pāśa-baddhaṃ grastāmiṣaṃ mīnam ivoddharanti || 205 ||
[Analyze grammar]

samudra-vīcīva cala-svabhāvāḥ sandhyābhra-rekheva muhūrta-rāgāḥ |
striyaḥ kṛtārthāḥ puruṣaṃ nirarthaṃ niṣpīḍotālaktakavat tyajanti || 206 ||
[Analyze grammar]

anṛtaṃ sāhasaṃ māyā mūrkhatvam atilubdhatā |
aśaucaṃ nirdayatvaṃ ca strīṇāṃ doṣāḥ svabhāvajāḥ || 207 ||
[Analyze grammar]

sammohayantimadayanti viḍambayanti nirbharstayanti ramayanti viṣādayanti |
etāḥ praviśya saralaṃ hṛdayaṃ narāṇāṃ kiṃ vā na vāma-nayanā na samācaranti || 208 ||
[Analyze grammar]

antar-viṣa-mayā hy etā bahiś caiva manoramāḥ |
guñjā-phala-samākārā yoṣitaḥ kena nirmitāḥ || 209 ||
[Analyze grammar]

bhinna-svara-mukha-varṇaḥ śaṅkita-dṛṣṭiḥ samutpatita-tejāḥ |
bhavati hi pāpaṃ kṛtvā sva-karma-santrāsitaḥ puruṣaḥ || 210 ||
[Analyze grammar]

āyāti skhalitaiḥ pādair mukha-vaivarṇya-saṃyutaḥ |
lalāṭa-sveda-bhāg bhūri-gadgadaṃ bhāṣate vacaḥ || 211 ||
[Analyze grammar]

adho-dṛṣṭir vadet kṛtvā pāpaṃ prāptaḥ sabhāṃ naraḥ |
tasmād yatnāt parijñeyāś cihnair etair vicakṣaṇaiḥ || 212 ||
[Analyze grammar]

prasanna-vadano dṛṣṭaḥ spaṣṭa-vākyaḥ saroṣa-dṛk |
sabhāyāṃ vakti sāmarṣaṃ sāvaṣṭambho naraḥ śuciḥ || 213 ||
[Analyze grammar]

avadhyā brāhmaṇā gāvo striyo bālāś ca jñātayaḥ |
yeṣāṃ cānnāni bhuñjīta ye ca syuḥ śaraṇāgatāḥ || 214 ||
[Analyze grammar]

ekaṃ hanyān na vā hanyād iṣuḥ kṣipto dhanuṣmatā |
prājñena tu matiḥ kṣiptā hanyād garbha-gatān api || 215 ||
[Analyze grammar]

tyājyaṃ na dhairyaṃ vidhure'pi daive dhairyāt kadācit sthitm āpnuyāt saḥ |
yāte samudre'pi hi pota-bhaṅge sāṃyātriko vāñchati karma eva || 216 ||
[Analyze grammar]

udyoginaṃ satatam atra sameti lakṣmīr daivaṃ hi daivam iti kāpuruṣā vadanti |
daivaṃ nihatya kuru pauruṣam ātma-śaktyā yatne kṛte yadi na sidhyati ko 'tra doṣaḥ || 217 ||
[Analyze grammar]

suprayuktasya dambhasya brahmāpy antaṃ na gacchati |
kauliko viṣṇu-rūpeṇa rāja-kanyāṃ niṣevate || 218 ||
[Analyze grammar]

auṣadhārtha-sumantrāṇāṃ buddheś caiva mahātmanām |
asādhyaṃ nāsti loke'tra yad brahmāṇḍasya madhyagam || 219 ||
[Analyze grammar]

mattebha-kumbha-pariṇāhini kuṅkumārdre tasyāḥ payodhara-yuge rati-kheda-khinnaḥ |
vakṣo nidhāya bhuja-pañjara-madhya-vartī svapsye kadā kṣaṇam avāpya tadīya-saṅgam || 220 ||
[Analyze grammar]

rāgī bimbādharo 'sau stana-kalaśa-yugaṃ yauvanārūḍha-garvaṃ nīcā nābhiḥ prakṛtyā kuṭilakam alakaṃ svalpakaṃ cāpi madhyam |
kurvatv etāni nāma prasabham iha manaś cintitāny āśu khedaṃ yan māṃ tasyāḥ kapolau dahata iti muhuḥ svacchakau tan na yuktam || 221 ||
[Analyze grammar]

putrīti jātā mahatīha cintā kasmai pradeyeti mahān vitarkaḥ |
dattvā sukhaṃ prāpsyati vā na veti kanyā-pitṛtvaṃ khalu nāma kaṣṭam || 222 ||
[Analyze grammar]

nadyaś ca nāryaś ca sadṛk-prabhāvās tulyāni kūlāni kulāni tāsām |
toyaiś ca doṣaiś ca nipātayanti nadyo hi kūlāni kulāni nāryaḥ || 223 ||
[Analyze grammar]

jananī-mano harati jātavatī parivardhate saha śucā suhṛdām |
para-sātkṛtāpi kurute malinaṃ durita-kramā duhitaro vipadaḥ || 224 ||
[Analyze grammar]

nirviṣeṇāpi sarpeṇa kartavyā mahatī phaṇā |
viṣaṃ bhavatu vā mābhūt phaṇāṭopo bhayaṅkaraḥ || 225 ||
[Analyze grammar]

gavām arthe brāhmaṇārthe svāmy-arthe svīkṛte'thavā |
sthānārthe yas tyajet prāṇāṃs tasya lokāḥ sanātanāḥ || 226 ||
[Analyze grammar]

candre maṇḍala-saṃsthe vigṛhyate rāhuṇā dinādhīśaḥ |
śaraṇāgatena sārdhaṃ vipad api tejasvinā ślāghyā || 227 ||
[Analyze grammar]

upāyena hi yac chakyaṃ na tac chakyaṃ parākramaiḥ |
kākī kanaka-sūtreṇa kṛṣṇa-sarpam aghātayat || 228 ||
[Analyze grammar]

yasya kṣetraṃ nadī-tīre bhāryā ca para-saṅgatā |
sa-sarpe ca gṛhe vāsaḥ kathaṃ syāt tasya nirvṛtiḥ || 229 ||
[Analyze grammar]

sarpa-yukte gṛhe vāso mṛtyur eva na saṃśayaḥ |
yad grāmānte vaset sarpas tasya syāt prāṇa-saṃśayaḥ || 230 ||
[Analyze grammar]

nūnaṃ sa lubdho nopāyam antareṇa vadhyaḥ syāt |
upāyena jayo yādṛg ripos tādṛṅ na hetibhiḥ |
upāya-jño 'lpa-kāyo 'pi na śūraiḥ paribhūyate || 231 ||
[Analyze grammar]

bhakṣayitvā bahūn matsyān uttamādhama-madhyamān |
atilaulyād bakaḥ kaścin mṛtaḥ karkaṭaka-grahāt || 232 ||
[Analyze grammar]

yadi bhinte sūrya-suto rohiṇyāḥ śakaṭam iha loke |
dvādaśa varṣāṇi tadā nahi varṣati vāsavau bhūmau || 233 ||
[Analyze grammar]

prājāpatye śakaṭe bhinne kṛtvaiva pātakaṃ vasudhā |
bhasmāsthi-śakalākīrṇā kāpālikam iva vrataṃ dhatte || 234 ||
[Analyze grammar]

rohiṇī-śakaṭam arka-nandanaś ced bhinnatti rudhiro 'thavā śaśī |
kiṃ vadāmi tad-aniṣṭa-sāgare sarva-lokam upayāti saṅkṣayaḥ || 235 ||
[Analyze grammar]

rohiṇī-śakaṭa-madhya-saṃsthite candram asya śaraṇī-kṛtā janāḥ |
kvāpi yānti śiśupācitāśanāḥ sūrya-tapta-bhidurāmbu-pāyinaḥ || 236 ||
[Analyze grammar]

yasya buddhir balaṃ tasya nirbuddhes tu kuto balam |
vane siṃho madonmattaḥ śaśakena nipātitaḥ || 237 ||
[Analyze grammar]

śanaiḥ śanaiś ca yo rājyam upabhuṅkte yathā-balam |
rasāyanam iva prājñaḥ sa puṣṭiṃ paramāṃ vrajet || 238 ||
[Analyze grammar]

vidhinā mantra-yuktena rūkṣāpi mathitāpi ca |
prayacchati phalaṃ bhūmir araṇīva hutāśanam || 239 ||
[Analyze grammar]

prajānāṃ pālanaṃ śasyaṃ svarga-kośasya vardhanam |
pīḍanaṃ dharma-nāśāya pāpāyāyaśase sthitam || 240 ||
[Analyze grammar]

gopālena prajādhenor vitta-dugdhaṃ śanaiḥ śanaiḥ |
pālanāt poṣaṇād grāhyaṃ nyāyyāṃ vṛttiṃ samācaret || 241 ||
[Analyze grammar]

ajām iva prajāṃ mohād yo hanyāt pṛthivī-patim |
tasyaikā jāyate tṛptir na dvitīyā kathañcana || 242 ||
[Analyze grammar]

phalārthī nṛpatir lokān pālayed yatnam āsthitaḥ |
dāna-mānādi-toyena mālākāro 'ṅkurān iva || 243 ||
[Analyze grammar]

nṛpa-dīpo dhana-snehaṃ prajābhyaḥ saṃharann api |
āntara-sthair guṇaiḥ śubhrair lakṣyate naiva kenacit || 244 ||
[Analyze grammar]

yathā gaur duhyate kāle pālyate ca tathā prajāḥ |
sicyate cīyate caiva latā puṣpa-phala-pradā || 245 ||
[Analyze grammar]

yathā bījāṅkuraḥ sūkṣmaḥ prayatnenābhirakṣitaḥ |
phala-prado bhavet kāle tadval lokaḥ surakṣitaḥ || 246 ||
[Analyze grammar]

hiraṇya-dhānya-ratnāni yānāni vividhāni ca |
tathānyad api yat kiñcit prajābhyaḥ syān mahīpateḥ || 247 ||
[Analyze grammar]

lokānugraha-kartāraḥ pravardhante nareśvarāḥ |
lokānāṃ saṅkṣayāc caiva kṣayaṃ yānti na saṃśayaḥ || 248 ||
[Analyze grammar]

bhūmir mitraṃ hiraṇyaṃ ca vigrahasya phala-trayam |
nāsty ekam api yady eṣāṃ na taṃ kuryāt kathañcana || 249 ||
[Analyze grammar]

yatra na syāt phalaṃ bhūri yatra casyāt parābhavaḥ |
na tatra matimān yuddhaṃ samutpādya samācaret || 250 ||
[Analyze grammar]

priyaṃ vā yadi vā dveṣyaṃ śubhaṃ vā yadi vāśubham |
apṛṣṭo 'pi hitaṃ vakṣyed yasya necchet parābhavam || 262 ||
[Analyze grammar]

ekaṃ bhūmi-patiḥ karoti sacivaṃ rājye pramāṇaṃ yadā taṃ mohāc chrayate madaḥ sa ca madād dāsyena nirvidyate |
nirviṇṇasya padaṃ karoti hṛdaye tasya svatantra-spṛhā- svātantrya-spṛhayā tataḥ sa nṛpateḥ prāṇān abhidruhyati || 263 ||
[Analyze grammar]

na so 'sti puruṣo rājñāṃ yo na kāmayate śriyam |
aśaktā eva sarvatra narendraṃ paryupāsate || 264 ||
[Analyze grammar]

aneka-doṣa-duṣṭasya kāyaḥ kasya na vallabhaḥ |
kurvann api vyalīkāni yaḥ priyaḥ priya eva saḥ || 265 ||
[Analyze grammar]

yasminn evādhikaṃ cakṣur āropayati pārthivaḥ |
akulīnaḥ kulīno vā sa śriyā bhājanaṃ naraḥ || 266 ||
[Analyze grammar]

ukto bhavati yaḥ pūrvaṃ guṇavān iti saṃsadi |
tasya doṣo na vaktavyaḥ pratijñā-bhaṅga-bhīruṇā || 267 ||
[Analyze grammar]

itaḥ sa daityaḥ prāpta-śrīr neta evārhati kṣayam |
viṣa-vṛkṣo 'pi saṃvardhya svayaṃ chettum asāmpratam || 268 ||
[Analyze grammar]

ādau na vā praṇayināṃ praṇayo vidheyo datto 'thavā pratidinaṃ paripoṣaṇīyaḥ |
utkṣipya yat kṣipati tat prakaroti lajjāṃ bhūmau sthitasya patanād bhayam eva nāsti || 269 ||
[Analyze grammar]

upakāriṣu yaḥ sādhuḥ sādhutve tasya ko guṇaḥ |
apakāriṣu yaḥ sādhuḥ sa sādhuḥ sadbhir ucyate || 270 ||
[Analyze grammar]

tulyārthaṃ tulya-sāmarthyaṃ marmajñaṃ vyavasāyinam |
ardha-rājya-haraṃ bhṛtyaṃ yo na hanyāt sa hanyate || 271 ||
[Analyze grammar]

yādṛśaiḥ sevyate bhṛtyair yādṛśāṃś copasevate |
kadācin nātra sandehas tādṛg bhavati pūruṣaḥ || 272 ||
[Analyze grammar]

santaptāyasi saṃsthitasya payaso nāmāpi na jñāyate mukta-kāratayā tad eva nalinī-patra-sthitaṃ rājate |
svātau sāgara-śukti-kukṣi-patitaṃ taj jāyate mauktikaṃ prāyeṇādhama-madhyamottama-guṇaḥ saṃvāsato jāyate || 273 ||
[Analyze grammar]

asatāṃ saṅga-doṣeṇa satī yāti matir bhramam |
eka-rātri-pravāsena kāṣṭhaṃ muñje pralambitam || 274 ||
[Analyze grammar]

na hy avijñāta-śīlasya pradātavyaḥ pratiśrayaḥ |
mat-kuṇasya ca doṣeṇa hatā manda-visarpiṇī || 275 ||
[Analyze grammar]

ehy āgaccha samāviśāsanam idaṃ kasmāc cirād dṛśyase kā vārteti sudurbalo 'si kuśalaṃ prīto 'smi te darśanāt |
evaṃ ye samupāgatān praṇayinaḥ pratyālapanty ādarāt teṣāṃ yuktam aśaṅkitena manasā harmyāṇi gantuṃ sadā || 276 ||
[Analyze grammar]

tyaktāś cābhyantarā yena bāhyāś cābhyantarīkṛtāḥ |
sa eva mṛtyum āpnoti yathā rājā kakud-drumaḥ || 282 ||
[Analyze grammar]

na yasya ceṣṭitaṃ vidyān na kulaṃ na parākramam |
na tasya viśvaset prājño yadīcchec chriyam ātmanaḥ || 284 ||
[Analyze grammar]

te dhanyās te viveka-jñās te sabhyā iha bhūtale |
āgacchanti gṛhe yeṣāṃ kāryārthaṃ suhṛdo janāḥ || 285 ||
[Analyze grammar]

sampattayaḥ parāyattāḥ sadā cittam anirvṛtam |
sva-jīvite'py aviśvāsas teṣāṃ ye rāja-sevakāḥ || 286 ||
[Analyze grammar]

sevayā dhanam icchadbhiḥ sevakaiḥ paśya yat kṛtam |
svātantryaṃ yac charīrasya mūḍhais tad api hāritam || 287 ||
[Analyze grammar]

tāvaj janmāti-duḥkhāya tato durgatatā sadā |
tatrāpi sevayā vṛttir aho duḥkha-paramparā || 288 ||
[Analyze grammar]

jīvanto 'pi mṛtāḥ pañca śrūyante kila bhārate |
daridro vyādhito mūrkhaḥ pravāsī nitya-sevakaḥ || 289 ||
[Analyze grammar]

nāśnāti svacchayotsukyād vinidro na prabudhyate |
na niḥśaṅkaṃ vaco brūte sevako 'py atra jīvati || 290 ||
[Analyze grammar]

sevā śva-vṛttir ākhyātā yais tair mithyā prajalpitam |
svacchandaṃ carati svātra sevakaḥ para-śāsanāt || 291 ||
[Analyze grammar]

bhū-śayyā brahmacaryaṃ ca kṛśatvaṃ laghu-bhojanam |
sevakasya yater yadvad viśeṣaḥ pāpa-dharmajaḥ || 292 ||
[Analyze grammar]

śītātapādi-kaṣṭāni sahate yāni sevakaḥ |
dhanāya tāni cālpāni yadi dharmān na mucyate || 293 ||
[Analyze grammar]

mṛdunāpi suvṛttena suśliṣṭenāpi hāriṇā |
modakenāpi kiṃ tena niṣpattir yasya sevayā || 294 ||
[Analyze grammar]

yo mantraṃ svāmino bhidyāt sācivye san-niyojitaḥ |
sa hatvā nṛpa-kāryaṃ tat svayaṃ ca narakaṃ vrajet || 295 ||
[Analyze grammar]

yena yasya kṛto bhedaḥ sacivena mahīpateḥ |
tenāśastra-vadhas tasya kṛta ity āha nāradaḥ || 296 ||
[Analyze grammar]

viśrambhād yasya yo mṛtyum avāpnoti kathañcana |
tasya hatyā tad-utthā sā prāhedaṃ vacanaṃ manuḥ || 297 ||
[Analyze grammar]

api brahma-vadhaṃ kṛtvā prāyaścittena śudhyati |
tad-arthena vicīrṇena na kathañcit suhṛd-druhaḥ || 298 ||
[Analyze grammar]

dattvāpi kanyakāṃ vairī nihantavyo vipaścitā |
anyopāyair aśakyo yo hate doṣo na vidyate || 299 ||
[Analyze grammar]

kṛtyākṛtyaṃ na manyeta kṣatriyo yudhi saṅgataḥ |
prasupto droṇa-putreṇa dhṛṣṭadyumnaḥ purā hataḥ || 300 ||
[Analyze grammar]

durjana-gamyā nāryaḥ prāyeṇāsnehavān bhavati rājā |
kṛpaṇānusāri ca dhanaṃ megho giri-durga-varṣī ca || 301 ||
[Analyze grammar]

ahaṃ hi saṃmato rājño ya evaṃ manyate kudhīḥ |
balīvardaḥ sa vijñeyo viṣāṇa-parivarjitaḥ || 302 ||
[Analyze grammar]

varaṃ vanaṃ varaṃ bhaikṣaṃ varaṃ bhāropajīvanam |
varaṃ vyādhir manuṣyāṇāṃ nādhikāreṇa sampadaḥ || 303 ||
[Analyze grammar]

yayor eva samaṃ vittaṃ yayor eva samaṃ kulam |
tayor maitrī vivāhaś ca na tu puṣṭa-vipuṣṭayoḥ || 304 ||
[Analyze grammar]

mṛgā mṛgaiḥ saṅgam anuvrajanti gāvaś ca gobhis turagās turagaiḥ |
mūrkhāś ca mūrkhaiḥ sudhiyaḥ sudhībhiḥ samāna-śīla-vyasanena sakhyam || 305 ||
[Analyze grammar]

nimittam uddiśya hi yaḥ prakupyati dhruvaṃ sa tasyāpagame praśāmyati |
akāraṇa-dveṣa-paro hi yo bhavet kathaṃ naras taṃ paritoṣayati || 306 ||
[Analyze grammar]

bhaktānām upakāriṇāṃ para-hita-vyāpāra-yuktātmanāṃ sevā-saṃvyavahāra-tattva-viduṣāṃ droha-cyutānām api |
vyāpattiḥ skhalitāntareṣu niyatā siddhir bhaved vā na vā tasmād ambupater ivāvani-pateḥ sevā sadā śaṅkinī || 307 ||
[Analyze grammar]

bhāva-snigdhair upakṛtam api dveṣyatāṃ yāti loke sākṣād anyair apakṛtam api prītaye copayāti |
durgrāhyatvān nṛpati-manasāṃ naika-bhāvāśrayāṇāṃ sevā-dharmaḥ parama-gahano yoginām apy agamyaḥ || 308 ||
[Analyze grammar]

prabhoḥ prasādam anyasya na sahantīha sevakāḥ |
sapatnya iva saṅkruddhāḥ sapatnyāḥ sukṛtair api || 309 ||
[Analyze grammar]

guṇavattara-pātreṇa chādyante guṇināṃ guṇāḥ |
rātrau dīpa-śikhā-kāntir na bhānāv udite sati || 310 ||
[Analyze grammar]

bahavaḥ paṇḍitāḥ kṣudrāḥ sarve māyopajīvinaḥ |
kuryuḥ kṛtyam akṛtyaṃ vā uṣṭre kākādayo yathā || 311 ||
[Analyze grammar]

āpadaṃ prāpnuyāt svāmī yasya bhṛtyasya paśyataḥ |
prāṇeṣu vidyamāneṣu sa bhṛtyo narakaṃ vrajet || 315 ||
[Analyze grammar]

kāka-māṃsaṃ tathocchiṣṭaṃ stokaṃ tad api durbalam |
bhakṣitenāpi kiṃ tena yena tṛptir na jāyate || 317 ||
[Analyze grammar]

aśuddha-prakṛtau rājñi janatā nānurajyate |
yathā gṛdhra-samāsannaḥ kalahaṃsaḥ samācaret || 324 ||
[Analyze grammar]

gṛdhrākāro 'pi sevyaḥ syād dhaṃsākāraiḥ sabhāsadaiḥ |
haṃsākāro 'pi santyājyo gṛdhrākāraiḥ sa tair nṛpaḥ || 325 ||
[Analyze grammar]

mṛdunā salilena khanyamā nānyavad dhṛṣyanti girer api sthalāni |
upajāpavidāṃ ca karṇa-jāpaiḥ kim u cetāṃsi mṛdūni mānavānām || 326 ||
[Analyze grammar]

karṇa-viṣeṇa ca bhagnaḥ kiṃ kiṃ na karoti bāliśo lokaḥ |
kṣapaṇakatām api dhatte pibati surāṃ naraka-pālena || 327 ||
[Analyze grammar]

pādāhato 'pi dṛḍha-daṇḍa-samāhato 'pi yaṃ daṃṣṭrayā spṛśati taṃ kila hanti sarpaḥ |
ko 'py eṣa eva piśunogra-manuṣya-dharmaḥ karṇe paraṃ spṛśati hanti paraṃ samūlam || 328 ||
[Analyze grammar]

aho khala-bhujaṅgasya viparīto vadha-kramaḥ |
karṇe lagati cānyasya prāṇair anyo viyujyate || 329 ||
[Analyze grammar]

guror apy avaliptasya kāryākāryam ajānataḥ |
utpatha-pratipannasya parityāgo vidhīyate || 330 ||
[Analyze grammar]

mahatāṃ yo 'parādhyena dūrastho 'smīti nāśvaset |
dīrghau buddhimato bāhū tābhyāṃ hiṃsati hiṃsakam || 331 ||
[Analyze grammar]

na tān hi tīrthais tapasā ca lokān svargaiṣiṇo dāna-śataiḥ suvṛttaiḥ |
kṣaṇena yān yānti raṇeṣu dhīrāḥ prāṇān samujjhanti hi ye suśīlāḥ || 332 ||
[Analyze grammar]

mṛtaiḥ samprāpyate svargo jīvadbhiḥ kīrtir uttamā |
tad ubhāv api śūrāṇāṃ guṇāv etau sudurlabhau || 333 ||
[Analyze grammar]

lalāṭa-deśe rudhiraṃ sravat tu śūrasya yasya praviśec ca vaktre |
tat somapānena samaṃ bhavec ca saṅgrāma-yajñe vidhivat pradiṣṭam || 334 ||
[Analyze grammar]

homārthair vidhivat pradāna-vidhinā sad-vipra-vṛndārcanair yajñair bhūri-sudakṣiṇaiḥ suvihitaiḥ samprāpyate yat phalam |
sat-tīrthāśrama-vāsa-homa-niyamaiś cāndrāyaṇādyaiḥ kṛtaiḥ pumbhis tat-phalam āhave vinihitaiḥ samprāpyate tat-kṣaṇāt || 335 ||
[Analyze grammar]

balavantaṃ ripuṃ dṛṣṭvā kilātmānaṃ pragopayet |
balavadbhiś ca kartavyā śarac-candra-prakāśatā || 336 ||
[Analyze grammar]

śatror vikramam ajñātvā vairam ārabhate hi yaḥ |
sa parābhavam āpnoti samudraṣ ṭiṭṭibhād yathā || 337 ||
[Analyze grammar]

baddhvāmbara-cara-mārgaṃ vyapagata-dhūmaṃ sadā mahad bhayadam |
manda-matiḥ kaḥ praviśati hutāśanaṃ svecchayā manujaḥ || 338 ||
[Analyze grammar]

mattebha-kumbha-vidalana-kṛta-śramaṃ suptam antaka-pratimam |
yama-loka-darśanecchuḥ siṃhaḥ bodhayati ko nāma || 339 ||
[Analyze grammar]

ko gatvā yama-sadanaṃ svayam antakam ādiśaty ajāta-bhayaḥ |
prāṇān apahara matto yadi śaktiḥ kācid asti tava || 340 ||
[Analyze grammar]

prāleya-leśa-miśre maruti prābhātike ca vāti jaḍe |
guṇa-doṣa-jñaḥ puruṣo jalena kaḥ śītam apanayati || 341 ||
[Analyze grammar]

yaḥ parābhava-santrastaḥ sva-sthānaṃ santyajen naraḥ |
tena cet putriṇī mātā tad vandhyā kena kathyate || 342 ||
[Analyze grammar]

utkṣipya ṭiṭṭibhaḥ pādāv āste bha gabhayād divaḥ |
sva-citta-kalpito garvaḥ kasya nātrāpi vidyate || 343 ||
[Analyze grammar]

tyājyaṃ na dhairyaṃ vidhure'pi kāle dhairyāt kadācid gatim āpnuyāt saḥ |
yathā samudre'pi ca pota-bhaṅge sāṃyātriko vāñchati tartum eva || 345 ||
[Analyze grammar]

mitrārthe bāndhavārthe ca buddhimān yatate sadā |
jātāsv āpatsu yatnena jagādedaṃ vaco manuḥ || 346 ||
[Analyze grammar]

anāgata-vidhātā ca pratyutpanna-matis tathā |
dvāv etau sukham edhete yad-bhaviṣyo vinaśyati || 347 ||
[Analyze grammar]

aśaktair balinaḥ śatroḥ kartavyaṃ prapalāyanam |
saṃśritavyo 'thavā durgo nānyā teṣāṃ gatir bhavet || 348 ||
[Analyze grammar]

vidyamānā gatir yeṣām anyatrāpi sukhāvahā |
te na paśyanti vidvāṃso deha-bhaṅgaṃ kula-kṣayam || 349 ||
[Analyze grammar]

para-deśa-bhayāt bhītā bahu-māyā napuṃsakāḥ |
sva-deśe nidhanaṃ yānti kākāḥ kāpuruṣā mṛgāḥ || 350 ||
[Analyze grammar]

yasyāsti sarvatra gatiḥ sa kasmāt sva-deśa-rāgeṇa hi yāti nāśam |
tātasya kūpo 'yam iti bruvāṇāḥ kṣāra-jalaṃ kāpuruṣāḥ pibanti || 351 ||
[Analyze grammar]

arakṣitaṃ tiṣṭhati daiva-rakṣitaṃ surakṣitaṃ daiva-hataṃ vinaśyati |
jīvaty anātho 'pi vane visarjitaḥ kṛta-prayatno 'pi gṛhe na jīvati || 352 ||
[Analyze grammar]

puṃsām asamarthānām upadravāyātmano bhavet kopaḥ |
piṭharaṃ jvalad-atimātraṃ nija-pārśvān eva dahatitarām || 353 ||
[Analyze grammar]

aviditvātmanaḥ śaktiṃ parasya na samutsukaḥ |
gacchann abhimukho vahnau nāśaṃ yāti pataṅgavat || 354 ||
[Analyze grammar]

viśeṣāt paripūrṇasya yāti śatror amarṣaṇaḥ |
ābhimukhyaṃ śaśāṅkasya yathādyāpi vidhuntudaḥ || 355 ||
[Analyze grammar]

bālasyāpi raveḥ pādāḥ patanty upari bhūbhṛtām |
tejasā saha jātānāṃ vayaḥ kutropayujyate || 357 ||
[Analyze grammar]

hastau sthūlataraḥ sa cāṅkuśa-vaśaḥ kiṃ hasti-mātro 'ṅkuśo dīpe prajvalite praṇaśyati tamaḥ kiṃ dīpa-mātraṃ tamaḥ |
vajreṇāpi hatāḥ patanti girayaḥ kiṃ vajra-mātro giris tejo yasya virājate sa balavān sthūleṣu kaḥ pratyayaḥ || 358 ||
[Analyze grammar]

anirvedaḥ śriyo mūlaṃ cañcur me loha-sannibhā |
aho-rātrāṇi dīrghāṇi samudraḥ kiṃ na śuṣyati || 359 ||
[Analyze grammar]

duradhigamaḥ para-bhāgo yāvat puruṣeṇa pauruṣaṃ na kṛtam |
jayati tulām adhirūḍho bhāsvān api jalada-paṭalāni || 360 ||
[Analyze grammar]

bahūnām apy asārāṇāṃ samvāyo hi durjayaḥ |
tṛṇair āveṣṭyate rajjur yathā nāgo 'pi baddhyate || 361 ||
[Analyze grammar]

caṭakākāṣṭha-kūṭena makṣikā-dardurais tathā |
mahājana-virodhena kuñjaraḥ pralayaṃ gataḥ || 362 ||
[Analyze grammar]

naṣṭaṃ mṛtam atikrāntaṃ nānuśocanti paṇḍitāḥ |
paṇḍitānāṃ ca mūrkhāṇāṃ viśeṣo 'yaṃ yataḥ smṛtaḥ || 363 ||
[Analyze grammar]

aśocyānīha bhūtāni yo mūḍhas tāni śocati |
tad-duḥkhāl labhate duḥkhaṃ dvāv anarthau niṣevate || 364 ||
[Analyze grammar]

śleṣmāśru bāndhavair muktaṃ preto bhuṅkte yato 'vaśaḥ |
tasmān na roditavyaṃ hi kriyāḥ kāryāś ca śaktitaḥ || 365 ||
[Analyze grammar]

āpadi yenopakṛtaṃ yena ca hasitaṃ daśāsu viṣamāsu |
upakṛtya tayor ubhayoḥ punar api jātaṃ naraṃ manye || 366 ||
[Analyze grammar]

sa suhṛd-vyasane yaḥ syād anya-jāty-udbhavo 'pi san |
vṛddhau sarvo 'pi mitraṃ syāt sarveṣām eva dehinām || 367 ||
[Analyze grammar]

sa suhṛd-vyasane yaḥ syāt sa putro yas tu bhaktimān |
sa bhṛtyo yo vidheyajñaḥ sā bhāryā yatra nirvṛtiḥ || 368 ||
[Analyze grammar]

punaḥ pratyupakārāya mitrāṇāṃ kriyate priyam |
yat punar mitra-mitrasya kāryaṃ mitrair na kiṃ kṛtam || 369 ||
[Analyze grammar]

hitaiḥ sādhu-samācāraiḥ śāstrajñair mati-śālibhiḥ |
kathañcin na vikalpante vidvadbhiś cintitā nayāḥ || 370 ||
[Analyze grammar]

abalaḥ pronnataṃ śatruṃ yo yāti mada-mohitaḥ |
yuddhārthaṃ sa nivarteta śīrṇa-danto yathā gajaḥ || 371 ||
[Analyze grammar]

suhṛdi nirantara-racite guṇavati bhṛtye'nuvartini kalatre |
svāmini śakti-samete nivedya duḥkhaṃ sukhī bhavati || 372 ||
[Analyze grammar]

kva kasya karma saṃvīkṣya karoty anyo 'pi garhitam |
gatānugatiko loko na lokaḥ pāramārthikaḥ || 373 ||
[Analyze grammar]

cāṭu-taskara-durvṛttais tathā sāhasikādibhiḥ |
pīḍyamānāḥ prajā rakṣyāḥ kaṭūcchadmādibhis tathā || 374 ||
[Analyze grammar]

prajānāṃ dharma-ṣaḍ-bhāgo rājño bhavati rakṣituḥ |
adharmād api ṣaḍ-bhāgo jāyate yo na rakṣati || 375 ||
[Analyze grammar]

prajā-pīḍana-santāpāt samudbhūto hutāśanaḥ |
rājñaḥ śriyaṃ kulaṃ prāṇān nādagdhvā vinivartate || 376 ||
[Analyze grammar]

rājā bandhur abandhūnāṃ rājā cakṣur acakṣuṣām |
rājā pitā ca mātā ca sarveṣāṃ nyāya-vartinām || 377 ||
[Analyze grammar]

phalārthī pārthivo lokān pālayed yatnam āsthitaḥ |
dāna-mānādi-toyena mālākāro 'ṅkurān iva || 378 ||
[Analyze grammar]

yathā bījāṅkuraḥ sūkṣmaḥ pratnenābhirakṣitaḥ |
phala-prado bhavet kāle tadval lokaḥ surakṣitaḥ || 379 ||
[Analyze grammar]

hiraṇya-dhānya-ratnāni yānāni vividhāni ca |
tathānyad api yat kiñcit prajābhyaḥ syān nṛpasya tat || 380 ||
[Analyze grammar]

yo na vetti guṇān yasya na taṃ seveta paṇḍitaḥ |
na hi tasmāt phalaṃ kiñcit sukṛṣṭād ūṣarād iva || 381 ||
[Analyze grammar]

bhaktaṃ śaktaṃ kulīnaṃ ca na bhṛtyam avamānayet |
putraval lālayen nityaṃ ya icchec chriyam ātmanaḥ || 382 ||
[Analyze grammar]

rājā tuṣṭo 'pi bhṛtyānām artha-mātraṃ prayacchati |
te tu sammānitās tasya prāṇair apy upakurvate || 383 ||
[Analyze grammar]

yena syāl laghutā vātha pīḍā citte prabhoḥ kvacit |
prāṇa-tyāge'pi tat karma na kuryāt kula-sevakaḥ || 384 ||
[Analyze grammar]

bhṛtyāparādhajo daṇḍaḥ svāmino jāyate yataḥ |
tena lajjāpi tasyotthā na bhṛtyasya tathā punaḥ || 385 ||
[Analyze grammar]

tyajed ekaṃ kulasyārthe grāmasyārthe kulaṃ tyajet |
grāmaṃ janapadasyārthe svātmārthe pṛthivīṃ tyajet || 386 ||
[Analyze grammar]

āpad-arthe dhanaṃ rakṣed dārān rakṣed dhanair api |
ātmānaṃ satataṃ rakṣed dārair api dhanair api || 387 ||
[Analyze grammar]

api putra-kalatrair vā prāṇān rakṣeta paṇḍitaḥ |
vidyamānair yatas taiḥ syāt sarvaṃ bhūyo 'pi dehinām || 388 ||
[Analyze grammar]

yena kenāpy upāyena śubhenāpy aśubhena vā |
uddhared dīnam ātmānaṃ samartho dharmam ācaret || 389 ||
[Analyze grammar]

yo māyāṃ kurute mūḍhaḥ prāṇa-tyāge dhanādiṣu |
tasya prāṇāḥ praṇaśyanti tair naṣṭair naṣṭam eva tat || 390 ||
[Analyze grammar]

parāṅmukhe'pi daive'tra kṛtyaṃ kāryaṃ vipaścitā |
ātma-doṣa-vināśāya sva-citta-stambhanāya ca || 391 ||
[Analyze grammar]

udyoginaṃ puruṣa-siṃham upaiti lakṣmīr daivena deyam iti kāpuruṣā vadanti |
daivaṃ nihatya kuru pauruṣam ātma-śaktyā yatne kṛte yadi na sidhyati ko 'tra doṣaḥ || 392 ||
[Analyze grammar]

aviruddhaṃ sukha-sthaṃ yo duḥkha-mārge niyojayet |
janma-janmāntare duḥkhī sa naraḥ syād asaṃśayam || 393 ||
[Analyze grammar]

ghātayitum eva nīcaḥ para-kāryaṃ vetti na prasādayitum |
pātayitum asti śaktir vāyor vṛkṣaṃ na connamitum || 394 ||
[Analyze grammar]

jāta-mātraṃ na yaḥ śatruṃ vyādhiṃ ca praśamaṃ nayet |
mahā-balo 'pi tenaiva vṛddhiṃ prāpya sa hanyate || 395 ||
[Analyze grammar]

pitṛ-paitāmahaṃ sthānaṃ yo yasyātra jigīṣate |
sa tasya sahajaḥ śatrur ucchedyo 'pi priye sthitaḥ || 396 ||
[Analyze grammar]

dadyāt sādhur yadi nija-pade durjanāya praveśaṃ tan-nāśāya prabhavati tato vāñchamānaḥ svayaṃ saḥ |
tasmād deyo vipula-matibhir nāvakāśo 'dhamānāṃ jārāpi syād gṛha-patir iti śrūyate vākyato 'tra || 397 ||
[Analyze grammar]

nistriṃśaṃ hṛdayaṃ kṛtvā vāṇīm ikṣu-rasopāmām |
vikalpo 'tra na kartavyo hanyāt tatrāpakāriṇam || 398 ||
[Analyze grammar]

parasya pīḍanaṃ kurvan svārtha-siddhiṃ ca paṇḍitaḥ |
mūḍha-buddhir na bhakṣeta vane caturako yathā || 399 ||
[Analyze grammar]

avadhyaṃ vāthavāgamyam akṛtyaṃ nāsti kiṃcana |
loke buddhimatām atra tasmāt tāṃ yojayāmy aham || 400 ||
[Analyze grammar]

agamyāni pumān yāti yo 'sevyāṃś ca niṣevate |
sa mṛtyum upagṛhṇāti garbham aśvatarī yathā || 401 ||
[Analyze grammar]

dharmārthaṃ yatatām apīha vipado devād yadi syuḥ kvacit tat tāsām upaśāntaye sumatibhiḥ kāryo viśeṣān nayaḥ |
loke khyātim upāgatātra sakale lokoktir eṣā yato dagdhānāṃ kila vahninā hita-karaḥ seko 'pi tasyodbhavaḥ || 402 ||
[Analyze grammar]

loke'thavā tanu-bhṛtāṃ nija-karma-pākaṃ nityaṃ samāśritavatāṃ suhita-kriyāṇām |
bhāvārjitaṃ śubham athāpy aśubhaṃ nikāmaṃ yad bhāvi tad bhavati nātra vicāra-hetuḥ || 403 ||
[Analyze grammar]

mahadbhiḥ spardhamānasya vipad eva garīyasī |
danta-bhaṅge'pi nāgānāṃ ślāghyo giri-vidāraṇe || 404 ||
[Analyze grammar]

mahato 'pi kṣayaṃ labdhvā ślāghyaṃ nīco 'pi gacchati |
dānārthī madhupo yadvad gaja-karṇa-samāhataḥ || 405 ||
[Analyze grammar]

antar-līna-bhujaṅgamaṃ gṛham ivāntaḥsthogra-siṃhaṃ vanaṃ grāhākīrṇam ivābhirāma-kamala-cchāyā-sanāthaṃ saraḥ |
kālenārya-janāpavāda-piśunaiḥ kṣudrair anāryaiḥ śritaṃ duḥkhena pravigāhyate sa-cakitaṃ rājñāṃ manaḥ sāmayam || 406 ||
[Analyze grammar]

kāryāṇy uttama-daṇḍa-sāhasa-phalāny āyāsa-sādhyāni ye prītyā saṃśamayanti nīti-kuśalāḥ sāmnaiva te mantriṇaḥ |
niḥsārālpa-phalāni ye tv avidhinā vāñchanti daṇḍodyamais teṣāṃ durnaya-ceṣṭitair narapater āropyate śrīs tulām || 407 ||
[Analyze grammar]

sāmādi-daṇḍa-paryanto nayaḥ proktaḥ svayambhuvā |
teṣāṃ daṇḍas tu pāpīyāṃs taṃ paścād viniyojayet || 408 ||
[Analyze grammar]

sāmnaiva yatra siddhir na tatra daṇḍo budhena viniyojyaḥ |
pittaṃ yadi śarkarayā śāmyati ko 'rthaḥ paṭolena || 409 ||
[Analyze grammar]

ādau sāma prayoktavyaṃ puruṣeṇa vijānatā |
sāma-sādhyāni kāryāṇi vikriyāṃ yānti na kvacit || 410 ||
[Analyze grammar]

na candreṇa na cāuṣadhyā na sūryeṇa na vahninā |
sāmnaiva vilayaṃ yāti vidveṣa-prabhavaṃ tamaḥ || 411 ||
[Analyze grammar]

mantriṇāṃ bhinna-sandhāne bhiṣajāṃ sāṃnipātike |
karmaṇi vyajyate prajñā susthe ko vā na paṇḍitaḥ || 412 ||
[Analyze grammar]

ghātayitum eva nīcaḥ para-kāryaṃ vetti na prasādhayitum |
pātayitum eva śaktir nākhoruddhartum anna-piṭakam || 413 ||
[Analyze grammar]

narādhipā nīca-janānuvartino budhopadiṣṭena pathā na yānti ye |
viśanty ato durgama-mārga-nirgamaṃ samasta-sambādham anartha-pañjaram || 414 ||
[Analyze grammar]

guṇālayo 'py asan mantrī nṛpatir nādhigamyate |
prasanna-svādu-salilo duṣṭa-grāhyo yathā hradaḥ || 415 ||
[Analyze grammar]

citrāsvāda-kathair bhṛtyair anāyāsita-kārmukaiḥ |
ye ramante nṛpās teṣāṃ ramante ripavaḥ śriyā || 416 ||
[Analyze grammar]

nānāmyaṃ namate dāru nāśmani syāt kṣura-kriyā |
sūcī-mukhaṃ vijānīhi nāśiṣyāyopaśyate || 417 ||
[Analyze grammar]

muhur vighnita-karmāṇaṃ dyūta-kāraṃ parājitam |
nālāpayed viveka-jño yadīcchet siddhim ātmanaḥ || 418 ||
[Analyze grammar]

ākheṭakaṃ vṛthākleśaṃ mūrkhaṃ vyasanasaṃsthitam |
samālāpena yo yuṅkte sa gacchati parābhavam || 419 ||
[Analyze grammar]

upadeśo hi mūrkhāṇāṃ prakopāya na śāntaye |
payaḥ-pānaṃ bhujaṅgānāṃ kevalaṃ viṣa-vardhanam || 420 ||
[Analyze grammar]

upadeśo na dātavyo yādṛśe tādṛśe nare |
paśya vānaramūrkheṇa sugṛhī nirgṛhīkṛtā || 421 ||
[Analyze grammar]

sūcī-mukhi durācārā raṇḍā paṇḍita-vādinī |
nāśaṅkate prajalpantī tat kim enāṃ na hanmy aham || 423 ||
[Analyze grammar]

vācyaṃ śraddhā-sametasya pṛcchateś ca viśeṣataḥ |
proktaṃ śraddhā-vihīnasya araṇya-ruditopamam || 424 ||
[Analyze grammar]

kiṃ karoty eva pāṇḍityam asthāne viniyojitam |
andhakāra-praticchanne ghaṭe dīpa ivāhitaḥ || 425 ||
[Analyze grammar]

jātaḥ putro 'nujātaś ca atijātas tathaiva ca |
apajātaś ca loke'smin mantavyāḥ śāstra-vedibhiḥ || 426 ||
[Analyze grammar]

mātṛ-tulya-guṇo jātas tv anujātaḥ pituḥ samaḥ |
atijāto 'dhikas tasmād apajāto 'dhamādhamaḥ || 427 ||
[Analyze grammar]

apy ātmano vināśaṃ gaṇayati na khalaḥ para-vyasana-hṛṣṭaḥ |
prāyo mastaka-nāśe samara-mukhe nṛtyati kabandhaḥ || 428 ||
[Analyze grammar]

dharma-buddhiḥ kubuddhiś ca dvāv etau viditau mama |
putreṇa vyartha-pāṇḍityāt pitā dhūmena ghātitaḥ || 429 ||
[Analyze grammar]

deśāntareṣu bahu-vidha-bhāṣā-veṣādi yena na jñātam |
bhramatā dharaṇī-pīṭhe tasya phalaṃ janmano vyartham || 430 ||
[Analyze grammar]

vidyāṃ vittaṃ śilpaṃ tāvan nāpnoti mānavaḥ samyak |
yāvad vrajati na bhūmau deśād deśāntaraṃ hṛṣṭaḥ || 431 ||
[Analyze grammar]

prāpta-vidyārtha-śilpānāṃ deśāntara-nivāsinām |
krośa-mātro 'pi bhū-bhāgaḥ śata-yojanavad bhavet || 432 ||
[Analyze grammar]

na vittaṃ darśayet prājñaḥ kasyacit svalpam apy aho |
muner api yatas tasya darśanāc calate manaḥ || 433 ||
[Analyze grammar]

yathāmiṣaṃ jale matsyair bhakṣyate śvāpadair bhuvi |
ākāśe pakṣibhiś caiva tathā sarvatra vittavān || 434 ||
[Analyze grammar]

vivāde anviṣyate patraṃ tad-abhāve'pi sākṣiṇaḥ |
sākṣy abhāvāt tato divyaṃ pravadanti manīṣiṇaḥ || 436 ||
[Analyze grammar]

antyajo 'pi yadā sākṣī vivāde samprajāyate |
na tatra yujyate divyaṃ kiṃ punar vana-devatāḥ || 437 ||
[Analyze grammar]

upāyaṃ cintayet prājñas tathāpāyam api cintayet |
paśyato baka-mūrkhasya nakulair bhakṣitāḥ sutāḥ || 439 ||
[Analyze grammar]

navanīta-samāṃ vāṇīṃ kṛtvā cittaṃ tu nirdayam |
tathā prabodhyate śatruḥ sānvayo mriyate yathā || 440 ||
[Analyze grammar]

yatnād api kaḥ paśyec chikhinām āhāra-niḥsaraṇa-mārgam |
yadi jalada-dhvani-muditās ta eva mūḍhā na nṛtyeyuḥ || 441 ||
[Analyze grammar]

tulāṃ loha-sahasrasya yatra khādanti mūṣakāḥ |
rājaṃs tatra harec chyeno bālakaṃ nātra saṃśayaḥ || 442 ||
[Analyze grammar]

yatra deśe atha vā sthāne bhogān bhuktvā svavīryataḥ |
tasmin vibhavahīno yo vaset sa puruṣādhamaḥ || 443 ||
[Analyze grammar]

yenāhaṃkārayuktena ciraṃ vilasitaṃ purā |
dīnaṃ vadati tatraiva yaḥ pareṣāṃ sa ninditaḥ || 444 ||
[Analyze grammar]

na bhaktyā kasyacit ko 'pi priyaṃ prakurute naraḥ |
muktvā bhayaṃ pralobhaṃ vā kārya-kāraṇam eva vā || 445 ||
[Analyze grammar]

atyādaro bhaved yatra kārya-kāraṇa-varjitaḥ |
tatra śaṅkā prakartavyā pariṇāme'sukhāvahā || 446 ||
[Analyze grammar]

tulāṃ loha-sahasrasya yatra khādanti mūṣikāḥ |
rājaṃs tatra harec chyeno bālakaṃ nātra saṃśayaḥ || 447 ||
[Analyze grammar]

prāyeṇātra kulānvitaṃ kukulajāḥ śrī-vallabhaṃ durbhagā dātāraṃ kṛpaṇā ṛjūn anṛjavo vitte sthitaṃ nirdhanāḥ |
vairūpyopahṛtāś ca kānta-vapuṣaṃ dharmāśrayaṃ pāpino nānā-śāstra-vicakṣaṇaṃ ca puruṣaṃ nindanti mūrkhāḥ sadā || 448 ||
[Analyze grammar]

mūrkhāṇāṃ paṇḍitā dveṣyā nirdhanānāṃ mahādhanāḥ |
vratinaḥ pāpa-śīlānām asatīnāṃ kula-striyaḥ || 449 ||
[Analyze grammar]

paṇḍito 'pi varaṃ śatrur na mūrkho hita-kārakaḥ |
vānareṇa hato rājā viprāś cīreṇa rakṣitāḥ || 450 ||
[Analyze grammar]

asatī bhavati salajjā kṣāraṃ nīraṃ ca śītalaṃ bhavati |
dambhī bhavati vivekī priyavaktā bhavati dhūrtajanaḥ || 451 ||
[Analyze grammar]

mṛtyor bibheṣi kiṃ bāla na sa bhītaṃ vimuñcati |
adya vābda-śatānte vā mṛtyur vai prāṇināṃ dhruvaḥ || 452 ||
[Analyze grammar]

gavārthe brāhmaṇārthe ca prāṇa-tyāgaṃ karoti yaḥ |
sūryasya maṇḍalaṃ bhittvā sa yāti paramāṃ gatim || 453 ||
[Analyze grammar]

mitra-drohī kṛtaghnaś ca yaś ca viśvāsa-ghātakaḥ |
te narā narakaṃ yānti yāvac candra-divākarau || 454 ||
[Analyze grammar]

bhūmi-kṣaye rāja-vināśa eva bhṛtyasya vā buddhimato vināśe |
no yuktam uktaṃ hy anayoḥ samatvaṃ naṣṭāpi bhūmiḥ sulabhā na bhṛtyāḥ || 455 ||
[Analyze grammar]

ukto bhavati yaḥ pūrvaṃ guṇavān iti saṃsadi |
na tasya doṣo vaktavyaḥ pratijñā-bhaṅga-bhīruṇā || 456 ||
[Analyze grammar]

pitā vā yadi vā bhrātā putro bhāryāthavā suhṛt |
prāṇa-drohaṃ yadā gacched dhantavyo nāsti pātakam || 457 ||
[Analyze grammar]

rājā ghṛṇī brāhmaṇaḥ sarva-bhakṣī strī cātrapā duṣṭamatiḥ sahāyaḥ |
preṣyaḥ pratīpo 'dhikṛtaḥ prasādī tyājyā amī yaś ca kṛtaṃ na vetti || 458 ||
[Analyze grammar]

satyānṛtā ca paruṣā priya-vādinī ca hiṃsrā dayālur api cārtha-parā vadānyā |
bhūri-vyathā pracura-vitta-samāgamā ca veśyāṅganeva nṛpa-nītir aneka-rūpā || 459 ||
[Analyze grammar]

akṛtopadravaḥ kaścin mahān api na pūjyate |
pūjayanti narā nāgān na tārkṣyaṃ nāga-ghātinam || 460 ||
[Analyze grammar]

aśocyān anvaśocas tvaṃ prajñā-vādāṃś ca bhāṣase |
gatāsūn agatāsūṃś ca nānuśocanti paṇḍitāḥ || 461 ||
[Analyze grammar]