Chapter 24

[English text for this chapter is available]

sūta uvāca |
ekādaśyāḥ phalaṃ śrutvā suprīto jaiministataḥ |
kṛtāñjaliruvācedaṃ kṛṣṇadvaipāyanaṃ prabhum || 1 ||
[Analyze grammar]

jaiminiruvāca |
viṣṇordevasya māhātmyaṃ tvatprasādācchrutaṃ mayā |
tulasyā brūhi māhātmyaṃ śṛṇvatāṃ pāpanāśanam || 2 ||
[Analyze grammar]

vyāsa uvāca |
indrādyairdaivataiḥ sarvaistulasī bhagavatyasau |
saṃsevyā sarvadā vipra caturvargaphalapradā || 3 ||
[Analyze grammar]

svarge martye ca pātāle tulasī durllabhā satām |
caturvargaphalaprāptistasyāṃ bhaktiḥ karoti vai || 4 ||
[Analyze grammar]

yatraikastulasīvṛkṣastiṣṭhatyapi ca sattama |
tatraiva tridaśāḥ sarve brahmaviṣṇuśivādayaḥ || 5 ||
[Analyze grammar]

keśavaḥ patramadhye ca patrāgre ca prajāpatiḥ |
patravṛṃte śivastiṣṭhettulasyāḥ sarvadaiva hi || 6 ||
[Analyze grammar]

lakṣmī sarasvatī caiva gāyatrī caṃḍikā tathā |
sarvāścānyā devapatnyastatpatreṣu vaṃsati ca || 7 ||
[Analyze grammar]

indro 'gni śamanaścaiva nairṛtirvaruṇastathā |
pavanaśca kubareśca tacchākhāyāṃ vasaṃtyamī || 8 ||
[Analyze grammar]

ādityādi grahāḥ sarve viśvedevāśca sarvadā |
vasavo munayaścaiva tathā devarṣayo'khilāḥ || 9 ||
[Analyze grammar]

koṭibrahmāṇḍamadhyeṣu yāni tīrthāni bhūtale |
tulasīdalamāśritya tānyeva nivasaṃti vai || 10 ||
[Analyze grammar]

tulasīṃ sevate yastu bhaktibhāvasamanvitaḥ |
sevitāstena tīrthāśca devā brahmādayastathā || 11 ||
[Analyze grammar]

chindaṃti tṛṇajālāni tulasīmūlajāni ye |
taddehasthāṃ brahmahatyāṃ kṣiṇatti tatkṣaṇāddhariḥ || 12 ||
[Analyze grammar]

grīṣmakāle dvijaśreṣṭha sugaṃdhaiḥ śītalairjalaiḥ |
tulasīsecanaṃ kṛtvā naro nirvāṇamāpnuyāt || 13 ||
[Analyze grammar]

candrātapaṃ vā chatraṃ vā tasyai yastu prayacchati |
viśeṣato nidāgheṣu sa muktaḥ sarvapātakaiḥ || 14 ||
[Analyze grammar]

vaiśākhe'kṣatadhārābhiradbhiryastulasīṃ janaḥ |
siṃcayetso'śvamedhasya phalaṃ prāpnoti nityaśaḥ || 15 ||
[Analyze grammar]

prasṛtodakamātreṇa tulasīṃ yasya secayet |
so'pi svargamavāpnoti sarvapāpavivarjitaḥ || 16 ||
[Analyze grammar]

kadācittulasīṃ dugdhaiḥ secayedyo narottamaḥ |
tasya veśmani viprarṣe lakṣmīrbhavati niścalā || 17 ||
[Analyze grammar]

gomayaistulasīmūlaṃ yaḥ kuryādupalepanam |
saṃmārjanaṃ ca viprarṣe tasya puṇyaphalaṃ śṛṇu || 18 ||
[Analyze grammar]

rajāṃsi tatra yāvaṃti dūrībhūtāni jaimine |
tāvatkalpasahasrāṇi modate viṣṇunā saha || 19 ||
[Analyze grammar]

pradīpaṃ yastu saṃdhyāyāṃ sthāpayettulasītale |
sa yāti maṃdiraṃ viṣṇoḥ kulakoṭisamanvitaḥ || 20 ||
[Analyze grammar]

gobhyaḥ śvabhyaḥ kharebhyaśca manuṣyebhyaśca rakṣati |
śiśubhyastulasīṃ yastu taṃ rakṣetkeśavaḥ sadā || 21 ||
[Analyze grammar]

tulasyāropaṇaṃ yastu bhaktitaḥ kurute naraḥ |
sa mṛtaḥ paramaṃ mokṣaṃ prāpnotyeva na saṃśayaḥ || 22 ||
[Analyze grammar]

prabhāte tulasīṃ paśyedbhaktimānyo narottamaḥ |
sa viṣṇudarśanasyaiva phalaṃ prāpnoti cākṣayam || 23 ||
[Analyze grammar]

tulasīṃ praṇamedyastu naro bhaktisamanvitaḥ |
āyurbalaṃ yaśovittaṃ saṃtatistasya varddhate || 24 ||
[Analyze grammar]

tulasīsmaraṇenaiva sarvapāpaṃ vinaśyati |
tulasīsparśanenaiva naśyaṃti vyādhayo nṛṇām || 25 ||
[Analyze grammar]

yo'śnāti tulasīpatraṃ sarvapāpaharaṃ śubham |
taccharīrāṃtarasthāyi pāpaṃ naśyati tatkṣaṇāt || 26 ||
[Analyze grammar]

tulasīkāṣṭhasaṃbhūtāṃ mālāṃ vahati yo naraḥ |
taddehe pātakaṃ nāsti satyametanmayocyate || 27 ||
[Analyze grammar]

tulasīpatragalitaṃ yastoyaṃ śirasā vahet |
gaṃgāyāḥ snānajaṃ puṇyaṃ labhate nātra saṃśayaḥ || 28 ||
[Analyze grammar]

dūrvābhirakṣataiḥ puṣpairnaivedyaistulasīṃ śubhām |
samārādhya naro bhaktyā viṣṇupūjā phalaṃ labhet || 29 ||
[Analyze grammar]

yenārcitā bhagavatī tulasī kadācinnaivedya puṣpavaradhūpaghṛtapradīpaiḥ |
dharmārthakāmaparamāmṛtadāyi viprāḥ kiṃ tasya viṣṇucaraṇāpacitiprayogaiḥ || 30 ||
[Analyze grammar]

sthāneṣu doṣarahiteṣu suraughasevyāmāropayaṃti tulasīṃ harituṣṭikartrīm |
tuṣṭo haristrijagatāmadhipo'murāristebhyo dadāti paramaṃ padamāśu vipra || 31 ||
[Analyze grammar]

yajñaṃ vrataṃ ca pitṛpūjanamacyutārccāṃ dānaṃ yadanyadapi karmaśubhaṃ manuṣyāḥ |
kurvaṃti doṣarahite tulasītale ca tānyakṣayāṇi sakalāni bhavaṃti nūnam || 32 ||
[Analyze grammar]

yaddharmakarmakurute manujaḥ pṛthivyāṃ nārāyaṇapriyatamāṃ tulasīṃ vinā ca |
tatsarvameva viphalaṃ bhavati dvijendra padmekṣaṇo'pi na hi tuṣyati devadevaḥ || 33 ||
[Analyze grammar]

yātrāsu paśyati śubhāṃ tulasīṃ pavitrāṃ yo bhaktibhāvasahito manujo hi nūnam |
yātrāphalaṃ sakalameva hariprasādāttasyāśu siddhyati vacaḥ sudṛḍhaṃ mamaitat || 34 ||
[Analyze grammar]

tyaktvā sugandhikusumaṃ bhuvanaikanātho maṃdārakundanalinādikamapyanaṃtaḥ |
gṛhṇāti sadguṇamayīṃ tulasīṃ pramodaiḥ śuṣkāmapi pracurapāpavināśarakṣām || 35 ||
[Analyze grammar]

utpāṭya caiva tulasīṃ bhuvi nikṣipaṃti pāpāśayā'mṛtalatābha nidānabhūtām |
ajñānato naraharistulasīpriyo'sau teṣāṃ śriyaṃ harati saṃtatameva satyam || 36 ||
[Analyze grammar]

mūtraṃ purīṣaṃ tulasītaleṣu kurvaṃti ye'pi ca malaṃ satataṃ manuṣyāḥ |
devāśraye saṃcita pātakānāṃ teṣāṃ haratyāśu harirdhanāni || 37 ||
[Analyze grammar]

nārāyaṇasyapūjārthaṃ cinomi tvāṃ namostute |
kusumaiḥ pārijātādyairgaṃdhādyairapi keśavaḥ || 38 ||
[Analyze grammar]

tvayā vinā naiti tṛptiṃ cinomi tvāmataḥ śubhe |
tvayā vinā mahābhāge samastaṃ karma niṣphalam || 39 ||
[Analyze grammar]

atastu tulasī devi cinomi varadā bhava |
cayanodbhava duḥkhaṃ te yaddevi hṛdi jāyate || 40 ||
[Analyze grammar]

tatkṣamasva jagannāthe tulasi tvāṃ namāmyaham |
kṛtāñjalirimānmantrānpaṭhitvā vaiṣṇavo janaḥ || 41 ||
[Analyze grammar]

karatāladvayaṃ datvā cinoti tulasīdalam |
yathā na kaṃpate śākhā tulasyā dvijasattama || 42 ||
[Analyze grammar]

patrasya cayane devī bhagnaśākhā yadā bhavet |
tadā hṛdi vyathā viṣṇorjjāyate tulasīpateḥ || 43 ||
[Analyze grammar]

śākhāgrātpatitaṃ bhūmau patraṃ patraṃ purātanam |
tenāpi pūjyo govindo madhukaiṭabhamarddanaḥ || 44 ||
[Analyze grammar]

komalaistulasīpatrairyo'rcayedacyutaṃ prabhum |
sarvaṃ sa labhate śīghraṃ yadyadicchati cetasā || 45 ||
[Analyze grammar]

jaiminiruvāca |
tulasīvṛkṣasadṛśaḥ kovṛkṣo'sti dvijarṣabha |
tamahaṃ jñātumicchāmi brūhi satyavatīsuta || 46 ||
[Analyze grammar]

vyāsa uvāca |
yathā priyatamā viṣṇostulasī satataṃ dvija |
tathā priyatamā dhātrī sarvapāpapraṇāśinī || 47 ||
[Analyze grammar]

tulasīvṛkṣamāsādya yā yāstiṣṭhaṃti devatāḥ |
āmalakyāstale tāstā nivasaṃti dvijottama || 48 ||
[Analyze grammar]

gaṃgādīni ca tīrthāni tatraiva dvijasattama |
viṣṇupriyatamā dhātrī pavitrā yatra tiṣṭhati || 49 ||
[Analyze grammar]

aśubhaṃ vāśubhaṃ vāpi yatkarmāmalakītale |
kriyate mānavairviṃpra bhavettatsatyamakṣayam || 50 ||
[Analyze grammar]

pavitrairnūtaneḥ patrairdhātryā yaḥ pūjayeddharim |
sa muktaḥ pāpajālena sāyujyaṃ labhate hareḥ || 51 ||
[Analyze grammar]

dhātrī ca tulasīdevī na tiṣṭhedyatra jaimine |
sthānaṃ tadapavitraṃ syānna ca kriyāphalaṃ labhet || 52 ||
[Analyze grammar]

na tiṣṭhatyāśrame yasya dhātrī ca tulasī śubhā |
tena karma kṛtaṃ sarvaṃ nūnaṃ gacchati niṣphalam || 53 ||
[Analyze grammar]

dhātryā tulasyā hīnaṃ ca nilayaṃ yasya bhūsura |
alakṣmīḥ pātakaṃ sarvaṃ kaliśca tena toṣitaḥ || 54 ||
[Analyze grammar]

sthāne tasmindvijaśreṣṭha na dhātrī tulasī na ca |
śmaśānatulyaṃ sthānaṃ tadvijñeyaṃ tatvadarśibhiḥ || 55 ||
[Analyze grammar]

dhātrī ca tulasī yatra tiṣṭhettatrākhilāḥ surāḥ |
na dhātrī tulasī patraṃ tatraivākhilapātakam || 56 ||
[Analyze grammar]

dhātrīphalasrajaṃ yastu pāpahartrīṃ vahedbudhaḥ |
tasyāśritya tanuṃ viṣṇuḥ sadā tiṣṭhecchriyā saha || 57 ||
[Analyze grammar]

dhātrīkāṣṭhasya mālāṃ ca yo vahenmatimānnaraḥ |
tasya dehaṃ samāśritya tiṣṭhaṃti sarvadevatāḥ || 58 ||
[Analyze grammar]

dhātrīphalasrajaṃ gṛhṇanyatkarma kurute naraḥ |
tatsarvamakṣayaṃ proktaṃ śubhaṃ vā yadi vāśubham || 59 ||
[Analyze grammar]

yastu dhātrīphalaṃ bhuṃkte mānavo'khilatatvavit |
taddehābhyaṃtarasthāyi sarvaṃ pāpaṃ vinaśyati || 60 ||
[Analyze grammar]

dhātrīphalamayīṃ mālāṃ yo vaheddivajasattama |
bravīmi śṛṇu māhātmyaṃ sarvapāpaharaṃ param || 61 ||
[Analyze grammar]

śmaśāne'pi yadā mṛtyustasya syāddaivayogataḥ |
gaṅgāmaraṇajaṃ puṇyaṃ saṃprāpnoti na saṃśayaḥ || 62 ||
[Analyze grammar]

taṃ dṛṣṭvā pāpinaḥ sarve pāpajālaiḥ sudāruṇaiḥ |
sadya eva pramucyaṃte janmakoṭiśatairapi || 63 ||
[Analyze grammar]

nityaṃ gṛhṇāti vipreṃdra yo dhātrīphalakarddamam |
dine dine labhetpuṇyaṃ saṃprāpnoti na saṃśayaḥ || 64 ||
[Analyze grammar]

dhātrītaruṃ ca yo haṃti sarvadevagaṇāśrayam |
sa dadāti hareraṃge ghātaṃ nāstyatra saṃśayaḥ || 65 ||
[Analyze grammar]

sarvadevamayī dhātrī viśeṣātkeśavapriyā |
samyagvaktuṃ guṇaṃ tasyā brahmaṇāpi na śakyate || 66 ||
[Analyze grammar]

dhātryāstulasyā vidadhāti bhaktiṃ yo mānavo jñātasamastatatvaḥ |
bhuktvā ca bhogānsakalāṃ statoṃ'te sa muktimāpnoti hareḥ prasādāt || 67 ||
[Analyze grammar]

iti śrīpadmapurāṇe kriyāyogasāre tulasīmāhātmyaṃ nāma caturviṃśo'dhyāyaḥ || 24 ||
[Analyze grammar]