Chapter 23

[English text for this chapter is available]

vyāsa uvāca |
pūrvaṃ kocaraśonāma rājā'bhūtkṣitimaṃḍale |
śāṃtaḥ paramadharmajño rājanītividāṃvaraḥ || 1 ||
[Analyze grammar]

satyavādī jitakrodho jitavairi samuccayaḥ |
nārāyaṇārcanaparo harisevā rataḥ paraḥ || 2 ||
[Analyze grammar]

suprajñā nāma mahiṣī tasyāsītpriyavādinī |
sarvalakṣaṇasaṃpannā patisevāparāyaṇā || 3 ||
[Analyze grammar]

ekādaśīvrataratā sarvaprāṇihitaiṣiṇī |
jātismarā mahābhāgā suśīlā varavarṇinī || 4 ||
[Analyze grammar]

sa rājā daśamīṃ kṛtvā sadāraḥ paramārthavit |
ekādaśīṃ niśīthinyāṃ jāgaraṃ kartumudyataḥ || 5 ||
[Analyze grammar]

tatrāṃtare dvijaḥ kaścicchaurirnāma mahīpateḥ |
ājagāma mahātejāstasya jāgaramaṇḍapam || 6 ||
[Analyze grammar]

tamāyāṃtaṃ sa bhūpālo nārāyaṇaparāyaṇaḥ |
pādyādyaiḥ pūjayāmāsa sadāro'tyaṃtaharṣitaḥ || 7 ||
[Analyze grammar]

teṣāṃ madhye sūpaviṣṭhaḥ sa vipro'khilatatvavit |
viṣṇupūjāparāṃstatra dadarśa vratino bahūn || 8 ||
[Analyze grammar]

pūjayaṃti hariṃ kecinnānāpuṣpairmanoramaiḥ |
gaṃdhairdhūpaistathādīpairupahārairanuttamaiḥ || 9 ||
[Analyze grammar]

gaṅgāmṛdbhūṣitākecittulasīpatramālayā |
alaṃkṛtā hareragre nṛtyaṃti vratino mudā || 10 ||
[Analyze grammar]

kecidgāyaṃti gītāni lalitāni hareḥ punaḥ |
karatālaṃ samādāya vratino bhagavatpriyāḥ || 11 ||
[Analyze grammar]

stavairanuttamaiḥ kecinnārāyaṇamanāmayam |
stuvaṃti jagatāmīśaṃ divyārthaiḥ komalākṣaraiḥ || 12 ||
[Analyze grammar]

śvetacāmaravātena śītalena jagatpateḥ |
vījayaṃti hareḥ prītiṃ kecicca mahatīṃ tathā || 13 ||
[Analyze grammar]

kecidvīṇādikaṃ vādyaṃ lalitaṃ śucimaṃgalam |
vādayaṃto mahātmānaḥ kecidgāyaṃti keśavam || 14 ||
[Analyze grammar]

sa rājā rājamahiṣī dvāvapyatyaṃtaharṣitau |
gāyatāṃ lalitaṃ gītaṃ nṛtyatāṃ nṛtyamuttamam || 15 ||
[Analyze grammar]

tau daṃpatī mahātmānau nṛtyagītādikāriṇau |
vācā madhurayā prāha sa śaurirbrāhmaṇottamaḥ || 16 ||
[Analyze grammar]

śauriruvāca |
dhanyo'si tvaṃ mahīpāla dhanyā ca mahiṣī tava |
caritraṃ yuvayoretanmaṅgalaṃ bhuvidurllabham || 17 ||
[Analyze grammar]

tvāṃ vakṣyāmi yataḥ kaścinna dṛṣṭo vaiṣṇavottamaḥ |
tvayā bhūmibhujā pṛthvī dhanyeyaṃ nātra saṃśayaḥ || 18 ||
[Analyze grammar]

ekādaśīvratamidaṃ pavitraṃ bhagavatpriyam |
sadāraḥ kuruṣe bhūpa tasmāttvaṃ vaiṣṇavāgraṇīḥ || 19 ||
[Analyze grammar]

saptadvīpaikanāthaśca sadārastvaṃ nṛpottama |
nārāyaṇāgrataḥ prītyā yato nṛtyasi gāyasi || 20 ||
[Analyze grammar]

caritraṃ yuvayoretaddaṃpatyordṛṣṭamadbhutam |
kasmādbuddhiriyaṃ jātā yuvayoratinirmalā || 21 ||
[Analyze grammar]

vyāsa uvāca |
tasyedaṃ vākyamākarṇya śaurināmno dvijanmanaḥ |
īṣaddhāsyamukhīprāha suprājñā tamatho dvijam || 22 ||
[Analyze grammar]

suprājñovāca |
ekādaśīprabhāvena pūrvamāvāṃ dvijottama |
atipātakinau muktau sūryajena mahātmanā || 23 ||
[Analyze grammar]

jātismṛtiprabhāveṇa divyamekādaśīvratam |
kurvaḥ saṃprati viprendra paramasthānakāṅkṣayā || 24 ||
[Analyze grammar]

śauriruvāca |
yadi nūnaṃ varārohe pūrvāṃ jātiṃ tvamātmanaḥ |
vetsi me brūhi tāṃ śrotuṃ jāyate kautukaṃ hṛdi || 25 ||
[Analyze grammar]

pūrvaṃ sthitā kā bhavatī patirvā kaḥ sthitastava |
kathaṃ bhāskariṇā tyaktau yuvāṃ pātakināvapi || 26 ||
[Analyze grammar]

suprājñovāca |
aprakāśyamidaṃ vākyaṃ yadyapi dvijasattama |
sthitāsmi vāramukhyā'haṃ ratiśāstraviśāradā || 27 ||
[Analyze grammar]

tasmiñjanmani pāpāni ghorāṇi subahūni ca |
mayā kṛtāni viprendra narakakleśadāni vai || 28 ||
[Analyze grammar]

ayaṃ nityodayo nāma śūdra svāḥcāravarjitaḥ |
paradāraharaḥ krūraḥ paradravyāpahārakaḥ || 29 ||
[Analyze grammar]

surāpo mitrahaṃtā ca bhrūṇahā parahiṃsakaḥ |
atyahaṃkārayuktaśca dharmaniṃdākaraḥ sadā || 30 ||
[Analyze grammar]

ekadā jñātibhiḥ sarvaiḥ parityakto hi sadvrataiḥ |
ājagāma mamāgāraṃ veśyāvibhramalolupaḥ || 31 ||
[Analyze grammar]

yuvānaṃ suṃdaraṃ dṛṣṭvā tamenaṃ dvijasattama |
mayāpi prītimāsādya saṃtuṣṭaḥ suratairapi || 32 ||
[Analyze grammar]

tato'nubhūya surataṃ mayā saha tapodhana |
ayamāha ca māṃ premṇā vinayāvanato vacaḥ || 33 ||
[Analyze grammar]

ahaṃ surataśāstrajñaḥ parityaktaḥ svabaṃdhubhiḥ |
yadi tvaṃ manyase tasmiṃstiṣṭhāmyatra tvayā saha || 34 ||
[Analyze grammar]

vinayāvanataṃ vākyamidaṃ śuśrāva taddivaja |
daṃpatībhāvamāsādya sahānena sthitāsmyaham || 35 ||
[Analyze grammar]

kadāciddivajaśārdūla ekādaśyāṃ tithau hareḥ |
mahadbhiḥ pīḍitāhaṃ ca dehadehāvaghātakaiḥ || 36 ||
[Analyze grammar]

tasminneva dvijaśreṣṭha jvarajarjaradehayā |
na pītamudakaṃ nānnaṃ bhuktaṃ ca parayā bhiyā || 37 ||
[Analyze grammar]

mamasnehodayo'yaṃ ca tasminneva dine hareḥ |
tatyājānnaṃ ca toyaṃ ca viṣaṇṇa iva janmanā || 38 ||
[Analyze grammar]

atha rātrau dvijaśreṣṭha dīpaṃ prajvālya sarpiṣā |
mayā kṛtaṃ jāgaraṇaṃ jvarāpahatacetasā || 39 ||
[Analyze grammar]

nārāyaṇa harekṛṣṇa rakṣa māmiti jalpatā |
muhurmuhuranenāpi kṛtaṃ jāgaraṇaṃ niśi || 40 ||
[Analyze grammar]

upavāsaprabhāveṇa keśavoccāraṇena ca |
āvayoḥ sakalaṃ pāpaṃ vinaṣṭamabhavaddivaja || 41 ||
[Analyze grammar]

tataḥ prabhāte vimale bhagavatyudite ravau |
jvarārditāhaṃ paṃcatvaṃ gatā brāhmaṇasattama || 42 ||
[Analyze grammar]

saṃprāptapaṃcatāṃ dṛṣṭvā māmayaṃ ca tataḥ śuciḥ |
sahatyā maraṇaṃ bheje niṃditaḥ sakalairjanaiḥ || 43 ||
[Analyze grammar]

sūryyajasya tataḥ preṣyairjvaladagninibhekṣaṇaiḥ |
baddhvā dṛḍhena pāśena nītau durgamavartmanā || 44 ||
[Analyze grammar]

śubhakarmā śubhaṃ vāpi citragupto yamājñayā |
sarvaṃ vicārayāmāsa mūlātsa tu vicakṣaṇaḥ || 45 ||
[Analyze grammar]

citragupta uvāca |
yadyapyetau mahābāho mahāpātakināṃ varau |
tathāpi pātakairmuktau hyekādaśyāmupoṣaṇāt || 46 ||
[Analyze grammar]

anicchayāpi yaḥ kuryātpuṇyamekādaśīvratam |
so'pi gacchetparaṃsthānaṃ sarvapāpavivarjitaḥ || 47 ||
[Analyze grammar]

ityuktaścitraguptena dharmarājo mahāyaśāḥ |
āsanātsahasotthāya vavaṃde tāmamuṃca saḥ || 48 ||
[Analyze grammar]

sugaṃdhaiścaṃdanairdivyairdhūpaiḥ puṣpaiśca mṛtyunā |
suvarṇābharaṇaireva maṃḍitau pāpavarjitau || 49 ||
[Analyze grammar]

phalairnānāvidhaistatra madhurairamṛtopamaiḥ |
bhāskariḥ kārayāmāsa prītyā bhojanamāvayoḥ || 50 ||
[Analyze grammar]

atha stutvā stavairdivyaiḥ svayamāvāṃ yamaḥ prabhuḥ |
samāropya rathe divye provāceti kṛtāñjali || 51 ||
[Analyze grammar]

yama uvāca |
yuvāṃ puṇyavatāṃ śreṣṭhau sarvapāpavivarjitau |
yatrāste bhagavānviṣṇurgaṃcchetāṃ tatra saṃprati || 52 ||
[Analyze grammar]

ityuktau dharmarājena vinayāvanatena vai |
athaitaduktamāvābhyāṃ natvā tatpādapaṅkaje || 53 ||
[Analyze grammar]

gaṃtavyaṃ nānyathā deva tadviṣṇoḥ paramaṃ padam |
kiṃtvasti narakaṃ draṣṭuṃ tvadgṛhasthaṃ spṛhāvayoḥ || 54 ||
[Analyze grammar]

yamājñayā tato vipra rathamāruhya śobhanam |
duṣprekṣyā nirayā dṛṣṭā āvābhyāṃ tatra vistarāḥ || 55 ||
[Analyze grammar]

brāhmaṇa uvāca |
tatrāvasthā pāpavatāṃ yā yā dṛṣṭāḥ pativrate |
vistareṇa samākhyātuṃ tāstāḥ sarvāstvamarhasi || 56 ||
[Analyze grammar]

puṇyātmānaḥ pathā yena vrajanti yamamaṃdiram |
pāpātmānaśca suśroṇi tanme kathaya vistarāt || 57 ||
[Analyze grammar]

puṇyātmā kīdṛśaṃ paśyettatra vaivasvataṃ prabhum |
puṇyātmanāṃ pāpināṃ ca paṃthānaṃ sukhaduḥkhadam || 58 ||
[Analyze grammar]

suprājñovāca |
ādau bravīmi paṃthānaṃ nṛṇāṃ puṇyavatāmaham |
śṛṇuṣva dvijaśārdūla śṛṇvatāṃ prītivarddhanam || 59 ||
[Analyze grammar]

prastarairvistarairbaddho divyavastraiḥ samāvṛtaḥ |
bhāti puṇyavatāṃ paṃthāḥ sarvopadravavarjitaḥ || 60 ||
[Analyze grammar]

kvacidgaṃdharvakanyābhirgīyate gānamadbhutam |
kvacinmañjuśarīrābhirapsarobhiśca nṛtyate || 61 ||
[Analyze grammar]

kvacidvīṇākvaṇaṃ nānā vādyaṃ cakrurmanoramam |
kvacitkusumavṛṣṭiśca kvacidvāyuśca śītalaḥ || 62 ||
[Analyze grammar]

kvacitprapā śītatoyā kvacicca bhuktiśālikāḥ |
kvaciddevāśca gaṃdharvāḥ paṭhaṃti stavamuttamam || 63 ||
[Analyze grammar]

kvacitkvaciddīrghikāśca phullapadmāḥ suśobhanāḥ |
succhāyāḥ pādapāḥ kvāpi puṣpitā vaṃjulādayaḥ || 64 ||
[Analyze grammar]

tatastu sukhasampannāḥ pathi gacchaṃti mānavāḥ |
puṇyātmāno dvijaśreṣṭha sukhamṛtyumavāpya ca || 65 ||
[Analyze grammar]

kecitturaṃgamārūḍhā nānālaṃkārabhūṣitāḥ |
uddaṇḍadhavalacchatrairgacchaṃtyāvṛtya mastakam || 66 ||
[Analyze grammar]

kecidyāṃti gajārūḍhā rathārūḍhāśca kecana |
yānārūḍhā janāḥ kecitsukhena yamamaṃdiram || 67 ||
[Analyze grammar]

keciddevāṅganā hasta nyastacāmaravāyubhiḥ |
gacchaṃti vījitā martyāḥ stūyamānāḥ surarṣibhiḥ || 68 ||
[Analyze grammar]

keciddivyāyudhadharāḥ srakcandanavibhūṣitāḥ |
bhuṃjaṃto yāṃti tāṃbūlaṃ puṇyātmāno yamālayam || 69 ||
[Analyze grammar]

nijagātratviṣā kecijjvālayaṃto diśo daśa |
vrajaṃti śamanāgāraṃ jalagrahanivāsinaḥ || 70 ||
[Analyze grammar]

kecicca pāyasaṃ divyaṃ bhuṃjato yāṃti sattama |
subhakṣaṇaṃ prakurvaṃtaḥ pathi yāṃtaḥ sukhena ca || 71 ||
[Analyze grammar]

keciddugdhaṃ pibaṃtaśca kecidikṣurasaṃ tathā |
kecittakraṃ pibaṃtaśca gacchaṃti yamamaṃdiram || 72 ||
[Analyze grammar]

keciddadhīni bhakṣaṃtaḥ kecinnānāphalāni ca |
kecinmadhupibaṃtaśca puṇyavaṃto vrajaṃti vai || 73 ||
[Analyze grammar]

tānāgatāṃstato dṛṣṭvā bahūndharmaparāyaṇān |
bhāskarīṃ prītimāsādya svayaṃ nārāyaṇo bhavet || 74 ||
[Analyze grammar]

caturbāhuḥ śyāmavarṇaḥ praphullakamalekṣaṇaḥ |
śaṅkhacakragadāpadmadhārī garuḍavāhanaḥ || 75 ||
[Analyze grammar]

svarṇayajñopavītī ca smaracārumahānanaḥ |
kirīṭī kuṇḍalī caiva vanamālāvibhūṣitaḥ || 76 ||
[Analyze grammar]

citragupto mahāprājñaścaṃḍādyā yamakiṃkarāḥ |
sarve nārāyaṇākārā babhūvurmadhuroktayaḥ || 77 ||
[Analyze grammar]

tataḥ svayaṃ dharmarājastānsarvānmanujottamān |
paramāṃ prītimāsādya mitravaccārcayeddvija || 78 ||
[Analyze grammar]

divyaratnaiḥ phalaiścaiva teṣāṃ puṇyavatāṃ nṛṇām |
bhojanaṃ kārayitvā tu tānuvācātha bhāskariḥ || 79 ||
[Analyze grammar]

yama uvāca |
yūyaṃ sarve mahātmāno narakakleśabhīravaḥ |
nijakarmaprabhāveṇa gamyatāṃ paramaṃ padam || 80 ||
[Analyze grammar]

saṃsāre janma saṃprāpya puṇyaṃ yaḥ kurute naraḥ |
sa me pitā sa me bhrātā sa me baṃdhusamaḥ suhṛt || 81 ||
[Analyze grammar]

ityuktā dharmarājena te sarve dvijasattama |
divyaṃ rathaṃ samāruhya nārāyaṇapuraṃ gatāḥ || 82 ||
[Analyze grammar]

puṇyātmanāṃ gatiḥ proktā samāsena dvijottama |
pāpātmanāṃ śṛṇu gatiṃ vistareṇa vadāmyaham || 83 ||
[Analyze grammar]

ṣaḍaśītisahasrāṇi yojanāni durātmanām |
prokto mārgasya vistāraḥ sarvaduḥkhānvitaḥ sa ca || 84 ||
[Analyze grammar]

kutracidvahnivṛṣṭiśca kutraciccāśmavarṣaṇam |
kvacitkvaciddvijaśreṣṭha saṃtaptaṃ taptavālukam || 85 ||
[Analyze grammar]

kvacitkvacittīkṣṇaśilāḥ kvacittaptaśilāstathā |
kvacitkvacicchastravṛṣṭiḥ kvacidaṃgāravarṣaṇam || 86 ||
[Analyze grammar]

kvacidagnirivātīva saṃtaptā vāṃti mārutāḥ |
gaṃbhīrāṃdhakarāḥ kvāpi tṛṇāvartamukhā dvija || 87 ||
[Analyze grammar]

kvacitkaṃṭakavṛṣṭiśca nārācamayakaṃṭakaiḥ |
pāṣāṇaśreṇayaḥ kvāpi duḥkharohāḥ sapannagāḥ || 88 ||
[Analyze grammar]

gacchaṃti pāpinastatra śuṣkakaṃṭhoṣṭhatālukāḥ |
evaṃ bahuvidhakleśe chāyājalavivarjite || 89 ||
[Analyze grammar]

tasminmārge dvijaśreṣṭha pāpino yāṃti duḥkhitāḥ |
nāmnā vimuktakeśāśca pretākārā bhayaṃkarāḥ || 90 ||
[Analyze grammar]

rudhiraughaplutāḥ kecitkecitkardamabhūṣitāḥ |
kecitkecicca kṛṣṇāṃgāḥ pathi gacchaṃti pāpinaḥ || 91 ||
[Analyze grammar]

kraṃdaṃto vyathayā kecitsravadbāṣpākule kṣaṇāḥ |
śocaṃtaḥ svāni karmāṇi kecidgacchaṃti pāpinaḥ || 92 ||
[Analyze grammar]

kasyaciccarmapāśasya baṃdhanaṃ pāpināṃ gale |
kaṃkāle kasyacidbaddhāḥ kasyacicca padadvaye || 93 ||
[Analyze grammar]

gale sūcīsamutkīrṇe pāśaṃ datvā dṛḍhaṃ ruṣā |
ākṛṣyaṃte yamapreṣyāḥ keṣāṃcicca kṛtainasām || 94 ||
[Analyze grammar]

vartmasthāngurupāṣāṇānvahaṃtaḥ karṇarandhrakaiḥ |
ayobhārāṃśca śīrṣāgrairvrajaṃti pathi pāpinaḥ || 95 ||
[Analyze grammar]

kāṃścidbhujeṣu pāśeṣu nayaṃti yamakiṃkarāḥ |
grīvāsu pāpinaḥ kecitkarapraharaṇairdṛḍhaiḥ || 96 ||
[Analyze grammar]

kṣiptakṣiptā yamapreṣyā nayaṃti yamakiṃkarāḥ |
yāṃtyadhaḥ śirasaḥ kecidūrdhvapādāstathāpare || 97 ||
[Analyze grammar]

gacchaṃti bāhubhiḥ kecidekapādāśca kecana |
ityevaṃ vikṛtākārā ārtarāvavirāvaṇāḥ || 98 ||
[Analyze grammar]

yamadūtaistāḍyamānāḥ pāpino yāṃti tatpathe |
teṣvāgateṣu sarveṣu pāpātmā suruṣā yamaḥ || 99 ||
[Analyze grammar]

divyāṃ mūrtiṃ parityajya babhūvātyaṃtabhairavaḥ |
triṃśadyojanadīrghāṃgo vāpīsadṛśalocanaḥ || 100 ||
[Analyze grammar]

dhūmravarṇo mahātejāḥ pralaṃbo ghargharadhvaniḥ |
sudīrghadaśanaśreṇiḥ śūrpopama nakhāvaliḥ || 101 ||
[Analyze grammar]

pracaṇḍamahiṣārūḍhaḥ saṃdaṣṭadaśanacchadaḥ |
daṃḍahastaścarmapāśo bhrukuṭī kuṭilānanaḥ || 102 ||
[Analyze grammar]

citragupto mahāmāyaḥ krodhāruṇitalocanaḥ |
aṭṭāṭṭahāsaṃ kurvāṇaḥ samavartī virājate || 103 ||
[Analyze grammar]

caṃḍādyāḥ kiṃkarāḥ sarve pāśamudgarapāṇayaḥ |
babhūvurbhairavāḥ kruddhā garjaṃto jaladā iva || 104 ||
[Analyze grammar]

jahi jahyāśu pāpiṣṭhānbhindhi cchiṃdaya viṃdhaya |
samaṃtādeva dhāvaṃto valgaṃti yamakiṃkarāḥ || 105 ||
[Analyze grammar]

tānāha patataḥ sarvānpāpino dharmarāṭprabhuḥ |
tarjayetkāladaṃḍena tyajanhuṃkāraniḥsvanam || 106 ||
[Analyze grammar]

yama uvāca |
rere pāpā durācārā yuṣmābhiravivekibhiḥ |
aho kṛtāni pāpāni ātmapīḍākarāṇyapi || 107 ||
[Analyze grammar]

mastakopari tiṣṭhaṃtaṃ nekṣadhvaṃ samavartinam |
jñātvāpi māṃ jīviteśaṃ yuṣmābhiḥ pātakaṃ kṛtam || 108 ||
[Analyze grammar]

puṇyātmanāmahaṃ baṃdhurahaṃ pāpātmanāṃ ripuḥ |
iti kutrāpi yuṣmābhirna śrutaṃ śravaṇaiḥ svakaiḥ || 109 ||
[Analyze grammar]

nirayā duḥsahāḥ saṃti nānāduḥkhasamanvitāḥ |
pāpino bhuṃjate tāṃśca yuṣmābhirneti viśrutam || 110 ||
[Analyze grammar]

matvā mithyaiva yuṣmābhiścarcā mama durāśayāḥ |
adya saiva svakairnetrairdṛśyatāṃ kṛtapātakāḥ || 111 ||
[Analyze grammar]

vittāṃdhyena vaco mattā yūyaṃ sarve sadaiva hi |
cakrire pāpajālāni yuṣmābhiḥ satataṃ yathā || 112 ||
[Analyze grammar]

tathā pāpaphalaṃ duṣṭā bhuṃjatāṃ kraṃdanena kim |
suprājñovāca |
ityuktvā bhāskarirdevaścitraguptamuvāca ha || 113 ||
[Analyze grammar]

eteṣāṃ pāpakarmāṇi mahābhāga vicāraya |
dharmarājavacaḥ śrutvā citragupto mahattadā || 114 ||
[Analyze grammar]

teṣāṃ yāvaṃti pāpāni tāvaṃti prāha coditaḥ |
tataste pāpinaḥ sarve kraṃdaṃti dvijasattama || 115 ||
[Analyze grammar]

ityūcuḥ śamanaṃ bhītāścarmapāśe niyaṃtritāḥ |
pāpina ūcuḥ |
asmābhiryāni pāpāni kṛtāni bhāskarātmaja || 116 ||
[Analyze grammar]

ke sthitāḥ sākṣiṇastatra ke vā yūyaṃ niveditāḥ |
aśubhaṃ vā śubhaṃ vāpi yato'smābhiḥ kṛtaṃ purā || 117 ||
[Analyze grammar]

tathā ca dṛṣṭaṃ kenātra puro'smākaṃ nigadyatām |
tataḥ prahasya bhagavānkopena mahatā dvija || 118 ||
[Analyze grammar]

āhūya sākṣiṇaḥ sarvānidaṃ vacanamabravīt |
yama uvāca |
yūyaṃ sarve yathāvṛttaṃ saṃnidhau sākṣiṇastathā || 119 ||
[Analyze grammar]

ākāśaṃ pṛthivīṃ caiva jalaṃ ca tithayastathā |
dinaṃ rātrirubhe saṃdhye dharmaścaite tu sākṣiṇaḥ || 120 ||
[Analyze grammar]

teṣāṃ pāpātmanāmūcuḥ sarvaṃ karmaśubhāśubham |
yasya yasya ca velāyāṃ karma yadyadikāritam || 121 ||
[Analyze grammar]

sa sa sākṣī tasya tasya jagāda yamasannidhau |
tacchrutvā pāpinaḥ sarve sādhvasā kṛṣṭamānasāḥ || 122 ||
[Analyze grammar]

sakaṃpahṛdayāstasthurmeghaṃ dṛṣṭvā mṛgā iva |
tatastu daṃtāvalibhiḥ kurvankaḍakaḍadhvanim || 123 ||
[Analyze grammar]

dharmarāṭkāladaṃḍena tāñjaghāna pṛthakpṛthak |
tāḍitā dharmarājena te sarve kṛtapātakāḥ || 124 ||
[Analyze grammar]

kraṃdaṃti nijakarmāṇi śocaṃtaḥ prāptasādhvasāḥ |
tatastānpāpinaḥ sarvāndūtāścaṃḍādayo ruṣā || 125 ||
[Analyze grammar]

narakeṣu yamādeśādrauravādiṣu cikṣipuḥ |
tapane cikṣipuḥ kāṃścidavīcau kṛtapātakān || 126 ||
[Analyze grammar]

saṃghāte kālasūtre ca mahārauravake tathā |
saṃtapte vālukākuṃḍe kuṃbhīpāke tathāparān || 127 ||
[Analyze grammar]

nirucchvāse mahāghore cikṣipuśca pramarddane |
asipatravane ghore nānābhakṣeṣu pāpinaḥ || 128 ||
[Analyze grammar]

vaitaraṇyāṃ tathā ke'pi cikṣipuryamakiṃkarāḥ |
ghore viṣṭhāhrade kāṃścittuṣāṃgārāsthikaṃṭakaiḥ || 129 ||
[Analyze grammar]

pūrṇe nitāṃtasaṃtapte cikṣipuryamakiṃkarāḥ |
purīṣalepane caiva purīṣabhojane tathā || 130 ||
[Analyze grammar]

svamāṃsabhojane caiva sthāpitā yamakiṃkaraiḥ |
śleṣmāṇaṃ bhuṃjate kecitkecidvīryaṃ ca bhuṃjate || 131 ||
[Analyze grammar]

pibaṃti kecinmūtrāṇi kecidraktāni pāpinaḥ |
keṣāṃcidvadaneṣveva jalaukāḥ pannagopamāḥ || 132 ||
[Analyze grammar]

pūryaṃte pannagāścaiva yamadūtairbhayaṃkaraiḥ |
utpādyaṃte'tisaṃtaptairjihvāśca dvijasattama || 133 ||
[Analyze grammar]

keṣāṃcitkarṇaraṃdhreṣu mukheṣu ca kṛtainasām |
taptatailāni pūryaṃte nirddayairyamakiṃkaraiḥ || 134 ||
[Analyze grammar]

keṣāṃcitkhaṅgadhārābhirbāhuṃ ca caraṇaṃ tathā |
karṇādināsikāścaiva cchiṃdaṃti ca durātmanām || 135 ||
[Analyze grammar]

śayanaṃ kurvate kecijjvaladaṃgārasaṃcaye |
kecinnārācatulyeṣu śayanaṃ kaṃṭakeṣu ca || 136 ||
[Analyze grammar]

kardameṣu ca tapteṣu kāṃścicchamanakiṃkarāḥ |
pātayaṃti dvijaśreṣṭha keśeṣvākṛṣya pāpinaḥ || 137 ||
[Analyze grammar]

vamaneṣu ca keṣāṃcinnakhasaṃdhiṣu pāpinām |
taptasūcīsahasrāṇi prakṣipaṃti muhurmuhuḥ || 138 ||
[Analyze grammar]

saṃtaptalohaśūlāgre kāṃścidāropayaṃti vai |
kraṃdaṃti kaṃṭakaistīkṣṇaiḥ keṣāṃcinmastakāni vai || 139 ||
[Analyze grammar]

gṛhītvā hastapādeṣu śālmalidrumakaṃṭakaiḥ |
niṣkuṣaṃti ruṣā kāṃścidārttarāvavirāviṇaḥ || 140 ||
[Analyze grammar]

baddhvā galeṣu pāṣāṇaṃ kāṃścicchamanakiṃkarāḥ |
raktagarte payogarte pātayaṃti punaḥ punaḥ || 141 ||
[Analyze grammar]

yāmyairdūtairudgiraṃti śirāṃsi pāpināṃ nṛṇām |
cūrṇayaṃtyupalairyāmyā muhurmuhuratikrudhā || 142 ||
[Analyze grammar]

vakṣomadhyeṣu keṣāṃcillohakīlakasaṃcayān |
āropayaṃti lokānāṃ kraṃdatāṃ duritātmanām || 143 ||
[Analyze grammar]

cakṣūṃṣi baḍiśaiḥ keṣāmutpāṭyaṃte kṛtainasām |
keṣāṃcinnāsikā eva pūryyaṃte vṛścikairdvija || 144 ||
[Analyze grammar]

keṣāṃcidvṛkṣaśākhāyāṃ baddhvā pādāṃśca pāśakaiḥ |
jvālayaṃti tale vahniṃ sadhūmaṃ yamakiṃkarāḥ || 145 ||
[Analyze grammar]

dhūmapānaṃ prakurvanti te tatra kṛtakilviṣāḥ |
adhomukhā ūrdhvapādāstasthurācandra tārakam || 146 ||
[Analyze grammar]

musalairmudgaraiḥ kecittāḍyamānāḥ punaḥ punaḥ |
yāmyairdūtairudgiranti śoṇitāni vyathākulāḥ || 147 ||
[Analyze grammar]

andhakāramaye gehe pūtigandhavati dvija |
daṃśaiśca maśakaiścaiva kecitsīdaṃti pāpinaḥ || 148 ||
[Analyze grammar]

bhasmāni bhuñjate kecitkṛmīnkecicca bhuñjate |
keciddurgandhamāṃsāni kecicca pūtimṛttikām || 149 ||
[Analyze grammar]

śvabhirvyāghraiḥ śṛgālaiśca vajradantanakhaistathā |
ṛkṣaiḥ kecidbhakṣyamāṇāḥ kraṃdanti rudhirāplutāḥ || 150 ||
[Analyze grammar]

nitāṃtograviṣaiḥ sarpairbhakṣyamāṇāstathāpare |
anye mahiṣaśṛṃgāgranirbhinnavakṣaso dvija || 151 ||
[Analyze grammar]

patanti mūrcchitāḥ pṛthvīṃ siṃcaṃto rudhirairmahīm |
yamadūtadhanurmuktairghorairāśīviṣopamaiḥ || 152 ||
[Analyze grammar]

jarjarākhiladehāśca luṭhaṃtyanye mahītale |
taptāyaḥ piṇḍanilayaṃ taptapāṣāṇameva ca || 153 ||
[Analyze grammar]

daṃśaśastreṇa keṣāṃcitkuṣṇaṃti vadaneṣu ca |
nāsārandhreṣu keṣāṃcidyamadūtā mukheṣu ca || 154 ||
[Analyze grammar]

śvāsānilanirodhārthaṃ nāsārandhraṃ vayaṃti vai |
keṣāṃcittīkṣṇadhārābhiryamaśāktibhiruddhataiḥ || 155 ||
[Analyze grammar]

utpāṭyaṃteṃgacarmāṇi yamadūtairmahābalaiḥ |
kāṃścidgṛhītvā keśeṣu nipātya pṛthivītale || 156 ||
[Analyze grammar]

kīlaiḥ pādādibhirghātaistāḍayaṃti sadaiva hi |
kecitkṣārāṃbudhārābhiḥ saṃtaptāḥ kṛtapātakāḥ || 157 ||
[Analyze grammar]

kṣārāṃbupānaṃ kurvaṃti kraṃdaṃto bahudhā dvija |
pittapānaṃ mahābhāga kecitkurvanti pāpinaḥ || 158 ||
[Analyze grammar]

snuhīkṣīrāṇi kecicca pibaṃti pāpināṃ varāḥ |
keṣāṃcitsvapatāṃ bhūmau vakṣaḥsu yamakiṃkaraiḥ || 159 ||
[Analyze grammar]

dīyaṃte gurupāṣāṇāḥ saṃtaptāḥ parvatopamāḥ |
kāṣṭhakhaṃḍadvayaṃ datvā grīvāyāṃ ca gale tathā || 160 ||
[Analyze grammar]

udagramukhaṃ badhnanti keṣāṃciddṛḍhapāśakaiḥ |
āropya vṛkṣaśākhāyāṃ kāṃścidbhūmau kṣipaṃti ca || 161 ||
[Analyze grammar]

utthāpayaṃti bhūmau ca prakṣipaṃti punaḥ punaḥ |
evaṃ te pāpinaḥ sarve kṣudhitāstṛṣitāstathā || 162 ||
[Analyze grammar]

trāhi trāhīti jalpaṃto rudaṃti yātanāgṛhe |
yugakalpāṃtaparyaṃtaṃ bhuktvā nirayayātanām || 163 ||
[Analyze grammar]

nātibhuktvā pāpaśeṣe jāyaṃte pāpayoniṣu |
pāpayonau samutpannā bhavaṃti vyādhipīḍitāḥ || 164 ||
[Analyze grammar]

hīnāṃgā adhikāṃgāśca duḥkhinaḥ pāpasevakāḥ |
aputrā atimūrkhāśca parahiṃsāparāyaṇāḥ || 165 ||
[Analyze grammar]

alpāyuṣo'lpamatayaḥ kubhāryāpatayastathā |
nityaṃ pāpāni karmāṇi karmaṇā manasā girā || 166 ||
[Analyze grammar]

punaḥ pāpaprabhāvena nirayaṃ yāṃti pūrvavat |
tasmātpāpaṃ na kartavyaṃ kadācidapi sattamaiḥ || 167 ||
[Analyze grammar]

narāṇāṃ kṛtapāpānāṃ narakānnāsti niṣkṛtiḥ |
saṃkṣepātpāpināṃ duḥkhaṃ niruktaṃ dvijasattama || 168 ||
[Analyze grammar]

samyagvaktuṃ kaḥ kṣamosti varṣāyutaśatairapi |
durgatīnāṃ tato dṛṣṭvā manujānāṃ kṛtainasām || 169 ||
[Analyze grammar]

āvāṃ vimānamāruhya nārāyaṇapuraṃ gatau |
kalpakoṭisahasrāṇi bhuktvā bhogānharergṛhe || 170 ||
[Analyze grammar]

jātau vai rājavaṃśe'sminviśuddhe dvijasattama |
atra bhuktvākhilānbhogānsarvasaṃpatsamanvitān || 171 ||
[Analyze grammar]

sukhamṛtyuṃ samāsādya gaṃtavyaṃ paramaṃ padam |
ekādaśīvratasamaṃ vrataṃ nāsti jagattraye || 172 ||
[Analyze grammar]

anicchayāpi yatkṛtvā gatirevaṃvidhā'vayoḥ |
ekādaśīvrataṃ ye tu bhaktibhāvena kurvate || 173 ||
[Analyze grammar]

na jāne kiṃ bhavetteṣāṃ vāsudevānukampayā |
iti te kathitaṃ sarvaṃ pṛṣṭaṃ brāhmaṇasattama || 174 ||
[Analyze grammar]

viṣṇordivasamāhātmyaṃ kimanyacchrotumarhasi |
vyāsa uvāca |
tasyaitadvacanaṃ śrutvā sa vipraḥ paramārthavit || 175 ||
[Analyze grammar]

ekādaśīvrate cittaṃ cakāra sudṛḍhaṃ nijam |
sa rājā rājamahiṣī ciraṃ bhuktvā vasuṃdharām || 176 ||
[Analyze grammar]

aṃte viṣṇupuraṃ gatvā prāptavaṃtau paraṃ padam |
vratarājasya māhātmyaṃ ye śṛṇvaṃti paṭhaṃti ca || 177 ||
[Analyze grammar]

pāpajālairvinirmuktā labhaṃte harisannidhau || 178 ||
[Analyze grammar]

iti śrīpadmapurāṇe kriyāyogasāre ekādaśīmāhātmye trayoviṃśatitamo'dhyāyaḥ || 23 ||
[Analyze grammar]