Padma Purana [sanskrit]

462,305 words | ISBN-13: 9789385005305

The Padma-purana Book 7 Chapter 21 (Sanskrit text), including grammatical analysis, glossary and relevant print editions. The Padmapurana is a one of the largest of the eighteen Major Puranas containing roughly 50,000 metrical verses. Although popular for its inclusion of the Ramayana and large sections on pilgrimage guides this is also known for its dedication to both Shiva and Vishnu.

[English text for this chapter is available]

vyāsa uvāca |
brahmaṇo vacanaṃ śrutvā hariśarmā dvijottamaḥ |
bhūyo'pi taṃ namaskṛtya bhaktyā prāheti jaimine || 1 ||
[Analyze grammar]

hariśarmovāca |
proktāni yāni dānāni sukhahūni tvayā prabho |
kasmai deyāni dānāni tanme gaditumarhasi || 2 ||
[Analyze grammar]

brahmovāca |
sarveṣāmeva varṇānāṃ brāhmaṇaḥ paramo guruḥ |
tasmai deyāni dānāni bhaktiśraddhāsamanvitaiḥ || 3 ||
[Analyze grammar]

sarvadevāśrayo vipraḥ pratyakṣastridaśo bhuvi |
sa tārayati dātāraṃ dustare viśvasāgare || 4 ||
[Analyze grammar]

brāhmaṇa uvāca |
sarvavarṇagururviprastvayā proktaḥ surottama |
teṣāṃ madhye tu kaḥ śreṣṭhaḥ kasmai dānaṃ pradīyate || 5 ||
[Analyze grammar]

brahmovāca |
sarve'pi brāhmaṇāḥ śreṣṭhāḥ pūjanīyāḥ sadaiva hi |
steyādidoṣataptā ye brāhmaṇā brāhmaṇottama || 6 ||
[Analyze grammar]

asmākaṃ dveṣiṇaste ca parebhyo na kadācana |
anācārā dvijāḥ pūjyā na ca śūdrā jitendriyāḥ |
abhakṣyabhakṣakā gāvo lokānāṃ mātaraḥ smṛtāḥ || 7 ||
[Analyze grammar]

māhātmyaṃ bhūmidevānāṃ viśeṣāducyate mayā |
tava snehāddvijaśreṣṭha niśāmaya samāhitaḥ || 8 ||
[Analyze grammar]

kṣattriyāṇāṃ ca vaiśyānāṃ śūdrāṇāṃ guravo dvijāḥ |
anyonyaṃ guravo viprāḥ pūjanīyāśca bhūsurāḥ || 9 ||
[Analyze grammar]

brāhmaṇaṃ pūjayedyastu viṣṇubuddhyā narottama |
āyuḥ putraśca kīrtiśca saṃpattistasya varddhate || 10 ||
[Analyze grammar]

saṃcinoti dvijaṃ yastu mūḍhadhīrmānavo bhuvi |
sudarśanena tacchīrṣaṃ haṃtumicchati keśavaḥ || 11 ||
[Analyze grammar]

puṣpahastaṃ payohastaṃ devahastaṃ ca jaimine |
na namedbrāhmaṇaṃ prājñastailābhyaṃgitavigraham || 12 ||
[Analyze grammar]

jalasthaṃ devaveśmasthaṃ dhyānamajjitacetasam |
devapūjāṃ prakurvaṃtaṃ na namedbrāhmaṇaṃ budhaḥ || 13 ||
[Analyze grammar]

bahiṣkriyāṃ prakurvaṃtaṃ bhuṃjānaṃ ca dvijottama |
tathā sāmāni gāyaṃtaṃ na namedbrāhmaṇaṃ budhaḥ || 14 ||
[Analyze grammar]

brāhmaṇā yatra tiṣṭhaṃti bahabo dvijasattama |
pratyekaṃ tu namaskārastatra kāryo na dhīmatā || 15 ||
[Analyze grammar]

kṛtābhivādanaṃ vipraṃ bhaktyā yo nābhivādayet |
sa cāṇḍālasamo jñeyo nābhivādyaḥ kadācana || 16 ||
[Analyze grammar]

kṛtapraṇāmaṃtanayaṃnametāṃpitaraunaca |
kṛtapraṇāmāḥ sarve'pi namaskāryā dvijairdvijāḥ || 17 ||
[Analyze grammar]

kṛtadoṣāndvijāngāśca na dviṣanti vicakṣaṇāḥ |
dviṣaṃti vāpi mohena teṣāṃ ruṣṭaḥ sadā hariḥ || 18 ||
[Analyze grammar]

yācakānbrāhmaṇānyastu kopadṛṣṭyā prapaśyati |
sūcīpraropaṇaṃ tasya netrayoḥ kurute yamaḥ || 19 ||
[Analyze grammar]

vipranirbhartsanaṃ mūḍhā yena vaktreṇa kurvate |
tasminvaktre yamastaptaṃ lohadaṃḍaṃ dadāti vai || 20 ||
[Analyze grammar]

brāhmaṇo yadgṛhaṃ bhuṃkte tadgṛhe keśavaḥ svayam |
devatāḥ sakalā ye ca pitaraśca surarṣayaḥ || 21 ||
[Analyze grammar]

viprapādodakaṃ yastu kaṇamātraṃ vahedbudhaḥ |
dehasthaṃ pātakaṃ tasya sarvamevāśu naśyati || 22 ||
[Analyze grammar]

koṭibrahmāṇḍamadhyeṣu saṃti tīrthāni yāni vai |
tīrthāni tāni sarvāṇi viprapāde tu dakṣiṇe || 23 ||
[Analyze grammar]

viprapādodakairnityaṃ siktaṃ syādyasya mastakam |
sa snātaḥ sarvatīrtheṣu sarvayajñeṣu dīkṣitaḥ || 24 ||
[Analyze grammar]

sarvapāpāni ghorāṇi brahmahatyādikāni ca |
sadyastasya vinaśyaṃti viprapādāṃbudhāraṇāt || 25 ||
[Analyze grammar]

kṣayādyā vyādhayaḥ sarvāḥ paramakleśadāyikāḥ |
gacchaṃti vilayaṃ sadyo viprapādāṃbudhāraṇāt || 26 ||
[Analyze grammar]

pitrarthaṃ yāni toyāni dīyaṃte viprapādayoḥ |
taistṛptāḥ pitaraḥ svarge tiṣṭhaṃtyācaṃdratārakam || 27 ||
[Analyze grammar]

prakṣālya vipracaraṇau dūrvābhiryo'rcayedbudhaḥ |
tenārcito jagatsvāmī viṣṇuḥ sarvasurottamaḥ || 28 ||
[Analyze grammar]

viprāṇāṃ pādanirmālyaṃ yo martyaḥ śirasā vahet |
satyaṃ satyamahaṃ vacmi tasya muktirhi śāśvatī || 29 ||
[Analyze grammar]

vipraṃ pradakṣiṇīkṛtye vaṃdate yo narottamaḥ |
pradakṣiṇīkṛtā tena saptadvīpā vasundharā || 30 ||
[Analyze grammar]

yo dadyātphalatāṃbūlaṃ viprāṇāṃ pādasecanāt |
rogī rogātpramucyeta pāpī mucyata pātakāt || 31 ||
[Analyze grammar]

mucyate bandhanādbaddho viprāṇāṃ pādasecane |
anapatyāśca yā nāryo mṛtā patyāśca yāḥ striyaḥ || 32 ||
[Analyze grammar]

bahvapatyā jīvavatsā viprapādasya secanāt |
māhāmtyaṃ śṛṇu viprendra sarvapāpapraṇāśanam || 33 ||
[Analyze grammar]

dvijāṃghrisecanasyāhaṃ samāsena bravīmi te |
pūrvaṃ bhadrakriyo nāma pavitrakulasaṃbhavaḥ || 34 ||
[Analyze grammar]

babhūva brāhmaṇo viṣṇoḥ paricaryāparāyaṇaḥ |
vedavitsadayaḥ śāṃtaḥ pitṛbhaktiparāyaṇaḥ || 35 ||
[Analyze grammar]

atithīnāṃ kṛtā pūjā jñātipūjākarastathā |
ekadā sa dvijaśreṣṭhastailābhyaṃgitavigrahaḥ || 36 ||
[Analyze grammar]

jagāma sarasīṃ snātuṃ gṛhītasnānavastrakaḥ |
kṛtasnānaḥ sa viprendro vidhinā tarpaṇādikam || 37 ||
[Analyze grammar]

cakāra sarvaśāstrajñaḥ sarvalokahite rataḥ |
samāpya snānakarmāṇi harināmāni kīrtayan || 38 ||
[Analyze grammar]

ājagāma svake gehe haripūjāparo'bhavat |
pādau prakṣālayāmāsa pānīyairatiśītalaiḥ || 39 ||
[Analyze grammar]

prakṣālitāṃghrihasto'sau brāhmaṇo brāhmaṇārcakaḥ |
sthāpayāmāsa sarvāṇi snānopakaraṇāni ca || 40 ||
[Analyze grammar]

dvāradeśe dvijaśreṣṭha nidāghatapanātapaiḥ |
tāpito bhaṣakaḥ kaścidagnikalpaiḥ samāgataḥ || 41 ||
[Analyze grammar]

viprapādodake tasminprasuptotyaṃtaśītale |
viprapādodakasparśādbhaṣakto'tyaṃtapātakī || 42 ||
[Analyze grammar]

vimuktaḥ pātakaiḥ sarvaiḥ koṭijanmakṛtairapi |
sa supto mandiradvāri bhaṣako vikalastṛṣā || 43 ||
[Analyze grammar]

pānīyaṃ yācayāmāsa tāḍito dvijakiṃkaraiḥ |
jagāma paṃcatāṃ sadyastatraiva bhaṣako dvijaḥ || 44 ||
[Analyze grammar]

dvijāṅghrisecanasparśādbhaṣako vītakalmaṣaḥ |
tamālokya mahātmānaṃ mūrtimaṃtamiveśvaram || 45 ||
[Analyze grammar]

vinayāvanataḥ prāha brāhmaṇo'sau tapodhanaḥ |
brāhmaṇa uvāca |
kastvaṃ brūhi mahābhāga kena duḥkhī tu karmaṇā |
bhaṣakasya kule jāto nānāduḥkhasamākule || 46 ||
[Analyze grammar]

brahmovāca |
vacanaṃ tasya viprarṣeḥ samākarṇya mahāyaśāḥ |
kathayāmāsa vṛttāṃtaṃ mūlataḥ sarvamātmanaḥ || 47 ||
[Analyze grammar]

ahamāsaṃ sarvabhaumaḥ śaṅkhanāmā mahābalaḥ |
caturvarṣasahasrāṇi mahīṃ kṛtsnāmapālayam || 48 ||
[Analyze grammar]

mayājñayā kṛtāḥ sarve jitāśca ripavo yudhi |
dattāni sarvadānāni pālitājñā tayonijāḥ || 49 ||
[Analyze grammar]

ekadā'haṃ mahābhāgaṃ saṃdhitaḥ smarasāyakaiḥ |
balājjanavadhūṃ kāṃcijjahāra bhṛśasuṃdarīm || 50 ||
[Analyze grammar]

tena pāpaprabhāveṇa mama śrīḥ saṃśayaṃ gatā |
tatassamastairlokaiśca nirasto'haṃ mahābalaḥ || 51 ||
[Analyze grammar]

tatastu bhraṣṭarājyo'haṃ kānanābhyaṃtare sthitaḥ |
kṣudhātṛṣāpariśrāṃtaḥkadācitpaṃcatāṃ gataḥ || 52 ||
[Analyze grammar]

aṃtakasya puraṃ gatvā duḥkhaṃ bhuktaṃ mayā ciram |
tadākarṇya viprendra śṛṇvatāṃ cittaduḥkhadam || 53 ||
[Analyze grammar]

saṃtaptalohaśastrāyāṃ taptā tāmramayīṃ mahīm |
saṃreme prajvaladvahniṃ śikhātatisubhīṣaṇām || 54 ||
[Analyze grammar]

tatastu śamanādeśāllohastaṃbhaṃ subhīṣaṇam |
jvalatā vahninā taptaṃ samāliṅgya sthito'smyaham || 55 ||
[Analyze grammar]

śīte kṣurāṃbudhārābhiḥ sikto'haṃ yamakiṅkaraiḥ |
duḥkhamanyacca sumahadbhuktaṃ tatra yamālaye || 56 ||
[Analyze grammar]

tato narakaśeṣe ca janmāsādya muhurmuhuḥ |
pāpayonau mayā duḥkhamanubhūtaṃ ciraṃ mahat || 57 ||
[Analyze grammar]

tvatpādajalasaṃsargānmukto'haṃ pāparajjunā |
gacchāmi paramaṃ dhāma durllabhaṃ yogināmapi || 58 ||
[Analyze grammar]

tvaṃ me gururdvijaśreṣṭha namaste'stu mahātmane |
tvatprasādādvimukto'haṃ pāpairyāmi puraṃ hareḥ || 59 ||
[Analyze grammar]

bhadrakriya uvāca |
pūrvajanmakathā rājanmanuṣyo na kadācana |
atastu tanayaṃ tyaktvā sarvadā nītimācaret || 60 ||
[Analyze grammar]

nītigrāhī nṛpo yastu vipattirnāsti tasya vai |
ciraṃ bhunakti pṛthivīṃ kaṃṭakaiḥ parivarjitām || 61 ||
[Analyze grammar]

yasmai na rocate nītirbhūpālāya durātmane |
bhraṣṭaśrīracireṇāpi sa bhavennātra saṃśayaḥ || 62 ||
[Analyze grammar]

āyurbalaṃ yaśo mitraṃ vijayaṃ sukhamicchatā |
maṃtriṇaḥ paṃḍitā rājñā niyojyāḥ sarvadaiva hi || 63 ||
[Analyze grammar]

avajñāya mahībhartustyajaṃte sādaraṃ budhāḥ |
sabhāyāṃ budhahīnāyāṃ nītirbalavatī nahi || 64 ||
[Analyze grammar]

tato nītau vinaṣṭāyāṃ sahasā dharaṇīpateḥ |
rājaśriyo vinaśyaṃti sakośabalavāhanāḥ || 65 ||
[Analyze grammar]

brāhmaṇāngaṇakāṃścaiva vaidyāṃśca bāṃdhavāṃstathā |
nṛpāḥ kalyāṇamicchaṃti na dviṣaṃti kadācana || 66 ||
[Analyze grammar]

gataśrīrgaṇakadveṣṭā vaidyadveṣṭāyuvarjitaḥ |
jñātidveṣṭāniṣkulaḥ syāddvijadveṣṭākhilārtibhāk || 67 ||
[Analyze grammar]

rājānaḥ pitaraḥ proktāḥ putrā jānapadāstathā |
tato bhūpāḥ pālayaṃti prajāḥ putramivaurasān || 68 ||
[Analyze grammar]

pauraloke tathā kuryādyathā sneho nijātmaje |
prajāpīḍākarā ye ca bhūpālā atipāpinaḥ || 69 ||
[Analyze grammar]

śiraḥsthā vipadasteṣāṃ vijñeyā dīrghadarśibhiḥ |
vivekino mahīpālāḥ pālayaṃti yathā prajāḥ || 70 ||
[Analyze grammar]

tathā tānapi deveśaḥ pālayatyaniśaṃ hariḥ |
prajānāṃ pālanaṃ daṃḍaṃ dve'pi rājñe śubhāvahe || 71 ||
[Analyze grammar]

dvābhyāṃ vivarjitā bhūpāste vijñeyā nṛpādhamāḥ |
duṣṭānāṃ śāsanaṃ caiva śiṣṭānāṃ pratipālanam || 72 ||
[Analyze grammar]

prakurvaṃto mahīpālāściraṃ naṃdaṃti bhūtale |
nyāyenopārjitaṃ vittaṃ yatnādrakṣenmahīpatiḥ || 73 ||
[Analyze grammar]

durvṛtto hi mahīpālo vipattau na hi vistaret |
nṛpāḥ kalyāṇamicchaṃto nijarājyaṃ śubhāśubham || 74 ||
[Analyze grammar]

paśyaṃti nityaṃ viprendra satvarāścāracakṣuṣā |
paracakrabhayaṃ yāvannāyāti ciṃtayedbhayam || 75 ||
[Analyze grammar]

āgate tu bhaye bhūpa ācarennirbhayo'pi ca |
jñātau vāpi ca mitre vā putre vāpi ca maṃtriṇi || 76 ||
[Analyze grammar]

kuryānmukhena gāṃbhīryaṃ manasā premakevalam |
maṃtriṇo jñātayaḥ putrāḥ prajāśca bhrātarastathā || 77 ||
[Analyze grammar]

gāṃbhīryahīnaṃ bhūpālaṃ manyaṃte nahi bhūpavat |
tiṣṭhaṃti prathamaṃ dūre na saṃti puratastathā || 78 ||
[Analyze grammar]

lokāśrayaṃ na hīcchanti tyaktagāṃbhīryabhūpateḥ |
ekaśca maṃtrī rājā vai ciraṃ rājyatvamicchatā || 79 ||
[Analyze grammar]

kartavyaḥ sakale rājye vṛddhaye na hi bhūsura |
atyaṃtabuddhivṛttīnāṃ bhṛtyānāṃ sapadaṃ haret || 80 ||
[Analyze grammar]

tasmātsaṃsadi bhūpālo bhṛtyamanyaṃ niyojayet |
mūrkhastrīvijito rājā gītavādyarataḥ sadā || 81 ||
[Analyze grammar]

turaṃgavāhanairhīnaḥ sahasā vipadaṃ vrajet |
ācāragrahaṇaṃ satyaṃ svavākyapratipālanam || 82 ||
[Analyze grammar]

gāṃbhīryaṃ ceti bhūpānāṃ lakṣaṇāni dvijottama |
sa kathaṃ nṛpatiryastu pratāpena vivarjitaḥ || 83 ||
[Analyze grammar]

sa kathaṃ nṛpatiryenā'nirjitā paramedinī |
jitāyāṃ paramedinyāṃ yāvatpādaṃ vrajennṛpaḥ || 84 ||
[Analyze grammar]

pratipāde'śvamedhasya phalaṃ prāpnoti cākṣayam |
parabhūmijayākāṃkṣī hato nṛpatibhiryudhi || 85 ||
[Analyze grammar]

tadāgacchetparaṃ sthānaṃ vimuktaḥ sarvapātakaiḥ |
yudhi prāptajayo rājā prāpnoti paramaṃ padam || 86 ||
[Analyze grammar]

saṃgrāme prāptamṛtyurvā divīndra saṃpadaṃ labhet |
tyaktaśastraṃ tyaktasatvaṃ palāyanaparāyaṇam || 87 ||
[Analyze grammar]

yoddhāraṃ yadi yo haṃti sa bhūpo yātyadhogatim |
palāyanaparo yuddhe taddhaṃtā ca dvijottama || 88 ||
[Analyze grammar]

tāvubhāvapi tiṣṭhetāṃ narake'tyaṃtaduḥsahe |
yuddhyetsāhasavānyoddhā taddhaṃtā ca dvijottama || 89 ||
[Analyze grammar]

tiṣṭhetāṃ tāvapi svarge yāvaccandra divākarau |
bahunātra kimuktena saṃkṣepāducyate mayā || 90 ||
[Analyze grammar]

prajāpālanakṛdrājā kadācinnāvasīdati |
brahmovāca |
iti bruvati bhūpāle tasmingalitakalmaṣe || 91 ||
[Analyze grammar]

puṣpavṛṣṭirabhūttasminmahatī gaganāddvija |
atha dūtāḥ samāyātāḥ keśavasya mahātmanaḥ || 92 ||
[Analyze grammar]

rājahaṃsayutaṃ divyaṃ rathamādāya sundaram |
rathaṃ sa taṃ samāruhya divyaṃ kanakanirmitam || 93 ||
[Analyze grammar]

jagāma viṣṇubhavanaṃ sa rājā gatakalmaṣaḥ |
viprapādodakasyaitanmāhātmyaṃ te prakīrtitam || 94 ||
[Analyze grammar]

tacchrutvā bhaktibhāvena naro nirvāṇamāpnuyāt |
iti te kathitaṃ sarvaṃ śrotuṃ yadvāṃchitaṃ tvayā || 95 ||
[Analyze grammar]

gaccha brāhmaṇa bhadraṃ te cakriṇo nilayaṃ prati |
hariśarmovāca |
kṣudhānalena mahatā śarīraṃ mama dahyate || 96 ||
[Analyze grammar]

kenopāyena bhagavankṣudhāśāṃtirbhavenmama |
etanme vada deveśa bhaktastvaṃ bhaktavatsalaḥ || 97 ||
[Analyze grammar]

prāpnomi sumahadduḥkhaṃ nityaṃ dagdhakṣudhānalaiḥ |
brahmovāca |
yaccharīraṃ tvayā puṣṭaṃ satataṃ bhojanaiḥ kṛtam || 98 ||
[Analyze grammar]

bhuṃkṣva tasya śarīrasya māṃsāni dvijasattama |
ātmatṛptiṃ prakurvanti bhojanena parasya ye |
māṃsāni svaśarīrāṇāṃ bhuṃjate teparatra hi || 99 ||
[Analyze grammar]

vyāsa uvāca |
brahmaṇo vacanaṃ śrutvā niṣṭhuraṃ dvijasattamaḥ |
punastuṣṭāva taṃ devaṃ vacanaiḥ komalākṣaraiḥ || 100 ||
[Analyze grammar]

brāhmaṇa uvāca |
prasīda devadeveśa śaraṇāgatapālaka |
kṣamasva sakalaṃ doṣaṃ suraśreṣṭha namo'stu te || 101 ||
[Analyze grammar]

malamūlaprakīrṇāni vapūṃṣi vahatāṃ nṛṇām |
sarva eva prabho doṣāḥ saṃti kecidguṇā na ca || 102 ||
[Analyze grammar]

kṛtaṃ mayā mohavatā dūṣaṇaṃ kṣaṃtumarhasi |
śaraṇāpannalokānāṃ sadbhirdoṣo na cekṣyate || 103 ||
[Analyze grammar]

ātmadehasya māṃsāni bhoktuṃ brahmanna śakyate |
dehināṃ vada yadyogyaṃ saṃtuṣṭirjāyate yataḥ || 104 ||
[Analyze grammar]

ityevamuktaṃ vacanaṃ bhaktyā tenāgrajanmanā |
uvāca sadayo brahmā sarvajño brāhmaṇapriyaḥ || 105 ||
[Analyze grammar]

brahmovāca |
śokaṃ mā kuru viprendra śṛṇu me vacanaṃ śubham |
āhāro labhate yena prakāreṇātra saṃprati || 106 ||
[Analyze grammar]

ātmano jāyate putro yathaivātmā tathā sutaḥ |
tasmātputrakṛtaṃ karma labhaṃte pitaraḥ khalu || 107 ||
[Analyze grammar]

ciraṃ tiṣṭhasi devasya bhavane'tyaṃtaśobhane |
evamuktastatastena sa vipraḥ kṣudhayākulaḥ || 108 ||
[Analyze grammar]

svapne saṃdarśanaṃ datvā putraṃ vacanamabravīt |
brāhmaṇa uvāca |
dīkṣito'si sutaśreṣṭha tathāstu paramāṃ śivam || 109 ||
[Analyze grammar]

tavāsmi janakaḥ saumya mamaduḥkhaṃ niśāmaya |
tapaḥprabhāvaiḥ paramaṃ dhāma prāptaṃ mayā suta || 110 ||
[Analyze grammar]

kṣudhānalena saṃtaptastatra sīdāmyahaṃ sadā |
yadā mayi pitṛsnehastavāsti suta saṃprati || 111 ||
[Analyze grammar]

tadānnamudakaṃ cāpi madarthaṃ dīyatāṃ dvija |
yatkiṃciddīyate putraiḥ pitrarthaṃ kṣitimaṃḍale || 112 ||
[Analyze grammar]

labhaṃte pitarastacca yatputrāḥ pitṛdehajāḥ |
purā paramayā bhaktyā pūjito bhagavānmayā || 113 ||
[Analyze grammar]

gītairvādyaiścanṛtyaiśca stavapāṭhaiśca śobhanaiḥ |
gaṃdhairdhūpaiśca naivedyairghṛtapūrṇapradīpakaiḥ || 114 ||
[Analyze grammar]

pādyārghyācamanīyaiśca dhyānairāvāhanādibhiḥ |
na dattaṃ jagadīśāya kṛpaṇena mayātmaja || 115 ||
[Analyze grammar]

annamatramapi kvāpi naivedyaṃ pāpahāriṇe |
atitherna kṛtā pūjā toyairanyaiḥ kadācana || 116 ||
[Analyze grammar]

jñātīnāṃ yācakānāṃ ca saṃtuṣṭirna kṛtā mayā |
tenaiva karmaṇā putra nārāyaṇagṛhe'pi ca || 117 ||
[Analyze grammar]

kṣudhānalena saṃtaptaḥ sīdāmi prativāsare |
ato'nnatoyadānāni daridrāya dvijātaye || 118 ||
[Analyze grammar]

datvā kṣipraṃ suraśreṣṭha prāṇarakṣāṃ kuruṣva bhoḥ |
athavā na karoṣi tvaṃ niṣṭhuratvādyadā bhavān || 119 ||
[Analyze grammar]

svamāṃsānyeva bhokṣyāmi tadā vai viṣṇumaṃdire |
athā'sau kṣudhito vipraḥ śuṣkakaṃṭhoṣṭhatālukaḥ || 120 ||
[Analyze grammar]

ityuktvā dīkṣitaṃ putramadṛśyaḥ sahasā'bhavat |
tataḥ prabhāte vimale prādurbhūte divākare || 121 ||
[Analyze grammar]

svapne yaduktaṃ pitrā tu ciṃtayāmāsa dīkṣitaḥ |
ātmanaḥ karmadoṣeṇa paraloke'pi matpitā || 122 ||
[Analyze grammar]

kṣudhayā dagdhasarvāṅgaḥ sīdati prativāsaram |
dhigastu māṃ maṃdadhiyaṃ kṛpaṇapravarañjanam || 123 ||
[Analyze grammar]

mayāpi pitṛpuṇyena na kiñcidapi dīyate |
iti saṃciṃtya bahudhā dīkṣito'pi dvijottama || 124 ||
[Analyze grammar]

dadau dānāni viprebhyaḥ śraddhābhaktisamanvitaḥ |
tena puṇyaprabhāveṇa tṛṣayārahitaḥ kṣudhā || 125 ||
[Analyze grammar]

tasthau nārāyaṇāgāre yāvatkālaṃ śṛṇuṣva tat |
caturyugasahasrāṇi brahmaṇo'haṃ prakīrtitam || 126 ||
[Analyze grammar]

bhavaṃti tasminnevāhni manavaśca caturdaśa |
iṃdrāścaturddaśa proktāstasminneva dine ca te || 127 ||
[Analyze grammar]

bhuṃjate brāhmaṇaḥ śreṣṭha viṣayānsvānpṛthakpṛthak |
ekasminbrahmadivase bhuktvā svānviṣayāñchubhān || 128 ||
[Analyze grammar]

indrāśca manavaścaiva vinaśyaṃti caturdaśa |
viṣṇuloke sthite tasminhariśarmātibhāsvare || 129 ||
[Analyze grammar]

samastasukhade ramye brahmaṇo divaso gataḥ |
tatrāsau kālametāvadbhuktvā bhogānmanoramān || 130 ||
[Analyze grammar]

paramaṃ jñānamāsādya praviveśa harestanum |
vyāsa uvāca |
annatoyasamaṃ dānaṃ saṃsāre nāsti jaimine || 131 ||
[Analyze grammar]

sarvadānaphalānyeva annatoyapradānataḥ |
na ca pātraparīkṣā ca na kālaniyamaḥ kvacit || 232 ||
[Analyze grammar]

annatoyapradāneṣu niruktastatvadarśibhiḥ |
annatoyapradānāni kartavyāni sadaiva hi || 133 ||
[Analyze grammar]

etatpaṭhaṃti manujāḥ paramādareṇa māhātmyamannajalayośca tathā dvijānām |
te prāpya cānnajaladānaphalaṃ tatoṃ'te nārāyaṇasya nilayaṃ sukhadaṃ prayāṃti || 134 ||
[Analyze grammar]

iti śrīpadmapurāṇe kriyāyogasāre annadānajaladānamāhātmyaṃnāma ekaviṃśatitamo'dhyāyaḥ || 21 ||
[Analyze grammar]

Other print editions:

Also see the following print editions of the Sanskrit text or (alternative) English translations of the Padma Purana Chapter 21

Cover of edition (2016)

Sri Padma Purana (Sanskrit Text and Hindi Translation)
by Chaukhamba Surbharati Prakashan (2016)

Sanskrit Text and Hindi Translation with Sloka Index (Set of 7 Volumes)

Buy now!
Cover of edition (2007)

Padma Purana (In Six Volumes)
by Chowkhamba Sanskrit Series Office (2007)

Sanskrit Text Only

Buy now!
Cover of Bengali edition

Padma Purana in Bengali
by Navabharat Publishers, Kolkata (0)

Set of 7 Volumes

Buy now!
Cover of edition (2015)

Sri Padma Purana (Tamil)
by Azhwargal Aaivu Maiyam, Chennai (2015)

Translated by S. Jagatrakshgan

Buy now!
Cover of Gujarati edition

Padma Purana in Gujarati
by Shree Harihar Pustakalay, Surat (0)

[પદમ પુરણ:]

Buy now!
Cover of edition (2013)

Padma Mahapurana (Kannada)
by Vijeth Prakashan Gadag, Bangalore (2013)

[ಪದ್ಮ ಮಹಾಪುರಾಣಂ]

Buy now!
Like what you read? Consider supporting this website: