Chapter 19

[English text for this chapter is available]

vyāsa uvāca |
nārāyaṇaprapannā ye narābhaktisamanvitāḥ |
kadācidaśubhaṃ teṣāṃ vidyate na dvijottama || 1 ||
[Analyze grammar]

punareva pravakṣyāmi māhātmyaṃ kamalāpateḥ |
yacchrutvā mānavāḥ sarve labhaṃte paramaṃ padam || 2 ||
[Analyze grammar]

vāsudevasya māhātmyaṃ śrutvā tṛpyaṃti vaiṣṇavāḥ |
pākhaṇḍā na hi tṛpyaṃti narake kleśabhāginaḥ || 3 ||
[Analyze grammar]

pākhaṇḍānāṃ samīpe tu viṣṇumāhātmyamuttamam |
na vaktavyaṃ dvijaśreṣṭha vaktavyaṃ vaiṣṇavāgrataḥ || 4 ||
[Analyze grammar]

pūrvaṃ tretāyuge vipra urvīśurnāma jaimine |
āsītpāparato nityaṃ dharmaniṃdāparāyaṇaḥ || 5 ||
[Analyze grammar]

brahmasvahārī viprendra parastrīgamanodyataḥ |
gomāṃsāśī surāpī ca veśyāvibhramalolupaḥ || 6 ||
[Analyze grammar]

śaraṇāgatahaṃtā ca paraniṃdākaraḥ sadā |
viśvāsaghātī mitraghno jñātipīḍākarastathā || 7 ||
[Analyze grammar]

asatyabhāṣī krūraśca pākhaṃḍajanasaṅgabhāk |
vṛtticchedī dvijātīnāṃ nyāsāpahārakastathā || 8 ||
[Analyze grammar]

tādṛśaṃ taṃ samālokya duṣṭaṃ pāpaparāyaṇam |
ājagmurjñātayaḥ sarve kruddhāstasya nijaṃgṛham || 9 ||
[Analyze grammar]

jñātaya ūcuḥ |
pratiṣṭhopārjitā pūrvairasmākaṃ vimale kule |
sā pratiṣṭhā tvayā mūḍha vināśaṃ pratinīyate || 10 ||
[Analyze grammar]

dharmamārgaṃ parityajya kuruṣe pātakaṃ sadā |
madvaṃśakīrtihananaṃ jāto'si jñātiduḥkhadaḥ || 11 ||
[Analyze grammar]

ativismayadā sṛṣṭirvidhāturmanyate tvayi |
yasminsiṃdhau śaśī jātastatra kṣveḍodbhavo'pi ca || 12 ||
[Analyze grammar]

aho śaktiḥ kuputrāṇāṃ saṃkhyātuṃ na ca śakyate |
anekaiḥ puruṣaiḥ kīrtiṃ saṃcitāṃ haṃti tatkṣaṇāt || 13 ||
[Analyze grammar]

jāte putrottame vaṃśaḥ śreṣṭhaḥ syādadhamo'pi ca |
putredhametu śreṣṭho'pi vaṃśo gacchati hīnatām || 14 ||
[Analyze grammar]

vyāsa uvāca |
ityuktvā jñātayaste ca taṃ sarve pāpināṃ varam |
apakīrtibhayātkruddhāstatyajuḥ sahasā dvija || 15 ||
[Analyze grammar]

jñātibhiḥ sa parityakto janaiḥ sarvaiśca dhikkṛtaḥ |
prapede dasyutāṃ duḥkhī vibhraṣṭākhilavaibhavaḥ || 16 ||
[Analyze grammar]

taṃ dasyukarmakurvaṃtaṃ nirddayaṃ parahiṃsakam |
dhṛtvā janapadāḥ sarve bhūpālāya nyavedayan || 17 ||
[Analyze grammar]

tena bhūmibhujā tasya pitṛsnehāddivajottama |
na hato'sau durācāro nijadeśādvahiṣkṛtaḥ || 18 ||
[Analyze grammar]

tato'sau vanamāśritya dasyubhiḥ saha nirddayaḥ |
pāṃthasvaharaṇārthāya tasthau bahubhiruddhataiḥ || 19 ||
[Analyze grammar]

kadācittaṭinītīraṃ dasyubhiḥ saha jaimine |
vanaparyaṭane śrāṃto jagāma snānahetave || 20 ||
[Analyze grammar]

tasyāṃ taṭinyāṃ bhagavatparicaryāparāyaṇān |
asau dadarśa duṣṭātmā brāhmaṇākṛtino bahūn || 21 ||
[Analyze grammar]

atha te brāhmaṇāḥ sarve samārādhya janārdanam |
anyonyaṃ kathayāmāsurvihitā ati kautukāt || 22 ||
[Analyze grammar]

adya caṃpakapuṣpāṇi mayā tyaktāni tāni vai |
kaścidvadati tāṃbūlaṃ mayā dattaṃ murāraye || 23 ||
[Analyze grammar]

na khāditavyaṃ tāṃbūlaṃ kadācidapi janmani |
mayādya haraye dattaṃ kadalīphalamuttamam || 24 ||
[Analyze grammar]

janmajanmāni ca mayā bhakṣyaṃ ca kadalīphalam |
ko'pi vakti mayā dattaṃ haraye dāḍimīphalam || 25 ||
[Analyze grammar]

ko'pi vakti mayā dattaṃ rasālaphalamuttamam |
anyo'nyametadvadatāṃ teṣāṃ śrutvā vacāṃsi ca || 26 ||
[Analyze grammar]

urvīśuścintayāmāsa kiṃ pradāsyāmi viṣṇave |
saṃsāre yāni vastūni bhakṣyāṇi saṃti tānyaham || 27 ||
[Analyze grammar]

na hi śaknomi saṃtyaktuṃ kiṃ dāsyāmi murāraye |
nityaṃ vanāṃtarastho'haṃ cauro rājabhayākulaḥ || 28 ||
[Analyze grammar]

śakaṭārohaṇe nāsti hyadhikāraḥ kadāpi me |
vyāsa uvāca |
ityuktvā dasyunā tena bhūyobhūyo dvijottama || 29 ||
[Analyze grammar]

śakaṭaṃ haraye dattaṃ caturvargapradāyine |
atha tebrāhmaṇāḥ sarve jagmurvipra yathāgatāḥ || 30 ||
[Analyze grammar]

so'pi dasyurdasyubhiśca jagāma nijamāśrayam |
ekadā guḍakaṃḍolaṃ tenaiva khalu vartmanā || 31 ||
[Analyze grammar]

gṛhītvā pathikaḥ kaścitkākīmaṃḍalamāgataḥ |
tato'sau sahasā dasyurnirbhayaḥ parahiṃsakaḥ || 32 ||
[Analyze grammar]

jahāra guḍakaṃḍolamadhvanīnasya tasya ca |
atha te dasyavaścakrurguḍakaṃḍola bhaṃjanam || 33 ||
[Analyze grammar]

urvīśuścāpatadbhāge śakaṭaṃ guḍanirmitam |
urvīśuḥ śakaṭaṃ gauḍaṃ samāsādya dvijottama || 34 ||
[Analyze grammar]

manasā ciṃtayāmāsa vacaḥsmaraṇapūrvakam |
ano mayā purā dattaṃ svayameva murāraye || 35 ||
[Analyze grammar]

tasmādano na me grāhyaṃ kadācidiha janmani |
vicintyeti hṛdā dātuṃ tadano guḍanirmitam || 36 ||
[Analyze grammar]

dattaṃ viprāya kasmaicinmādhavaprītihetave |
tāṃ bhaktiṃ tasya vijñāya mahāpātakino dvija || 37 ||
[Analyze grammar]

jahāra sakalaṃ pāpaṃ sadyaḥ prīto janārdanaḥ |
tasminneva dine vipra praviśya ca mahāvanam || 38 ||
[Analyze grammar]

hataḥ paurajanaiḥ sarvairatha kruddhaiḥ sa urviśuḥ |
bhagavānatha taṃ netuṃ vimānaṃ svarṇanirmitam || 39 ||
[Analyze grammar]

dūtāṃśca preṣayāmāsa nānābharaṇabhūṣitān |
atha te bhagavaddūtāstamurvīśuṃ gatainasam || 40 ||
[Analyze grammar]

samāropya vimāne taṃ sadyo jagmuḥ puraṃ hareḥ |
tatau'sau harisānnidhyaṃ prāpya puṇyātmanāṃ varaḥ || 41 ||
[Analyze grammar]

punarmanvaṃtaraśataṃ sthitvā keśavasannidhim |
paramaṃ jñānamāsādya sa viveśa tanuṃ hareḥ || 42 ||
[Analyze grammar]

vyāsa uvāca |
yena kenāpyupāyena haribhaktikaro naraḥ |
saṃsārajaladheḥ pāraṃ rājahaṃsa iva vrajan || 43 ||
[Analyze grammar]

kṣaṇameva harerbhaktirvartate yasya cetasi |
tatpadaṃ paramaṃ yāti sa pāpātmāpi gacchati || 44 ||
[Analyze grammar]

ekamapyuttamaṃ vastu datvā'sau tanmurāraye |
svayameva hi bhoktavyaṃ paścātpāpopaśāṃtaye || 45 ||
[Analyze grammar]

yadvastu haraye dattaṃ tacca dadyāddivajātaye |
kiṃciccheṣaṃ na bhoktavyaṃ tasyāvaśyaṃ svayaṃ budhaiḥ || 46 ||
[Analyze grammar]

vastūni brāhmaṇaśreṣṭhamiṣṭāni yāni kāni ca |
adatvā viṣṇave tāni na bhoktavyāni vaiṣṇavaiḥ || 47 ||
[Analyze grammar]

viṣṇunaivedyamāhātmyaṃ sarvapāpapraṇāśanam |
setihāsaṃ punarvacmi śṛṇu vipra samāhitaḥ || 48 ||
[Analyze grammar]

āsītsarvajanirnāma brāhmaṇaḥ śuddhavaṃśajaḥ |
śāṃto dāṃto dayāyukto gurubrāhmaṇapūjakaḥ || 49 ||
[Analyze grammar]

hareḥ pūjāparaścaiva harismaraṇatatparaḥ |
prapannakleśavidhvaṃsī satyavādī jitendriyaḥ || 50 ||
[Analyze grammar]

prātaḥsnāyī nijācāragrāhī hiṃsā vivarjitaḥ |
ekādaśīvratarato jñātipūjāparāyaṇaḥ || 51 ||
[Analyze grammar]

kadācitsa dvijaśreṣṭhaḥ svapne'paśyacca keśavam |
śyāmaṃ virajapadmākṣaṃ smerāsyaṃ pītavāsasam || 52 ||
[Analyze grammar]

svarṇakuṇḍalamañjīrakirīṭojjvalavigraham |
kaustubhodbhāsitoraskaṃ vanamālāvibhūṣitam || 53 ||
[Analyze grammar]

caturbāhuṃ śaṅkhacakragadāpadmadharaṃ prabhum |
samastairlakṣaṇairyuktaṃ svarṇayajñopavītinam || 54 ||
[Analyze grammar]

saṃprāpya darśanaṃ svapne sa vipro jagatīpateḥ |
kṛtāñjalistamastauṣīdromāṃcitatanurmudā || 55 ||
[Analyze grammar]

tubhyaṃ namo'stu jagataḥ sakalasyabharttre sallokaśokabhayarogavināśanāya |
nārāyaṇāya kamalāhṛdayapriyāya dharmārthakāmaparamāmṛtadāya tubhyam || 56 ||
[Analyze grammar]

pāpāni caiva sakalāni mayā kṛtāni mattena mohavaśagena sadā murāre |
tasmādbibhemi jagadaṃbunidhergabhīrānmāmuddharasva nijabhaktitarīṃ pradāya || 57 ||
[Analyze grammar]

jānāmi yadyapi hare duritaṃ manuṣyo vyāmohamāśucalabhe bhuvi kaiṭabhāre |
pāpaṃ tathāpi ca mudā satataṃ karomi tasmānna ko'pyahamivāsti jano vimūḍhaḥ || 58 ||
[Analyze grammar]

puṇyadrumaḥ sukhaphalaṃ sahasaiva dhatte kiṃ vedmi neti nṛhare kṛtapātako'ham |
puṣpadrumārpaṇavidhau na mamāsti vittaṃ nātha prasīda bhagavankimahaṃ karomi || 59 ||
[Analyze grammar]

tvatpādapadmayugalaṃ paramāmṛtasya sthānaṃ vihāya mama cittamadhuvrato'yam |
nārīmukhaṃ vrajati devamṛtipradaṃ yacchleṣmaprakīrṇamaniśaṃ kamalabhrameṇa || 60 ||
[Analyze grammar]

pāṇiḥpradānarahito'nṛtabhāṣivaktraṃ karṇau ca pāpaśravaṇāya sadaiva dakṣau |
doṣānimānmama hare hara sevakasya yasmānnu nātha śaraṇāgatadoṣahaṃtā || 61 ||
[Analyze grammar]

saṃsāraghorajaladhau nṛhare kadācittvadbhaktinauriha mayā sudṛḍhā ca labdhā |
tatrāpi daivavaśago'hamaho durātmā varteta eva satataṃ mamaduḥkhakālaḥ || 62 ||
[Analyze grammar]

saṃsārapāragamanāya lasatpatho'sti kiṃ sarvaduḥkharahitaḥ sadayaḥ prasannaḥ |
aṃdhīkṛtasya mama mohamahattamisrairdṛṣṭistvayīha na kadāpi ca yāti viṣṇo || 63 ||
[Analyze grammar]

pāpātmano'pi mama cittamidaṃ murāre naṣṭaṃ vinaṣṭajanakaṣṭavinaṣṭikāri |
yastvāṃ samastasuravaṃditapādapadma svapne'pi keśimathanādya vibho samīkṣe || 64 ||
[Analyze grammar]

vyāsa uvāca |
iti tena stuto devo bhagavānkamalāpatiḥ |
uvāca vākyaṃ vākyajñaḥ saṃsārārṇavatārakaḥ || 65 ||
[Analyze grammar]

śrībhagavānuvāca |
bhaktibhistava vipreṃdra tuṣṭo'haṃ nityameva ca |
tasmāttavācireṇaiva sarvaṃ bhadraṃ bhaviṣyati || 66 ||
[Analyze grammar]

pāpino'pi tavoddhāro mayā pūrvaṃ kṛto dvija |
adhunā mama bhakto'si na vipattirbhaviṣyati || 67 ||
[Analyze grammar]

brāhmaṇa uvāca |
ko'haṃ tasthau purā viṣṇo kiṃ vā pāpaṃ mayā kṛtam |
pāpino'pi mamoddhāraḥ kathaṃ pūrvaṃ tvayā kṛtaḥ || 68 ||
[Analyze grammar]

saṃsāre'sminkathaṃ jāto janito'haṃ kathaṃ tvayā |
etatsarvaṃ vibho brūhi yatastvaṃ sadayaḥ sadā || 69 ||
[Analyze grammar]

śrībhagavānuvāca |
aprakāśyamidaṃ guhyaṃ yadyapi dvijasattama |
tathāpi tava vātsalyānnigadāmi niśāmaya || 70 ||
[Analyze grammar]

purā tvaṃ brāhmaṇaśreṣṭha pakṣivaṃśasamudbhavaḥ |
bhūto'si bhūmibhāgeṣu nijakarmavipākataḥ || 71 ||
[Analyze grammar]

kṣudhayā tṛṣayā vāpi satataṃ vyākulo bhavān |
babhrāma bhakṣayankīṭānnirjharoṣṇodakaṃ tathā || 72 ||
[Analyze grammar]

nānāduḥkhaṃ sadā bhuṃjanpakṣiyonau samudbhavaḥ |
caturvarṣasahasrāṇi sthito'si tvaṃ purā kṣitau || 73 ||
[Analyze grammar]

ekadā kulabhadrākhyo brāhmaṇaḥ sarvatatvavit |
pūjayāmāsa māṃ bhaktyā naivedyādyairnadītaṭe || 74 ||
[Analyze grammar]

samabhyarcya sa vipreṃdro mama naivedyataṃdulam |
yayau tatraiva nikṣipya bhūya eva nijaṃ gṛham || 75 ||
[Analyze grammar]

tato vṛkṣātsamāgatya kṣudhinā pakṣiṇā tvayā |
mama naivedyasaṃbaṃdhi bhakṣitaṃ sarvataṃdulam || 76 ||
[Analyze grammar]

bhuktvaiva sadyo mukto'si pātakairatidāruṇaiḥ |
kadācitprāptakālastvaṃ kāladharmagato dvija || 77 ||
[Analyze grammar]

tvāmānetuṃ mayā dūtāḥ preṣitāḥ sarvathā nijāḥ |
tato rathe samāropya bhavaṃtaṃ naṣṭakalmaṣam || 78 ||
[Analyze grammar]

sadyo dūtagaṇāḥ sarve samāyātāḥ paraṃ padam |
yugakoṭisahasrāṇi sthito'si mama sannidhau || 79 ||
[Analyze grammar]

bhuṃjansukhāni sarvāṇi durllabhāni surairapi |
tato yāto'si viprendra viśuddhe brāhmaṇānvaye || 80 ||
[Analyze grammar]

tatrāpi mayi bhaktiste jātātisudṛḍhā punaḥ |
kriyāyogena māṃ nityaṃ samārādhya dvijottama || 81 ||
[Analyze grammar]

āyuṣoṃte matprasādānmāmakaṃ padamāpsyasi |
yadā tuṣṭo'smyahaṃ vipra sapāpātmāpi muktibhāk || 82 ||
[Analyze grammar]

kadācidyasya ruṣṭosmi puṇyātmāpi ca pāpabhāk |
tasmādbrāhmaṇa bhadraṃ te bhakto'si mama suvrata || 83 ||
[Analyze grammar]

dāsyāmi te paraṃ sthānaṃ yadalabhyaṃ surairapi |
brāhmaṇa uvāca |
tvatprasādācchrutaṃ nātha pūrvavṛttāṃtamātmanaḥ || 84 ||
[Analyze grammar]

idānīṃ śrotumicchāmi yatkiñcidbrūhi tatprabho |
kasya tuṣṭo'si devendra kasya ruṣṭo'si vā prabho || 85 ||
[Analyze grammar]

mahatyā kṛpayā sarvametanme vaktumarhasi |
śrībhagavānuvāca |
karmaṇā yenaviprendra tuṣṭirme hṛdi jāyate || 86 ||
[Analyze grammar]

krodhaśca tatsamastaṃ ca kathayāmi samāsataḥ |
yo dayāvāndvijaśreṣṭha sarvabhūteṣu sarvadā || 87 ||
[Analyze grammar]

ahaṃkāravihīnaśca tasya tuṣṭo'smyahaṃ sadā |
karma kuryānmadarthaṃ yo dharmabhaktisamanvitaḥ || 88 ||
[Analyze grammar]

brūte madarthaṃ yaḥ śāṃtaṃ tasya tuṣṭo'smyahaṃ sadā |
miṣṭaṃ vastu samāsādya datvā me yaśca mānavaḥ || 89 ||
[Analyze grammar]

mānāpamāne sadṛśastasya tuṣṭo'smyahaṃ sadā |
sarvabhūtaśarīrasthaṃ yo māṃ jānāti mānavaḥ || 90 ||
[Analyze grammar]

parahiṃsāvihīno yastasya tuṣṭo'smyahaṃ sadā |
karmāṇi kurute yastu suvicārya punaḥ punaḥ || 91 ||
[Analyze grammar]

gobrāhmaṇahitaiṣī yastasya tuṣṭo'smyahaṃ sadā |
svayaṃ niruktaṃ vacanaṃ yatnādyaḥ paripālayet || 92 ||
[Analyze grammar]

prapannaṃ yāti yatnādyastasya tuṣṭo'smyahaṃ sadā |
dadātyanupakāribhyo dānāni dvijasattama || 93 ||
[Analyze grammar]

mayi cittaṃ sadā yasya tasya tuṣṭo'smyahaṃ sadā |
karmaṇā yenatuṣṭo'smi niruktaṃ tatsamāsataḥ || 94 ||
[Analyze grammar]

ruṣṭo'smi karmaṇā yena vipra vacmi śṛṇuṣvatam |
parahiṃsārato yastu nirddayaḥ sarvajaṃtuṣu || 95 ||
[Analyze grammar]

ahaṃyuḥ sarvadā kruddhaḥ samāṃ nayati śatrutām |
asatyabhāṣīkrūraśca paraniṃdāparastu yaḥ || 96 ||
[Analyze grammar]

kavivartanavidhvaṃsī samāṃ nayati śatrutām |
adṛṣṭadoṣau pitarau strībhrātṛbhaginī tathā || 97 ||
[Analyze grammar]

mohāttyajati yo mūḍhaḥ samāṃ nayati śatrutām |
pitṛbhirbhartsanaṃ yastu kurute mūḍhadhīrnaraḥ || 98 ||
[Analyze grammar]

gurvavajñākaro vipra samāṃ nayati śatrutām |
ārāmacchedino ye ca jalāśayavilāyinaḥ || 99 ||
[Analyze grammar]

grāmanāśakarāyecatemāṃnayaṃtiśatrutām |
parastriyaṃ samālokya viṣādaṃ yānti ye janāḥ || 100 ||
[Analyze grammar]

śṛṇvaṃti pāpacarcāṃ ca teṣāṃ ruṣṭosmyahaṃ sadā |
dviṣaṃti nāthaṃ ye mūḍhā anāthasvaṃ haraṃti ye || 101 ||
[Analyze grammar]

viśvāsaghātino ye ca teṣāṃ ruṣṭo'smyahaṃ sadā |
ye ca govīryahaṃtāro vṛṣalīpatayaśca ye || 102 ||
[Analyze grammar]

aśvatthaghātino ye ca teṣāṃ ruṣṭo'smyahaṃ sadā |
brahmaviṣṇumaheśānāṃ madhye ye bhedakāriṇaḥ || 103 ||
[Analyze grammar]

paradārātiraktā ye teṣāṃ ruṣṭo'smyahaṃ sadā |
ekādaśyāṃ bhuṃjate ye lobhātpāpadhiyo narāḥ || 104 ||
[Analyze grammar]

vedaniṃdākarā ye ca teṣāṃruṣṭo'smyahaṃ sadā |
pāpabuddhiratā ye ca mitradroharatāstathā || 105 ||
[Analyze grammar]

dhātrītaruṃ ca ye ghnaṃti teṣāṃ ruṣṭo'smyahaṃ sadā |
divase maithunaṃ ye ca kurvaṃte kāmamohitāḥ || 106 ||
[Analyze grammar]

rajasvalā striyāṃ caiva teṣāṃ ruṣṭo'smyahaṃ sadā |
ye cādṛṣṭārtavāṃ nārīṃ mohādgacchaṃti sattama || 107 ||
[Analyze grammar]

vratasthāṃ ca sadā jālmāste māṃ nayaṃti śatrutām |
amāvāsyātithau ye ca kurvaṃte niśibhojanam || 108 ||
[Analyze grammar]

bhojanadvayamevārke teṣāṃ ruṣṭo'smyahaṃ sadā |
āmiṣaṃ maithunaṃ tailamamāvāsyādine dvijāḥ || 109 ||
[Analyze grammar]

na ye tyajaṃti viprendra teṣāṃ ruṣṭo'smyahaṃ sadā |
bahunātra kimuktena saṃkṣepātte vadāmyaham || 110 ||
[Analyze grammar]

niṃdaṃti vaiṣṇavānye ca teṣāṃ ruṣṭosmyahaṃ sadā |
vyāsa uvāca |
ityuktvā bhagavānviṣṇuradṛśyaḥ sahasā'bhavat || 111 ||
[Analyze grammar]

sa ca vipraḥ samuttasthau tyaktanidrastu maṃcataḥ |
keśavoktena vākyena sa vipro haribhaktikṛt || 112 ||
[Analyze grammar]

saṃtyajya sakalaṃ kāryaṃ kriyāyogarato'bhavat |
nārāyaṇasya naivedyaṃ bhuṃjato'pi phalaṃ tvidam || 113 ||
[Analyze grammar]

haripūjākṛtāṃ puṃsāṃ na jāne kiṃ bhavediti |
samāsena bravīmi tvāṃ śṛṇu sattama jaimine || 114 ||
[Analyze grammar]

sakṛtkṛtvā hareḥ pūjāṃ prāpyate paramaṃ padam |
mānuṣyaṃ durllabhaṃ loke pūjā tatrāpi cakriṇaḥ || 115 ||
[Analyze grammar]

bhaktistatrāpi viprendra durllabhā parikīrtitā || 116 ||
[Analyze grammar]

saṃsārābdhiṃ sarvaduḥkhaprapūrṇaṃ tartuṃ vāṃchā yasya cittesti puṃsaḥ |
bhaktyā nityaṃ vāsudevasya pūjāṃ kuryādāryaḥ karmaṇāṃ so'khilānām || 117 ||
[Analyze grammar]

iti śrīpadmapurāṇe kriyāyogasāre ekonaviṃśatitamo'dhyāyaḥ || 19 ||
[Analyze grammar]