Chapter 5

[English text for this chapter is available]

vyāsa uvāca |
asti tāladhvajā nāma nagarī tridaśopamā |
sarvalokeṣu vikhyātā prakīrṇā guṇināṃ gaṇaiḥ || 1 ||
[Analyze grammar]

tatrāsīdvikramo nāmā rājā śuddhakulodbhavaḥ |
dhārmikaḥ satyavādī ca prajāpālanatatparaḥ || 2 ||
[Analyze grammar]

tasya hārāvatī nāma vallabhā bhuvi durllabhā |
āsītsvakīyavadanaprabhājita śaśiprabhā || 3 ||
[Analyze grammar]

tasya saiva priyā rājñaḥ strīgaṇe'pi ca tiṣṭhati |
gaṅgeva saritāṃ bharttustiṣṭhatyapi saridgaṇe || 4 ||
[Analyze grammar]

bhūdevadaivaparataḥ kālena kiyatā dvija |
vyajāyata sutastasyāṃ sarvalakṣaṇasaṃyutaḥ || 5 ||
[Analyze grammar]

śāstroktavidhinā tasya sa rājā sarvaśāstravit |
mādhaveti tato nāma cakravartī cakāra ha || 6 ||
[Analyze grammar]

tato'sau mādhavo vipraḥ kālena kiyatā balī |
sarvavidyāsaritpāraṃgataḥ sadguṇasaṃgataḥ || 7 ||
[Analyze grammar]

athāsau yauvarājyena rājye narapatiḥ sutam |
siktavāṃstaṃ mahīdeva sarvadevagaṇārcakam || 8 ||
[Analyze grammar]

ekasmindivase vipra caturaṃgabalairvṛtaḥ |
jagāma kautukenāsau mṛgayāyai mahadvanam || 9 ||
[Analyze grammar]

tatra hatvā bahūñjantūnmadhyāhne samaye tataḥ |
kṛtavānnagare gaṃtumudyamaṃ vipinādasau || 10 ||
[Analyze grammar]

nagaraṃ svakamāgacchatsasainyo mādhavo mudā |
dadarśa yuvatīmekāṃ sarasi snānatatparām || 11 ||
[Analyze grammar]

snānārhadravyavasanairvyaktīkṛtakalevarām |
svakīyamukhasaundaryyajitapūrṇaniśākarām || 12 ||
[Analyze grammar]

suvarṇakuṇḍaladvandva vibhrājadgaṇḍamaṇḍalām |
sudīrghakeśakaiśchanna nitaṃbāṃ cāruhāsinīm || 13 ||
[Analyze grammar]

suvarṇapadmakalikāṃ cārūnnatapayodharām |
mṛgārikṛśamadhyāṃ ca vasaṃte kokilasvarām || 14 ||
[Analyze grammar]

yūnāṃ manoharā rājye kandarpeṇa mahātmanā |
āropitā patākeva sundarī sā vyajāyata || 15 ||
[Analyze grammar]

tādṛśīṃ tāṃ samālokya prāntare saṅgavarjite |
kaḥ kāmavaśago na syātkṣitau prāṇānvahanpumān || 16 ||
[Analyze grammar]

atha vikramaputro'sau tāmālokya varānanām |
kaṃdarpabāṇavraṇita hṛdayaśceti ciṃtayan || 17 ||
[Analyze grammar]

etasyāḥ sadṛśī kāpi na dṛṣṭā kṣitimaṇḍale |
etāmiha samāliṅgya saphalaṃ janma ceṣyate || 18 ||
[Analyze grammar]

śreṣṭho'smi sarvalokānāṃ vayastejoguṇairaham |
yadyapīndrāṃganeyaṃ syānnetavyādya tathāpi ca || 19 ||
[Analyze grammar]

parastrīharaṇe yo vā doṣo bhavati sāṃpratam |
ko vā śaknoti tadvaktuṃ yato rājā pitā mama || 20 ||
[Analyze grammar]

iti saṃciṃtya manasā sudṛḍhaṃ tena kāminā |
dūre saṃsthāpya sainyāni yayau sā snāti yatra ha || 21 ||
[Analyze grammar]

aiśvaryaṃ ca madaścaiva kāmaścaiva mahītale |
traya ete vivekasya tejo ghnaṃti kimadbhutam || 22 ||
[Analyze grammar]

pitāsya duritadhvaṃsī dharmarakṣākaro nṛṇām |
dhiksvayaṃ kāmadevo'sau mohayatyakhilaṃ jagat || 23 ||
[Analyze grammar]

tamāyātaṃ samālokya vegena mahatā tataḥ |
ekākinī sā ramate bhṛśaṃ ciṃtākulābhavat || 24 ||
[Analyze grammar]

ekākinīṃ samālokya kāṃtārasthāṃ sayauvanām |
ayaṃ dhāvati vegena tanme manasi vartate || 25 ||
[Analyze grammar]

jalpaṃti munayaḥ sarve dharmo rakṣati rakṣitaḥ |
na ca jñātavyamatraiva kimatra ca bhaviṣyati || 26 ||
[Analyze grammar]

sahāyahīnaṃ yatsthānaṃ puro dhāvati śatravaḥ |
ślāghyaṃ palāyanaṃ tatra nivāsaḥ prāṇanāśakaḥ || 27 ||
[Analyze grammar]

ityālocya varārohā savyakacche ghaṭaṃ tataḥ |
kṛtvā palāyane bhītyā manaścakre sarovarāt || 28 ||
[Analyze grammar]

tataḥ sa mādhavaścāpi javena mahatā dvija |
evaṃ tasyāḥ puro gatvā prasāritakaraḥ sthitaḥ || 29 ||
[Analyze grammar]

śrīmādhava uvāca |
varāṅgane cārudehe suyauvanabalānmama |
palāyase mano hṛtvā hatosmyahamacetanaḥ || 30 ||
[Analyze grammar]

kiṃ nāma caṃcalāpāṃgi cārvaṅgi tava kaḥ patiḥ |
svargātkiṃ vā gatāsi tvaṃ tvattulyā nāsti bhūtale || 31 ||
[Analyze grammar]

sundari tvamiha śreṣṭhā sarvalakṣaṇasaṃyutā |
kathaṃ vahasi pānīyaṃ dāsīva kamalānane || 32 ||
[Analyze grammar]

payodharau śātakuṃbhau sadā vahasi vakṣasi |
kakṣeṇa jalakumbhaṃ ca komalāṅgīdamadbhutam || 33 ||
[Analyze grammar]

divākarakarātyaṃta saṃtapte pathi lohitāḥ |
pādāṃgulyaṃtarā bhāṃti japānāṃ kalikā iva || 34 ||
[Analyze grammar]

suśroṇi bhaja māṃ prītyā tyaja kuṃbhaṃ varānane |
tava duḥkhāvasāno'bhūnmama darśanamātrataḥ || 35 ||
[Analyze grammar]

śrīmadvikramabhūbharttuḥ putro'haṃ mādhavāhvayaḥ |
sarvabhāvairbhaviṣyāmi varāṅgastava sundari || 36 ||
[Analyze grammar]

mamastrīgaṇamadhyeṣu subhagā tvaṃ bhaviṣyasi |
supuṣpavallī madhyeṣu dvirephasyeva mālatī || 37 ||
[Analyze grammar]

athavā mama vākyaṃ tvaṃ garvāllaṃghitumicchasi |
na tyakṣāmi tathāpi tvāṃ yato'haṃ nṛpateḥ sutaḥ || 38 ||
[Analyze grammar]

vyāsa uvāca |
tenoktaṃ vacanaṃ śrutvā paṃthānaṃ pravihāya sā |
tasthāvadhomukhī vipra prāheti ca śanaiḥ śanaiḥ || 39 ||
[Analyze grammar]

kadāpi cetparasyāpi na śṛṇoti vaco mama |
tathāpi lajjāṃ saṃtyajya vakṣyāmyeva bhavāgrataḥ || 40 ||
[Analyze grammar]

tathā hyahaṃ mahāvīra subāhukṣattriyapriyā |
nayāmi devapūjārthaṃ jalaṃ caṃdrakalā hyaham || 41 ||
[Analyze grammar]

yadvaco bhavatā proktaṃ na ca tattvatkulocitam |
tvadvaṃśaprabhavāḥ sarve parastrīṣunapuṃsakāḥ || 42 ||
[Analyze grammar]

ahamekākinī nārī vīrāṇāṃ prabhavo bhavān |
balādāliṅgya māmatra yaśaḥ kiṃ te bhaviṣyati || 43 ||
[Analyze grammar]

parastriyaṃ samāliṅgya kṣaṇamātrasukhaṃ bhavet |
ihāpakīrtiḥ śeṣaṃ ca duḥkhaṃ kalpaśatādhikam || 44 ||
[Analyze grammar]

karmabhūmiriyaṃ śūra puṇyamatra vidhīyatām |
parastrīharaṇe cittaṃ kadācinmāṃ kariṣyasi || 45 ||
[Analyze grammar]

lobhātpravartate kāmaḥ kāmātpāpaṃ pravarttate |
pāpānmṛtyurmṛte'pi syāddustare narake sthitiḥ || 46 ||
[Analyze grammar]

sarve'pi tvadguṇā vyarthaṃ tvajjanmāpi ca niṣphalam |
kāmasya vaśatāṃ gatvā raṃtumiccheḥ parastriyam || 47 ||
[Analyze grammar]

māṃsamūtrapūrīṣāsthinirmitaṃ me kalevaram |
etadeva samālokya smarasya vaśatāṃ gataḥ || 48 ||
[Analyze grammar]

bhūpālavaṃśotpattitvātpaurebhyo na bibheṣi kim |
mastakopari garjaṃtaṃ nekṣase samavarttinam || 49 ||
[Analyze grammar]

grasaṃti baḍiśaṃ matsyāste sarve jñānavarjitāḥ |
jñānīcetprāpya baḍiśaṃ bhavānkasmādgrasiṣyasi || 50 ||
[Analyze grammar]

vivekastriṣu lokeṣu saṃpadāṃ paramaṃ padam |
aviveko hi lokānāmāpadāṃ paramaṃ padam || 51 ||
[Analyze grammar]

tayoktaṃ vacanaṃ śrutvā mādhavaḥ kāmamohitaḥ |
uvāca jaimine vācaṃ vinayāvanataḥ punaḥ || 52 ||
[Analyze grammar]

tavodvīkṣaṇanārāca dhārājarjaramānasam |
priye māṃ trāhi trāhīti tavāsmi śaraṇaṃ gataḥ || 53 ||
[Analyze grammar]

tāvatpriyatamā nārī yāvattiṣṭhati yauvane |
mṛṇālakoṣāṃ nalinīṃ hemabhṛṃgo na gacchati || 54 ||
[Analyze grammar]

prasīda hariṇīnetre rakṣa māṃ sevakaṃ svakam |
tvadvācaṃ nīrasāṃ śrutvā bhinatti hṛdayaṃ mama || 55 ||
[Analyze grammar]

candrakalovāca |
tyaja duḥkhaṃ mahāvīra śṛṇu madvacanaṃ śubham |
pravakṣyāmi manoduḥkhaṃ haṃtuṃ yadbhavataḥ kṣamām || 56 ||
[Analyze grammar]

samudrapāre vikhyātā puraṃdarapuropamā |
plakṣadvīpe'sti dīpyaṃtī vikhyātā saṃjñayā purī || 57 ||
[Analyze grammar]

guṇākarāhvayastatra rājā śreṣṭho mahāyaśāḥ |
āste sarvagaṇairyuktaḥ pratāpe'gnisamo balī || 58 ||
[Analyze grammar]

suśīlā nāma tadbhāryā sarvalakṣaṇasaṃyutā |
sevāvaśīkṛtasvāmi hṛdayā sadayā janaiḥ || 59 ||
[Analyze grammar]

sulocanākhyā tatkanyā vīratatkukṣisaṃbhavā |
sadūharūpairajayatsakalānsundarīgaṇān || 60 ||
[Analyze grammar]

tasyā rūpaṃ guṇaughaṃ ca varṇituṃ bhuvi kaḥ kṣamaḥ |
tadrūpadarśamālokyāsṛjadanyāṃ svayaṃ vidhiḥ || 61 ||
[Analyze grammar]

ahamāsaṃ mahāvīra tasyā dāsī nṛpātmajaḥ |
samāgatāsmi daivena tvaddeśaṃ prati sundarī || 62 ||
[Analyze grammar]

tatsamā sundarī nāsti tvatsamo nāsti sundaraḥ |
gṛhāṇa tāṃ vivāhena svargabhogaṃ yadīcchasi || 63 ||
[Analyze grammar]

jaṃbukīṃ balavānsiṃho vihāyāṃkagatāmapi |
hastinīṃ na hi kiṃ dhatte yatnataḥ pratipattaye || 64 ||
[Analyze grammar]

udyogī puruṣo loke labhate paramāṃ śriyam |
udyogena vinā brūhi kiṃ kāryaṃ bhuvi vidyate || 65 ||
[Analyze grammar]

vyāsa uvāca |
tasyāstadvacanaṃ śrutvā mādhavo mādhavārcakaḥ |
dūrīkṛtya smarodbhāvaṃ tāmityāha varānanām || 66 ||
[Analyze grammar]

mādhava uvāca |
kena cihnena tāṃ kanyāṃ jñāsyāmi kamalānane |
tanme kathaya suśroṇi yadi te mayyanugrahaḥ || 67 ||
[Analyze grammar]

siṃdhupāra pratīpājñaḥ kathaṃ yāsyāmi mānuṣaḥ |
bhaviṣyati tayā sārddhaṃ kathaṃ saṃdarśanaṃ mama || 68 ||
[Analyze grammar]

candrakalovāca |
tasyāstu vāmajaghane tilakaṃ tilasannibham |
asti taddarśanenaiva jñāsyasi tvaṃ sulocanām || 69 ||
[Analyze grammar]

uccaiḥśravasasaṃjñasya turagasya mahātmanaḥ |
tvanmaṃdurāyāṃ putrosti sarvagāmī hayottamaḥ || 70 ||
[Analyze grammar]

tamaśvaśreṣṭhamāruhya javena pavanopamam |
gamiṣyasi samudrāṃtaṃ sukhasādhyā mahīyataḥ || 71 ||
[Analyze grammar]

tato bhūpālaputro'sau sasainyo gṛhamāgataḥ |
sāpi candrakalā sādhvī suprītā svagṛhaṃ gatā || 72 ||
[Analyze grammar]

viciṃtya vacanaṃ tasyā mādhavo'ti tvarānvitaḥ |
ciṃtākulitacitto'sau sahasā maṃdurāṃ yayau || 73 ||
[Analyze grammar]

tatra baddhāñjalirbhūtvā vaikramirvikramānvitaḥ |
turaṃgamāniti prāha guṇayuktānmahābalān || 74 ||
[Analyze grammar]

mādhava uvāca |
yūyaṃ sarve mahātmānaḥ sarvalakṣaṇasaṃyutāḥ |
samudrapāre māṃ netuṃ kaḥ śaknoti turaṅgamaḥ || 75 ||
[Analyze grammar]

atha te turagāḥ sarve śrutvā tadvacanaṃ bhiyā |
parasparaṃ kṣitimukhāstasthurno netumudyatāḥ || 76 ||
[Analyze grammar]

athaikasturagastatra samastalakṣaṇairyutaḥ |
mādhavasya puro gatvā vācametāmuvāca ha || 77 ||
[Analyze grammar]

ahaṃ bhavaṃtaṃ neṣyāmi siṃdhupāraṃ na saṃśayaḥ |
kiṃ tvākarṇaya duḥkhāni madīyāni nṛpātmaja || 78 ||
[Analyze grammar]

anyabhuktāvaśiṣṭaṃ yattattṛṇaṃ mama bhakṣaṇam |
graṃthikoṭiprayuktābhīrajjubhirmama baṃdhanam || 79 ||
[Analyze grammar]

svapne'pi vrīhayo vīra na dṛṣṭā balinā mayā |
anyeṣāmapi bhogānāṃ kā kathātra nṛpātmaja || 80 ||
[Analyze grammar]

gauraveṇa vinā vīra na satāṃ vikramo bhavet |
janiṣyati kathaṃ vahnirvinā kāṣṭhaṃ ghṛtādibhiḥ || 81 ||
[Analyze grammar]

ahamīdṛgime sarve nānābhūṣāsamanvitāḥ |
na tu siṃhasamāḥ śvānaḥ sarvābharaṇabhūṣitāḥ || 82 ||
[Analyze grammar]

pradakṣiṇākāratayā saśailadvīpasāgarāḥ |
kṣaṇamātreṇa pṛthivīṃ śaknomi bhūpate prabho || 83 ||
[Analyze grammar]

mādhava uvāca |
kṣamasva doṣaṃ sakalaṃ matpitrā vihitaṃ haya |
adyaprabhṛti mukhyo'si maṃdurābhyaṃtare mama || 84 ||
[Analyze grammar]

pareṇa dattaḥ saṃtāpaḥ sadā tiṣṭhati nottame |
salilaṃ vahnisaṃtaptaṃ kṣaṇācchītalatāṃ vrajet || 85 ||
[Analyze grammar]

svamādhuryairbhavedikṣuḥ kṣaṇamapi hi tṛptaye |
ityuktvā taṃ namaskṛtya turaṃgaṃ nṛpanaṃdanaḥ || 86 ||
[Analyze grammar]

tataḥ śubhe kṣaṇe tasya pṛṣṭhamāruhya vājinaḥ |
praceṣṭākhyena bhṛtyena vilaṃghya jaladhiṃ yayau || 87 ||
[Analyze grammar]

purīṃ sarvaguṇairyuktāṃ puraṃdarapuropamām |
jagāma mādhavo bhrājansaudhāvalibhirujjvalām || 88 ||
[Analyze grammar]

tatropasthāṃ ca yuvatīṃ gaṃdhinīṃ mādhavo dvijaḥ |
dṛṣṭvāsmitamukho vākyamuvāceti ca komalam || 89 ||
[Analyze grammar]

vṛddhe mātarahaṃ pārtho dinamekaṃ tavālaye |
sthātumicchāmi kā'jñāte dhanavānmādhavāhvayaḥ || 90 ||
[Analyze grammar]

ātitheyī gaṃdhinī sā tamādāyātithiṃ tataḥ |
harṣitvā svagṛhaṃ tatra jagāmātyaṃtabhaktitaḥ || 91 ||
[Analyze grammar]

yathoktavidhinā vipra tayā tasyārhaṇā kṛtā |
mādhavastāṃ niśāṃ ninye ciṃtāvyākulamānasaḥ || 92 ||
[Analyze grammar]

atha prabhāte vimale gandhinyāḥ purato dvija |
mādhavaḥ sakalaṃ kāryaṃ kathayāmāsa bhūsuraḥ || 93 ||
[Analyze grammar]

devī sulocanāyāśca tasminneva dine śubhe |
gandhādivāsanaṃ karma racayāmāsa sā ca tat || 94 ||
[Analyze grammar]

śrutvādhivāsanaṃ karma rājaputryāstato dvija |
śokasāgarakallola nikaro mādhavo'bhavat || 95 ||
[Analyze grammar]

yadarthaṃ rājyavasatirmayā tyaktā tadicchunā |
yadarthaṃ bāṃdhavāstyaktā laṃghitaśca mahodadhiḥ || 96 ||
[Analyze grammar]

adyaiva tasyā daivena bhaviṣyatyadhivāsanam |
niṣphalāḥ sakalā eva yāvaṃto vihitāḥ śramāḥ || 97 ||
[Analyze grammar]

kiṃtu lokā na jalpaṃti mādhvyā mugdho gato'khilam |
ko'pi bhagnodyamo na syātprajñātvā kāryaniścayam || 98 ||
[Analyze grammar]

etadviciṃtya manasā mādhavo'sau punaḥ punaḥ |
mālāpuṣpādike kāryaṃ lilekha premavarṇitam || 99 ||
[Analyze grammar]

kanye mādhavanāmāhaṃ kumāro dharaṇīpateḥ |
tāladhvajādhirājasya vikramasya mahātmanaḥ || 100 ||
[Analyze grammar]

tvacceṭī tatra kāpyasti kanye candrakalāhvayā |
tayā tavaguṇagrāmaḥ kathito me purā kila || 101 ||
[Analyze grammar]

tvadguṇagrāmasaṃlagnacitto'haṃ nimnasāgaram |
vilaṅghya turagārūḍhaḥ samāyātaḥ purīṃ tava || 102 ||
[Analyze grammar]

adhunā māṃ varatvena vṛṇu kanye sulocane |
yataḥ saṃsāramadhye'smiṃstavāsmi śaraṇaṃ gataḥ || 103 ||
[Analyze grammar]

yathā guṇavatīṃ tvāṃ hi nānyo jānāti tatpumān || 104 ||
[Analyze grammar]

sarojinīguṇaṃ vetti bhṛṃga eva na darduraḥ |
śubhrasya jaladasyāpi gaganaikasya nodayaḥ || 105 ||
[Analyze grammar]

tathāpi na bhajedanyaṃ vinā candraṃ kumudvatī |
atha tallikhanaṃ vīro mālākārapriyā kare || 106 ||
[Analyze grammar]

svarṇāṃgulīya sahitaṃ dadau sa vinayo nṛpaḥ |
puṣpamālāṃtare kṛtvā taṃ lekhaṃ sāṃgulīyakam || 107 ||
[Analyze grammar]

rājaputrī samīpe sā gaṃdhinī tarasā yayau |
puṣpamālāṃ baliṃ tasyai datvā sā gaṃdhinī tataḥ || 108 ||
[Analyze grammar]

tasthau baddhāñjalirbhūtvā dūraṃ gatvā bhiyā kiyat |
tataḥ sā rājatanayā likhitaṃ sāṃgulīyakam || 109 ||
[Analyze grammar]

vilokya sakalaṃ mūlātpapāṭhātyaṃtapaṇḍitā |
sāpi tatpṛṣṭhapatre tu tadyogyamuttaraṃ dvija || 110 ||
[Analyze grammar]

alikhadvismitā kanyā yadyacca sarvamucyate |
rājaputra mahābāho tvadvākyamakhilaṃ śrutam || 111 ||
[Analyze grammar]

śṛṇu sattama vākyaṃ me yathocitamidaṃ vacaḥ |
adyādhivāsanaṃ karma śvo vivāho mama dhruvam || 112 ||
[Analyze grammar]

pituryatsaṃmataṃ kāryaṃ pṛthivyāṃko'pi natyajet |
kārye tu duḥkhasādhye tu kāryo nātiśramo janaiḥ || 113 ||
[Analyze grammar]

kāryesiddhe śramo na syādasiddhe śrama eva hi |
tathāpi śṛṇu vakṣyāmi yena prāpnoti māṃ bhavān || 114 ||
[Analyze grammar]

yadartho bhavatā caiva samudropi ca laṃghitaḥ |
mayā pradakṣaṇī kāryo varo vidyādharo hyayam || 115 ||
[Analyze grammar]

tatpuro'haṃ gamiṣyāmi nānābharaṇabhūṣitā |
vāmabāhūrddhvaṃ kṛtvā ca vīraḥ syānmama saṃmukhaḥ || 116 ||
[Analyze grammar]

yena māṃ śakyate netuṃ sa me bhartā bhaviṣyati |
satyaṃ satyamidaṃ satyaṃ patre'smiṃllikhitaṃ mayā || 117 ||
[Analyze grammar]

anyathā sudṛḍhaṃ kāryaṃ laṃghituṃ na hi śakyate |
etadvilikhya sā kanyā tasyā eva kare dadau || 118 ||
[Analyze grammar]

sāpi tatpatramādāya gatā mādhavasannidhim |
tayā yallikhitaṃ patre tatpaṭhitvā tu mādhavaḥ || 119 ||
[Analyze grammar]

bhūyopi likhitaṃ vipra lilekhātyaṃtakautukaiḥ |
tvayā yaduktaṃ he kanye dhanye dhanyakulodbhave || 120 ||
[Analyze grammar]

tadeva manmataṃ sarvaṃ ko'pi nāstyatra saṃśayaḥ |
tatastu gaṃdhinī bhūyo gatvā tannikaṭe dvija || 121 ||
[Analyze grammar]

dadau sulocanāyai sā likhanaṃ sundarākṣaram |
atha tallikhanaṃ jñātvā kumārāṃgī kṛtaṃ dvija || 122 ||
[Analyze grammar]

babhūvātyantasaṃhṛṣṭā vismitā ca punaḥ punaḥ |
tasminnasaṃśayaṃ kāryaṃ yadāsau svīkṛtaṃ dadau || 123 ||
[Analyze grammar]

tadā kiṃ svayamindro vā yanmāyā mādhavaḥ pumān |
ihaloke paratrāsti snehabhūmiḥ patiḥ sadā || 124 ||
[Analyze grammar]

vinā saṃdarśanenāpi na varatvedṛto mayā |
iti saṃcintya sā sādhvī niḥśvasya ca punaḥ punaḥ || 125 ||
[Analyze grammar]

snānavyājādgatāvāsaṃ gandhinyāśca sahālibhiḥ |
haste vidhṛtya tāṃ kanyāṃ gaṃdhinī sā puraṃdhrikā || 126 ||
[Analyze grammar]

mādhavaṃ darśayāmāsa śayānaṃ maṃcakopari |
taṃ samālokya sā kanyā kaṃdarpasadṛśaṃ tataḥ || 127 ||
[Analyze grammar]

romāṃcitaṃ samastāṅgamudāttaṃ paśyati kramāt |
tannetrayugalaṃ tasminyatra yatra nimajjati || 128 ||
[Analyze grammar]

kaṣṭadṛṣṭyā ca nānyatra tasmānnāmātra gacchati |
sākṣādayaṃ vā kandarpo devakīnandano'pi vā || 129 ||
[Analyze grammar]

śarvo vā viṣayādhīśaḥ sākṣādvā pārvatīpatiḥ |
rūpairetairjaganmadhye mānuṣo na hi jāyate || 130 ||
[Analyze grammar]

anena svāminā janmasaphalaṃ hariṇīdṛśaḥ |
madbhaktivaśago bhūtvā vidhātātyaṃtayatnataḥ || 131 ||
[Analyze grammar]

yadāhaṃ kanyakā jātā tadainaṃ kiṃ sasarja ha |
adyaprabhṛti nātho'yaṃ svayaṃ nāstyatra saṃśayaḥ || 132 ||
[Analyze grammar]

ityuktvā sā matiṃ cakre gaṃtuṃ nijagṛhaṃ prati |
gandhinyuvāca |
kanye yuktiriyaṃ bhadre tvayāpi hṛdi sevyatām || 133 ||
[Analyze grammar]

yathā sumūrtiḥ puruṣo na tathā bhāti nindayā |
ullāso gātrabhaṃgaśca mandadṛṣṭiśca vismitam || 134 ||
[Analyze grammar]

sarvāṇi viṣṇucihnāni nidrāyāṃ mṛgalocane |
saṃdaṣṭauṣṭhapuṭākṣepātprokto nottiṣṭhati dhruvam || 135 ||
[Analyze grammar]

śanaiḥ śanaiḥ karaṃ tasya svakarābhyāmadarśayat |
tvāṃ draṣṭuṃ rājakanyāyāḥ saṃdhṛtyāgamanaṃ śṛṇu || 136 ||
[Analyze grammar]

śrutvaitatsopi cottasthau saṃbhramākrāṃtamānasaḥ |
vinayāvanato vākyaṃ mādhavaścetyuvāca tām || 137 ||
[Analyze grammar]

mādhava uvāca |
kanye majjanmasaphalaṃ śramaśca saphalo mama |
tvaccāruvadanāṃbhojaṃ sākṣādeva mayekṣitam || 138 ||
[Analyze grammar]

sakalairyauvanaiḥ kanye tvaṃ varatvena māṃ vṛṇu |
tvadyogosti varo nānyo māṃ vinā bhuvi sundari || 139 ||
[Analyze grammar]

sulocanovāca |
sugate tvaṃ mama svāmī bhāgyena mahatā bhaveḥ |
mayā yadvacanaṃ proktaṃ tadeva sudṛḍhaṃ khalu || 140 ||
[Analyze grammar]

ājñāṃ kuru mahābhāga gacchāmi nijamaṃdiram |
mādhava uvāca |
tiṣṭheti yadi vā vacmi kanye garvastadā bhavet || 141 ||
[Analyze grammar]

gaccheti vacanaṃ vaktuṃ nāyāti vadanānmama |
svayaṃ vicārya cārvaṃgi yadyuktaṃ tadvidhīyatām || 142 ||
[Analyze grammar]

satyehavacanaṃ tasminbhaviṣyasi sutatparā |
ityuktā tena sā kanyā harṣitā svagṛhaṃ gatā || 143 ||
[Analyze grammar]

tatraiva mādhavastasthau vṛto bahuparicchadaiḥ |
cāruvidyādhara eva sthito vidyādharo varaḥ || 144 ||
[Analyze grammar]

tatrasthāśca janāḥ sarve srakcandanavibhūṣitāḥ |
divyāṃbaraparīdhānā rejurdevagaṇā iva || 145 ||
[Analyze grammar]

kvacidgītaṃ kvacinnṛtyaṃ kvacitkolāhaladhvaniḥ |
kvacitkena pradīpālistatpure samavartata || 146 ||
[Analyze grammar]

heṣitaiḥ saptivṛṃdānāṃ hastināṃ caiva bṛṃhitaiḥ |
harṣasvanaiśca patrīṇāṃ pūritāḥ kakubho daśa || 147 ||
[Analyze grammar]

nānāpatākānivahairdhavalairnṛpasadmabhiḥ |
samaṃtādgaganaṃ sarvaṃ vyāptaṃ hi yatra jaimine || 148 ||
[Analyze grammar]

ke'pi śaṅkhānsamādadhmurḍhakkāḍiṃḍimajharjharān |
vādayāṃcakrire ke'pi madhukohalakādikam || 149 ||
[Analyze grammar]

tato yuvatayaḥ sarvāḥ sarojakorakastasthā |
lalitāni sugītāni jaguścandranibhānanāḥ || 150 ||
[Analyze grammar]

parasparaṃ yauvanato gharṣaṇacyutamālayā |
prasvedāmbugaladgaṃdhairbabhau kanyeva tatra bhūḥ || 151 ||
[Analyze grammar]

gaṃbhārīkāṣṭharacitaṃ pīṭhamāruhya sundarī |
jñātibhirveṣṭitā yātā varaṃ sthānaṃ sulocanā || 152 ||
[Analyze grammar]

atrāṃtare vikramaputra eṣa śayyopariṣṭātkila labdhanidraḥ |
na veda daivena vivāhakāryaṃ sulocanāyāśca sulocanāyāḥ || 153 ||
[Analyze grammar]

vidhātṛmāyāśatamohitānāṃ kadāpi na syādbhuvane sukhāya |
tataḥ svasaṃketavidhiṃ jano'yaṃ vismṛtya nidrāmabhajatsukhena || 154 ||
[Analyze grammar]

vanaṃ parityajya kṛśānubhītyā jalaṃ praviṣṭā nalinī sukhārtham |
saṃdahyate tatra himānalena yadyasya karma na tadanyathā syāt || 155 ||
[Analyze grammar]

vedādiśāstramakhilaṃ prapaṭhaṃtu lokāḥ kurvaṃtu nāmakṣitipālasevām |
ugraṃ tapaḥ pratidivaṃ pratisādhayaṃtu na śrīstathāpi ca bhajatyatibhāgyahīnam || 156 ||
[Analyze grammar]

mastakopari tiṣṭhaṃti duḥkhāni ca sukhāni ca |
anyakāle samāyānti haṭhādanyāni sattama || 157 ||
[Analyze grammar]

nidrāvaṃtaṃ samālokya mādhavaṃ duḥkhabhāginam |
praceṣṭaściṃtayāmāsa jānansaṃketametayoḥ || 158 ||
[Analyze grammar]

dhigastvamuṃ rājaputraṃ daivamāyāvimohitaḥ |
vismṛtya nijasaṃketaṃ nidrāṃ saṃprāpya sevate || 159 ||
[Analyze grammar]

asau duḥkhāgatā kanyā varasya nikaṭe'dhunā |
kiṃ bhavennayane tādṛksaṃketaṃ yāti niṣphalam || 160 ||
[Analyze grammar]

tiṣṭha tvaṃ vai pāpakarmannidrāṃ saṃsevya mastake |
mayā hayaṃ samāruhya netavyā sā varāṅganā || 161 ||
[Analyze grammar]

kanyāratnaṃ ca ratnaṃ ca mudā prāpnoti durllabham |
tadā kiṃ sevayā kāryaṃ mādhavasyāsya durmateḥ || 162 ||
[Analyze grammar]

dhanārthaṃ kriyate sevā sarvabhāvena bhūbhujām |
taccenmudā svayaṃ prāptaṃ sevāduḥkhena kiṃ tadā || 163 ||
[Analyze grammar]

praceṣṭa iti saṃciṃtya samāruhya turaṃgamam |
sā rājakanyā yatrāste yayau tatra nabhaḥ pathā || 164 ||
[Analyze grammar]

varaṃ pradakṣiṇīkṛtya smaraṃtī samayaṃ svakam |
vāmahastaṃ samuddhṛtya tasthau vidyādharāgrataḥ || 165 ||
[Analyze grammar]

haste vidhṛtya tāṃ kanyāṃ praceṣṭo'tijavena saḥ |
pṛṣṭhe niveśayāmāsa saptestasya mahābalaḥ || 166 ||
[Analyze grammar]

tāṃ rājaputrīmādāya purīṃ kāṃcīṃ suśobhanām |
tāmathāsau samālokya praceṣṭo'titvarānvitaḥ || 167 ||
[Analyze grammar]

uvāca pravahanpāṇiṃ naṣṭamānasasādhvasaḥ |
praceṣṭa uvāca |
samudrāṃtaratīrasthāṃ kāṃcīṃ nāma purīmimām || 168 ||
[Analyze grammar]

paśya sarvatra vikhyātāṃ janasarvasukhapradām |
atra mādhavavīrasya tasya vidyādharasya vā || 169 ||
[Analyze grammar]

kasyāpi ca bhayaṃ nāsti paśya candranibhānane |
maccitteṃdhanasaṃlagnāṃ kāmānalaśikhāvalim || 170 ||
[Analyze grammar]

kucakuṃbhakaraiḥ siddhaṃ nirvāṇaṃ dehi suṃdari |
tvaccārumukhapadme'sminmanmukhabhramaro'dhunā || 171 ||
[Analyze grammar]

icchetpātuṃ madhūnyatra kā'jñāte tiṣṭhati priye |
tvaccārugātrasaṃsparśāccharaistudati māṃ smaraḥ || 172 ||
[Analyze grammar]

trāhi trāhi priye trāhi tavāsmi śaraṇaṃ gataḥ |
iti bruvaṃtaṃ taṃ mūḍhamabhivīkṣya varāṃganā || 173 ||
[Analyze grammar]

śokāgnitaptasarvāṅgī ciṃtayāmāsa cetasā |
ayaṃ mūḍho duṣṭaceṣṭaḥ praceṣṭo nāma vedhasā || 174 ||
[Analyze grammar]

likhitaḥ kiṃ lalāṭe me yanmayā hā hatāsmyaham |
kva mātā kva ca me tātaḥ kva ca vidyādharo varaḥ || 175 ||
[Analyze grammar]

anenāhaṃ samānītā dhigastu ghaṭanāṃ vidheḥ |
alaṃ lokāḥ prakurvaṃti garvaṃ jagati sarvadā || 176 ||
[Analyze grammar]

vetti cchetuṃ garvavṛkṣaṃ vidhātā ghaṭanāsinā |
tathāpi vipade dhairyaṃ nirbhayatvaṃ ca tatparam || 177 ||
[Analyze grammar]

upāyāśceti catvāraḥ praśasyā dīrghadarśibhiḥ |
ityālokya hṛdā kanyā vacobhiḥ komalākṣaraiḥ || 178 ||
[Analyze grammar]

praceṣṭaṃ pratyuvācāsau sarvakāryavicakṣaṇā |
sulocanovāca |
dṛḍhaṃ kuru mano vīra kanyāhamavivāhitā || 179 ||
[Analyze grammar]

māṃ samāliṅgya mohena kathaṃ yāsyasi durmate |
śāstroktavidhinā vīra vivāhena gṛhāṇa mām || 180 ||
[Analyze grammar]

tava sevāṃ kariṣyāmi dāsīvatko'tra saṃśayaḥ |
tvaṃ me prāṇāśca mitraśca bhūṣaṇaṃ bāṃdhavastathā || 181 ||
[Analyze grammar]

ananyagatayo nāryo bhavānnītimavaiti kim |
vivāhayogyavastūni vivāhārthaṃ samānaya || 182 ||
[Analyze grammar]

matpāṇigrahaṇaṃ śīghraṃ kuru jāḍyaṃgṛhīti ca |
aṃtardṛḍhaṃ bahiḥ ślakṣṇaṃ badarīphalavadvacaḥ || 183 ||
[Analyze grammar]

ākarṇya tasyā mūḍho'sau paramāṃ prītimāyayau |
turaṃgamaṃ ca tāṃ kanyāṃ saṃsthāpyaikatra durmatiḥ || 184 ||
[Analyze grammar]

karakaṃkaṇamādāya tasyāstatpuramāyayau |
tataḥ sā ciṃtayāmāsa vidhiṃ nūnaṃ praśasyatam || 185 ||
[Analyze grammar]

yata āvāṃ parityajya mūḍho'sau harṣito yayau |
kiṃ kartavyaṃ kva gaṃtavyaṃ kva sthātavyaṃ mayādhunā || 186 ||
[Analyze grammar]

atisaṃkaṭakāryesminnistāro me bhavetkatham |
yadāhamatra tiṣṭhami kiṃ vadiṣyaṃti te tadā || 187 ||
[Analyze grammar]

puṇyatīrthaṃ samāsādya paratra janmakāmyayā |
paṃcatāṃ pratiyāsyāmi sāpi śreyaskarī yataḥ || 188 ||
[Analyze grammar]

madviyogādayaṃ mūḍho na vidyādhara mādhavau |
jīviṣyaṃti trayopyete kṣaṇamātramapi smaran || 189 ||
[Analyze grammar]

mayi sthitāyāmeteṣāṃ bhavejjīvanarakṣaṇam |
mṛtāyāmapi yāsyaṃti trayo'pyete tu paṃcatām || 190 ||
[Analyze grammar]

māmuddiśya yadā prāṇāḥ yakṣyaṃte te'tra me janāḥ |
bhaviṣyāmi tadā nūnamahaṃ tadvadhabhāginī || 191 ||
[Analyze grammar]

idānīṃ puṇyatīrtheṣu yaṣṭavyo bhagavānhariḥ |
tasminprasanne bhadraṃ me sarvameva bhaviṣyati || 192 ||
[Analyze grammar]

prāṇeṣu ca vinaṣṭeṣu sarvameva vinaśyati |
teṣu sthiteṣu sakalaṃ stokastokena sidhyati || 193 ||
[Analyze grammar]

niśāvaśiṣṭā nalinī himākare dūrīkṛte caṇḍakareṇa bhāsvatā |
sugandhapuṣpaprakaro'tisuṃdarī nāpnoti kiṃ bhṛṃgavarasya saṃgamam || 194 ||
[Analyze grammar]

hṛdā viciṃtyeti varāṃganā sā saptiṃ samāruhya mahājavaṃ tam |
taptuṃ tapaḥ sāgaraviṣṇupatnyorjagāma vijñottamasaṃgamāya || 195 ||
[Analyze grammar]

tasminkṣetravare puṇye gaṅgāsāgarasaṃgame |
vasedrājā suṣeṇākhyaḥ somavaṃśasamudbhavaḥ || 196 ||
[Analyze grammar]

gaṃtuṃ tasya sabhāṃ rājñaścetasā sā vyaciṃtayat |
mayā yuvatyā kartavyaṃ kathaṃ bhūpāladarśanam || 197 ||
[Analyze grammar]

adhivāsanasūtrāṇi sadūrvāṇi bhuje mama |
kanyāhaṃ turagārūḍhā yuvatī saṃgavarjitā || 198 ||
[Analyze grammar]

cāritraṃ māmakaṃ nūnaṃ manovismayakārakam |
ātmānaṃ gopayitvāhaṃ yāsyāmi nṛpateḥ sabhām || 199 ||
[Analyze grammar]

indrajālaprabhāveṇa sā bhūtvā puruṣākṛtiḥ |
praviveśa sabhāṃ rājñaḥ sudharmāmiva jaimine || 200 ||
[Analyze grammar]

taṃ sapannamivāyāṃtaṃ śaktihastaṃ hayāsanam |
svayaṃ papraccha bhūpālaḥ kastvaṃ kuta ihāgataḥ || 201 ||
[Analyze grammar]

tasyaitadvacanaṃ śrutvā sā kanyā puruṣākṛtiḥ |
praṇamyovāca rājānaṃ suhṛdaṃ sajjanāśrayam || 202 ||
[Analyze grammar]

deva vīravaro nāma putro'haṃ pṛthivīpateḥ |
vartanāya samāyātastvadrājyaṃ prati saṃprati || 203 ||
[Analyze grammar]

yadyatkāryamasādhyaṃ syāttadeva sādhayāmyaham |
mayi sthite na madbharttuḥ kutrāpi syātparājayaḥ || 204 ||
[Analyze grammar]

iti śrīpadmapurāṇe kriyāyogasāre vīravarapradarśonāma paṃcamo'dhyāyaḥ || 5 ||
[Analyze grammar]