Chapter 253

[English text for this chapter is available]

śrīpārvatyuvāca |
bhagavansarvamākhyātaṃ vaibhavāvasthitaṃ hareḥ |
etasminrāmakṛṣṇābhyāṃ caritramati vismitam || 1 ||
[Analyze grammar]

aho rāmasyacaritaṃ kṛṣṇasya ca mahātmanaḥ |
śṛṇvatyā mama deveśa kalpāṃtaraśatairapi || 2 ||
[Analyze grammar]

tṛptiṃ naiveti bhūteśa ceto harikathāmṛtam |
adhunā śrotumicchāmi viṣṇormāhātmyamuttamam |
tatpūjanavidhiṃ deva śrotumicchāmyahaṃ tathā || 3 ||
[Analyze grammar]

śrīrudra uvāca |
śṛṇu devi pravakṣyāmi hareśca sumahātmanaḥ |
sthāpanaṃ ca svayaṃ vyaktaṃ dvividhaṃ tatprakīrtitam || 4 ||
[Analyze grammar]

śilā mṛddārulohādyaiḥ kṛtvā pratikṛtiṃ hareḥ |
śrautasmārtāgamaproktakriyāsaṃsthāpanaṃ hi yat || 5 ||
[Analyze grammar]

tatsthāpanamiti proktaṃ svayaṃ vyaktaṃ hi me śṛṇu |
yasminsaṃnihito viṣṇuḥ svayameva nṛṇāṃ bhuvi || 6 ||
[Analyze grammar]

pāṣāṇadārvorātmeśaḥ svayaṃ vyaktaṃ hi tatsmṛtam |
svayaṃ vyaktaṃ sthāpitaṃ vā pūjayenmadhusūdanam || 7 ||
[Analyze grammar]

devatānāṃ marhaṣīṇāmarcanārthe sanātanaḥ |
svayameva jagannāthaḥ sānnidhyaṃ yāti keśavaḥ || 8 ||
[Analyze grammar]

yasya yadvigrahe bhogyaṃ tadevāvirabhūdbhuvi |
tadeva pūjayennityaṃ tasminneva rametsadā || 9 ||
[Analyze grammar]

śrīraṅgaśāyī deveśo vidhinārcyaḥ surottamaḥ |
sa evekṣvākunāthānāṃ tapasāvirabhūdbhuvi || 10 ||
[Analyze grammar]

mamāpi kāśyāṃ saṃpūjyo mādhavaḥ kaluṣāpahaḥ |
yatra yatra gṛhe ramye svayaṃ vyaktaḥ sanātanaḥ || 11 ||
[Analyze grammar]

tatratatra samāgamya rame'haṃ saṃvyavasthitaḥ |
nāṣṭāṃgayoge yajñeśastvarcāyāṃ viṃdate nṛṇām || 12 ||
[Analyze grammar]

cakṣuṣorviṣayaṃ prāpya dadāti varamīpsitam |
sarvāvasthāsu saulabhyamarcāyāṃ labhyate janaiḥ || 13 ||
[Analyze grammar]

ajñānāmapi sānnidhyaṃ sarvadā pṛthivītale |
jaṃbūdvīpe mahāpuṇye varṣe vai bhārate śubhe || 14 ||
[Analyze grammar]

arcāyāṃ saṃnidhau viṣṇurnetareṣu kadācana |
tattasmādbhārate varṣe munibhistridaśairapi || 15 ||
[Analyze grammar]

sevitaḥ satataṃ devi tapoyajñakriyādibhiḥ |
bhārate'sminmahāvarṣe nityaṃ saṃnihito hariḥ || 16 ||
[Analyze grammar]

aiṃdradyumne tathā kaurme siṃhādrau karavīrake |
kāśyāṃ prayāge saumye ca śālagrāmācale tathā || 17 ||
[Analyze grammar]

dvāravatyāṃ naimiṣe ca tathā badarikāśrame |
kṛtaśauce haretpāpaṃ pauṃḍarīke ca daṃḍake || 18 ||
[Analyze grammar]

māthure veṅkaṭādrau ca śvetādrau garuḍācale |
kāṃcyāmanaṃtaśayane śrīṃrage vāsavācale || 19 ||
[Analyze grammar]

nārāyaṇācale saumye vārāhe vāmanāśrame |
evamādyāḥ svayaṃ vyaktāḥ sarvakāmaphalapradāḥ || 20 ||
[Analyze grammar]

svayameva hi sānnidhyaṃ yasminyāti janārdanaḥ |
tasminneva svayaṃ vyaṃktaṃ vadaṃti munayaḥ śubhāḥ || 21 ||
[Analyze grammar]

mahābhāgavataśreṣṭho vidhinā sthāpya keśavam |
maṃtreṇa kuryātsāṃnidhyaṃ sthāpanaṃ tadviśiṣyate || 22 ||
[Analyze grammar]

tasminsaṃpūjayeddevaṃ grāmeṣu ca gṛheṣu ca |
śālagrāmaśilāyāṃ tu gṛhārcā sadbhiriṣyate || 23 ||
[Analyze grammar]

arcanaṃ maṃtrapaṭhanaṃ yāgayogo mahātmanaḥ |
nāmasaṃkīrtanaṃ sevā taccihnairaṃkanaṃ tathā || 24 ||
[Analyze grammar]

tadīyārādhanaṃ ca syānnavadhā bhidyate śubhe |
tattatkarmavidhānaṃ ca viprasya satataṃ smṛtam || 25 ||
[Analyze grammar]

mahābhāgavataḥ śreṣṭho brāhmaṇo vai gururnṛṇām |
sarveṣāmevalokānāmasau pūjyo yathā hariḥ || 26 ||
[Analyze grammar]

tāpādipaṃca saṃskāri navejyākarmakārakaḥ |
arthapaṃcakavidvipro mahābhāgavataḥ smṛtaḥ || 27 ||
[Analyze grammar]

tattatkarmavidhānejyā kṣattriyasya vidhīyate |
taccihnairaṃkane sevā tadīyānāṃ ca pūjanam || 28 ||
[Analyze grammar]

maṃtravarṇasya japanaṃ nāmasaṃkīrtanaṃ hareḥ |
vaṃdanaṃ ca viśāṃ proktaṃ ṣaṭkarmejyāvidhānataḥ || 29 ||
[Analyze grammar]

nāmasaṃkīrtanaṃ sevā pūjanaṃ vaṃdanaṃ tathā |
arcanaṃ ca tadīyānāṃ paṃcejyā śūdrajanmanaḥ || 30 ||
[Analyze grammar]

sādhāraṇena sarveṣāṃ mānasejyā nṛṇāṃ priye |
svādhikārānurūpaṃ ca kāryā cejyā jagatpateḥ || 31 ||
[Analyze grammar]

ananyadevatābhaktairananyaphalasādhakaiḥ |
vedavidbrahmatattvajñairvītarāgairmumukṣubhiḥ || 32 ||
[Analyze grammar]

gurubhaktisamāyuktaiḥ suprasannaiḥ susādhubhiḥ |
brāhmaṇairitaraiścāpi pūjanīyo hariḥ sadā || 33 ||
[Analyze grammar]

yathocitā ca varṇasya kāryā ijyā harernṛṇām |
varṇāśramānurūpaṃ ca karttavyaṃ vaiṣṇavaiḥ śubhaiḥ || 34 ||
[Analyze grammar]

śrutismṛtyuditaṃ samyaṅnityamatra samācaret |
śrutismṛtyuktakarmāṇi nātikrāmeta buddhimān || 35 ||
[Analyze grammar]

śrutismṛtyuktamācāraṃ yo na seveta vaiṣṇavaḥ |
sa ca pākhaṃḍamāpanno raurave narake vaset || 36 ||
[Analyze grammar]

tasmādvarṇānurūpāṃ vai kuryādijyāṃ jagatpateḥ |
tasmātsmṛtyuktamācāraṃ kuryādvai mānavaḥ sadā || 37 ||
[Analyze grammar]

sādhāraṇā hi sarveṣāṃ mānasejyā śubhe nṛṇām |
svādhikāraṃ nirīkṣyaiva karma kuryādataṃdritaḥ || 38 ||
[Analyze grammar]

śamodamastapaḥ śaucaṃ satyamāmiṣavarjanam |
asteyamevāhiṃsā ca sarveṣāṃ dharmasādhanam || 39 ||
[Analyze grammar]

tasmādvarṇānurūpeṇa pūjayenmadhusūdanam |
rātrāvaṃte samutthāya upaspṛśya yathāvidhi || 40 ||
[Analyze grammar]

namaskṛtya gurūnsvasya saṃsmaredacyutaṃ hṛdi |
sahasranāmabhirbhaktyā kīrtayedvāgyataḥ śuciḥ || 41 ||
[Analyze grammar]

bahirgrāmātsamusṛjya mūlamaṃtraṃ yathāvidhi |
śaucaṃ kṛtvā yathānyāyamācamya prayataḥ śuciḥ || 42 ||
[Analyze grammar]

daṃtadhāvanapūrvaṃ tu snānaṃ kuryādyathāvidhi |
ādāya tulasīmūlamṛdaṃ tatpatrasaṃyutām || 43 ||
[Analyze grammar]

mūlamaṃtreṇābhimaṃtrya gāyatryā ca śubhānane |
maṃtreṇaivānuliptāṃgaḥ snāyātkṛtvāghamarṣaṇam || 44 ||
[Analyze grammar]

haripādodbhavāṃ gaṃgāṃ tatrāvāhya sunirmale |
nimajjyāśu japetsūktamaghamarṣaṇamuttamam || 45 ||
[Analyze grammar]

ācamya mārjanaṃ kuryātpauruṣoktakramādatha |
paścādāśu nimajjyātha mūlamaṃtraṃ japedbudhaḥ || 46 ||
[Analyze grammar]

aṣṭāviṃśativāraṃ vā śatamaṣṭottaraṃ ca vā |
prārthayedabhimaṃtryātha jalamaṃtreṇa vaiṣṇavaḥ || 47 ||
[Analyze grammar]

ācamya tarpayeddevānnṛṣīṃścaiva pitṝṃstathā |
nipīḍya vastramācamya dhautavastreṇa veṣṭitaḥ || 48 ||
[Analyze grammar]

vimalāṃ mṛttikāṃ ramyāmādāya dvijasattamaḥ |
maṃtreṇaivābhimaṃtryātha lalāṭādiṣu vaiṣṇavaḥ || 49 ||
[Analyze grammar]

dhārayedūrddhvapuṃḍrāni yathāsaṃkhyamataṃdritaḥ |
upāsya vidhivatsaṃdhyāṃ sāvitrīṃ ca japedbudhaḥ || 50 ||
[Analyze grammar]

saṃyatātmā gṛhaṃ gatvā pādau prakṣālya vāgyataḥ |
ācamyaikāgramanasā pūjāmaṃḍapamāviśet || 51 ||
[Analyze grammar]

ramye śubhratare pīṭhe puṣpopacaya śobhite |
tasminniveśya devaṃ taṃ lakṣmīnārāyaṇaṃ prabhum || 52 ||
[Analyze grammar]

pūjayedvidhinā samyaggaṃdhapuṣpākṣatādibhiḥ |
sthāpane vā svayaṃ vyakte gṛhārcāyāṃ vidhānataḥ || 53 ||
[Analyze grammar]

śrautasmārtāgamoktānāmarcanaṃ vidhinā dvijaḥ |
kuryādbhaktyā yathārhaṃ ca viṣṇoḥ prayatamānasaḥ || 54 ||
[Analyze grammar]

yathopadiṣṭaṃ guruṇā tathā kurvīta vaiṣṇavaḥ |
śrautaṃ vaikhānasaṃ proktaṃ vāsiṣṭhaṃ smārtamucyate || 55 ||
[Analyze grammar]

paṃcarātravidhānaṃ ca divyāgamamitīritam |
kriyālopaṃ na karttavyaṃ viṣṇorārādhanaṃ param || 56 ||
[Analyze grammar]

āvāhanāsanārghyādyairgaṃdhapuṣpākṣatādibhiḥ |
dhūpairdīpaiśca naivedyaistāṃbūlādyairnamaskṛtaiḥ || 57 ||
[Analyze grammar]

kuryādārādhanaṃ viṣṇoryathāśaktyā mudānvitaḥ |
pratyṛcaṃ puruṣasūktena mūlamaṃtreṇa vaiṣṇavaḥ || 58 ||
[Analyze grammar]

maṃtradvayena kurvīta ṣoḍaśairupacārakaiḥ |
bhūyaḥ pratyupacāreṣu dadyātpuṣpāñjaliṃ tataḥ || 59 ||
[Analyze grammar]

āvāhayejjagannāthaṃ mudrayā caiva vaiṣṇavaḥ |
āsanaṃ tu yathā dadyātpuṣpakeṇa ca mudrayā || 60 ||
[Analyze grammar]

dīpārghyācamanaṃ snānaṃ pātrasthairvimalairjalaiḥ |
maṃgaladravyasaṃyuktaistulasīdalamiśritaiḥ || 61 ||
[Analyze grammar]

dadyātpratyupacāraṃ tu mūlamaṃtradvayena ca |
suvāsitena tailena kuryādabhyaṃjanaṃ tataḥ || 62 ||
[Analyze grammar]

kastūryācaṃdenenāpi kuryādudvarttanādikam |
sugaṃdhavāsitaistoyaiḥ snāpya maṃtrayutaiḥ śubhaiḥ || 63 ||
[Analyze grammar]

vastrairābharaṇairdivyairalaṃkṛtya yathāvidhi |
madhuparkaṃ tato dadyādgaṃdhaṃ dadyātsuvāsitam || 64 ||
[Analyze grammar]

surabhīṇi supuṣpāṇi bhaktyā samyaṅnivedayet |
dhūpaṃ daśāṃgamaṣṭāṃgaṃ dīpaṃ ca sumanoharam || 65 ||
[Analyze grammar]

naivedyaṃ vividhaṃ dadyātpāyasāpūpamiśritam |
karpūraṃ tu satāṃbūlaṃ bhaktyā caiva nivedayet || 66 ||
[Analyze grammar]

dīpairnīrājanaṃ kṛtvā puṣpamālāṃ samarcayet |
pariṇīya praṇamyātha stutvā stotrairanuttamaiḥ || 67 ||
[Analyze grammar]

garuḍāṅke śāyayitvā maṅgalārghyaṃ nivedayet |
saṃkīrtya nāmabhiḥ puṇyaiḥ paścāddhomaṃ samācaret || 68 ||
[Analyze grammar]

harernaivaidyaśeṣeṇa jahuyādvahnimaṃḍale |
pratyṛcaṃ pauruṣaṃ sūktaṃ śrīsūktaṃ maṃgalāhvayam || 69 ||
[Analyze grammar]

hotavyamājyasaṃmiśraṃ haviṣā vaidikānale |
proktena maṃtraratnena juhuyādbhaktisaṃyutam || 70 ||
[Analyze grammar]

aṣṭottaraśatavāramaṣṭāviṃśatimeva ca |
yajñarūpaṃ mahāviṣṇuṃ dhyāyanvai juhuyāddhaviḥ || 71 ||
[Analyze grammar]

śuddhajāṃbūnadanibhaṃ śaṃkhacakragadādharam |
samastavedavedāṃtasāṃgopāṃgayutaṃ prabhum || 72 ||
[Analyze grammar]

devyā śriyā samāsīnaṃ dhyātvā homaṃ samācaret |
ekaikāmāhutiṃ paścānnāmabhirjuhuyāddhaviḥ || 73 ||
[Analyze grammar]

nityānbhaktānsamudidaśya mahābhāgavatottamaḥ |
bhūlīlā vimalādyāśca śaktayaḥ prathamaṃ kramāt || 74 ||
[Analyze grammar]

anaṃtaṃ vihageṃdrādi devatāstadanaṃtaram |
vāsudevādayaḥ paścāttathā śaktyādi devatāḥ || 75 ||
[Analyze grammar]

mūrttayaḥ keśavādyāśca tathā saṃkarṣaṇādayaḥ |
matsyakūrmādayaścaiva tathā cakrādihetayaḥ || 76 ||
[Analyze grammar]

kumudādayaśca tridaśāstathā caṃdrādidevatāḥ |
iṃdrādilokapālāśca tathā dharmādidevatāḥ || 77 ||
[Analyze grammar]

hotavyāḥ kramaśastasminsaṃpūjyāśca viśeṣataḥ |
etadvaikuṃṭhahomaṃ tu mahābhāgavatottamaḥ || 78 ||
[Analyze grammar]

nityārcanavidhau nityaṃ kurvīta susamāhitaḥ |
gṛhārcane gṛhadvāri paṃcayajñavidhānataḥ || 79 ||
[Analyze grammar]

dattvā balividhānena paścādācamanaṃ caret |
upaviśyāsane śubhre kṛṣṇājinakuśottare || 80 ||
[Analyze grammar]

maṃtrayoge prakurvīta bhogārthaṃ sukhamātmanaḥ |
samyakpadmāsanāsīno bhūtaśuddhiṃ samācaret || 81 ||
[Analyze grammar]

prāṇāyāmatrayaṃ kuryānmantreṇa vijiteṃdriyaḥ |
udaṅmukhaṃ tataḥ kṛtvā hṛtpaṅkajamanuttamam || 82 ||
[Analyze grammar]

vikāsaṃ tasya kurvīta vijñānaraviṇā hṛdi |
tatkarṇikāyāṃ vahnyarkaśaśibiṃbānyanukramāt || 83 ||
[Analyze grammar]

trayaṃ trayīmaye tasmiṃściṃtayedvaiṣṇavottamaḥ |
nānāratnamayaṃ pīṭhaṃ teṣāmupari ciṃtayet || 84 ||
[Analyze grammar]

tasminhṛtpadmamūlāṃte bālārkasadṛśadyutim |
aṣṭaiśvaryadalaṃ padmaṃ maṃtrākṣaramayaṃ caret || 85 ||
[Analyze grammar]

tasmindevyā samāsīnaṃ koṭiśītāṃśusaṃnibham |
caturbhujaṃ suṃdarāṃgaṃ śaṃkhacakragadādharam || 86 ||
[Analyze grammar]

padmapatraviśālākṣaṃ sarvalakṣaṇalakṣitam |
śrīvatsakaustubhoraskaṃ pītavastradharaṃ prabhum || 87 ||
[Analyze grammar]

vicitrābharaṇairyuktaṃ divyamaṃḍanamaṃḍitam |
divyacaṃdanaliptāṃgaṃ divyapuṣpopaśobhitam || 88 ||
[Analyze grammar]

tulasīkomaladalavanamālāvibhūṣitam |
bālārkakoṭisadṛśaṃ kāṃtyā devyā śriyā saha || 89 ||
[Analyze grammar]

sarvalakṣaṇalakṣaṇyā samāśliṣṭatanuḥ śivam |
evaṃ dhyātvā japenmaṃtraṃ samāhitamanāḥ śuciḥ || 90 ||
[Analyze grammar]

sahasraṃ śatavāraṃ vā yathāśaktyā'thavāpi ca |
manasaivārcanaṃ kṛtvā viramettatra bhaktitaḥ || 91 ||
[Analyze grammar]

tadīyānarccayedbhaktyā tasminkāle samāgatān |
tarpayitvānnapānādyairanuvrajya visarjayet || 92 ||
[Analyze grammar]

arccayitvā pitṝndevāṃstarpayecca vidhānataḥ |
saṃpūjyātithibhṛtyāṃśca bhuṃjīyātāṃ ca dampatī || 93 ||
[Analyze grammar]

yakṣarākṣasa bhūtānāmarcanaṃ varjayetsadā |
yo mohātkurute vipraḥ sa cāṃḍālo bhaveddhruvam || 94 ||
[Analyze grammar]

yakṣāṇāṃ ca piśācānāṃ madyamāṃsabhujāṃ tathā |
divaukasāṃ tu bhajanaṃ surāpānasamaṃ smṛtam || 95 ||
[Analyze grammar]

brahmarākṣasavetālayakṣabhūtārcanaṃ nṛṇām |
kuṃbhīpākamahāghora narakaprāptisādhanam || 96 ||
[Analyze grammar]

koṭijanmakṛtaṃ puṇyaṃ yajñadānakriyādikam |
sadyaḥ sarvaṃ layaṃ yāti yakṣabhūtādipūjanāt || 97 ||
[Analyze grammar]

striyo vā puruṣo vāpi yakṣabhūtādikārccanāt |
kalpakoṭisahasrāṇi kalpakoṭiśatāni ca || 98 ||
[Analyze grammar]

krimirbhūtvātha viṣṭhāyāṃ pitṛbhiḥ saha majjati |
yakṣāṇāṃ ca piśācānāṃ tāmasānāṃ divaukasām || 99 ||
[Analyze grammar]

niveditānnaṃ yo'śnāti pūyaśoṇitabhugbhavet |
yakṣānbhūtagaṇāṃścānyānkrūrānvai brahmarākṣasān || 100 ||
[Analyze grammar]

uddiśya bhuṅkte yo vipraḥ sadyaścāṇḍāla eva saḥ |
yā nārī pūjayedyakṣānpiśācoragarākṣasān || 101 ||
[Analyze grammar]

sā yāti narakaṃ ghoraṃ kālasūtramadhomukhī |
pitṛbhiḥ saha kalpāṃtamuṣitvā tatra dāruṇe || 102 ||
[Analyze grammar]

lihanmūtrapurīṣaṃ vai kṛcchrātsūcimukhaistathā |
kṛmibhirbhakṣamāṇāṃgo yāvadābhūtasaṃplavam || 103 ||
[Analyze grammar]

paścādbhūmau daśāheṣu jāyate śatasaṃkhyayā |
tasmādyakṣādikānāṃ ca devānāmarccanaṃ tyajet || 104 ||
[Analyze grammar]

svataṃtrapūjanaṃ yatra vaidikānāmapi tyajet |
arccayitvā jagadvaṃdyaṃ devaṃ nārāyaṇaṃ harim || 105 ||
[Analyze grammar]

tadāvaraṇasaṃsthānaṃ devasya parito'rccayet |
harerbhuktāvaśeṣeṇa baliṃ tebhyo viniḥkṣipet || 106 ||
[Analyze grammar]

homaṃ caiva prakurvīta taccheṣeṇaiva vaiṣṇavaḥ |
harernivedituṃ samyagdevebhyo juhuyāddhaviḥ || 107 ||
[Analyze grammar]

pitṛbhyaścāpi taddadyātsarvamānaṃtyamāpnuyāt |
prāṇināṃ pīḍanaṃ yattadviduṣāṃ nirayāya vai || 108 ||
[Analyze grammar]

adattaṃ caiva yatkiṃcitparasvaṃ gṛhyate naraiḥ |
steyaṃ tadviddhi girije narakasyaiva kāraṇam || 109 ||
[Analyze grammar]

laśunaṃ madyapānādi mūlakaṃ gṛṃjanaṃ tathā |
tilapiṣṭaṃ śigru bilvaṃ tathā kośātakīṃ tathā || 110 ||
[Analyze grammar]

alābuṃ caiva vārtākaṃ bījāladyaṃ kavacāni ca |
evamanyānyabhakṣyāṇi śāstradṛṣṭāni vai naraḥ || 111 ||
[Analyze grammar]

khādannarakamāpnoti vicitramaśivaṃ tathā |
avaiṣṇavānāṃ yaccānnaṃ patitānāṃ tathaiva ca || 112 ||
[Analyze grammar]

anarpitaṃ tathā viṣṇoḥ śvamāṃsasadṛśaṃ bhavet |
yakṣarākṣasabhūtānnaṃ surā madyaṃ ca gṛñjanam || 113 ||
[Analyze grammar]

yo'śnāti nirayaṃ yāti pūyaśoṇitabhojanam |
etaiḥ saṃsthāpanasparśasahavāsādibhirnaraḥ || 114 ||
[Analyze grammar]

tepiyāntyeva nirayaṃ viṇmūtrakṛmibhojanam |
patitānāṃ ca saṃsargātpākhaṃḍānāṃ tathaiva ca || 115 ||
[Analyze grammar]

sarvayajñasyabhoktāraṃ purāṇaṃ puruṣottamam |
jñātvā sarvaṃ prakurvīta nityanaimittikāḥ kriyāḥ || 116 ||
[Analyze grammar]

yakṣarākṣasabhūtāśca kūṣmāṇḍagaṇa bhairavāḥ |
nārccanīyāḥ sadā devi svargalokamabhīpsubhiḥ || 117 ||
[Analyze grammar]

yakṣarākṣasabhūtānāmarccanaṃ varjayeddvijaḥ |
paiśācatvamavāpnoti kalpakoṭiśatatrayam || 118 ||
[Analyze grammar]

tasmādrākṣasabhūtānāmarcanaṃ pratiṣidhyate |
kalpakoṭisahasrāṇi kalpakoṭiśatāni ca || 119 ||
[Analyze grammar]

rauravaṃ narakaṃ yāti yakṣabhūtagaṇārcanāt |
śaṃkhacakrādibhiścihnairanyaiḥ priyatamairhareḥ || 120 ||
[Analyze grammar]

rahitaḥ sarvadharmebhyaḥ pracyuto narakaṃ vrajet |
agamyāgamanāddhiṃsā paradravyāpahāraṇāt || 121 ||
[Analyze grammar]

abhakṣyabhakṣaṇātsadyo narakaṃ samavāpnuyāt |
yastu pāṇigṛhītāṃ ca hitvā'nyāṃ yo striyaṃ vrajet || 122 ||
[Analyze grammar]

agamyāgamanaṃ taddhi sadyo narakakārakam |
patitānāṃ ca saṃsargātpākhaṃḍānāṃ tathaiva ca || 123 ||
[Analyze grammar]

vikarmasthānāṃ ca tathā yātyeva nirayaṃ naraḥ |
saṃsargiṇāṃ ca saṃsargaṃ tatsaṃsargamapi tyajet || 124 ||
[Analyze grammar]

vaiṣṇavaḥ kulamekaṃ tu varjayetpāpasaṃyutam |
ekāṃtī saṃtyajedgrāmaṃ mahāpātakamiśritam || 125 ||
[Analyze grammar]

tathaiva paramekāntī taddeśamapi varjayet |
svakarmmajñānabhaktyādi sādhanaṃ vaiṣṇavaṃ smṛtam || 126 ||
[Analyze grammar]

harerājñānurūpeṇa karmajñānādi yaścaret |
sa ekāṃtī bhavedvipro vāsudevaparāyaṇaḥ || 127 ||
[Analyze grammar]

akṛtyaṃ vaiṣṇavaḥ pāpabuddhyā samyakparityajet |
ekāṃtī saṃtyajecchāstraṃ dūṣaṇānmanasāpi ca || 128 ||
[Analyze grammar]

tathaiva paramaikāṃtī heyabuddhyā parityajet |
nityaṃ naimittikaṃ kāmyaṃ kṛtyaṃ tu trividhaṃ smṛtam || 129 ||
[Analyze grammar]

jñānaṃ tathaivaloke'sminmunibhiḥ saṃprakīrtitam |
kṛtyākṛtyavivekaṃ ca paralokasya ciṃtanam || 130 ||
[Analyze grammar]

tatprāptisādhanaṃ viṣṇoḥ svarūpajñānameva ca |
bhaktiyukto bhavedbhakto navadhā sā prakīrtitā || 131 ||
[Analyze grammar]

sudarśanorddhvapuṃḍrādi taccihnairaṃkanaṃ śubham |
sadguromaṃtrapaṭhanamarcanaṃ vidhinā hareḥ || 132 ||
[Analyze grammar]

smaraṇaṃ kīrtanaṃ viṣṇoḥ sevā ca paramātmanaḥ |
praṇāmastasya puratastadīyānāṃ ca pūjanam || 133 ||
[Analyze grammar]

prasādatīrthasevā ca bhaktirnavavidhā smṛtā |
yasmātprapadyate devaṃ śaraṇaṃ vaiṣṇavo harim || 134 ||
[Analyze grammar]

prapattiḥ sā tu vijñeyā trividhā saṃprakīrtitā |
tāmasī rājasī caiva sātvikī trividhā smṛtā || 135 ||
[Analyze grammar]

sāpi tridhākṛtā siddhiḥ sāmānyā sarvadehinām |
etaccatuṣṭayaṃ devi heyaṃ saṃtyajya vaiṣṇavaḥ || 136 ||
[Analyze grammar]

upāyabhūtaṃ brahmaivamavalaṃbeta vaiṣṇavam |
upāyabhāvātsaṃtyajya karmajñānādikaṃ naraḥ || 137 ||
[Analyze grammar]

kurvīta bhagavatprītyai mahābhāgavatottamaḥ |
trikālamarcayedviṣṇuṃ bhaktyā vai puruṣottamam || 138 ||
[Analyze grammar]

naimittike viśeṣeṇa pūjayedvidhinā śubhe |
pratyahaṃ kārtike māsi jātīpuṣpaiḥ samarcayet || 139 ||
[Analyze grammar]

dadyādakhaṃḍaṃ dīpaṃ ca niyatātmā dṛḍhavrataḥ |
brāhmaṇānbhojayitvāṃte harisāyujyamāpnuyāt || 140 ||
[Analyze grammar]

dhanuṣyuṣasi deveśaṃ māsamekaṃ niraṃtaram |
arcayedutpalairdevi karavīraiḥ sitāsitaiḥ || 141 ||
[Analyze grammar]

dhūpadīpaiśca naivedyairyathāśaktyā nivedayet |
samāptau bhojayedviprānmahābhāgavatottamān || 142 ||
[Analyze grammar]

aśvamedhasahasrasya phalamāpnotyasaṃśayam |
tapo māsyudite bhānau snātvā nadyāṃ viśeṣataḥ || 143 ||
[Analyze grammar]

arccayenmādhavaṃ puṣpairutpalaiśca śubhānane |
pāyasaṃ saghṛtaṃ divyaṃ bhaktyā tatra nivedayet || 144 ||
[Analyze grammar]

snātvā saṃpūjayedviṣṇuṃ māsamekaṃ niraṃtaram |
śarkarāṃbuyutaṃ nityamudyānaṃ vinivedayet || 145 ||
[Analyze grammar]

vaiṣṇavānpūjayedbhaktyā māsānte śubhadarśane |
madhumāsi tathā nityaṃ bakulaiścaṃpakairapi || 146 ||
[Analyze grammar]

pūjayejjagatāmīśaṃ guḍānnaṃ ca nivedayet |
māsāṃte vaiṣṇavānviprānbhojayetsusamāhitaḥ || 147 ||
[Analyze grammar]

sahasravārṣikīṃ pūjāṃ pratinityamavāpnuyāt |
mādhave pūjayeddevaṃ śatapatrairmahotpalaiḥ || 148 ||
[Analyze grammar]

pūjayitvā vidhānena dadhyannaṃ phalasaṃyutam |
guḍodakaṃ ca bhaktyā vai tasmindevi nivedayet || 149 ||
[Analyze grammar]

lakṣmyā yukto jagannāthaḥ prīto bhavati pārvati |
śukre tu śuklakamalaiḥ pāṭalaiḥ kumudotpalaiḥ || 150 ||
[Analyze grammar]

arcayitvā hṛṣīkeśamannaṃ cūtaphalairyutam |
nivedayitvā bhaktyā vai gavāṃkoṭiprado bhavet || 151 ||
[Analyze grammar]

vaiṣṇavānbhojayitvātha sarvamānaṃtyamāpnuyāt |
āṣāḍhe devadeveśaṃ lakṣmībhartāramacyutam || 152 ||
[Analyze grammar]

śrīpuṣpairarcayennityaṃ pāyasānnaṃ nivedayet |
māsānte bhojayedviprānmahābhāgavatottamān || 153 ||
[Analyze grammar]

ṣaṣṭivarṣasahasrasya pūjāṃ prāpnotyasaṃśayaḥ |
nabhomāsyarcayedviṣṇuṃ punnāgaiḥ ketakīdalaiḥ || 154 ||
[Analyze grammar]

arcayitvācyutaṃ bhaktyā na bhūyo janmabhāgbhavet |
dadyādapūpānbhaktyātha śarkarāghṛtamiśritān || 155 ||
[Analyze grammar]

brāhmaṇānbhojayettadvatsarvamānaṃtyamāpnuyāt |
nabhasye'pyarcayedīśaṃ kuṃdaiḥ kurabakairapi || 156 ||
[Analyze grammar]

kṣīrānnaṃ guḍasaṃmiśraṃ bhaktyā tatra nivedayet |
gavāṃkoṭipradānasya pratyahaṃ phalamāpnuyāt || 157 ||
[Analyze grammar]

nīlotpalairiṣe māsi pūjayenmadhusūdanam |
bhaktyā nivedayettasminkṣīramāpūpamiśritam || 158 ||
[Analyze grammar]

kalpakoṭisahasrāṇi kalpakoṭiśatāni ca |
vaiṣṇavaṃ lokamāpnoti muditaḥ svajanairvṛtaḥ || 159 ||
[Analyze grammar]

ūrje māsi tathā devi komalaistulasīdalaiḥ |
pūjayitvācyutaṃ bhaktyā tatsāyujyamavāpnuyāt || 160 ||
[Analyze grammar]

kṣīrājyaśarkaropetamannaṃ vai pāyasaṃ tathā |
apūpaṃ ca krameṇaiva bhaktyā samyaṅnivedayet || 161 ||
[Analyze grammar]

amāyāṃ maṃdavāre ca vaiṣṇavarkṣe tathaiva ca |
ravisaṃkrame vyatīpāte grahaṇaṃ caṃdra sūryayoḥ || 162 ||
[Analyze grammar]

viśeṣeṇārcayedviṣṇuṃ yathāśaktyā varānane |
gurorutkrāṃtadivase janmarkṣeṣu tathā hareḥ || 163 ||
[Analyze grammar]

iṣṭiṃ ca vaiṣṇavīṃ kuryācchaktyā vai dvijasattamaḥ |
dadyātpuṣpāṃjaliṃ tatra pratyarcaṃ vedasaṃmitam || 164 ||
[Analyze grammar]

pāraṇaṃ cāpi kurvīta caruṇā pāyasena vā |
vaiṣṇavānbhojayedviprāñchaktyā dadyācca dakṣiṇām || 165 ||
[Analyze grammar]

kulakoṭiṃ samudhṛtya vaiṣṇavaṃ padamāpnuyāt |
sarvavedairaśaktaścedyaṣṭuṃ bhāgavatottamam || 166 ||
[Analyze grammar]

vaiṣṇavairanuvākairvā saptarātraṃ niraṃtaram |
puṣpāṃjalisahasraṃ tu homaṃ ca pratyahaṃ caret || 167 ||
[Analyze grammar]

prītaye vā bhagavataḥ pratiślokaṃ yajedabudhaḥ |
athavā maṃtraratnaṃ hi saptarātraṃ niraṃtaram || 168 ||
[Analyze grammar]

aṣṭottarasahasraṃ tu juhuyāddhaviṣā yajet |
viśeṣeṇārcayedvidvānmahābhāgavatottamān || 169 ||
[Analyze grammar]

aṃte cāvabhṛthaṃ kuryādyathāvibhavasārataḥ |
vaiṣṇavairanuvākaiśca kuryādavabhṛthaṃ dvijaḥ || 170 ||
[Analyze grammar]

atra snātvā vidhānena yathāśaktyā dvijottamaḥ |
śubhe pātrāṃtare ramye pādau prakṣālya bhaktitaḥ || 171 ||
[Analyze grammar]

arcayedgaṃdhapuṣpādyairvastrairābharaṇādibhiḥ |
tāṃbūlena phalairvāpi yathāśaktyā samarcayet || 172 ||
[Analyze grammar]

bhojayitvānnapānādyaiḥ praṇamya ca punaḥpunaḥ |
āsīmāṃtamanuvrajya namaskṛtya visarjitam || 173 ||
[Analyze grammar]

punaḥ praṇamya bhaktyātha śanaistatra nivarttitaḥ |
gṛhaṃ praviśya deveśaṃ pūjayetprayatātmavān || 174 ||
[Analyze grammar]

evamabhyarcayedviṣṇuṃ yāvajjīvamataṃdritaḥ |
tadīyāṃśca viśeṣeṇa pūjayetsarvadā śubhe || 175 ||
[Analyze grammar]

ārādhanānāṃ sarveṣāṃ viṣṇorārādhanaṃ param |
tasmātparataraṃ devi tadīyānāṃ samarcanam || 176 ||
[Analyze grammar]

arcayitvāpi goviṃdaṃ tadīyānnārcayetpunaḥ |
na sa bhāgavato jñeyaḥ kevalaṃ dāṃbhikaḥ smṛtaḥ || 177 ||
[Analyze grammar]

pumāṃstasmātprayatnena vaiṣṇavānpūjayetsadā |
sarvaṃ tarati duḥkhaughaṃ mahābhāgavatārcanāt || 178 ||
[Analyze grammar]

evamuktaṃ mayā devi viṣṇorārādhanaṃ param |
nityanaimittikaṃ caiva tadīyānāṃ ca pūjanam || 179 ||
[Analyze grammar]

pauruṣaṃ tasya yāthātmyaṃ phalasādhanameva ca |
tasyāvasathadehaṃ ca karmādyapi catuṣṭayam |
tava proktaṃ mayā devi kimanyacchrotumicchasi || 180 ||
[Analyze grammar]

iti śrīpādme mahāpurāṇe paṃcapaṃcāśatsāhasryāṃ saṃhitāyāmuttarakhaṃḍe umāmaheśvarasaṃvāde viṣṇupūjāvidhānavaiṣṇavācārakathanaṃnāma tripaṃcāśadadhikadviśatatamo'dhyāyaḥ || 253 ||
[Analyze grammar]