Chapter 247

[English text for this chapter is available]

rudra uvāca |
hatvātha yavanaṃ tatra mucukuṃdena dhīmatā |
dattvā tasmai varaṃ muktiṃ niṣkrāṃto yadunaṃdanaḥ || 1 ||
[Analyze grammar]

hataṃ ca yavanaṃ śrutvā jarāsaṃdhaḥ sudurmatiḥ |
yayudhe rāmakṛṣṇābhyāṃ svabalena samāvṛtaḥ || 2 ||
[Analyze grammar]

kṛṣṇena nihataṃ sainyaṃ sarvaṃ tasya durātmanaḥ |
sa papāta mahīpṛṣṭhe mūrcchito magadhādhipaḥ || 3 ||
[Analyze grammar]

cireṇa labdhvā saṃjñāṃ tu vihvalāṃgo bhayāturaḥ |
na śaśāka raṇe yoddhuṃ rāmeṇa magadheśvaraḥ || 4 ||
[Analyze grammar]

vimukhaḥ prādravattūrṇaṃ hataśeṣabalānugaḥ |
ajeyāviti tau matvā rāmakṛṣṇau mahābalau || 5 ||
[Analyze grammar]

tayorvirodhaṃ tyaktvātha nagarīṃ svāṃ viveśa ha |
atha tau vasudevasya tanayau saha senayā || 6 ||
[Analyze grammar]

mathurāṃ tyajya nagarīṃ praviṣṭau dvārikāṃ purīm |
iṃdreṇa preṣito vāyuḥ sabhāṃ tatra divaukasām || 7 ||
[Analyze grammar]

kṛṣṇāya pradadau prītyā nirmitāṃ viśvakarmaṇā |
vajravaiḍūryaracitāṃ bahvāsanavicitritām || 8 ||
[Analyze grammar]

nānāratnamayairdivyaiḥ svarṇacchatrairvirājitām |
tāṃ prāpya ramyāṃ tu sabhāmugrasenādayo nṛpāḥ || 9 ||
[Analyze grammar]

modaṃte naigamaiḥ sārddhaṃ divi devagaṇā iva |
ikṣvākuvaṃśasaṃbhūto raivato nāma pārthivaḥ || 10 ||
[Analyze grammar]

kanyāṃ duhitaraṃ svasya sarvalakṣaṇasaṃyutām |
rāmāya pradadau prītyā revatī nāma nāmataḥ || 11 ||
[Analyze grammar]

upayeme vidhānena sa rāmastāṃ ca revatīm |
ramayāmāsa ca tayā śacyā iva sureśvaraḥ || 12 ||
[Analyze grammar]

vidarbharājo dharmātmā bhīṣmako nāma dhārmikaḥ |
babhūvustasya putrāstu rukmaprabhṛtayaḥ śubhāḥ || 13 ||
[Analyze grammar]

teṣāmavarajā kanyā rukmiṇī varavarṇinī |
kamalāṃśena saṃbhūtā sarvalakṣaṇasaṃyutā || 14 ||
[Analyze grammar]

rāghavatvebhavatsītā rukmiṇī kṛṣṇajanmani |
anyeṣvevāvatāreṣu viṣṇoreṣā sahāyinī || 15 ||
[Analyze grammar]

hiraṇyaka hiraṇyākṣau saṃbhūtau dvāpare punaḥ |
śiśupālo daṃtavaktra iti nāma samanvitau || 16 ||
[Analyze grammar]

caidyānvaye samudbhūtau mahābalaparākramau |
rukmiṇī śiśupālāya dātumaicchattadātmajaḥ || 17 ||
[Analyze grammar]

taṃ necchatī patiṃ sā tu śiśupālaṃ śubhānanā |
bālyātprabhṛti vai viṣṇumanuraktā dṛḍhavratā || 18 ||
[Analyze grammar]

uddiśya kṛṣṇaṃ bharttāraṃ surāṇāmarcanaṃ sadā |
cakāra rukmiṇī kanyā dānāni vividhāni ca || 19 ||
[Analyze grammar]

vratacaryāparābhūtvā dhyāyaṃtī puruṣottamam |
ātmeśaṃ svasya bhartāramuvāsa pitṛmaṃdire || 20 ||
[Analyze grammar]

karttuṃ tāṃ śiśupālāya vivāhaṃ pārthivottamaḥ |
cakāra yatnaṃ putreṇa rukmiṇā savidhīmatā || 21 ||
[Analyze grammar]

purohitasutaṃ vipraṃ preṣayāmāsa rukmiṇī |
uddiśya kṛṣṇaṃ bharttāraṃ sa tūrṇaṃ dvārakāṃ yayau || 22 ||
[Analyze grammar]

sametya kṛṣṇaṃ rāmaṃ ca tābhyāṃ vidhivadarcitaḥ |
ekāṃte sarvamācaṣṭa rukmiṇībhāṣitaṃ tayoḥ || 23 ||
[Analyze grammar]

tacchrutvā rāmakṛṣṇau tu tena vipreṇa dhīmatā |
sarvaśastrāstrasaṃpūrṇaṃ rathamākāśagaṃ prabhuḥ || 24 ||
[Analyze grammar]

āruhya sūtamukhyena dārukeṇa mahātmanā |
vidarbhanagarīṃ tūrṇaṃ jagmatuḥ puruṣottamau || 25 ||
[Analyze grammar]

rājānaḥ sarvarāṣṭrebhyo vivāhaṃ draṣṭumāgatāḥ |
jarāsaṃdhamukhāḥ sarve śiśupālasya dhīmataḥ || 26 ||
[Analyze grammar]

tasminnudvāhasamaye rukmiṇī rukmabhūṣaṇā |
durgāṃ niḥsṛtārcayituṃ sakhībhirnagarādbahiḥ || 27 ||
[Analyze grammar]

etasminneva kāle tu saṃprāpto devakīsutaḥ |
rathasthāṃ tāṃ ca jagrāha balavānmadhusūdanaḥ || 28 ||
[Analyze grammar]

sahasā rathamāropya yayau tūrṇaṃ svamālayam |
tataḥ krodhasamāviṣṭā jarāsaṃdhamukhā nṛpāḥ || 29 ||
[Analyze grammar]

rukmiṇā rājaputreṇa yuddhāya samupasthitāḥ |
anuyātā hariṃ kruddhāścaturaṃgabalānvitāḥ || 30 ||
[Analyze grammar]

balabhadro mahābāhuravaruhya rathottamāt |
lāṃgalaṃ muśalaṃ gṛhya nijaghāna kṣaṇādarīn || 31 ||
[Analyze grammar]

rathānaśvānmahānāgāṃstathā pādacarānapi |
lāṃgalamuśalāmyāṃ vai nijaghāna balādraṇe || 32 ||
[Analyze grammar]

tasya lāṃgalapātena cūrṇitā rathapaṃktayaḥ |
nāgāśca patitā bhūmau vajreṇeva mahīdharāḥ || 33 ||
[Analyze grammar]

nirbhinnamastakāḥ sarve vamaṃto rudhiraṃ bahu |
kṣaṇenaiva hataṃ sainyaṃ balarāmeṇa vai tadā || 34 ||
[Analyze grammar]

sāśvaṃ sanāgaṃ sarathaṃ sapadātiṃ mahāraṇe |
samaṃtātsamare tatra susruvuḥ śoṇitāpagāḥ || 35 ||
[Analyze grammar]

prabhagnāḥ pārthivāḥ sarve dudruvurbhayapīḍitāḥ |
kṛṣṇena kadanaṃ cakre rukmī krodhavaśādbalī || 36 ||
[Analyze grammar]

dhanurudyamya bāṇaughaistāḍayāmāsa śārṅgiṇam |
tataḥ prahasya goviṃdaḥ śārṅgamādāya līlayā || 37 ||
[Analyze grammar]

jaghānaikenabāṇena rathāśvāṃstasya sārathim |
rathaṃdhvajaṃ patākāṃ ca ciccheda dharaṇīdharaḥ || 38 ||
[Analyze grammar]

virathaḥ khaṅgamādāya dharaṇyāṃ sa upasthitaḥ |
kṛṣṇastu khaṅgaṃ ciccheda bāṇenaikena vīryavān || 39 ||
[Analyze grammar]

tataḥ sa muṣṭimudyamya kṛṣṇaṃ vakṣasyatāḍayat |
taṃ jagrāha raṇe vīraṃ nibadhya nibiḍaṃ hariḥ || 40 ||
[Analyze grammar]

tīkṣṇaṃ kṣurapramādāya prahasanmadhusūdanaḥ |
śiraso muṃḍanaṃ kṛtvā mumoca ca janārdanaḥ || 41 ||
[Analyze grammar]

sa tu śokasamāviṣṭo niḥśvasannurago yathā |
āviveśa puraṃ svīyaṃ sa tu tatraiva cāvasat || 42 ||
[Analyze grammar]

iti śrīpādme mahāpurāṇe paṃcapaṃcāśatsāhasryāṃ saṃhitāyāmuttarakhaṃḍe umāmaheśvarasaṃvāde śrīkṛṣṇacarite vidarbhasenāvidhvaṃsanaṃnāma saptacatvāriṃśadadhikadviśatatamo'dhyāyaḥ || 247 ||
[Analyze grammar]