Chapter 244

[English text for this chapter is available]

śaṃkara uvāca |
atha rāmastu vaidehyā rājyabhogānmanoramān |
bubhuje varṣasāhasraṃ pālayansarvatodiśaḥ || 1 ||
[Analyze grammar]

aṃtaḥpurajanāssarve rākṣasasya gṛhe sthitām |
garhayaṃti sma vaidehīṃ tathā jānapadā janāḥ || 2 ||
[Analyze grammar]

lokāpavādabhītyā ca rāmaḥ śatrunivārakaḥ |
darśayanmānuṣaṃ dharmamaṃtarvatnīṃ nṛpātmajām || 3 ||
[Analyze grammar]

vālmīkerāśrame puṇye gaṃgātīre mahāvane |
visasarja mahātejā garbhiṇīṃ munisaṃsadi || 4 ||
[Analyze grammar]

sā bhartuḥ parataṃtrā hi uvāsa muniveśmani |
arcitā munipatnībhirvālmīkamuni rakṣitā || 5 ||
[Analyze grammar]

tatraivāsūta yamalau nāmnā kuśalavau sutau |
tau ca tatraiva muninā saṃskṛtau ca vavardhatuḥ || 6 ||
[Analyze grammar]

rāmo'pi bhrātṛbhissārddhaṃ pālayāmāsa medinīm |
yamādiguṇasampannassarvabhogavivarjitaḥ || 7 ||
[Analyze grammar]

arcayansatataṃ viṣṇumanādinidhanaṃ harim |
brahmacaryaparo nityaṃ śaśāsa pṛthivīṃ nṛpaḥ || 8 ||
[Analyze grammar]

śatrughno lavaṇaṃ hatvā mathurāṃ devanirmitām |
pālayāmāsa dharmātmā putrābhyāṃ saha rāghavaḥ || 9 ||
[Analyze grammar]

gaṃdharvānbharato hatvā siṃdhorubhayapārśvataḥ |
svātmajau sthāpayāmāsa tasmindeśe mahābalau || 10 ||
[Analyze grammar]

paścime madradeśe tu madrānhatvā ca lakṣmaṇaḥ |
svasutau ca mahāvīryau abhiṣicya mahābalaḥ || 11 ||
[Analyze grammar]

gatvā punarayodhyāṃ tu rāmapādāvupaspṛśat |
brāhmaṇasya mṛtaṃ bālaṃ kāladharmamupāgatam || 12 ||
[Analyze grammar]

jīvayāmāsa kākutsthaḥ śūdraṃ hatvā ca tāpasam |
tatastu gautamītīre naimiṣe janasaṃsadi || 13 ||
[Analyze grammar]

iyāja vājimedhaṃ ca rāghavaḥ paravīrahā |
kāṃcanīṃ jānakīṃ kṛtvā tayā sārddhaṃ mahābalaḥ || 14 ||
[Analyze grammar]

cakāra yajñānbahuśo rāghavaḥ paramārthavit |
ayutānyaśvamedhāni vājapeyāni ca prabhuḥ || 15 ||
[Analyze grammar]

agniṣṭomaṃ viśvajitaṃ gomedhaṃ ca śatakratum |
cakāra vividhānyajñānparipūrṇasadakṣiṇān || 16 ||
[Analyze grammar]

etasminnaṃtare tatra vālmīkiḥ sumahātapāḥ |
sītāmānīya kākutsthamidaṃ vacanamabravīt || 17 ||
[Analyze grammar]

vālmīkiruvāca |
apāpāṃ maithilīṃ rāma tyaktuṃ nārhasi suvrata |
iyaṃ tu virajā sādhvī bhāskarasya prabhā yathā |
ananyā tava kākutstha kasmāttyaktā tvayānagha || 18 ||
[Analyze grammar]

rāma uvāca |
apāpāṃ maithilīṃ brahmanjānāmi vacanāttava |
rāvaṇena hṛtā sādhvī daṇḍake vijane purā || 19 ||
[Analyze grammar]

taṃ hatvā samare sītāṃ śuddhāmagnimukhāgatām |
punaryātosmyayodhyāyāṃ sītāmādāya dharmataḥ || 20 ||
[Analyze grammar]

lokāpavādaḥ sumahānabhūtpaurajaneṣu ca |
tyaktā mayā śubhācārā tadbhayāttava sannidhau || 21 ||
[Analyze grammar]

tasmāllokasya saṃtuṣṭyai sītā mama parāyaṇā |
pārthivānāṃ maharṣīṇāṃ pratyayaṃ kartumarhati || 22 ||
[Analyze grammar]

maheśvara uvāca |
evamuktā tadā sītā munipārthivasaṃsadi |
cakārapratyayaṃ devī lokāścaryakaraṃ satī || 23 ||
[Analyze grammar]

darśayaṃstasya lokasya rāmasyānanyatāṃ satī |
abravītprāṃjaliḥ sītā sarveṣāṃ janasaṃsadi || 24 ||
[Analyze grammar]

sītovāca |
yathā'haṃ rāghavādanyaṃ manasāpi na ciṃtaye |
tathā me dharaṇī devī vivarandātumarhati || 25 ||
[Analyze grammar]

yathaiva satyamuktaṃ me vedmi rāmātparaṃ na ca |
tathā svaputryāṃ vaidehyāṃ dharaṇī sahasā iyāt || 26 ||
[Analyze grammar]

maheśvara uvāca |
tato ratnamayaṃ pīṭhaṃ pṛṣṭhe dhṛtvā khageśvaraḥ |
rasātalāttadā vīro vijñāya jananīṃ tadā || 27 ||
[Analyze grammar]

tatastu dharaṇīdevī hastābhyāṃ gṛhya maithilīm |
svāgatenābhinaṃdyaināmāsane saṃnyaveśayat || 28 ||
[Analyze grammar]

sītāṃ samāgatāṃ dṛṣṭvā divi devagaṇā bhṛśam |
puṣpavṛṣṭimavicchinnāṃ divyāṃ sītāmavākiran || 29 ||
[Analyze grammar]

sāpi divyāpsarobhistu pūjyamānā sanātanī |
vainateyaṃ samāruhya tasmānmārgāddivaṃ yayau || 30 ||
[Analyze grammar]

dāsīgaṇaiḥ pūrvabhāge saṃvṛtā jagadīśvarī |
saṃprāpya paramaṃ dhāma yogigamyaṃ sanātanam || 31 ||
[Analyze grammar]

rasātalapraviṣṭāṃ tu tāṃ dṛṣṭvā sarvamānuṣāḥ |
sādhusādhviti sīteyamuccaiḥ sarve pracukruśuḥ || 32 ||
[Analyze grammar]

rāmaḥ śokasamāviṣṭaḥ saṃgṛhya tanayāvubhau |
munibhiḥ pārthiveṃdraiśca sāketaṃ praviveśa ha || 33 ||
[Analyze grammar]

atha kālena mahatā mātaraḥ saṃśitavratāḥ |
kāladharmaṃ samāpannā bhartuḥ svargaṃ prapedire || 34 ||
[Analyze grammar]

daśavarṣasahasrāṇi daśavarṣaśatāni ca |
cakāra rājyaṃ dharmeṇa rāghavaḥ saṃśitavrataḥ || 35 ||
[Analyze grammar]

kasyacittvathakālasya rāghavasya niveśanam |
kālastāpasarūpeṇa saṃprāpto vākyamabravīt || 36 ||
[Analyze grammar]

kāla uvāca |
rāma rāma mahābāho dhātrā saṃpreṣito'smyaham |
yadbravīmi raghuśreṣṭha tacchṛṇuṣva mahāmate || 37 ||
[Analyze grammar]

dvandvameva hi kāryaṃ syādāvayoḥ paribhāṣitam |
tadaṃtare praviṣṭoyassa vaddhyo hi bhaviṣyati || 38 ||
[Analyze grammar]

maheśvara uvāca |
tatheti ca pratiśrutya rāmo rājīvalocanaḥ |
dvāsthaṃ kṛtvā tu saumitriṃ kālo vākyamabhāṣata |
vaivasvato'bravīdvākyaṃ rāmaṃ daśarathātmajam || 39 ||
[Analyze grammar]

kāla uvāca |
śṛṇu rāma yathāvṛttaṃ samāgamanakāraṇāt |
daśavarṣasahasrāṇi daśavarṣaśatāni ca || 40 ||
[Analyze grammar]

vasāmi mānuṣe loke hatvā rākṣasapuṃgavau |
evamuktaḥ suragaṇairavatīrṇosi bhūtale || 41 ||
[Analyze grammar]

tadayaṃ samayaḥ prāptaḥ svarlokaṃ gamituṃ tvayā |
sanāthā hi surāssarve bhavaṃtvadya tvayānagha || 42 ||
[Analyze grammar]

maheśvara uvāca |
evamastviti kākutstho rāmaḥ prāha mahāmunim |
etasminnaṃtare tatra durvāsāstu mahātapāḥ || 43 ||
[Analyze grammar]

rājadvāramupāgamya lakṣmaṇaṃ vākyamabravīt |
durvāsā uvāca |
māṃ nivedaya kākutsthaṃ śīghraṃ gatvā nṛpātmaja || 44 ||
[Analyze grammar]

maheśvara uvāca |
tamabravīllakṣmaṇastu asāṃnidhyamiti dvija |
tataḥ krodhasamāviṣṭaḥ prāha taṃ munisattamaḥ || 45 ||
[Analyze grammar]

durvāsā uvāca |
śāpaṃ dāsyāmi kākutsthaṃ rāmaṃ na yadi darśaye |
maheśvara uvāca |
tasmācchāpabhayādvipraṃ rāghavāya nyavedayat |
tatraivāṃtardadhe kālaḥ sarvabhūtabhayāvahaḥ || 46 ||
[Analyze grammar]

pūjayāmāsa taṃ prāptamṛṣiṃ durvāsasaṃ nṛpaḥ |
agrajasya pratijñā taṃ vijñāya raghusattamaḥ || 47 ||
[Analyze grammar]

tatyāja mānuṣaṃ rūpaṃ lakṣmaṇaḥ sarayūjale |
visṛjya mānuṣaṃ rūpaṃ praviveśa svakāṃ tanum || 48 ||
[Analyze grammar]

phaṇāsahasrasaṃyuktaḥ koṭīṃdusamavarcasaḥ |
divyamālyāṃbaradharo divyagaṃdhānulepanaḥ || 49 ||
[Analyze grammar]

nāgakanyāsahasraistu saṃvṛtaḥ samalaṃkṛtaḥ |
vimānaṃ divyamāruhya prayayau vaiṣṇavaṃ padam || 50 ||
[Analyze grammar]

lakṣmaṇasya gatiṃ sarvāṃ viditvā raghusattamaḥ |
svayamapyatha kākutsthaḥ svargaṃ gaṃtumabhīpsitaḥ || 51 ||
[Analyze grammar]

abhiṣicyātha kākutsthaḥ svātmajau ca kuśīlavau |
vibhajya rathanāgāśvaṃ sadhanaṃ pradadau tayoḥ || 52 ||
[Analyze grammar]

kuśavatyāṃ kuśaṃ taṃ ca śaravatyāṃ lavaṃ tathā |
sthāpayāmāsa dharmeṇa rājye sve raghusattamaḥ || 53 ||
[Analyze grammar]

abhiprāyaṃ tu vijñāya rāmasya viditātmanaḥ |
ājagmurvānarāḥ sarve rākṣasāḥ sumahābalāḥ || 54 ||
[Analyze grammar]

vibhīṣaṇo'tha sugrīvo jāmbavānmārutātmajaḥ |
nīlo nalaḥ suṣeṇaśca niṣādādhipatirguhaḥ || 55 ||
[Analyze grammar]

abhiṣicya sutau vīrau śatrughnaśca mahāmanāḥ |
sarva ete samājagmurayodhyāṃ rāmapālitām || 56 ||
[Analyze grammar]

te praṇamya mahātmānamūcuḥ prāṃjalayastathā |
vānaraprabhṛtaya ūcuḥ |
svarlokaṃ gaṃtumudyuktaṃ jñātvā tvāṃ raghusattama || 57 ||
[Analyze grammar]

āgatāḥ sma vayaṃ sarve tavānugamanaṃ prati |
na śaktāḥ sma kṣaṇaṃ rāma jīvituṃ tvāṃ vinā prabho |
tasmāttvayā viśālākṣa gacchāmastridaśālayam || 58 ||
[Analyze grammar]

maheśvara uvāca |
tairevamuktaḥ kākutstho bāḍhamityabravīttataḥ |
athovāca mahātejā rākṣaseṃdraṃ vibhīṣaṇam || 59 ||
[Analyze grammar]

rāma uvāca |
rājyaṃ praśāsa dharmeṇa mā pratijñāṃ vṛthā kṛthāḥ |
yāvaccaṃdraśca sūryaśca yāvattiṣṭhati medinī |
tāvadramasva suprīto kāle mama padaṃ vraja || 60 ||
[Analyze grammar]

maheśvara uvāca |
ityuktvātha sa kākutsthaḥ svāḍgaṃ viṣṇuṃ sanātanam |
śrīraṃgaśāyinaṃ saumyamikṣvākukuladaivatam || 61 ||
[Analyze grammar]

saṃprītyā pradadau tasmai rāmo rājīvalocanaḥ |
hanumaṃtamathovāca rāghavaḥ śatrusūdanaḥ || 62 ||
[Analyze grammar]

rāma uvāca |
matkathāḥ pracariṣyaṃti yāvalloke harīśvara |
tāvattvamāsa medinyāṃ kāle māṃ vraja suvrata || 63 ||
[Analyze grammar]

maheśvara uvāca |
tamevamuktvā kākutstho jāṃbavaṃtamathābravīt |
rāma uvāca |
dvāpare samanuprāpte yadūnāmanvaye punaḥ || 64 ||
[Analyze grammar]

bhūbhārasya vināśāya samutpatsyāmyahaṃ bhuvi |
kariṣye tatra saṃgrāmaṃ svayaṃ bhallūkasattama || 65 ||
[Analyze grammar]

maheśvara uvāca |
tamevamuktvā kākutsthaḥ sarvāṃstānṛkṣavānarān |
uvāca vācā gacchadhvamiti rāmo mahābalaḥ || 66 ||
[Analyze grammar]

maṃtriṇo naigamāścaiva bharataḥ kaikayīsutaḥ |
rāghavasyānugamane niścitāste samāyayuḥ || 67 ||
[Analyze grammar]

tataḥ śuklāṃbaradharo brahmacārī yayau param |
kuśāngṛhītvā pāṇibhyāṃ saṃsaktaḥ prayayau param || 68 ||
[Analyze grammar]

rāmasya dakṣiṇe pārśve padmahastā ramā gatā |
tathaiva dharaṇīdevī dakṣiṇetaragā tathā || 69 ||
[Analyze grammar]

vedāḥ sāṃgāḥ purāṇāni setihāsāni sarvataḥ |
oṃkāro'tha vaṣaṭkāraḥ sāvitrī lokapāvanī || 70 ||
[Analyze grammar]

astraśastrāṇi ca tadā dhanurādyāni pārvati |
anujagmustathā rāmaṃ sarve puruṣavigrahāḥ || 71 ||
[Analyze grammar]

bharataścaiva śatrughnaḥ sarve puranivāsinaḥ |
saputradārāḥ kākutsthamanujagmuḥ sahānugāḥ || 72 ||
[Analyze grammar]

maṃtriṇo bhṛtyavargāśca kiṃkarā naigamāstathā |
vānarāścaiva ṛkṣāśca sugrīvasahitāstadā || 73 ||
[Analyze grammar]

saputradārāḥ kākutsthamanvagacchanmahāmatim |
paśavaḥ pakṣiṇaścaiva sarve sthāvarajaṃgamāḥ || 74 ||
[Analyze grammar]

anujagmurmahātmānaṃ samīpasthā narottamāḥ |
ye ca paśyaṃti kākutsthaṃ svapathāṃtargataṃ prabhum || 75 ||
[Analyze grammar]

te tathānugatā rāmaṃ nivarttaṃte na kecana |
atha triyojanaṃ gatvā nadīṃ paścānmukhīṃ sthitām || 76 ||
[Analyze grammar]

sarayūṃ puṇyasalilāṃ praviveśa sahānugaḥ |
tataḥ pitāmaho brahmā sarvadevagaṇāvṛtaḥ || 77 ||
[Analyze grammar]

tuṣṭāva raghuśārdūlamṛṣibhiḥ sārddhamakṣaraiḥ |
abravīttatra kākutsthaṃ praviṣṭaṃ sarayūjale || 78 ||
[Analyze grammar]

brahmovāca |
āgaccha viṣṇo bhadraṃ te diṣṭyā prāpto'si mānada |
bhrātṛbhissahadevābhaiḥ praviśasva nijāṃ tanum || 79 ||
[Analyze grammar]

vaiṣṇavīṃ tāṃ mahātejāṃ devākārāṃ sanātanīm |
tvaṃ hi lokagatirdeva na tvāṃ kecittu jānate || 80 ||
[Analyze grammar]

tvāmaciṃtyaṃ mahātmānamakṣaraṃ sarvasaṃgraham |
yamicchasi mahātejastāṃ tanuṃ praviśasva bhoḥ || 81 ||
[Analyze grammar]

maheśvara uvāca |
tasminsūryakarākīrṇe puṣpavṛṣṭinipātite |
utsṛjya mānuṣaṃ rūpaṃ svāṃ tanuṃ praviveśa ha || 82 ||
[Analyze grammar]

aṃśābhyāṃ śaṃkhacakrābhyāṃ śatrughnabharatāvubhau |
tadā tena mahātmānau divyatejassamanvitau || 83 ||
[Analyze grammar]

śaṃkhacakragadāśārṅgapadmahastaścaturbhujaḥ |
divyābharaṇasampanno divyagaṃdhānulepanaḥ || 84 ||
[Analyze grammar]

divyapītāṃbaradharaḥ padmapatranibhekṣaṇaḥ |
yuvā kumāraḥ saumyāṃgaḥ komalāvayavojjvalaḥ || 85 ||
[Analyze grammar]

susnigdhanīlakuṭilakuṃtalaḥ śubhalakṣaṇaḥ |
navadūrvāṃkuraḥ śyāmaḥ pūrṇacaṃdra nibhānanaḥ || 86 ||
[Analyze grammar]

devībhyāṃ sahitaḥ śrīmānvimānamadhiruhya ca |
tasminsiṃhāsane divye mūle kalpataroḥ prabhuḥ || 87 ||
[Analyze grammar]

niṣasāda mahātejāḥ sarvadevairabhiṣṭutaḥ |
rāghavānugatā ye ca ṛkṣavānaramānuṣāḥ || 88 ||
[Analyze grammar]

spṛṣṭvaiva sarayūtoyaṃ sukhena tyaktajīvitāḥ |
rāmaprasādātte sarve divyarūpadharāḥ śubhāḥ || 89 ||
[Analyze grammar]

divyamālyāṃbaradharā divyamaṃgalavarcasaḥ |
āruroha vimānaṃ tadasaṃkhyāstatra dehinaḥ || 90 ||
[Analyze grammar]

sarvaiḥ parivṛtaḥ śrīmānrāmo rājīvalocanaḥ |
pūjitaḥ surasiddhaughairmunibhistu mahātmabhiḥ || 91 ||
[Analyze grammar]

āyayau śāśvataṃ divyamakṣaraṃ svapadaṃ vibhuḥ |
yaḥ paṭhedrāmacaritaṃ ślokaṃ ślokārdhameva vā || 92 ||
[Analyze grammar]

śṛṇuyādvā tathā bhaktyā smaredvā śubhadarśane |
koṭijanmārjitātpāpājjñānato'jñānataḥ kṛtāt || 93 ||
[Analyze grammar]

vimukto vaiṣṇavaṃ lokaṃ putradārasabāṃdhavaiḥ |
samāpnuyādyogagamyamanāyāsena vai naraḥ || 94 ||
[Analyze grammar]

etatte kathitaṃ devi rāmasya caritaṃ mahat |
dhanyo'smyahaṃ tvayā devi rāmacaṃdrasya kīrttanāt |
kimanyacchrotukāmāsi tadbravīmi varānane || 95 ||
[Analyze grammar]

iti śrīpādme mahāpurāṇe paṃcapaṃcāśatsāhasryāṃ saṃhitāyāmuttarakhaṃḍe umāmaheśvarasaṃvāde śrīrāmacaritakathanaṃnāma catuścatvāriṃśadadhikadviśatatamo'dhyāyaḥ || 244 ||
[Analyze grammar]