Chapter 243

[English text for this chapter is available]

śaṃkara uvāca |
atha tasmindine puṇye śubhalagne śubhānvite |
maṃgalasyābhiṣekārthaṃ maṃgalaṃ cakrire janāḥ || 1 ||
[Analyze grammar]

vasiṣṭho vāmadevaśca jābāliratha kaśyapaḥ |
mārkaṃḍeyaśca maudgalyaḥ parvato nāradastathā || 2 ||
[Analyze grammar]

ete maharṣayastatra japahomapurassaram |
abhiṣekaṃ śubhaṃ cakrurmunayo rājasattamam || 3 ||
[Analyze grammar]

nānāratnamaye divye hemapīṭhe śubhānvite |
niveśya sītayā sārddhaṃ śriyā iva janārdanam || 4 ||
[Analyze grammar]

sauvarṇakalaśairdivyairnānāratnamayaiḥ śubhaiḥ |
sarvatīrthodakaiḥ puṇyairmāṅgalyadravyasaṃyutaiḥ || 5 ||
[Analyze grammar]

dūrvāgratulasīpatrapuṣpagaṃdhasamanvitaiḥ |
maṃtrapūtajalaiḥ śuddhairmunayaḥ saṃśitavratāḥ || 6 ||
[Analyze grammar]

ajapanvaiṣṇavānsūktāncaturvedamayānśubhān |
abhiṣekaṃ śubhaṃ cakruḥ kākutsthaṃ jagataḥ patim || 7 ||
[Analyze grammar]

tasminśubhatame lagne devaduṃdubhayo divi |
vineduḥ puṣpavarṣāṇi vavṛṣuśca samaṃtataḥ || 8 ||
[Analyze grammar]

divyāṃbarairbhūṣaṇaiśca divyagaṃdhānulepanaiḥ |
puṣpairnānāvidhairdivyairdevyā saha raghūdvahaḥ || 9 ||
[Analyze grammar]

alaṃkṛtaśca śuśubhe munibhirvedapāragaiḥ |
chatraṃ ca cāmaraṃ divyaṃ dhṛtavānlakṣmaṇastadā || 10 ||
[Analyze grammar]

pārśve bharataśatrughnau tālavṛṃtau virejatuḥ |
darpaṇaṃ pradadau śrīmānrākṣaseṃdro vibhīṣaṇaḥ || 11 ||
[Analyze grammar]

dadhāra pūrṇakalaśaṃ sugrīvo vānareśvaraḥ |
jāmbavāṃśca mahātejāḥ puṣpamālāṃ manoharām || 12 ||
[Analyze grammar]

vāliputrastu tāṃbūlaṃ sakarpūraṃ dadau hareḥ |
hanumāndīpakāṃ divyāṃ suṣeṇaśca dhvajaṃ śubham || 13 ||
[Analyze grammar]

parivārya mahātmānaṃ maṃtriṇaḥ samupāsire |
sṛṣṭirjayaṃto vijayaḥ saurāṣṭro rāṣṭravarddhanaḥ || 14 ||
[Analyze grammar]

akopo dharmapālaśca sumaṃtro maṃtriṇaḥ smṛtāḥ |
rājānaśca naravyāghrā nānājanapadeśvarāḥ || 15 ||
[Analyze grammar]

paurāśca naigamā vṛddhā rājānaṃ paryupāsata |
ṛkṣaiśca vānareṃdraiśca maṃtribhiḥ pṛthivīśvaraiḥ || 16 ||
[Analyze grammar]

rākṣasairdvijamukhyaiśca kiṃkaraiśca samāvṛtaḥ |
pare vyomni yathā līno daivataiḥ kamalāpatiḥ || 17 ||
[Analyze grammar]

tathā nṛpavaraḥ śrīmānsākete śuśubhe tadā |
iṃdīvaradalaśyāmaṃ padmapatranibhekṣaṇam || 18 ||
[Analyze grammar]

ājānubāhuṃ kākutsthaṃ pītavastradharaṃ harim |
kaṃbugrīvaṃ mahoraskaṃ vicitrābharaṇairyutam || 19 ||
[Analyze grammar]

devyā saha samāsīnamabhiṣiktaṃ raghūttamam |
vimānasthāḥ suragaṇā harṣanirbharamānasāḥ || 20 ||
[Analyze grammar]

tuṣṭuvurjayaśabdena gaṃdharvāpsarasāṃ gaṇāḥ |
abhiṣiktastato rāmo vasiṣṭhādyairmaharṣibhiḥ || 21 ||
[Analyze grammar]

śuśubhe sītayā devyā nārāyaṇa iva śriyā |
atimartyatayābhīta upāsituṃ padāṃbujam || 22 ||
[Analyze grammar]

dṛṣṭvā tuṣṭāva hṛṣṭātmā śaṃkaro hṛṣṭamāgataḥ |
kṛtāṃjalipuṭo bhūtvā sānaṃdo gadgadākulaḥ |
harṣayansakalāndevānmunīnapi ca vānarān || 23 ||
[Analyze grammar]

mahādeva uvāca |
namo mūlaprakṛtaye nityāya paramātmane |
saccidānaṃdarūpāya viśvarūpāya vedhase || 24 ||
[Analyze grammar]

namo niraṃtarānaṃda kandamūlāya viṣṇave |
jagattrayakṛtānaṃda mūrttaye divyamūrttaye || 25 ||
[Analyze grammar]

namo brahmeṃdrapūjyāya śaṃkarābhayadāya ca |
namo viṣṇusvarūpāya sarvarūpanamonamaḥ || 26 ||
[Analyze grammar]

utpattisthitisaṃhārakāriṇe triguṇātmane |
namostu nirgatopādhisvarūpāya mahātmane || 27 ||
[Analyze grammar]

anayā vidyayā devyā sītayopādhikāriṇe |
namaḥ puṃprakṛtibhyāṃ ca yuvābhyāṃ jagatāṃ kṛte || 28 ||
[Analyze grammar]

jaganmātāpitṛbhyāṃ ca jananyai rāghavāya ca |
namaḥ prapaṃcarūpiṇyai niṣprapaṃcasvarūpiṇe || 29 ||
[Analyze grammar]

namo dhyānasvarūpiṇyai yogidhyeyātmamūrttaye |
pariṇāmāparīṇāmariktābhyāṃ ca namonamaḥ || 30 ||
[Analyze grammar]

kūṭasthabījarūpiṇyai sītāyai rāghavāya ca |
sītā lakṣmīrbhavānviṣṇuḥ sītā gaurī bhavānśivaḥ || 31 ||
[Analyze grammar]

sītā svayaṃ hi sāvitri bhavānbrahmā caturmukhaḥ |
sītā śacī bhavānśakraḥ sītā svāhānalo bhavān || 32 ||
[Analyze grammar]

sītā saṃhāriṇī devī yamarūpadharo bhavān |
sītā hi sarvasampattiḥ kuberastvaṃ raghūttama || 33 ||
[Analyze grammar]

sītā devī ca rudrāṇī bhavānrudro mahābalaḥ |
sītā tu rohiṇī devī caṃdrastvaṃ lokasaukhyadaḥ || 34 ||
[Analyze grammar]

sītā saṃjñā bhavānsūryaḥ sītā rātrirdivā bhavān |
sītādevī mahākālī mahākālo bhavānsadā || 35 ||
[Analyze grammar]

strīliṅgeṣu trilokeṣu yattatsarvaṃ hi jānakī |
punnāma lāṃchitaṃ yattu tatsarvaṃ hi bhavānprabho || 36 ||
[Analyze grammar]

sarvatra sarvadeveśa sītā sarvatra dhāriṇī |
tadātvamapicatrātuṃtacchaktirviśvadhāriṇī || 37 ||
[Analyze grammar]

tasmātkoṭiguṇaṃ puṇyaṃ yuvābhyāṃ paricihnitam |
cihnitaṃ śivaśaktibhyāṃ caritaṃ tava śāṃtidam || 38 ||
[Analyze grammar]

āvāṃ rāma jagatpūjyau mama pūjyau sadā yuvām |
tvannāmajāpinī gaurī tvanmaṃtrajapavānaham || 39 ||
[Analyze grammar]

mumūrṣormaṇikarṇyāṃ tu arddhodakanivāsinaḥ |
ahaṃ diśāmi te maṃtraṃ tārakaṃ brahmadāyakam || 40 ||
[Analyze grammar]

atastvaṃ jānakīnātha parabrahmāsi niścitam |
tvanmāyāmohitāssarve na tvāṃ jānaṃti tatvataḥ || 41 ||
[Analyze grammar]

īśvara uvāca |
ityuktaḥ śaṃbhunā rāmaḥ prasādapravaṇo'bhavat |
divyarūpadharaḥ śrīmānadbhutādbhutadarśanaḥ || 42 ||
[Analyze grammar]

tathā taṃ rūpamālokya naravānaradevatāḥ |
na draṣṭumapiśaktāste tejasaṃ mahadadbhutam || 43 ||
[Analyze grammar]

bhayādvai tridaśaśreṣṭhāḥ praṇemuścātibhaktitaḥ |
bhītā vijñāya rāmo'pi naravānaradevatāḥ |
māyāmānuṣatāṃ prāpya sa devānabravītpunaḥ || 44 ||
[Analyze grammar]

rāmacaṃdra uvāca |
śṛṇudhvaṃ devatā yo māṃ pratyahaṃ saṃstuviṣyati |
stavena śaṃbhunoktena devatulyo bhavennaraḥ || 45 ||
[Analyze grammar]

vimuktaḥ sarvapāpebhyo matsvarūpaṃ samaśnute |
raṇe jayamavāpnoti na kvacitpratihanyate || 46 ||
[Analyze grammar]

bhūtavetālakṛtyābhirgrahaiścāpi na bādhyate |
aputro labhate putraṃ patiṃ viṃdati kanyakā || 47 ||
[Analyze grammar]

daridraḥ śriyamāpnoti satvavāñśīlavānbhavet |
ātmatulyabalaḥ śrīmāñjāyate nātra saṃśayaḥ || 48 ||
[Analyze grammar]

nirvighnaṃ sarvakāryeṣu sarvāraṃbheṣu vai nṛṇām |
yaṃyaṃ kāmayate martyaḥ sudurlabhamanoratham || 49 ||
[Analyze grammar]

ṣaṇmāsātsiddhimāpnoti stavasyāsya prasādataḥ |
yatpuṇyaṃ sarvatīrtheṣu sarvayajñeṣu yatphalam |
tatphalaṃ koṭiguṇitaṃ stavenānena labhyate || 50 ||
[Analyze grammar]

īśvara uvāca |
ityuktvā rāmacaṃdro'sau visasarja maheśvaram |
brahmādi tridaśānsarvānvisasarja samāgatān || 51 ||
[Analyze grammar]

arcitā mānavāḥ sarve naravānaradevatāḥ |
visṛṣṭā rāmacaṃdreṇa prītyā paramayā yutāḥ || 52 ||
[Analyze grammar]

itthaṃ visṛṣṭāḥ khalu te ca sarve sukhaṃ tadā jagmuratīvahṛṣṭāḥ |
paraṃ paṭhaṃtaḥ stavamīśvaroktaṃ rāmaṃ smaraṃto varaviśvarūpam || 53 ||
[Analyze grammar]