Chapter 229

[English text for this chapter is available]

pārvatyuvāca |
vistareṇa mamākhyāhi devasargamanuttamam |
brahmādi tridivaśreṣṭhāḥ kathaṃ jātāḥ sanātanāḥ |
īśvarasyāvatārāṃśca vistareṇa vadasva me || 1 ||
[Analyze grammar]

rudra uvāca |
ākāśānilatejoṃbu bhuvaḥ sṛṣṭā yathākramam |
tāsāṃ madhye'sṛjadbrahmā agādhajalamarṇavam || 2 ||
[Analyze grammar]

asminnekārṇavībhūte jalamāyāvaṭacchade |
ādāya sarvvabhūtāni yoganidrāṃ yayau hariḥ || 3 ||
[Analyze grammar]

sa jagatsraṣṭukāmastu yoganidrāmupeyivān |
tayā reme ciraṃ kālaṃ māyayā madhusūdanaḥ || 4 ||
[Analyze grammar]

tasyāṃ tu janayāmāsa kālātmānamanuttamam |
kalākāṣṭhādi bhūtā ye pakṣamāsādirūpiṇaḥ || 5 ||
[Analyze grammar]

tasminkāle harernnābhipaṃkajaṃ mukulākṛti |
vikasatsarvajagato bījabhūtaṃ suvarcasam || 6 ||
[Analyze grammar]

udasthādudabhūttatra brahmā ca sumahāmatiḥ |
sa jagatsraṣṭukāmastu rajoguṇavicoditaḥ |
tuṣṭāva yoganidrāyāṃ śayānaṃ parameśvaram || 7 ||
[Analyze grammar]

brahmovāca |
namostu viṣṇave tubhyaṃ sargasthityaṃtahetave |
jagadbhūṣaṇabhūṣāya śrīmate viśvarūpiṇe || 8 ||
[Analyze grammar]

namo brahmaṇyadevāya gobrāhmaṇahitāya ca |
jagaddhitāya kṛṣṇāya goviṃdāya namonamaḥ || 9 ||
[Analyze grammar]

pradhānakālarūpāya puruṣāyeśvarāya ca |
namaḥ prapaṃcarūpāya niṣprapaṃcasvarūpiṇe || 10 ||
[Analyze grammar]

nārāyaṇāya viśvāya viśveśāya namonamaḥ |
śrībhūlīlādhipataye brahmaṇe paramātmane || 11 ||
[Analyze grammar]

namostu vāsudevāya viśvarūpāya śārṅgiṇe |
trayīnāthāya haraye viśvanāthasvarūpiṇe || 12 ||
[Analyze grammar]

anaṃtakalyāṇaguṇaparipūrṇāya te namaḥ |
jagacca sarvvaṃ svapiti tvayi supte jaganmaye || 13 ||
[Analyze grammar]

vṛtaṃ sarvaṃ jagannātha prapaṃce sacarācaram |
tvameva kāraṇaṃ karttā kāryyaṃ ca triguṇodbhavam || 14 ||
[Analyze grammar]

sraṣṭā dhyātā vidhātā ca tvameva parameśvaraḥ |
jāgarṣiśuddhasatvasthastavanidrā kutaḥprabho |
devatvayi sthitālokāḥ samādhiṣṭhāḥ sanātanāḥ || 15 ||
[Analyze grammar]

śivauvāca |
evamukto hṛṣīkeśo brahmaṇā parameśvaraḥ |
uttasthau śayanāttasmādvimukto yoganidrayā || 16 ||
[Analyze grammar]

niyamya yoganidrāṃ tāṃ jagatsraṣṭuṃ pracakrame |
aciṃtyastatkṣaṇāddevo jagatāṃ prabhuracyutaḥ || 17 ||
[Analyze grammar]

ciṃtayitvā jagatsarvamasṛjatsa pumāṃstataḥ |
lokānsarvvāṃstadā hyapsu gatamaṃḍaṃ hiraṇmayam || 18 ||
[Analyze grammar]

saptadvīpānsamudrāṃtānmedinī bhūdharairyutān |
sahaikāṇḍakaṭāhena nābhipadme'sṛjatprabhuḥ || 19 ||
[Analyze grammar]

tadaṇḍamadhye cāsthānamīśvaraḥ kṛtavānhariḥ |
atha nārāyaṇaṃkastu dadhyāvadhyātmacetasā || 20 ||
[Analyze grammar]

dhyānāṃte tasya bhālāttu svedabiṃdurajāyata |
sa biṃdurbudbudākāraḥ pṛthivyāmapatatkṣaṇāt || 21 ||
[Analyze grammar]

tasmāttu budbudātso'hamutpannosmi varānane |
tryakṣastriśūlahasto'haṃ jaṭāmukuṭamaṃḍitaḥ || 22 ||
[Analyze grammar]

kiṃkaromīti deveśamavocaṃ vinayānvitaḥ |
tato nārāyaṇo devo māmityāha mudānvitaḥ || 23 ||
[Analyze grammar]

karttāsi jagato rudra saṃhāraṃ bhīmadarśanam |
sākṣātsaṃkarṣaṇāṃśena saṃhārārthe varānane || 24 ||
[Analyze grammar]

tasmānnārāyaṇāddevi utpannosmi bhayaṃkaraḥ |
niyojya māṃ tu saṃhāre punareva janārdanaḥ || 25 ||
[Analyze grammar]

netrābhyāmasṛjaccaṃdrasūryyau dhvāṃtāpahāriṇau |
vāyuṃ diśaśca śrotrābhyāmiṃdrāgnīmukhato'sṛjat || 26 ||
[Analyze grammar]

nāsābhyāṃ varuṇaṃ mitramasṛjatpaṃkajekṣaṇaḥ |
bāhubhyāmakhilāndevānsasādhyānsamarudgaṇān || 27 ||
[Analyze grammar]

samastaromakūpebhyo ratnānyoṣadhayastathā |
tvaci śailānsamudrāśca gavādyāḥ paśavastathā || 28 ||
[Analyze grammar]

mukhato brāhmaṇaḥ sṛṣṭo bāhubhyāṃ kṣatriyastathā |
ūrvvorvaiśyastataḥ padbhyāṃ śūdraścaivamajāyata || 29 ||
[Analyze grammar]

evaṃ sṛṣṭvā jagatsarvvamacetanamavasthitam |
viśvarūpeṇa deveśo yasyāṃtaramadhiṣṭhitaḥ || 30 ||
[Analyze grammar]

śaktyā vinā harestasya nonmeṣo vidyate yataḥ |
tasmātsarvajagatprāṇo viṣṇureva sanātanaḥ || 31 ||
[Analyze grammar]

sa evāvyaktarūpaḥ sanparamātmā vyavasthitaḥ |
sargasthitilayaṃ brahmā svayameva pravarttate || 32 ||
[Analyze grammar]

ṣāḍguṇyaparipūrṇo'sau vāsudevaḥ sanātanaḥ |
triguṇādātmanorūpaṃ caturddhā kurute jagat || 33 ||
[Analyze grammar]

pradyumnamūrttirbhagavānsarvaiśvaryyasamanvitaḥ |
vidheḥ prajāpatīnāṃ ca kālasya ca janasya ca || 34 ||
[Analyze grammar]

aṃtaryyāmitvamāpanno sargaṃ samyakkaroti hi |
setihāsāṃstato vedāndadau tasmai mahātmane || 35 ||
[Analyze grammar]

pradyumnasyāṃśabhāgo'sau brahmā lokapitāmahaḥ |
jagatsargasthitiṃ sarvvaṃ prakarotyaṃśasaṃbhavaḥ || 36 ||
[Analyze grammar]

aniruddhaśca bhagavāñchaktitejaḥ samanvitaḥ |
manūnāṃ pārthivānāṃ ca kālasya ca janasya ca || 37 ||
[Analyze grammar]

sthitiṃ karoti bhagavānaṃtaryyāmitvamāsthitaḥ |
saṃkarṣaṇo mahāviṣṇurvidyābalasamanvitaḥ || 38 ||
[Analyze grammar]

kālasya sarvabhūtānāṃ rudrasya ca yamasya ca |
aṃtaryyāmitvamāsthāya jagatsaṃharate prabhuḥ || 39 ||
[Analyze grammar]

ityaṃtaryyāmyavasthāyāmaṃtaryyāmitvamātmanaḥ |
matsyaḥ kūrmmo varāhaśca narasiṃho'tha vāmanaḥ || 40 ||
[Analyze grammar]

rāmo rāmaśca kṛṣṇaśca buddhaḥ kalkī ca te daśa |
ete tu vibhavāvasthā brahmaṇaḥ paramātmanaḥ || 41 ||
[Analyze grammar]

nṛsiṃharāmakṛṣṇeṣu ṣāḍguṇyaṃ parikīrtitam |
parāvasthā tu devasya dīpādutpanna dīpavat || 42 ||
[Analyze grammar]

sā hyavasthā harerasya śṛṇuṣva girije śubhe |
vaikuṃṭhaṃ paramaṃ lokaṃ viṣṇulokamanuttamam || 43 ||
[Analyze grammar]

śvetadīpaṃ svarūpaṃ tu kṣīrasāgaramuttamam |
evaṃ caturddhā vyūhaṃ tu samyaguktaṃ maharṣibhiḥ || 44 ||
[Analyze grammar]

jalāvaraṇamadhye tu vaikuṃṭhaṃ kāraṇaṃ śubham |
koṭivaiśvānaraprakhyaṃ sarvaṃ dharmmavadavyayam || 45 ||
[Analyze grammar]

āmodamaṃdārakarairvṛkṣairvahnibhirāsthitam |
nānāmaṇimayaṃ divyaṃ vimānakoṭibhiryyutam || 46 ||
[Analyze grammar]

yaduktaṃ paramaṃ dhāma tādṛklakṣaṇasaṃsthitam |
tasminvaikuṃṭhanagare nānāratnasamujjvale || 47 ||
[Analyze grammar]

madhye devajayārāmaṃ puraṃ ramyamanuttamam |
caturdvārasamāyuktaṃ hemaprākāratoraṇam || 48 ||
[Analyze grammar]

caṃḍādidvārapālādyaiḥ kumudādyaiśca rakṣitam |
nānāmaṇimayairdivyairgṛhaiḥ paṃktibhirāvṛtam || 49 ||
[Analyze grammar]

vitataṃ paṃcapadmābhiryojanaiśca samaṃtataḥ |
sahasrayojanottuṃgaiḥ prāsādaiḥ koṭibhirvṛtam || 50 ||
[Analyze grammar]

ārūḍhayauvanairddivyaiḥ puṃbhiḥ strībhiśca śobhitam |
striyaśca puruṣāścāsminsarvalakṣaṇaśobhitāḥ || 51 ||
[Analyze grammar]

samarūpāśca śrīviṣṇoḥ sarvvālaṃkārabhūṣitāḥ |
divyasragvastrasaṃchannā divyacaṃdanabhūṣitāḥ || 52 ||
[Analyze grammar]

modaṃte tatra deveśa bhaktyā tvātmamanorame |
maṃtrāṣṭākṣarasaṃsiddhā bhaktyā ṣoḍaśarūpayā || 53 ||
[Analyze grammar]

vṛtāstatpadamāviśya modaṃte manasīpsitam |
gatvāsminna nivartaṃte viṣṇunā saha saṃsthitāḥ || 54 ||
[Analyze grammar]

avicchinnātmanā te vai viṣṇunā saṃgatāḥ śubhāḥ |
tatsamānasukhaṃ nityaṃ prāpnuvaṃti manīṣiṇaḥ || 55 ||
[Analyze grammar]

yatratatra harerlokānāviśya śubhacetasaḥ |
prāpnuvaṃti punaḥ svargaṃ svargasthāiva jaṃtavaḥ || 56 ||
[Analyze grammar]

yathā saumitri bharatau yathā saṃkarṣaṇādayaḥ |
tathā tepi ca jāyaṃte satyaloke yathecchayā || 57 ||
[Analyze grammar]

punastenaiva yāsyaṃti tatpadaṃ śāśvataṃ param |
na karmmabaṃdhanaṃ janma vaiṣṇavānāṃ ca vidyate || 58 ||
[Analyze grammar]

viṣṇoranucaratvaṃ hi mokṣayāhurmanīṣiṇaḥ |
na dāsyamamareśasya baṃdhanaṃ parikīrtitam || 59 ||
[Analyze grammar]

sarvabaṃdhananirmuktā haridāsā nirāmayāḥ |
ābrahmabhuvanāṃ lokāḥ punarāvṛttilakṣaṇāḥ || 60 ||
[Analyze grammar]

karmabaṃdhamayā duḥkhamitrāsakhyabhayapradāḥ |
bahvāyā saphalā devi janināśakahetavaḥ || 61 ||
[Analyze grammar]

sukhabhogastu yannṝṇāṃ viṣamiśrāśanaṃ yathā |
svargasaṃsthānnarāndṛṣṭvā kṣīṇe karmmaṇi devatāḥ || 62 ||
[Analyze grammar]

kupitāḥ pātayantyeva saṃsṛtau kāryyabaṃdhane |
tasmātsvargasukhaṃ devi bahudhāyāsasādhanam || 63 ||
[Analyze grammar]

anityaṃ kuṭilaṃ duḥkhamiśraṃ yogī parityajet |
satataṃ saṃsmaredviṣṇuṃ sarvaduḥkhaughanāśanam || 64 ||
[Analyze grammar]

nāmoccāraṇamātreṇa prāpnuvaṃti paraṃ padam |
tasmāttu vaiṣṇavaṃ lokaṃ gauri saṃprārthayetsudhīḥ || 65 ||
[Analyze grammar]

bhaktyā tvananyayā devaṃ bhajeta karuṇāṃbudhim |
sa sarvajñānaguṇavānrakṣatyeva na saṃśayaḥ || 66 ||
[Analyze grammar]

tasmādaṣṭākṣaraṃ mantraṃ japtvā sukhataraṃ śubham |
saṃprāpnoti paraṃ lokaṃ vaiṣṇavaṃ sarvakāmadam || 67 ||
[Analyze grammar]

tasminmaṇimaye talpe sahasrasūryyaraśmini |
vimāne śuśubhe divye saṃsthito bhagavānhariḥ || 68 ||
[Analyze grammar]

tatra cādhāraśaktyādi dhṛte pīṭhe hiraṇmaye |
nānāratnamaye divye nānāvarṇasamanvite || 69 ||
[Analyze grammar]

tasminnaṣṭadale padme maṃtrākṣarapade śubhe |
karṇikāyāṃ suramyāyāṃ lakṣmībījaśubhākṣare || 70 ||
[Analyze grammar]

tasminvālārkasāhasrakoṭitulya samaprabhe |
divye nārāyaṇaḥ śrīmānāsīnaḥ paṃkajāsane || 71 ||
[Analyze grammar]

tasya dakṣiṇake pārśve jaganmātā hiraṇmayī |
gṛhītvā cāmarāndivyān divyamālyavibhūṣaṇā || 72 ||
[Analyze grammar]

vasupātraṃ mātuluṃgaṃ svarṇapadmaṃ dhṛtaṃ karaiḥ |
vāmataḥ pṛthivīdevī nīlotpaladaladyutiḥ || 73 ||
[Analyze grammar]

nānābharaṇasaṃyuktā vicitrāṃbarabhūṣitā |
sā dhṛtvā corddhvabāhubhyāṃ ramyaṃ raktotpaladvayam || 74 ||
[Analyze grammar]

itarābhyāṃ dhṛtaṃ devyā dhānyapātrayugaṃ tathā |
gṛhītvā cāmarāndivyānśaktayo vimalādikāḥ || 75 ||
[Analyze grammar]

dalāgreṣu samāsīnāḥ sarvalakṣaṇaśobhitāḥ |
tāsāṃ madhye samāsīno bhagavānacyuto hariḥ || 76 ||
[Analyze grammar]

śaṃkhacakragadāpadmapāṇibhirdivyabhūṣaṇaiḥ |
keyūrāṃgadahārādyairbhūṣaṇai rūpaśobhitaḥ || 77 ||
[Analyze grammar]

prātarudyatsahasrāṃśu kuṇḍalābhyāṃ virājitaḥ |
pūrvoktaistridaśairnnityaiḥ sevitaḥ parameśvaraḥ || 78 ||
[Analyze grammar]

āste vaikuṇṭhanagare nitye satye ca bhogavān |
śrīmadaṣṭākṣaraṃ maṃtraṃ siddhānāṃ vai manīṣiṇām || 79 ||
[Analyze grammar]

gamyaṃ tadvaiṣṇavaṃ lokaṃ netareṣāṃ kathaṃcana |
ityevaṃ prathamaṃ vyūhaṃ kathitaṃ te varānane || 80 ||
[Analyze grammar]

dvitīyaṃ vaiṣṇavaṃ lokaṃ śṛṇu vakṣyāmi suvrate |
yo'yaṃ nitya iti khyāto lokāgryo vaiṣṇavaḥ smṛtaḥ || 81 ||
[Analyze grammar]

taṃ lokaṃ vipulaṃ puṇyaṃ śuddhaṃ satvamayaṃ śubham |
madhyāhnasūryyasāhasrayugapadbhāsitaṃ tadā || 82 ||
[Analyze grammar]

kalpāṃte'pi na līyeta tatvalokaṃ mahattaram |
mama brahmādidevānāṃ na draṣṭumapi śakyate || 83 ||
[Analyze grammar]

sarvaṃ kalpadrumavanaiḥ paripūrṇaṃ samaṃtataḥ |
sudhāmbuparipūrṇābhirdīrghikābhiḥ samanvitam || 84 ||
[Analyze grammar]

svarṇaratnamayairdivyaiḥ paṃkajairupaśobhitam |
jaladagninibhairdivyairbhūṣaṇaiḥ koṭibhirvṛtam || 85 ||
[Analyze grammar]

niraṃtaraṃ sāmabhiśca kūjitaiḥ kokilādibhiḥ |
ūhyamānairgandharvṛkṣaiḥ puṣpakairapi śobhitam || 86 ||
[Analyze grammar]

ūnaṣoḍaśavarṣābdairdivyanārīnarairvṛtam |
sarvalakṣaṇaśobhāḍhyairdivyakalpavibhūṣaṇaiḥ || 87 ||
[Analyze grammar]

tatrapradeśe ramyeṣu deśeṣu kamalāpatim |
muditaiḥ patibhiḥ sārddhamarcayaṃti sma yoṣitaḥ || 88 ||
[Analyze grammar]

tatprasādopalabhyaṃ vai sukhamaśnanti sarvadā |
gāyaṃti paramānaṃdaṃ kṛṣṇasya caritaṃ mahat || 89 ||
[Analyze grammar]

padmekṣaṇāḥ padmahastāḥ padmayā sadṛśaḥ śubhāḥ |
divyasragvasanopetāḥ krīḍaṃti sma suyoṣitaḥ || 90 ||
[Analyze grammar]

śaṃkhacakragadāpadmadharā bhūṣaṇabhūṣitāḥ |
sragviṇaḥ pītavasanāḥ puruṣāstatra saṃsthitāḥ || 91 ||
[Analyze grammar]

ananyasparśanāttatra strīpuṃsoḥ krīḍamānayoḥ |
bhavatyanudinaṃ vṛddhaṃ haribhaktisukhaṃ rasam || 92 ||
[Analyze grammar]

tanmadhyeṃtaḥpuraṃ ramyaṃ vāsudevasya śobhitam |
caṃdanāgurukarppūrakuṃkumodakasaṃyutam || 93 ||
[Analyze grammar]

nānāpuṣpavimānādyaiḥ sarvataḥ samalaṃkṛtam |
tanmadhye kalpavṛkṣasya cchāyāyāṃ kamalāsane || 94 ||
[Analyze grammar]

vicitraślakṣṇaparyaṃke śubhāstaraṇasaṃvṛte |
divyagaṃdhasuśobhāḍhyairnānāpuṣpaparicchadaiḥ || 95 ||
[Analyze grammar]

tasminmanorame divye samāsīnaḥ śriyā saha |
īśvaryyā saha deveśo vāsudevaḥ sanātanaḥ || 96 ||
[Analyze grammar]

sudhāṃśukoṭisaṃkāśo divyābharaṇabhūṣitaḥ |
suvarṇaśubhrayugala ślakṣṇanāsāṃcitānanaḥ || 97 ||
[Analyze grammar]

snigdhāyatasulāvaṇyakapolābhyāṃ virājitaḥ |
nīlakuṃcitakeśāḍhyo raktābjadalalocanaḥ || 98 ||
[Analyze grammar]

maṃdāraketakījātī kairavīkṛtaśekharaḥ |
snigdhabimbaphalābhauṣṭhaḥ susmitānanapaṃkajaḥ || 99 ||
[Analyze grammar]

anarghyamauktikābhāsadaṃtāvalivirājitaḥ |
haricaṃdanaliptāṃgaḥ kastūrītilakāṃkitaḥ || 100 ||
[Analyze grammar]

unnatāṃsabhujairdīrghaiścaturbhirupaśobhitaḥ |
japākusumasaṃkāśakarapallavaśobhitaḥ || 101 ||
[Analyze grammar]

śrīvatsakaustubhābhyāṃ ca śobhitaḥ pṛthuvakṣasā || 102 ||
[Analyze grammar]

muktāmayaiḥ suśobhāḍhyairdivyasragbhiralaṃkṛtaḥ |
bālārkasadṛśajyotsnā pītavastreṇa veṣṭitaḥ || 103 ||
[Analyze grammar]

māṇikyanūpuropeta padmapatravirājitaḥ |
akalaṃkitacaṃdrābha nakhapaṃktivirājitaḥ || 104 ||
[Analyze grammar]

raktotpalanibhaślakṣṇa śubhrāṃghrikarapaṃkajaḥ |
pāṃcajanyarathāṃgābhyāṃ bāhuyugmavirājitaḥ || 105 ||
[Analyze grammar]

itarābhyāṃ śriyo gātramāśliṣyannijavakṣasi |
śliṣyadvidyullatodgītha śitābhra iva rājate || 106 ||
[Analyze grammar]

saptajāṃbūnadaślakṣṇa śubhāṃghriyugapaṃjakaḥ |
atra krīḍati deveśo vāsudevaḥ sanātanaḥ || 107 ||
[Analyze grammar]

taptakāṃcanasaṃkāśā sarvābharaṇabhūṣitā |
susnigdhanīlakuṭilacaṃdrarāvivirājitā || 108 ||
[Analyze grammar]

maṃdārapārijātādi divyapuṣpavirājitā |
karṇāvataṃsa śobhāḍhyā cikurāṃtālisannibhā || 109 ||
[Analyze grammar]

pīnonnatastanābhyāṃ ca pīḍaṃti harivakṣasi |
keyūrāṃgadahārādyairbhūṣaṇairupaśobhitā || 110 ||
[Analyze grammar]

ārūḍhayauvanā nityaṃ sarvalokeśasuṃdarī |
tatra krīḍati lokeśa patyā saha niraṃtaram || 111 ||
[Analyze grammar]

sa eva vāsudevo'tra sarvabhūtamanoharaḥ |
krīḍate sarvalokesminsarvakāmaprado nṛṇām || 112 ||
[Analyze grammar]

atrāṣṭaśaktayo lakṣmyāstanavaḥ paritaḥ sthitāḥ |
ramā ca rukmiṇī sītā padmā padmālayā śivā || 113 ||
[Analyze grammar]

sulakṣaṇā suśīlā ca ratikāmapradāśca tāḥ |
śaṃkhacakragadāpadma śārṅgādyairhetibhistathā || 114 ||
[Analyze grammar]

paritaḥ puṣkarākāraistaṃ lokaṃ parirakṣate |
evaṃ dvitīyaṃ rūpaṃ ca samyakte śubhadarśane || 115 ||
[Analyze grammar]

saṃkṣepato mayā proktaṃ na śakyaṃ vistareṇa hi |
dvādaśākṣaramaṃtraṃ vai ye japaṃti sukhāhvayam || 116 ||
[Analyze grammar]

te prāpnuvaṃti satataṃ śāśvataṃ śubhamakṣayam |
na vedādhyayanairyajñairna vratairnopavāsataḥ || 117 ||
[Analyze grammar]

na prāpyaṃ vaiṣṇavaṃ lokaṃ vinā dāsyena kutracit |
tasmāddāsyaṃ harerbhaktaṃ bhajetānanyamānasaḥ || 118 ||
[Analyze grammar]

prāpnoti paramāṃ siddhiṃ karmabaṃdhavimocanīm |
evaṃ saṃprocyate devi dvitīyaṃ vyūhamavyayam || 119 ||
[Analyze grammar]

tṛtīyaṃ tu paraṃ vyūhaṃ śṛṇu vakṣyāmi pārvati |
toyābdheruttaraṃ kūlaṃ śvetadvīpe mahāmate || 120 ||
[Analyze grammar]

saṃdarśanāya yogānāṃ sanakādi mahātmanām |
sanakaśca sanaṃdaśca tṛtīyaśca sanātanaḥ || 121 ||
[Analyze grammar]

sanatkumārajātāśca voḍhuḥ paṃcaśikhastathā |
saptaite brahmaṇaḥ putrā yoginaḥ sumahaujasaḥ || 122 ||
[Analyze grammar]

viraktāḥ sarvabhogeṣu śuddhāḥ satvaguṇāḥ sadā |
bhagavaddarśanodbhūtasukhaikarasasevinaḥ || 123 ||
[Analyze grammar]

naranārāyaṇādyāśca śvetadvīpe vasaṃti ye |
teṣāṃ saṃdarśanārthāya tatra saṃnihito hariḥ || 124 ||
[Analyze grammar]

śubhrāṃśukoṭisaṃkāśe nānāratnamayojjvale |
śvetadvīpe mahāyogi sevite bhayavarjite || 125 ||
[Analyze grammar]

tatrodyānāni ramyāṇi pārijātasamāni vai |
saṃtānakalatākīrṇaṃ candanadrumamaṃḍitam || 126 ||
[Analyze grammar]

phullapadmotpalopetaṃ nānātoyālayairyutam |
tanmadhye nagarī ramyā nāmnā cairāvatī śubhā || 127 ||
[Analyze grammar]

nānāratnamayairdivyairvimānairupaśobhitā |
divyastrīpuṃbhirākrāṃtā bahuprāsādasaṃkulā || 128 ||
[Analyze grammar]

tanmadhye'ntapuraṃ ramyaṃ ratnadrumasamākulam |
bālasūryanibhaistuṃgaiḥ prāsādairbahubhirvṛtam || 129 ||
[Analyze grammar]

tanmadhye maṃḍapaṃ divyaṃ maṇikāṃcanaśobhitam |
caṃdanāgurukarpūrakuṃkumāmodavāśitam || 130 ||
[Analyze grammar]

nānākusumaśobhāḍhyairvitānaiḥ samalaṃkṛtam |
divyāpsaraḥ samākīrṇaṃ sāmagānopaśobhitam || 131 ||
[Analyze grammar]

madhye siṃhāsanaṃ tatra sūryavaiśvānaraprabham |
tanmadhye'ṣṭadalaṃ padmaṃ caṃdrabiṃbamivāparam || 132 ||
[Analyze grammar]

tanmadhye karṇikāyāṃ tu samāsīno janārdanaḥ |
śuddhajāṃbūnadaprakhyo muktāhāravibhūṣitaḥ || 133 ||
[Analyze grammar]

śaṃkhacakragadāpadmaśaktihastacatuṣṭayaḥ |
hārakeyūrakaṭakairaṃgulīyaiśca śobhitaḥ || 134 ||
[Analyze grammar]

suvarṇapaṃkajaprakhyaḥ padayugmavirājitaḥ |
saṃtānakanibhaiḥ śubhrairnakhapaṃktivirājitaḥ || 135 ||
[Analyze grammar]

ṣoḍaśābdavayo rūpayauvanena virājitaḥ |
viśālabhāladeśe tu kuṃkumena sugaṃdhinā || 136 ||
[Analyze grammar]

racitenordhvapuṃḍreṇa sīmaṃtenopaśobhitaḥ |
mathitāmṛtaphenābha śuklavastrasuveṣṭitaḥ || 137 ||
[Analyze grammar]

muktāmayābhyāṃ śubhrābhyāṃ kuṃḍalābhyāṃ virājitaḥ |
padmāsanasamāsīno jaganmohanavigrahaḥ || 138 ||
[Analyze grammar]

vāmāṃke saṃsthitā devī tasya divyasvarūpiṇī |
tasyaiva sadṛśī lakṣmīḥ śīlasuṣṭuguṇādibhiḥ || 139 ||
[Analyze grammar]

padmakiṃjalkasaṃkāśā yauvanāraṃbhaśobhitā |
sarvalakṣaṇasaṃpannā taptakāṃcanabhūṣaṇā || 140 ||
[Analyze grammar]

divyasragvasanopetā nīlakuṃcitamūrdhajā |
caturbhujairvirājaṃtī keyūrāṅgadabhūṣitā || 141 ||
[Analyze grammar]

muktāhārairvirājaṃtī maṃdārāṃcitaśīrṣajā |
ślakṣṇanāsāpuṭayutā lasaddaṃtivarā jitā || 142 ||
[Analyze grammar]

kastūrītilakopetā nāsāgrāṃcita mauktikā |
svarṇakuṃbhasamaprakhya pīnonnatapayodharā || 143 ||
[Analyze grammar]

divyakuṃkumaliptāṃgī padmamālopaśobhitā |
vastrapātraṃ mātuliḍgaṃ darpaṇaṃ hemapaṃkajam || 144 ||
[Analyze grammar]

karapadmadhṛtā devī cetasābhīṣṭadāyinī |
tasyaitāḥ sadṛśāstatra śaktayaḥ parito hareḥ || 145 ||
[Analyze grammar]

īśāvāsyā mahādevī jāhnavī kamalālayā |
sāvitrī sarvagā padmā śaktayaḥ parikīrtitāḥ || 146 ||
[Analyze grammar]

śraddhā medhā dhṛtiḥ prajñā dhāraṇā śāṃtireva ca |
śrutismṛtirdhṛtirmedhā vṛddhirbuddhirmanīṣiṇī || 147 ||
[Analyze grammar]

dāsyaste tāḥ śriyaḥ proktāḥ sarvakāryasya kārikāḥ |
anaṃtavainateyādi devatā nityakiṃkarāḥ || 148 ||
[Analyze grammar]

sādhyā marudgaṇāścaiva sevaṃte nityadevatāḥ |
prāsādeṣu vimāneṣu vaneṣu nagareṣu ca || 149 ||
[Analyze grammar]

tatprasādopalabdheṣu bhogeṣvatrānuraṃjitāḥ |
krīḍaṃtī satataṃ nityā heyaniṣphalavarjitāḥ || 150 ||
[Analyze grammar]

ye viṣṇumaṃtrajaptāraḥ satataṃ śraddhayānvitāḥ |
ye dvādaśīvrate yuktāstatpadaṃ yāṃti te'vyayam || 151 ||
[Analyze grammar]

na vedairna ca dānaiśca na yajñairna vratairapi |
prāptuṃ ca śakyaṃ girije viṣṇulokaṃ sanātanam || 152 ||
[Analyze grammar]

bhaktyā cānanyayā prāptuṃ śakyaṃ viṣṇupadaṃ nṛṇām |
tasmātsaṃpūjayennityaṃ bhaktyā devaṃ janārdanam || 153 ||
[Analyze grammar]

kīrtanaṃ nāmamātraṃ ca dhyāyanmaṃtraṃ japetsadā |
juhuyāttarpayedbhaktyā sarvagaṃ sarvakāmadam || 154 ||
[Analyze grammar]

evamuktaṃ tṛtīyaṃ tu vyūhaṃ tu paramātmanaḥ |
svarūpaṃ tava suśroṇi yathāproktaṃ purātanaiḥ || 155 ||
[Analyze grammar]

ataḥ paraṃ pravakṣyāmi caturthaṃ vyūhamuttamam |
divaukasāṃ rakṣaṇārthaṃ dugdhābdhau parameśvaraḥ || 156 ||
[Analyze grammar]

sudhāṃśukoṭisaṃkāśaḥ sahasrākṣeṇa śobhite |
puraṃdarasayūthaistu cchādite dugdhavāridhau || 157 ||
[Analyze grammar]

tasminnanaṃtaparyaṃke śete'sau vistṛte śubhe |
divyāsanasamāsīnaḥ padmanābho'cyuto hariḥ || 158 ||
[Analyze grammar]

nīlajīmūtasaṃkāśaḥ padmapatrāyatekṣaṇaḥ |
vivasvatkoṭisaṃkāśa kirīṭena virājitaḥ || 159 ||
[Analyze grammar]

nānāratnojjvaladdivyaṃ kuṃḍalābhyāṃ virājitaḥ |
bālārkasadṛśajyotsnā pītavastreṇa veṣṭitaḥ || 160 ||
[Analyze grammar]

sphuradraktāraviṃdābha hastāṃghritalaśobhitaḥ |
hārakeyūrakaṭakairaṃgulīyairvirājitaḥ || 161 ||
[Analyze grammar]

śaṃkhacakragadāśārṅgakhaḍgahastairvibhūṣitaḥ |
supuṣpaphalaśākhāḍhyakalpavṛkṣairvirājitaḥ || 162 ||
[Analyze grammar]

viśvasya janmamaraṇa nābhipaṃkajaśobhitaḥ |
haricaṃdanaliptāṃgaḥ sarvābharaṇabhūṣitaḥ || 163 ||
[Analyze grammar]

maṃdārapārijātādi divyapuṣpairmanoramaiḥ |
susnigdhanīlakuṭilakabarīkṛtakeśavān || 164 ||
[Analyze grammar]

ślakṣṇonnatasunāsāṃsa jānuyugmavirājitaḥ |
maṇividrumaśākhāḍhya nūpurāṅghrivirājitaḥ || 165 ||
[Analyze grammar]

akalaṃkitacaṃdrābha nakhapaṃktivirājitaḥ |
aśokapuṣpasaṃkāśa raktoṣṭhamukhapaṃkajaḥ || 166 ||
[Analyze grammar]

anarghyamuktikābhāsa daṃtapaṃktivirājitaḥ |
saṃpūrṇacaṃdrapratima smitavaktrasuśobhitaḥ || 167 ||
[Analyze grammar]

ārūḍhayauvanaḥ śrīmānkomalāvayavojjvalaḥ |
śaraṇyaḥ sarvalokānāṃ sarvalokaphalapradaḥ || 168 ||
[Analyze grammar]

sadṛśī tasya devī tu rūpaśīlaguṇādibhiḥ |
taptakāṃcanasaṃkāśā taptakāṃcanabhūṣaṇā || 169 ||
[Analyze grammar]

taruṇī rūpalāvaṇyā kāntiśīlaguṇānvitā |
dugdhābdhiphenasaṃkāśa śubhavastreṇa veṣṭitā || 170 ||
[Analyze grammar]

maṃdāraketakī jātī puṣpārcitaśiroruhā |
kastūrītilakopetā ratnasīmaṃtaśobhitā || 171 ||
[Analyze grammar]

nānāvarṇasuśobhāḍhyā karṇabhūṣaṇabhūṣitā |
pravālasadṛśajyotsnā raktadhārasuvismitā || 172 ||
[Analyze grammar]

mattabhṛṅgopamaiḥ snigdhairalakaiḥ suvirājitā |
tanumadhyā viśālākṣī pīnonnatapayodharā || 173 ||
[Analyze grammar]

caturhastairvirājaṃtī sarvābharaṇabhūṣitā |
udbāhubhyāṃ dhṛtā devī hemapadmayugaṃ śubham || 174 ||
[Analyze grammar]

itarābhyāṃ samāśliṣya bhartāraṃ nibiḍaṃ sthitā |
ālokayaṃtī satataṃ tridaśāṃśca kaṭākṣakai || 175 ||
[Analyze grammar]

nirīkṣitāstayā devyā dhanyāste satataṃ śive |
tatra devā vimānasthāḥ siddhacāraṇakinnarāḥ || 176 ||
[Analyze grammar]

gāyaṃti satataṃ devīmānaṃdāśrupariplutāḥ |
daiteyairbādhyamānaistu brahmarudrādibhiḥ suraiḥ || 177 ||
[Analyze grammar]

saṃstūyamānastatreśo devānāmabhayaṃ dadau |
devānāmabhayaṃ dattvā sarvadeveśvaro hariḥ || 178 ||
[Analyze grammar]

rākṣasānhaṃtumārebhe jagatsaṃrakṣaṇāya vai |
evaṃ caturthaṃ vyūhaṃ tu hareḥ proktaṃ tavānaghe || 179 ||
[Analyze grammar]

kimanyacchrotukāmāsīttadbravīmi varānane |
dhanyāsi kṛtakṛtyāsi bhaktāsi puruṣottame || 180 ||
[Analyze grammar]

iti śrīpādme mahāpurāṇe paṃcapaṃcāśatsāhasryāṃ saṃhitāyāmuttarakhaṃḍe viṣṇuvyūhabheda |
varṇanaṃnāma ekonatriṃśadadhikadviśatatamo'dhyāyaḥ || 229 ||
[Analyze grammar]