Chapter 227

[English text for this chapter is available]

pārvatyuvāca |
vistareṇa mayācakṣva maṃtrārthapadagauravam |
īśvarasya svarūpaṃ ca tadvibhūtiguṇāṃstathā || 1 ||
[Analyze grammar]

tadviṣṇoḥ paramaṃ dhāmavyūhabhedāṃstathā hareḥ |
sarvamākhyāhi tattvena mama sarvasureśvara || 2 ||
[Analyze grammar]

īśvara uvāca |
śṛṇu devi pravakṣyāmi svarūpaṃ paramātmanaḥ |
vibhūtiguṇasaṃghātaṃ tadavasthātmakaṃ hareḥ || 3 ||
[Analyze grammar]

yaḥ paraḥ puruṣo viṣṇurnārāyaṇa udāhṛtaḥ |
sa īśvaraśca jagatāṃ paramātmā sanātanaḥ || 4 ||
[Analyze grammar]

viśvataḥ pāṇipādaśca cakṣuṣmānviśvataḥ prabhuḥ |
viśvāni bhuvanānyasmindhāmāni paramāṇi vai || 5 ||
[Analyze grammar]

dhārayanso'pyatyatiṣṭhenmanāṃsi ca manīṣiṇām |
evaṃ bahusvarūpaḥ sañchrīpatiḥ puruṣottamaḥ |
īśvararyyā sahabhogārthaṃ divyamaṃgalarūpavān || 6 ||
[Analyze grammar]

bṛhaccharīro'gnisamānarūpo yuvā kumāratvamupeyivānhariḥ |
reme śriyāsau jagatāṃ jananyā svajyotsnayā caṃdraivāmṛtāṃśuḥ || 7 ||
[Analyze grammar]

ayaṃ ca jagadīśvaryyā kumāro nityayauvanaḥ |
kaṃdarppakoṭilāvaṇyaḥ sa tasthe parame pade || 8 ||
[Analyze grammar]

bhogārthaṃ paramaṃ vyoma līlārthamakhilaṃ jagat |
bhogena krīḍayā viṣṇorvibhūtidvayasaṃsthitiḥ || 9 ||
[Analyze grammar]

bhoge nityasthitistasya līlāṃ saṃharate kadā |
bhogo līlā ubhaustasya dhāryyete śaktimattayā || 10 ||
[Analyze grammar]

tripādvyāptiḥ pare dhāmni pādosyehābhavatpunaḥ |
tripādvibhūtirnityā syādanityaṃ pādamaiśvaram || 11 ||
[Analyze grammar]

nityaṃ tadrūpamīśasya pare dhāmni sthitaṃ śubham |
acyutaṃ śāśvataṃ divyaṃ sadā yauvanamāśritam || 12 ||
[Analyze grammar]

nityaṃ saṃbhogamīśvaryā śriyā bhūmyā ca saṃvṛtam |
nityaiveṣā jaganmātā viṣṇoḥ śrīranapāyinī || 13 ||
[Analyze grammar]

yathā sarvagato viṣṇustathā lakṣmīśśubhānane |
īśānā sarvajagato viṣṇupatnī sadā śivā || 14 ||
[Analyze grammar]

sarvataḥ pāṇipādāṃtā sarvato'kṣiśiromukhī |
nārāyaṇī jaganmātā samastajagadāśrayā || 15 ||
[Analyze grammar]

yadapāṅgāśritaṃ sarvaṃ jagatsthāvarajaṅgamam |
jagatsthitilayau yasyā unmīlananimīlanāt || 16 ||
[Analyze grammar]

sarvasyādyā mahālakṣmīstriguṇā parameśvarī |
lakṣyālakṣyasvarūpā sā vyāpya kṛtsnaṃ vyavasthitā || 17 ||
[Analyze grammar]

śūnyaṃ tadakhilaṃ viśvaṃ vilokya parameśvarī |
śūnyaṃ tadakhilaṃ svena pūrayāmāsa tejasā || 18 ||
[Analyze grammar]

sā lakṣmīrdharaṇī caiva nīlādevīti viśrutā |
ādhārabhūtā jagataḥ pṛthivīrūpamāśritā || 19 ||
[Analyze grammar]

toyādirasarūpeṇa saiva nīlāvapurbhavet |
lakṣmīrūpatvamāpannā dhanavāgrūpiṇī hi sā || 20 ||
[Analyze grammar]

evaṃ devīsvarūpā sā jagataḥ śrīḥ śrītāharim |
samastavidyābhedā syurlakṣmīrūpā varānane || 21 ||
[Analyze grammar]

śrīrūpamakhilaṃ sarvaṃ tasyā hi vapurucyate |
sauṃdaryaṃ śīlavṛttaṃ ca saubhāgyaṃ strīṣu saṃsthitam |
tasyā rūpaṃ ca girije sarvāsāṃ mūrdhni yoṣitām || 22 ||
[Analyze grammar]

yasyāḥ kaṭākṣāya tamogradṛṣṭyā brahmāśivassvargapatirmaheṃdraḥ |
caṃdraśca sūryo dhanadopamogniḥ prabhūtamaiśvaryamavāpnuvaṃti || 23 ||
[Analyze grammar]

lakṣmīḥ śrīḥ kamalā vidyā mātā viṣṇupriyā satī |
padmālayā padmahastā padmākṣī lokasuṃdarī || 24 ||
[Analyze grammar]

bhūtānāmīśvarī nityā sahyā sarvagatā śubhā |
viṣṇupatnī mahādevī kṣīrodatanayā ramā || 25 ||
[Analyze grammar]

anaṃtā lokamātā bhūrnīlā sarvasukhapradā |
rukmiṇī ca tathā sītā sarvavedavatī śubhā || 26 ||
[Analyze grammar]

satī sarasvatī gaurī śāṃtiḥ svāhā svadhā ratiḥ |
nārāyaṇī varārohā viṣṇornityānapāyinī || 27 ||
[Analyze grammar]

etāni puṇyanāmāni prātarutthāya yaḥ paṭhet |
sa mahāśriyamāpnoti dhanadhānyamakalmaṣam || 28 ||
[Analyze grammar]

hiraṇyavarṇāṃ hariṇīṃ suvarṇarajataḥ srajām |
caṃdrāṃ hiraṇmayīṃ lakṣmīṃ viṣṇoranapagāminīm || 29 ||
[Analyze grammar]

gandhadvārāṃ durādharṣāṃ nityapuṣṭāṃ karīṣiṇīm |
īśvarīṃ sarvabhūtānāṃ tāmihopahvaye śriyam || 30 ||
[Analyze grammar]

evaṃ ṛksaṃhitāyāṃ tu stūyamānā maheśvarī |
sarvaiśvaryasukhaṃ prādācchivādīnāṃ divaukasām || 31 ||
[Analyze grammar]

asyeśānā hi jagato viṣṇupatnī sanātanī |
yadapāṅgāśritaṃ sarvaṃ jagatsthāvarajaṃgamam || 32 ||
[Analyze grammar]

yasya vakṣasi sā devī prabhāgnāviva tiṣṭhati |
sa vai sarveśvaraḥ sākṣādakṣaraḥ puruṣo'vyayaḥ || 33 ||
[Analyze grammar]

sa vai nārāyaṇaḥ śrīmānvātsalyaguṇasāgaraḥ |
svāmī suśīlaḥ subhagaḥ sarvajñaḥ sarvaśaktimān || 34 ||
[Analyze grammar]

nityaṃ saṃpūrṇakāmaśca naisargikasuhṛtsakhā |
kṛpāpīyūṣajaladhiḥ śaraṇaṃ sarvadehinām || 35 ||
[Analyze grammar]

svargāpavargasukhado bhaktānāṃ karuṇākaraḥ |
śrīmate viṣṇave tasmai dāsyaṃ sarvaṃ karomyaham || 36 ||
[Analyze grammar]

deśakālādyavasthā tu sarvāsu kamalāpateḥ |
iti svarūpaṃ saṃsiddhaṃ sukhaṃ dāsyamavāpnuyāt || 37 ||
[Analyze grammar]

evaṃ viditvā maṃtrārthaṃ tadbhaktiṃ samyagācaret |
dāsabhūtamidaṃ tasya jagatsthāvarajaṃgamam || 38 ||
[Analyze grammar]

śrīmannārāyaṇaḥ svāmī jagatāṃ prabhurīśvaraḥ |
mātā pitā suto baṃdhurnivāsaḥ śaraṇaṃ gatiḥ || 39 ||
[Analyze grammar]

kalyāṇaguṇavānśrīśaḥ sarvakāmaphalapradaḥ |
yo'sau nirguṇa ityuktaḥ śāstreṣu jagadīśvaraḥ || 40 ||
[Analyze grammar]

prākṛtairheyasaṃyuktairguṇairhīnatvamucyate |
yatra mithyā prapañcatvaṃ vākyairvedāṃtagocaraiḥ || 41 ||
[Analyze grammar]

dṛśyamānamidaṃ sarvamanityamiti cocyate |
atrāpi prākṛtaṃ rūpamaṇḍasyaiva vināśanam || 42 ||
[Analyze grammar]

prākṛtānāṃ hi rūpāṇāmanityatvaṃ tathocyate |
imamarthaṃ mahādevi prakṛterudbhavaṃ hareḥ || 43 ||
[Analyze grammar]

krīḍārthaṃ devadevasya viṣṇorlīlādhikāriṇaḥ |
lokaiścaturbhirdaśabhiḥ sāgarairdvīpasaṃyutaiḥ || 44 ||
[Analyze grammar]

bhūtaiścaturvidhaiścāpi bhūdharaiśca mahocchrayaiḥ |
paripūrṇamidaṃ ramyamaṃḍaṃ prakṛtisaṃbhavam || 45 ||
[Analyze grammar]

daśottaraguṇopetaṃ saptāvaraṇasaṃvṛtam |
kalākāṣṭhādirūpeṇa yaḥ kālaṃ parivartate || 46 ||
[Analyze grammar]

kālenaiva jagatsargasthitisaṃharaṇaṃ bhavet |
caturyugasahasraṃ vai brahmaṇo divaso bhavet || 47 ||
[Analyze grammar]

tāvaṃti rātrivarṣāṇi brahmaṇo'vyaktajanmanaḥ |
kṣaye tu brahmaṇaḥ prāpte sarvasaṃhārako bhavet || 48 ||
[Analyze grammar]

aṃḍamaṃḍagatā lokā dahyaṃte kālavahninā |
sarvātmānastathā viṣṇoḥ prakṛtau viniveśitāḥ || 49 ||
[Analyze grammar]

aṃḍāvaraṇabhūtāni prakṛtau layamāpnuyuḥ |
sā sarvajagadādhārā prakṛtirharisaṃśritā || 50 ||
[Analyze grammar]

tayā jagatsargalayau karoti bhagavānsadā |
krīḍārthaṃ devadevena sṛṣṭā māyā jaganmayī || 51 ||
[Analyze grammar]

avidyā prakṛtirmāyā guṇatrayamayī sadā |
sargasthitilayānāṃ sā hetubhūtā sanātanī || 52 ||
[Analyze grammar]

yoganidrā mahāmāyā prakṛtistriguṇānvitā |
avyaktā ca pradhānaṃ ca viṣṇorlīlāvikāriṇaḥ || 53 ||
[Analyze grammar]

jagatsargalayau syātāṃ prakṛtereva sarvadā |
asaṃkhyaprakṛteḥ sthānaṃ nibiḍadhvāntamavyayam || 54 ||
[Analyze grammar]

ūrdhvaṃ tu sīmni virajā nissīmādhassanātanī |
tayādṛtaṃ jagatsarvaṃ sthūlasūkṣmādyavasthayā || 55 ||
[Analyze grammar]

vikāsasaṃkocāvasthe tasyāṃ sargalayau smṛtau |
evaṃ sarvāṇi bhūtāni prakṛtyaṃtargatāni vai || 56 ||
[Analyze grammar]

tataḥ śūnyamidaṃ sarvaṃ prakṛtyaṃtargataṃ mahat |
evaṃ prakṛtirūpāyā vibhūte rūpamuttamam || 57 ||
[Analyze grammar]

tripādvibhūtirūpaṃ tu śṛṇu bhūdharanaṃdini |
pradhāna paramavyomnoraṃtare virajā nadī || 58 ||
[Analyze grammar]

vedāṃgasvedajanitatoyaiḥ prasrāvitā śubhā |
tasyāḥ pāre pare vyomni tripādbhūtissanātanī || 59 ||
[Analyze grammar]

amṛtaṃ śāśvataṃ nityamanantaṃ paramaṃ padam |
śuddhaṃ satvamayaṃ divyamakṣaraṃ brahmaṇaḥ padam || 60 ||
[Analyze grammar]

anekakoṭisūryāgni tulya varcasamavyayam |
sarvavedamayaṃ śuddhaṃ sargapralayavarjitam || 61 ||
[Analyze grammar]

asaṃkhyamajaraṃ nityaṃ jāgratsvapnādivarjitam |
hiraṇmayaṃ mokṣapadaṃ brahmānaṃdasukhāvaham || 62 ||
[Analyze grammar]

samānādhikyarahitamādyaṃtarahitaṃ śubham |
tejasātyadbhutaṃ ramyaṃ nityamānaṃdasāgaram || 63 ||
[Analyze grammar]

evamādiguṇopetaṃ tadviṣṇoḥ paramaṃ padam |
na tadbhāsayate sūryo na śaśāṃko na pāvakaḥ || 64 ||
[Analyze grammar]

yadgatvā na nivartaṃte taddhāma paramaṃ hareḥ |
tadviṣṇoḥ paramaṃ dhāma śāśvataṃ nityamacyutam |
na hi varṇayituṃ śakyaṃ kalpakoṭiśatairapi || 65 ||
[Analyze grammar]

hareḥ padaṃ varṇayituṃ na śakyaṃ mayā ca dhātrā ca munīṃdrasaṅghaiḥ |
yasminpade hyacyuta īśvaro yaḥ so aṅga veda yadi vā na veda || 66 ||
[Analyze grammar]

yadakṣaraṃ vedaguhyaṃ yasmindevā adhi viśve niṣeduḥ |
yastanno veda kimṛcā kariṣyati ye tadvidusta ime samāsate || 67 ||
[Analyze grammar]

tadviṣṇoḥ paramaṃ dhāma sadā paśyaṃti sūrayaḥ |
akṣaraṃ śāśvataṃ divyaṃ devi cakṣurivātatam || 68 ||
[Analyze grammar]

tatpraveṣṭumaśakyaṃ ca brahmarudrādidaivataiḥ |
jñānena śāstramārgeṇa vīkṣyate yogipuṃgavaiḥ || 69 ||
[Analyze grammar]

ahaṃ brahmā ca devāśca na jānaṃti maharṣayaḥ |
sarvopaniṣadāmarthaṃ dṛṣṭvā vakṣyāmi suvrate || 70 ||
[Analyze grammar]

viṣṇoḥ pade hi parame pade tatsaśubhāhvayeḥ |
yatra gāvo bhūriśṛṃgā āsate susukhāḥ prajāḥ || 71 ||
[Analyze grammar]

atrāha tatparaṃ dhāma gopaveṣasya śārṅgiṇaḥ |
tadbhāti paramaṃ dhāma gobhirgopaissukhāhvayaiḥ || 72 ||
[Analyze grammar]

ādityavarṇaṃ tamasaḥ parastājjyotiracyutam |
ādhāro brahmaṇo lokaśśuddhasattvassanātanaḥ || 73 ||
[Analyze grammar]

sāmānyā vibhite bhūminte'sminśāśvate pade |
tasthaturjāgarūkesminyuvānau śrīsanātanau || 74 ||
[Analyze grammar]

yataḥ svasārau yuvatī bhūnīle viṣṇuvallabhe |
atra pūrve ye ca sādhyā viśvedevāssanātanāḥ || 75 ||
[Analyze grammar]

te ha nākaṃ mahimānassacante śubhadarśanāḥ |
tatra vijñānino viprā jāgṛvāṃsassamindhate || 76 ||
[Analyze grammar]

tatpadaṃ jñānino viprā yāṃti saṃvāsamicchavaḥ |
tadviṣṇoḥ paramaṃ dhāma mokṣa ityabhidhīyate || 77 ||
[Analyze grammar]

tasminbaṃdhavinirmuktāḥ prāpnuvanti sukhaṃ padam |
tatprāpya na nivartaṃte tasmānmokṣa udāhṛtaḥ || 78 ||
[Analyze grammar]

mokṣaṃ paraṃ padaṃ divyamamṛtaṃ viṣṇumaṃdiram |
akṣaraṃ paramaṃ dhāma vaikuṇṭhaṃ śāśvataṃ padam || 79 ||
[Analyze grammar]

nityañca paramaṃ vyoma sarvotkṛṣṭaṃ sanātanam |
paryyāyavācakānyasya paradhāmnocyutasya ca |
tasya tripādvibhūtestu rūpaṃ vakṣyāmi vistarāt || 80 ||
[Analyze grammar]

iti śrīpādmemahāpurāṇe paṃcapaṃcāśatsāhasryāṃ saṃhitāyāmuttarakhaṃḍe umāmaheśvarasaṃvāde tripādvibhūtikathanaṃnāma saptaviṃśatyadhikadviśatatamo'dhyāyaḥ || 227 ||
[Analyze grammar]