Chapter 221

[English text for this chapter is available]

nārada uvāca |
ityuktā sā kalā rājaṃstayā nṛpatibhāryayā |
svakośātsvarṇamaṃjūṣāmānāyya vidadhe puraḥ || 1 ||
[Analyze grammar]

uvāca ca mahārāja bhārye'syāmahadadbhutam |
pustakaṃ vartate devi tatra citrāṇi saṃti vai || 2 ||
[Analyze grammar]

uddhāṭya dṛśyatāṃ kiṃcitkiṃ kimastyatra pustake |
raṃsyate te mano nūnaṃ tatrasthā lekhyadarśane || 3 ||
[Analyze grammar]

ityuktvā bhūpapatnī sā dāsyā tāmudaghāṭayat |
maṃjūṣāṃ tatra saṃsthaṃ ca pustakaṃ pāṇinā'grahīt || 4 ||
[Analyze grammar]

tatrāvalokayāmāsa sāvatārānsamāsataḥ |
pūrvaṃ tatastu bhūgolaṃ paṃcāśatkoṭiyojanam || 5 ||
[Analyze grammar]

tatrāṃdhakārasaṃyuktā bhūmirdṛṣṭātha kāṃcanī |
etayoraṃtare rājaṃllokālokaśca parvataḥ || 6 ||
[Analyze grammar]

saptadvīpāstato dṛṣṭvā samudraiḥ saptabhirvṛtāḥ |
eteṣu nadyaḥ śailāśca khaṃḍāni tu mahāmate || 7 ||
[Analyze grammar]

etadbhāratakhaṃḍaṃ sā paśyaṃtī bhūpatipriyā |
yamunājāhnavī mukhyā saritaḥ samavaikṣata || 8 ||
[Analyze grammar]

yamunātīragaṃ rājanniṃdraprasthamidaṃ śubham |
dadarśa sā mahābhāgā tīrthaṃ vrajayutaṃ nṛpa || 9 ||
[Analyze grammar]

atra tīrthamidaṃ dṛṣṭvā prayāgaṃ brahmanirmitam |
pūrvajanmakṛtaṃ karma sā sasmāra manasvinī || 10 ||
[Analyze grammar]

tatastūṣṇīṃ samutthāya tūrṇaṃ sā svagṛhaṃ yayau |
niścityeti na bhokṣyāmi tataḥ prasthāya tīrthakam || 11 ||
[Analyze grammar]

tadaiva sā tu hemāṃgī sahagaṃtumasupriyam |
vīravarmāṇamāhedaṃ tīrtharājaṃ priyā satī || 12 ||
[Analyze grammar]

hemāṃgyuvāca |
bho bho prāṇapate vākyaṃ madīyaṃ śṛṇu dharmadam |
vidhehi ca mahābhāga tūrṇaṃ pūrṇo bhaviṣyati || 13 ||
[Analyze grammar]

purāhaṃ mohinī nāma veśyā ca bahupāpakṛt |
yauvane vārddhake kiṃciddharme jātā matirmama || 14 ||
[Analyze grammar]

pāpenopārjitāṃ vittaṃ dharmeṇa vyayitaṃ mayā |
nirddhanāhaṃ yadā rājannirgatā nijapattanāt || 15 ||
[Analyze grammar]

tadā māṃ nirjane'raṇye yāṃtī jaghnustu taskarāḥ |
vṛthā dāridryasaṃtaptā pāpā dhanajighṛkṣayā || 16 ||
[Analyze grammar]

śitaśastrakṣatāṃgīṃ māṃ śvasaṃtīṃ gatacetanām |
visṛjya taskarāstatra gatā hatamanorathāḥ || 17 ||
[Analyze grammar]

tato vaikhānaso hyekaḥ prayāgasya jalaṃ vahan |
iṃdraprasthagatasyaiva vane tatra samāgataḥ || 18 ||
[Analyze grammar]

tatra māṃ patitāṃ dṛṣṭvā tadavasthāṃ sa tāpasaḥ |
kā tvaṃ kutaḥ kimarthaṃ vā hatā keneti pṛṣṭavān || 19 ||
[Analyze grammar]

tadā kimapi noktaṃ me prārthitaṃ puṇyamaṃbu tat |
tena tanme mukhe kṣiptaṃ tato'haṃ dehamatyajam || 20 ||
[Analyze grammar]

prāṇaprayāṇakāle tu vāritatsarvakāmadam |
śrutveti vāṃcchitavatī mahiṣī syāmiti prabho || 21 ||
[Analyze grammar]

tasya tīrthāṃbhaso rājanprasādātte gṛheśvarī |
jātāhaṃ satkulācārā śīlayā parayo nidheḥ || 22 ||
[Analyze grammar]

sāṃprataṃ draṣṭumicchāmi śakraprasthagataṃ nṛpa |
prayāgaṃ tīrtharājaṃ taṃ bhavatā saha kāmadam || 23 ||
[Analyze grammar]

prasthāsyehaṃ yadā rājan tīrtharājaṃ prati prabho |
tadāhamannaṃ bhokṣyāmi mayeti vihitaḥ paṇaḥ || 24 ||
[Analyze grammar]

rājovāca |
kathametadvijānīyāṃ tvaduktaṃ calalocane |
pratītaṃ kuru me bhadre tvaduktaṃ karavāṇyaham || 25 ||
[Analyze grammar]

nārada uvāca |
ityukte tena bhūpena khe vāgityabhavattadā |
ākāśavāguvāca |
satyamuktaṃ vaco rājannanayā tava bhāryayā || 26 ||
[Analyze grammar]

iṃdraprasthe gate puṇye prayāge tīrthapuṃgave |
tatra gatvā kuru snānaṃ lapsyase yadyadicchasi || 27 ||
[Analyze grammar]

nārada uvāca |
niśamyeti tato vāṇīṃ nṛpo gaganasaṃbhavām |
daṃḍavatpatito bhūmau tadvaktāraṃ namāmyaham || 28 ||
[Analyze grammar]

atha maṃtriṇamāhūya rājyamāropya tatra vai |
tayā saha samāruhya rathaṃ tīrthavaraṃ yayau || 29 ||
[Analyze grammar]

katibhirvāsarairatra hemāṃgyā saha āyayau |
upajahṛ tīrtharāje kṣīraṃ bhāryāyuto nṛpaḥ || 30 ||
[Analyze grammar]

sasnatustau śive tīrthe daṃpatī tatra kāmade |
prayāge tena vapuṣā vaikuṃṭhaprāptirastu me || 31 ||
[Analyze grammar]

pratīcchayā snānamātre mithune tatra bhūpate |
āgatau suraśārdūlau haṃsapakṣīṃdravāhanau || 32 ||
[Analyze grammar]

āgatau tau samālokya vīravarmā sa bhūpatiḥ |
praṇamya śirasā devau tuṣṭāvaikāgramānasaḥ || 33 ||
[Analyze grammar]

rājovāca |
namo vāṃ suraśārdūlau bibhradbhyāmasitāruṇe |
vapuṣī kṣaumavāsāṃsi hemasiṃdūrabhāni ca || 34 ||
[Analyze grammar]

vaṃde yuvāṃ satvarajaḥ pradhānau carācarasya sthitisargahetū |
vaikuṃṭhasatyādbhutalokanāthau caturdvibāhū khagarājavāhau || 35 ||
[Analyze grammar]

vairāgyasaṃrāgavatāṃ janānāṃ sanmuktibhuktipratipādikau ca |
vṛṃdārake vaṃditapādapadmau sadbhāvanamreṇa namāmi mūrdhnā || 36 ||
[Analyze grammar]

goviṃdavṛṃdārakavaṃdyapāda na ko'pi jānāti tava svarūpam |
yataḥ parastvaṃ prakṛteśca puṃso manovacobhyāmapi dūravartī || 37 ||
[Analyze grammar]

dhanyaḥ saloke puruṣaḥ parātmanyo viśvametatkṣaṇikaṃ viciṃtya |
ananyacetā bhajati tvadīya pādāraviṃdaṃ munivṛṃdavaṃdyam || 38 ||
[Analyze grammar]

tvatpādasevanaṃnāma tīrthametacca durlabham |
janānāṃ bhajamānānāṃ vāṃchitārthaphalapradam || 39 ||
[Analyze grammar]

tathāpyetaddvayaṃ sevyaṃ muktaye nānyalabdhaye |
anyakāmanayā yastu sevate sa tu vaṃcitaḥ || 40 ||
[Analyze grammar]

saṃto bhavaṃtamāsevya tīrthametacca muktidam |
nānyamicchaṃtyatikramya sarvalokānjijīṣavaḥ || 41 ||
[Analyze grammar]

nārada uvāca |
ityabhiṣṭūya deveśaṃ lokeśaṃ sa ca bhūpatiḥ |
tasthau yadā tadā rājanhemāṃgī sā jagāda ha || 42 ||
[Analyze grammar]

padmāpate padmapalāśalocana brahmankarālāsana bhāratī guro |
namo yuvābhyāṃ yadi dīnacetase prasīdatāṃ tārayatāṃ bhavābdheḥ || 43 ||
[Analyze grammar]

tīrthasyāsya prasādena jātāhaṃ mahiṣī prabho |
yuvayordarśanaṃ jātaṃ devānāmapi durlabham || 44 ||
[Analyze grammar]

yuvāmakhilacittajñau dattaṃ nau mānasepsitam |
snānakāle yadāvābhyāṃ vihitaṃ pāramārthikam || 45 ||
[Analyze grammar]

evaṃ tābhyāmubhābhyāṃ tau saṃstutau devapuṃgavau |
prasannavadanau bhūtvā procaturdaṃpatī prati || 46 ||
[Analyze grammar]

haribrahmāṇāvūcatuḥ |
dhanyā tvamasi hemāṃgi yato'yaṃ tāritaḥ patiḥ |
tvayā rājyasukhāsakta cittopyetatsamāgamāt || 47 ||
[Analyze grammar]

rājñāṃ viṣayasaktānāṃ durlabhā muktirīdṛśī |
tvadbharturyādṛśī jātā tīrthasyāsya prasādataḥ || 48 ||
[Analyze grammar]

nārada uvāca |
ityuktvā tau samālokya garuḍaṃ pakṣipuṃgavam |
jagmatustau suraśreṣṭhau satyalokaṃ nareśvara || 49 ||
[Analyze grammar]

tatra te brahmaṇā sarve pūjitā vidhivannṛpa |
tasya cittānurodhena tasthurekaṃ muhūrtakam || 50 ||
[Analyze grammar]

atha tābhyāmubhābhyāṃ sa daṃpatībhyāṃ samaṃ hariḥ |
āruhya garuḍaṃ śrīmadvaikuṃṭhamagamannṛpa || 51 ||
[Analyze grammar]

ityetatkathitaṃ tubhyaṃ tīrtharājasya vaibhavam |
puṇyaṃ samastapāpaghnaṃ yaśasyaṃ sutadaṃ nṛpa || 52 ||
[Analyze grammar]

ya etacchṛṇuyānnityaṃ paṭhedapi ca mānavaḥ |
sa gacchedvāṃchitaṃ sthānaṃ satyametanmayoditam || 53 ||
[Analyze grammar]

iti śrīpādme mahāpurāṇe paṃcapaṃcāśatsāhasryāṃ saṃhitāyāmuttarakhaṃḍe iṃdraprasthamāhātmye prayāgavarṇanaṃnāmaikaviṃśatyadhikadviśatatamo'dhyāyaḥ || 221 ||
[Analyze grammar]