Chapter 209

[English text for this chapter is available]

yudhiṣṭhira uvāca |
saubhare kasya tīrthasya māhātmyaṃ nārado muniḥ |
varṇayāmāsa śibaye śakratīrthagatasya ca || 1 ||
[Analyze grammar]

atastu mama śuśrūṣā jāyate munipuṃgavaḥ |
śivināradasaṃvādaṃ brūhi puṇyaṃ natāya me || 2 ||
[Analyze grammar]

saubhariruvāca |
dharmarāja śibīrājā śrutvā nāradavarṇitam |
dvārakāyāstu māhātmyaṃ tamevāpṛcchadādarāt || 3 ||
[Analyze grammar]

śibiruvāca |
brahmāṃgaja suraśreṣṭha śrutaṃ māhātmyamuttamam |
iṃdraprasthataṭasthāyā dvārakāyā mayādbhutam || 4 ||
[Analyze grammar]

ayodhyāyāṃ yadi mune kiṃcidasti pavitrakam |
caritaṃ mama tadbrūhi pipāsostvadvaco'mṛtam || 5 ||
[Analyze grammar]

nārada uvāca |
astyatra caritaṃ puṇyaṃ mahāpātakanāśanam |
nāpitasyādyayuktasya mukuṃdasya dvijasya ca || 6 ||
[Analyze grammar]

brahmahā nāpito rājannapamṛtyuṃ gato dvijaḥ |
prasādātkośalāyāstu dvāvapi svargatiṃ gatau || 7 ||
[Analyze grammar]

caṃdrabhāgā nadī tīre purī sā ca niveśitā |
tatrāsti nāpitaḥ pāpaścaṃḍakonāma garhitaḥ || 8 ||
[Analyze grammar]

cauryeṇa paravittānāmapahartā sa pāpakṛt |
ghātakaḥ śastrapāśādyaiḥ pāṃthānāmavaluṃṭhakaḥ || 9 ||
[Analyze grammar]

dyūtamadyarato nityaṃ parastrīlaṃpaṭeṃdriyaḥ |
bhitvā devālayaṃ bhittimiṣṭikā grāva vikrayī || 10 ||
[Analyze grammar]

sa tasyodvasitābhyāse brāhmaṇo vasati śriyā |
saṃyukto brahmakarmajño mukuṃdo nāmato nṛpa || 11 ||
[Analyze grammar]

sa ekadā samāliṃgya taruṇīmātmayoṣitam |
suṣvāpa suratāyāsa ślathāṃgo niśi nirbhayam || 12 ||
[Analyze grammar]

sa caṃḍako niśīthe'tha praviveśa tadālayam |
mukuṃdasya samāhartuṃ harmye bhūṣādi vastu yat || 13 ||
[Analyze grammar]

upakāryā bahisthaṃ yattadgṛhītvo'gamadgṛham |
svakīyaṃ ca punastasya brāhmaṇasyāviśadgṛham || 14 ||
[Analyze grammar]

kapāṭotpāṭanārthī tu yatnena mahatā'bhavat |
lohayaṃtrāvaruddhaśca sa noddhāṭayituṃ kṣamaḥ || 15 ||
[Analyze grammar]

āruroha tadā tasya brāhmaṇasyāviśadgṛham |
praviśya tadgṛhaṃ krūraḥ kṛpaṇaṃ pāṇinādadhat || 16 ||
[Analyze grammar]

aṭṭālikāṃ sa pāpiṣṭho nāpitastaskarakriyaḥ |
tatrāpaśyatprasuptau tau daṃpatīrativihvalau || 17 ||
[Analyze grammar]

jagāma ca tayoḥ pārśve hemabhūṣājighṛkṣayā |
śayyāyā ekadeśasthaṃ gṛhītvā bhūṣaṇaṃ bahu || 18 ||
[Analyze grammar]

hartuṃ tadaṃgato hastaṃ prasasāra sa nāpitaḥ |
taskarasparśato vipro jajāgāra bhayāturaḥ || 19 ||
[Analyze grammar]

na kiṃcidūce saṃmīlya netre tatraiva saṃsthitaḥ |
yadā sa taskaraḥ pāpo gṛhītvā dehabhūṣaṇam || 20 ||
[Analyze grammar]

calitaḥ sa tadā tena dorbhyāmātto dvijena hi |
paścādāgatya vittasyāsahamānena saṃkṣayam || 21 ||
[Analyze grammar]

tenāpi nṛpa caureṇa kṛpāṇena hato dvijaḥ |
vidīrṇodaramadhyastu tātamātaritīrayan || 22 ||
[Analyze grammar]

vadaṃtaḥ kiṃkimetyetatpārśvaṃ tasyā yayurjanāḥ |
dadṛśustaṃ niḥsṛtāṃtraṃ rudhirāliptavigraham || 23 ||
[Analyze grammar]

papracchuśca mukuṃdedaṃ karma kenedṛśaṃ kṛtam |
so'pi kṛcchreṇa mahatā provācedaṃ svabāṃdhavān || 24 ||
[Analyze grammar]

mukuṃda uvāca |
mamaiva paripāko'yaṃ pūrvopārjitakarmaṇām |
na kaścitsukhaduḥkhasya dātā kasyāpi dehinaḥ || 25 ||
[Analyze grammar]

dharmo'dharmaśca tāveva teṣāṃ mūlaṃ purākṛtau |
nārada uvāca |
ityuktvā sa tu bhūyasyāpīḍayā gāḍhapīḍitaḥ || 26 ||
[Analyze grammar]

tatyāja bhūpate prāṇānpaśyatāṃ suhṛdāṃ tadā |
vilalāpa tadā tasya mātā dvijasatī nṛpa || 27 ||
[Analyze grammar]

nidhāya tacchiraḥ svāṃke kuṃḍalābhyāmalaṃkṛtam |
mātovāca |
hā hatāsmi tvayā vatsa daśāmaṃtyāṃ ca gacchatā || 28 ||
[Analyze grammar]

dinaśrīriva sūryeṇa paścimācalalaṃbinā |
yadaṃgaṃ caṃdanālepayogyaṃ tava mahāmate || 29 ||
[Analyze grammar]

māṃ majjayārtiśokābdhau tadidaṃ dhūlidhūsaram || 30 ||
[Analyze grammar]

tāṃbūlacarvaṇebhyāso yastvayā vihitastvasau |
sa eva rudhirodgāra miśreṇa kriyate dhruvam |
tava ye locane pūrvaṃ jigyatuḥ kamalaśriyam || 31 ||
[Analyze grammar]

ta eva sāṃprataṃ jāte timiraughā vṛte iva |
uttiṣṭhottiṣṭha vatsa tvaṃ śiṣyānadhyāpayātmanaḥ || 32 ||
[Analyze grammar]

yathāvadvaiśvadevāṃte pūjayātithimāgatam |
dvāri sthitā vayasyāste tvāhvayaṃti prayāhi tān || 33 ||
[Analyze grammar]

dātavyaṃ yaddadasvaibhyo gṛhītavyaṃ gṛhāṇa tat |
hāhā dehi prativacaḥ patāmi tava pādayoḥ || 34 ||
[Analyze grammar]

nocedahaṃ vimokṣyāmi prāṇāṃstava samīpataḥ |
nārada uvāca |
ityuktvā mūrchitā tasya mukuṃdasya prasūstadā || 35 ||
[Analyze grammar]

bhāryā tasya śiraḥ svāṃke vidhāya vyalapacca sā |
bhāryovāca |
nāmamārgeṇa pāthodhe madīyaṃ vacanaṃ śṛṇu || 36 ||
[Analyze grammar]

ruṣṭo'si cetsamaṃ mātrā kuto vada mamāgrataḥ |
na kadācittvayā sādho maunamīdṛkkṛtaṃ purā |
kenāpi laghunā bhrātrā hyapamānaḥ kṛtastava || 37 ||
[Analyze grammar]

śuko'yaṃ paṃjarasthaste nānnamatti tvayā vinā |
bhojayainaṃ susiddhānnaṃ kalavācaṃ ca sārikām || 38 ||
[Analyze grammar]

rāmarāma harekṛṣṇa viṣṇo nāmāvalīmiti |
pāṭhayottiṣṭha nipuṇau dvāvetau sārikāśukau || 39 ||
[Analyze grammar]

aparāddhaṃ mayā kiṃ te yatvaṃ māṃ nābhibhāṣase |
yattvayā me dhanaṃ dattaṃ tanmayā sādhurakṣiṇam || 40 ||
[Analyze grammar]

arpitaṃ yattvayā nātha nijatejo mamodare |
sūtikālamahaṃ tasya nopekṣe tvāmanuvraje || 41 ||
[Analyze grammar]

nārada uvāca |
evaṃ vilapya sā tasya mukuṃdasya priyā tadā |
na ruroda svabhartāramanugaṃtumanā satī || 42 ||
[Analyze grammar]

atha tasya mukuṃdasya gururvedāyanābhidhaḥ |
saṃnyāsī paryaṭanpṛthvīṃ tasya veśma yayau nṛpa || 43 ||
[Analyze grammar]

mukuṃdaḥ kva gato mātā bhāryā tasya ca dhīmataḥ |
na dṛśyate tadā tena pṛṣṭetyācaṣṭa ceṭikā || 44 ||
[Analyze grammar]

ceṭikovāca |
svāminkenāpi caureṇa mama svāmī hato niśi |
snuṣāyā bhūṣaṇaṃ nītaṃ dukūlāni ca sarvaśaḥ || 45 ||
[Analyze grammar]

sa mṛtaḥ patito bhūmau harmyasyopari tiṣṭhati |
tasya mātā vadhūścaiva bhrātaraśca tadaṃtike || 46 ||
[Analyze grammar]

vilapaṃti mahāśokasāgare patitā guro |
nārada uvāca |
ityākarṇya parivrāṭsa vacanaṃ ceṭikoditam || 47 ||
[Analyze grammar]

āruhya harmyamadrākṣīdātmāṃte vāsinaṃ mṛtam |
tadaṃtike samālokya baṃdhūnāṃ kraṃdato bhṛśam || 48 ||
[Analyze grammar]

uddhariṣyannidaṃ dhīraḥ śokābdhestānuvāca ha |
vedāyana uvāca |
dehamuddiśya vātmānaṃ śoko'yaṃ kriyate tvayā || 49 ||
[Analyze grammar]

mātaḥ kathaya satyaṃ me nobhayoryujyate hi saḥ |
deho'yaṃ bhūtasaṃghātaḥ prārabdheḥ samupārjitaḥ || 50 ||
[Analyze grammar]

teṣu kṣīṇeṣu bhūtānāṃ pṛthaktvamupajāyate |
yadekībhavanaṃ teṣāṃ karmabhirjanma tannṛṇām || 51 ||
[Analyze grammar]

tannāśe tatpṛthaktvaṃ ca tadeva maraṇaṃ smṛtam |
ekyaṃ pṛthaktvaṃ bhūtānāṃ karmārdhā neyato budhaiḥ || 52 ||
[Analyze grammar]

ato dehe na kartavyaḥ śokaḥ paravaśe jaḍe |
anādyavidyayā jīve dṛṣṭe maraṇajanmanī || 53 ||
[Analyze grammar]

dehasyātmanyahaṃ buddhyā manyate nahi tatra te |
tannivṛttau sa tadbrahma yacchuddhaṃ rūpavarjitam || 54 ||
[Analyze grammar]

svaprakāśaṃ jagaddhetu hetvatītaṃ guṇorjitam |
nityaṃ vijñānamānaṃda svabhāsā bhāsayajjagat || 55 ||
[Analyze grammar]

na jihvā leḍhi taccakṣurna paśyati śṛṇoti na |
śrutirjighrati na ghrāṇaṃ na tvakspṛśati karhicit || 56 ||
[Analyze grammar]

atītamiṃdriyebhyastatsvaprakāśakamātmadṛk |
aviṣayaṃ manodūraṃ buddherapi na gocaram || 57 ||
[Analyze grammar]

tasyāvatārarūpāṇi śuddhasatvāni devatāḥ |
sevaṃte tanna jānaṃti rūpaṃ yatsadasatparam || 58 ||
[Analyze grammar]

evaṃ svarūpamātmā yastaṃ samuddiśya kaḥ kudhīḥ |
krodhaṃ kuryādyatastasya notpattirnaiva saṃkṣayaḥ || 59 ||
[Analyze grammar]

iti śrīpādmemahāpurāṇe pacaṃpaṃcāśatsāhasryāṃ saṃhitāyāmuttarakhaṃḍe kāliṃdīmāhātmye navādhikadviśatatamo'dhyāyaḥ || 209 ||
[Analyze grammar]