Chapter 207

[English text for this chapter is available]

saubhariruvāca |
dharmātmaja niśamyaitadvacastasya mahātmanaḥ |
nāradasya śibī rājā provācedaṃ vinītavat || 1 ||
[Analyze grammar]

śibiruvāca |
tiṣṭhaṃtyo marumārge tā rākṣasyo munipuṃgava |
etasyā dvārikāyāstu lebhire salilaṃ kutaḥ || 2 ||
[Analyze grammar]

nārada uvāca |
śṛṇu rājankathāṃ divyāṃ pūtāṃ pāpapraṇāśinīm |
vimalākhyasya viprasya himavaddroṇivāsinaḥ || 3 ||
[Analyze grammar]

ekastu himavaddroṇyāṃ vimalo nāma bhūsuraḥ |
devarṣipitṛvahnīnāṃ pūjako'tithipūjakaḥ || 4 ||
[Analyze grammar]

haripādārcanarato vedavedāṃgadharmavit |
vāsudevaguṇagrāma purāṇaśrutimānasaḥ || 5 ||
[Analyze grammar]

vārddhake tasya putro'bhūtprasādāccakrapāṇinaḥ |
cakāra haridatteti nāmnā taṃ janakastadā || 6 ||
[Analyze grammar]

vidhivadvidadhe cāsya kṣaurakarmādikaṃ ca tat |
guroḥ sakāśājjagrāha chaṃdāṃsi haridattakaḥ || 7 ||
[Analyze grammar]

adhītya vidhivadvedāndattvā ca gurudakṣiṇām |
pravavrāja viraktaḥ sansamūlaṃ cāśramadvayam || 8 ||
[Analyze grammar]

jñātvā tatkarmatanmātā vyalapatputravatsalā |
snāpayaṃtī kucadvaṃdvaṃ putraviśleṣajāśrubhiḥ || 9 ||
[Analyze grammar]

mātovāca |
māmanāthāṃ parityajya tāta yāto'si kutra vai |
pitaraṃ ca jarāgrastaṃ ṣaṭpado balvajāviva || 10 ||
[Analyze grammar]

vārddhake tvaṃ mayā prāptaḥ śrīpateḥ pādasevayā |
māṃ vihāyābhajastvaṃ vai caraṇaṃ tasya muktaye || 11 ||
[Analyze grammar]

ahaṃ mūḍhā dhruvaṃ tāta dhruvamārādhya yaddharim |
adhruvaṃ vāṃchitavatī bhavantaṃ tu sukhalabdhaye || 12 ||
[Analyze grammar]

tvaṃ sudhīrvatsa sarvārthaṃ yadviṣṇuṃ bhajase svayam |
adhruvaṃ jagadetadvai matvāsīstvamapi dhruvam || 13 ||
[Analyze grammar]

kiṃ karomi kva gacchāmi māyā jñānaṃ chinatti me |
suphalotpādakaṃ śāstrī raṃbhāmūlamivolbaṇā || 14 ||
[Analyze grammar]

dhanyo daśaratho rājā yo mṛto rāmaśokataḥ |
dhiṅmāṃ putrasya viśleṣāddhārayaṃtī svajīvitam || 15 ||
[Analyze grammar]

āgaccha darśaṃna dehi tāta māṃ paritāraya |
vada vedamayīṃ vāṇīṃ pituragre guṇārṇava || 16 ||
[Analyze grammar]

nārada uvāca |
evaṃ vilapya tanmātā rājansā patitā bhuvi |
dalanādrāhudattānāṃ lekhā cāṃdramasī yathā || 17 ||
[Analyze grammar]

athājagāma viprarṣirvimalo nṛpasattamaḥ |
dṛṣṭvā tāṃ patitāṃ bhūmau kiṃkimityabhyabhāṣata || 18 ||
[Analyze grammar]

kasmādiyaṃ kīrṇakeśavyastavastravibhūṣaṇā |
patitā bhuvi kalyāṇaṃ haridattasya vidyate || 19 ||
[Analyze grammar]

tasyāvayasyāstāḥ sarvāḥ procustaṃ vimalaṃ nṛpa |
vayasyā ūcuḥ |
adhītya vedāṃste putro dattvā ca gurudakṣiṇām || 20 ||
[Analyze grammar]

nārāyaṇaparo bhūtvā prāvrajaddharidattakaḥ |
tasya viśleṣaśokena patiteyaṃ dharātale || 21 ||
[Analyze grammar]

nārada uvāca |
ityākarṇya vacastāsāṃ vimalo buddhimattaraḥ |
prābodhayannijāṃ bhāryāmiti vāgamṛtena saḥ || 22 ||
[Analyze grammar]

vimala uvāca |
uttiṣṭha jāye śṛṇu vākyamīritaṃ mayā kimarthaṃ patitā viṣīdasi |
dhanyaḥ sutaste ya imaṃ vinaśvaraṃ vijñāya bheje haripādapallavam || 23 ||
[Analyze grammar]

dhanyā tvamapyasya jani pradāyinī yasyāḥ sutaste haripādabhāgabhūt |
saṃtārayiṣyatyapi māmasaṃśayaṃ kulaṃ kulotthānapi pūruṣānśubhe || 24 ||
[Analyze grammar]

kva viśvamekatacca pataccalaṃ kva sevanaṃ śāśvatalokadaṃ hareḥ |
matveti bhejurbharatādayo nṛpā yathā hariṃ sādhvi tathaiva te sutaḥ || 25 ||
[Analyze grammar]

dārā dhanāgāra śarīrabāṃdhavā ete bhavaṃti pratijanmaduḥkhadāḥ |
tāvannayāvaddharipādapallavaṃ bhajeta dhīro'khilakāmavarjitaḥ || 26 ||
[Analyze grammar]

nārada uvāca |
evaṃ prabodhitā tena dhīreṇa dharaṇītalāt |
utthāya nijabhartāramabravīddīnayā girā || 27 ||
[Analyze grammar]

bhāryovāca |
sarvaṃ jānāmyahaṃ kāṃta yattvayā sādhubhāṣitam |
kuladhuryaṃ na paśyāmi yatastapyāmi vai bhṛśam || 28 ||
[Analyze grammar]

putre sati mahattīrthe kiṃ vā keśavasevayā |
gṛha evāvayormṛtyuścetsyāllokadvayaṃ tadā || 29 ||
[Analyze grammar]

satputrotpādane yatnaḥ karttavyaḥ khalu mānavaiḥ |
tārayaṃti pitṝnputrā yataḥ saṃsāravāridhaiḥ || 30 ||
[Analyze grammar]

sraṣṭāraṃ sarvajaṃtūnāṃ dhātāraṃ putrakāmyayā |
bhaja vāṃchasi cetputraṃ kuladhuryaṃ mahāmate || 31 ||
[Analyze grammar]

nārada uvāca |
ityākarṇyavacastasyāḥ pratyāha vimalo dvijaḥ |
brahmakṣetraṃ prayāgaṃ hi yāmyahaṃ putrakāmyayā || 32 ||
[Analyze grammar]

ityuktvā calitaḥ so'tha haridvāramagāddvijaḥ |
snātvā tatrāpi vidhivadiṃdraprasthamathāgamat || 33 ||
[Analyze grammar]

katibhirvāsarairvīra sāyaṃkāle'khilārthidam |
snātvā bhuktvā niśāyāṃ sa suṣvāpa yamunātaṭe || 34 ||
[Analyze grammar]

niśīthe svapatastasya vimalasyāṃtike vidhiḥ |
haṃsamāruhya deveśastīrthaiḥ sarvairanudrutaḥ || 35 ||
[Analyze grammar]

āgatyotthāpayāmāsa vimalaṃ putravāṃcchakam |
uvāca ca suraśreṣṭho vacanaṃ madhurākṣaram || 36 ||
[Analyze grammar]

brahmovāca |
jāne samītiṃ cittaṃ tvadīye manasi sthitam |
na tatpūrayituṃ kalpo yatastatkāraṇaṃ śṛṇu || 37 ||
[Analyze grammar]

ekadā meruśikhare militāḥ sarvadevatāḥ |
tuṣṭuvurmadbhavamukhā mādhavaṃ kāryasiddhaye || 38 ||
[Analyze grammar]

stuto smadādivibudhaiḥ kṛpayā bhagavānhariḥ |
prasannobhūttadā viṣṇurvṛṇudhvamiti cābravīt || 39 ||
[Analyze grammar]

ityuktāstena te devā yathābhilaṣitaṃ varam |
śrīpateḥ prāpya te jagmuḥ sarve svaṃ svaṃ niketanam || 40 ||
[Analyze grammar]

mayoktamiti deveśa dehi me varamuttamam |
prayāgaṃ nāma me kṣetraṃ bhavatvakhilakāmadam || 41 ||
[Analyze grammar]

tataḥ śataguṇaṃ bhūyāddivatīyaṃ kṣetrakaṃ mama |
iṃdraprasthagataṃ samyagvṛttaṃ tvatto mayānagha || 42 ||
[Analyze grammar]

ityākarṇya vaco mahyaṃ bhagavānāha māṃ tadā |
tathāstviti punarvācamuvāca śrūyatāṃ vacaḥ || 43 ||
[Analyze grammar]

śrībhagavānuvāca |
iṃdrasya khāṃḍavāraṇye iṃdraprasthābhidhaṃ śubham |
kṣetraṃ kaliṃdajātīre mattulyāstatra ye mṛtāḥ || 44 ||
[Analyze grammar]

viriṃce racitā tatra svakīyā dvārakāpurī |
mayā śataguṇāṃbhodhī tīrasthāyāḥ purā guṇaiḥ || 45 ||
[Analyze grammar]

tāmullaṃghya naro yastu tīrthamanyanniṣevyate |
na tīrthaphalamāpnoti sa pumānna mṛṣoditam || 46 ||
[Analyze grammar]

sarvatīrthoditaṃ puṇyaṃ śakratīrthe labhennaraḥ |
dvārakā ca purī māyātīrthamanyacca rakṣati || 47 ||
[Analyze grammar]

yo nimajjyānyatīrtheṣu kṛtvā ca vividhāṃ kriyām |
atraiṣyati phalaṃ tebhyaḥ phalaṃ prāpsyati sa dhruvam || 48 ||
[Analyze grammar]

ityuktvāṃtarddhadhe viṣṇurahamapyagamaṃ svakam |
lokaṃ dvijeṃdra vaikuṃṭhādadhobhāge vyavasthitam || 49 ||
[Analyze grammar]

prayāgānmāmakātkṣetrātkāśī śataguṇā smṛtā |
kāśyāḥ śataguṇaṃ tīrthaṃ nigamodbodhakaṃ tathā || 50 ||
[Analyze grammar]

tīrthasaptakametattu trayaṃ tulyaphalaṃ smṛtam |
etattrayamanullaṃghya yo gacchati sitāsitam || 51 ||
[Analyze grammar]

tasyāhaṃ vāṃchitaṃ vipra dadāmi khalu nānyathā |
kecidāhuḥ saptapurī samapuṇyā maharṣayaḥ || 52 ||
[Analyze grammar]

ayodhyādyāḥ śataṃ tābhya iṃdraprasthaṃ pracakṣate |
tvamatrāgatya vipreṃdra sarvakāmaphalaprade || 53 ||
[Analyze grammar]

tīrthe śrīdvārakākhye hi kuru snānaṃ sutecchayā |
yāvaṃti sarvatīrthāni brahmāṃḍakalaśodare || 54 ||
[Analyze grammar]

tebhyo parimitaṃ puṇyaṃ śatanāmani kīrtite |
sutaṃ te kuladhaureyaṃ tīrthametatpradāsyati || 55 ||
[Analyze grammar]

snānācca tava goviṃdaḥ prasannātmā bhaviṣyati |
nārada uvāca |
ityuktvā devadeveśo brahmā tatra tirodhate || 56 ||
[Analyze grammar]

vimalo'pi tadā snātvā devādīnapyatarpayat |
ityuvāca sa dharmātmā dvārake kṛṣṇavallabhe || 57 ||
[Analyze grammar]

sutaṃ vaṃśakaraṃ dehi mahyaṃbhaktāya te namaḥ |
ityukte tena vipreṇa devavāgabhavattadā || 58 ||
[Analyze grammar]

devavāguvāca |
putraste dharmmatatvajño vaṃśakarttā bhaviṣyati |
prasādādasya tīrthasya sarvatīrthaśiromaṇeḥ || 59 ||
[Analyze grammar]

yāhi gehaṃ vilaṃbaṃ mā sukṛtaṃ tena majjanam |
nārada uvāca |
ityākarṇya satāṃ vāṇīṃ viśvastaḥ putrajanmani || 60 ||
[Analyze grammar]

cacāla jalamādāya dvārakāyāḥ kamaṃḍalau |
mārge tasya sakhā vipro malayācalaketanaḥ || 61 ||
[Analyze grammar]

mīlitaścalito gehaṃ kṛtvā tīrthāni sarvataḥ |
tasmai svavṛttamākhyātaṃ brahmasaṃvādakātmakam || 62 ||
[Analyze grammar]

yadbhūtaṃ dvārakātīrthe śrutvā so'pi visismaye |
uvāca sa ca dharmātmā sakhe mama vacaḥ śṛṇu || 63 ||
[Analyze grammar]

yāvaṃti bhārate kṣetre tīrthāni vihitāni me |
tāvaṃti kartumicchāmi tvaduktaṃ tīrthamuttamam || 64 ||
[Analyze grammar]

nītvā māṃ darśaya sakhe tattīrthaṃ sarvakāmadam |
sakhāyaste varā bhūmāvupakurvaṃti ye sakhīn || 65 ||
[Analyze grammar]

na tairnanu samo loke pitāmātā'thavā sutaḥ |
nirddhanaṃ puruṣaṃ loke sarve muṃcaṃti bāṃdhavāḥ || 66 ||
[Analyze grammar]

na muṃcaṃti sakhāyastu tasya duḥkhena duḥkhitāḥ |
saṃsārārṇavanirmagnānsakhīnuddharate sakhā || 67 ||
[Analyze grammar]

upadiśya harerbhaktimārgaṃ janmeṃdhanānalam |
atastvaṃ me sakhā śreṣṭha upakāraṃ vidhehi me || 68 ||
[Analyze grammar]

darśayaitadvaraśreṣṭhaṃ tīrthākhyaṃ dvārakāṃ dvija || 69 ||
[Analyze grammar]

iti śrīpādme mahāpurāṇe paṃcapaṃcāśatsāhasryāṃ saṃhiṃtāyāmuttarakhaṃḍe kāliṃdīmāhātmye saptādhikadviśatatamo'dhyāyaḥ || 207 ||
[Analyze grammar]