Chapter 202

[English text for this chapter is available]

devala uvāca |
śṛṇuṣva bho mahāprājña dilīpasya mahīpateḥ |
kathāṃ divyāṃ vicitrāṃ ca śṛṇutāṃ pāpanāśinīm || 1 ||
[Analyze grammar]

vaivasvatamanorvaṃśe dilīpo bhūbhujāṃ varaḥ |
āsītprācīnabarhistu svāyaṃbhuvamanoriva || 2 ||
[Analyze grammar]

sa tu dharmabhṛtāṃ śreṣṭho dharmeṇa pratipālayan |
mahīṃ mahīpatirlokānguṇairāddhairaraṃjayat || 3 ||
[Analyze grammar]

magadhādhipateḥ putrī mahiṣī tasya bhūpateḥ |
sudakṣaṇākhyayā khyātā śacīvāsīddivaspateḥ || 4 ||
[Analyze grammar]

gate mahati kāle tu mahiṣyāṃ nābhavatsutaḥ |
dadhyāviti nijasvāṃte sa samrāṭkośalādhipaḥ || 5 ||
[Analyze grammar]

ratnākarasumervādi nagaratnairvirājitam |
dhṛtaṃ bhūvalayaṃ doṣo bhūṣāyai nāprajasya me || 6 ||
[Analyze grammar]

vargatrayī yathākālaṃ sevitā na virodhitā |
tathāpi me'napatyasya na saukhyaṃ vidyate hṛdi || 7 ||
[Analyze grammar]

yajñairārādhito viṣṇuriṃdrādyāśca surottamāḥ |
dīrghikārāmakūpāśca kāritāḥ sarvato bhuvi || 8 ||
[Analyze grammar]

gobhūhiraṇyavāsobhiḥ ṣaḍrasānvitabhojanaiḥ |
viprā atithayaścaiva bhaktyā saṃtoṣitā mayā || 9 ||
[Analyze grammar]

vṛtyarthaṃ pṛthivīpālānuddhṛtya yudhi dharmataḥ |
dhanena mahatā kośo mayā hi bahulīkṛtaḥ || 10 ||
[Analyze grammar]

unmārgagāmino mattā nijadharmavilaṃghinaḥ |
vimukhaḥ pitṛdevebhyo daṃḍyāste daṃḍitā mayā || 11 ||
[Analyze grammar]

paṃcaparvasu vaiṣṇavyāṃ ravau pitrye ca karmaṇi |
daśamyaikādaśītithyorna strīsevā kṛtā mayā || 12 ||
[Analyze grammar]

ṛtukālāvadhau snātāṃ svastriyaṃ nāhamatyajam |
anṛtāvapi tadyogye kāle cetprārthitastayā || 13 ||
[Analyze grammar]

tadā tasyāṃ sakāminyāṃ sakāmaṃ ramitaṃ mayā |
evaṃ dharmārthakāmā me yathākālaṃ niṣevitāḥ || 14 ||
[Analyze grammar]

mahiṣyāṃ kena doṣeṇa jāyate me na saṃtatiḥ |
atītānāgatajñāno vasiṣṭho gurureva naḥ || 15 ||
[Analyze grammar]

kathayiṣyati taṃ doṣaṃ yanme putro na jāyate |
devala uvāca |
ityālocya sa bhūpālo gamiṣyannāśramaṃ guroḥ |
maṃtriṣvāropayāmāsa kośalāmṛddhikośalām || 16 ||
[Analyze grammar]

atha prajāsṛjaṃ devaṃ pūjayitvāśramaṃ guroḥ |
pratasthāte putrakāmau daṃpatī tau śubhe'hani || 17 ||
[Analyze grammar]

katicidvāsarairmārgamullaṃghyaikarathe sthitau |
tau daṃpatī guroḥ sāyamāśramaṃ prāpatuḥ śubham || 18 ||
[Analyze grammar]

vaiśvadevāṃta saṃprāptātithisatkārakṛnmunim |
hutāśanahutadravyaprasaraddhūmamālayā || 19 ||
[Analyze grammar]

pavitrayaṃtamātmasthānmunīnāgaṃtukānapi |
mṛgairdūrvāpratānaughaprapūrṇodaramaṃtharam || 20 ||
[Analyze grammar]

abhyāgacchadbhirabhito maṃḍapaṃ sa mṛgīgaṇaiḥ |
vāsavṛkṣamilatpakṣikulakolāhalākulam || 21 ||
[Analyze grammar]

parasparavinirmuktavairavyāghramṛgādikam |
japadhyānapararṣīṇāṃ kṣaṇaśrāṃtaśrutidhvanim || 22 ||
[Analyze grammar]

anadhyayanakālottha krīḍāraktakumārakam |
tasminvasiṣṭhamadrāṣṭāṃ daṃpatī tau kṛtakriyam || 23 ||
[Analyze grammar]

bṛsyāṃ niṣaṇamavyagramaruṃdhatyopasevitam |
sa vavaṃde guroḥ pādau mahiṣī sā ca tatstriyaḥ || 24 ||
[Analyze grammar]

āśiṣā gururapyenaṃ yuyojāruṃdhatī ca tām |
atithiṃ tamathābhyarcya madhuparkādibhirguruḥ || 25 ||
[Analyze grammar]

arhaṇairarhatāṃ śreṣṭho vasiṣṭha iti pṛṣṭavān |
vasiṣṭha uvāca |
bho bho bhūmibhṛtāṃ śreṣṭha rājye kuśalamasti te || 26 ||
[Analyze grammar]

kule ca kaccilloke ca nijadharmānuvarttini |
dharmeṇa pālitā kaccitvayā vīravasuṃdharā || 27 ||
[Analyze grammar]

saṃvarddhayati te kośaṃ dharmadhīriva sātvikī |
tava jānapadā rājanpaurāśca sthitimātmanaḥ || 28 ||
[Analyze grammar]

sāravaṃto vimuṃcaṃti kaccinnāṃbudhayo yathā |
snehena sāhacaryeṇa sahavāsatayā prabho || 29 ||
[Analyze grammar]

lakṣmīnārāyaṇāyete kaccitte puradaṃpatī |
kāmyavratāni rājeṃdra prajānāṃ nagare tava |
phalaṃti vāṃchitaṃ kacciddharicaṃdanavaddivi || 30 ||
[Analyze grammar]

devala uvāca |
pṛṣṭvaivaṃ sa muniśreṣṭho vasiṣṭho munipuṃgavaḥ |
yogaprabhāvopanatairnṛpaṃ bhojyairabhojayat || 31 ||
[Analyze grammar]

aruṃdhatīca tāṃ rājñīṃ bahvādarasamanvitā |
nānāvyaṃjanapakvānnairabhojayadudāradhīḥ || 32 ||
[Analyze grammar]

kṛtabhojanamāsīnaṃ svasthaḥ svasthaṃ munirnṛpam |
punaḥ papraccha saṃgṛhya pāṇinā pāṇimānatam || 33 ||
[Analyze grammar]

vasiṣṭha uvāca |
saptāṃga saṃyutaṃ rājyaṃ nijadharmarataprajam |
prītabaṃdhujanāmātyaṃ śastrāstravidhivadbhaṭam || 34 ||
[Analyze grammar]

vaśyamitraṃ hṛtāmitraṃ kṛṣṇārcāparamānasam |
yasyāsti nṛpate rājyaṃ svargarājyena tasya kim || 35 ||
[Analyze grammar]

ikṣvākuvaṃśarājānaḥ putrānutpādya dhārmikāḥ |
rājyaṃ ca teṣu vinyasya prapannāstapasi prabho || 36 ||
[Analyze grammar]

tvaṃ yuvā dṛṣṭaputrāsyo nādhikārī tapovidhau |
kimarthamāgato hyatra rājyaṃ tyaktvā tathāvidham || 37 ||
[Analyze grammar]

rājovāca |
brahmannāhaṃ tapaḥ kartumāgatastāvakāśrame |
svargakāmanayā tyaktvā rājyamatra tathāvidham || 38 ||
[Analyze grammar]

brahmansatyamidaṃ coktaṃ bhavatā yattapovanam |
rājyamāropya putreṣu prāptā ikṣvākuvaṃśajāḥ || 39 ||
[Analyze grammar]

na taistyaktaṃ mahīrājyamidaṃ svargagatairapi |
tanmūrtirasyāṃ vimanāstiṣṭhati hyeva saṃtatiḥ || 40 ||
[Analyze grammar]

yathā bālyaṃ gataṃ tāta yauvanaṃ ca samāgatam |
yāsyatyadopi ca tathā jarāpyeṣyati niścitam || 41 ||
[Analyze grammar]

jaraso'nataraṃ mṛtyuḥ puruṣasya na saṃśayaḥ |
mṛtyuṃgate mayi brahmanvinātanayasaṃbhavam || 42 ||
[Analyze grammar]

kasyedaṃ jagatīrājyaṃ bhaviṣyati guro vada |
tasmādapatyahīnasya rājye'pi mama tiṣṭhataḥ || 43 ||
[Analyze grammar]

mamatvaṃ vidyate nātra purastāttadabhāvataḥ |
vargatrayasya vai samyaksaṃvettā tvaṃ guro mama || 44 ||
[Analyze grammar]

kena doṣeṇa me putro jāyate na taponidhe |
dhyānena doṣamālokya taṃ guro kathayāśume || 45 ||
[Analyze grammar]

tasya pratikriyāṃ kuryāṃ śrutvā saṃtānalabdhaye |
devala uvāca |
ityākarṇya vasiṣṭhastu vacastasya mahīpateḥ || 46 ||
[Analyze grammar]

uvāca saṃtatistaṃbhahetuṃ vīkṣya samādhinā |
vasiṣṭha uvāca |
tvaṃ purā rājaśārdūla saṃsevya suranāyakam || 47 ||
[Analyze grammar]

snātāmimāṃ vadhūṃ smṛtvā calito nijamaṃdiram |
gacchatastvarayā tāta saṃtānotkaṃṭhitasya te || 48 ||
[Analyze grammar]

āsītsuratarormūle kāmedhanuḥ sthitā pathi |
utpāditā tvayā tasyāḥ pūjyāṃghrirajaso'tiruṭ || 49 ||
[Analyze grammar]

pradakṣiṇanamaskārasadācāramakurvatā |
sā'śapattvāmatikrodhātputro notpatsyate tava || 50 ||
[Analyze grammar]

mama saṃtānaśuśrūṣāṃ yāvattvaṃ na kariṣyasi |
gacchaṃstvamṛtudānāya tvarayā sutakāmukaḥ || 51 ||
[Analyze grammar]

tanmanā nāśrṛṇoḥ śāpaṃ nayaṃtākṣaninādataḥ |
tasyāḥ sutāsutāṃ dhenuṃ naṃdinīṃ sasutāṃ mama || 52 ||
[Analyze grammar]

ārādhayānayā vadhvā sārddhaṃ sā dāsyate sutam |
devala uvāca |
ityuktavati tatrarṣau vasiṣṭhe sā tu naṃdinī || 53 ||
[Analyze grammar]

tapovanātsamāyātā vatsasnehasnutastanī |
tāṃ dṛṣṭvā hṛṣṭahṛdayo vasiṣṭho munipuṃgavaḥ |
uvāca bhūpatiṃ bhūyo darśayitvā ca naṃdinīm || 54 ||
[Analyze grammar]

vasiṣṭha uvāca |
rājansamāgatā hyeṣā smṛtamātraśubhāhvayā |
ato viddhi samīpasthāṃ kāryasiddhimihātmanaḥ || 55 ||
[Analyze grammar]

ārādhitānugatyeyaṃ tvayāraṇye tathāśrame |
vadhvā prasādātte putraṃ dāsyate nātra saṃśayaḥ || 56 ||
[Analyze grammar]

yathānābhibhavedenāṃ jaṃtuḥ kaścidvanodbhavaḥ |
tathā cāraya rājeṃdra vane hiṃsro dhanurddhara || 57 ||
[Analyze grammar]

devala uvāca |
tatheti laghuvādine nṛpataye snuṣāyai ca sakṣapāśayanahetave saduṭajaṃ dadau tāpasaḥ |
sa tatra sahabhāryayā samadhiśayyadarbhāstṛtāṃ mahīmagamayanniśāṃ niyatamānaso viśpatiḥ || 58 ||
[Analyze grammar]

iti śrīpādme mahāpurāṇe paṃcapaṃcāśatsahasrasaṃhitāyāmuttarakhaṃḍe kāliṃdīmāhātmye dvyadhikadviśatatamodhyāyaḥ || 202 ||
[Analyze grammar]