Chapter 198

[English text for this chapter is available]

kumārā ūcuḥ |
atha te saṃpravakṣyāmaḥ saptāhaśravaṇe vidhim |
yena bhāgavataṃ siddhyetpuṃsāṃ kṛṣṇārpitātmanām || 1 ||
[Analyze grammar]

daivajñaṃ śāstrakuśalaṃ samāhūya dhanāṃśukaiḥ |
samabhyarcya muhūrtaṃ tu prākpṛcchedbhaktimānnaraḥ || 2 ||
[Analyze grammar]

sa vadedyaṃ muhūrtaṃ tu tatrāraṃbhaḥ praśasyate |
nabhonabhasyeṣorjāśca sahaḥ śucisamanvitāḥ || 3 ||
[Analyze grammar]

māsāḥ śreṣṭhāḥ kathāraṃbhe pūrṇā cāpi tithiḥ śubhā |
bhaumārkivarjitā vārā bhāni dhruva mṛdūni ca || 4 ||
[Analyze grammar]

śubhe yoge śubhe lagne prāraṃbhaḥ śasyate sadā |
nityāyāṃ ca kathāyāṃ tu purāṇānāṃ munīśvara || 5 ||
[Analyze grammar]

dvādaśīṃ varjayetprājñaḥ sūtasūtakasaṃbhavāt |
śrīmadbhāgavatasyāpi saptāhenaiva ke'pi ca || 6 ||
[Analyze grammar]

na niṣedhosti devarṣe prāhurevaṃ purāvidaḥ |
śrībhāgavatasaptāho mahāyajñaḥ smṛto budhaiḥ || 7 ||
[Analyze grammar]

ato nimaṃtraṇaṃ kāryaṃ vaiṣṇavānāṃ samaṃtataḥ |
satāṃ samājo bhavitā saptāhaṃ vaiṣṇavottamāḥ || 8 ||
[Analyze grammar]

āgaṃtavyamataścātra vaiṣṇavaiḥ śravaṇārthibhiḥ |
samāgatānāṃ teṣāṃ tu nivāsaṃ parikalpayet || 9 ||
[Analyze grammar]

tīrthe vāpi vane vāpi grāme vāpi prayatnataḥ |
saṃśodhitāyāṃ bhūmyāṃ tu maṃḍapaṃ parikalpayet || 10 ||
[Analyze grammar]

kadalīstaṃbhasaṃyuktaṃ caturdikṣu dhvajānvitam |
uccamāsanamapyuktaṃ vaktustasyāgrato mune || 11 ||
[Analyze grammar]

āpārśvadvayamuktāni śrotṝṇāmāsanāni ca |
udaṅmukho bhavedvaktā samājesminvidāṃvaraḥ || 12 ||
[Analyze grammar]

vedaśāstrārthatatvajño vaiṣṇavo brāhmaṇottamaḥ |
dṛṣṭāṃtakuśalo dhīro vaktā kāryo'tinispṛhaḥ || 13 ||
[Analyze grammar]

sarvasaṃdehaharttāpi kāryo vaktā na caiva hi |
vaktuḥ pārśve sahāyārthaṃ sthāpyo'nya paṃḍitaḥ sudhīḥ || 14 ||
[Analyze grammar]

śrotṝṇāṃ saṃśayacchettā jñānāṃbodhavidhāyakaḥ |
kathāvighnavighātārthaṃ gaṇeśaṃ prākprapūjayet || 15 ||
[Analyze grammar]

tato durgāṃ haraṃ viṣṇuṃ brahmāṇaṃ bhāskaraṃ dvijān |
saṃpūjya vidhivadbhaktyā tarpayeddevatāḥ pitṝn || 16 ||
[Analyze grammar]

mukhyaḥ śrotā tataḥ paścātpūjayetpustake harim |
tataḥ pradakṣiṇīkṛtya dravyavastraphalāni ca || 17 ||
[Analyze grammar]

dhṛtvāṃjalau pustakasthaṃ hariṃ saṃprārthayenmune |
tvaṃ bhāgavatalokesminsvayaṃ kṛṣṇo vyavasthitaḥ || 18 ||
[Analyze grammar]

samāśrito mayā nātha muktyarthaṃ bhavasāgare |
manoratho madīyo'yaṃ sarvathā saphalastvayā || 19 ||
[Analyze grammar]

nirvighnena prakartavyo dāso'haṃ tava keśava |
ityuccārya mune dravyaṃ pustakāgre samarpyatu || 20 ||
[Analyze grammar]

vaktāraṃ prārthayeccāpi namaskurvankṛtāṃjali |
śukarūpadvijaśreṣṭha sarvaśāstraviśārada || 21 ||
[Analyze grammar]

śrībhāgavatavyākhyānādajñānaṃ me vināśaya |
iti saṃprārthya vaktāraṃ varayetpaṃca vāḍavān || 22 ||
[Analyze grammar]

dvādaśākṣaramaṃtrasya japārthaṃ munisattama |
gītavādyavidhijñāṃśca saṃpūjyārthāṃśukādibhiḥ || 23 ||
[Analyze grammar]

sthāpayetkīrtanārthaṃ tu kathāṃte vidhivanmune |
yastu jāyā dhanāgāra putraciṃtāṃ vyudasya ca || 24 ||
[Analyze grammar]

śṛṇuyādekacittastu sa samagraṃ phalaṃ labhet |
sūryodayaṃ samārabhya sārddhatripraharāṃtakam || 25 ||
[Analyze grammar]

paṭhitvārthaḥ prakarttavyo vākyamadhyāyameva vā |
madhyāhne ghaṭikāyugmaṃ viramedapi nārada || 26 ||
[Analyze grammar]

kathā'vasāne karttavyaṃ kīrtanaṃ keśavasya ca |
upavāsaḥ prakarttavyaḥ śrotṛbhistatphalepsubhiḥ || 27 ||
[Analyze grammar]

tadaśakto haviṣyānnaṃ sakṛtsvalpaṃ samāharet |
jalenāpi phalenāpi dugdhena ca ghṛtena vā || 28 ||
[Analyze grammar]

kevalenaiva karttavyaṃ nirvighnaṃ dhāraṇaṃ tanoḥ |
saptāhavratināṃ puṃsāṃ niyamānśṛṇu nārada || 29 ||
[Analyze grammar]

viṣṇudīkṣāvihīnānāṃ nādhikāro'tra kīrtitaḥ |
brahmacaryamadhaḥ suptiḥ patrāvalyāṃ ca bhojanam || 30 ||
[Analyze grammar]

samācarennityameva saptāhe munisattama |
dvidalaṃ madhu tailaṃ ca parānnaṃ cekṣujaṃ rasam || 31 ||
[Analyze grammar]

bhāvaduṣṭaṃ kriyāduṣṭaṃ jahyātparyuṣitaṃ vratī |
palāṃḍulaśunaṃ hiṃguṃ mūlakaṃ gṛṃjanaṃ tathā || 32 ||
[Analyze grammar]

nālikāṃ caiva kūṣmāṃḍaṃ naro nādyātkathāvratī |
kāmaṃ krodhaṃ madaṃ lobhaṃ daṃbhaṃ mātsaryameva ca || 33 ||
[Analyze grammar]

mohaṃ dveṣaṃ tathā hiṃsāṃ naiva kuryātkathāvratī || 34 ||
[Analyze grammar]

vedavaiṣṇavaviprāṇāṃ guru govratināṃ tathā |
strī rājamahatāṃ cāpi niṃdāṃ jahyātkathāvratī || 35 ||
[Analyze grammar]

satyaṃ śaucaṃ dayāmaunamārjavaṃ vinayaṃ tathā |
manaḥ prasannatāṃ cāpi budhaḥ kuryātkathāvratī || 36 ||
[Analyze grammar]

śrīkāmastanayārthī ca jayakāmaśca mokṣadhīḥ |
śṛṇuyādvai bhāgavataṃ niṣkāmaḥ śrīhariṃ labhet || 37 ||
[Analyze grammar]

saptame divase kuryāllaṃghanaṃ tatsamāptike |
vaktuśca pūjā karttavyā gobhūsvargaṃ varādibhiḥ || 38 ||
[Analyze grammar]

prasāda tulasīṃ mālāṃ śrotṛbhyaḥ pratidāpayet |
utsavaśca tathā kāryo gītavādyaviśāradaiḥ || 39 ||
[Analyze grammar]

gītārthaṃ śṛṇuyāccāpi pare'hani vicakṣaṇaḥ |
pratiślokaṃ ca juhuyādgāyatryā vā yathāvidhi || 40 ||
[Analyze grammar]

pāyasaṃ madhusarpiśca tilāṃstaṃḍulakānyavān |
śarkarāṃ ca priyālaṃ ca drākṣāṃ vātāma kharjurau || 41 ||
[Analyze grammar]

aṃbhojāni ca karpūraṃ caṃdanāguruṇīpuram |
lavaṃgaṃ bilvapatrāṇi sahasraṃ ca pṛthakpṛthak || 42 ||
[Analyze grammar]

vighnasya ca vighātārthaṃ nyūnādhikyanivṛttaye |
ātmanaḥ pūtatārthaṃ ca paṭhennāmasahasrakam || 43 ||
[Analyze grammar]

dvādaśāṣṭādaśāthāpi śraddhayāhyadhikāṃstathā |
pāyasenāśayedviprānsvarṇaṃ dhenuśca dakṣiṇā || 44 ||
[Analyze grammar]

vratasiddhyarthamapyatra prauṣṭhapadyāmathāpi vā |
svarṇasiṃhaṃ vinirmāya tasya pṛṣṭhe nidhāya ca || 45 ||
[Analyze grammar]

śrīmadbhāgavataṃ vaktre lekhayitvā samarpayet |
evaṃ kṛte vidhāne tu sarvapāpanivāraṇam || 46 ||
[Analyze grammar]

bhavecchrotuḥ suphaladaṃ śrīmadbhāgavataṃ śrutam |
dharmakāmārthamokṣāṇāṃ sādhanaṃ bhaktidāyakam || 47 ||
[Analyze grammar]

na kāryaṃ vidyate loke yadanena na sidhyati |
tato bhāgavataṃ loke purāṇebhyo'dhikaṃ matam || 48 ||
[Analyze grammar]

doṣāṣṭādaśanirmukto vācakaḥ parikīrtitaḥ |
dvātriṃśadaparādhairhi mukto śrotā mato budhaiḥ || 49 ||
[Analyze grammar]

śrīmadbhāgavataṃ nāma purāṇaṃ kāmadaṃ nṛṇām |
tathāpi śravaṇaṃ cāsya niṣkāmasyaiva bhaktidam || 50 ||
[Analyze grammar]

śrīmadbhāgavatābhidhaḥ suratarustārāṃkuraḥ sajjaniḥ skaṃdhairdvādaśabhistataḥ pravilasadbhaktyālavālodayaḥ |
dvātriṃśattriśataṃ ca yasya vilasacchākhāḥ sahasrāṇyalaṃ parṇānyaṣṭadaśeṣṭadotisulabho varvarti sarvopari || 51 ||
[Analyze grammar]

iti te kathitaṃ sarvaṃ kṛtaṃ cāpi tavepsitam |
jñānavairāgyabhaktīnāṃ tāruṇyaṃ lokamokṣadam || 52 ||
[Analyze grammar]

sūta uvāca |
ityuktā te kumārāstu kṛṣṇāṃghrisudhayāplutāḥ |
viremurbhagavadbhaktā dīnoddharaṇatatparāḥ || 53 ||
[Analyze grammar]

tadvākyaṃ tu samākarṇya nārado bhagavatpriyaḥ |
premagadgadayā vācā tānuvāca kṛtāṃjaliḥ || 54 ||
[Analyze grammar]

nārada uvāca |
dhanyosmyanugṛhītosmi bhavadbhiḥ karuṇāparaiḥ |
yadbhāgavatasaptāhānnikaṭe darśito hariḥ || 55 ||
[Analyze grammar]

evaṃ bruvati vai tasminnārade vaiṣṇavottame |
paryaṭaṃstaṃ samāyātastatra yogeśvaraḥ śukaḥ || 56 ||
[Analyze grammar]

dviraṣṭavarṣākṛtiraṃbujākṣo vyāsātmajo jñānapayodhicaṃdraḥ |
kathāvasāne nijalābhatuṣṭo hṛdāniśaṃ bhāgavataṃ paṭhaṃśca || 57 ||
[Analyze grammar]

dṛṣṭvā sadasyāstamathorutejasaṃsadyaḥsamutthāya varāsanaṃ daduḥ |
sa copaviṣṭaḥ sukhamāsane yadā tadāvirāsīddharirabjalocanaḥ || 58 ||
[Analyze grammar]

bhavo bhavānyā kamalāsanaḥ sutaistatrāgataḥ kīrtanadarśanāya ca |
sureśamukhyāstridaśā vimānakaiḥ samāgatāstairabhavadvṛtaṃ nabhaḥ || 59 ||
[Analyze grammar]

prahlādastāladhārītaralagatitayā hyuddhavaḥ kāṃsyadhārī vīṇādhārī surarṣiḥ svarakuśalatayā rāgakartā'rjuno'bhūt |
iṃdro mārdaṃgiko'bhūjjayajaya suvacaḥ prāvadaṃste kumārāḥ sadbhāvasya pravaktā niratiśayaguṇovyāsaputro babhūva || 60 ||
[Analyze grammar]

nanartta madhye trikameva tatra jñānādikānāṃ navarūpayuktam |
alaukikaṃ kīrttanakaṃ samīkṣya prasannacetā harirityuvāca || 61 ||
[Analyze grammar]

matto varaṃ bhāgavatā vṛṇīdhvaṃ prītātkathākīrttanato bhṛśaṃ vaḥ |
śrutvātha tadvākyamatiprasannā premārdracittā harimūcire te || 62 ||
[Analyze grammar]

kumārā ūcuḥ |
saptāhayajñena vitāyatena sadyaḥ prasanno bhavitā murāre |
kalauyuge ghoratare narāṇāṃ svalpāyuṣāṃ vighnaśatākulānām || 63 ||
[Analyze grammar]

evaṃ varaṃ viśvavidhānapālanapraṇāśahetorbhavatokhilātmanaḥ |
vṛṇīmahe'nyo na manoratho vibho bhavatpadāṃbhojaniṣeviṇāṃ hi naḥ || 64 ||
[Analyze grammar]

evamastviti caivoktvā tatraivāṃtardadhe hariḥ |
nāradaḥ suprasannātmā kumārānabhyavādayat || 65 ||
[Analyze grammar]

tataste sanakādyāśca bhṛgvādyāśca śukādayaḥ |
prayayuḥ svāśramānhṛṣṭāḥ pītvā tacca kathāmṛtam || 66 ||
[Analyze grammar]

bhaktiḥ sutābhyāṃ sahitā nāradena pravartitā |
bhūmaṃḍale samaste'smistadā prabhṛti śaunaka || 67 ||
[Analyze grammar]

śiva uvāca |
ākhyānaṃ mahadākarṇya prītātmā śaunakaḥ priye |
paryapṛcchatpunaḥ sūtaṃ sarvasaṃdehabhaṃjanam || 68 ||
[Analyze grammar]

śaunaka uvāca |
śukenoktaṃ kadā rājñe gokarṇena kadā punaḥ |
surarṣaye kadā brāhmairetadākhyāhi mānada || 69 ||
[Analyze grammar]

sūta uvāca |
śrīkṛṣṇanirgamāttriṃśadvarṣāvadhigate kalau |
bhādraśuklanavamyāṃ vai kathāraṃbhaṃ śuko'karot || 70 ||
[Analyze grammar]

parīkṣicchravaṇāṃte tu gate varṣaśatadvaye |
śuciśuklanavamyāṃ tu gokarṇokathayatkathām || 71 ||
[Analyze grammar]

kalau sahasramabdānāmadhunā pragataṃ dvija |
parīkṣito janmakālātsamāptiṃ nīyatāṃ makhaḥ || 72 ||
[Analyze grammar]

īśvara uvāca |
iti śrutvā vacastasya śaunako munisattamaḥ |
pūrṇaṃ cakāra taṃ yajñaṃ sahasraparivatsaram || 73 ||
[Analyze grammar]

brāhmaṃ pādmaṃ vaiṣṇavaṃ ca kaurmyaṃ mātsyaṃ ca vāmanam |
vārāhaṃ brahmavaivarttanāradīyaṃ bhaviṣyakam || 74 ||
[Analyze grammar]

āgneyamarddhaṃ vai sūtācchuśruvurlomaharṣaṇāt |
etāni tu purāṇāni dvāparāṃte śrutāni hi || 75 ||
[Analyze grammar]

śaunakādyairmunivarairyajñāraṃbhātpuraiva hi |
yadā tu tīrthayātrāyāṃ valadevaḥ samāgataḥ || 76 ||
[Analyze grammar]

naimiṣaṃ miśrikaṃ nāma samāhūto munīśvaraiḥ |
tatra sūtaṃ samāsīnaṃ dṛṣṭvā tvadhyāsanopari || 77 ||
[Analyze grammar]

cukṣubhe bhagavānrāmaḥ parvaṇīva mahodadhiḥ |
āṣāḍhaśukladvādaśyāṃ pāraṇāhani pārvati || 78 ||
[Analyze grammar]

pūrvārddhayāmavelāyāṃ bhāvitvātkṛṣṇamāyayā |
mugdho darbhakaro rāmaḥ prāharallomaharṣaṇam || 79 ||
[Analyze grammar]

tato munigaṇāḥ sarve hāhākāraparāyaṇāḥ |
babhūvurnagajetyarthaṃ śokaduḥkhākulāṃtarāḥ || 80 ||
[Analyze grammar]

ūcuśca rāmaṃ lokeśaṃ vinayena kṣamāparāḥ |
ṛṣaya ūcuḥ |
rāmarāma mahābāho bhavatā lokakāriṇā || 81 ||
[Analyze grammar]

ajānatevācaritā hiṃsā brahmavadhādhikā |
vyāsaśiṣyo hyayaṃ sākṣātpurāṇarṣirmahātapāḥ || 82 ||
[Analyze grammar]

asmai hyadhyāsanaṃ dattamasmābhiryajñakarmaṇi |
aṣṭādaśapurāṇānāṃ vācakāya kṛtakṣaṇaiḥ || 83 ||
[Analyze grammar]

kathāyāṃ jagadīśasya dīrghamāyuśca mānada |
tadbhavāṃllokarakṣārthaṃ dharmasetupravartakaḥ || 84 ||
[Analyze grammar]

āvirbhūto jagannātho nigrahānugrahakṣamaḥ |
ityuktvā munayaste tu baladevāgrataḥ priye || 85 ||
[Analyze grammar]

tūṣṇīṃ babhūvuḥ sahasā smaraṃto niyaterbalam |
tataḥ provāca bhagavānrāmaḥ śatruniṣūdanaḥ || 86 ||
[Analyze grammar]

viprānsaṃprīṇayaṃstāṃstu lokavedapathānugaḥ |
śrīrāma uvāca |
viprāḥ śṛṇuta bhadraṃ vaḥ kopaṃ tyaktvā sudūrataḥ || 87 ||
[Analyze grammar]

yadahaṃ vedmi bhavatāmabhīṣṭaṃ kāryasiddhidam |
asya putro mahājñānī bhaviṣyati varānmama || 88 ||
[Analyze grammar]

bhavatāmīpsitaṃ sarvaṃ śāstraṃ vai kathayiṣyati |
yadarthamahamāhūtastacca kāryyaṃ samucyatām || 89 ||
[Analyze grammar]

īśvara uvāca |
iti śrutvā vacaste tu rāmasya sumahātmanaḥ |
balvalasya vadhārthāya prerayāmāsurīśvaram || 90 ||
[Analyze grammar]

tataḥ sa balvalaṃ hatvā prasādya munipuṃgavān |
praṇipatyābhyanujñātastīrthayātrāmupāgamat || 91 ||
[Analyze grammar]

tīrthayātrāṃ gate rāme śaunakādyā munīśvarāḥ |
laumaharṣaṇimāhūya satkṛtya naganaṃdini || 92 ||
[Analyze grammar]

tatpade sthāpayāmāsuḥ śeṣaṃ saṃkīrtanāya vai |
āgneyottaramāhātmyaṃ śrīmadbhāgavatāṃtakam || 93 ||
[Analyze grammar]

purāṇasaptakaṃ sārddhaṃ śuśruvurhṛṣṭamānasāḥ |
daśasaptapurāṇāni kṛtvā satyavatīsutaḥ || 94 ||
[Analyze grammar]

nāptavānmanasastoṣaṃ bhāratenāpi bhāmini |
jñātvāsya hṛdayaṃ khinnaṃ nārado devadarśanaḥ || 95 ||
[Analyze grammar]

samājagāma bhagavānvyāsasyāśramamuttamam |
taṃ dṛṣṭvā vāsavīsūnuḥ satkṛtyāsanapūrvakam || 96 ||
[Analyze grammar]

nāradaṃ pūjayāmāsa vidhidṛṣṭenakarmaṇā |
atha taṃ nāradaḥ prāha kiṃ bhavānkliṣṭamānasaḥ || 97 ||
[Analyze grammar]

dhyāyate tatsamācakṣva sarvaṃ saṃdehakāraṇam |
iti pṛṣṭaḥ sa muninā parāśara suto'bravīt || 98 ||
[Analyze grammar]

brahmankiṃ kāraṇaṃ ceto mohe jāne na tattvaham |
bhavānvijñānakuśalo jñātvā tatprabravītu me || 99 ||
[Analyze grammar]

evaṃ vijñāpitastena nārado'dhyātmakovidaḥ |
uvāca paramaṃ tatvaṃ yaduktaṃ vidhinātmane || 100 ||
[Analyze grammar]

nārada uvāca |
śṛṇu pārāśare mattaḥ kāraṇaṃ yena vai tava |
asaṃpannaṃ mano bhāti śāstrayonerapi prabhoḥ || 101 ||
[Analyze grammar]

tvayāvatīrya lokesminvedā vyastā vibhāgaśaḥ |
kṛtāni ca purāṇāni setihāsāni cānagha || 102 ||
[Analyze grammar]

yatra sarvastrayī dharmo varṇāśramanivāsinām |
nirdiṣṭo vīkṣya kālena nṛṇāmalpāyuṣāṃ kalau || 103 ||
[Analyze grammar]

yatrādhikāraḥ sarveṣāṃ dṛśyate śravaṇādiṣu |
strī śūdra dvijabaṃdhūnāṃ sādhūnāṃ sādhusaṃgamaḥ || 104 ||
[Analyze grammar]

dharmādayo yathāśaśvadvarṇitāsteṣu vai tvayā |
prādhānyena tathā naiva varṇito mahimā hareḥ |
sarvadharmakriyāśūnye kalau doṣanidhau mune || 105 ||
[Analyze grammar]

na gatiḥ pāpakartṝṇāṃ vinā kṛṣṇakathā'mṛtam |
eṣa eva guṇo hyasminghore kaliyuge narāḥ || 106 ||
[Analyze grammar]

yatkṛṣṇakīrtanenaiva mucyaṃte karmabaṃdhanāt |
yajño dānaṃ tapaḥ karma jñānaṃ dhyānaṃ kṛtādiṣu || 107 ||
[Analyze grammar]

siddhidaṃ ca tathā brahmannāmakīrttanakaṃ kalau |
ato vai kalijātānāmuddhārārthaṃ nṛṇāṃ bhavān || 108 ||
[Analyze grammar]

śrīmadbhāgavataṃ nāma purāṇaṃ varṇayatvalam |
yena pravartitenāṃga bhavato mānasaṃ dhruvam || 109 ||
[Analyze grammar]

toṣameṣyati lokāśca prāpsyaṃti kṛtakṛtyatām || 110 ||
[Analyze grammar]

īśvara uvāca |
evamādiśya sa munirvyāsāyāmitatejase |
yayau yādṛcchikaḥ śaśvadgāyanhariguṇānpriye || 111 ||
[Analyze grammar]

nārade tu gate paścādvyāsaḥ sarvārthadarśanaḥ |
cakāra saṃhitāmetāṃ śrīmadbhāvatīṃ parām || 112 ||
[Analyze grammar]

pailādīṃścaturo vedānadhyāpya vidhipūrvakam |
purāṇasaṃhitāḥ sarvāḥ sūtāya pratyapādayat || 113 ||
[Analyze grammar]

śrīmadbhāgavataṃ nāma purāṇaṃ brahmasaṃmitam |
śukamadhyāpayāmāsa virataṃ lokavedataḥ || 114 ||
[Analyze grammar]

sā saṃhitā bhāgavatī lomaharṣaṇasūnunā |
śrutā kathayato rājñe auttareyāya vai śukāt || 115 ||
[Analyze grammar]

śaunakādiṛṣibhyastu tena proktā yathārthataḥ |
varīvartti purāṇānāmuparīyaṃ nagātmane || 116 ||
[Analyze grammar]

asyāṃ saṃlagnacittānāṃ nṛṇāmanyatra no ratiḥ |
jāyate mānase kṛṣṇo naṃdasūnuścakāsti ca || 117 ||
[Analyze grammar]

yattu pṛṣṭaṃ tvayā bhadre lokanistārahetave |
śrībhāgavatamāhātmyaṃ mahyaṃ saṃkīrttayeti ha || 118 ||
[Analyze grammar]

tatsarvaṃ ca mayā tubhyaṃ nirdiṣṭaṃ gaṇapāṃbike |
nānetihāsasahitaṃ bhaktimuktipradāyakam || 119 ||
[Analyze grammar]

yaḥ śṛṇoti naro bhaktyā māhātmyaṃ paṭhate'pi ca |
anumodanena vā sopi labhate paramāṃ gatim || 120 ||
[Analyze grammar]

dvijo'dhītyāpnuyādvedānkṣatriyastu labhejjayam |
dhanaṃ vaiśyastathāśūdraḥ śrutvaiva labhate gatim || 121 ||
[Analyze grammar]