Chapter 196

[English text for this chapter is available]

sūta uvāca |
atha vaiṣṇavacitteṣu dṛṣṭvā bhaktimalaukikīm |
nijalokaṃ parityajya bhuvamabhyagamaddhariḥ || 1 ||
[Analyze grammar]

vanamālī ghanaśyāmaḥ pītavāsāḥ kirīṭadhṛk |
kāṃcīkalāpaparyasto lasanmakarakuṃḍalaḥ || 2 ||
[Analyze grammar]

tribhaṃgalalitaścāru kaustubhena virājitaḥ |
koṭimanmatha lāvaṇyo haricaṃdana carcitaḥ || 3 ||
[Analyze grammar]

paramānaṃda cinmūrtirmadhuro muralīdharaḥ |
āviveśa svabhaktānāṃ hṛdayānyamalāni ca || 4 ||
[Analyze grammar]

vaikuṃṭhavāsino ye ca vaiṣṇavāḥ śāṃtamānasāḥ |
gūḍharūpāḥ samāyātāḥ śravaṇāya hareḥ kathāḥ || 5 ||
[Analyze grammar]

tadā jayajayetyuccaiḥ śabdo'bhūtkaṃbuśabdayuk |
yenāmaṃgalamatyugraṃ kalijaṃ pralayaṃ gatam || 6 ||
[Analyze grammar]

tatrasthānāṃ janānāṃ ca dṛṣṭvā gehātmavismṛtim |
nārado'dhyātmatatvajñaḥ kumārānpratyuvāca ha || 7 ||
[Analyze grammar]

nārada uvāca |
alaukiko'yaṃ mahimā munīśvarāḥ saptāhajanyodya vilokito mayā || 8 ||
[Analyze grammar]

mūḍhāḥ śaṭhā ye paśupakṣiṇo'pi tepi prayāṃtyeva gatiṃ parākhyāt |
ato nṛlokena tu śāstramanyaccittasya śudhyai vihitaṃ pavitram || 9 ||
[Analyze grammar]

aghaughavidhvaṃsi kṛtārthatāvahaṃ kalau yuge doṣanidhau kumārāḥ |
ke kena śudhyaṃti vadaṃtu mahyaṃ saptāhayajñena kathāmayena || 10 ||
[Analyze grammar]

kṛpālubhirlokahitobhavadbhiḥ prakāśitaṃ ko'pi navīnamārgaḥ |
kumārā ūcuḥ |
ye mānavāḥ pāpakṛtaḥ suduṣṭāḥ sadā durācāraratāḥ samatsarāḥ || 11 ||
[Analyze grammar]

krodhāgnidagdhāḥ kuṭilāśca kāminaḥ saptāhayajñena hariṃ vrajaṃti te || 12 ||
[Analyze grammar]

satyena hīnāḥ pitṛmātṛdūṣakāstṛṣṇākulāścāśramavarṇabāhyāḥ |
ye dāṃbhikā jīvavihiṃsakāśca saptāhayajñena hariṃ vrajaṃti te || 13 ||
[Analyze grammar]

paṃcograpāpāścchalakāriṇaśca krūrāḥ piśācā iva nirdayāśca |
brahmasvapuṣṭā vyabhicāriṇaśca saptāhayajñena hariṃ vrajaṃti te || 14 ||
[Analyze grammar]

kāyena vācā manasāpi pātakaṃ nityaṃ prakurvaṃti śaṭhā haṭhena ye |
nīcāḥ kṛtaghnā malinā durāśayāḥ saptāhayajñena hariṃ vrajaṃti te || 15 ||
[Analyze grammar]

sūta uvāca |
athaivaṃ tuṣṭacitte'tha nārade devapūjite |
prasannāste kumārāśca punarūcuśca nāradam || 16 ||
[Analyze grammar]

kumārā ūcuḥ |
atra te kīrtayiṣyāma itihāsaṃ purātanam |
yasya śravaṇamātreṇa pāpahāniḥ prajāyate || 17 ||
[Analyze grammar]

tuṃgabhadrā taṭe pūrvaṃ pattane kohalābhidhe |
varṇāśramācārayute dhanadhānyasamākule || 18 ||
[Analyze grammar]

ātmadeva iti khyātastatrāsīddivajasattamaḥ |
vedavidyāvidhiprājño nityakarmaparāyaṇaḥ || 19 ||
[Analyze grammar]

tatpriyā dhuṃdhulī nāma nityaṃ svīyahite ratā |
svavākyasthāpanācāpi suṃdarī sukulodbhavā || 20 ||
[Analyze grammar]

pūrvakarmavipākena prāyaśo bahujalpinī |
śūrā ca gṛhakṛtyeṣu krūrā ca kalahapriyā || 21 ||
[Analyze grammar]

evaṃ nivasatostatra daṃpatyornirapatyayoḥ |
vyatikrāṃtaṃ vayaścāpi paṃcāśadvarṣasaṃmitam || 22 ||
[Analyze grammar]

atha tau duḥkhitau jātau nirapatyau gṛhesthitau |
saṃtānotpattaye tābhyāṃ dattaṃ cāpi dhanādikam || 23 ||
[Analyze grammar]

gobhūhiraṇyavāsāṃsi dattānyapi bahūni ca |
na putro nāpi duhitā jāyate pūrvakarmaṇā || 24 ||
[Analyze grammar]

sa caikadā tu nirviṇṇa ātmadevo dvijottamaḥ |
gṛhaṃ tyaktvā gato'raṇyamānapatyena duḥkhitaḥ || 25 ||
[Analyze grammar]

yatra tatra bhramanbhrāṃto duḥkhākulitamānasaḥ |
kṣutkṣāmastṛṭparītaśca daivātprāpto jalāśayam || 26 ||
[Analyze grammar]

jalaṃ pītvā tatastasmiṃstaḍāge sa dvijottamaḥ |
vṛkṣacchāyāṃ samāśritya niṣaṇṇastatra nārada || 27 ||
[Analyze grammar]

atha tatra tadaivāgātkaścitsiddho bhramanmahīm |
jalaṃ pītvā taḍāge tu so'pi tatraiva cāgataḥ || 28 ||
[Analyze grammar]

taṃ dṛṣṭvā nyāsinaṃ śāṃtamātmadeva udāradhīḥ |
satkṛtyotthāya tatpādau jagrāha svaguroriva || 29 ||
[Analyze grammar]

upaviṣṭau tatastau dvau kṛtapraśnau parasparam |
susnigdhamānasau bhūtvā guruśiṣyāvivāśrame || 30 ||
[Analyze grammar]

atha taṃ sa yatirdṛṣṭvā śvasaṃtaṃ duḥkhitāṃtaram |
papraccha karuṇāsiṃdhurātmadevaṃ puraḥ sthitam || 31 ||
[Analyze grammar]

siddha uvāca |
kā te ciṃtā dvijaśreṣṭha duḥkhāya hṛdi vartate |
tāṃ samācakṣva dharmajña paritāpapradāyinīm || 32 ||
[Analyze grammar]

tacchrutvā vacanaṃ tasya siddhasya sumahātmanaḥ |
ātmadeva uvācātha svasya duḥkhasya kāraṇam || 33 ||
[Analyze grammar]

ātmadeva uvāca |
kiṃ bravīmi mune duḥkhaṃ saṃcitaṃ pūrvakarmaṇā |
madīyāḥ pūrvajāstoyaṃ kavoṣṇamupabhuṃjate || 34 ||
[Analyze grammar]

maddattaṃ naiva gṛhṇaṃti pitaro devatā balim |
tena duḥkhena nirviṇṇaḥ prāṇāṃstyaktumihāgataḥ || 35 ||
[Analyze grammar]

dhigjīvitaṃ prajāhīnaṃ gṛhaṃ caiva dhanaṃ kulam |
pālyate yā mayā dhenuḥ sā'pi vaṃdhyātvameti ha || 36 ||
[Analyze grammar]

yo mayāropito vṛkṣaḥ sopi vaṃdhyatvamāgataḥ |
nirbhāgyasyānapatyasya kimato jīvitena me || 37 ||
[Analyze grammar]

kumārā ūcuḥ |
ityuktvā sa rurodoccaistatpuro duḥkhapīḍitaḥ |
yadā tadā yateścitte karuṇābhūdgarīyasī || 38 ||
[Analyze grammar]

lalāṭākṣaramālāṃ ca dṛṣṭvā jñātvā sa yogavān |
ātmadevaṃ dvijaṃ prājñaḥ punarūce savistaram || 39 ||
[Analyze grammar]

siddha uvāca |
śṛṇu vipra mayā te'dya prārabdhamavalokitam |
saptajanmāvadhi prāptiḥ putrasya na ca dṛśyate || 40 ||
[Analyze grammar]

muṃcāgrahaṃ prajāhetorbaliṣṭhā karmaṇo gatiḥ |
vivekaṃ tu samāsādya sukhī bhava mahāmate || 41 ||
[Analyze grammar]

evamuktaṃ samākarṇya siddhasya dvijasattamaḥ |
prajāśābaddhacittastu siddhaṃ prāhātiduḥkhitaḥ || 42 ||
[Analyze grammar]

vipra uvāca |
vivekena bhavetkiṃ me putraṃ dehi balādapi |
no cettyajāmyahaṃ prāṇāṃstvadagre śokamūrcchitaḥ || 43 ||
[Analyze grammar]

iti viprāgrahaṃ dṛṣṭvā prābravītsa tapodhanaḥ |
saṃtateḥ sagaro duḥkhamavāpāṃgaḥ prajāpatiḥ || 44 ||
[Analyze grammar]

citraketurgataḥ kaṣṭaṃ vidhilekhavimārjjanāt |
atastvamapi dharmajña yadi putraṃ labherapi || 45 ||
[Analyze grammar]

sutena na sukhībhūyāḥ daivaṃ hi balavattaram |
ityuktvā dvijavaryāya sa siddhaḥ sādhusaṃmataḥ || 46 ||
[Analyze grammar]

dadāvekaṃ phalaṃ tasmai prāgraheṇa sutārthine |
idaṃ phalaṃ mayā tubhyaṃ dattaṃ putrāptaye dvija || 47 ||
[Analyze grammar]

bhāryāyai dehi putraste bhaviṣyati na saṃśayaḥ |
satyaṃ śaucaṃ dayā dānamekabhaktaṃ tu bhojanam || 48 ||
[Analyze grammar]

varṣāvadhi striyā kāryaṃ tena śuddho bhavetsutaḥ |
evamuktvā yayau yogī vipraḥ svagṛhamāgataḥ || 49 ||
[Analyze grammar]

dattvā patnyai phalaṃ tattu siddhoktamavadacca ha |
atha sā dhuṃdhulī krūrā svavākyasthāpanotsukā || 50 ||
[Analyze grammar]

svasakhyai prāha tatsarvaṃ patyoktaṃ siddhabhāṣitam |
yadyahaṃ bhakṣaye cedaṃ phalaṃ siddhena cārpitam || 51 ||
[Analyze grammar]

garbho mama bhavettarhi kathaṃ cāhaṃ sahāmyaham |
svalpaṃ bhakṣyamaśaktiśca gamane gṛhakarmaṇi || 52 ||
[Analyze grammar]

tiryakcedāgato garbho tadā me maraṇaṃ bhavet |
prasūtau dāruṇaṃ duḥkhaṃ sukumārī kathaṃ sahe |
maṃdayāṃ mayi sarvasvaṃ nanāṃdā saṃharetsadā || 53 ||
[Analyze grammar]

ciṃtā me samanuprāptā kiṃ karomi śucismite |
sā tadvacanamākarṇya snehabhaṃgabhayāddivaja || 54 ||
[Analyze grammar]

evameveti tāṃ prāha prītyā prahasitānanā |
evaṃ kutarkayogena tatphalaṃ naiva bhakṣitam || 55 ||
[Analyze grammar]

patyā pṛṣṭe phalaṃ bhuktaṃ bhuktaṃ ceti tayeritam |
ekadā bhaginī tasyāḥ svecchayā tadgṛhaṃ gatā || 56 ||
[Analyze grammar]

tadagre kathitaṃ sarvaṃ ciṃteyaṃ mahatī hi me |
kiṃ karomi sagarbho'haṃ tvaṃ prabrūhi yathātatham || 57 ||
[Analyze grammar]

sābravīnmama garbhosti tubhyaṃ dāsye prasūtitaḥ |
tāvatkālaṃ sagarbheva guptā tiṣṭha gṛhe sukham || 58 ||
[Analyze grammar]

taṃ bālaṃ poṣayiṣyāmi tvadgṛhe caiva nityadā |
phalaṃ dhenoḥ prayacchādya parīkṣārthaṃ śubhānane || 59 ||
[Analyze grammar]

ityuktvā sā yayau gehamātmano hṛṣṭamānasā |
dhuṃdhulyāpi yathoddiṣṭaṃ tadbhaginyā tathā kṛtam || 60 ||
[Analyze grammar]

atha prasūya sā bālaṃ dhuṃdhulyai cārpayaddrutam |
tayā ca kathitaṃ bhartre prasūtaḥ sukhamarbhakaḥ || 61 ||
[Analyze grammar]

lokasya sukhamutpannamātmadeva prajodayāt |
dattvā dānaṃ dvijāgrebhyo jātakarma cakāra ca || 62 ||
[Analyze grammar]

gītavāditranirghoṣo gṛhe tasyātimaṅgalam |
babhūva harṣamāpanna ātmadevo mahāmatiḥ || 63 ||
[Analyze grammar]

atha sā prāha bharttāraṃ dugdhaṃ mestanayornahi |
pālayiṣye kathaṃ bālaṃ sadyaḥ sūtaṃ prabho'dhunā || 64 ||
[Analyze grammar]

matsvasuśca prasūtāyā mṛto bālaḥ purābhavat |
tāmānīya gṛhe rakṣasārbhakaṃ poṣayiṣyati || 65 ||
[Analyze grammar]

iti śrutvā vacastasyā dhuṃdhulyā dvijasattamaḥ |
tathaiva kṛtavānbhrāṃtarātmadevo mudānvitaḥ || 66 ||
[Analyze grammar]

dhuṃdhukārīti nāmāsya kṛtaṃ mātrā yathārthataḥ |
stanyena poṣamāpnoti nityaṃ mātṛṣvasuḥ sutaḥ || 67 ||
[Analyze grammar]

trimāse nirgate cātha sā dhenuḥ suṣuve'rbhakam |
sarvāṃgasuṃdaraṃ divyaṃ nirmalaṃ kanakaprabham || 68 ||
[Analyze grammar]

dṛṣṭvā prasannastaṃ vipraḥ saṃskārānsvayamādadhe |
taṃ didṛkṣava āyātā janāḥ sarve'tivismitāḥ || 69 ||
[Analyze grammar]

ātmadevasya viprasya mahābhāgyodayena ca |
dhenvā bālaḥ prasūtaśca devarūpo'tikautukam || 70 ||
[Analyze grammar]

na jñātaṃ tadrahasyaṃ tu kenāpi vidhiyogataḥ |
gokarṇaḥ taṃ sutaṃ dṛṣṭvā gokarṇetyevacābhyadhāt || 71 ||
[Analyze grammar]

kiyatkālena saṃprāptau tāruṇyaṃ tāvubhāvapi |
gokarṇaḥ paṃḍito jñānī dhuṃdhukārī mahākhalaḥ || 72 ||
[Analyze grammar]

snānaśaucakriyāhīno bhakṣyābhakṣī krudhāplutaḥ |
cauraḥ sarvajanadveṣī duṣṭacāṃḍālasaṃgataḥ || 73 ||
[Analyze grammar]

krīḍato hyarbhakāndhṛtvā balātkūpe nipātayet |
evaṃ veśyāprasaṃgenānayaddravyaṃ kṣayaṃ pituḥ || 74 ||
[Analyze grammar]

pitā kṛpaṇavattasya śucā niḥsvo ruroda ha |
anapatyaḥ sukhī nityaṃ kuputro duḥkhadāyakaḥ || 75 ||
[Analyze grammar]

siddhenoktaṃ vacaḥ satyamanubhūtaṃ mayādhunā |
kva gacchāmi kva tiṣṭhāmi ko me duḥkhaṃ nivārayet || 76 ||
[Analyze grammar]

prāṇāṃstyakṣye jale vahnau bhṛgorvāpi pate hyaham |
ityevaṃ ciṃtayānaṃ tamadhomukhamupāgataḥ || 77 ||
[Analyze grammar]

gokarṇo janakaṃ jñānī bodhayāmāsa tatvataḥ |
gokarṇa uvāca |
asārastāta saṃsāra duḥkhamohaprado nṛṇām || 78 ||
[Analyze grammar]

kaḥ suta kiṃ dhanaṃ kasya kā jāyā kaḥ patiḥ pitaḥ |
mohena baddho dīnātmā lokaḥ kliśyati nānyathā || 79 ||
[Analyze grammar]

na ceṃdrasya sukhaṃ kiṃcinna sukhaṃ cakravartinaḥ |
viraktasya sukhaṃ tāta munerekāṃtaśīlinaḥ || 80 ||
[Analyze grammar]

muṃcājñānaṃ prajārūpaṃ mohaṃ narakakāraṇam |
nirdvaṃdvo nirabhīmāno vraja tyaktvākhilaṃ vanam || 81 ||
[Analyze grammar]

tatastadvākyamākarṇya gokarṇaṃ sa dvijo'bravīt |
dvija uvāca |
yatkarttavyaṃ vane sādho tanmamācakṣva vistarāt || 82 ||
[Analyze grammar]

mohapāśanibaddhaṃ hi śaṭhaṃ kṛpaṇamānasam |
saṃsāragarte patitaṃ māmuddhara dayānidhe || 83 ||
[Analyze grammar]

pituritthaṃ vacaḥ śrutvā gokarṇo jñānapaṃḍitaḥ |
uvāca dīnaṃ nirviṇṇaṃ pitaraṃ hṛṣṭamānasaḥ || 84 ||
[Analyze grammar]

gokarṇa uvāca |
māṃsāsthiraktanikare svaśarīrake'sminsvatvaṃ tyajāśu mamatāṃ vanitā sutādau |
paśyāniśaṃ jagadidaṃ kṣaṇabhaṃganiṣṭhaṃ jñānī virāgarasiko bhava bhaktiniṣṭhaḥ || 85 ||
[Analyze grammar]

dharmaṃ bhajasva satataṃ tyaja lokadharmānsaṃsevya sādhupuruṣānjahi kāmatṛṣṇām |
anyasya doṣaguṇa ciṃtanamāśu muktvā viṣṇoḥ kathārasamatho nitarāṃ piba tvam || 86 ||
[Analyze grammar]

kumārā ucuḥ |
evaṃ sutoktaviditānubhavo nirīhastyaktvā gṛhaṃ sthiramatirgataṣaṣṭivarṣaḥ |
nityaṃ haripriyajanānugato mahātmā duṣprāpamāpa ca padaṃ sa harervanasthaḥ || 87 ||
[Analyze grammar]