Chapter 188

[English text for this chapter is available]

īśvara uvāca |
ataḥ paraṃ pravakṣyāmi bhavāni bhavamuktaye |
gītācaturdaśādhyāyamavadhāraya susmite || 1 ||
[Analyze grammar]

medinyāṃ yatkilasthūlamasti kāśmīramaṃḍalam |
rājadhānī sarasvatyā āste caiva manoharā || 2 ||
[Analyze grammar]

yāmadhiṣṭhāya vāgdevī brahmalokaṃ prayacchati |
haṃsamāruhyamānāpi sāvitrīprahatairapi || 3 ||
[Analyze grammar]

sarasvatīpadāṃbhoja sevāmāśritya kuṃkumaiḥ |
yatra gauravayaṃtyāśā haṃsapakṣapuṭodbhavaiḥ || 4 ||
[Analyze grammar]

niraṃtaraṃ tayā caiva nṛṇāṃ saṃskṛtabhāṣiṇām |
suparvāṇamayī bhāṣā nimeṣeṇopalabhyate || 5 ||
[Analyze grammar]

prātargṛhāṃgaṇodbhūtai ryatrakuṃkumapāṃsulaiḥ |
sarvatoruṇitacchāya śaśāṃkaravimaṃḍalam || 6 ||
[Analyze grammar]

tatrāsīttejasāṃ rāśiḥ śauryavarmā nareśvaraḥ |
udyadujjvalabāṇaugha khaṃḍitārātimaṃḍalaḥ || 7 ||
[Analyze grammar]

abhūcca siṃhaladvīpe rājā siṃhaparākramaḥ |
nāmnā vikramavetālaḥ kalānāmapi śevadhiḥ || 8 ||
[Analyze grammar]

ubhau parasparaṃ maitrīṃ varddhayāṃcakratuḥ kramāt |
tattaddeśasamutpannairapūrvaiḥ pracurotkaraiḥ || 9 ||
[Analyze grammar]

ekadā prahitaṃ premṇā prabhūtaṃ śauryavarmaṇā |
rājā vikramavetālo vilokya śunakīdvayam || 10 ||
[Analyze grammar]

mattamātaṃgaturaga maṇibhūṣaṇacāmaram |
preṣayāmāsa mitrāya prabhūtaṃ śauryavarmaṇe || 11 ||
[Analyze grammar]

ekadā śibikārūḍhaścāru cāmaravījitaḥ |
suvarṇaśṛṃkhalārūḍhaṃ vādyaḍiṃḍimaḍaṃbaram || 12 ||
[Analyze grammar]

śunīyugalamādāya mṛgayā kautukotsukaḥ |
rājā jagāma bāhyālīṃ samaṃ rājakumārakaiḥ || 13 ||
[Analyze grammar]

paṇabaṃdhavidhānena samupetaṃ śaśāmiṣam |
tatra rājakumārāṇāṃ mahānkolāhalo'bhavat || 14 ||
[Analyze grammar]

tataḥ samānavayasā kenacidrājasūnunā |
bahumūlyaṃ paṇaṃ kṛtvā rājācikrīḍakautukī || 15 ||
[Analyze grammar]

tatovatārya dolāyā virudāvaligarvitām |
dhāvataḥ śaśakasyoccaiḥ pṛṣṭhe muṃcannṛpaṃ śunīm || 16 ||
[Analyze grammar]

mumoca rājaputro'pi premapātraṃ mahābhujaḥ |
virarāma śunīmuccaiḥ saṃkīrtya virudāvalīm || 17 ||
[Analyze grammar]

alakṣyamāṇavege'sminśunīyugalakebhṛśam |
dhāvatyutthitamevāsītpaśyatāṃ sarvabhūbhṛtām || 18 ||
[Analyze grammar]

papāta garte mahati śaśako'tiśramādasau |
patito'pi śunī vaśyo nābhavacchaśaśāvakaḥ || 19 ||
[Analyze grammar]

tataḥ śanaiḥ samutthāya dhāvannākramyaroṣataḥ |
jagṛhe rājaśunyā'sau śaśakaḥ phenamudvaman || 20 ||
[Analyze grammar]

tataḥ kathaṃciduplutya gacchanviskhalayañchaśaḥ |
rājaputraśunakyāsau gṛhītaḥ kaṃdharātaṭe || 21 ||
[Analyze grammar]

jitamasmābhiratyarthamiti saṃjalpatāṃ nṛṇām |
kolāhale śaṃkitāyā śunyā nirgatavānmukhāt || 22 ||
[Analyze grammar]

tato daṃṣṭrāvraṇaśreṇī kṣaradrudhiradhārakaḥ |
kvāpi rmamarabhūbhāge nilīyasthitavāñchaśaḥ || 23 ||
[Analyze grammar]

jighraṃtyā rājaśunyā'sau bhūbhāgaṃ dhanaroṣayā |
dṛṣṭamātraḥ paritrasto hastamātraṃ tato'gamat || 24 ||
[Analyze grammar]

yatra karpūrakadalī kroḍavyāghradarītalaḥ |
colī kapolaphalakāncubanvāti samīraṇaḥ || 25 ||
[Analyze grammar]

udbhinna ketakīkośarajomukulitekṣaṇaḥ |
visrabdhāharaṇā yatracchāyāṃ tāṃ paritanvataḥ || 26 ||
[Analyze grammar]

nārikelaphalairyatra svayaṃ nipatitairadhaḥ |
api cūtaphalaistṛptāḥ pakvaiḥ śākhāmṛgā api || 27 ||
[Analyze grammar]

api kesariṇo yatra khelaṃti kalabhaiḥ samam |
phaṇinaḥ kekibarheṣu nirviśaṃkaṃ viśaṃti ca || 28 ||
[Analyze grammar]

yatrāśramāṃtare vipro vatsanāmā jiteṃdriyaḥ |
śāṃtaścaturdaśādhyāyaṃ japannāste niraṃtaram || 29 ||
[Analyze grammar]

tatra tacchiṣyapādābja prakṣālanajalaiḥ kṛte |
kardame nyapatadgatvā jīvaśeṣo muhuḥ śvasan || 30 ||
[Analyze grammar]

tataḥ kardamasaṃsparśamātranistīrṇa saṃsṛtiḥ |
divyaṃ vimānamāruhya niryayau śaśako divam || 31 ||
[Analyze grammar]

tataḥ śunyapi liptāṃgīstokaiḥ kardamabiṃdubhiḥ |
kṣutpipāsārtirahitā śunīrūpaṃ vihāya sā || 32 ||
[Analyze grammar]

tato divyāṃganāramyaṃ gaṃdharvairupaśobhitam |
divyaṃ vimānamāruhya śunyapi tridivaṃ yayau || 33 ||
[Analyze grammar]

tato jahāsa medhāvī śiṣyo nāmnā svakaṃdharaḥ |
vicārya vismitaḥ pūrvajanmavairasya kāraṇam || 34 ||
[Analyze grammar]

rājāpi paryapṛcchattaṃ vismayasmeralocanaḥ |
praṇamya parayā bhaktyā vinayaikapayonidhiḥ || 35 ||
[Analyze grammar]

kathāṃ kathaya me vipra hīnayoni niṣevitau |
ajñauyau jagmatuḥ svarge śunī śaśakaśāvakau || 36 ||
[Analyze grammar]

śiṣya uvāca |
vatsanāmā dvijanmāste vane'muṣminjiteṃdriyaḥ |
caturdaśaṃ tu hyadhyāyaṃ gītānāṃ sarvadā japan || 37 ||
[Analyze grammar]

śiṣyo'haṃ tasya bhūpāla brahmavidyāviśāradaḥ |
caturdaśa tu adhyāyaṃ japāmi pratyahaṃ nṛpa || 38 ||
[Analyze grammar]

madīyacaraṇāṃbhojaprakṣālanajale luṭhan |
śaśastridivamāpannaḥ śunakyā saha bhūpate || 39 ||
[Analyze grammar]

rājovāca |
hetunā kena kathaya hasitaṃ ca dvijottama |
ataḥ kimapi sākūtaṃ manyamānena sādaram || 40 ||
[Analyze grammar]

śiṣya uvāca |
mahārāṣṭreti nagaraṃ nāmnā pratyudakaṃ mahat |
tatrāsīdbrāhmaṇo nāmnā keśavaḥ kitavāgraṇīḥ || 41 ||
[Analyze grammar]

vilobhanābhavattasya jāyā svairavihāriṇī |
tena sā hanyate krodhādvairaṃ saṃciṃtya janmanaḥ || 42 ||
[Analyze grammar]

tataḥ strīvadhapāpena śaśako jāyate dvijaḥ |
kilbiṣācchunakī sāpi jātā vaṃcanajanmanaḥ || 43 ||
[Analyze grammar]

pūrveṇa janmanābhyastaṃ vairaṃ vismarato nahi |
āsedivadbhyāṃ bahudhā yonyaṃtaramapi kvacit || 44 ||
[Analyze grammar]

ityākalayya sakalaṃ bhūpālaḥ śraddhayānvitaḥ |
gītāmabhyasya sakalāmavāpa paramāṃ gatim || 45 ||
[Analyze grammar]

iti śrīpādmemahāpurāṇe paṃcapaṃcāśatsahasrasaṃhitāyāmuttarakhaṃḍe gītā |
māhātmye aṣṭāśītyadhikaśatatamo'dhyāyaḥ || 188 ||
[Analyze grammar]