Chapter 187

[English text for this chapter is available]

devyuvāca |
dvādaśādhyāyamāhātmyaṃ bhavatā kathitaṃ mama |
brūhi trayodaśādhyāyamāhātmyamatisuṃdaram || 1 ||
[Analyze grammar]

īśvara uvāca |
śṛṇu trayodaśādhyāyamahimāṃbhonidhiṃ śive |
yadākarṇanamātreṇa parāṃ mudamavāpsyasi || 2 ||
[Analyze grammar]

asti dakṣiṇadiṅmārge tuṃgabhadrā mahānadī |
tattaṭe nagaraṃ ramyaṃ nāmnā hariharaṃ puram || 3 ||
[Analyze grammar]

yatrā'ste bhagavāndevi devo hariharaḥ svayam |
yasya darśanamātreṇa paraṃ kalyāṇamāpyate || 4 ||
[Analyze grammar]

tasminpure dvijanmāsīddharidīkṣitasaṃjñikaḥ |
tapaḥ svādhyāyanirato śrotriyo vedapāragaḥ || 5 ||
[Analyze grammar]

durācāreti tasyāsīdbhāryā nāmnā ca karmaṇā |
na suṣvāpa samaṃ patyā durālāpā kadācana || 6 ||
[Analyze grammar]

kṣaṇamapyātmasadane na cāste svairacāriṇī |
kaṃṭhadaghnaṃ dvijadvāre dhayaṃtī vāruṇīrasam || 7 ||
[Analyze grammar]

patisaṃbadhinaḥ sarvāntarjayaṃtī punaḥ punaḥ |
viṭaiḥ saha sadonmattā ramamāṇā niraṃtaram || 8 ||
[Analyze grammar]

kadacidvyākulaṃ dṛṣṭvā puraṃ paurairitastataḥ |
saṃketagehamakarotkāṃtāre nirjane svayam || 9 ||
[Analyze grammar]

atha tatraiva sā dhūrtā ramamāṇā viṭaiḥ saha |
nināya sā bahūnkālānnijayauvanagarvitā || 10 ||
[Analyze grammar]

atha tasminpure ramye nivasaṃtyā niraṃkuśam |
vasaṃtakālaṃ samabhūtparaṃ citte bhuvaḥ sakhā || 11 ||
[Analyze grammar]

āmūlapallavākīrṇaṃ sahakāravikāriṇā |
pikānāṃ paṃcamālāpaiḥ punaḥ sa jīvitaḥ smaraḥ || 12 ||
[Analyze grammar]

sphuraccaṃpakasaurabhyahārakairmalayānilaiḥ |
maṃdaṃ maṃdaṃ prasarpadbhirāṃdolitavanadrumaḥ || 13 ||
[Analyze grammar]

utphullamallikāmoda madirāpāraṇāvatām |
alīnāṃ kalaṭaṃkāraiḥ samaṃtādrāvaśobhitaḥ || 14 ||
[Analyze grammar]

prasannacārubhiḥ smeraḥ sarovarasugaṃdhibhiḥ |
mīlanmarālanivahaiḥ sarobhiḥ prakaṭīkṛtaḥ || 15 ||
[Analyze grammar]

ghanacchāyāsukhāsīna hariṇārbhakadhāribhiḥ |
nīraṃdhrapallavairnānāśākhibhiḥ śobhitāvaniḥ || 16 ||
[Analyze grammar]

tasminvasaṃtasamaye muditā sābhisārikā |
apaśyajjagadānaṃdadāyinīṃ caṃdrikāṃ niśi || 17 ||
[Analyze grammar]

caṃcaccakoracaṃcvagragalatpīyūṣasīkarām |
dravadiṃduśilāniryatsudhānirjharanirbharām || 18 ||
[Analyze grammar]

vikāśikusumakroḍasāṃdrībhūtakarotkarām |
ullāsitapayorāśikallolāliṃgitāṃbarām || 19 ||
[Analyze grammar]

manobhavamahāsiṃhakulaṭākaṃṭhakartarīm |
ghanāṃdhakārasaṃdohavidāraṇapaṭīyasīm || 20 ||
[Analyze grammar]

śvetīkṛtasatīkāraparārthahimagarbhiṇīm |
mlānapaṃkajasaṃkocā dyūnāmānaṃdadāyinīm || 21 ||
[Analyze grammar]

cakravākavadhūvaktra karuṇākrośasākṣiṇīm |
muktāśreṇīviśuddhāṃśu prabhāsitadigaṃtarām || 22 ||
[Analyze grammar]

atha tasyāṃ prabhūtāyāṃ pūrayaṃtyā diśo daśa |
kāmāṃdhā kāminījātā pathisaudhavihāriṇī || 23 ||
[Analyze grammar]

apaśyaṃtī viṭānrātrau nirbhidya bhavanārgalam |
yayau saṃketabhavanaṃ nirgatya nagarādbahiḥ || 24 ||
[Analyze grammar]

tatra priyatamaṃ kaṃcitkāmamohitamānasā |
anveṣayaṃtī nādrākṣītkuṃje kuṃje tarau tarau || 25 ||
[Analyze grammar]

ākarṇayaṃtī kāṃtasya maṃdālāpānpade pade |
abhiyāti tataḥ krīḍanyatra saṃhārinisvanaḥ || 26 ||
[Analyze grammar]

cakravākaravānśrutvā kāṃtālāpabhramādasau |
sarovarāṇi sarvāṇi paryaṭaṃtī muhurmuhuḥ || 27 ||
[Analyze grammar]

kāṃtabhrāṃtyā tarutale prasuptānhariṇotkarān |
prabodhayaṃtī socchvāsamāgatāsmīti bhāṣiṇī || 28 ||
[Analyze grammar]

āliṃgaṃtī vanasthāṇuṃ jīvaneśvaraśaṃkayā |
tadānanabhramādbhūyaṃ cuṃbaṃtī vikacāṃbujam || 29 ||
[Analyze grammar]

tatratatra kṛtavyarthaśramādṛṣṭapriyāsvayam |
vilalāpa vane tasminmūrcchatī vividhoktibhiḥ |
hā kāṃta hā guṇākrāṃta maccaitanyasya nāyaka || 30 ||
[Analyze grammar]

he manoharasaubhāgya bhāgyalāvaṇyaśevadhe |
hā pūrṇacaṃdravadana hā sarojāyatekṣaṇa || 31 ||
[Analyze grammar]

hā kāṃtatatvasauhitya viśramāya suradruma |
yadi kopena kutrāpi guhyaveṣo'tra tiṣṭhasi || 32 ||
[Analyze grammar]

prasādayāmi tvāṃ kāṃta dattvā prāṇānpriyānapi |
ityuccaiḥ sarvato dikṣu vilapaṃtyā viyogataḥ || 33 ||
[Analyze grammar]

tasyāḥ śrutvā vacaḥ ko'pi supto vyāghraḥ prabuddhavān |
kurvanghuraghuradhvānaṃ paśyanpratidiśaṃ ruṣā || 34 ||
[Analyze grammar]

āsphālayannakhairbhūmiṃ garjannākāśagahvaram |
pṛṣṭhanirbhagnalāṃgūla drutamutthāya vegavān || 35 ||
[Analyze grammar]

gato vyāghraḥ samutpatya yatrāste sābhisārikā |
atha sāpi tamāyāṃtamālokya patiśaṃkayā || 36 ||
[Analyze grammar]

nirjagāma puraḥ sthātuṃ premamanirbharamānasā |
tatastasyanakhakrīḍākrūratāṃdhīkṛtā satī || 37 ||
[Analyze grammar]

jahau priyavapuḥ śaṃkāṃ śrutvā garjitamūrjjitam |
tathāvidhāpi sā nārī bhrāṃtimutsṛjyasatvaram || 38 ||
[Analyze grammar]

vyāghratvaṃ tu kuto hetormāṃ nihaṃtumihāgataḥ |
idaṃ sarvaṃ samākhyāhi yatastvaṃ haṃtumicchasi || 39 ||
[Analyze grammar]

iti tasyā vacaḥ śrutvā śārdūlaścaṃḍavikramaḥ |
kṣaṇaṃ vihāya tadgrāsamuvāca prahasanniva || 40 ||
[Analyze grammar]

malāpahā nadī nāmnā deśe tiṣṭhati dakṣiṇe |
nagarī muniparṇeti tasyā rodhasi vartate || 41 ||
[Analyze grammar]

tatrāste bhagavānsākṣātpaṃcaliṃgo maheśvaraḥ |
tasyāṃ puryāmahaṃ vipra putro bhūtvā sthitastataḥ || 42 ||
[Analyze grammar]

ayājyānyājayannaśnannekoddiṣṭe nadī taṭe |
vedapāṭhaphalaṃ śaśvadvikrīṇandhanakāṃkṣayā || 43 ||
[Analyze grammar]

bhikṣukānaparānlobhāttiraskurvanduruktibhiḥ |
adeyadraviṇaṃ gṛhṇannadattamaniśaṃ dinam || 44 ||
[Analyze grammar]

chalayansakalāṃllokānkṣaṇagrahaṇakautukāt |
tataḥ katipaye kāle jaraṭhatvamupāgataḥ || 45 ||
[Analyze grammar]

valīpalitavānaṃdhaḥ prapatanpraskhaladgatiḥ |
pataddaṃtobhavaṃ bhūyaḥ pratigrahaparāyaṇaḥ || 46 ||
[Analyze grammar]

haste gṛhīta darbho'hamagamaṃ tīrthasannidhim |
dhanagrahaṇalobhena bhramanparvasu parvasu || 47 ||
[Analyze grammar]

tato'haṃ śithilāṃgaḥ sankaṃcidbhūnirjarālayam |
gatavānyācitaṃ bhoktuṃ daṣṭo madhye pade śunā || 48 ||
[Analyze grammar]

apataṃ mūrchito bhūtvā tataḥ kṣititale kṣaṇāt |
tato'haṃ galitaprāṇo vyāghrayonimupāgataḥ || 49 ||
[Analyze grammar]

atra tiṣṭhāmi kāṃtāre pūrvapāpamanusmaran |
na bhakṣayāmi dharmiṣṭhānmunīnsādhujanānsatīḥ || 50 ||
[Analyze grammar]

kiṃtu pāpāndurācāranasatīrbhakṣayāmyaham |
ato'satitvaṃ tatvena mamaiva kavalāyase || 51 ||
[Analyze grammar]

ityuktvā svairnakhaiḥ kūraistāṃ vibhajyāṃgakhaṃḍaśaḥ |
athatāṃ bhakṣitāṃ tena pāpadehamupāśritām || 52 ||
[Analyze grammar]

yamasya kiṃkarā ninyuḥ sadyaḥ saṃyamanīṃ purīm |
yamādeśena tatrāpi pātayāmāsurāśu tām || 53 ||
[Analyze grammar]

viṇmūtraraktapūrṇeṣu ghorakuṃḍeṣvanekadhā |
kalpakoṭiṣu pītāsu tasmādānīya tāṃ muhuḥ || 54 ||
[Analyze grammar]

raurave sthāpayāmāsurmanvaṃtaraśatāvadhi |
tatopyākṛṣya tāṃ dīnāṃ rudatīṃ sarvatomukhīm || 55 ||
[Analyze grammar]

muktakeśāṃ bhagnagātrāṃ cikṣipurdahanānane |
evaṃ pāpaparāṃ ghorāṃ bhuktvā narakayātanām || 56 ||
[Analyze grammar]

iha jātā mahāpāpātpunaḥ śvapacayoniṣu |
tataḥ śvapacagehe'pi varddhamānā dinedine || 57 ||
[Analyze grammar]

pūrvajanmavaśenaiva tathaivāsīdyathā purā |
tataḥ katipaye kāle punaḥ svaṃbhavanaṃyayau || 58 ||
[Analyze grammar]

yatrāste jṛṃbhakādevī śivasyāṃtaḥ pureśvarī |
tatrāpaśyaddvijanmānaṃ vāsudevābhidhaṃ śucim || 59 ||
[Analyze grammar]

gītātrayodaśādhyāyamudgiraṃtamanāratam |
tatastacchravaṇādeva muktā śvapacavigrahāt || 60 ||
[Analyze grammar]

divyaṃ dehaṃ samāsādya jagāma tridaśālayam || 61 ||
[Analyze grammar]

iti śrīpādme mahāpurāṇe paṃcapaṃcāśatsahasrasaṃhitāyāmuttarakhaṃḍe gītā |
māhātmye saptāśītyadhikaśatatamo'dhyāyaḥ || 187 ||
[Analyze grammar]